| Library / Tipiṭaka / திபிடக • Tipiṭaka / கதா²வத்து²பாளி • Kathāvatthupāḷi |
2. து³தியவக்³கோ³
2. Dutiyavaggo
(17) 8. குக்குளகதா²
(17) 8. Kukkuḷakathā
338. ஸப்³பே³ ஸங்கா²ரா அனோதி⁴ங் கத்வா குக்குளாதி? ஆமந்தா. நனு அத்தி² ஸுகா² வேத³னா, காயிகங் ஸுக²ங், சேதஸிகங் ஸுக²ங் , தி³ப்³ப³ங் ஸுக²ங், மானுஸகங் ஸுக²ங், லாப⁴ஸுக²ங், ஸக்காரஸுக²ங், யானஸுக²ங், ஸயனஸுக²ங், இஸ்ஸரியஸுக²ங், ஆதி⁴பச்சஸுக²ங், கி³ஹிஸுக²ங், ஸாமஞ்ஞஸுக²ங், ஸாஸவங் ஸுக²ங், அனாஸவங் ஸுக²ங், உபதி⁴ஸுக²ங், நிரூபதி⁴ஸுக²ங், ஸாமிஸங் ஸுக²ங், நிராமிஸங் ஸுக²ங், ஸப்பீதிகங் ஸுக²ங், நிப்பீதிகங் ஸுக²ங், ஜா²னஸுக²ங், விமுத்திஸுக²ங், காமஸுக²ங், நெக்க²ம்மஸுக²ங், விவேகஸுக²ங், உபஸமஸுக²ங், ஸம்போ³த⁴ஸுக²ந்தி? ஆமந்தா. ஹஞ்சி அத்தி² ஸுகா² வேத³னா…பே॰… ஸம்போ³த⁴ஸுக²ங், நோ ச வத ரே வத்தப்³பே³ – ‘‘ஸப்³பே³ ஸங்கா²ரா அனோதி⁴ங் கத்வா குக்குளா’’தி.
338. Sabbe saṅkhārā anodhiṃ katvā kukkuḷāti? Āmantā. Nanu atthi sukhā vedanā, kāyikaṃ sukhaṃ, cetasikaṃ sukhaṃ , dibbaṃ sukhaṃ, mānusakaṃ sukhaṃ, lābhasukhaṃ, sakkārasukhaṃ, yānasukhaṃ, sayanasukhaṃ, issariyasukhaṃ, ādhipaccasukhaṃ, gihisukhaṃ, sāmaññasukhaṃ, sāsavaṃ sukhaṃ, anāsavaṃ sukhaṃ, upadhisukhaṃ, nirūpadhisukhaṃ, sāmisaṃ sukhaṃ, nirāmisaṃ sukhaṃ, sappītikaṃ sukhaṃ, nippītikaṃ sukhaṃ, jhānasukhaṃ, vimuttisukhaṃ, kāmasukhaṃ, nekkhammasukhaṃ, vivekasukhaṃ, upasamasukhaṃ, sambodhasukhanti? Āmantā. Hañci atthi sukhā vedanā…pe… sambodhasukhaṃ, no ca vata re vattabbe – ‘‘sabbe saṅkhārā anodhiṃ katvā kukkuḷā’’ti.
ஸப்³பே³ ஸங்கா²ரா அனோதி⁴ங் கத்வா குக்குளாதி? ஆமந்தா. ஸப்³பே³ ஸங்கா²ரா து³க்கா² வேத³னா காயிகங் து³க்க²ங் சேதஸிகங் து³க்க²ங் ஸோகபரிதே³வது³க்க²தோ³மனஸ்ஸஉபாயாஸாதி? ந ஹேவங் வத்தப்³பே³.
Sabbe saṅkhārā anodhiṃ katvā kukkuḷāti? Āmantā. Sabbe saṅkhārā dukkhā vedanā kāyikaṃ dukkhaṃ cetasikaṃ dukkhaṃ sokaparidevadukkhadomanassaupāyāsāti? Na hevaṃ vattabbe.
ந வத்தப்³ப³ங் – ‘‘ஸப்³பே³ ஸங்கா²ரா அனோதி⁴ங் கத்வா குக்குளா’’தி? ஆமந்தா. நனு வுத்தங் ப⁴க³வதா – ‘‘ஸப்³ப³ங், பி⁴க்க²வே, ஆதி³த்தங்! கிஞ்ச, பி⁴க்க²வே, ஸப்³ப³ங் ஆதி³த்தங்? சக்கு²ங், பி⁴க்க²வே, ஆதி³த்தங், ரூபா ஆதி³த்தா, சக்கு²விஞ்ஞாணங் ஆதி³த்தங், சக்கு²ஸம்ப²ஸ்ஸோ ஆதி³த்தோ; யமித³ங் 1 சக்கு²ஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா, தம்பி ஆதி³த்தங். கேன ஆதி³த்தங்? ‘ராக³க்³கி³னா தோ³ஸக்³கி³னா மோஹக்³கி³னா ஆதி³த்தங், ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி ஆதி³த்த’ந்தி வதா³மி. ஸோதங் ஆதி³த்தங், ஸத்³தா³ ஆதி³த்தா…பே॰… கா⁴னங் ஆதி³த்தங், க³ந்தா⁴ ஆதி³த்தா…பே॰… ஜிவ்ஹா ஆதி³த்தா, ரஸா ஆதி³த்தா…பே॰… காயோ ஆதி³த்தோ, பொ²ட்ட²ப்³பா³ ஆதி³த்தா…பே॰… மனோ ஆதி³த்தோ, த⁴ம்மா ஆதி³த்தா, மனோவிஞ்ஞாணங் ஆதி³த்தங், மனோஸம்ப²ஸ்ஸோ ஆதி³த்தோ; யமித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா, தம்பி ஆதி³த்தங். கேன ஆதி³த்தங்? ‘ராக³க்³கி³னா தோ³ஸக்³கி³னா மோஹக்³கி³னா ஆதி³த்தங், ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி ஆதி³த்த’ந்தி வதா³மீ’’தி 2. அத்தே²வ ஸுத்தந்தோதி? ஆமந்தா. தேன ஹி வத்தப்³ப³ங் 3 – ‘‘ஸப்³பே³ ஸங்கா²ரா அனோதி⁴ங் கத்வா குக்குளா’’தி.
Na vattabbaṃ – ‘‘sabbe saṅkhārā anodhiṃ katvā kukkuḷā’’ti? Āmantā. Nanu vuttaṃ bhagavatā – ‘‘sabbaṃ, bhikkhave, ādittaṃ! Kiñca, bhikkhave, sabbaṃ ādittaṃ? Cakkhuṃ, bhikkhave, ādittaṃ, rūpā ādittā, cakkhuviññāṇaṃ ādittaṃ, cakkhusamphasso āditto; yamidaṃ 4 cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā, tampi ādittaṃ. Kena ādittaṃ? ‘Rāgagginā dosagginā mohagginā ādittaṃ, jātiyā jarāya maraṇena sokehi paridevehi dukkhehi domanassehi upāyāsehi āditta’nti vadāmi. Sotaṃ ādittaṃ, saddā ādittā…pe… ghānaṃ ādittaṃ, gandhā ādittā…pe… jivhā ādittā, rasā ādittā…pe… kāyo āditto, phoṭṭhabbā ādittā…pe… mano āditto, dhammā ādittā, manoviññāṇaṃ ādittaṃ, manosamphasso āditto; yamidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā, tampi ādittaṃ. Kena ādittaṃ? ‘Rāgagginā dosagginā mohagginā ādittaṃ, jātiyā jarāya maraṇena sokehi paridevehi dukkhehi domanassehi upāyāsehi āditta’nti vadāmī’’ti 5. Attheva suttantoti? Āmantā. Tena hi vattabbaṃ 6 – ‘‘sabbe saṅkhārā anodhiṃ katvā kukkuḷā’’ti.
ஸப்³பே³ ஸங்கா²ரா அனோதி⁴ங் கத்வா குக்குளாதி? ஆமந்தா. நனு வுத்தங் ப⁴க³வதா – ‘‘பஞ்சிமே, பி⁴க்க²வே, காமகு³ணா! கதமே பஞ்ச? சக்கு²விஞ்ஞெய்யா ரூபா இட்டா² கந்தா மனாபா பியரூபா காமூபஸங்ஹிதா ரஜனீயா, ஸோதவிஞ்ஞெய்யா ஸத்³தா³…பே॰… கா⁴னவிஞ்ஞெய்யா க³ந்தா⁴… ஜிவ்ஹாவிஞ்ஞெய்யா ரஸா… காயவிஞ்ஞெய்யா பொ²ட்ட²ப்³பா³ இட்டா² கந்தா மனாபா பியரூபா காமூபஸங்ஹிதா ரஜனீயா. இமே கோ², பி⁴க்க²வே, பஞ்ச காமகு³ணா’’தி 7. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ங் – ‘‘ஸப்³பே³ ஸங்கா²ரா அனோதி⁴ங் கத்வா குக்குளா’’தி.
Sabbe saṅkhārā anodhiṃ katvā kukkuḷāti? Āmantā. Nanu vuttaṃ bhagavatā – ‘‘pañcime, bhikkhave, kāmaguṇā! Katame pañca? Cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddā…pe… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā. Ime kho, bhikkhave, pañca kāmaguṇā’’ti 8. Attheva suttantoti? Āmantā. Tena hi na vattabbaṃ – ‘‘sabbe saṅkhārā anodhiṃ katvā kukkuḷā’’ti.
ந வத்தப்³ப³ங் – ‘‘ஸப்³பே³ ஸங்கா²ரா அனோதி⁴ங் கத்வா குக்குளா’’தி? ஆமந்தா. நனு வுத்தங் ப⁴க³வதா – ‘‘லாபா⁴ வோ, பி⁴க்க²வே, ஸுலத்³த⁴ங் வோ, பி⁴க்க²வே, க²ணோ வோ படிலத்³தோ⁴ 9 ப்³ரஹ்மசரியவாஸாய! தி³ட்டா² மயா, பி⁴க்க²வே, ச² ப²ஸ்ஸாயதனிகா நாம நிரயா. தத்த² யங் கிஞ்சி சக்கு²னா ரூபங் பஸ்ஸதி, அனிட்ட²ரூபஞ்ஞேவ பஸ்ஸதி நோ இட்ட²ரூபங், அகந்தரூபஞ்ஞேவ பஸ்ஸதி நோ கந்தரூபங், அமனாபரூபஞ்ஞேவ பஸ்ஸதி நோ மனாபரூபங். யங் கிஞ்சி ஸோதேன ஸத்³த³ங் ஸுணாதி…பே॰… கா⁴னேன க³ந்த⁴ங் கா⁴யதி… ஜிவ்ஹாய ரஸங் ஸாயதி… காயேன பொ²ட்ட²ப்³ப³ங் பு²ஸதி… மனஸா த⁴ம்மங் விஜானாதி, அனிட்ட²ரூபஞ்ஞேவ விஜானாதி நோ இட்ட²ரூபங், அகந்தரூபஞ்ஞேவ விஜானாதி நோ கந்தரூபங், அமனாபரூபஞ்ஞேவ விஜானாதி நோ மனாபரூப’’ந்தி 10. அத்தே²வ ஸுத்தந்தோதி? ஆமந்தா. தேன ஹி வத்தப்³ப³ங் 11 – ‘‘ஸப்³பே³ ஸங்கா²ரா அனோதி⁴ங் கத்வா குக்குளா’’தி.
Na vattabbaṃ – ‘‘sabbe saṅkhārā anodhiṃ katvā kukkuḷā’’ti? Āmantā. Nanu vuttaṃ bhagavatā – ‘‘lābhā vo, bhikkhave, suladdhaṃ vo, bhikkhave, khaṇo vo paṭiladdho 12 brahmacariyavāsāya! Diṭṭhā mayā, bhikkhave, cha phassāyatanikā nāma nirayā. Tattha yaṃ kiñci cakkhunā rūpaṃ passati, aniṭṭharūpaññeva passati no iṭṭharūpaṃ, akantarūpaññeva passati no kantarūpaṃ, amanāparūpaññeva passati no manāparūpaṃ. Yaṃ kiñci sotena saddaṃ suṇāti…pe… ghānena gandhaṃ ghāyati… jivhāya rasaṃ sāyati… kāyena phoṭṭhabbaṃ phusati… manasā dhammaṃ vijānāti, aniṭṭharūpaññeva vijānāti no iṭṭharūpaṃ, akantarūpaññeva vijānāti no kantarūpaṃ, amanāparūpaññeva vijānāti no manāparūpa’’nti 13. Attheva suttantoti? Āmantā. Tena hi vattabbaṃ 14 – ‘‘sabbe saṅkhārā anodhiṃ katvā kukkuḷā’’ti.
ஸப்³பே³ ஸங்கா²ரா அனோதி⁴ங் கத்வா குக்குளாதி? ஆமந்தா. நனு வுத்தங் ப⁴க³வதா – ‘‘லாபா⁴ வோ, பி⁴க்க²வே, ஸுலத்³த⁴ங் வோ, பி⁴க்க²வே, க²ணோ வோ படிலத்³தோ⁴ ப்³ரஹ்மசரியவாஸாய! தி³ட்டா² மயா, பி⁴க்க²வே, ச² ப²ஸ்ஸாயதனிகா நாம ஸக்³கா³. தத்த² யங் கிஞ்சி சக்கு²னா ரூபங் பஸ்ஸதி, இட்ட²ரூபஞ்ஞேவ பஸ்ஸதி நோ அனிட்ட²ரூபங், கந்தரூபஞ்ஞேவ பஸ்ஸதி நோ அகந்தரூபங், மனாபரூபஞ்ஞேவ பஸ்ஸதி நோ அமனாபரூபங். யங் கிஞ்சி ஸோதேன ஸத்³த³ங் ஸுணாதி…பே॰… கா⁴னேன க³ந்த⁴ங் கா⁴யதி… ஜிவ்ஹாய ரஸங் ஸாயதி… காயேன பொ²ட்ட²ப்³ப³ங் பு²ஸதி… மனஸா த⁴ம்மங் விஜானாதி, இட்ட²ரூபஞ்ஞேவ விஜானாதி நோ அனிட்ட²ரூபங், கந்தரூபஞ்ஞேவ விஜானாதி நோ அகந்தரூபங், மனாபரூபஞ்ஞேவ விஜானாதி நோ அமனாபரூப’’ந்தி 15. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ங் – ‘‘ஸப்³பே³ ஸங்கா²ரா அனோதி⁴ங் கத்வா குக்குளா’’தி.
Sabbe saṅkhārā anodhiṃ katvā kukkuḷāti? Āmantā. Nanu vuttaṃ bhagavatā – ‘‘lābhā vo, bhikkhave, suladdhaṃ vo, bhikkhave, khaṇo vo paṭiladdho brahmacariyavāsāya! Diṭṭhā mayā, bhikkhave, cha phassāyatanikā nāma saggā. Tattha yaṃ kiñci cakkhunā rūpaṃ passati, iṭṭharūpaññeva passati no aniṭṭharūpaṃ, kantarūpaññeva passati no akantarūpaṃ, manāparūpaññeva passati no amanāparūpaṃ. Yaṃ kiñci sotena saddaṃ suṇāti…pe… ghānena gandhaṃ ghāyati… jivhāya rasaṃ sāyati… kāyena phoṭṭhabbaṃ phusati… manasā dhammaṃ vijānāti, iṭṭharūpaññeva vijānāti no aniṭṭharūpaṃ, kantarūpaññeva vijānāti no akantarūpaṃ, manāparūpaññeva vijānāti no amanāparūpa’’nti 16. Attheva suttantoti? Āmantā. Tena hi na vattabbaṃ – ‘‘sabbe saṅkhārā anodhiṃ katvā kukkuḷā’’ti.
ந வத்தப்³ப³ங் – ‘‘ஸப்³பே³ ஸங்கா²ரா அனோதி⁴ங் கத்வா குக்குளா’’தி? ஆமந்தா. நனு ‘‘யத³னிச்சங் தங் து³க்க²ங் 17,’’ வுத்தங் ப⁴க³வதா, ‘‘ஸப்³பே³ ஸங்கா²ரா அனிச்சா’’தி 18? ஆமந்தா. ஹஞ்சி ‘‘யத³னிச்சங் தங் து³க்க²ங்,’’ வுத்தங் ப⁴க³வதா, ‘‘ஸப்³பே³ ஸங்கா²ரா அனிச்சா,’’ தேன வத ரே வத்தப்³பே³ – ‘‘ஸப்³பே³ ஸங்கா²ரா அனோதி⁴ங் கத்வா குக்குளா’’தி.
Na vattabbaṃ – ‘‘sabbe saṅkhārā anodhiṃ katvā kukkuḷā’’ti? Āmantā. Nanu ‘‘yadaniccaṃ taṃ dukkhaṃ 19,’’ vuttaṃ bhagavatā, ‘‘sabbe saṅkhārā aniccā’’ti 20? Āmantā. Hañci ‘‘yadaniccaṃ taṃ dukkhaṃ,’’ vuttaṃ bhagavatā, ‘‘sabbe saṅkhārā aniccā,’’ tena vata re vattabbe – ‘‘sabbe saṅkhārā anodhiṃ katvā kukkuḷā’’ti.
ஸப்³பே³ ஸங்கா²ரா அனோதி⁴ங் கத்வா குக்குளாதி? ஆமந்தா. தா³னங் அனிட்ட²ப²லங் அகந்தப²லங் அமனுஞ்ஞப²லங் ஸேசனகப²லங் து³க்கு²த்³ரயங் து³க்க²விபாகந்தி? ந ஹேவங் வத்தப்³பே³.
Sabbe saṅkhārā anodhiṃ katvā kukkuḷāti? Āmantā. Dānaṃ aniṭṭhaphalaṃ akantaphalaṃ amanuññaphalaṃ secanakaphalaṃ dukkhudrayaṃ dukkhavipākanti? Na hevaṃ vattabbe.
ஸீலங்…பே॰… உபோஸதோ²…பே॰… பா⁴வனா…பே॰… ப்³ரஹ்மசரியங் அனிட்ட²ப²லங் அகந்தப²லங் அமனுஞ்ஞப²லங் ஸேசனகப²லங் து³க்கு²த்³ரயங் து³க்க²விபாகந்தி? ந ஹேவங் வத்தப்³பே³.
Sīlaṃ…pe… uposatho…pe… bhāvanā…pe… brahmacariyaṃ aniṭṭhaphalaṃ akantaphalaṃ amanuññaphalaṃ secanakaphalaṃ dukkhudrayaṃ dukkhavipākanti? Na hevaṃ vattabbe.
நனு தா³னங் இட்ட²ப²லங் கந்தப²லங் மனுஞ்ஞப²லங் அஸேசனகப²லங் ஸுகு²த்³ரயங் ஸுக²விபாகந்தி ? ஆமந்தா. ஹஞ்சி தா³னங் இட்ட²ப²லங் கந்தப²லங் மனுஞ்ஞப²லங் அஸேசனகப²லங் ஸுகு²த்³ரயங் ஸுக²விபாகங், நோ ச வத ரே வத்தப்³பே³ – ‘‘ஸப்³பே³ ஸங்கா²ரா அனோதி⁴ங் கத்வா குக்குளா’’தி.
Nanu dānaṃ iṭṭhaphalaṃ kantaphalaṃ manuññaphalaṃ asecanakaphalaṃ sukhudrayaṃ sukhavipākanti ? Āmantā. Hañci dānaṃ iṭṭhaphalaṃ kantaphalaṃ manuññaphalaṃ asecanakaphalaṃ sukhudrayaṃ sukhavipākaṃ, no ca vata re vattabbe – ‘‘sabbe saṅkhārā anodhiṃ katvā kukkuḷā’’ti.
நனு ஸீலங்… உபோஸதோ²… பா⁴வனா… ப்³ரஹ்மசரியங் இட்ட²ப²லங் கந்தப²லங் மனுஞ்ஞப²லங் அஸேசனகப²லங் ஸுகு²த்³ரயங் ஸுக²விபாகந்தி? ஆமந்தா. ஹஞ்சி ப்³ரஹ்மசரியங் இட்ட²ப²லங் கந்தப²லங் மனுஞ்ஞப²லங் அஸேசனகப²லங் ஸுகு²த்³ரயங் ஸுக²விபாகந்தி, நோ ச வத ரே வத்தப்³பே³ – ‘‘ஸப்³பே³ ஸங்கா²ரா அனோதி⁴ங் கத்வா குக்குளா’’தி.
Nanu sīlaṃ… uposatho… bhāvanā… brahmacariyaṃ iṭṭhaphalaṃ kantaphalaṃ manuññaphalaṃ asecanakaphalaṃ sukhudrayaṃ sukhavipākanti? Āmantā. Hañci brahmacariyaṃ iṭṭhaphalaṃ kantaphalaṃ manuññaphalaṃ asecanakaphalaṃ sukhudrayaṃ sukhavipākanti, no ca vata re vattabbe – ‘‘sabbe saṅkhārā anodhiṃ katvā kukkuḷā’’ti.
ஸப்³பே³ ஸங்கா²ரா அனோதி⁴ங் கத்வா குக்குளாதி? ஆமந்தா. நனு வுத்தங் ப⁴க³வதா –
Sabbe saṅkhārā anodhiṃ katvā kukkuḷāti? Āmantā. Nanu vuttaṃ bhagavatā –
‘‘ஸுகோ² விவேகோ துட்ட²ஸ்ஸ, ஸுதத⁴ம்மஸ்ஸ பஸ்ஸதோ;
‘‘Sukho viveko tuṭṭhassa, sutadhammassa passato;
அப்³யாபஜ்ஜங் ஸுக²ங் லோகே, பாணபூ⁴தேஸு ஸங்யமோ.
Abyāpajjaṃ sukhaṃ loke, pāṇabhūtesu saṃyamo.
‘‘ஸுகா² விராக³தா லோகே, காமானங் ஸமதிக்கமோ;
‘‘Sukhā virāgatā loke, kāmānaṃ samatikkamo;
‘‘தங் ஸுகே²ன ஸுக²ங் பத்தங், அச்சந்தஸுக²மேவ தங்;
‘‘Taṃ sukhena sukhaṃ pattaṃ, accantasukhameva taṃ;
திஸ்ஸோ விஜ்ஜா அனுப்பத்தா, ஏதங் வே பரமங் ஸுக²’’ந்தி.
Tisso vijjā anuppattā, etaṃ ve paramaṃ sukha’’nti.
அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ங் – ‘‘ஸப்³பே³ ஸங்கா²ரா அனோதி⁴ங் கத்வா குக்குளா’’தி.
Attheva suttantoti? Āmantā. Tena hi na vattabbaṃ – ‘‘sabbe saṅkhārā anodhiṃ katvā kukkuḷā’’ti.
குக்குளகதா² நிட்டி²தா.
Kukkuḷakathā niṭṭhitā.
Footnotes:
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 8. குக்குளகதா²வண்ணனா • 8. Kukkuḷakathāvaṇṇanā
