| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၂. ဒုတိယဝဂ္ဂော
2. Dutiyavaggo
(၁၇) ၈. ကုက္ကုဠကထာ
(17) 8. Kukkuḷakathā
၃၃၈. သဗ္ဗေ သင္ခာရာ အနောဓိံ ကတ္ဝာ ကုက္ကုဠာတိ? အာမန္တာ။ နနု အတ္ထိ သုခာ ဝေဒနာ, ကာယိကံ သုခံ, စေတသိကံ သုခံ , ဒိဗ္ဗံ သုခံ, မာနုသကံ သုခံ, လာဘသုခံ, သက္ကာရသုခံ, ယာနသုခံ, သယနသုခံ, ဣသ္သရိယသုခံ, အာဓိပစ္စသုခံ, ဂိဟိသုခံ, သာမညသုခံ, သာသဝံ သုခံ, အနာသဝံ သုခံ, ဥပဓိသုခံ, နိရူပဓိသုခံ, သာမိသံ သုခံ, နိရာမိသံ သုခံ, သပ္ပီတိကံ သုခံ, နိပ္ပီတိကံ သုခံ, ဈာနသုခံ, ဝိမုတ္တိသုခံ, ကာမသုခံ, နေက္ခမ္မသုခံ, ဝိဝေကသုခံ, ဥပသမသုခံ, သမ္ဗောဓသုခန္တိ? အာမန္တာ။ ဟဉ္စိ အတ္ထိ သုခာ ဝေဒနာ။ပေ.။ သမ္ဗောဓသုခံ, နော စ ဝတ ရေ ဝတ္တဗ္ဗေ – ‘‘သဗ္ဗေ သင္ခာရာ အနောဓိံ ကတ္ဝာ ကုက္ကုဠာ’’တိ။
338. Sabbe saṅkhārā anodhiṃ katvā kukkuḷāti? Āmantā. Nanu atthi sukhā vedanā, kāyikaṃ sukhaṃ, cetasikaṃ sukhaṃ , dibbaṃ sukhaṃ, mānusakaṃ sukhaṃ, lābhasukhaṃ, sakkārasukhaṃ, yānasukhaṃ, sayanasukhaṃ, issariyasukhaṃ, ādhipaccasukhaṃ, gihisukhaṃ, sāmaññasukhaṃ, sāsavaṃ sukhaṃ, anāsavaṃ sukhaṃ, upadhisukhaṃ, nirūpadhisukhaṃ, sāmisaṃ sukhaṃ, nirāmisaṃ sukhaṃ, sappītikaṃ sukhaṃ, nippītikaṃ sukhaṃ, jhānasukhaṃ, vimuttisukhaṃ, kāmasukhaṃ, nekkhammasukhaṃ, vivekasukhaṃ, upasamasukhaṃ, sambodhasukhanti? Āmantā. Hañci atthi sukhā vedanā…pe… sambodhasukhaṃ, no ca vata re vattabbe – ‘‘sabbe saṅkhārā anodhiṃ katvā kukkuḷā’’ti.
သဗ္ဗေ သင္ခာရာ အနောဓိံ ကတ္ဝာ ကုက္ကုဠာတိ? အာမန္တာ။ သဗ္ဗေ သင္ခာရာ ဒုက္ခာ ဝေဒနာ ကာယိကံ ဒုက္ခံ စေတသိကံ ဒုက္ခံ သောကပရိဒေဝဒုက္ခဒောမနသ္သဥပာယာသာတိ? န ဟေဝံ ဝတ္တဗ္ဗေ။
Sabbe saṅkhārā anodhiṃ katvā kukkuḷāti? Āmantā. Sabbe saṅkhārā dukkhā vedanā kāyikaṃ dukkhaṃ cetasikaṃ dukkhaṃ sokaparidevadukkhadomanassaupāyāsāti? Na hevaṃ vattabbe.
န ဝတ္တဗ္ဗံ – ‘‘သဗ္ဗေ သင္ခာရာ အနောဓိံ ကတ္ဝာ ကုက္ကုဠာ’’တိ? အာမန္တာ။ နနု ဝုတ္တံ ဘဂဝတာ – ‘‘သဗ္ဗံ, ဘိက္ခဝေ, အာဒိတ္တံ! ကိဉ္စ, ဘိက္ခဝေ, သဗ္ဗံ အာဒိတ္တံ? စက္ခုံ, ဘိက္ခဝေ, အာဒိတ္တံ, ရူပာ အာဒိတ္တာ, စက္ခုဝိညာဏံ အာဒိတ္တံ, စက္ခုသမ္ဖသ္သော အာဒိတ္တော; ယမိဒံ 1 စက္ခုသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ, တမ္ပိ အာဒိတ္တံ။ ကေန အာဒိတ္တံ? ‘ရာဂဂ္ဂိနာ ဒောသဂ္ဂိနာ မောဟဂ္ဂိနာ အာဒိတ္တံ, ဇာတိယာ ဇရာယ မရဏေန သောကေဟိ ပရိဒေဝေဟိ ဒုက္ခေဟိ ဒောမနသ္သေဟိ ဥပာယာသေဟိ အာဒိတ္တ’န္တိ ဝဒာမိ။ သောတံ အာဒိတ္တံ, သဒ္ဒာ အာဒိတ္တာ။ပေ.။ ဃာနံ အာဒိတ္တံ, ဂန္ဓာ အာဒိတ္တာ။ပေ.။ ဇိဝ္ဟာ အာဒိတ္တာ, ရသာ အာဒိတ္တာ။ပေ.။ ကာယော အာဒိတ္တော, ဖောဋ္ဌဗ္ဗာ အာဒိတ္တာ။ပေ.။ မနော အာဒိတ္တော, ဓမ္မာ အာဒိတ္တာ, မနောဝိညာဏံ အာဒိတ္တံ, မနောသမ္ဖသ္သော အာဒိတ္တော; ယမိဒံ မနောသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ, တမ္ပိ အာဒိတ္တံ။ ကေန အာဒိတ္တံ? ‘ရာဂဂ္ဂိနာ ဒောသဂ္ဂိနာ မောဟဂ္ဂိနာ အာဒိတ္တံ, ဇာတိယာ ဇရာယ မရဏေန သောကေဟိ ပရိဒေဝေဟိ ဒုက္ခေဟိ ဒောမနသ္သေဟိ ဥပာယာသေဟိ အာဒိတ္တ’န္တိ ဝဒာမီ’’တိ 2။ အတ္ထေဝ သုတ္တန္တောတိ? အာမန္တာ။ တေန ဟိ ဝတ္တဗ္ဗံ 3 – ‘‘သဗ္ဗေ သင္ခာရာ အနောဓိံ ကတ္ဝာ ကုက္ကုဠာ’’တိ။
Na vattabbaṃ – ‘‘sabbe saṅkhārā anodhiṃ katvā kukkuḷā’’ti? Āmantā. Nanu vuttaṃ bhagavatā – ‘‘sabbaṃ, bhikkhave, ādittaṃ! Kiñca, bhikkhave, sabbaṃ ādittaṃ? Cakkhuṃ, bhikkhave, ādittaṃ, rūpā ādittā, cakkhuviññāṇaṃ ādittaṃ, cakkhusamphasso āditto; yamidaṃ 4 cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā, tampi ādittaṃ. Kena ādittaṃ? ‘Rāgagginā dosagginā mohagginā ādittaṃ, jātiyā jarāya maraṇena sokehi paridevehi dukkhehi domanassehi upāyāsehi āditta’nti vadāmi. Sotaṃ ādittaṃ, saddā ādittā…pe… ghānaṃ ādittaṃ, gandhā ādittā…pe… jivhā ādittā, rasā ādittā…pe… kāyo āditto, phoṭṭhabbā ādittā…pe… mano āditto, dhammā ādittā, manoviññāṇaṃ ādittaṃ, manosamphasso āditto; yamidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā, tampi ādittaṃ. Kena ādittaṃ? ‘Rāgagginā dosagginā mohagginā ādittaṃ, jātiyā jarāya maraṇena sokehi paridevehi dukkhehi domanassehi upāyāsehi āditta’nti vadāmī’’ti 5. Attheva suttantoti? Āmantā. Tena hi vattabbaṃ 6 – ‘‘sabbe saṅkhārā anodhiṃ katvā kukkuḷā’’ti.
သဗ္ဗေ သင္ခာရာ အနောဓိံ ကတ္ဝာ ကုက္ကုဠာတိ? အာမန္တာ။ နနု ဝုတ္တံ ဘဂဝတာ – ‘‘ပဉ္စိမေ, ဘိက္ခဝေ, ကာမဂုဏာ! ကတမေ ပဉ္စ? စက္ခုဝိညေယ္ယာ ရူပာ ဣဋ္ဌာ ကန္တာ မနာပာ ပိယရူပာ ကာမူပသံဟိတာ ရဇနီယာ, သောတဝိညေယ္ယာ သဒ္ဒာ။ပေ.။ ဃာနဝိညေယ္ယာ ဂန္ဓာ။ ဇိဝ္ဟာဝိညေယ္ယာ ရသာ။ ကာယဝိညေယ္ယာ ဖောဋ္ဌဗ္ဗာ ဣဋ္ဌာ ကန္တာ မနာပာ ပိယရူပာ ကာမူပသံဟိတာ ရဇနီယာ။ ဣမေ ခော, ဘိက္ခဝေ, ပဉ္စ ကာမဂုဏာ’’တိ 7။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘သဗ္ဗေ သင္ခာရာ အနောဓိံ ကတ္ဝာ ကုက္ကုဠာ’’တိ။
Sabbe saṅkhārā anodhiṃ katvā kukkuḷāti? Āmantā. Nanu vuttaṃ bhagavatā – ‘‘pañcime, bhikkhave, kāmaguṇā! Katame pañca? Cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddā…pe… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā. Ime kho, bhikkhave, pañca kāmaguṇā’’ti 8. Attheva suttantoti? Āmantā. Tena hi na vattabbaṃ – ‘‘sabbe saṅkhārā anodhiṃ katvā kukkuḷā’’ti.
န ဝတ္တဗ္ဗံ – ‘‘သဗ္ဗေ သင္ခာရာ အနောဓိံ ကတ္ဝာ ကုက္ကုဠာ’’တိ? အာမန္တာ။ နနု ဝုတ္တံ ဘဂဝတာ – ‘‘လာဘာ ဝော, ဘိက္ခဝေ, သုလဒ္ဓံ ဝော, ဘိက္ခဝေ, ခဏော ဝော ပဋိလဒ္ဓော 9 ဗ္ရဟ္မစရိယဝာသာယ! ဒိဋ္ဌာ မယာ, ဘိက္ခဝေ, ဆ ဖသ္သာယတနိကာ နာမ နိရယာ။ တတ္ထ ယံ ကိဉ္စိ စက္ခုနာ ရူပံ ပသ္သတိ, အနိဋ္ဌရူပညေဝ ပသ္သတိ နော ဣဋ္ဌရူပံ, အကန္တရူပညေဝ ပသ္သတိ နော ကန္တရူပံ, အမနာပရူပညေဝ ပသ္သတိ နော မနာပရူပံ။ ယံ ကိဉ္စိ သောတေန သဒ္ဒံ သုဏာတိ။ပေ.။ ဃာနေန ဂန္ဓံ ဃာယတိ။ ဇိဝ္ဟာယ ရသံ သာယတိ။ ကာယေန ဖောဋ္ဌဗ္ဗံ ဖုသတိ။ မနသာ ဓမ္မံ ဝိဇာနာတိ, အနိဋ္ဌရူပညေဝ ဝိဇာနာတိ နော ဣဋ္ဌရူပံ, အကန္တရူပညေဝ ဝိဇာနာတိ နော ကန္တရူပံ, အမနာပရူပညေဝ ဝိဇာနာတိ နော မနာပရူပ’’န္တိ 10။ အတ္ထေဝ သုတ္တန္တောတိ? အာမန္တာ။ တေန ဟိ ဝတ္တဗ္ဗံ 11 – ‘‘သဗ္ဗေ သင္ခာရာ အနောဓိံ ကတ္ဝာ ကုက္ကုဠာ’’တိ။
Na vattabbaṃ – ‘‘sabbe saṅkhārā anodhiṃ katvā kukkuḷā’’ti? Āmantā. Nanu vuttaṃ bhagavatā – ‘‘lābhā vo, bhikkhave, suladdhaṃ vo, bhikkhave, khaṇo vo paṭiladdho 12 brahmacariyavāsāya! Diṭṭhā mayā, bhikkhave, cha phassāyatanikā nāma nirayā. Tattha yaṃ kiñci cakkhunā rūpaṃ passati, aniṭṭharūpaññeva passati no iṭṭharūpaṃ, akantarūpaññeva passati no kantarūpaṃ, amanāparūpaññeva passati no manāparūpaṃ. Yaṃ kiñci sotena saddaṃ suṇāti…pe… ghānena gandhaṃ ghāyati… jivhāya rasaṃ sāyati… kāyena phoṭṭhabbaṃ phusati… manasā dhammaṃ vijānāti, aniṭṭharūpaññeva vijānāti no iṭṭharūpaṃ, akantarūpaññeva vijānāti no kantarūpaṃ, amanāparūpaññeva vijānāti no manāparūpa’’nti 13. Attheva suttantoti? Āmantā. Tena hi vattabbaṃ 14 – ‘‘sabbe saṅkhārā anodhiṃ katvā kukkuḷā’’ti.
သဗ္ဗေ သင္ခာရာ အနောဓိံ ကတ္ဝာ ကုက္ကုဠာတိ? အာမန္တာ။ နနု ဝုတ္တံ ဘဂဝတာ – ‘‘လာဘာ ဝော, ဘိက္ခဝေ, သုလဒ္ဓံ ဝော, ဘိက္ခဝေ, ခဏော ဝော ပဋိလဒ္ဓော ဗ္ရဟ္မစရိယဝာသာယ! ဒိဋ္ဌာ မယာ, ဘိက္ခဝေ, ဆ ဖသ္သာယတနိကာ နာမ သဂ္ဂာ။ တတ္ထ ယံ ကိဉ္စိ စက္ခုနာ ရူပံ ပသ္သတိ, ဣဋ္ဌရူပညေဝ ပသ္သတိ နော အနိဋ္ဌရူပံ, ကန္တရူပညေဝ ပသ္သတိ နော အကန္တရူပံ, မနာပရူပညေဝ ပသ္သတိ နော အမနာပရူပံ။ ယံ ကိဉ္စိ သောတေန သဒ္ဒံ သုဏာတိ။ပေ.။ ဃာနေန ဂန္ဓံ ဃာယတိ။ ဇိဝ္ဟာယ ရသံ သာယတိ။ ကာယေန ဖောဋ္ဌဗ္ဗံ ဖုသတိ။ မနသာ ဓမ္မံ ဝိဇာနာတိ, ဣဋ္ဌရူပညေဝ ဝိဇာနာတိ နော အနိဋ္ဌရူပံ, ကန္တရူပညေဝ ဝိဇာနာတိ နော အကန္တရူပံ, မနာပရူပညေဝ ဝိဇာနာတိ နော အမနာပရူပ’’န္တိ 15။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘သဗ္ဗေ သင္ခာရာ အနောဓိံ ကတ္ဝာ ကုက္ကုဠာ’’တိ။
Sabbe saṅkhārā anodhiṃ katvā kukkuḷāti? Āmantā. Nanu vuttaṃ bhagavatā – ‘‘lābhā vo, bhikkhave, suladdhaṃ vo, bhikkhave, khaṇo vo paṭiladdho brahmacariyavāsāya! Diṭṭhā mayā, bhikkhave, cha phassāyatanikā nāma saggā. Tattha yaṃ kiñci cakkhunā rūpaṃ passati, iṭṭharūpaññeva passati no aniṭṭharūpaṃ, kantarūpaññeva passati no akantarūpaṃ, manāparūpaññeva passati no amanāparūpaṃ. Yaṃ kiñci sotena saddaṃ suṇāti…pe… ghānena gandhaṃ ghāyati… jivhāya rasaṃ sāyati… kāyena phoṭṭhabbaṃ phusati… manasā dhammaṃ vijānāti, iṭṭharūpaññeva vijānāti no aniṭṭharūpaṃ, kantarūpaññeva vijānāti no akantarūpaṃ, manāparūpaññeva vijānāti no amanāparūpa’’nti 16. Attheva suttantoti? Āmantā. Tena hi na vattabbaṃ – ‘‘sabbe saṅkhārā anodhiṃ katvā kukkuḷā’’ti.
န ဝတ္တဗ္ဗံ – ‘‘သဗ္ဗေ သင္ခာရာ အနောဓိံ ကတ္ဝာ ကုက္ကုဠာ’’တိ? အာမန္တာ။ နနု ‘‘ယဒနိစ္စံ တံ ဒုက္ခံ 17,’’ ဝုတ္တံ ဘဂဝတာ, ‘‘သဗ္ဗေ သင္ခာရာ အနိစ္စာ’’တိ 18? အာမန္တာ။ ဟဉ္စိ ‘‘ယဒနိစ္စံ တံ ဒုက္ခံ,’’ ဝုတ္တံ ဘဂဝတာ, ‘‘သဗ္ဗေ သင္ခာရာ အနိစ္စာ,’’ တေန ဝတ ရေ ဝတ္တဗ္ဗေ – ‘‘သဗ္ဗေ သင္ခာရာ အနောဓိံ ကတ္ဝာ ကုက္ကုဠာ’’တိ။
Na vattabbaṃ – ‘‘sabbe saṅkhārā anodhiṃ katvā kukkuḷā’’ti? Āmantā. Nanu ‘‘yadaniccaṃ taṃ dukkhaṃ 19,’’ vuttaṃ bhagavatā, ‘‘sabbe saṅkhārā aniccā’’ti 20? Āmantā. Hañci ‘‘yadaniccaṃ taṃ dukkhaṃ,’’ vuttaṃ bhagavatā, ‘‘sabbe saṅkhārā aniccā,’’ tena vata re vattabbe – ‘‘sabbe saṅkhārā anodhiṃ katvā kukkuḷā’’ti.
သဗ္ဗေ သင္ခာရာ အနောဓိံ ကတ္ဝာ ကုက္ကုဠာတိ? အာမန္တာ။ ဒာနံ အနိဋ္ဌဖလံ အကန္တဖလံ အမနုညဖလံ သေစနကဖလံ ဒုက္ခုဒ္ရယံ ဒုက္ခဝိပာကန္တိ? န ဟေဝံ ဝတ္တဗ္ဗေ။
Sabbe saṅkhārā anodhiṃ katvā kukkuḷāti? Āmantā. Dānaṃ aniṭṭhaphalaṃ akantaphalaṃ amanuññaphalaṃ secanakaphalaṃ dukkhudrayaṃ dukkhavipākanti? Na hevaṃ vattabbe.
သီလံ။ပေ.။ ဥပောသထော။ပေ.။ ဘာဝနာ။ပေ.။ ဗ္ရဟ္မစရိယံ အနိဋ္ဌဖလံ အကန္တဖလံ အမနုညဖလံ သေစနကဖလံ ဒုက္ခုဒ္ရယံ ဒုက္ခဝိပာကန္တိ? န ဟေဝံ ဝတ္တဗ္ဗေ။
Sīlaṃ…pe… uposatho…pe… bhāvanā…pe… brahmacariyaṃ aniṭṭhaphalaṃ akantaphalaṃ amanuññaphalaṃ secanakaphalaṃ dukkhudrayaṃ dukkhavipākanti? Na hevaṃ vattabbe.
နနု ဒာနံ ဣဋ္ဌဖလံ ကန္တဖလံ မနုညဖလံ အသေစနကဖလံ သုခုဒ္ရယံ သုခဝိပာကန္တိ ? အာမန္တာ။ ဟဉ္စိ ဒာနံ ဣဋ္ဌဖလံ ကန္တဖလံ မနုညဖလံ အသေစနကဖလံ သုခုဒ္ရယံ သုခဝိပာကံ, နော စ ဝတ ရေ ဝတ္တဗ္ဗေ – ‘‘သဗ္ဗေ သင္ခာရာ အနောဓိံ ကတ္ဝာ ကုက္ကုဠာ’’တိ။
Nanu dānaṃ iṭṭhaphalaṃ kantaphalaṃ manuññaphalaṃ asecanakaphalaṃ sukhudrayaṃ sukhavipākanti ? Āmantā. Hañci dānaṃ iṭṭhaphalaṃ kantaphalaṃ manuññaphalaṃ asecanakaphalaṃ sukhudrayaṃ sukhavipākaṃ, no ca vata re vattabbe – ‘‘sabbe saṅkhārā anodhiṃ katvā kukkuḷā’’ti.
နနု သီလံ။ ဥပောသထော။ ဘာဝနာ။ ဗ္ရဟ္မစရိယံ ဣဋ္ဌဖလံ ကန္တဖလံ မနုညဖလံ အသေစနကဖလံ သုခုဒ္ရယံ သုခဝိပာကန္တိ? အာမန္တာ။ ဟဉ္စိ ဗ္ရဟ္မစရိယံ ဣဋ္ဌဖလံ ကန္တဖလံ မနုညဖလံ အသေစနကဖလံ သုခုဒ္ရယံ သုခဝိပာကန္တိ, နော စ ဝတ ရေ ဝတ္တဗ္ဗေ – ‘‘သဗ္ဗေ သင္ခာရာ အနောဓိံ ကတ္ဝာ ကုက္ကုဠာ’’တိ။
Nanu sīlaṃ… uposatho… bhāvanā… brahmacariyaṃ iṭṭhaphalaṃ kantaphalaṃ manuññaphalaṃ asecanakaphalaṃ sukhudrayaṃ sukhavipākanti? Āmantā. Hañci brahmacariyaṃ iṭṭhaphalaṃ kantaphalaṃ manuññaphalaṃ asecanakaphalaṃ sukhudrayaṃ sukhavipākanti, no ca vata re vattabbe – ‘‘sabbe saṅkhārā anodhiṃ katvā kukkuḷā’’ti.
သဗ္ဗေ သင္ခာရာ အနောဓိံ ကတ္ဝာ ကုက္ကုဠာတိ? အာမန္တာ။ နနု ဝုတ္တံ ဘဂဝတာ –
Sabbe saṅkhārā anodhiṃ katvā kukkuḷāti? Āmantā. Nanu vuttaṃ bhagavatā –
‘‘သုခော ဝိဝေကော တုဋ္ဌသ္သ၊ သုတဓမ္မသ္သ ပသ္သတော။
‘‘Sukho viveko tuṭṭhassa, sutadhammassa passato;
အဗ္ယာပဇ္ဇံ သုခံ လောကေ၊ ပာဏဘူတေသု သံယမော။
Abyāpajjaṃ sukhaṃ loke, pāṇabhūtesu saṃyamo.
‘‘သုခာ ဝိရာဂတာ လောကေ၊ ကာမာနံ သမတိက္ကမော။
‘‘Sukhā virāgatā loke, kāmānaṃ samatikkamo;
‘‘တံ သုခေန သုခံ ပတ္တံ၊ အစ္စန္တသုခမေဝ တံ။
‘‘Taṃ sukhena sukhaṃ pattaṃ, accantasukhameva taṃ;
တိသ္သော ဝိဇ္ဇာ အနုပ္ပတ္တာ၊ ဧတံ ဝေ ပရမံ သုခ’’န္တိ။
Tisso vijjā anuppattā, etaṃ ve paramaṃ sukha’’nti.
အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘သဗ္ဗေ သင္ခာရာ အနောဓိံ ကတ္ဝာ ကုက္ကုဠာ’’တိ။
Attheva suttantoti? Āmantā. Tena hi na vattabbaṃ – ‘‘sabbe saṅkhārā anodhiṃ katvā kukkuḷā’’ti.
ကုက္ကုဠကထာ နိဋ္ဌိတာ။
Kukkuḷakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၈. ကုက္ကုဠကထာဝဏ္ဏနာ • 8. Kukkuḷakathāvaṇṇanā
