| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
९. कुहसुत्तं
9. Kuhasuttaṃ
१०८. वुत्तञ्हेतं भगवता, वुत्तमरहताति मे सुतं –
108. Vuttañhetaṃ bhagavatā, vuttamarahatāti me sutaṃ –
‘‘ये केचि, भिक्खवे, भिक्खू कुहा थद्धा लपा सिङ्गी उन्नळा असमाहिता, न मे ते , भिक्खवे, भिक्खू मामका। अपगता च ते, भिक्खवे, भिक्खू इमस्मा धम्मविनया; न च ते 1 इमस्मिं धम्मविनये वुद्धिं विरूळ्हिं वेपुल्लं आपज्जन्ति। ये च खो, भिक्खवे, भिक्खू निक्कुहा निल्लपा धीरा अत्थद्धा सुसमाहिता, ते खो मे, भिक्खवे, भिक्खू मामका। अनपगता च ते, भिक्खवे, भिक्खू इमस्मा धम्मविनया; ते च इमस्मिं धम्मविनये 2 वुद्धिं विरूळ्हिं वेपुल्लं आपज्जन्ती’’ति। एतमत्थं भगवा अवोच। तत्थेतं इति वुच्चति –
‘‘Ye keci, bhikkhave, bhikkhū kuhā thaddhā lapā siṅgī unnaḷā asamāhitā, na me te , bhikkhave, bhikkhū māmakā. Apagatā ca te, bhikkhave, bhikkhū imasmā dhammavinayā; na ca te 3 imasmiṃ dhammavinaye vuddhiṃ virūḷhiṃ vepullaṃ āpajjanti. Ye ca kho, bhikkhave, bhikkhū nikkuhā nillapā dhīrā atthaddhā susamāhitā, te kho me, bhikkhave, bhikkhū māmakā. Anapagatā ca te, bhikkhave, bhikkhū imasmā dhammavinayā; te ca imasmiṃ dhammavinaye 4 vuddhiṃ virūḷhiṃ vepullaṃ āpajjantī’’ti. Etamatthaṃ bhagavā avoca. Tatthetaṃ iti vuccati –
‘‘कुहा थद्धा लपा सिङ्गी, उन्नळा असमाहिता।
‘‘Kuhā thaddhā lapā siṅgī, unnaḷā asamāhitā;
न ते धम्मे विरूहन्ति, सम्मासम्बुद्धदेसिते॥
Na te dhamme virūhanti, sammāsambuddhadesite.
‘‘निक्कुहा निल्लपा धीरा, अत्थद्धा सुसमाहिता।
‘‘Nikkuhā nillapā dhīrā, atthaddhā susamāhitā;
ते वे धम्मे विरूहन्ति, सम्मासम्बुद्धदेसिते’’ति॥
Te ve dhamme virūhanti, sammāsambuddhadesite’’ti.
अयम्पि अत्थो वुत्तो भगवता, इति मे सुतन्ति। नवमं।
Ayampi attho vutto bhagavatā, iti me sutanti. Navamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ९. कुहसुत्तवण्णना • 9. Kuhasuttavaṇṇanā
