| Library / Tipiṭaka / తిపిటక • Tipiṭaka / ఇతివుత్తకపాళి • Itivuttakapāḷi |
౯. కుహసుత్తం
9. Kuhasuttaṃ
౧౦౮. వుత్తఞ్హేతం భగవతా, వుత్తమరహతాతి మే సుతం –
108. Vuttañhetaṃ bhagavatā, vuttamarahatāti me sutaṃ –
‘‘యే కేచి, భిక్ఖవే, భిక్ఖూ కుహా థద్ధా లపా సిఙ్గీ ఉన్నళా అసమాహితా, న మే తే , భిక్ఖవే, భిక్ఖూ మామకా. అపగతా చ తే, భిక్ఖవే, భిక్ఖూ ఇమస్మా ధమ్మవినయా; న చ తే 1 ఇమస్మిం ధమ్మవినయే వుద్ధిం విరూళ్హిం వేపుల్లం ఆపజ్జన్తి. యే చ ఖో, భిక్ఖవే, భిక్ఖూ నిక్కుహా నిల్లపా ధీరా అత్థద్ధా సుసమాహితా, తే ఖో మే, భిక్ఖవే, భిక్ఖూ మామకా. అనపగతా చ తే, భిక్ఖవే, భిక్ఖూ ఇమస్మా ధమ్మవినయా; తే చ ఇమస్మిం ధమ్మవినయే 2 వుద్ధిం విరూళ్హిం వేపుల్లం ఆపజ్జన్తీ’’తి. ఏతమత్థం భగవా అవోచ. తత్థేతం ఇతి వుచ్చతి –
‘‘Ye keci, bhikkhave, bhikkhū kuhā thaddhā lapā siṅgī unnaḷā asamāhitā, na me te , bhikkhave, bhikkhū māmakā. Apagatā ca te, bhikkhave, bhikkhū imasmā dhammavinayā; na ca te 3 imasmiṃ dhammavinaye vuddhiṃ virūḷhiṃ vepullaṃ āpajjanti. Ye ca kho, bhikkhave, bhikkhū nikkuhā nillapā dhīrā atthaddhā susamāhitā, te kho me, bhikkhave, bhikkhū māmakā. Anapagatā ca te, bhikkhave, bhikkhū imasmā dhammavinayā; te ca imasmiṃ dhammavinaye 4 vuddhiṃ virūḷhiṃ vepullaṃ āpajjantī’’ti. Etamatthaṃ bhagavā avoca. Tatthetaṃ iti vuccati –
‘‘కుహా థద్ధా లపా సిఙ్గీ, ఉన్నళా అసమాహితా;
‘‘Kuhā thaddhā lapā siṅgī, unnaḷā asamāhitā;
న తే ధమ్మే విరూహన్తి, సమ్మాసమ్బుద్ధదేసితే.
Na te dhamme virūhanti, sammāsambuddhadesite.
‘‘నిక్కుహా నిల్లపా ధీరా, అత్థద్ధా సుసమాహితా;
‘‘Nikkuhā nillapā dhīrā, atthaddhā susamāhitā;
తే వే ధమ్మే విరూహన్తి, సమ్మాసమ్బుద్ధదేసితే’’తి.
Te ve dhamme virūhanti, sammāsambuddhadesite’’ti.
అయమ్పి అత్థో వుత్తో భగవతా, ఇతి మే సుతన్తి. నవమం.
Ayampi attho vutto bhagavatā, iti me sutanti. Navamaṃ.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / ఖుద్దకనికాయ (అట్ఠకథా) • Khuddakanikāya (aṭṭhakathā) / ఇతివుత్తక-అట్ఠకథా • Itivuttaka-aṭṭhakathā / ౯. కుహసుత్తవణ్ణనా • 9. Kuhasuttavaṇṇanā
