| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৬. কুহসুত্তৰণ্ণনা
6. Kuhasuttavaṇṇanā
২৬. ছট্ঠে কুহকাতি সামন্তজপ্পনাদিনা কুহনৰত্থুনা কুহকা, অসন্তগুণসম্ভাৰনিচ্ছায কোহঞ্ঞং কত্ৰা পরেসং ৰিদ্ধংসকাতি অত্থো। থদ্ধাতি ‘‘কোধনো হোতি উপাযাসবহুলো, অপ্পম্পি ৰুত্তো সমানো অভিসজ্জতি কুপ্পতি ব্যাপজ্জতি পতিত্থীযতী’’তি (অ॰ নি॰ ৩.২৫, ২৭) এৰং ৰুত্তেন কোধেন চ, ‘‘দুব্বচো হোতি দোৰচস্সকরণেহি ধম্মেহি সমন্নাগতো অক্খমো অপ্পদক্খিণগ্গাহী অনুসাসনি’’ন্তি (ম॰ নি॰ ১.১৮১; পারা॰ ৪২৬)। এৰং ৰুত্তেন দোৰচস্সেন চ, ‘‘জাতিমদো, গোত্তমদো, লাভমদো, আরোগ্যমদো, যোব্বনমদো, জীৰিতমদো’’তি (ৰিভ॰ ৮৩২) এৰং ৰুত্তজাতিমদাদিভেদেন মানেন চ গরুকাতব্বেসু গরূসুপি নিপচ্চকারং অকত্ৰা অযোসলাকং গিলিত্ৰা ঠিতা ৰিয অনোনতা হুত্ৰা ৰিচরণকা। তেনাহ ‘‘কোধেন চা’’তিআদি।
26. Chaṭṭhe kuhakāti sāmantajappanādinā kuhanavatthunā kuhakā, asantaguṇasambhāvanicchāya kohaññaṃ katvā paresaṃ viddhaṃsakāti attho. Thaddhāti ‘‘kodhano hoti upāyāsabahulo, appampi vutto samāno abhisajjati kuppati byāpajjati patitthīyatī’’ti (a. ni. 3.25, 27) evaṃ vuttena kodhena ca, ‘‘dubbaco hoti dovacassakaraṇehi dhammehi samannāgato akkhamo appadakkhiṇaggāhī anusāsani’’nti (ma. ni. 1.181; pārā. 426). Evaṃ vuttena dovacassena ca, ‘‘jātimado, gottamado, lābhamado, ārogyamado, yobbanamado, jīvitamado’’ti (vibha. 832) evaṃ vuttajātimadādibhedena mānena ca garukātabbesu garūsupi nipaccakāraṃ akatvā ayosalākaṃ gilitvā ṭhitā viya anonatā hutvā vicaraṇakā. Tenāha ‘‘kodhena cā’’tiādi.
উপলাপকাতি মিচ্ছাজীৰৰসেন কুলসঙ্গণ্হকা। লপাতি পচ্চযত্থং পযুত্তৰাচাৰসেন নিপ্পেসিকতাৰসেন লপকাতি অত্থো। সিঙ্গন্তি সিঙ্গারং। তঞ্হি কুসলস্স ৰিজ্ঝনতো সুট্ঠু আসেৰিততায সীসে পরিক্খিত্তং সুনিব্বত্তং ৰিসাণং ৰিয থিরত্তা চ সিঙ্গং ৰিযাতি সিঙ্গং, নাগরিকভাৰসঙ্খাতস্স কিলেসসিঙ্গস্সেতং নামং। সিঙ্গারভাৰো সিঙ্গারতা, সিঙ্গারকরণকআকারো ৰা। চাতুরভাৰো চাতুরতা। তথা চাতুরিযং। পরিক্খতভাৰো পরিক্খততা, পরিখণিত্ৰা ঠপিতস্সেৰ দল়্হসিঙ্গারস্সেতং নামং। ইতরং তস্সেৰ ৰেৰচনং। এৰং সব্বেহি ৰারেহি কিলেসসিঙ্গারতাৰ কথিতা।
Upalāpakāti micchājīvavasena kulasaṅgaṇhakā. Lapāti paccayatthaṃ payuttavācāvasena nippesikatāvasena lapakāti attho. Siṅganti siṅgāraṃ. Tañhi kusalassa vijjhanato suṭṭhu āsevitatāya sīse parikkhittaṃ sunibbattaṃ visāṇaṃ viya thirattā ca siṅgaṃ viyāti siṅgaṃ, nāgarikabhāvasaṅkhātassa kilesasiṅgassetaṃ nāmaṃ. Siṅgārabhāvo siṅgāratā, siṅgārakaraṇakaākāro vā. Cāturabhāvo cāturatā. Tathā cāturiyaṃ. Parikkhatabhāvo parikkhatatā, parikhaṇitvā ṭhapitasseva daḷhasiṅgārassetaṃ nāmaṃ. Itaraṃ tasseva vevacanaṃ. Evaṃ sabbehi vārehi kilesasiṅgāratāva kathitā.
উগ্গতনল়াতি নল়সদিসং তুচ্ছমানং উক্খিপিত্ৰা ৰিচরণকা। তেনাহ ‘‘তুচ্ছমানং উক্খিপিত্ৰা ঠিতা’’তি। যস্মা তে কুহনাদিযোগতো ন সম্মাপটিপন্না, তস্মা ‘‘মম সন্তকা ন হোন্তী’’তি ৰুত্তং। অপগতাতি যদিপি তে মম সাসনে পব্বজিতা, যথানুসিট্ঠং পন অপ্পটিপজ্জনতো অপগতা এৰ ইমস্মা ধম্মৰিনযা, ইতো তে সুৰিদূরে ঠিতাতি দস্সেতি। ৰুত্তঞ্হেতং –
Uggatanaḷāti naḷasadisaṃ tucchamānaṃ ukkhipitvā vicaraṇakā. Tenāha ‘‘tucchamānaṃ ukkhipitvā ṭhitā’’ti. Yasmā te kuhanādiyogato na sammāpaṭipannā, tasmā ‘‘mama santakā na hontī’’ti vuttaṃ. Apagatāti yadipi te mama sāsane pabbajitā, yathānusiṭṭhaṃ pana appaṭipajjanato apagatā eva imasmā dhammavinayā, ito te suvidūre ṭhitāti dasseti. Vuttañhetaṃ –
‘‘নভঞ্চ দূরে পথৰী চ দূরে,
‘‘Nabhañca dūre pathavī ca dūre,
পারং সমুদ্দস্স তদাহু দূরে।
Pāraṃ samuddassa tadāhu dūre;
ততো হৰে দূরতরং ৰদন্তি,
Tato have dūrataraṃ vadanti,
সতঞ্চ ধম্মো অসতঞ্চ রাজা’’তি॥ (জা॰ ২.২১.৪১৪)।
Satañca dhammo asatañca rājā’’ti. (jā. 2.21.414);
সব্বত্থ পত্থটতায ৰেপুল্লং পাপুণন্তীতি সব্বত্থ পত্থটভাৰেন সীলাদিধম্মক্খন্ধপারিপূরিযা ৰেপুল্লং পাপুণন্তি।
Sabbatthapatthaṭatāya vepullaṃ pāpuṇantīti sabbattha patthaṭabhāvena sīlādidhammakkhandhapāripūriyā vepullaṃ pāpuṇanti.
কুহসুত্তৰণ্ণনা নিট্ঠিতা।
Kuhasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৬. কুহসুত্তং • 6. Kuhasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৬. কুহসুত্তৰণ্ণনা • 6. Kuhasuttavaṇṇanā
