| Library / Tipiṭaka / තිපිටක • Tipiṭaka / ජාතකපාළි • Jātakapāḷi |
7. සත්‌තකනිපාතො
7. Sattakanipāto
1. කුක්‌කුවග්‌ගො
1. Kukkuvaggo
396. කුක්‌කුජාතකං (7-1-1)
396. Kukkujātakaṃ (7-1-1)
1.
1.
දියඩ්‌ඪකුක්‌කූ උදයෙන කණ්‌ණිකා, විදත්‌ථියො අට්‌ඨ පරික්‌ඛිපන්‌ති නං;
Diyaḍḍhakukkū udayena kaṇṇikā, vidatthiyo aṭṭha parikkhipanti naṃ;
2.
2.
තාහි සුසඞ්‌ගහිතා බලසා පීළිතා 9, සමං ඨිතා උප්‌පරිතො න ධංසති.
Tāhi susaṅgahitā balasā pīḷitā 10, samaṃ ṭhitā upparito na dhaṃsati.
3.
3.
එවම්‌පි මිත්‌තෙහි දළ්‌හෙහි පණ්‌ඩිතො, අභෙජ්‌ජරූපෙහි සුචීහි මන්‌තිභි;
Evampi mittehi daḷhehi paṇḍito, abhejjarūpehi sucīhi mantibhi;
සුසඞ්‌ගහීතො සිරියා න ධංසති, ගොපාණසී භාරවහාව කණ්‌ණිකා.
Susaṅgahīto siriyā na dhaṃsati, gopāṇasī bhāravahāva kaṇṇikā.
4.
4.
ඛරත්‌තචං බෙල්‌ලං යථාපි සත්‌ථවා, අනාමසන්‌තොපි කරොති තිත්‌තකං;
Kharattacaṃ bellaṃ yathāpi satthavā, anāmasantopi karoti tittakaṃ;
සමාහරං සාදුං කරොති පත්‌ථිව, අසාදුං කයිරා තනුබන්‌ධමුද්‌ධරං 11.
Samāharaṃ sāduṃ karoti patthiva, asāduṃ kayirā tanubandhamuddharaṃ 12.
5.
5.
එවම්‌පි ගාමනිගමෙසු පණ්‌ඩිතො, අසාහසං රාජධනානි සඞ්‌ඝරං;
Evampi gāmanigamesu paṇḍito, asāhasaṃ rājadhanāni saṅgharaṃ;
ධම්‌මානුවත්‌තී පටිපජ්‌ජමානො, ස ඵාති කයිරා අවිහෙඨයං පරං.
Dhammānuvattī paṭipajjamāno, sa phāti kayirā aviheṭhayaṃ paraṃ.
6.
6.
ඔදාතමූලං සුචිවාරිසම්‌භවං, ජාතං යථා පොක්‌ඛරණීසු අම්‌බුජං;
Odātamūlaṃ sucivārisambhavaṃ, jātaṃ yathā pokkharaṇīsu ambujaṃ;
පදුමං යථා අග්‌ගිනිකාසිඵාලිමං, න කද්‌දමො න රජො න වාරි ලිම්‌පති.
Padumaṃ yathā agginikāsiphālimaṃ, na kaddamo na rajo na vāri limpati.
7.
7.
එවම්‌පි වොහාරසුචිං අසාහසං, විසුද්‌ධකම්‌මන්‌තමපෙතපාපකං;
Evampi vohārasuciṃ asāhasaṃ, visuddhakammantamapetapāpakaṃ;
න ලිම්‌පති කම්‌මකිලෙස තාදිසො, ජාතං යථා පොක්‌ඛරණීසු අම්‌බුජන්‌ති.
Na limpati kammakilesa tādiso, jātaṃ yathā pokkharaṇīsu ambujanti.
කුක්‌කුජාතකං පඨමං.
Kukkujātakaṃ paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ජාතක-අට්‌ඨකථා • Jātaka-aṭṭhakathā / [396] 1. කුක්‌කුජාතකවණ්‌ණනා • [396] 1. Kukkujātakavaṇṇanā
