| Library / Tipiṭaka / ติปิฎก • Tipiṭaka / ชาตกปาฬิ • Jātakapāḷi |
๗. สตฺตกนิปาโต
7. Sattakanipāto
๑. กุกฺกุวโคฺค
1. Kukkuvaggo
๓๙๖. กุกฺกุชาตกํ (๗-๑-๑)
396. Kukkujātakaṃ (7-1-1)
๑.
1.
ทิยฑฺฒกุกฺกู อุทเยน กณฺณิกา, วิทตฺถิโย อฎฺฐ ปริกฺขิปนฺติ นํ;
Diyaḍḍhakukkū udayena kaṇṇikā, vidatthiyo aṭṭha parikkhipanti naṃ;
๒.
2.
ตาหิ สุสงฺคหิตา พลสา ปีฬิตา 9, สมํ ฐิตา อุปฺปริโต น ธํสติฯ
Tāhi susaṅgahitā balasā pīḷitā 10, samaṃ ṭhitā upparito na dhaṃsati.
๓.
3.
เอวมฺปิ มิเตฺตหิ ทเฬฺหหิ ปณฺฑิโต, อเภชฺชรูเปหิ สุจีหิ มนฺติภิ;
Evampi mittehi daḷhehi paṇḍito, abhejjarūpehi sucīhi mantibhi;
สุสงฺคหีโต สิริยา น ธํสติ, โคปาณสี ภารวหาว กณฺณิกาฯ
Susaṅgahīto siriyā na dhaṃsati, gopāṇasī bhāravahāva kaṇṇikā.
๔.
4.
ขรตฺตจํ เพลฺลํ ยถาปิ สตฺถวา, อนามสโนฺตปิ กโรติ ติตฺตกํ;
Kharattacaṃ bellaṃ yathāpi satthavā, anāmasantopi karoti tittakaṃ;
สมาหรํ สาทุํ กโรติ ปตฺถิว, อสาทุํ กยิรา ตนุพนฺธมุทฺธรํ 11ฯ
Samāharaṃ sāduṃ karoti patthiva, asāduṃ kayirā tanubandhamuddharaṃ 12.
๕.
5.
เอวมฺปิ คามนิคเมสุ ปณฺฑิโต, อสาหสํ ราชธนานิ สงฺฆรํ;
Evampi gāmanigamesu paṇḍito, asāhasaṃ rājadhanāni saṅgharaṃ;
ธมฺมานุวตฺตี ปฎิปชฺชมาโน, ส ผาติ กยิรา อวิเหฐยํ ปรํฯ
Dhammānuvattī paṭipajjamāno, sa phāti kayirā aviheṭhayaṃ paraṃ.
๖.
6.
โอทาตมูลํ สุจิวาริสมฺภวํ, ชาตํ ยถา โปกฺขรณีสุ อมฺพุชํ;
Odātamūlaṃ sucivārisambhavaṃ, jātaṃ yathā pokkharaṇīsu ambujaṃ;
ปทุมํ ยถา อคฺคินิกาสิผาลิมํ, น กทฺทโม น รโช น วาริ ลิมฺปติฯ
Padumaṃ yathā agginikāsiphālimaṃ, na kaddamo na rajo na vāri limpati.
๗.
7.
เอวมฺปิ โวหารสุจิํ อสาหสํ, วิสุทฺธกมฺมนฺตมเปตปาปกํ;
Evampi vohārasuciṃ asāhasaṃ, visuddhakammantamapetapāpakaṃ;
น ลิมฺปติ กมฺมกิเลส ตาทิโส, ชาตํ ยถา โปกฺขรณีสุ อมฺพุชนฺติฯ
Na limpati kammakilesa tādiso, jātaṃ yathā pokkharaṇīsu ambujanti.
กุกฺกุชาตกํ ปฐมํฯ
Kukkujātakaṃ paṭhamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ชาตก-อฎฺฐกถา • Jātaka-aṭṭhakathā / [๓๙๖] ๑. กุกฺกุชาตกวณฺณนา • [396] 1. Kukkujātakavaṇṇanā
