| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
১৩. কুলদূসকসিক্খাপদৰণ্ণনা
13. Kuladūsakasikkhāpadavaṇṇanā
৪৩১. ন কেৰলং ৰিহারো এৰ কীটাগিরি, সোপি গামো ‘‘কীটাগিরি’’চ্চেৰ ৰুচ্চতি। গামঞ্হি সন্ধায পরতো ‘‘ন অস্সজিপুনব্বসুকেহি ভিক্খূহি কীটাগিরিস্মিং ৰত্থব্ব’’ন্তি ৰুত্তং। একসংৰচ্ছরে দ্ৰিক্খত্তুং ৰস্সতি কির, তং সন্ধায ‘‘দ্ৰীহি মেঘেহী’’তি ৰুত্তং। সমধিকন্তি ছ জনে সন্ধায। অকতৰত্থুন্তি নৰং অট্ঠুপ্পত্তিং। ‘‘জাভিসুমনাদিগচ্ছং অল্লানং হরিতানং এৰা’’তি লিখিতং। ভূতগামবীজগামভেদতো পনেস ভেদো। ৰতত্থাযাতি ৰতিঅত্থায। যংকিঞ্চীতি সোদকং ৰা নিরুদকং ৰা। আরামাদিঅত্থাযাতি ৰনরাজিকাদিঅত্থায। মালাৰচ্ছরোপনং কুলদূসকংযেৰ সন্ধায, গন্থনাদিসব্বং ন সন্ধায ৰুত্তন্তি। কথং পঞ্ঞাযতীতি চে? তং দস্সেতুং ‘‘বুদ্ধেন ধম্মো’’তিআদি। ‘‘আৰেল়ং আবিল়’’ন্তিপি পাঠো।
431. Na kevalaṃ vihāro eva kīṭāgiri, sopi gāmo ‘‘kīṭāgiri’’cceva vuccati. Gāmañhi sandhāya parato ‘‘na assajipunabbasukehi bhikkhūhi kīṭāgirismiṃ vatthabba’’nti vuttaṃ. Ekasaṃvacchare dvikkhattuṃ vassati kira, taṃ sandhāya ‘‘dvīhi meghehī’’ti vuttaṃ. Samadhikanti cha jane sandhāya. Akatavatthunti navaṃ aṭṭhuppattiṃ. ‘‘Jābhisumanādigacchaṃ allānaṃ haritānaṃ evā’’ti likhitaṃ. Bhūtagāmabījagāmabhedato panesa bhedo. Vatatthāyāti vatiatthāya. Yaṃkiñcīti sodakaṃ vā nirudakaṃ vā. Ārāmādiatthāyāti vanarājikādiatthāya. Mālāvaccharopanaṃ kuladūsakaṃyeva sandhāya, ganthanādisabbaṃ na sandhāya vuttanti. Kathaṃ paññāyatīti ce? Taṃ dassetuṃ ‘‘buddhena dhammo’’tiādi. ‘‘Āveḷaṃ ābiḷa’’ntipi pāṭho.
গোপ্ফনন্তি গন্থনং। ৰেঠিমন্তি তগ্গতিকমেৰ। ৰেধিমং অঞ্ঞেন কেনচি পুপ্ফং ৰেধেত্ৰা কতং । কণ্টকম্পি বন্ধিতুন্তি এত্থ ‘‘সযং ৰিজ্ঝনত্থং ন ৰট্টতি। অঞ্ঞস্সত্থায ৰট্টতী’’তি ৰদন্তি। জালমযং ৰিতানং জালৰিতানং। পুপ্ফপটিচ্ছকং গৰক্খং ৰিয সছিদ্দং করোন্তি। তালপণ্ণগুল়কন্তি তালপণ্ণমযং পুন কতম্পি পটিছিজ্জকমেৰ। ধম্মরজ্জু চেতিযং ৰা বোধিং ৰা পুপ্ফপ্পৰেসনত্থং আৰিজ্ঝিত্ৰা বদ্ধরজ্জু। ‘‘কাসাৰেন বদ্ধম্পি সুত্তৰাকাদীহি বদ্ধং ভণ্ডিতসদিস’’ন্তি লিখিতং। অংসভণ্ডিকং পসিব্বকে পক্খিত্তসদিসত্তা ৰেধিমং ন জাতং, তস্মা ‘‘সিথিলবদ্ধস্স অন্তরন্তরা পক্খিপিতুং ন ৰট্টতী’’তি ৰদন্তি। ‘‘অঞ্ঞমঞ্ঞং অফুসাপেত্ৰা অনেকক্খত্তুম্পি পরিক্খিপিতুং ৰট্টতী’’তি ৰদন্তি। পূরিতন্তি দীঘতো পসারেত্ৰা পূরিতং। ঘটিকদামওলম্বকোতি ‘‘যমকদামওলম্বকো’’তি লিখিতং। ‘‘গেণ্ডুখরপত্তদামানং পটিক্খিত্তত্তা চেলাদীহি কতদামম্পি ন ৰট্টতি অকপ্পিযানুলোমত্তা’’তি ৰদন্তি।
Gopphananti ganthanaṃ. Veṭhimanti taggatikameva. Vedhimaṃ aññena kenaci pupphaṃ vedhetvā kataṃ . Kaṇṭakampi bandhitunti ettha ‘‘sayaṃ vijjhanatthaṃ na vaṭṭati. Aññassatthāya vaṭṭatī’’ti vadanti. Jālamayaṃ vitānaṃ jālavitānaṃ. Pupphapaṭicchakaṃ gavakkhaṃ viya sachiddaṃ karonti. Tālapaṇṇaguḷakanti tālapaṇṇamayaṃ puna katampi paṭichijjakameva. Dhammarajju cetiyaṃ vā bodhiṃ vā pupphappavesanatthaṃ āvijjhitvā baddharajju. ‘‘Kāsāvena baddhampi suttavākādīhi baddhaṃ bhaṇḍitasadisa’’nti likhitaṃ. Aṃsabhaṇḍikaṃ pasibbake pakkhittasadisattā vedhimaṃ na jātaṃ, tasmā ‘‘sithilabaddhassa antarantarā pakkhipituṃ na vaṭṭatī’’ti vadanti. ‘‘Aññamaññaṃ aphusāpetvā anekakkhattumpi parikkhipituṃ vaṭṭatī’’ti vadanti. Pūritanti dīghato pasāretvā pūritaṃ. Ghaṭikadāmaolambakoti ‘‘yamakadāmaolambako’’ti likhitaṃ. ‘‘Geṇḍukharapattadāmānaṃ paṭikkhittattā celādīhi katadāmampi na vaṭṭati akappiyānulomattā’’ti vadanti.
‘‘রেচকং নাম তথালাসিযনাটনটানং নচ্চ’’ন্তি লিখিতং। তং ‘‘পরিৰত্তন্তী’’তি ৰুত্তং। ‘‘সারিযো নাম রুতসুনখা সিঙ্গালকম্মকুরুঙ্গকেল়িপনে ঠিতা’’তি কির পাঠো। ‘‘নিবুজ্ঝন্তী’’তি পাল়ি।
‘‘Recakaṃ nāma tathālāsiyanāṭanaṭānaṃ nacca’’nti likhitaṃ. Taṃ ‘‘parivattantī’’ti vuttaṃ. ‘‘Sāriyo nāma rutasunakhā siṅgālakammakuruṅgakeḷipane ṭhitā’’ti kira pāṭho. ‘‘Nibujjhantī’’ti pāḷi.
৪৩২. অবলবলাদি-পদানং উপ্পটিপাটিযা। যথা পামোক্খানং ৰসেন সব্বেপি ‘‘অস্সজিপুনব্বসুকা’’তি ৰুত্তা, তথা পামোক্খপ্পত্তসাৰকস্স ৰসেন তদাযত্তৰুত্তিনে সব্বেপি ‘‘সারিপুত্তা’’তি। তেন ৰুত্তং ‘‘গচ্ছথ তুম্হে সারিপুত্তা’’তি।
432.Abalabalādi-padānaṃ uppaṭipāṭiyā. Yathā pāmokkhānaṃ vasena sabbepi ‘‘assajipunabbasukā’’ti vuttā, tathā pāmokkhappattasāvakassa vasena tadāyattavuttine sabbepi ‘‘sāriputtā’’ti. Tena vuttaṃ ‘‘gacchatha tumhe sāriputtā’’ti.
৪৩৩. ‘‘গামে ৰা ন ৰসিতব্ব’’ন্তি ইমিনাৰ তস্মিং গামে অঞ্ঞত্থ ন ৰসিতব্বন্তি সিদ্ধং। ‘‘তস্মিং ৰিহারে ৰা’’তি কস্মা ৰুত্তন্তি চে? অত্থসব্ভাৰতো। যস্মিঞ্হি গামে কুলদূসককম্মং কতং, তস্মিং গামে, যস্মিং ৰিহারে ৰসন্তেন কুলদূসনং কতং, তং ৰিহারং ঠপেত্ৰা অঞ্ঞস্মিং ৰসিতুং ন ৰট্টতীতি দস্সনত্থং। তং কথন্তি চে? ‘‘গামে ৰা ন ৰসিতব্ব’’ন্তি ৰচনেন যস্মিং গামে কুলদূসনকম্মং কতং, তস্মিং ৰিহারেপি ৰসিতুং ন লব্ভতীতি আপন্নং, তং দিস্ৰা ‘‘তস্মিং ৰিহারে’’তি ৰুত্তং, তেন তস্মিং গামে অঞ্ঞস্মিং ৰসিতুং লব্ভতীতি সিদ্ধং। ‘‘তস্মিং ৰিহারে ৰসন্তেনা’’তি ইমিনা তস্মিং গামে অঞ্ঞত্থ ৰসন্তেন সামন্তগামে পিণ্ডায চরিতুং ৰট্টতীতি দীপিতং হোতি। সামন্তৰিহারেপীতি সামন্তৰিহারো নাম তস্মিংযেৰ গামে তস্স ৰিহারস্স সামন্তৰিহারো চ তস্স গামস্স সামন্তৰিহারো চাতি উভযং ৰুচ্চতি, এতেন তস্মিং গামে অঞ্ঞত্থ ৰসন্তেন তস্মিং গামে পিণ্ডায ন চরিতব্বং। সামন্তগামেপি পিণ্ডায চরিতুং ৰট্টতি, পুন যস্মিং গামে কুলদূসনকম্মং কতং, তস্স সামন্তগামে কুলদূসকৰিহারস্স সামন্তৰত্থুৰিহারে ৰসন্তেন তস্মিং গামেপি চরিতুং ৰট্টতি। যস্মিং সামন্তগামে কুলদূসকং ন কতং, তস্মিম্পি চরিতুং ৰট্টতি, নেৰ ৰিহারেতি অধিপ্পাযো। ‘‘ন নগরে চরিতু’’ন্তি ৰুত্তত্তা অঞ্ঞস্মিং ৰিহারে তস্মিং গামে ৰসিতুং ৰট্টতীতি দীপিতং হোতীতি একে। গণ্ঠিপদেসু পন ৰিচারণা এৰ নত্থি, তস্মা সুট্ঠু ৰিচারেত্ৰা কথেতব্বং।
433. ‘‘Gāme vā na vasitabba’’nti imināva tasmiṃ gāme aññattha na vasitabbanti siddhaṃ. ‘‘Tasmiṃ vihāre vā’’ti kasmā vuttanti ce? Atthasabbhāvato. Yasmiñhi gāme kuladūsakakammaṃ kataṃ, tasmiṃ gāme, yasmiṃ vihāre vasantena kuladūsanaṃ kataṃ, taṃ vihāraṃ ṭhapetvā aññasmiṃ vasituṃ na vaṭṭatīti dassanatthaṃ. Taṃ kathanti ce? ‘‘Gāme vā na vasitabba’’nti vacanena yasmiṃ gāme kuladūsanakammaṃ kataṃ, tasmiṃ vihārepi vasituṃ na labbhatīti āpannaṃ, taṃ disvā ‘‘tasmiṃ vihāre’’ti vuttaṃ, tena tasmiṃ gāme aññasmiṃ vasituṃ labbhatīti siddhaṃ. ‘‘Tasmiṃ vihāre vasantenā’’ti iminā tasmiṃ gāme aññattha vasantena sāmantagāme piṇḍāya carituṃ vaṭṭatīti dīpitaṃ hoti. Sāmantavihārepīti sāmantavihāro nāma tasmiṃyeva gāme tassa vihārassa sāmantavihāro ca tassa gāmassa sāmantavihāro cāti ubhayaṃ vuccati, etena tasmiṃ gāme aññattha vasantena tasmiṃ gāme piṇḍāya na caritabbaṃ. Sāmantagāmepi piṇḍāya carituṃ vaṭṭati, puna yasmiṃ gāme kuladūsanakammaṃ kataṃ, tassa sāmantagāme kuladūsakavihārassa sāmantavatthuvihāre vasantena tasmiṃ gāmepi carituṃ vaṭṭati. Yasmiṃ sāmantagāme kuladūsakaṃ na kataṃ, tasmimpi carituṃ vaṭṭati, neva vihāreti adhippāyo. ‘‘Nanagare caritu’’nti vuttattā aññasmiṃ vihāre tasmiṃ gāme vasituṃ vaṭṭatīti dīpitaṃ hotīti eke. Gaṇṭhipadesu pana vicāraṇā eva natthi, tasmā suṭṭhu vicāretvā kathetabbaṃ.
৪৩৬-৭. দাপেতুং ন লভন্তি, পুপ্ফদানঞ্হি সিযা। তস্সেৰ ন কপ্পতীতি এত্থ যাগুআদীনি আনেত্ৰা ‘‘দদন্তূ’’তি ইচ্ছাৰসেন ৰদতি চে, সব্বেসং ন কপ্পতি, কেৰলং পন সুদ্ধচিত্তেন অত্তানং ৰা পরেসং ৰা অনুদ্দিসিত্ৰা ‘‘ইমে মনুস্সা দানং দত্ৰা পুঞ্ঞং পসৰন্তূ’’তি ৰদন্তস্স তস্সেৰ ন কপ্পতি যাগুআদীনং পচ্চযপটিসংযুত্তকথায উপ্পন্নত্তা। মহাঅট্ঠকথাযম্পি ‘‘পঞ্চন্নম্পি সহধম্মিকান’’ন্তি ৰিসেসেত্ৰা অৰুত্তত্তা অত্থতো সযমেৰাতি অপরে। আচরিযা পন ‘‘যথা মহাপচ্চরিযং, কুরুন্দিযঞ্চ ‘তস্সেৰা’তি ৰিসেসেত্ৰা ৰুত্তং, এৰং মহাঅট্ঠকথাযং ৰিসেসেত্ৰা ন ৰুত্তং, তস্মা সব্বেসং ন কপ্পতী’’তি ৰদন্তি।
436-7.Dāpetuṃ na labhanti, pupphadānañhi siyā. Tasseva na kappatīti ettha yāguādīni ānetvā ‘‘dadantū’’ti icchāvasena vadati ce, sabbesaṃ na kappati, kevalaṃ pana suddhacittena attānaṃ vā paresaṃ vā anuddisitvā ‘‘ime manussā dānaṃ datvā puññaṃ pasavantū’’ti vadantassa tasseva na kappati yāguādīnaṃ paccayapaṭisaṃyuttakathāya uppannattā. Mahāaṭṭhakathāyampi ‘‘pañcannampi sahadhammikāna’’nti visesetvā avuttattā atthato sayamevāti apare. Ācariyā pana ‘‘yathā mahāpaccariyaṃ, kurundiyañca ‘tassevā’ti visesetvā vuttaṃ, evaṃ mahāaṭṭhakathāyaṃ visesetvā na vuttaṃ, tasmā sabbesaṃ na kappatī’’ti vadanti.
কুলদূসকসিক্খাপদৰণ্ণনা নিট্ঠিতা।
Kuladūsakasikkhāpadavaṇṇanā niṭṭhitā.
তেরসককণ্ডৰণ্ণনা নিট্ঠিতা।
Terasakakaṇḍavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১৩. কুলদূসকসিক্খাপদং • 13. Kuladūsakasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১৩. কুলদূসকসিক্খাপদৰণ্ণনা • 13. Kuladūsakasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১৩. কুলদূসকসিক্খাপদৰণ্ণনা • 13. Kuladūsakasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১৩. কুলদূসকসিক্খাপদৰণ্ণনা • 13. Kuladūsakasikkhāpadavaṇṇanā
