| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
13. குலதூ³ஸகஸிக்கா²பத³ங்
13. Kuladūsakasikkhāpadaṃ
431. 1 தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஸ்ஸஜிபுனப்³ப³ஸுகா நாம 2 கீடாகி³ரிஸ்மிங் ஆவாஸிகா ஹொந்தி அலஜ்ஜினோ பாபபி⁴க்கூ². தே 3 ஏவரூபங் அனாசாரங் ஆசரந்தி – மாலாவச்ச²ங் ரோபெந்திபி ரோபாபெந்திபி, ஸிஞ்சந்திபி ஸிஞ்சாபெந்திபி, ஓசினந்திபி ஓசினாபெந்திபி, க³ந்தெ²ந்திபி க³ந்தா²பெந்திபி, ஏகதோவண்டிகமாலங் கரொந்திபி காராபெந்திபி, உப⁴தோவண்டிகமாலங் கரொந்திபி காராபெந்திபி, மஞ்ஜரிகங் கரொந்திபி காராபெந்திபி, விதூ⁴திகங் கரொந்திபி காராபெந்திபி, வடங்ஸகங் கரொந்திபி காராபெந்திபி, ஆவேளங் கரொந்திபி காராபெந்திபி, உரச்ச²த³ங் கரொந்திபி காராபெந்திபி. தே குலித்தீ²னங் குலதீ⁴தானங் குலகுமாரீனங் குலஸுண்ஹானங் குலதா³ஸீனங் ஏகதோவண்டிகமாலங் ஹரந்திபி ஹராபெந்திபி, உப⁴தோவண்டிகமாலங் ஹரந்திபி ஹராபெந்திபி, மஞ்ஜரிகங் ஹரந்திபி ஹராபெந்திபி, விதூ⁴திகங் ஹரந்திபி ஹராபெந்திபி, வடங்ஸகங் ஹரந்திபி ஹராபெந்திபி, ஆவேளங் ஹரந்திபி ஹராபெந்திபி, உரச்ச²த³ங் ஹரந்திபி ஹராபெந்திபி. தே குலித்தீ²ஹி குலதீ⁴தாஹி குலகுமாரீஹி குலஸுண்ஹாஹி குலதா³ஸீஹி ஸத்³தி⁴ங் ஏகபா⁴ஜனேபி பு⁴ஞ்ஜந்தி, ஏகதா²லகேபி பிவந்தி, ஏகாஸனேபி நிஸீத³ந்தி, ஏகமஞ்சேபி துவட்டெந்தி, ஏகத்த²ரணாபி துவட்டெந்தி, ஏகபாவுரணாபி துவட்டெந்தி, ஏகத்த²ரணபாவுரணாபி துவட்டெந்தி, விகாலேபி பு⁴ஞ்ஜந்தி, மஜ்ஜம்பி பிவந்தி, மாலாக³ந்த⁴விலேபனம்பி தா⁴ரெந்தி, நச்சந்திபி கா³யந்திபி வாதெ³ந்திபி லாஸெந்திபி, நச்சந்தியாபி நச்சந்தி, நச்சந்தியாபி கா³யந்தி, நச்சந்தியாபி வாதெ³ந்தி, நச்சந்தியாபி லாஸெந்தி, கா³யந்தியாபி நச்சந்தி, கா³யந்தியாபி கா³யந்தி, கா³யந்தியாபி வாதெ³ந்தி, கா³யந்தியாபி லாஸெந்தி, வாதெ³ந்தியாபி நச்சந்தி, வாதெ³ந்தியாபி கா³யந்தி, வாதெ³ந்தியாபி வாதெ³ந்தி, வாதெ³ந்தியாபி லாஸெந்தி, லாஸெந்தியாபி நச்சந்தி, லாஸெந்தியாபி கா³யந்தி, லாஸெந்தியாபி வாதெ³ந்தி, லாஸெந்தியாபி லாஸெந்தி. அட்ட²பதே³பி கீளந்தி, த³ஸபதே³பி கீளந்தி, ஆகாஸேபி கீளந்தி, பரிஹாரபதே²பி கீளந்தி, ஸந்திகாயபி கீளந்தி, க²லிகாயபி கீளந்தி, க⁴டிகாயபி கீளந்தி, ஸலாகஹத்தே²னபி கீளந்தி, அக்கே²னபி கீளந்தி, பங்க³சீரேனபி கீளந்தி, வங்ககேனபி கீளந்தி, மொக்க²சிகாயபி கீளந்தி, சிங்கு³லகேனபி கீளந்தி, பத்தாள்ஹகேனபி கீளந்தி, ரத²கேனபி கீளந்தி, த⁴னுகேனபி கீளந்தி, அக்க²ரிகாயபி கீளந்தி, மனேஸிகாயபி கீளந்தி, யதா²வஜ்ஜேனபி கீளந்தி. ஹத்தி²ஸ்மிம்பி ஸிக்க²ந்தி, அஸ்ஸஸ்மிம்பி ஸிக்க²ந்தி, ரத²ஸ்மிம்பி ஸிக்க²ந்தி, த⁴னுஸ்மிம்பி ஸிக்க²ந்தி, த²ருஸ்மிம்பி ஸிக்க²ந்தி, ஹத்தி²ஸ்ஸபி புரதோ தா⁴வந்தி, அஸ்ஸஸ்ஸபி புரதோ தா⁴வந்தி, ரத²ஸ்ஸபி புரதோ 4 தா⁴வந்திபி ஆதா⁴வந்திபி, உஸ்ஸேளெந்திபி, அப்போ²டெந்திபி, நிப்³பு³ஜ்ஜ²ந்திபி, முட்டீ²ஹிபி யுஜ்ஜ²ந்தி, ரங்க³மஜ்ஜே²பி ஸங்கா⁴டிங் பத்த²ரித்வா நச்சகிங் 5 ஏவங் வத³ந்தி – இத⁴, ப⁴கி³னி, நச்சஸ்ஸூதி, நலாடிகம்பி தெ³ந்தி, விவித⁴ம்பி அனாசாரங் ஆசரந்தி.
431.6 Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena assajipunabbasukā nāma 7 kīṭāgirismiṃ āvāsikā honti alajjino pāpabhikkhū. Te 8 evarūpaṃ anācāraṃ ācaranti – mālāvacchaṃ ropentipi ropāpentipi, siñcantipi siñcāpentipi, ocinantipi ocināpentipi, ganthentipi ganthāpentipi, ekatovaṇṭikamālaṃ karontipi kārāpentipi, ubhatovaṇṭikamālaṃ karontipi kārāpentipi, mañjarikaṃ karontipi kārāpentipi, vidhūtikaṃ karontipi kārāpentipi, vaṭaṃsakaṃ karontipi kārāpentipi, āveḷaṃ karontipi kārāpentipi, uracchadaṃ karontipi kārāpentipi. Te kulitthīnaṃ kuladhītānaṃ kulakumārīnaṃ kulasuṇhānaṃ kuladāsīnaṃ ekatovaṇṭikamālaṃ harantipi harāpentipi, ubhatovaṇṭikamālaṃ harantipi harāpentipi, mañjarikaṃ harantipi harāpentipi, vidhūtikaṃ harantipi harāpentipi, vaṭaṃsakaṃ harantipi harāpentipi, āveḷaṃ harantipi harāpentipi, uracchadaṃ harantipi harāpentipi. Te kulitthīhi kuladhītāhi kulakumārīhi kulasuṇhāhi kuladāsīhi saddhiṃ ekabhājanepi bhuñjanti, ekathālakepi pivanti, ekāsanepi nisīdanti, ekamañcepi tuvaṭṭenti, ekattharaṇāpi tuvaṭṭenti, ekapāvuraṇāpi tuvaṭṭenti, ekattharaṇapāvuraṇāpi tuvaṭṭenti, vikālepi bhuñjanti, majjampi pivanti, mālāgandhavilepanampi dhārenti, naccantipi gāyantipi vādentipi lāsentipi, naccantiyāpi naccanti, naccantiyāpi gāyanti, naccantiyāpi vādenti, naccantiyāpi lāsenti, gāyantiyāpi naccanti, gāyantiyāpi gāyanti, gāyantiyāpi vādenti, gāyantiyāpi lāsenti, vādentiyāpi naccanti, vādentiyāpi gāyanti, vādentiyāpi vādenti, vādentiyāpi lāsenti, lāsentiyāpi naccanti, lāsentiyāpi gāyanti, lāsentiyāpi vādenti, lāsentiyāpi lāsenti. Aṭṭhapadepi kīḷanti, dasapadepi kīḷanti, ākāsepi kīḷanti, parihārapathepi kīḷanti, santikāyapi kīḷanti, khalikāyapi kīḷanti, ghaṭikāyapi kīḷanti, salākahatthenapi kīḷanti, akkhenapi kīḷanti, paṅgacīrenapi kīḷanti, vaṅkakenapi kīḷanti, mokkhacikāyapi kīḷanti, ciṅgulakenapi kīḷanti, pattāḷhakenapi kīḷanti, rathakenapi kīḷanti, dhanukenapi kīḷanti, akkharikāyapi kīḷanti, manesikāyapi kīḷanti, yathāvajjenapi kīḷanti. Hatthismimpi sikkhanti, assasmimpi sikkhanti, rathasmimpi sikkhanti, dhanusmimpi sikkhanti, tharusmimpi sikkhanti, hatthissapi purato dhāvanti, assassapi purato dhāvanti, rathassapi purato 9 dhāvantipi ādhāvantipi, usseḷentipi, apphoṭentipi, nibbujjhantipi, muṭṭhīhipi yujjhanti, raṅgamajjhepi saṅghāṭiṃ pattharitvā naccakiṃ 10 evaṃ vadanti – idha, bhagini, naccassūti, nalāṭikampi denti, vividhampi anācāraṃ ācaranti.
432. தேன கோ² பன ஸமயேன அஞ்ஞதரோ பி⁴க்கு² காஸீஸு வஸ்ஸங்வுட்டோ² ஸாவத்தி²ங் க³ச்ச²ந்தோ ப⁴க³வந்தங் த³ஸ்ஸனாய, யேன கீடாகி³ரி தத³வஸரி. அத² கோ² ஸோ பி⁴க்கு² புப்³ப³ண்ஹஸமயங் நிவாஸெத்வா பத்தசீவரமாதா³ய கீடாகி³ரிங் பிண்டா³ய பாவிஸி பாஸாதி³கேன அபி⁴க்கந்தேன படிக்கந்தேன ஆலோகிதேன விலோகிதேன ஸமிஞ்ஜிதேன பஸாரிதேன ஒக்கி²த்தசக்கு² இரியாபத²ஸம்பன்னோ. மனுஸ்ஸா தங் பி⁴க்கு²ங் பஸ்ஸித்வா ஏவமாஹங்ஸு – ‘‘க்வாயங் அப³லப³லோ விய மந்த³மந்தோ³ விய பா⁴குடிகபா⁴குடிகோ விய? கோ இமஸ்ஸ உபக³தஸ்ஸ பிண்ட³கங் த³ஸ்ஸதி? அம்ஹாகங் பன அய்யா அஸ்ஸஜிபுனப்³ப³ஸுகா ஸண்ஹா ஸகி²லா ஸுக²ஸம்பா⁴ஸா மிஹிதபுப்³ப³ங்க³மா ஏஹிஸ்வாக³தவாதி³னோ அப்³பா⁴குடிகா உத்தானமுகா² புப்³ப³பா⁴ஸினோ. தேஸங் கோ² நாம பிண்டோ³ தா³தப்³போ³’’தி.
432. Tena kho pana samayena aññataro bhikkhu kāsīsu vassaṃvuṭṭho sāvatthiṃ gacchanto bhagavantaṃ dassanāya, yena kīṭāgiri tadavasari. Atha kho so bhikkhu pubbaṇhasamayaṃ nivāsetvā pattacīvaramādāya kīṭāgiriṃ piṇḍāya pāvisi pāsādikena abhikkantena paṭikkantena ālokitena vilokitena samiñjitena pasāritena okkhittacakkhu iriyāpathasampanno. Manussā taṃ bhikkhuṃ passitvā evamāhaṃsu – ‘‘kvāyaṃ abalabalo viya mandamando viya bhākuṭikabhākuṭiko viya? Ko imassa upagatassa piṇḍakaṃ dassati? Amhākaṃ pana ayyā assajipunabbasukā saṇhā sakhilā sukhasambhāsā mihitapubbaṅgamā ehisvāgatavādino abbhākuṭikā uttānamukhā pubbabhāsino. Tesaṃ kho nāma piṇḍo dātabbo’’ti.
அத்³த³ஸா கோ² அஞ்ஞதரோ உபாஸகோ தங் பி⁴க்கு²ங் கீடாகி³ரிஸ்மிங் பிண்டா³ய சரந்தங். தி³ஸ்வான யேன ஸோ பி⁴க்கு² தேனுபஸங்கமி; உபஸங்கமித்வா தங் பி⁴க்கு²ங் அபி⁴வாதெ³த்வா ஏதத³வோச – ‘‘அபி, ப⁴ந்தே, பிண்டோ³ லப்³ப⁴தீ’’தி? ‘‘ந கோ², ஆவுஸோ, பிண்டோ³ லப்³ப⁴தீ’’தி. ‘‘ஏஹி, ப⁴ந்தே, க⁴ரங் க³மிஸ்ஸாமா’’தி. அத² கோ² ஸோ உபாஸகோ தங் பி⁴க்கு²ங் க⁴ரங் நெத்வா போ⁴ஜெத்வா ஏதத³வோச – ‘‘கஹங், ப⁴ந்தே, அய்யோ க³மிஸ்ஸதீ’’தி? ‘‘ஸாவத்தி²ங் கோ² அஹங், ஆவுஸோ, க³மிஸ்ஸாமி ப⁴க³வந்தங் த³ஸ்ஸனாயா’’தி. ‘‘தேன ஹி, ப⁴ந்தே, மம வசனேன ப⁴க³வதோ பாதே³ ஸிரஸா வந்த³, ஏவஞ்ச வதே³ஹி – ‘து³ட்டோ², ப⁴ந்தே, கீடாகி³ரிஸ்மிங் ஆவாஸோ. அஸ்ஸஜிபுனப்³ப³ஸுகா நாம கீடாகி³ரிஸ்மிங் ஆவாஸிகா அலஜ்ஜினோ பாபபி⁴க்கூ². தே ஏவரூபங் அனாசாரங் ஆசரந்தி – மாலாவச்ச²ங் ரோபெந்திபி ரோபாபெந்திபி, ஸிஞ்சந்திபி ஸிஞ்சாபெந்திபி…பே॰… விவித⁴ம்பி அனாசாரங் ஆசரந்தி. யேபி தே, ப⁴ந்தே, மனுஸ்ஸா புப்³பே³ ஸத்³தா⁴ அஹேஸுங் பஸன்னா தேபி ஏதரஹி அஸ்ஸத்³தா⁴ அப்பஸன்னா. யானிபி தானி ஸங்க⁴ஸ்ஸ புப்³பே³ தா³னபதா²னி தானிபி ஏதரஹி உபச்சி²ன்னானி. ரிஞ்சந்தி பேஸலா பி⁴க்கூ², நிவஸந்தி பாபபி⁴க்கூ². ஸாது⁴, ப⁴ந்தே, ப⁴க³வா கீடாகி³ரிங் பி⁴க்கூ² பஹிணெய்ய யதா²யங் கீடாகி³ரிஸ்மிங் ஆவாஸோ ஸண்ட²ஹெய்யா’’’தி.
Addasā kho aññataro upāsako taṃ bhikkhuṃ kīṭāgirismiṃ piṇḍāya carantaṃ. Disvāna yena so bhikkhu tenupasaṅkami; upasaṅkamitvā taṃ bhikkhuṃ abhivādetvā etadavoca – ‘‘api, bhante, piṇḍo labbhatī’’ti? ‘‘Na kho, āvuso, piṇḍo labbhatī’’ti. ‘‘Ehi, bhante, gharaṃ gamissāmā’’ti. Atha kho so upāsako taṃ bhikkhuṃ gharaṃ netvā bhojetvā etadavoca – ‘‘kahaṃ, bhante, ayyo gamissatī’’ti? ‘‘Sāvatthiṃ kho ahaṃ, āvuso, gamissāmi bhagavantaṃ dassanāyā’’ti. ‘‘Tena hi, bhante, mama vacanena bhagavato pāde sirasā vanda, evañca vadehi – ‘duṭṭho, bhante, kīṭāgirismiṃ āvāso. Assajipunabbasukā nāma kīṭāgirismiṃ āvāsikā alajjino pāpabhikkhū. Te evarūpaṃ anācāraṃ ācaranti – mālāvacchaṃ ropentipi ropāpentipi, siñcantipi siñcāpentipi…pe… vividhampi anācāraṃ ācaranti. Yepi te, bhante, manussā pubbe saddhā ahesuṃ pasannā tepi etarahi assaddhā appasannā. Yānipi tāni saṅghassa pubbe dānapathāni tānipi etarahi upacchinnāni. Riñcanti pesalā bhikkhū, nivasanti pāpabhikkhū. Sādhu, bhante, bhagavā kīṭāgiriṃ bhikkhū pahiṇeyya yathāyaṃ kīṭāgirismiṃ āvāso saṇṭhaheyyā’’’ti.
ஏவமாவுஸோதி கோ² ஸோ பி⁴க்கு² தஸ்ஸ உபாஸகஸ்ஸ படிஸ்ஸுத்வா யேன ஸாவத்தி² தேன பக்காமி. அனுபுப்³பே³ன யேன ஸாவத்தி² ஜேதவனங் அனாத²பிண்டி³கஸ்ஸ ஆராமோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஆசிண்ணங் கோ² பனேதங் பு³த்³தா⁴னங் ப⁴க³வந்தானங் ஆக³ந்துகேஹி பி⁴க்கூ²ஹி ஸத்³தி⁴ங் படிஸம்மோதி³துங். அத² கோ² ப⁴க³வா தங் பி⁴க்கு²ங் ஏதத³வோச – ‘‘கச்சி, பி⁴க்கு², க²மனீயங் கச்சி யாபனீயங், கச்சிஸி அப்பகிலமதே²ன அத்³தா⁴னங் ஆக³தோ, குதோ ச த்வங் பி⁴க்கு² ஆக³ச்ச²ஸீ’’தி? ‘‘க²மனீயங், ப⁴க³வா, யாபனீயங், ப⁴க³வா. அப்பகிலமதே²ன சாஹங், ப⁴ந்தே, அத்³தா⁴னங் ஆக³தோ. இதா⁴ஹங், ப⁴ந்தே, காஸீஸு வஸ்ஸங்வுட்டோ² ஸாவத்தி²ங் ஆக³ச்ச²ந்தோ ப⁴க³வந்தங் த³ஸ்ஸனாய யேன கீடாகி³ரி தத³வஸரிங். அத² க்²வாஹங், ப⁴ந்தே, புப்³ப³ண்ஹஸமயங் நிவாஸெத்வா பத்தசீவரமாதா³ய கீடாகி³ரிங் பிண்டா³ய பாவிஸிங். அத்³த³ஸா கோ² மங், ப⁴ந்தே, அஞ்ஞதரோ உபாஸகோ கீடாகி³ரிஸ்மிங் பிண்டா³ய சரந்தங். தி³ஸ்வான யேனாஹங் தேனுபஸங்கமி; உபஸங்கமித்வா மங் அபி⁴வாதெ³த்வா ஏதத³வோச – ‘அபி, ப⁴ந்தே, பிண்டோ³ லப்³ப⁴தீ’தி? ‘ந கோ², ஆவுஸோ, பிண்டோ³ லப்³ப⁴தீ’தி. ‘ஏஹி, ப⁴ந்தே, க⁴ரங் க³மிஸ்ஸாமா’தி. அத² கோ², ப⁴ந்தே, ஸோ உபாஸகோ மங் க⁴ரங் நெத்வா போ⁴ஜெத்வா ஏதத³வோச – ‘கஹங், ப⁴ந்தே, அய்யோ க³மிஸ்ஸஸீ’தி? ‘ஸாவத்தி²ங் கோ² அஹங், ஆவுஸோ, க³மிஸ்ஸாமி ப⁴க³வந்தங் த³ஸ்ஸனாயா’தி. தேன ஹி, ப⁴ந்தே, மம வசனேன ப⁴க³வதோ பாதே³ ஸிரஸா வந்த³, ஏவஞ்ச வதே³ஹி – ‘து³ட்டோ², ப⁴ந்தே, கீடாகி³ரிஸ்மிங் ஆவாஸோ, அஸ்ஸஜிபுனப்³ப³ஸுகா நாம கீடாகி³ரிஸ்மிங் ஆவாஸிகா அலஜ்ஜினோ பாபபி⁴க்கூ². தே ஏவரூபங் அனாசாரங் ஆசரந்தி – மாலாவச்ச²ங் ரோபெந்திபி ரோபாபெந்திபி, ஸிஞ்சந்திபி ஸிஞ்சாபெந்திபி…பே॰… விவித⁴ம்பி அனாசாரங் ஆசரந்தி. யேபி தே, ப⁴ந்தே, மனுஸ்ஸா புப்³பே³ ஸத்³தா⁴ அஹேஸுங் பஸன்னா தேபி ஏதரஹி அஸ்ஸத்³தா⁴ அப்பஸன்னா, யானிபி தானி ஸங்க⁴ஸ்ஸ புப்³பே³ தா³னபதா²னி தானிபி ஏதரஹி உபச்சி²ன்னானி, ரிஞ்சந்தி பேஸலா பி⁴க்கூ² நிவஸந்தி பாபபி⁴க்கூ². ஸாது⁴, ப⁴ந்தே, ப⁴க³வா கீடாகி³ரிங் பி⁴க்கூ² பஹிணெய்ய யதா²யங் கீடாகி³ரிஸ்மிங் ஆவாஸோ ஸண்ட²ஹெய்யா’தி. ததோ அஹங், ப⁴க³வா, ஆக³ச்சா²மீ’’தி.
Evamāvusoti kho so bhikkhu tassa upāsakassa paṭissutvā yena sāvatthi tena pakkāmi. Anupubbena yena sāvatthi jetavanaṃ anāthapiṇḍikassa ārāmo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā taṃ bhikkhuṃ etadavoca – ‘‘kacci, bhikkhu, khamanīyaṃ kacci yāpanīyaṃ, kaccisi appakilamathena addhānaṃ āgato, kuto ca tvaṃ bhikkhu āgacchasī’’ti? ‘‘Khamanīyaṃ, bhagavā, yāpanīyaṃ, bhagavā. Appakilamathena cāhaṃ, bhante, addhānaṃ āgato. Idhāhaṃ, bhante, kāsīsu vassaṃvuṭṭho sāvatthiṃ āgacchanto bhagavantaṃ dassanāya yena kīṭāgiri tadavasariṃ. Atha khvāhaṃ, bhante, pubbaṇhasamayaṃ nivāsetvā pattacīvaramādāya kīṭāgiriṃ piṇḍāya pāvisiṃ. Addasā kho maṃ, bhante, aññataro upāsako kīṭāgirismiṃ piṇḍāya carantaṃ. Disvāna yenāhaṃ tenupasaṅkami; upasaṅkamitvā maṃ abhivādetvā etadavoca – ‘api, bhante, piṇḍo labbhatī’ti? ‘Na kho, āvuso, piṇḍo labbhatī’ti. ‘Ehi, bhante, gharaṃ gamissāmā’ti. Atha kho, bhante, so upāsako maṃ gharaṃ netvā bhojetvā etadavoca – ‘kahaṃ, bhante, ayyo gamissasī’ti? ‘Sāvatthiṃ kho ahaṃ, āvuso, gamissāmi bhagavantaṃ dassanāyā’ti. Tena hi, bhante, mama vacanena bhagavato pāde sirasā vanda, evañca vadehi – ‘duṭṭho, bhante, kīṭāgirismiṃ āvāso, assajipunabbasukā nāma kīṭāgirismiṃ āvāsikā alajjino pāpabhikkhū. Te evarūpaṃ anācāraṃ ācaranti – mālāvacchaṃ ropentipi ropāpentipi, siñcantipi siñcāpentipi…pe… vividhampi anācāraṃ ācaranti. Yepi te, bhante, manussā pubbe saddhā ahesuṃ pasannā tepi etarahi assaddhā appasannā, yānipi tāni saṅghassa pubbe dānapathāni tānipi etarahi upacchinnāni, riñcanti pesalā bhikkhū nivasanti pāpabhikkhū. Sādhu, bhante, bhagavā kīṭāgiriṃ bhikkhū pahiṇeyya yathāyaṃ kīṭāgirismiṃ āvāso saṇṭhaheyyā’ti. Tato ahaṃ, bhagavā, āgacchāmī’’ti.
433. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா பி⁴க்கூ² படிபுச்சி² – ‘‘ஸச்சங் கிர, பி⁴க்க²வே, அஸ்ஸஜிபுனப்³ப³ஸுகா நாம கீடாகி³ரிஸ்மிங் ஆவாஸிகா அலஜ்ஜினோ பாபபி⁴க்கூ² தே ஏவரூபங் அனாசாரங் ஆசரந்தி – மாலாவச்ச²ங் ரோபெந்திபி ரோபாபெந்திபி, ஸிஞ்சந்திபி ஸிஞ்சாபெந்திபி …பே॰… விவித⁴ம்பி அனாசாரங் ஆசரந்தி, யேபி தே, பி⁴க்க²வே, மனுஸ்ஸா புப்³பே³ ஸத்³தா⁴ அஹேஸுங் பஸன்னா தேபி ஏதரஹி அஸ்ஸத்³தா⁴ அப்பஸன்னா; யானிபி தானி ஸங்க⁴ஸ்ஸ புப்³பே³ தா³னபதா²னி தானிபி ஏதரஹி உபச்சி²ன்னானி; ரிஞ்சந்தி பேஸலா பி⁴க்கூ² நிவஸந்தி பாபபி⁴க்கூ²’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… ‘‘கத²ஞ்ஹி நாம தே, பி⁴க்க²வே, மோக⁴புரிஸா ஏவரூபங் அனாசாரங் ஆசரிஸ்ஸந்தி – மாலாவச்ச²ங் ரோபெஸ்ஸந்திபி ரோபாபெஸ்ஸந்திபி, ஸஞ்சிஸ்ஸந்திபி ஸிஞ்சாபெஸ்ஸந்திபி, ஓசினிஸ்ஸந்திபி ஓசினாபெஸ்ஸந்திபி, க³ந்தி²ஸ்ஸந்திபி க³ந்தா²பெஸ்ஸந்திபி, ஏகதோவண்டிகமாலங் கரிஸ்ஸந்திபி காராபெஸ்ஸந்திபி, உப⁴தோவண்டிகமாலங் கரிஸ்ஸந்திபி காராபெஸ்ஸந்திபி, மஞ்ஜரிகங் கரிஸ்ஸந்திபி காராபெஸ்ஸந்திபி, விதூ⁴திகங் கரிஸ்ஸந்திபி காராபெஸ்ஸந்திபி, வடங்ஸகங் கரிஸ்ஸந்திபி காராபெஸ்ஸந்திபி, ஆவேளங் கரிஸ்ஸந்திபி காராபெஸ்ஸந்திபி, உரச்ச²த³ங் கரிஸ்ஸந்திபி காராபெஸ்ஸந்திபி. தே குலித்தீ²னங் குலதீ⁴தானங் குலகுமாரீனங் குலஸுண்ஹானங் குலதா³ஸீனங் ஏகதோவண்டிகமாலங் ஹரிஸ்ஸந்திபி ஹாராபெஸ்ஸந்திபி, உப⁴தோவண்டிகமாலங் ஹரிஸ்ஸந்திபி ஹாராபெஸ்ஸந்திபி, மஞ்ஜரிகங் ஹரிஸ்ஸந்திபி ஹாராபெஸ்ஸந்திபி , விதூ⁴திகங் ஹரிஸ்ஸந்திபி ஹாராபெஸ்ஸந்திபி, வடங்ஸகங் ஹரிஸ்ஸந்திபி ஹாராபெஸ்ஸந்திபி, ஆவேளங் ஹரிஸ்ஸந்திபி ஹாராபெஸ்ஸந்திபி, உரச்ச²த³ங் ஹரிஸ்ஸந்திபி ஹாராபெஸ்ஸந்திபி. தே குலித்தீ²ஹி குலதீ⁴தாஹி குலகுமாரீஹி குலஸுண்ஹாஹி குலதா³ஸீஹி ஸத்³தி⁴ங் ஏகபா⁴ஜனேபி பு⁴ஞ்ஜிஸ்ஸந்தி, ஏகதா²லகேபி பிவிஸ்ஸந்தி, ஏகாஸனேபி நிஸீதி³ஸ்ஸந்தி, ஏகமஞ்சேபி துவட்டிஸ்ஸந்தி, ஏகத்த²ரணாபி துவட்டிஸ்ஸந்தி, ஏகபாவுரணாபி துவட்டிஸ்ஸந்தி, ஏகத்த²ரணபாவுரணாபி துவட்டிஸ்ஸந்தி, விகாலேபி பு⁴ஞ்ஜிஸ்ஸந்தி, மஜ்ஜம்பி பிவிஸ்ஸந்தி, மாலாக³ந்த⁴விலேபனம்பி தா⁴ரிஸ்ஸந்தி, நச்சிஸ்ஸந்திபி கா³யிஸ்ஸந்திபி வாதெ³ஸ்ஸந்திபி லாஸெஸ்ஸந்திபி, நச்சந்தியாபி நச்சிஸ்ஸந்தி நச்சந்தியாபி கா³யிஸ்ஸந்தி நச்சந்தியாபி வாதெ³ஸ்ஸந்தி நச்சந்தியாபி லாஸெஸ்ஸந்தி, கா³யந்தியாபி நச்சிஸ்ஸந்தி கா³யந்தியாபி கா³யிஸ்ஸந்தி கா³யந்தியாபி வாதெ³ஸ்ஸந்தி கா³யந்தியாபி லாஸெஸ்ஸந்தி, வாதெ³ந்தியாபி நச்சிஸ்ஸந்தி வாதெ³ந்தியாபி கா³யிஸ்ஸந்தி வாதெ³ந்தியாபி வாதெ³ஸ்ஸந்தி வாதெ³ந்தியாபி லாஸெஸ்ஸந்தி, லாஸெந்தியாபி நச்சிஸ்ஸந்தி லாஸெந்தியாபி கா³யிஸ்ஸந்தி லாஸெந்தியாபி வாதெ³ஸ்ஸந்தி லாஸெந்தியாபி லாஸெஸ்ஸந்தி, அட்ட²பதே³பி கீளிஸ்ஸந்தி த³ஸபதே³பி கீளிஸ்ஸந்தி, அகாஸேபி கீளிஸ்ஸந்தி, பரிஹாரபதே²பி கீளிஸ்ஸந்தி, ஸந்திகாயபி கீளிஸ்ஸந்தி, க²லிகாயபி கீளிஸ்ஸந்தி, க⁴டிகாயபி கீளிஸ்ஸந்தி, ஸலாகஹத்தே²னபி கீளிஸ்ஸந்தி, அக்கே²னபி கீளிஸ்ஸந்தி, பங்க³சீரேனபி கீளிஸ்ஸந்தி, வங்ககேனபி கீளிஸ்ஸந்தி, மொக்க²சிகாயபி கீளிஸ்ஸந்தி, சிங்கு³லகேனபி கீளிஸ்ஸந்தி, பத்தாள்ஹகேனபி கீளிஸ்ஸந்தி, ரத²கேனபி கீளிஸ்ஸந்தி, த⁴னுகேனபி கீளிஸ்ஸந்தி, அக்க²ரிகாயபி கீளிஸ்ஸந்தி , மனேஸிகாயபி கீளிஸ்ஸந்தி, யதா²வஜ்ஜேனபி கீளிஸ்ஸந்தி, ஹத்தி²ஸ்மிம்பி ஸிக்கி²ஸ்ஸந்தி, அஸ்ஸஸ்மிம்பி ஸிக்கி²ஸ்ஸந்தி, ரத²ஸ்மிம்பி ஸிக்கி²ஸ்ஸந்தி, த⁴னுஸ்மிம்பி ஸிக்கி²ஸ்ஸந்தி, த²ருஸ்மிம்பி ஸிக்கி²ஸ்ஸந்தி, ஹத்தி²ஸ்ஸபி புரதோ தா⁴விஸ்ஸந்தி, அஸ்ஸஸ்ஸபி புரதோ தா⁴விஸ்ஸந்தி, ரத²ஸ்ஸபி புரதோ 11 தா⁴விஸ்ஸந்திபி ஆதா⁴விஸ்ஸந்திபி, உஸ்ஸேளெஸ்ஸந்திபி, அப்போ²டெஸ்ஸந்திபி, நிப்³பு³ஜ்ஜி²ஸ்ஸந்திபி, முட்டீ²ஹிபி யுஜ்ஜி²ஸ்ஸந்தி, ரங்க³மஜ்ஜே²பி ஸங்கா⁴டிங் பத்த²ரித்வா நச்சகிங் ஏவங் வக்க²ந்தி ‘‘இத⁴ ப⁴கி³னி நச்சஸ்ஸூ’’தி நலாடிகம்பி த³ஸ்ஸந்தி, விவித⁴ம்பி அனாசாரங் ஆசரிஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… விக³ரஹித்வா த⁴ம்மிங் கத²ங் கத்வா ஸாரிபுத்தமொக்³க³ல்லானே ஆமந்தேஸி – ‘‘க³ச்ச²த² தும்ஹே, ஸாரிபுத்தா, கீடாகி³ரிங் க³ந்த்வா அஸ்ஸஜிபுனப்³ப³ஸுகானங் பி⁴க்கூ²னங் கீடாகி³ரிஸ்மா பப்³பா³ஜனீயகம்மங் கரோத². தும்ஹாகங் ஏதே ஸத்³தி⁴விஹாரிகா’’தி.
433. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, assajipunabbasukā nāma kīṭāgirismiṃ āvāsikā alajjino pāpabhikkhū te evarūpaṃ anācāraṃ ācaranti – mālāvacchaṃ ropentipi ropāpentipi, siñcantipi siñcāpentipi …pe… vividhampi anācāraṃ ācaranti, yepi te, bhikkhave, manussā pubbe saddhā ahesuṃ pasannā tepi etarahi assaddhā appasannā; yānipi tāni saṅghassa pubbe dānapathāni tānipi etarahi upacchinnāni; riñcanti pesalā bhikkhū nivasanti pāpabhikkhū’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma te, bhikkhave, moghapurisā evarūpaṃ anācāraṃ ācarissanti – mālāvacchaṃ ropessantipi ropāpessantipi, sañcissantipi siñcāpessantipi, ocinissantipi ocināpessantipi, ganthissantipi ganthāpessantipi, ekatovaṇṭikamālaṃ karissantipi kārāpessantipi, ubhatovaṇṭikamālaṃ karissantipi kārāpessantipi, mañjarikaṃ karissantipi kārāpessantipi, vidhūtikaṃ karissantipi kārāpessantipi, vaṭaṃsakaṃ karissantipi kārāpessantipi, āveḷaṃ karissantipi kārāpessantipi, uracchadaṃ karissantipi kārāpessantipi. Te kulitthīnaṃ kuladhītānaṃ kulakumārīnaṃ kulasuṇhānaṃ kuladāsīnaṃ ekatovaṇṭikamālaṃ harissantipi hārāpessantipi, ubhatovaṇṭikamālaṃ harissantipi hārāpessantipi, mañjarikaṃ harissantipi hārāpessantipi , vidhūtikaṃ harissantipi hārāpessantipi, vaṭaṃsakaṃ harissantipi hārāpessantipi, āveḷaṃ harissantipi hārāpessantipi, uracchadaṃ harissantipi hārāpessantipi. Te kulitthīhi kuladhītāhi kulakumārīhi kulasuṇhāhi kuladāsīhi saddhiṃ ekabhājanepi bhuñjissanti, ekathālakepi pivissanti, ekāsanepi nisīdissanti, ekamañcepi tuvaṭṭissanti, ekattharaṇāpi tuvaṭṭissanti, ekapāvuraṇāpi tuvaṭṭissanti, ekattharaṇapāvuraṇāpi tuvaṭṭissanti, vikālepi bhuñjissanti, majjampi pivissanti, mālāgandhavilepanampi dhārissanti, naccissantipi gāyissantipi vādessantipi lāsessantipi, naccantiyāpi naccissanti naccantiyāpi gāyissanti naccantiyāpi vādessanti naccantiyāpi lāsessanti, gāyantiyāpi naccissanti gāyantiyāpi gāyissanti gāyantiyāpi vādessanti gāyantiyāpi lāsessanti, vādentiyāpi naccissanti vādentiyāpi gāyissanti vādentiyāpi vādessanti vādentiyāpi lāsessanti, lāsentiyāpi naccissanti lāsentiyāpi gāyissanti lāsentiyāpi vādessanti lāsentiyāpi lāsessanti, aṭṭhapadepi kīḷissanti dasapadepi kīḷissanti, akāsepi kīḷissanti, parihārapathepi kīḷissanti, santikāyapi kīḷissanti, khalikāyapi kīḷissanti, ghaṭikāyapi kīḷissanti, salākahatthenapi kīḷissanti, akkhenapi kīḷissanti, paṅgacīrenapi kīḷissanti, vaṅkakenapi kīḷissanti, mokkhacikāyapi kīḷissanti, ciṅgulakenapi kīḷissanti, pattāḷhakenapi kīḷissanti, rathakenapi kīḷissanti, dhanukenapi kīḷissanti, akkharikāyapi kīḷissanti , manesikāyapi kīḷissanti, yathāvajjenapi kīḷissanti, hatthismimpi sikkhissanti, assasmimpi sikkhissanti, rathasmimpi sikkhissanti, dhanusmimpi sikkhissanti, tharusmimpi sikkhissanti, hatthissapi purato dhāvissanti, assassapi purato dhāvissanti, rathassapi purato 12 dhāvissantipi ādhāvissantipi, usseḷessantipi, apphoṭessantipi, nibbujjhissantipi, muṭṭhīhipi yujjhissanti, raṅgamajjhepi saṅghāṭiṃ pattharitvā naccakiṃ evaṃ vakkhanti ‘‘idha bhagini naccassū’’ti nalāṭikampi dassanti, vividhampi anācāraṃ ācarissanti! Netaṃ, bhikkhave, appasannānaṃ vā pasādāya…pe… vigarahitvā dhammiṃ kathaṃ katvā sāriputtamoggallāne āmantesi – ‘‘gacchatha tumhe, sāriputtā, kīṭāgiriṃ gantvā assajipunabbasukānaṃ bhikkhūnaṃ kīṭāgirismā pabbājanīyakammaṃ karotha. Tumhākaṃ ete saddhivihārikā’’ti.
‘‘கத²ங் மயங், ப⁴ந்தே, அஸ்ஸஜிபுனப்³ப³ஸுகானங் பி⁴க்கூ²னங் கீடாகி³ரிஸ்மா பப்³பா³ஜனீயகம்மங் கரோம? சண்டா³ தே பி⁴க்கூ² ப²ருஸா’’தி. ‘‘தேன ஹி தும்ஹே, ஸாரிபுத்தா, ப³ஹுகேஹி பி⁴க்கூ²ஹி ஸத்³தி⁴ங் க³ச்ச²தா²’’தி. ‘‘ஏவங், ப⁴ந்தே’’தி கோ² ஸாரிபுத்தமொக்³க³ல்லானா ப⁴க³வதோ பச்சஸ்ஸோஸுங். ‘‘ஏவஞ்ச பன, பி⁴க்க²வே, காதப்³ப³ங். பட²மங் அஸ்ஸஜிபுனப்³ப³ஸுகா பி⁴க்கூ² சோதே³தப்³பா³. சோதெ³த்வா ஸாரேதப்³பா³. ஸாரெத்வா ஆபத்திங் ரோபேதப்³பா³ . ஆபத்திங் ரோபெத்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
‘‘Kathaṃ mayaṃ, bhante, assajipunabbasukānaṃ bhikkhūnaṃ kīṭāgirismā pabbājanīyakammaṃ karoma? Caṇḍā te bhikkhū pharusā’’ti. ‘‘Tena hi tumhe, sāriputtā, bahukehi bhikkhūhi saddhiṃ gacchathā’’ti. ‘‘Evaṃ, bhante’’ti kho sāriputtamoggallānā bhagavato paccassosuṃ. ‘‘Evañca pana, bhikkhave, kātabbaṃ. Paṭhamaṃ assajipunabbasukā bhikkhū codetabbā. Codetvā sāretabbā. Sāretvā āpattiṃ ropetabbā . Āpattiṃ ropetvā byattena bhikkhunā paṭibalena saṅgho ñāpetabbo –
434. ‘‘ஸுணாது மே, ப⁴ந்தே, ஸங்கோ⁴. இமே அஸ்ஸஜிபுனப்³ப³ஸுகா பி⁴க்கூ² குலதூ³ஸகா பாபஸமாசாரா. இமேஸங் பாபகா ஸமாசாரா தி³ஸ்ஸந்தி சேவ ஸுய்யந்தி ச. குலானி ச இமேஹி து³ட்டா²னி தி³ஸ்ஸந்தி சேவ ஸுய்யந்தி ச. யதி³ ஸங்க⁴ஸ்ஸ பத்தகல்லங், ஸங்கோ⁴ அஸ்ஸஜிபுனப்³ப³ஸுகானங் பி⁴க்கூ²னங் கீடாகி³ரிஸ்மா பப்³பா³ஜனீயகம்மங் கரெய்ய – ‘ந அஸ்ஸஜிபுனப்³ப³ஸுகேஹி பி⁴க்கூ²ஹி கீடாகி³ரிஸ்மிங் வத்த²ப்³ப³’ந்தி. ஏஸா ஞத்தி.
434. ‘‘Suṇātu me, bhante, saṅgho. Ime assajipunabbasukā bhikkhū kuladūsakā pāpasamācārā. Imesaṃ pāpakā samācārā dissanti ceva suyyanti ca. Kulāni ca imehi duṭṭhāni dissanti ceva suyyanti ca. Yadi saṅghassa pattakallaṃ, saṅgho assajipunabbasukānaṃ bhikkhūnaṃ kīṭāgirismā pabbājanīyakammaṃ kareyya – ‘na assajipunabbasukehi bhikkhūhi kīṭāgirismiṃ vatthabba’nti. Esā ñatti.
‘‘ஸுணாது மே, ப⁴ந்தே, ஸங்கோ⁴. இமே அஸ்ஸஜிபுனப்³ப³ஸுகா பி⁴க்கூ² குலதூ³ஸகா பாபஸமாசாரா. இமேஸங் பாபகா ஸமாசாரா தி³ஸ்ஸந்தி சேவ ஸுய்யந்தி ச. குலானி ச இமேஹி து³ட்டா²னி தி³ஸ்ஸந்தி சேவ ஸுய்யந்தி ச. ஸங்கோ⁴ அஸ்ஸஜிபுனப்³ப³ஸுகானங் பி⁴க்கூ²னங் கீடாகி³ரிஸ்மா பப்³பா³ஜனீயகம்மங் கரோதி – ‘ந அஸ்ஸஜிபுனப்³ப³ஸுகேஹி பி⁴க்கூ²ஹி கீடாகி³ரிஸ்மிங் வத்த²ப்³ப³’ந்தி. யஸ்ஸாயஸ்மதோ க²மதி அஸ்ஸஜிபுனப்³ப³ஸுகானங் பி⁴க்கூ²னங் கீடாகி³ரிஸ்மா பப்³பா³ஜனீயகம்மஸ்ஸ கரணங் – ‘ந அஸ்ஸஜிபுனப்³ப³ஸுகேஹி பி⁴க்கூ²ஹி கீடாகி³ரிஸ்மிங் வத்த²ப்³ப³’ந்தி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ime assajipunabbasukā bhikkhū kuladūsakā pāpasamācārā. Imesaṃ pāpakā samācārā dissanti ceva suyyanti ca. Kulāni ca imehi duṭṭhāni dissanti ceva suyyanti ca. Saṅgho assajipunabbasukānaṃ bhikkhūnaṃ kīṭāgirismā pabbājanīyakammaṃ karoti – ‘na assajipunabbasukehi bhikkhūhi kīṭāgirismiṃ vatthabba’nti. Yassāyasmato khamati assajipunabbasukānaṃ bhikkhūnaṃ kīṭāgirismā pabbājanīyakammassa karaṇaṃ – ‘na assajipunabbasukehi bhikkhūhi kīṭāgirismiṃ vatthabba’nti, so tuṇhassa; yassa nakkhamati, so bhāseyya.
‘‘து³தியம்பி ஏதமத்த²ங் வதா³மி…பே॰… ததியம்பி ஏதமத்த²ங் வதா³மி – ஸுணாது மே, ப⁴ந்தே, ஸங்கோ⁴…பே॰… ஸோ பா⁴ஸெய்ய.
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho…pe… so bhāseyya.
‘‘கதங் ஸங்கே⁴ன அஸ்ஸஜிபுனப்³ப³ஸுகானங் பி⁴க்கூ²னங் கீடாகி³ரிஸ்மா பப்³பா³ஜனீயகம்மங் – ‘ந அஸ்ஸஜிபுனப்³ப³ஸுகேஹி பி⁴க்கூ²ஹி கீடாகி³ரிஸ்மிங் வத்த²ப்³ப³’ந்தி. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Kataṃ saṅghena assajipunabbasukānaṃ bhikkhūnaṃ kīṭāgirismā pabbājanīyakammaṃ – ‘na assajipunabbasukehi bhikkhūhi kīṭāgirismiṃ vatthabba’nti. Khamati saṅghassa, tasmā tuṇhī, evametaṃ dhārayāmī’’ti.
435. அத² கோ² ஸாரிபுத்தமொக்³க³ல்லானப்பமுகோ² பி⁴க்கு²ஸங்கோ⁴ கீடாகி³ரிங் க³ந்த்வா அஸ்ஸஜிபுனப்³ப³ஸுகானங் பி⁴க்கூ²னங் கீடாகி³ரிஸ்மா பப்³பா³ஜனீயகம்மங் அகாஸி – ‘ந அஸ்ஸஜிபுனப்³ப³ஸுகேஹி பி⁴க்கூ²ஹி கீடாகி³ரிஸ்மிங் வத்த²ப்³ப³’ந்தி. தே ஸங்கே⁴ன பப்³பா³ஜனீயகம்மகதா ந ஸம்மா வத்தந்தி, ந லோமங் பாதெந்தி, ந நெத்தா²ரங் வத்தந்தி, ந பி⁴க்கூ² க²மாபெந்தி, அக்கோஸந்தி பரிபா⁴ஸந்தி ச²ந்த³கா³மிதா தோ³ஸகா³மிதா மோஹகா³மிதா ப⁴யகா³மிதா பாபெந்தி, பக்கமந்திபி, விப்³ப⁴மந்திபி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அஸ்ஸஜிபுனப்³ப³ஸுகா பி⁴க்கூ² ஸங்கே⁴ன பப்³பா³ஜனீயகம்மகதா ந ஸம்மா வத்திஸ்ஸந்தி, ந லோமங் பாதெஸ்ஸந்தி, ந நெத்தா²ரங் வத்திஸ்ஸந்தி, ந பி⁴க்கூ² க²மாபெஸ்ஸந்தி , அக்கோஸிஸ்ஸந்தி பரிபா⁴ஸிஸ்ஸந்தி, ச²ந்த³கா³மிதா தோ³ஸகா³மிதா மோஹகா³மிதா ப⁴யகா³மிதா பாபெஸ்ஸந்தி பக்கமிஸ்ஸந்திபி விப்³ப⁴மிஸ்ஸந்திபீ’’தி ! அத² கோ² தே பி⁴க்கூ² அஸ்ஸஜிபுனப்³ப³ஸுகே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர, பி⁴க்க²வே, அஸ்ஸஜிபுனப்³ப³ஸுகா பி⁴க்கூ² ஸங்கே⁴ன பப்³பா³ஜனீயகம்மகதா ந ஸம்மா வத்தந்தி…பே॰… விப்³ப⁴மந்திபீ’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
435. Atha kho sāriputtamoggallānappamukho bhikkhusaṅgho kīṭāgiriṃ gantvā assajipunabbasukānaṃ bhikkhūnaṃ kīṭāgirismā pabbājanīyakammaṃ akāsi – ‘na assajipunabbasukehi bhikkhūhi kīṭāgirismiṃ vatthabba’nti. Te saṅghena pabbājanīyakammakatā na sammā vattanti, na lomaṃ pātenti, na netthāraṃ vattanti, na bhikkhū khamāpenti, akkosanti paribhāsanti chandagāmitā dosagāmitā mohagāmitā bhayagāmitā pāpenti, pakkamantipi, vibbhamantipi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma assajipunabbasukā bhikkhū saṅghena pabbājanīyakammakatā na sammā vattissanti, na lomaṃ pātessanti, na netthāraṃ vattissanti, na bhikkhū khamāpessanti , akkosissanti paribhāsissanti, chandagāmitā dosagāmitā mohagāmitā bhayagāmitā pāpessanti pakkamissantipi vibbhamissantipī’’ti ! Atha kho te bhikkhū assajipunabbasuke bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira, bhikkhave, assajipunabbasukā bhikkhū saṅghena pabbājanīyakammakatā na sammā vattanti…pe… vibbhamantipī’’ti? ‘‘Saccaṃ, bhagavā’’ti. Vigarahi buddho bhagavā…pe… evañca pana, bhikkhave, imaṃ sikkhāpadaṃ uddiseyyātha –
436. ‘‘பி⁴க்கு² பனேவ அஞ்ஞதரங் கா³மங் வா நிக³மங் வா உபனிஸ்ஸாய விஹரதி குலதூ³ஸகோ பாபஸமாசாரோ. தஸ்ஸ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச, குலானி ச தேன து³ட்டா²னி தி³ஸ்ஸந்தி சேவ ஸுய்யந்தி ச. ஸோ பி⁴க்கு² பி⁴க்கூ²ஹி ஏவமஸ்ஸ வசனீயோ – ‘ஆயஸ்மா கோ² குலதூ³ஸகோ பாபஸமாசாரோ, ஆயஸ்மதோ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச, குலானி சாயஸ்மதா து³ட்டா²னி தி³ஸ்ஸந்தி சேவ ஸுய்யந்தி ச. பக்கமதாயஸ்மா இமம்ஹா ஆவாஸா. அலங் தே இத⁴ வாஸேனா’தி. ஏவஞ்ச ஸோ பி⁴க்கு² பி⁴க்கூ²ஹி வுச்சமானோ தே பி⁴க்கூ² ஏவங் வதெ³ய்ய – ‘ச²ந்த³கா³மினோ ச பி⁴க்கூ² தோ³ஸகா³மினோ ச பி⁴க்கூ² மோஹகா³மினோ ச பி⁴க்கூ² ப⁴யகா³மினோ ச பி⁴க்கூ² தாதி³ஸிகாய ஆபத்தியா ஏகச்சங் பப்³பா³ஜெந்தி ஏகச்சங் ந பப்³பா³ஜெந்தீ’தி, ஸோ பி⁴க்கு² பி⁴க்கூ²ஹி ஏவமஸ்ஸ வசனீயோ – ‘மாயஸ்மா ஏவங் அவச. ந ச பி⁴க்கூ² ச²ந்த³கா³மினோ. ந ச பி⁴க்கூ² தோ³ஸகா³மினோ. ந ச பி⁴க்கூ² மோஹகா³மினோ. ந ச பி⁴க்கூ² ப⁴யகா³மினோ. ஆயஸ்மா கோ² குலதூ³ஸகோ பாபஸமாசாரோ. ஆயஸ்மதோ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச. குலானி சாயஸ்மதா து³ட்டா²னி தி³ஸ்ஸந்தி சேவ ஸுய்யந்தி ச. பக்கமதாயஸ்மா இமம்ஹா ஆவாஸா. அலங் தே இத⁴ வாஸேனா’தி. ஏவஞ்ச ஸோ பி⁴க்கு² பி⁴க்கூ²ஹி வுச்சமானோ ததே²வ பக்³க³ண்ஹெய்ய, ஸோ பி⁴க்கு² பி⁴க்கூ²ஹி யாவததியங் ஸமனுபா⁴ஸிதப்³போ³ தஸ்ஸ படினிஸ்ஸக்³கா³ய. யாவததியஞ்சே ஸமனுபா⁴ஸீயமானோ தங் படினிஸ்ஸஜ்ஜெய்ய , இச்சேதங் குஸலங்; நோ சே படினிஸ்ஸஜ்ஜெய்ய, ஸங்கா⁴தி³ஸேஸோ’’தி.
436.‘‘Bhikkhu paneva aññataraṃ gāmaṃ vā nigamaṃ vā upanissāya viharati kuladūsako pāpasamācāro. Tassa kho pāpakā samācārā dissanti ceva suyyanti ca, kulāni ca tena duṭṭhāni dissanti ceva suyyanti ca. So bhikkhu bhikkhūhi evamassa vacanīyo – ‘āyasmā kho kuladūsako pāpasamācāro, āyasmato kho pāpakā samācārā dissanti ceva suyyanti ca, kulāni cāyasmatā duṭṭhāni dissanti ceva suyyanti ca. Pakkamatāyasmā imamhā āvāsā. Alaṃ te idha vāsenā’ti. Evañca so bhikkhu bhikkhūhi vuccamāno te bhikkhū evaṃ vadeyya – ‘chandagāmino ca bhikkhū dosagāmino ca bhikkhū mohagāmino ca bhikkhū bhayagāmino ca bhikkhū tādisikāya āpattiyā ekaccaṃ pabbājenti ekaccaṃ na pabbājentī’ti, so bhikkhu bhikkhūhi evamassa vacanīyo – ‘māyasmā evaṃ avaca. Na ca bhikkhū chandagāmino. Na ca bhikkhū dosagāmino. Na ca bhikkhū mohagāmino. Na ca bhikkhū bhayagāmino. Āyasmā kho kuladūsako pāpasamācāro. Āyasmato kho pāpakā samācārā dissanti ceva suyyanti ca. Kulāni cāyasmatā duṭṭhāni dissanti ceva suyyanti ca. Pakkamatāyasmā imamhā āvāsā. Alaṃ te idha vāsenā’ti. Evañca so bhikkhu bhikkhūhi vuccamāno tatheva paggaṇheyya, so bhikkhu bhikkhūhi yāvatatiyaṃ samanubhāsitabbo tassa paṭinissaggāya. Yāvatatiyañce samanubhāsīyamāno taṃ paṭinissajjeyya , iccetaṃ kusalaṃ; no ce paṭinissajjeyya, saṅghādiseso’’ti.
437. பி⁴க்கு² பனேவ அஞ்ஞதரங் கா³மங் வா நிக³மங் வாதி கா³மோபி நிக³மோபி நக³ரம்பி கா³மோ சேவ நிக³மோ ச.
437.Bhikkhu paneva aññataraṃ gāmaṃ vā nigamaṃ vāti gāmopi nigamopi nagarampi gāmo ceva nigamo ca.
உபனிஸ்ஸாய விஹரதீதி தத்த² படிப³த்³தா⁴ ஹொந்தி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா.
Upanissāya viharatīti tattha paṭibaddhā honti cīvarapiṇḍapātasenāsanagilānappaccayabhesajjaparikkhārā.
குலங் நாம சத்தாரி குலானி – க²த்தியகுலங், ப்³ராஹ்மணகுலங், வெஸ்ஸகுலங், ஸுத்³த³குலங்.
Kulaṃ nāma cattāri kulāni – khattiyakulaṃ, brāhmaṇakulaṃ, vessakulaṃ, suddakulaṃ.
குலதூ³ஸகோதி குலானி தூ³ஸேதி புப்பே²ன வா ப²லேன வா சுண்ணேன வா மத்திகாய வா த³ந்தகட்டே²ன வா வேளுயா வா 13 வேஜ்ஜிகாய வா ஜங்க⁴பேஸனிகேன வா.
Kuladūsakoti kulāni dūseti pupphena vā phalena vā cuṇṇena vā mattikāya vā dantakaṭṭhena vā veḷuyā vā 14 vejjikāya vā jaṅghapesanikena vā.
பாபஸமாசாரோதி மாலாவச்ச²ங் ரோபேதிபி ரோபாபேதிபி, ஸிஞ்சதிபி ஸிஞ்சாபேதிபி, ஓசினாதிபி ஓசினாபேதிபி, க³ந்தே²திபி க³ந்தா²பேதிபி.
Pāpasamācāroti mālāvacchaṃ ropetipi ropāpetipi, siñcatipi siñcāpetipi, ocinātipi ocināpetipi, ganthetipi ganthāpetipi.
தி³ஸ்ஸந்தி சேவ ஸுய்யந்தி சாதி யே ஸங்முகா² தே பஸ்ஸந்தி, யே திரொக்கா² தே ஸுணந்தி.
Dissanti ceva suyyanti cāti ye saṃmukhā te passanti, ye tirokkhā te suṇanti.
குலானி ச தேன து³ட்டா²னீதி புப்³பே³ ஸத்³தா⁴ ஹுத்வா தங் ஆக³ம்ம அஸ்ஸத்³தா⁴ ஹொந்தி, பஸன்னா ஹுத்வா அப்பஸன்னா ஹொந்தி.
Kulānica tena duṭṭhānīti pubbe saddhā hutvā taṃ āgamma assaddhā honti, pasannā hutvā appasannā honti.
தி³ஸ்ஸந்தி சேவ ஸுய்யந்தி சாதி யே ஸங்முகா² தே பஸ்ஸந்தி, யே திரொக்கா² தே ஸுணந்தி.
Dissanti ceva suyyanti cāti ye saṃmukhā te passanti, ye tirokkhā te suṇanti.
ஸோ பி⁴க்கூ²தி யோ ஸோ குலதூ³ஸகோ பி⁴க்கு².
So bhikkhūti yo so kuladūsako bhikkhu.
பி⁴க்கூ²ஹீதி அஞ்ஞேஹி பி⁴க்கூ²ஹி. யே பஸ்ஸந்தி யே ஸுணந்தி. தேஹி வத்தப்³போ³ – ‘‘ஆயஸ்மா கோ² குலதூ³ஸகோ பாபஸமாசாரோ. ஆயஸ்மதோ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச. குலானி சாயஸ்மதா து³ட்டா²னி தி³ஸ்ஸந்தி சேவ ஸுய்யந்தி ச. பக்கமதாயஸ்மா இமம்ஹா ஆவாஸா. அலங் தே இத⁴ வாஸேனா’’தி.
Bhikkhūhīti aññehi bhikkhūhi. Ye passanti ye suṇanti. Tehi vattabbo – ‘‘āyasmā kho kuladūsako pāpasamācāro. Āyasmato kho pāpakā samācārā dissanti ceva suyyanti ca. Kulāni cāyasmatā duṭṭhāni dissanti ceva suyyanti ca. Pakkamatāyasmā imamhā āvāsā. Alaṃ te idha vāsenā’’ti.
ஏவஞ்ச ஸோ பி⁴க்கு² பி⁴க்கூ²ஹி வுச்சமானோ தே பி⁴க்கூ² ஏவங் வதெ³ய்ய – ‘‘ச²ந்த³கா³மினோ ச பி⁴க்கூ², தோ³ஸகா³மினோ ச பி⁴க்கூ², மோஹகா³மினோ ச பி⁴க்கூ², ப⁴யகா³மினோ ச பி⁴க்கூ². தாதி³ஸிகாய ஆபத்தியா ஏகச்சங் பப்³பா³ஜெந்தி ஏகச்சங் ந பப்³பா³ஜெந்தீ’’தி.
Evañca so bhikkhu bhikkhūhi vuccamāno te bhikkhū evaṃ vadeyya – ‘‘chandagāmino ca bhikkhū, dosagāmino ca bhikkhū, mohagāmino ca bhikkhū, bhayagāmino ca bhikkhū. Tādisikāya āpattiyā ekaccaṃ pabbājenti ekaccaṃ na pabbājentī’’ti.
ஸோ பி⁴க்கூ²தி யோ ஸோ கம்மகதோ பி⁴க்கு².
So bhikkhūti yo so kammakato bhikkhu.
பி⁴க்கூ²ஹீதி அஞ்ஞேஹி பி⁴க்கூ²ஹி. யே பஸ்ஸந்தி யே ஸுணந்தி தேஹி வத்தப்³போ³ – ‘‘மாயஸ்மா ஏவங் அவச. ந ச பி⁴க்கூ² ச²ந்த³கா³மினோ, ந ச பி⁴க்கூ² தோ³ஸகா³மினோ, ந ச பி⁴க்கூ² மோஹகா³மினோ, ந ச பி⁴க்கூ² ப⁴யகா³மினோ. ஆயஸ்மா கோ² குலதூ³ஸகோ பாபஸமாசாரோ. ஆயஸ்மதோ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச. குலானி சாயஸ்மதா து³ட்டா²னி தி³ஸ்ஸந்தி சேவ ஸுய்யந்தி ச. பக்கமதாயஸ்மா இமம்ஹா ஆவாஸா. அலங் தே இத⁴ வாஸேனா’’தி. து³தியம்பி வத்தப்³போ³. ததியம்பி வத்தப்³போ³.
Bhikkhūhīti aññehi bhikkhūhi. Ye passanti ye suṇanti tehi vattabbo – ‘‘māyasmā evaṃ avaca. Na ca bhikkhū chandagāmino, na ca bhikkhū dosagāmino, na ca bhikkhū mohagāmino, na ca bhikkhū bhayagāmino. Āyasmā kho kuladūsako pāpasamācāro. Āyasmato kho pāpakā samācārā dissanti ceva suyyanti ca. Kulāni cāyasmatā duṭṭhāni dissanti ceva suyyanti ca. Pakkamatāyasmā imamhā āvāsā. Alaṃ te idha vāsenā’’ti. Dutiyampi vattabbo. Tatiyampi vattabbo.
ஸசே படினிஸ்ஸஜ்ஜதி, இச்சேதங் குஸலங். நோ சே படினிஸ்ஸஜ்ஜதி, ஆபத்தி து³க்கடஸ்ஸ. ஸுத்வா ந வத³ந்தி, ஆபத்தி து³க்கடஸ்ஸ. ஸோ பி⁴க்கு² ஸங்க⁴மஜ்ஜ²ம்பி ஆகட்³டி⁴த்வா வத்தப்³போ³ – ‘‘மாயஸ்மா ஏவங் அவச. ந ச பி⁴க்கூ² ச²ந்த³கா³மினோ, ந ச பி⁴க்கூ² தோ³ஸகா³மினோ, ந ச பி⁴க்கூ² மோஹகா³மினோ, ந ச பி⁴க்கூ² ப⁴யகா³மினோ. ஆயஸ்மா கோ² குலதூ³ஸகோ பாபஸமாசாரோ. ஆயஸ்மதோ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச. குலானி சாயஸ்மதா து³ட்டா²னி தி³ஸ்ஸந்தி சேவ ஸுய்யந்தி ச. பக்கமதாயஸ்மா இமம்ஹா ஆவாஸா. அலங் தே இத⁴ வாஸேனா’’தி. து³தியம்பி வத்தப்³போ³. ததியம்பி வத்தப்³போ³. ஸசே படினிஸ்ஸஜ்ஜதி, இச்சேதங் குஸலங். நோ சே படினிஸ்ஸஜ்ஜதி, ஆபத்தி து³க்கடஸ்ஸ. ஸோ பி⁴க்கு² ஸமனுபா⁴ஸிதப்³போ³. ஏவஞ்ச பன, பி⁴க்க²வே, ஸமனுபா⁴ஸிதப்³போ³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
Sace paṭinissajjati, iccetaṃ kusalaṃ. No ce paṭinissajjati, āpatti dukkaṭassa. Sutvā na vadanti, āpatti dukkaṭassa. So bhikkhu saṅghamajjhampi ākaḍḍhitvā vattabbo – ‘‘māyasmā evaṃ avaca. Na ca bhikkhū chandagāmino, na ca bhikkhū dosagāmino, na ca bhikkhū mohagāmino, na ca bhikkhū bhayagāmino. Āyasmā kho kuladūsako pāpasamācāro. Āyasmato kho pāpakā samācārā dissanti ceva suyyanti ca. Kulāni cāyasmatā duṭṭhāni dissanti ceva suyyanti ca. Pakkamatāyasmā imamhā āvāsā. Alaṃ te idha vāsenā’’ti. Dutiyampi vattabbo. Tatiyampi vattabbo. Sace paṭinissajjati, iccetaṃ kusalaṃ. No ce paṭinissajjati, āpatti dukkaṭassa. So bhikkhu samanubhāsitabbo. Evañca pana, bhikkhave, samanubhāsitabbo. Byattena bhikkhunā paṭibalena saṅgho ñāpetabbo –
438. ‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² ஸங்கே⁴ன பப்³பா³ஜனீயகம்மகதோ பி⁴க்கூ² ச²ந்த³கா³மிதா தோ³ஸகா³மிதா மோஹகா³மிதா ப⁴யகா³மிதா பாபேதி. ஸோ தங் வத்து²ங் ந படினிஸ்ஸஜ்ஜதி. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங் பி⁴க்கு²ங் ஸமனுபா⁴ஸெய்ய தஸ்ஸ வத்து²ஸ்ஸ படினிஸ்ஸக்³கா³ய. ஏஸா ஞத்தி.
438. ‘‘Suṇātu me, bhante, saṅgho. Ayaṃ itthannāmo bhikkhu saṅghena pabbājanīyakammakato bhikkhū chandagāmitā dosagāmitā mohagāmitā bhayagāmitā pāpeti. So taṃ vatthuṃ na paṭinissajjati. Yadi saṅghassa pattakallaṃ, saṅgho itthannāmaṃ bhikkhuṃ samanubhāseyya tassa vatthussa paṭinissaggāya. Esā ñatti.
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² ஸங்கே⁴ன பப்³பா³ஜனீயகம்மகதோ பி⁴க்கூ² ச²ந்த³கா³மிதா தோ³ஸகா³மிதா மோஹகா³மிதா ப⁴யகா³மிதா பாபேதி. ஸோ தங் வத்து²ங் ந படினிஸ்ஸஜ்ஜதி. ஸங்கோ⁴ இத்த²ன்னாமங் பி⁴க்கு²ங் ஸமனுபா⁴ஸதி தஸ்ஸ வத்து²ஸ்ஸ படினிஸ்ஸக்³கா³ய. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ஸமனுபா⁴ஸனா தஸ்ஸ வத்து²ஸ்ஸ படினிஸ்ஸக்³கா³ய, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ayaṃ itthannāmo bhikkhu saṅghena pabbājanīyakammakato bhikkhū chandagāmitā dosagāmitā mohagāmitā bhayagāmitā pāpeti. So taṃ vatthuṃ na paṭinissajjati. Saṅgho itthannāmaṃ bhikkhuṃ samanubhāsati tassa vatthussa paṭinissaggāya. Yassāyasmato khamati itthannāmassa bhikkhuno samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
‘‘து³தியம்பி ஏதமத்த²ங் வதா³மி…பே॰… ததியம்பி ஏதமத்த²ங் வதா³மி…பே॰….
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘ஸமனுப⁴ட்டோ² ஸங்கே⁴ன இத்த²ன்னாமோ பி⁴க்கு² தஸ்ஸ வத்து²ஸ்ஸ படினிஸ்ஸக்³கா³ய. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Samanubhaṭṭho saṅghena itthannāmo bhikkhu tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
439. ஞத்தியா து³க்கடங், த்³வீஹி கம்மவாசாஹி து²ல்லச்சயா, கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ. ஸங்கா⁴தி³ஸேஸங் அஜ்ஜா²பஜ்ஜந்தஸ்ஸ ஞத்தியா து³க்கடங், த்³வீஹி கம்மவாசாஹி து²ல்லச்சயா படிப்பஸ்ஸம்ப⁴ந்தி.
439. Ñattiyā dukkaṭaṃ, dvīhi kammavācāhi thullaccayā, kammavācāpariyosāne āpatti saṅghādisesassa. Saṅghādisesaṃ ajjhāpajjantassa ñattiyā dukkaṭaṃ, dvīhi kammavācāhi thullaccayā paṭippassambhanti.
ஸங்கா⁴தி³ஸேஸோதி ஸங்கோ⁴வ தஸ்ஸா ஆபத்தியா பரிவாஸங் தே³தி, மூலாய படிகஸ்ஸதி, மானத்தங் தே³தி, அப்³பே⁴தி; ந ஸம்ப³ஹுலா, ந ஏகபுக்³க³லோ . தேன வுச்சதி – ‘ஸங்கா⁴தி³ஸேஸோ’தி, தஸ்ஸேவ ஆபத்தினிகாயஸ்ஸ நாமகம்மங் அதி⁴வசனங். தேனபி வுச்சதி ஸங்கா⁴தி³ஸேஸோதி.
Saṅghādisesoti saṅghova tassā āpattiyā parivāsaṃ deti, mūlāya paṭikassati, mānattaṃ deti, abbheti; na sambahulā, na ekapuggalo . Tena vuccati – ‘saṅghādiseso’ti, tasseva āpattinikāyassa nāmakammaṃ adhivacanaṃ. Tenapi vuccati saṅghādisesoti.
440. த⁴ம்மகம்மே த⁴ம்மகம்மஸஞ்ஞீ ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.
440. Dhammakamme dhammakammasaññī na paṭinissajjati, āpatti saṅghādisesassa.
த⁴ம்மகம்மே வேமதிகோ ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.
Dhammakamme vematiko na paṭinissajjati, āpatti saṅghādisesassa.
த⁴ம்மகம்மே அத⁴ம்மகம்மஸஞ்ஞீ ந படினிஸ்ஸஜ்ஜதி, ஆபத்தி ஸங்கா⁴தி³ஸேஸஸ்ஸ.
Dhammakamme adhammakammasaññī na paṭinissajjati, āpatti saṅghādisesassa.
அத⁴ம்மகம்மே த⁴ம்மகம்மஸஞ்ஞீ, ஆபத்தி து³க்கடஸ்ஸ.
Adhammakamme dhammakammasaññī, āpatti dukkaṭassa.
அத⁴ம்மகம்மே வேமதிகோ, ஆபத்தி து³க்கடஸ்ஸ.
Adhammakamme vematiko, āpatti dukkaṭassa.
அத⁴ம்மகம்மே அத⁴ம்மகம்மஸஞ்ஞீ, ஆபத்தி து³க்கடஸ்ஸ.
Adhammakamme adhammakammasaññī, āpatti dukkaṭassa.
441. அனாபத்தி அஸமனுபா⁴ஸந்தஸ்ஸ, படினிஸ்ஸஜ்ஜந்தஸ்ஸ, உம்மத்தகஸ்ஸ, ஆதி³கம்மிகஸ்ஸாதி.
441. Anāpatti asamanubhāsantassa, paṭinissajjantassa, ummattakassa, ādikammikassāti.
குலதூ³ஸகஸிக்கா²பத³ங் நிட்டி²தங் தேரஸமங்.
Kuladūsakasikkhāpadaṃ niṭṭhitaṃ terasamaṃ.
442. உத்³தி³ட்டா² கோ², ஆயஸ்மந்தோ, தேரஸ ஸங்கா⁴தி³ஸேஸா த⁴ம்மா, நவ பட²மாபத்திகா, சத்தாரோ யாவததியகா. யேஸங் பி⁴க்கு² அஞ்ஞதரங் வா அஞ்ஞதரங் வா ஆபஜ்ஜித்வா யாவதீஹங் ஜானங் படிச்சா²தே³தி தாவதீஹங் தேன பி⁴க்கு²னா அகாமா பரிவத்த²ப்³ப³ங். பரிவுத்த²பரிவாஸேன பி⁴க்கு²னா உத்தரி சா²ரத்தங் பி⁴க்கு²மானத்தாய படிபஜ்ஜிதப்³ப³ங். சிண்ணமானத்தோ பி⁴க்கு² யத்த² ஸியா வீஸதிக³ணோ பி⁴க்கு²ஸங்கோ⁴ தத்த² ஸோ பி⁴க்கு² அப்³பே⁴தப்³போ³. ஏகேனபி சே ஊனோ வீஸதிக³ணோ பி⁴க்கு²ஸங்கோ⁴ தங் பி⁴க்கு²ங் அப்³பெ⁴ய்ய, ஸோ ச பி⁴க்கு² அனப்³பி⁴தோ, தே ச பி⁴க்கூ² கா³ரய்ஹா, அயங் தத்த² ஸாமீசி. தத்தா²யஸ்மந்தே புச்சா²மி – ‘கச்சித்த² பரிஸுத்³தா⁴’? து³தியம்பி புச்சா²மி – ‘கச்சித்த² பரிஸுத்³தா⁴’? ததியம்பி புச்சா²மி – ‘கச்சித்த² பரிஸுத்³தா⁴’? பரிஸுத்³தெ⁴த்தா²யஸ்மந்தோ. தஸ்மா துண்ஹீ, ஏவமேதங் தா⁴ரயாமீதி.
442. Uddiṭṭhā kho, āyasmanto, terasa saṅghādisesā dhammā, nava paṭhamāpattikā, cattāro yāvatatiyakā. Yesaṃ bhikkhu aññataraṃ vā aññataraṃ vā āpajjitvā yāvatīhaṃ jānaṃ paṭicchādeti tāvatīhaṃ tena bhikkhunā akāmā parivatthabbaṃ. Parivutthaparivāsena bhikkhunā uttari chārattaṃ bhikkhumānattāya paṭipajjitabbaṃ. Ciṇṇamānatto bhikkhu yattha siyā vīsatigaṇo bhikkhusaṅgho tattha so bhikkhu abbhetabbo. Ekenapi ce ūno vīsatigaṇo bhikkhusaṅgho taṃ bhikkhuṃ abbheyya, so ca bhikkhu anabbhito, te ca bhikkhū gārayhā, ayaṃ tattha sāmīci. Tatthāyasmante pucchāmi – ‘kaccittha parisuddhā’? Dutiyampi pucchāmi – ‘kaccittha parisuddhā’? Tatiyampi pucchāmi – ‘kaccittha parisuddhā’? Parisuddhetthāyasmanto. Tasmā tuṇhī, evametaṃ dhārayāmīti.
தேரஸகங் நிட்டி²தங்.
Terasakaṃ niṭṭhitaṃ.
தஸ்ஸுத்³தா³னங் –
Tassuddānaṃ –
விஸ்ஸட்டி² காயஸங்ஸக்³க³ங், து³ட்டு²ல்லங் அத்தகாமஞ்ச;
Vissaṭṭhi kāyasaṃsaggaṃ, duṭṭhullaṃ attakāmañca;
ஸஞ்சரித்தங் குடீ சேவ, விஹாரோ ச அமூலகங்.
Sañcarittaṃ kuṭī ceva, vihāro ca amūlakaṃ.
கிஞ்சிலேஸஞ்ச பே⁴தோ³ ச, தஸ்ஸேவ அனுவத்தகா;
Kiñcilesañca bhedo ca, tasseva anuvattakā;
து³ப்³ப³சங் குலதூ³ஸஞ்ச, ஸங்கா⁴தி³ஸேஸா தேரஸாதி.
Dubbacaṃ kuladūsañca, saṅghādisesā terasāti.
ஸங்கா⁴தி³ஸேஸகண்ட³ங் நிட்டி²தங்.
Saṅghādisesakaṇḍaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā
13. குலதூ³ஸகஸிக்கா²பத³வண்ணனா • 13. Kuladūsakasikkhāpadavaṇṇanā
நிக³மனவண்ணனா • Nigamanavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
13. குலதூ³ஸகஸிக்கா²பத³வண்ணனா • 13. Kuladūsakasikkhāpadavaṇṇanā
நிக³மனவண்ணனா • Nigamanavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 13. குலதூ³ஸகஸிக்கா²பத³வண்ணனா • 13. Kuladūsakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā
13. குலதூ³ஸகஸிக்கா²பத³வண்ணனா • 13. Kuladūsakasikkhāpadavaṇṇanā
நிக³மனவண்ணனா • Nigamanavaṇṇanā
