| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
১৩. কুলদূসকসিক্খাপদৰণ্ণনা
13. Kuladūsakasikkhāpadavaṇṇanā
৪৩১. তেরসমে কীটাগিরীতি তস্স নিগমস্স নামং। তঞ্হি সন্ধায পরতো ‘‘ন অস্সজিপুনব্বসুকেহি ভিক্খূহি কীটাগিরিস্মিং ৰত্থব্ব’’ন্তি ৰুত্তং। তেন পন যোগতো সো জনপদোপি ‘‘কীটাগিরি’’ইচ্চেৰ সঙ্খ্যং গতোতি আহ ‘‘এৰংনামকে জনপদে’’তি। আৰাসে নিযুত্তা আৰাসিকা, নিবদ্ধৰাসিনো। তে অকতং সেনাসনং করোন্তি, জিণ্ণং পটিসঙ্খরোন্তি, কতে ইস্সরা হোন্তি। তেনাহ ‘‘সো যেসং আযত্তো…পে॰… তে আৰাসিকা’’তি । নিৰাসো নিৰাসমত্তং এতেসং অত্থীতি নেৰাসিকাতি আহ ‘‘যে পন কেৰল’’ন্তিআদি। তেতি অস্সজিপুনব্বসুকা। ছ জনাতি পণ্ডুকো লোহিতকো মেত্তিযো ভূমজকো অস্সজি পুনব্বসুকোতি ইমে ছ জনা। সম্মাতি আলপনৰচনমেতং। আযমুখভূতাতি আযস্স মুখভূতা। ধুরট্ঠানেতি সাৰত্থিযা অৰিদূরে ঠানে। ৰস্সানে হেমন্তে চাতি দ্ৰীসু উতূসু ৰস্সনতো ‘‘দ্ৰীহি মেঘেহী’’তি ৰুত্তং। দিযড্ঢভিক্খুসহস্সতো গণাচরিযানং ছন্নং জনানং অধিকত্তা ‘‘সমধিক’’ন্তি ৰুত্তং, সাধিকন্তি অত্থো। ম-কারো পদসন্ধিৰসেন আগতো। অকতৰত্থুন্তি অকতপুব্বং অভিনৰৰত্থুং।
431. Terasame kīṭāgirīti tassa nigamassa nāmaṃ. Tañhi sandhāya parato ‘‘na assajipunabbasukehi bhikkhūhi kīṭāgirismiṃ vatthabba’’nti vuttaṃ. Tena pana yogato so janapadopi ‘‘kīṭāgiri’’icceva saṅkhyaṃ gatoti āha ‘‘evaṃnāmake janapade’’ti. Āvāse niyuttā āvāsikā, nibaddhavāsino. Te akataṃ senāsanaṃ karonti, jiṇṇaṃ paṭisaṅkharonti, kate issarā honti. Tenāha ‘‘so yesaṃ āyatto…pe… te āvāsikā’’ti . Nivāso nivāsamattaṃ etesaṃ atthīti nevāsikāti āha ‘‘ye pana kevala’’ntiādi. Teti assajipunabbasukā. Cha janāti paṇḍuko lohitako mettiyo bhūmajako assaji punabbasukoti ime cha janā. Sammāti ālapanavacanametaṃ. Āyamukhabhūtāti āyassa mukhabhūtā. Dhuraṭṭhāneti sāvatthiyā avidūre ṭhāne. Vassāne hemante cāti dvīsu utūsu vassanato ‘‘dvīhi meghehī’’ti vuttaṃ. Diyaḍḍhabhikkhusahassato gaṇācariyānaṃ channaṃ janānaṃ adhikattā ‘‘samadhika’’nti vuttaṃ, sādhikanti attho. Ma-kāro padasandhivasena āgato. Akatavatthunti akatapubbaṃ abhinavavatthuṃ.
কণিকারাদযো পুপ্ফরুক্খা, জাতিসুমনাদযো পুপ্ফগচ্ছা। কোট্টনন্তি সযং ছিন্দনং। কোট্টাপনন্তি ‘‘ইমং ছিন্দ ভিন্দা’’তি অঞ্ঞেহি ছেদাপনং। আল়িযা বন্ধনন্তি যথা গচ্ছমূলে উদকং সন্তিট্ঠতি, তথা সমন্ততো বন্ধনং। উদকস্সাতি অকপ্পিযউদকস্স। কপ্পিযউদকসিঞ্চনন্তি ইমিনাৰ সিঞ্চাপনম্পি সঙ্গহিতন্তি দট্ঠব্বং। ননু ‘‘উদকস্স সেচনং সেচাপন’’ন্তি ইমিনাৰ সামঞ্ঞতো কপ্পিযাকপ্পিযউদকসিঞ্চনাদিং সক্কা সঙ্গহেতুং, তস্মা কপ্পিযউদকসিঞ্চনাদি কস্মা ৰিসুং ৰুত্তন্তি? ‘‘আরামাদিঅত্থং রোপিতে অকপ্পিযৰোহারেসুপি কপ্পিযউদকসিঞ্চনাদি ৰট্টতী’’তি ৰক্খমানত্তা ইধাপি ৰিভাগং কত্ৰা কপ্পিযউদকসিঞ্চনাদি ৰিসুং দস্সিতং। হত্থমুখপাদধোৰনন্হানোদকসিঞ্চনন্তি ইমিনাপি পকারন্তরেন কপ্পিযউদকসিঞ্চনমেৰ দস্সেতি। ‘‘অকপ্পিযৰোহারো’’তি কোট্টনখণনাদিৰসেন সযং করণস্সপি কথং সঙ্গহোতি? অকপ্পিযন্তি ৰোহরীযতীতি অকপ্পিযৰোহারোতি অকপ্পিযভূতং করণকারাপনাদি সব্বমেৰ সঙ্গহিতং, ন পন অকপ্পিযৰচনমত্তন্তি দট্ঠব্বং। কপ্পিযৰোহারেপি এসেৰ নযো। সুক্খমাতিকায উজুকরণন্তি ইমিনা পুরাণপণ্ণাদিহরণম্পি সঙ্গহিতন্তি দট্ঠব্বং। কুদালাদীনি ভূমিযং ঠপেত্ৰা ঠানতো হত্থেন গহেত্ৰা ঠানমেৰ পাকটতরন্তি ‘‘ওভাসো’’তি ৰুত্তং।
Kaṇikārādayo puppharukkhā, jātisumanādayo pupphagacchā. Koṭṭananti sayaṃ chindanaṃ. Koṭṭāpananti ‘‘imaṃ chinda bhindā’’ti aññehi chedāpanaṃ. Āḷiyā bandhananti yathā gacchamūle udakaṃ santiṭṭhati, tathā samantato bandhanaṃ. Udakassāti akappiyaudakassa. Kappiyaudakasiñcananti imināva siñcāpanampi saṅgahitanti daṭṭhabbaṃ. Nanu ‘‘udakassa secanaṃ secāpana’’nti imināva sāmaññato kappiyākappiyaudakasiñcanādiṃ sakkā saṅgahetuṃ, tasmā kappiyaudakasiñcanādi kasmā visuṃ vuttanti? ‘‘Ārāmādiatthaṃ ropite akappiyavohāresupi kappiyaudakasiñcanādi vaṭṭatī’’ti vakkhamānattā idhāpi vibhāgaṃ katvā kappiyaudakasiñcanādi visuṃ dassitaṃ. Hatthamukhapādadhovananhānodakasiñcananti imināpi pakārantarena kappiyaudakasiñcanameva dasseti. ‘‘Akappiyavohāro’’ti koṭṭanakhaṇanādivasena sayaṃ karaṇassapi kathaṃ saṅgahoti? Akappiyanti voharīyatīti akappiyavohāroti akappiyabhūtaṃ karaṇakārāpanādi sabbameva saṅgahitaṃ, na pana akappiyavacanamattanti daṭṭhabbaṃ. Kappiyavohārepi eseva nayo. Sukkhamātikāya ujukaraṇanti iminā purāṇapaṇṇādiharaṇampi saṅgahitanti daṭṭhabbaṃ. Kudālādīni bhūmiyaṃ ṭhapetvā ṭhānato hatthena gahetvā ṭhānameva pākaṭataranti ‘‘obhāso’’ti vuttaṃ.
মহাপচ্চরিৰাদম্হি পতিট্ঠপেতুকামো পচ্ছা ৰদতি। ৰনত্থাযাতি ইদং কেচি ‘‘ৰতত্থাযা’’তি পঠন্তি, তেসং ৰতিঅত্থাযাতি অত্থো। অকপ্পিযৰোহারেপি একচ্চং ৰট্টতীতি দস্সেতুং ‘‘ন কেৰলঞ্চ সেস’’ন্তিআদিমাহ। যং কিঞ্চি মাতিকন্তি সুক্খমাতিকং ৰা অসুক্খমাতিকং ৰা। ‘‘কপ্পিযউদকং সিঞ্চিতু’’ন্তি ইমিনা ‘‘কপ্পিযউদকং সিঞ্চথাতি ৰত্তুম্পি ৰট্টতী’’তি দস্সেতি। সযং রোপেতুম্পি ৰট্টতীতি ইমিনা ‘‘রোপেহীতি ৰত্তুং ৰট্টতী’’তিপি সিদ্ধং। অঞ্ঞত্থায ৰা করোন্তস্সাতি ৰত্থুপূজাদিঅত্থং করোন্তস্স। কস্মা ন অনাপত্তীতি ৰত্থুপূজনত্থায গন্থনাদীসু কস্মা ন অনাপত্তি। অনাপত্তিযেৰাতি পটিৰচনং দত্ৰা ইদানি তমেৰ অনাপত্তিভাৰং দস্সেতুং ‘‘যথাহী’’তিআদি ৰুত্তং। তত্থাতি আরামাদিঅত্থায রুক্খরোপনে। তথা ৰত্থুপূজনত্থাযপি অনাপত্তিযেৰাতি রতনত্তযপূজনত্থাযপি কপ্পিযৰোহারেন পরিযাযাদীহি চ গন্থাপনে অনাপত্তিযেৰাতি অত্থো।
Mahāpaccarivādamhi patiṭṭhapetukāmo pacchā vadati. Vanatthāyāti idaṃ keci ‘‘vatatthāyā’’ti paṭhanti, tesaṃ vatiatthāyāti attho. Akappiyavohārepi ekaccaṃ vaṭṭatīti dassetuṃ ‘‘na kevalañca sesa’’ntiādimāha. Yaṃ kiñci mātikanti sukkhamātikaṃ vā asukkhamātikaṃ vā. ‘‘Kappiyaudakaṃsiñcitu’’nti iminā ‘‘kappiyaudakaṃ siñcathāti vattumpi vaṭṭatī’’ti dasseti. Sayaṃ ropetumpi vaṭṭatīti iminā ‘‘ropehīti vattuṃ vaṭṭatī’’tipi siddhaṃ. Aññatthāya vā karontassāti vatthupūjādiatthaṃ karontassa. Kasmā na anāpattīti vatthupūjanatthāya ganthanādīsu kasmā na anāpatti. Anāpattiyevāti paṭivacanaṃ datvā idāni tameva anāpattibhāvaṃ dassetuṃ ‘‘yathāhī’’tiādi vuttaṃ. Tatthāti ārāmādiatthāya rukkharopane. Tathā vatthupūjanatthāyapi anāpattiyevāti ratanattayapūjanatthāyapi kappiyavohārena pariyāyādīhi ca ganthāpane anāpattiyevāti attho.
‘‘তথা ৰত্থুপূজনত্থাযা’’তি হি সামঞ্ঞতো ৰুত্তেপি ‘‘যথা হি তত্থ কপ্পিযৰোহারেন পরিযাযাদীহি চা’’তি ৰুত্তত্তা কপ্পিযৰোহারাদীহি গন্থাপনে এৰ অনাপত্তি ৰিঞ্ঞাযতি, ন সযং গন্থনে, তেনেৰ পরো সযং গন্থনম্পি কস্মা ন ৰট্টতীতি চোদেন্তো ‘‘ননু চা’’তিআদিমাহ। যথা আরামাদিঅত্থং কপ্পিযপথৰিযং সযং রোপেতুম্পি ৰট্টতি, তথা ৰত্থুপূজনত্থায সযং গন্থনেপি কস্মা ন ৰট্টতীতি চোদকস্স অধিপ্পাযো। ৰুত্তন্তিআদি আচরিযস্স পরিহারো। অথ ‘‘ন পন মহাঅট্ঠকথায’’ন্তি কস্মা ৰদতি। মহাপচ্চরিআদীসু ৰুত্তম্পি হি পমাণমেৰাতি নাযং ৰিরোধো, মহাঅট্ঠকথাযং অৰুত্তম্পি তত্থেৰ ৰুত্তেন সংসন্দিত্ৰা পমাণমেৰাতি পতিট্ঠাপেতুং ৰুত্তত্তা। তং কথন্তি মঞ্ঞেয্যাসীতি সম্বন্ধো। মহাঅট্ঠকথাযঞ্চ কপ্পিযউদকসেচনং ৰুত্তং, তং কথন্তি এত্থাযমধিপ্পাযো। কিঞ্চাপি মহাঅট্ঠকথাযং আরামাদিঅত্থায কপ্পিযপথৰিযং সযং রোপনং ন ৰুত্তং, কপ্পিযউদকস্স পন সযং সিঞ্চনং ৰুত্তমেৰ, তস্মা যথা আরামাদিঅত্থায কপ্পিযউদকং সযং সিঞ্চিতুম্পি ৰট্টতি, তথা ৰত্থুপূজনত্থায সযং গন্থনম্পি কস্মা ন ৰট্টতীতি। তম্পি ন ৰিরুজ্ঝতীতি যদেতং আরামাদিঅত্থায সযং রোপনং কপ্পিযউদকসিঞ্চনঞ্চ ৰুত্তং, তম্পি ন ৰিরুজ্ঝতি। কথং তং ন ৰিরুজ্ঝতীতি আহ ‘‘তত্রহী’’তিআদি। এতং ৰুত্তন্তি মালাৰচ্ছং রোপেন্তিপি রোপাপেন্তিপি সিঞ্চন্তিপি সিঞ্চাপেন্তিপীতি এতং ৰুত্তং। অঞ্ঞত্র পন পরিযাযো অত্থীতি ‘‘মালাৰচ্ছং রোপেন্তিপি রোপাপেন্তিপি সিঞ্চন্তিপি সিঞ্চাপেন্তিপী’’তি কুলসঙ্গহত্থায রোপনসিঞ্চনং সন্ধায ৰুত্তত্তা ততো অঞ্ঞত্র আরামাদিঅত্থায মালাৰচ্ছরোপনে পরিযাযো অত্থি। তত্থ পরিযাযং ইধ চ পরিযাযাভাৰং ঞত্ৰাতি তত্থ ‘‘মালাৰচ্ছং রোপেন্তী’’তিআদীসু ‘‘মালাৰচ্ছ’’ন্তি ৰিসেসৰচনসব্ভাৰতো পরিযাযং, ইধ ‘‘গন্থেন্তী’’তিআদীসু তথাৰিধৰিসেসৰচনাভাৰতো পরিযাযাভাৰঞ্চ ঞত্ৰা।
‘‘Tathā vatthupūjanatthāyā’’ti hi sāmaññato vuttepi ‘‘yathā hi tattha kappiyavohārena pariyāyādīhi cā’’ti vuttattā kappiyavohārādīhi ganthāpane eva anāpatti viññāyati, na sayaṃ ganthane, teneva paro sayaṃ ganthanampi kasmā na vaṭṭatīti codento ‘‘nanu cā’’tiādimāha. Yathā ārāmādiatthaṃ kappiyapathaviyaṃ sayaṃ ropetumpi vaṭṭati, tathā vatthupūjanatthāya sayaṃ ganthanepi kasmā na vaṭṭatīti codakassa adhippāyo. Vuttantiādi ācariyassa parihāro. Atha ‘‘na pana mahāaṭṭhakathāya’’nti kasmā vadati. Mahāpaccariādīsu vuttampi hi pamāṇamevāti nāyaṃ virodho, mahāaṭṭhakathāyaṃ avuttampi tattheva vuttena saṃsanditvā pamāṇamevāti patiṭṭhāpetuṃ vuttattā. Taṃ kathanti maññeyyāsīti sambandho. Mahāaṭṭhakathāyañca kappiyaudakasecanaṃ vuttaṃ, taṃ kathanti etthāyamadhippāyo. Kiñcāpi mahāaṭṭhakathāyaṃ ārāmādiatthāya kappiyapathaviyaṃ sayaṃ ropanaṃ na vuttaṃ, kappiyaudakassa pana sayaṃ siñcanaṃ vuttameva, tasmā yathā ārāmādiatthāya kappiyaudakaṃ sayaṃ siñcitumpi vaṭṭati, tathā vatthupūjanatthāya sayaṃ ganthanampi kasmā na vaṭṭatīti. Tampi na virujjhatīti yadetaṃ ārāmādiatthāya sayaṃ ropanaṃ kappiyaudakasiñcanañca vuttaṃ, tampi na virujjhati. Kathaṃ taṃ na virujjhatīti āha ‘‘tatrahī’’tiādi. Etaṃ vuttanti mālāvacchaṃ ropentipi ropāpentipi siñcantipi siñcāpentipīti etaṃ vuttaṃ. Aññatra pana pariyāyo atthīti ‘‘mālāvacchaṃ ropentipi ropāpentipi siñcantipi siñcāpentipī’’ti kulasaṅgahatthāya ropanasiñcanaṃ sandhāya vuttattā tato aññatra ārāmādiatthāya mālāvaccharopane pariyāyo atthi. Tattha pariyāyaṃ idhaca pariyāyābhāvaṃ ñatvāti tattha ‘‘mālāvacchaṃ ropentī’’tiādīsu ‘‘mālāvaccha’’nti visesavacanasabbhāvato pariyāyaṃ, idha ‘‘ganthentī’’tiādīsu tathāvidhavisesavacanābhāvato pariyāyābhāvañca ñatvā.
ননু চ যথা ‘‘গন্থেন্তী’’তি সামঞ্ঞতো ৰুত্তত্তা পরিযাযো ন লব্ভতীতি যস্স কস্সচি অত্থায সযং গন্থনং ন ৰট্টতি, এৰং ‘‘গন্থাপেন্তী’’তি সামঞ্ঞতো ৰুত্তত্তা পরিযাযেন গন্থাপনম্পি ন ৰট্টতীতি আপজ্জতি। এৰঞ্চ সতি পরতো ‘‘এৰং জান, এৰং কতে সোভেয্য, যথা এতানি পুপ্ফানি ন ৰিকিরিযন্তি, তথা করোহীতিআদিনা কপ্পিযৰচনেন কারেতুং ৰট্টতী’’তি ইদং ৰিরুজ্ঝতীতি? ন ৰিরুজ্ঝতি, পরিযাযেন হি কারাপনং গন্থাপনমেৰ ন হোতি, তস্মা যথাৰুত্তনযেন পরিযাযতো কারাপনং ৰট্টতি। সব্বং ৰুত্তনযেনেৰ ৰেদিতব্বন্তি হেট্ঠা ৰুত্তং ৰিনিচ্ছযমেৰ সঙ্খেপতো নিগমেতি। হরণাদীসু কস্মা অনাপত্তীতি ৰত্থুপূজনত্থায হরণাদীসু কস্মা অনাপত্তি। কুলিত্থিআদীনং অত্থায হরণতোতি কুলিত্থিআদীনং হরণস্স তত্থ ৰুত্তত্তাতি অধিপ্পাযো। তেনেৰাহ ‘‘হরণাধিকারে হী’’তিআদি। মালন্তি পুপ্ফদামং। মঞ্জরী ৰিযাতি কুসুমমঞ্জরী ৰিয। হারসদিসন্তি মুত্তাহারসদিসং।
Nanu ca yathā ‘‘ganthentī’’ti sāmaññato vuttattā pariyāyo na labbhatīti yassa kassaci atthāya sayaṃ ganthanaṃ na vaṭṭati, evaṃ ‘‘ganthāpentī’’ti sāmaññato vuttattā pariyāyena ganthāpanampi na vaṭṭatīti āpajjati. Evañca sati parato ‘‘evaṃ jāna, evaṃ kate sobheyya, yathā etāni pupphāni na vikiriyanti, tathā karohītiādinā kappiyavacanena kāretuṃ vaṭṭatī’’ti idaṃ virujjhatīti? Na virujjhati, pariyāyena hi kārāpanaṃ ganthāpanameva na hoti, tasmā yathāvuttanayena pariyāyato kārāpanaṃ vaṭṭati. Sabbaṃ vuttanayeneva veditabbanti heṭṭhā vuttaṃ vinicchayameva saṅkhepato nigameti. Haraṇādīsu kasmā anāpattīti vatthupūjanatthāya haraṇādīsu kasmā anāpatti. Kulitthiādīnaṃ atthāya haraṇatoti kulitthiādīnaṃ haraṇassa tattha vuttattāti adhippāyo. Tenevāha ‘‘haraṇādhikāre hī’’tiādi. Mālanti pupphadāmaṃ. Mañjarī viyāti kusumamañjarī viya. Hārasadisanti muttāhārasadisaṃ.
পাচিত্তিযঞ্চেৰ দুক্কটঞ্চাতি পথৰীখণনপচ্চযা পাচিত্তিযং, কুলসঙ্গহপচ্চযা দুক্কটং। অকপ্পিযৰোহারেনাতি ‘‘ইদং খণ, ইদং রোপেহী’’তিআদিঅকপ্পিযৰোহারেন। দুক্কটমেৰাতি কুলসঙ্গহপচ্চযা দুক্কটং। উভযত্থাতি কপ্পিযাকপ্পিযপথৰিযং। সব্বত্থাতি কুলসঙ্গহপরিভোগআরামাদিঅত্থায রোপিতে। দুক্কটম্পীতি ন কেৰলং পাচিত্তিযমেৰ। কপ্পিযেনাতি কপ্পিযেন উদকেন। তেসংযেৰ দ্ৰিন্নন্তি কুলদূসনপরিভোগানং। দুক্কটন্তি কুলসঙ্গহত্থায সযং সিঞ্চনে কপ্পিযৰোহারেন অকপ্পিযৰোহারেন ৰা সিঞ্চাপনে চ দুক্কটং, পরিভোগত্থায পন সযং সিঞ্চনে অকপ্পিযৰোহারেন সিঞ্চাপনে চ দুক্কটং। আপত্তিবহুলতা ৰেদিতব্বাতি এত্থ সযং সিঞ্চনে ধারাপচ্ছেদগণনায আপত্তিগণনা ৰেদিতব্বা। সিঞ্চাপনে পন পুনপ্পুনং আণাপেন্তস্স ৰাচায ৰাচায আপত্তি, সকিং আণত্তস্স বহূনং সিঞ্চনেপি একাৰ।
Pācittiyañceva dukkaṭañcāti pathavīkhaṇanapaccayā pācittiyaṃ, kulasaṅgahapaccayā dukkaṭaṃ. Akappiyavohārenāti ‘‘idaṃ khaṇa, idaṃ ropehī’’tiādiakappiyavohārena. Dukkaṭamevāti kulasaṅgahapaccayā dukkaṭaṃ. Ubhayatthāti kappiyākappiyapathaviyaṃ. Sabbatthāti kulasaṅgahaparibhogaārāmādiatthāya ropite. Dukkaṭampīti na kevalaṃ pācittiyameva. Kappiyenāti kappiyena udakena. Tesaṃyeva dvinnanti kuladūsanaparibhogānaṃ. Dukkaṭanti kulasaṅgahatthāya sayaṃ siñcane kappiyavohārena akappiyavohārena vā siñcāpane ca dukkaṭaṃ, paribhogatthāya pana sayaṃ siñcane akappiyavohārena siñcāpane ca dukkaṭaṃ. Āpattibahulatā veditabbāti ettha sayaṃ siñcane dhārāpacchedagaṇanāya āpattigaṇanā veditabbā. Siñcāpane pana punappunaṃ āṇāpentassa vācāya vācāya āpatti, sakiṃ āṇattassa bahūnaṃ siñcanepi ekāva.
দুক্কটপাচিত্তিযানীতি কুলসঙ্গহপচ্চযা দুক্কটং, ভূতগামপাতব্যতায পাচিত্তিযং। অঞ্ঞত্থাতি ৰত্থুপূজাদিঅত্থায ওচিননে। সকিং আণত্তোতি অকপ্পিযৰোহারেন আণত্তো। পাচিত্তিযমেৰাতি অকপ্পিযৰচনেন আণত্তত্তা পাচিত্তিযং। কপ্পিযৰচনেন পন ৰত্থুপূজাদিঅত্থায ওচিনাপেন্তস্স অনাপত্তিযেৰ।
Dukkaṭapācittiyānīti kulasaṅgahapaccayā dukkaṭaṃ, bhūtagāmapātabyatāya pācittiyaṃ. Aññatthāti vatthupūjādiatthāya ocinane. Sakiṃ āṇattoti akappiyavohārena āṇatto. Pācittiyamevāti akappiyavacanena āṇattattā pācittiyaṃ. Kappiyavacanena pana vatthupūjādiatthāya ocināpentassa anāpattiyeva.
গন্থনেন নিব্বত্তং গন্তিমং। এস নযো সেসেসুপি। ন ৰট্টতীতি কুলসঙ্গহত্থায ৰত্থুপূজাদিঅত্থায ৰা ৰুত্তনযেন করোন্তস্স চ কারাপেন্তস্স চ দুক্কটন্তি অত্থো। পুরিমনযেনেৰাতি ‘‘ভিক্খুস্স ৰা’’তিআদিনা ৰুত্তনযেন। ধম্মাসনৰিতানে বদ্ধকণ্টকেসু পুপ্ফানি ৰিজ্ঝিত্ৰা ঠপেন্তীতি সম্বন্ধো। উপরূপরি ৰিজ্ঝিত্ৰা ছত্তসদিসং কত্ৰা আৰুণনতো ‘‘ছত্তাতিছত্তং ৰিযা’’তি ৰুত্তং। ‘‘কদলিক্খন্ধম্হী’’তিআদিনা ৰুত্তং সব্বমেৰ সন্ধায ‘‘তং অতিওল়ারিকমেৰা’’তি ৰুত্তং, সযং করোন্তস্স অকপ্পিযৰচনেনেৰ কারাপেন্তস্স চ দুক্কটমেৰাতি অত্থো। পুপ্ফৰিজ্ঝনত্থন্তি ৰুত্তত্তা পুপ্ফানি ৰিজ্ঝিতুংযেৰ কণ্টকং বন্ধিতুং ন ৰট্টতি, পুপ্ফদামাদিবন্ধনত্থং পন ৰট্টতি। কণ্টকম্পি বন্ধিতুং ন ৰট্টতীতি চ ইদং অট্ঠকথাচরিযপ্পমাণেন গহেতব্বং। পৰেসেতুং ন ৰট্টতীতি ৰুত্তত্তা পুপ্ফচ্ছিদ্দে অপৰেসেত্ৰা উপরূপরি ঠপেতুং ৰট্টতি। জালমযং ৰিতানং জালৰিতানং। নাগদন্তকম্পি সচ্ছিদ্দকংযেৰ গহেতব্বং। পুপ্ফপটিচ্ছকং দণ্ডাদীহি কতপুপ্ফাধারণং, তম্পি সচ্ছিদ্দমেৰ ইধ ৰুত্তং। অসোকপিণ্ডিযাতি অসোকপুপ্ফমঞ্জরিকায। ‘‘ধম্মরজ্জু নাম চেতিযং ৰা বোধিং ৰা পুপ্ফপৰেসনত্থং আৰিজ্ঝিত্ৰা বদ্ধরজ্জূ’’তি মহাগণ্ঠিপদে মজ্ঝিমগণ্ঠিপদে চ ৰুত্তং, তস্মা তথাবদ্ধায রজ্জুযা চেতিযস্স চ অন্তরে পুপ্ফানি পৰেসেতুং ৰট্টতীতি ৰিঞ্ঞাযতি। গণ্ঠিপদে পন ‘‘ধম্মরজ্জুন্তি সিথিলং ৰট্টিকং রজ্জুং কত্ৰা বোধিং ৰা চেতিযং ৰা পরিক্খিপিত্ৰা ধম্মাসনে ৰা লম্বিত্ৰা তত্থ পুপ্ফানি পৰেসেন্তী’’তি ৰুত্তং, তস্মা সিথিলৰট্টিকায রজ্জুযা অন্তরেপি পুপ্ফানি পৰেসেতুং ৰট্টতীতি ৰিঞ্ঞাযতি, ৰীমংসিত্ৰা যুত্ততরং গহেতব্বং। উভযত্থাপি পনেত্থ নেৰত্থি ৰিরোধোতি অম্হাকং খন্তি।
Ganthanena nibbattaṃ gantimaṃ. Esa nayo sesesupi. Na vaṭṭatīti kulasaṅgahatthāya vatthupūjādiatthāya vā vuttanayena karontassa ca kārāpentassa ca dukkaṭanti attho. Purimanayenevāti ‘‘bhikkhussa vā’’tiādinā vuttanayena. Dhammāsanavitāne baddhakaṇṭakesu pupphāni vijjhitvā ṭhapentīti sambandho. Uparūpari vijjhitvā chattasadisaṃ katvā āvuṇanato ‘‘chattātichattaṃ viyā’’ti vuttaṃ. ‘‘Kadalikkhandhamhī’’tiādinā vuttaṃ sabbameva sandhāya ‘‘taṃ atioḷārikamevā’’ti vuttaṃ, sayaṃ karontassa akappiyavacaneneva kārāpentassa ca dukkaṭamevāti attho. Pupphavijjhanatthanti vuttattā pupphāni vijjhituṃyeva kaṇṭakaṃ bandhituṃ na vaṭṭati, pupphadāmādibandhanatthaṃ pana vaṭṭati. Kaṇṭakampi bandhituṃ na vaṭṭatīti ca idaṃ aṭṭhakathācariyappamāṇena gahetabbaṃ. Pavesetuṃ na vaṭṭatīti vuttattā pupphacchidde apavesetvā uparūpari ṭhapetuṃ vaṭṭati. Jālamayaṃ vitānaṃ jālavitānaṃ. Nāgadantakampi sacchiddakaṃyeva gahetabbaṃ. Pupphapaṭicchakaṃ daṇḍādīhi katapupphādhāraṇaṃ, tampi sacchiddameva idha vuttaṃ. Asokapiṇḍiyāti asokapupphamañjarikāya. ‘‘Dhammarajju nāma cetiyaṃ vā bodhiṃ vā pupphapavesanatthaṃ āvijjhitvā baddharajjū’’ti mahāgaṇṭhipade majjhimagaṇṭhipade ca vuttaṃ, tasmā tathābaddhāya rajjuyā cetiyassa ca antare pupphāni pavesetuṃ vaṭṭatīti viññāyati. Gaṇṭhipade pana ‘‘dhammarajjunti sithilaṃ vaṭṭikaṃ rajjuṃ katvā bodhiṃ vā cetiyaṃ vā parikkhipitvā dhammāsane vā lambitvā tattha pupphāni pavesentī’’ti vuttaṃ, tasmā sithilavaṭṭikāya rajjuyā antarepi pupphāni pavesetuṃ vaṭṭatīti viññāyati, vīmaṃsitvā yuttataraṃ gahetabbaṃ. Ubhayatthāpi panettha nevatthi virodhoti amhākaṃ khanti.
মত্থকদামন্তি ধম্মাসনাদিমত্থকে লম্বকদামং। পুপ্ফেহি ৰেঠেন্তীতি পুপ্ফদামেন ৰেঠেন্তি। তেসংযেৰাতি উপ্পলাদীনংযেৰ। ৰাকেন ৰা দণ্ডকেন ৰাতি ৰিসুং অচ্ছিন্নেন পুপ্ফসহিতেনেৰ ৰাকেন ৰা দণ্ডকেন ৰা। খন্ধে ঠপিতকাসাৰস্সাতি খন্ধে ঠপিতসঙ্ঘাটিং সন্ধায ৰুত্তং। তঞ্হি তথা বন্ধিতুং সক্কা ভৰেয্য। ইমিনাৰ অঞ্ঞম্পি তাদিসং কাসাৰং ৰা ৰত্থং ৰা ৰুত্তনযেন বন্ধিত্ৰা তত্থ পুপ্ফানি পক্খিপিতুং ৰট্টতীতি সিদ্ধং। অংসভণ্ডিকং পসিব্বকে পক্খিত্তসদিসত্তা ৰেঠিমং নাম ন জাতং, তস্মা সিথিলবন্ধস্স অন্তরন্তরা পক্খিপিতুং ৰট্টতীতি ৰদন্তি।
Matthakadāmanti dhammāsanādimatthake lambakadāmaṃ. Pupphehi veṭhentīti pupphadāmena veṭhenti. Tesaṃyevāti uppalādīnaṃyeva. Vākena vā daṇḍakena vāti visuṃ acchinnena pupphasahiteneva vākena vā daṇḍakena vā. Khandhe ṭhapitakāsāvassāti khandhe ṭhapitasaṅghāṭiṃ sandhāya vuttaṃ. Tañhi tathā bandhituṃ sakkā bhaveyya. Imināva aññampi tādisaṃ kāsāvaṃ vā vatthaṃ vā vuttanayena bandhitvā tattha pupphāni pakkhipituṃ vaṭṭatīti siddhaṃ. Aṃsabhaṇḍikaṃ pasibbake pakkhittasadisattā veṭhimaṃ nāma na jātaṃ, tasmā sithilabandhassa antarantarā pakkhipituṃ vaṭṭatīti vadanti.
পুপ্ফপটে চ দট্ঠব্বন্তি পুপ্ফপটং করোন্তস্স দীঘতো পুপ্ফদামস্স হরণপচ্চাহরণৰসেন পূরণং সন্ধায ৰুত্তং। তিরিযতো হরণং পন ৰাযিমং নাম হোতি, ন পূরিমং। পুরিমট্ঠানং অতিক্কামেতীতি এত্থ ‘‘অফুসাপেত্ৰাপি অতিক্কামেন্তস্স আপত্তিযেৰা’’তি তীসুপি গণ্ঠিপদেসু ৰুত্তং। ‘‘পুরিমট্ঠানং অতিক্কামেতী’’তি অৰিসেসেন ৰুত্তত্তা তং যুত্তং। কেচি পন ‘‘অঞ্ঞমঞ্ঞং অফুসাপেত্ৰা অনেকক্খত্তুং পরিক্খিপিতুং ৰট্টতী’’তি ৰদন্তীতি ৰুত্তং, তত্থ কারণং ন দিস্সতি। বন্ধিতুং ৰট্টতীতি পুপ্ফরহিতায সুত্তকোটিযা ৰাককোটিযা ৰা বন্ধিতুং ৰট্টতি। একৰারং হরিত্ৰা ৰা পরিক্খিপিত্ৰা ৰাতি ইদং পুব্বে ৰুত্তচেতিযাদিপরিক্খেপং পুপ্ফপটকরণঞ্চ সন্ধায ৰুত্তং, তস্মা চেতিযং ৰা বোধিং ৰা পরিক্খিপন্তেন একৰারং পরিক্খিপিত্ৰা পুরিমট্ঠানং সম্পত্তে অঞ্ঞস্স দাতব্বং, তেনপি একৰারং পরিক্খিপিত্ৰা তথেৰ কাতব্বং। পুপ্ফপটং করোন্তেন চ একৰারং হরিত্ৰা অঞ্ঞস্স দাতব্বং, তেনপি তথেৰ কাতব্বং। সচেপি দ্ৰেযেৰ ভিক্খূ উভোসু পস্সেসু ঠত্ৰা পরিযাযেন হরন্তি, ৰট্টতিযেৰাতি ৰদন্তি।
Pupphapaṭeca daṭṭhabbanti pupphapaṭaṃ karontassa dīghato pupphadāmassa haraṇapaccāharaṇavasena pūraṇaṃ sandhāya vuttaṃ. Tiriyato haraṇaṃ pana vāyimaṃ nāma hoti, na pūrimaṃ. Purimaṭṭhānaṃ atikkāmetīti ettha ‘‘aphusāpetvāpi atikkāmentassa āpattiyevā’’ti tīsupi gaṇṭhipadesu vuttaṃ. ‘‘Purimaṭṭhānaṃ atikkāmetī’’ti avisesena vuttattā taṃ yuttaṃ. Keci pana ‘‘aññamaññaṃ aphusāpetvā anekakkhattuṃ parikkhipituṃ vaṭṭatī’’ti vadantīti vuttaṃ, tattha kāraṇaṃ na dissati. Bandhituṃ vaṭṭatīti puppharahitāya suttakoṭiyā vākakoṭiyā vā bandhituṃ vaṭṭati. Ekavāraṃ haritvā vā parikkhipitvā vāti idaṃ pubbe vuttacetiyādiparikkhepaṃ pupphapaṭakaraṇañca sandhāya vuttaṃ, tasmā cetiyaṃ vā bodhiṃ vā parikkhipantena ekavāraṃ parikkhipitvā purimaṭṭhānaṃ sampatte aññassa dātabbaṃ, tenapi ekavāraṃ parikkhipitvā tatheva kātabbaṃ. Pupphapaṭaṃ karontena ca ekavāraṃ haritvā aññassa dātabbaṃ, tenapi tatheva kātabbaṃ. Sacepi dveyeva bhikkhū ubhosu passesu ṭhatvā pariyāyena haranti, vaṭṭatiyevāti vadanti.
পূরিতন্তি দীঘতো পসারণৰসেন পূরিতং। ৰাযিতুং ন লভতীতি দীঘতো পসারিতে তিরিযতো হরণং ৰাযনং নাম হোতীতি একৰারম্পি পুপ্ফগুণং তিরিযতো হরিতুং ন ৰট্টতি। পুপ্ফানি ঠপেন্তেনাতি অগন্থিতানি পাকতিকপুপ্ফানি ঠপেন্তেন। পুপ্ফদামং পন পূজনত্থায ভূমিযং ঠপেন্তেন ফুসাপেত্ৰা ৰা অফুসাপেত্ৰা ৰা দিগুণং কত্ৰা ঠপেতুং ন ৰট্টতীতি ৰদন্তি। ঘটিকদামওলম্বকোতি অন্তে ঘটিকাকারযুত্তো যমকদামওলম্বকো। একেকং পন দামং নিক্খন্তসুত্তকোটিযাৰ বন্ধিত্ৰা ওলম্বিতুং ৰট্টতি, পুপ্ফদামদ্ৰযং সঙ্ঘটিতুকামেনপি নিক্খন্তসুত্তকোটিযাৰ সুত্তকোটিং সঙ্ঘটিতুং ৰট্টতি। অড্ঢচন্দাকারেন মালাগুণপরিক্খেপোতি অড্ঢচন্দাকারেন মালাগুণস্স পুনপ্পুনং হরণপচ্চাহরণৰসেন পূরেত্ৰা পরিক্খিপনং। তেনেৰ তং পূরিমে পৰিট্ঠং, তস্মা এতম্পি অড্ঢচন্দাকারং পুনপ্পুনং হরণপচ্চাহরণৰসেন পূরিতং ন ৰট্টতি। একৰারং পন অড্ঢচন্দাকারেন মালাগুণং হরিতুং ৰট্টতীতি ৰদন্তি। পুপ্ফদামকরণন্তি এত্থ সুত্তকোটিযং গহেত্ৰাপি একতো কাতুং ন ৰট্টতীতি ৰদন্তি। গেণ্ডুকখরপত্তদামানং পটিক্খিত্তত্তা চেলাদীহি কতদামম্পি ন ৰট্টতি অকপ্পিযানুলোমত্তাতি ৰদন্তি।
Pūritanti dīghato pasāraṇavasena pūritaṃ. Vāyituṃ na labhatīti dīghato pasārite tiriyato haraṇaṃ vāyanaṃ nāma hotīti ekavārampi pupphaguṇaṃ tiriyato harituṃ na vaṭṭati. Pupphāni ṭhapentenāti aganthitāni pākatikapupphāni ṭhapentena. Pupphadāmaṃ pana pūjanatthāya bhūmiyaṃ ṭhapentena phusāpetvā vā aphusāpetvā vā diguṇaṃ katvā ṭhapetuṃ na vaṭṭatīti vadanti. Ghaṭikadāmaolambakoti ante ghaṭikākārayutto yamakadāmaolambako. Ekekaṃ pana dāmaṃ nikkhantasuttakoṭiyāva bandhitvā olambituṃ vaṭṭati, pupphadāmadvayaṃ saṅghaṭitukāmenapi nikkhantasuttakoṭiyāva suttakoṭiṃ saṅghaṭituṃ vaṭṭati. Aḍḍhacandākārena mālāguṇaparikkhepoti aḍḍhacandākārena mālāguṇassa punappunaṃ haraṇapaccāharaṇavasena pūretvā parikkhipanaṃ. Teneva taṃ pūrime paviṭṭhaṃ, tasmā etampi aḍḍhacandākāraṃ punappunaṃ haraṇapaccāharaṇavasena pūritaṃ na vaṭṭati. Ekavāraṃ pana aḍḍhacandākārena mālāguṇaṃ harituṃ vaṭṭatīti vadanti. Pupphadāmakaraṇanti ettha suttakoṭiyaṃ gahetvāpi ekato kātuṃ na vaṭṭatīti vadanti. Geṇḍukakharapattadāmānaṃ paṭikkhittattā celādīhi katadāmampi na vaṭṭati akappiyānulomattāti vadanti.
‘‘লাসিযনাটকং নাটেন্তী’’তি ৰত্ৰা তমেৰ পরিযাযন্তরেন দস্সেতুং ‘‘রেচকং দেন্তী’’তি ৰুত্তং, অভিনযং দস্সেন্তীতি অত্থো, অত্তনো অধিপ্পাযং পকাসেত্ৰা ‘‘এৰং নচ্চিতব্ব’’ন্তি পঠমং উট্ঠহিত্ৰা নচ্চনাকারং দস্সেন্তীতি ৰুত্তং হোতি। কেচি পন ‘‘মুখে অঙ্গুলিযো পক্খিপিত্ৰা সদ্দং করোন্তা চক্কমিৰ অত্তানং ভমযমানা রেচকং দেন্তি নামা’’তি ৰদন্তি। একেকায পন্তিযা অট্ঠ অট্ঠ পদানি অস্সাতি অট্ঠপদং। ‘‘অট্ঠাপদ’’ন্তিপি পঠন্তি। দসপদেপি এসেৰ নযো। পদানীতি চ সারিআদীনং পতিট্ঠানট্ঠানানি। দসপদং নাম দ্ৰীহি পন্তীহি ৰীসতিযা পদেহি কীল়নজূতং। আকাসেযেৰ কীল়ন্তীতি ‘‘অযং সারী অসুকপদং মযা নীতা, অযং অসুকপদ’’ন্তি কেৰলং মুখেনেৰ ৰদন্তা আকাসেযেৰ জূতং কীল়ন্তি। জূতফলকেতি জূতমণ্ডলে। পাসককীল়ায কীল়ন্তীতি পাসকং ৰুচ্চতি ছসু পস্সেসু একেকং যাৰ ছক্কং দস্সেত্ৰা কতকীল়নং, তং ৰড্ঢেত্ৰা যথালদ্ধএককাদিৰসেন সারিযো অপনেন্তা উপনেন্তা চ কীল়ন্তি। ঘটেন কীল়া ঘটিকাতি একে।
‘‘Lāsiyanāṭakaṃnāṭentī’’ti vatvā tameva pariyāyantarena dassetuṃ ‘‘recakaṃ dentī’’ti vuttaṃ, abhinayaṃ dassentīti attho, attano adhippāyaṃ pakāsetvā ‘‘evaṃ naccitabba’’nti paṭhamaṃ uṭṭhahitvā naccanākāraṃ dassentīti vuttaṃ hoti. Keci pana ‘‘mukhe aṅguliyo pakkhipitvā saddaṃ karontā cakkamiva attānaṃ bhamayamānā recakaṃ denti nāmā’’ti vadanti. Ekekāya pantiyā aṭṭha aṭṭha padāni assāti aṭṭhapadaṃ. ‘‘Aṭṭhāpada’’ntipi paṭhanti. Dasapadepi eseva nayo. Padānīti ca sāriādīnaṃ patiṭṭhānaṭṭhānāni. Dasapadaṃ nāma dvīhi pantīhi vīsatiyā padehi kīḷanajūtaṃ. Ākāseyeva kīḷantīti ‘‘ayaṃ sārī asukapadaṃ mayā nītā, ayaṃ asukapada’’nti kevalaṃ mukheneva vadantā ākāseyeva jūtaṃ kīḷanti. Jūtaphalaketi jūtamaṇḍale. Pāsakakīḷāya kīḷantīti pāsakaṃ vuccati chasu passesu ekekaṃ yāva chakkaṃ dassetvā katakīḷanaṃ, taṃ vaḍḍhetvā yathāladdhaekakādivasena sāriyo apanentā upanentā ca kīḷanti. Ghaṭena kīḷā ghaṭikāti eke.
মঞ্জট্ঠিযা ৰাতি মঞ্জট্ঠিরুক্খসারং গহেত্ৰা পক্ককসাৰং সন্ধায ৰদতি। সলাকহত্থন্তি তালহীরাদীনং কলাপস্সেতং অধিৰচনং। বহূসু সলাকাসু ৰিসেসরহিতং একং সলাকং গহেত্ৰা তাসু পক্খিপিত্ৰা পুন তংযেৰ উদ্ধরন্তা সলাকহত্থেন কীল়ন্তীতি কেচি। পণ্ণেন ৰংসাকারেন কতা নাল়িকা পণ্ণনাল়িকা। তেনেৰাহ ‘‘তং ধমন্তা’’তি। পুচ্ছন্তস্স মুখাগতং অক্খরং গহেত্ৰা নট্ঠমুট্ঠিলাভালাভাদিজাননকীল়া অক্খরিকাতিপি ৰদন্তি। হত্থিস্মিন্তি নিমিত্তত্থে ভুম্মং, হত্থিনিমিত্তসিপ্পেতি অত্থো। অস্সস্মিন্তিআদীসুপি এসেৰ নযো। ‘‘উস্সেল়েন্তি অপ্ফোটেন্তী’’তি দ্ৰিন্নং পদানং অত্থো পাকটোযেৰাতি ন ৰুত্তো। তত্থ উস্সেল়েন্তীতি মুখেন উস্সেল়নসদ্দং পমুঞ্চন্তি, মহন্তং কত্ৰা অব্যত্তসদ্দং পৰত্তেন্তীতি অত্থো। ‘‘অজানং সঞ্ঞং দেন্তা অজপালকা ৰিয মুখেন ৰাতং নিচ্ছারেন্তা সুখুমং অব্যত্তনাদং পৰত্তেন্তী’’তিপি ৰদন্তি। অপ্ফোটেন্তীতি ভুজহত্থসঙ্ঘট্টনসদ্দং পৰত্তেন্তি, ৰামহত্থং উরে ঠপেত্ৰা দক্খিণেন পাণিনা তত্থ তাল়নেন সদ্দং করোন্তীতি অত্থো। মুখডিণ্ডিমন্তি মুখভেরিযা এতং অধিৰচনং।
Mañjaṭṭhiyā vāti mañjaṭṭhirukkhasāraṃ gahetvā pakkakasāvaṃ sandhāya vadati. Salākahatthanti tālahīrādīnaṃ kalāpassetaṃ adhivacanaṃ. Bahūsu salākāsu visesarahitaṃ ekaṃ salākaṃ gahetvā tāsu pakkhipitvā puna taṃyeva uddharantā salākahatthena kīḷantīti keci. Paṇṇena vaṃsākārena katā nāḷikā paṇṇanāḷikā. Tenevāha ‘‘taṃ dhamantā’’ti. Pucchantassa mukhāgataṃ akkharaṃ gahetvā naṭṭhamuṭṭhilābhālābhādijānanakīḷā akkharikātipi vadanti. Hatthisminti nimittatthe bhummaṃ, hatthinimittasippeti attho. Assasmintiādīsupi eseva nayo. ‘‘Usseḷenti apphoṭentī’’ti dvinnaṃ padānaṃ attho pākaṭoyevāti na vutto. Tattha usseḷentīti mukhena usseḷanasaddaṃ pamuñcanti, mahantaṃ katvā abyattasaddaṃ pavattentīti attho. ‘‘Ajānaṃ saññaṃ dentā ajapālakā viya mukhena vātaṃ nicchārentā sukhumaṃ abyattanādaṃ pavattentī’’tipi vadanti. Apphoṭentīti bhujahatthasaṅghaṭṭanasaddaṃ pavattenti, vāmahatthaṃ ure ṭhapetvā dakkhiṇena pāṇinā tattha tāḷanena saddaṃ karontīti attho. Mukhaḍiṇḍimanti mukhabheriyā etaṃ adhivacanaṃ.
৪৩২. পসাদাৰহেনাতি পসাদজননকেন। অভিক্কমনং অভিক্কন্তন্তি আহ ‘‘গমনেনা’’তি। পটিক্কমনং পটিক্কন্তং। নিৰত্তনেনাতি নিৰত্তিমত্তং দস্সেতি। নিৰত্তেত্ৰা পন গমনং গমনমেৰ। অভিমুখং লোকিতং আলোকিতন্তি আহ ‘‘পুরতো দস্সনেনা’’তি। ইতো চিতো চ দস্সনেনাতি অনুদিসাপেক্খনং দস্সেতি। যংদিসাভিমুখো গচ্ছতি তিট্ঠতি নিসীদতি, তদভিমুখং পেক্খনং আলোকিতং, তদনুগতদিসালোকনং ‘‘ৰিলোকিত’’ন্তি হি ৰুচ্চতি। অঞ্ঞানিপি হেট্ঠা উপরি পচ্ছতো পেক্খনৰসেন ওলোকিতউল্লোকিতাপলোকিতানি নাম হোন্তি। তানি পন ন সমণসারুপ্পানি অপ্পসাদাৰহানি, তেনেৰেত্থ আলোকিতৰিলোকিতানেৰ গহিতানি। তেসন্তি সমাসে গুণীভূতানিপি পব্বানি পরামসতি। ‘‘পব্বসঙ্কোচনেনা’’তি হি ৰুত্তত্তা পব্বানি তত্থ গুণীভূতানি সঙ্কোচনস্স পধানত্তা। সতিসম্পজঞ্ঞেহীতি সাত্থকতাদিপরিগ্গাহিকায সতিযা তথাপৰত্তসম্পজঞ্ঞেন চ সমন্ততো পকারেহি, পকট্ঠং ৰা সৰিসেসং জানাতীতি সম্পজানো, তস্স ভাৰো সম্পজঞ্ঞং। তথাপৰত্তঞাণস্সেতং অধিৰচনং। অভিসঙ্খতত্তাতি সম্মা পৰত্তিতত্তা। হেট্ঠাখিত্তচক্খূতি খন্ধং অনামেত্ৰাৰ অধোখিত্তচক্খু। খন্ধং নামেত্ৰা হি হেট্ঠাৰলোকনং ন সমণসারুপ্পং। ‘‘ওক্খিত্তচক্খূ’’তি চ ইমিনা যুগমত্তদস্সিতা ৰুত্তা।
432.Pasādāvahenāti pasādajananakena. Abhikkamanaṃ abhikkantanti āha ‘‘gamanenā’’ti. Paṭikkamanaṃ paṭikkantaṃ. Nivattanenāti nivattimattaṃ dasseti. Nivattetvā pana gamanaṃ gamanameva. Abhimukhaṃ lokitaṃ ālokitanti āha ‘‘purato dassanenā’’ti. Ito cito ca dassanenāti anudisāpekkhanaṃ dasseti. Yaṃdisābhimukho gacchati tiṭṭhati nisīdati, tadabhimukhaṃ pekkhanaṃ ālokitaṃ, tadanugatadisālokanaṃ ‘‘vilokita’’nti hi vuccati. Aññānipi heṭṭhā upari pacchato pekkhanavasena olokitaullokitāpalokitāni nāma honti. Tāni pana na samaṇasāruppāni appasādāvahāni, tenevettha ālokitavilokitāneva gahitāni. Tesanti samāse guṇībhūtānipi pabbāni parāmasati. ‘‘Pabbasaṅkocanenā’’ti hi vuttattā pabbāni tattha guṇībhūtāni saṅkocanassa padhānattā. Satisampajaññehīti sātthakatādipariggāhikāya satiyā tathāpavattasampajaññena ca samantato pakārehi, pakaṭṭhaṃ vā savisesaṃ jānātīti sampajāno, tassa bhāvo sampajaññaṃ. Tathāpavattañāṇassetaṃ adhivacanaṃ. Abhisaṅkhatattāti sammā pavattitattā. Heṭṭhākhittacakkhūti khandhaṃ anāmetvāva adhokhittacakkhu. Khandhaṃ nāmetvā hi heṭṭhāvalokanaṃ na samaṇasāruppaṃ. ‘‘Okkhittacakkhū’’ti ca iminā yugamattadassitā vuttā.
বোন্দোতি লোলো মন্দধাতুকোতি অত্থো। ভকুটিং কত্ৰাতি ভমুকভেদং কত্ৰা। সাখল্যেন যুত্তাতি ‘‘তত্থ কতমং সাখল্যং? যা সা ৰাচা নেলা কণ্ণসুখা’’তিআদিনা (ধ॰ স॰ ১৩৫০) নযেন ৰুত্তসাখল্যেন সমন্নাগতা, মুদুৰচনাতি অত্থো। নেলাতি এলং ৰুচ্চতি দোসো, নাস্সা এলন্তি নেলা, নিদ্দোসাতি অত্থো। কণ্ণসুখাতি ব্যঞ্জনমধুরতায কণ্ণানং সুখা, সূচিনা ৰিজ্ঝনং ৰিয কণ্ণসূলং ন জনেতি। দাননিবদ্ধানীতি নিবদ্ধদানানি।
Bondoti lolo mandadhātukoti attho. Bhakuṭiṃ katvāti bhamukabhedaṃ katvā. Sākhalyena yuttāti ‘‘tattha katamaṃ sākhalyaṃ? Yā sā vācā nelā kaṇṇasukhā’’tiādinā (dha. sa. 1350) nayena vuttasākhalyena samannāgatā, muduvacanāti attho. Nelāti elaṃ vuccati doso, nāssā elanti nelā, niddosāti attho. Kaṇṇasukhāti byañjanamadhuratāya kaṇṇānaṃ sukhā, sūcinā vijjhanaṃ viya kaṇṇasūlaṃ na janeti. Dānanibaddhānīti nibaddhadānāni.
‘‘সারিপুত্তমোগ্গল্লানে আমন্তেসী’’তি ৰত্ৰা ‘‘গচ্ছথ তুম্হে সারিপুত্তা’’তি ৰচনতো ‘‘সারিপুত্তা’’তি ইদং একসেসনযেন ৰুত্তন্তি অযমত্থো পাকটোযেৰাতি ন ৰুত্তো। ‘‘সারিপুত্তা’’তি হি ইদং একসেসনযেন ৰুত্তং ৰিরূপেকসেসস্সপি ইচ্ছিতত্তা, তেনেৰেত্থ বহুৰচননিদ্দেসো কতোতি। সদ্ধস্স পসন্নস্সাতি রতনত্তযস্স সদ্ধায সমন্নাগতস্স ততোযেৰ চ পসন্নস্স, কম্মফলসদ্ধায ৰা সমন্নাগতত্তা সদ্ধস্স রতনত্তযপ্পসাদবহুলতায পসন্নস্স।
‘‘Sāriputtamoggallāne āmantesī’’ti vatvā ‘‘gacchatha tumhe sāriputtā’’ti vacanato ‘‘sāriputtā’’ti idaṃ ekasesanayena vuttanti ayamattho pākaṭoyevāti na vutto. ‘‘Sāriputtā’’ti hi idaṃ ekasesanayena vuttaṃ virūpekasesassapi icchitattā, tenevettha bahuvacananiddeso katoti. Saddhassa pasannassāti ratanattayassa saddhāya samannāgatassa tatoyeva ca pasannassa, kammaphalasaddhāya vā samannāgatattā saddhassa ratanattayappasādabahulatāya pasannassa.
৪৩৩. আপত্তিং রোপেতব্বাতি কুলদূসককম্মেন আপন্নাপত্তিং রোপেতব্বা। তস্মিং ৰিহারেতি বহিগামে ৰিহারং সন্ধায ৰুত্তং। অন্তোগামে ৰিহারো পন ‘‘তস্মিং গামে ন ৰসিতব্ব’’ন্তি ইমিনাৰ সঙ্গহিতো গামগ্গহণেনেৰ গহিতত্তা। ‘‘তস্মিং ৰিহারে’’তি ৰচনতো তস্স গামস্স সামন্তা অঞ্ঞস্মিং ৰিহারে ৰসিতুং ৰট্টতি। সামন্তগামে পিণ্ডায ন চরিতব্বন্তি তস্মিং ৰিহারে ৰাসস্স পটিক্খিত্তত্তা যদি তত্থ ৰসতি, তেন সামন্তগামেপি পিণ্ডায ন চরিতব্বন্তি অধিপ্পাযো। তস্মিং গামে পিণ্ডায ন চরিতব্বন্তি যস্মিং গামে কুলদূসককম্মং কতং, তস্মিং গামে ন চরিতব্বং। যস্মিঞ্হি গামে ৰা নিগমে ৰা কুলদূসককম্মং কতং, যস্মিঞ্চ ৰিহারে ৰসতি, নেৰ তস্মিং গামে ৰা নিগমে ৰা চরিতুং লব্ভতি, ন ৰিহারে ৰসিতুং। সামন্তৰিহারে ৰসন্তেন পন সামন্তগামে চরিতুং ৰট্টতি তত্থ ৰাসস্স অপ্পটিক্খিত্তত্তা।
433.Āpattiṃ ropetabbāti kuladūsakakammena āpannāpattiṃ ropetabbā. Tasmiṃ vihāreti bahigāme vihāraṃ sandhāya vuttaṃ. Antogāme vihāro pana ‘‘tasmiṃ gāme na vasitabba’’nti imināva saṅgahito gāmaggahaṇeneva gahitattā. ‘‘Tasmiṃ vihāre’’ti vacanato tassa gāmassa sāmantā aññasmiṃ vihāre vasituṃ vaṭṭati. Sāmantagāme piṇḍāya na caritabbanti tasmiṃ vihāre vāsassa paṭikkhittattā yadi tattha vasati, tena sāmantagāmepi piṇḍāya na caritabbanti adhippāyo. Tasmiṃ gāme piṇḍāya na caritabbanti yasmiṃ gāme kuladūsakakammaṃ kataṃ, tasmiṃ gāme na caritabbaṃ. Yasmiñhi gāme vā nigame vā kuladūsakakammaṃ kataṃ, yasmiñca vihāre vasati, neva tasmiṃ gāme vā nigame vā carituṃ labbhati, na vihāre vasituṃ. Sāmantavihāre vasantena pana sāmantagāme carituṃ vaṭṭati tattha vāsassa appaṭikkhittattā.
৪৩৫. অট্ঠারস ৰত্তানীতি ‘‘ন উপসম্পাদেতব্বং, ন নিস্সযো দাতব্বো, ন সামণেরো উপট্ঠাপেতব্বো, ন ভিক্খুনোৰাদকসম্মুতি সাদিতব্বা, সম্মতেন ভিক্খুনিযো ন ওৰদিতব্বা, যায আপত্তিযা সঙ্ঘেন পব্বাজনীযকম্মং কতং হোতি, ন সা আপত্তি আপজ্জিতব্বা অঞ্ঞা ৰা তাদিসিকা ততো ৰা পাপিট্ঠতরা, কম্মং ন গরহিতব্বং, কম্মিকা ন গরহিতব্বা, ন পকতত্তস্স ভিক্খুনো উপোসথো ঠপেতব্বো, ন পৰারণা ঠপেতব্বা, ন সৰচনীযং কাতব্বং, ন অনুৰাদো ঠপেতব্বো, ন ওকাসো কারেতব্বো, ন চোদেতব্বো, ন সারেতব্বো, ন ভিক্খূহি সম্পযোজেতব্ব’’ন্তি এৰমাগতানি অট্ঠারস ৰত্তানি।
435.Aṭṭhārasavattānīti ‘‘na upasampādetabbaṃ, na nissayo dātabbo, na sāmaṇero upaṭṭhāpetabbo, na bhikkhunovādakasammuti sāditabbā, sammatena bhikkhuniyo na ovaditabbā, yāya āpattiyā saṅghena pabbājanīyakammaṃ kataṃ hoti, na sā āpatti āpajjitabbā aññā vā tādisikā tato vā pāpiṭṭhatarā, kammaṃ na garahitabbaṃ, kammikā na garahitabbā, na pakatattassa bhikkhuno uposatho ṭhapetabbo, na pavāraṇā ṭhapetabbā, na savacanīyaṃ kātabbaṃ, na anuvādo ṭhapetabbo, na okāso kāretabbo, na codetabbo, na sāretabbo, na bhikkhūhi sampayojetabba’’nti evamāgatāni aṭṭhārasa vattāni.
অস্সজিপুনব্বসুকপ্পধানা অস্সজিপুনব্বসুকাতি ৰুত্তা সহচরণঞাযেন। অনুলোমপটিপদং অপ্পটিপজ্জনতাযাতি যথাপঞ্ঞত্তসম্মাৰত্তসঙ্খাতং অনুলোমপটিপদং অপ্পটিপজ্জনতায, যেন ৰত্তেন চিণ্ণেন সঙ্ঘো অনুলোমিকো হোতি, তস্মিং অৰত্তনতোতি ৰুত্তং হোতি। ন পন্নলোমা হোন্তীতি পতিতলোমা ন হোন্তি, অনুকূলৰুত্তিনো ন হোন্তীতি অত্থো। নিত্থরণমগ্গং ন পটিপজ্জন্তীতি অনুলোমৰত্তসঙ্খাতং নিত্থরণূপাযং ন পটিপজ্জন্তি, যেন ৰত্তেন চিণ্ণেন সাপত্তিকভাৰতো নিত্তিণ্ণা হোন্তি, তস্মিং নিত্থরণকৰত্তস্মিং ন ৰত্তন্তি, আপত্তিৰুট্ঠানত্থং তুরিততুরিতা ছন্দজাতা ন হোন্তীতি ৰুত্তং হোতি। দসহি অক্কোসৰত্থূহীতি জাতিনামগোত্তকম্মসিপ্পআবাধলিঙ্গকিলেসআপত্তিহীনসঙ্খাতেহিদসহি অক্কোসকারণেহি। ছন্দগামিতা পাপেন্তীতিআদীসু য-কারো ‘‘সযং অভিঞ্ঞা’’তিআদীসু ৰিয লুত্তনিদ্দিট্ঠোতি আহ ‘‘ছন্দগামিতাযপি পাপেন্তী’’তিআদি। তেসন্তি অস্সজিপুনব্বসুকানং গণপামোক্খানং।
Assajipunabbasukappadhānā assajipunabbasukāti vuttā sahacaraṇañāyena. Anulomapaṭipadaṃ appaṭipajjanatāyāti yathāpaññattasammāvattasaṅkhātaṃ anulomapaṭipadaṃ appaṭipajjanatāya, yena vattena ciṇṇena saṅgho anulomiko hoti, tasmiṃ avattanatoti vuttaṃ hoti. Na pannalomā hontīti patitalomā na honti, anukūlavuttino na hontīti attho. Nittharaṇamaggaṃ na paṭipajjantīti anulomavattasaṅkhātaṃ nittharaṇūpāyaṃ na paṭipajjanti, yena vattena ciṇṇena sāpattikabhāvato nittiṇṇā honti, tasmiṃ nittharaṇakavattasmiṃ na vattanti, āpattivuṭṭhānatthaṃ turitaturitā chandajātā na hontīti vuttaṃ hoti. Dasahi akkosavatthūhīti jātināmagottakammasippaābādhaliṅgakilesaāpattihīnasaṅkhātehidasahi akkosakāraṇehi. Chandagāmitā pāpentītiādīsu ya-kāro ‘‘sayaṃ abhiññā’’tiādīsu viya luttaniddiṭṭhoti āha ‘‘chandagāmitāyapi pāpentī’’tiādi. Tesanti assajipunabbasukānaṃ gaṇapāmokkhānaṃ.
৪৩৬-৪৩৭. নিগমস্স অপাকটত্তা তং দস্সেতুং ‘‘তত্থা’’তিআদিমাহ। পরসন্তকং দেতি, দুক্কটমেৰাতি ৰিস্সাসগ্গাহেন পরসন্তকং গহেত্ৰা দেন্তং সন্ধায ৰুত্তং। তঞ্চ খো ৰত্থুপূজনত্থাযাতি মাতাপিতূনম্পি দেন্তেন ৰত্থুপূজনত্থায এৰ দাতব্বন্তি দস্সেতি। ‘‘মণ্ডনত্থায পন সিৰলিঙ্গাদিপূজনত্থাযাতি এত্তকমেৰ ৰুত্তত্তা ইমং ৰিক্কিণিত্ৰা জীৰিকম্পি কপ্পেস্সন্তীতি মাতুআদীনং দাতুং ৰট্টতী’’তি ৰদন্তি। কস্সচিপীতি ঞাতকস্স অঞ্ঞাতকস্স ৰা কস্সচিপি। ঞাতিসামণেরেহেৰাতি অনুচ্ছৰিকত্তা ৰুত্তং। সম্পত্তানং সামণেরানং উপড্ঢভাগং দাতুং ৰট্টতীতি সঙ্ঘিকস্স লাভস্স উপচারসীমগতানং সামণেরানম্পি সন্তকত্তা তেসম্পি উপড্ঢভাগো লব্ভতেৰাতি কত্ৰা ৰুত্তং। চূল়কন্তি উপড্ঢভাগতোপি উপড্ঢং। চতুত্থভাগস্সেতং অধিৰচনং।
436-437. Nigamassa apākaṭattā taṃ dassetuṃ ‘‘tatthā’’tiādimāha. Parasantakaṃ deti, dukkaṭamevāti vissāsaggāhena parasantakaṃ gahetvā dentaṃ sandhāya vuttaṃ. Tañca kho vatthupūjanatthāyāti mātāpitūnampi dentena vatthupūjanatthāya eva dātabbanti dasseti. ‘‘Maṇḍanatthāya pana sivaliṅgādipūjanatthāyāti ettakameva vuttattā imaṃ vikkiṇitvā jīvikampi kappessantīti mātuādīnaṃ dātuṃ vaṭṭatī’’ti vadanti. Kassacipīti ñātakassa aññātakassa vā kassacipi. Ñātisāmaṇerehevāti anucchavikattā vuttaṃ. Sampattānaṃ sāmaṇerānaṃ upaḍḍhabhāgaṃ dātuṃ vaṭṭatīti saṅghikassa lābhassa upacārasīmagatānaṃ sāmaṇerānampi santakattā tesampi upaḍḍhabhāgo labbhatevāti katvā vuttaṃ. Cūḷakanti upaḍḍhabhāgatopi upaḍḍhaṃ. Catutthabhāgassetaṃ adhivacanaṃ.
‘‘সামণেরা…পে॰… ঠপেন্তী’’তি ইদং ৰস্সগ্গেন অভাজিযং সন্ধায ৰুত্তং। তত্থ তত্থাতি মগ্গে ৰা চেতিযঙ্গণে ৰা। দাপেতুং ন লভন্তীতি সামণেরেহি দাপেতুং অননুচ্ছৰিকত্তা ৰুত্তং। ন হি তং পুপ্ফদানং নাম সিযা। যদি হি তথা আগতানং তেসং দানং পুপ্ফদানং ভৰেয্য, সামণেরেহিপি দাতুং ন লব্ভেয্য। সযমেৰাতি সামণেরা সযমেৰ। যাগুভত্তাদীনি আদাযাতি ইদং ভিক্খূনং অত্থায যাগুভত্তাদিসম্পাদনং সন্ধায ৰুত্তত্তা ‘‘ন ৰট্টতী’’তি অৰিসেসেন ৰুত্তং।
‘‘Sāmaṇerā…pe… ṭhapentī’’ti idaṃ vassaggena abhājiyaṃ sandhāya vuttaṃ. Tattha tatthāti magge vā cetiyaṅgaṇe vā. Dāpetuṃ na labhantīti sāmaṇerehi dāpetuṃ ananucchavikattā vuttaṃ. Na hi taṃ pupphadānaṃ nāma siyā. Yadi hi tathā āgatānaṃ tesaṃ dānaṃ pupphadānaṃ bhaveyya, sāmaṇerehipi dātuṃ na labbheyya. Sayamevāti sāmaṇerā sayameva. Yāgubhattādīni ādāyāti idaṃ bhikkhūnaṃ atthāya yāgubhattādisampādanaṃ sandhāya vuttattā ‘‘na vaṭṭatī’’ti avisesena vuttaṃ.
ৰুত্তনযেনেৰাতি মাতাপিতূনং তাৰ হরিত্ৰাপি হরাপেত্ৰাপি পক্কোসিত্ৰাপি পক্কোসাপেত্ৰাপি দাতুং ৰট্টতি, সেসঞাতকানং পক্কোসাপেত্ৰাৰ। মাতাপিতূনঞ্চ হরাপেন্তেন ঞাতিসামণেরেহেৰ হরাপেতব্বং, ইতরে পন যদি সযমেৰ ইচ্ছন্তি, ৰট্টতীতি ইমং পুপ্ফে ৰুত্তনযং ফলেপি অতিদিসতি, তস্মা ফলম্পি মাতাপিতূনং হরণহরাপনাদিনা দাতুং ৰট্টতি, সেসঞাতীনং পক্কোসাপেত্ৰাৰ। ইদানি ‘‘যো হরিত্ৰা ৰা হরাপেত্ৰা ৰা…পে॰… ইস্সরৰতায দদতো থুল্লচ্চয’’ন্তি ইমং পুপ্ফে ৰুত্তনযং ফলেপি সঙ্খিপিত্ৰা দস্সেন্তো ‘‘কুলসঙ্গহত্থায পনা’’তিআদিমাহ। খীণপরিব্বযানন্তি আগন্তুকে সন্ধায ৰুত্তং। ফলপরিচ্ছেদেন ৰাতি ‘‘এত্তকানি ফলানি দাতব্বানী’’তি এৰং ফলপরিচ্ছেদেন ৰা। রুক্খপরিচ্ছেদেন ৰাতি ‘‘ইমেহি রুক্খেহি দাতব্বানী’’তি এৰং রুক্খপরিচ্ছেদেন ৰা। পরিচ্ছিন্নেসুপি রুক্খেসু ‘‘ইধ ফলানি সুন্দরানি, ইতো গণ্হথা’’তি ৰদন্তেন কুলসঙ্গহো কতো নাম হোতীতি আহ ‘‘এৰং পন ন ৰত্তব্ব’’ন্তি।
Vuttanayenevāti mātāpitūnaṃ tāva haritvāpi harāpetvāpi pakkositvāpi pakkosāpetvāpi dātuṃ vaṭṭati, sesañātakānaṃ pakkosāpetvāva. Mātāpitūnañca harāpentena ñātisāmaṇereheva harāpetabbaṃ, itare pana yadi sayameva icchanti, vaṭṭatīti imaṃ pupphe vuttanayaṃ phalepi atidisati, tasmā phalampi mātāpitūnaṃ haraṇaharāpanādinā dātuṃ vaṭṭati, sesañātīnaṃ pakkosāpetvāva. Idāni ‘‘yo haritvā vā harāpetvā vā…pe… issaravatāya dadato thullaccaya’’nti imaṃ pupphe vuttanayaṃ phalepi saṅkhipitvā dassento ‘‘kulasaṅgahatthāya panā’’tiādimāha. Khīṇaparibbayānanti āgantuke sandhāya vuttaṃ. Phalaparicchedena vāti ‘‘ettakāni phalāni dātabbānī’’ti evaṃ phalaparicchedena vā. Rukkhaparicchedena vāti ‘‘imehi rukkhehi dātabbānī’’ti evaṃ rukkhaparicchedena vā. Paricchinnesupi rukkhesu ‘‘idha phalāni sundarāni, ito gaṇhathā’’ti vadantena kulasaṅgaho kato nāma hotīti āha ‘‘evaṃ pana na vattabba’’nti.
রুক্খচ্ছল্লীতি রুক্খত্তচো। তেসং তেসং গিহীনং গামন্তরদেসন্তরাদীসু সাসনপটিসাসনহরণং জঙ্ঘপেসনিকং। তেনাহ ‘‘গিহীনং দূতেয্যং সাসনহরণকম্ম’’ন্তি। দূতস্স কম্মং দূতেয্যং। পঠমং সাসনং অগ্গহেত্ৰাপি…পে॰… পদে পদে দুক্কটন্তি ইদং তস্স সাসনং আরোচেস্সামীতি ইমিনা অধিপ্পাযেন গমনং সন্ধায ৰুত্তং, তস্স পন সাসনং পটিক্খিপিত্ৰা সযমেৰ কারুঞ্ঞে ঠিতো গন্ত্ৰা অত্তনো পতিরূপং সাসনং আরোচেতি, অনাপত্তি। পুব্বে ৰুত্তপ্পকারন্তি ‘‘মম ৰচনেন ভগৰতো পাদে ৰন্দথা’’তিআদিনা ৰুত্তপ্পকারং সিক্খাপদে পঠমং ৰুত্তং। পক্কমতাযস্মাতি ইদং পব্বাজনীযকম্মৰসেন ৰুত্তং। পুন পক্কমতাযস্মাতি ইদং পন পব্বাজনীযকম্মকতস্স ৰত্তৰসেন ৰুত্তং। পঠমসঙ্ঘভেদসদিসানেৰাতি এত্থ অঙ্গেসুপি যথা তত্থ পরক্কমনং, এৰং ইধ ছন্দাদীহি পাপনং দট্ঠব্বং। সেসং তাদিসমেৰাতি।
Rukkhacchallīti rukkhattaco. Tesaṃ tesaṃ gihīnaṃ gāmantaradesantarādīsu sāsanapaṭisāsanaharaṇaṃ jaṅghapesanikaṃ. Tenāha ‘‘gihīnaṃ dūteyyaṃ sāsanaharaṇakamma’’nti. Dūtassa kammaṃ dūteyyaṃ. Paṭhamaṃ sāsanaṃ aggahetvāpi…pe… pade pade dukkaṭanti idaṃ tassa sāsanaṃ ārocessāmīti iminā adhippāyena gamanaṃ sandhāya vuttaṃ, tassa pana sāsanaṃ paṭikkhipitvā sayameva kāruññe ṭhito gantvā attano patirūpaṃ sāsanaṃ āroceti, anāpatti. Pubbe vuttappakāranti ‘‘mama vacanena bhagavato pāde vandathā’’tiādinā vuttappakāraṃ sikkhāpade paṭhamaṃ vuttaṃ. Pakkamatāyasmāti idaṃ pabbājanīyakammavasena vuttaṃ. Puna pakkamatāyasmāti idaṃ pana pabbājanīyakammakatassa vattavasena vuttaṃ. Paṭhamasaṅghabhedasadisānevāti ettha aṅgesupi yathā tattha parakkamanaṃ, evaṃ idha chandādīhi pāpanaṃ daṭṭhabbaṃ. Sesaṃ tādisamevāti.
কুলদূসকসিক্খাপদৰণ্ণনা নিট্ঠিতা।
Kuladūsakasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১৩. কুলদূসকসিক্খাপদং • 13. Kuladūsakasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১৩. কুলদূসকসিক্খাপদৰণ্ণনা • 13. Kuladūsakasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১৩. কুলদূসকসিক্খাপদৰণ্ণনা • 13. Kuladūsakasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১৩. কুলদূসকসিক্খাপদৰণ্ণনা • 13. Kuladūsakasikkhāpadavaṇṇanā
