| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8. කොට්‌ඨිකසුත්‌තං
8. Koṭṭhikasuttaṃ
133. බාරාණසියං විහරන්‌ති ඉසිපතනෙ මිගදායෙ. අථ ඛො ආයස්‌මා සාරිපුත්‌තො සායන්‌හසමයං…පෙ.… එකමන්‌තං නිසින්‌නො ඛො ආයස්‌මා සාරිපුත්‌තො ආයස්‌මන්‌තං මහාකොට්‌ඨිකං එතදවොච – ‘‘‘අවිජ්‌ජා, අවිජ්‌ජා’ති, ආවුසො කොට්‌ඨික, වුච්‌චති. කතමා නු ඛො, ආවුසො, අවිජ්‌ජා, කිත්‌තාවතා ච අවිජ්‌ජාගතො හොතී’’ති?
133. Bārāṇasiyaṃ viharanti isipatane migadāye. Atha kho āyasmā sāriputto sāyanhasamayaṃ…pe… ekamantaṃ nisinno kho āyasmā sāriputto āyasmantaṃ mahākoṭṭhikaṃ etadavoca – ‘‘‘avijjā, avijjā’ti, āvuso koṭṭhika, vuccati. Katamā nu kho, āvuso, avijjā, kittāvatā ca avijjāgato hotī’’ti?
‘‘ඉධාවුසො, අස්‌සුතවා පුථුජ්‌ජනො රූපස්‌ස අස්‌සාදඤ්‌ච ආදීනවඤ්‌ච නිස්‌සරණඤ්‌ච යථාභූතං නප්‌පජානාති. වෙදනාය…පෙ.… සඤ්‌ඤාය… සඞ්‌ඛාරානං… විඤ්‌ඤාණස්‌ස අස්‌සාදඤ්‌ච ආදීනවඤ්‌ච නිස්‌සරණඤ්‌ච යථාභූතං නප්‌පජානාති. අයං වුච්‌චතාවුසො, අවිජ්‌ජා; එත්‌තාවතා ච අවිජ්‌ජාගතො හොතී’’ති.
‘‘Idhāvuso, assutavā puthujjano rūpassa assādañca ādīnavañca nissaraṇañca yathābhūtaṃ nappajānāti. Vedanāya…pe… saññāya… saṅkhārānaṃ… viññāṇassa assādañca ādīnavañca nissaraṇañca yathābhūtaṃ nappajānāti. Ayaṃ vuccatāvuso, avijjā; ettāvatā ca avijjāgato hotī’’ti.
එවං වුත්‌තෙ, ආයස්‌මා සාරිපුත්‌තො ආයස්‌මන්‌තං මහාකොට්‌ඨිකං එතදවොච – ‘‘‘විජ්‌ජා, විජ්‌ජා’ති, ආවුසො කොට්‌ඨික, වුච්‌චති. කතමා නු ඛො, ආවුසො, විජ්‌ජා, කිත්‌තාවතා ච විජ්‌ජාගතො හොතී’’ති?
Evaṃ vutte, āyasmā sāriputto āyasmantaṃ mahākoṭṭhikaṃ etadavoca – ‘‘‘vijjā, vijjā’ti, āvuso koṭṭhika, vuccati. Katamā nu kho, āvuso, vijjā, kittāvatā ca vijjāgato hotī’’ti?
‘‘ඉධාවුසො සුතවා අරියසාවකො රූපස්‌ස අස්‌සාදඤ්‌ච ආදීනවඤ්‌ච නිස්‌සරණඤ්‌ච යථාභූතං පජානාති. වෙදනාය…පෙ.… සඤ්‌ඤාය… සඞ්‌ඛාරානං… විඤ්‌ඤාණස්‌ස අස්‌සාදඤ්‌ච ආදීනවඤ්‌ච නිස්‌සරණඤ්‌ච යථාභූතං පජානාති. අයං වුච්‌චතාවුසො, විජ්‌ජා; එත්‌තාවතා ච විජ්‌ජාගතො හොතී’’ති. අට්‌ඨමං.
‘‘Idhāvuso sutavā ariyasāvako rūpassa assādañca ādīnavañca nissaraṇañca yathābhūtaṃ pajānāti. Vedanāya…pe… saññāya… saṅkhārānaṃ… viññāṇassa assādañca ādīnavañca nissaraṇañca yathābhūtaṃ pajānāti. Ayaṃ vuccatāvuso, vijjā; ettāvatā ca vijjāgato hotī’’ti. Aṭṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1-10. සමුදයධම්‌මසුත්‌තාදිවණ්‌ණනා • 1-10. Samudayadhammasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1-10. සමුදයධම්‌මසුත්‌තාදිවණ්‌ණනා • 1-10. Samudayadhammasuttādivaṇṇanā
