| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. குஹஸுத்தவண்ணனா
6. Kuhasuttavaṇṇanā
26. ச²ட்டே² குஹகாதி ஸாமந்தஜப்பனாதி³னா குஹனவத்து²னா குஹகா, அஸந்தகு³ணஸம்பா⁴வனிச்சா²ய கோஹஞ்ஞங் கத்வா பரேஸங் வித்³த⁴ங்ஸகாதி அத்தோ². த²த்³தா⁴தி ‘‘கோத⁴னோ ஹோதி உபாயாஸப³ஹுலோ, அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதீ’’தி (அ॰ நி॰ 3.25, 27) ஏவங் வுத்தேன கோதே⁴ன ச, ‘‘து³ப்³ப³சோ ஹோதி தோ³வசஸ்ஸகரணேஹி த⁴ம்மேஹி ஸமன்னாக³தோ அக்க²மோ அப்பத³க்கி²ணக்³கா³ஹீ அனுஸாஸனி’’ந்தி (ம॰ நி॰ 1.181; பாரா॰ 426). ஏவங் வுத்தேன தோ³வசஸ்ஸேன ச, ‘‘ஜாதிமதோ³, கொ³த்தமதோ³, லாப⁴மதோ³, ஆரொக்³யமதோ³, யொப்³ப³னமதோ³, ஜீவிதமதோ³’’தி (விப⁴॰ 832) ஏவங் வுத்தஜாதிமதா³தி³பே⁴தே³ன மானேன ச க³ருகாதப்³பே³ஸு க³ரூஸுபி நிபச்சகாரங் அகத்வா அயோஸலாகங் கி³லித்வா டி²தா விய அனோனதா ஹுத்வா விசரணகா. தேனாஹ ‘‘கோதே⁴ன சா’’திஆதி³.
26. Chaṭṭhe kuhakāti sāmantajappanādinā kuhanavatthunā kuhakā, asantaguṇasambhāvanicchāya kohaññaṃ katvā paresaṃ viddhaṃsakāti attho. Thaddhāti ‘‘kodhano hoti upāyāsabahulo, appampi vutto samāno abhisajjati kuppati byāpajjati patitthīyatī’’ti (a. ni. 3.25, 27) evaṃ vuttena kodhena ca, ‘‘dubbaco hoti dovacassakaraṇehi dhammehi samannāgato akkhamo appadakkhiṇaggāhī anusāsani’’nti (ma. ni. 1.181; pārā. 426). Evaṃ vuttena dovacassena ca, ‘‘jātimado, gottamado, lābhamado, ārogyamado, yobbanamado, jīvitamado’’ti (vibha. 832) evaṃ vuttajātimadādibhedena mānena ca garukātabbesu garūsupi nipaccakāraṃ akatvā ayosalākaṃ gilitvā ṭhitā viya anonatā hutvā vicaraṇakā. Tenāha ‘‘kodhena cā’’tiādi.
உபலாபகாதி மிச்சா²ஜீவவஸேன குலஸங்க³ண்ஹகா. லபாதி பச்சயத்த²ங் பயுத்தவாசாவஸேன நிப்பேஸிகதாவஸேன லபகாதி அத்தோ². ஸிங்க³ந்தி ஸிங்கா³ரங். தஞ்ஹி குஸலஸ்ஸ விஜ்ஜ²னதோ ஸுட்டு² ஆஸேவிததாய ஸீஸே பரிக்கி²த்தங் ஸுனிப்³ப³த்தங் விஸாணங் விய தி²ரத்தா ச ஸிங்க³ங் வியாதி ஸிங்க³ங், நாக³ரிகபா⁴வஸங்கா²தஸ்ஸ கிலேஸஸிங்க³ஸ்ஸேதங் நாமங். ஸிங்கா³ரபா⁴வோ ஸிங்கா³ரதா, ஸிங்கா³ரகரணகஆகாரோ வா. சாதுரபா⁴வோ சாதுரதா. ததா² சாதுரியங். பரிக்க²தபா⁴வோ பரிக்க²ததா, பரிக²ணித்வா ட²பிதஸ்ஸேவ த³ள்ஹஸிங்கா³ரஸ்ஸேதங் நாமங். இதரங் தஸ்ஸேவ வேவசனங். ஏவங் ஸப்³பே³ஹி வாரேஹி கிலேஸஸிங்கா³ரதாவ கதி²தா.
Upalāpakāti micchājīvavasena kulasaṅgaṇhakā. Lapāti paccayatthaṃ payuttavācāvasena nippesikatāvasena lapakāti attho. Siṅganti siṅgāraṃ. Tañhi kusalassa vijjhanato suṭṭhu āsevitatāya sīse parikkhittaṃ sunibbattaṃ visāṇaṃ viya thirattā ca siṅgaṃ viyāti siṅgaṃ, nāgarikabhāvasaṅkhātassa kilesasiṅgassetaṃ nāmaṃ. Siṅgārabhāvo siṅgāratā, siṅgārakaraṇakaākāro vā. Cāturabhāvo cāturatā. Tathā cāturiyaṃ. Parikkhatabhāvo parikkhatatā, parikhaṇitvā ṭhapitasseva daḷhasiṅgārassetaṃ nāmaṃ. Itaraṃ tasseva vevacanaṃ. Evaṃ sabbehi vārehi kilesasiṅgāratāva kathitā.
உக்³க³தனளாதி நளஸதி³ஸங் துச்ச²மானங் உக்கி²பித்வா விசரணகா. தேனாஹ ‘‘துச்ச²மானங் உக்கி²பித்வா டி²தா’’தி. யஸ்மா தே குஹனாதி³யோக³தோ ந ஸம்மாபடிபன்னா, தஸ்மா ‘‘மம ஸந்தகா ந ஹொந்தீ’’தி வுத்தங். அபக³தாதி யதி³பி தே மம ஸாஸனே பப்³ப³ஜிதா, யதா²னுஸிட்ட²ங் பன அப்படிபஜ்ஜனதோ அபக³தா ஏவ இமஸ்மா த⁴ம்மவினயா, இதோ தே ஸுவிதூ³ரே டி²தாதி த³ஸ்ஸேதி. வுத்தஞ்ஹேதங் –
Uggatanaḷāti naḷasadisaṃ tucchamānaṃ ukkhipitvā vicaraṇakā. Tenāha ‘‘tucchamānaṃ ukkhipitvā ṭhitā’’ti. Yasmā te kuhanādiyogato na sammāpaṭipannā, tasmā ‘‘mama santakā na hontī’’ti vuttaṃ. Apagatāti yadipi te mama sāsane pabbajitā, yathānusiṭṭhaṃ pana appaṭipajjanato apagatā eva imasmā dhammavinayā, ito te suvidūre ṭhitāti dasseti. Vuttañhetaṃ –
‘‘நப⁴ஞ்ச தூ³ரே பத²வீ ச தூ³ரே,
‘‘Nabhañca dūre pathavī ca dūre,
பாரங் ஸமுத்³த³ஸ்ஸ ததா³ஹு தூ³ரே;
Pāraṃ samuddassa tadāhu dūre;
ததோ ஹவே தூ³ரதரங் வத³ந்தி,
Tato have dūrataraṃ vadanti,
ஸதஞ்ச த⁴ம்மோ அஸதஞ்ச ராஜா’’தி. (ஜா॰ 2.21.414);
Satañca dhammo asatañca rājā’’ti. (jā. 2.21.414);
ஸப்³ப³த்த² பத்த²டதாய வேபுல்லங் பாபுணந்தீதி ஸப்³ப³த்த² பத்த²டபா⁴வேன ஸீலாதி³த⁴ம்மக்க²ந்த⁴பாரிபூரியா வேபுல்லங் பாபுணந்தி.
Sabbatthapatthaṭatāya vepullaṃ pāpuṇantīti sabbattha patthaṭabhāvena sīlādidhammakkhandhapāripūriyā vepullaṃ pāpuṇanti.
குஹஸுத்தவண்ணனா நிட்டி²தா.
Kuhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. குஹஸுத்தங் • 6. Kuhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. குஹஸுத்தவண்ணனா • 6. Kuhasuttavaṇṇanā
