| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༨. ཀོཊྛིཀསུཏྟཾ
8. Koṭṭhikasuttaṃ
༡༣༣. བཱརཱཎསིཡཾ ཝིཧརནྟི ཨིསིཔཏནེ མིགདཱཡེ། ཨཐ ཁོ ཨཱཡསྨཱ སཱརིཔུཏྟོ སཱཡནྷསམཡཾ…པེ॰… ཨེཀམནྟཾ ནིསིནྣོ ཁོ ཨཱཡསྨཱ སཱརིཔུཏྟོ ཨཱཡསྨནྟཾ མཧཱཀོཊྛིཀཾ ཨེཏདཝོཙ – ‘‘‘ཨཝིཛྫཱ, ཨཝིཛྫཱ’ཏི, ཨཱཝུསོ ཀོཊྛིཀ, ཝུཙྩཏི། ཀཏམཱ ནུ ཁོ, ཨཱཝུསོ, ཨཝིཛྫཱ, ཀིཏྟཱཝཏཱ ཙ ཨཝིཛྫཱགཏོ ཧོཏཱི’’ཏི?
133. Bārāṇasiyaṃ viharanti isipatane migadāye. Atha kho āyasmā sāriputto sāyanhasamayaṃ…pe… ekamantaṃ nisinno kho āyasmā sāriputto āyasmantaṃ mahākoṭṭhikaṃ etadavoca – ‘‘‘avijjā, avijjā’ti, āvuso koṭṭhika, vuccati. Katamā nu kho, āvuso, avijjā, kittāvatā ca avijjāgato hotī’’ti?
‘‘ཨིདྷཱཝུསོ, ཨསྶུཏཝཱ པུཐུཛྫནོ རཱུཔསྶ ཨསྶཱདཉྩ ཨཱདཱིནཝཉྩ ནིསྶརཎཉྩ ཡཐཱབྷཱུཏཾ ནཔྤཛཱནཱཏི། ཝེདནཱཡ…པེ॰… སཉྙཱཡ… སངྑཱརཱནཾ… ཝིཉྙཱཎསྶ ཨསྶཱདཉྩ ཨཱདཱིནཝཉྩ ནིསྶརཎཉྩ ཡཐཱབྷཱུཏཾ ནཔྤཛཱནཱཏི། ཨཡཾ ཝུཙྩཏཱཝུསོ, ཨཝིཛྫཱ; ཨེཏྟཱཝཏཱ ཙ ཨཝིཛྫཱགཏོ ཧོཏཱི’’ཏི།
‘‘Idhāvuso, assutavā puthujjano rūpassa assādañca ādīnavañca nissaraṇañca yathābhūtaṃ nappajānāti. Vedanāya…pe… saññāya… saṅkhārānaṃ… viññāṇassa assādañca ādīnavañca nissaraṇañca yathābhūtaṃ nappajānāti. Ayaṃ vuccatāvuso, avijjā; ettāvatā ca avijjāgato hotī’’ti.
ཨེཝཾ ཝུཏྟེ, ཨཱཡསྨཱ སཱརིཔུཏྟོ ཨཱཡསྨནྟཾ མཧཱཀོཊྛིཀཾ ཨེཏདཝོཙ – ‘‘‘ཝིཛྫཱ, ཝིཛྫཱ’ཏི, ཨཱཝུསོ ཀོཊྛིཀ, ཝུཙྩཏི། ཀཏམཱ ནུ ཁོ, ཨཱཝུསོ, ཝིཛྫཱ, ཀིཏྟཱཝཏཱ ཙ ཝིཛྫཱགཏོ ཧོཏཱི’’ཏི?
Evaṃ vutte, āyasmā sāriputto āyasmantaṃ mahākoṭṭhikaṃ etadavoca – ‘‘‘vijjā, vijjā’ti, āvuso koṭṭhika, vuccati. Katamā nu kho, āvuso, vijjā, kittāvatā ca vijjāgato hotī’’ti?
‘‘ཨིདྷཱཝུསོ སུཏཝཱ ཨརིཡསཱཝཀོ རཱུཔསྶ ཨསྶཱདཉྩ ཨཱདཱིནཝཉྩ ནིསྶརཎཉྩ ཡཐཱབྷཱུཏཾ པཛཱནཱཏི། ཝེདནཱཡ…པེ॰… སཉྙཱཡ… སངྑཱརཱནཾ… ཝིཉྙཱཎསྶ ཨསྶཱདཉྩ ཨཱདཱིནཝཉྩ ནིསྶརཎཉྩ ཡཐཱབྷཱུཏཾ པཛཱནཱཏི། ཨཡཾ ཝུཙྩཏཱཝུསོ, ཝིཛྫཱ; ཨེཏྟཱཝཏཱ ཙ ཝིཛྫཱགཏོ ཧོཏཱི’’ཏི། ཨཊྛམཾ།
‘‘Idhāvuso sutavā ariyasāvako rūpassa assādañca ādīnavañca nissaraṇañca yathābhūtaṃ pajānāti. Vedanāya…pe… saññāya… saṅkhārānaṃ… viññāṇassa assādañca ādīnavañca nissaraṇañca yathābhūtaṃ pajānāti. Ayaṃ vuccatāvuso, vijjā; ettāvatā ca vijjāgato hotī’’ti. Aṭṭhamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡-༡༠. སམུདཡདྷམྨསུཏྟཱདིཝཎྞནཱ • 1-10. Samudayadhammasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡-༡༠. སམུདཡདྷམྨསུཏྟཱདིཝཎྞནཱ • 1-10. Samudayadhammasuttādivaṇṇanā
