| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
১৩. কুলদূসকসিক্খাপদৰণ্ণনা
13. Kuladūsakasikkhāpadavaṇṇanā
৪৩১. তেরসমে কীটাগিরীতি তস্স নিগমস্স নামং। তঞ্হি সন্ধায পরতো ‘‘ন অস্সজিপুনব্বসুকেহি ভিক্খূহি কীটাগিরিস্মিং ৰত্থব্ব’’ন্তি ৰুত্তং, গামনিগমতো চ পব্বাজনং, ন জনপদতো। তেন পন যোগতো জনপদোপি ‘‘কীটাগিরি’’ইচ্চেৰ সঙ্খ্যং গতোতি আহ ‘‘এৰংনামকে জনপদে’’তি।
431. Terasame kīṭāgirīti tassa nigamassa nāmaṃ. Tañhi sandhāya parato ‘‘na assajipunabbasukehi bhikkhūhi kīṭāgirismiṃ vatthabba’’nti vuttaṃ, gāmanigamato ca pabbājanaṃ, na janapadato. Tena pana yogato janapadopi ‘‘kīṭāgiri’’icceva saṅkhyaṃ gatoti āha ‘‘evaṃnāmake janapade’’ti.
তত্রাতি সাৰত্থিযং। ধুরট্ঠানেতি অভিমুখট্ঠানে, জেতৰনদ্ৰারসমীপেতি অত্থো। দ্ৰীহি মেঘেহীতি ৰস্সিকেন, হেমন্তিকেন চাতি দ্ৰীহি মেঘেহি। গণাচরিযেহি ছহি অধিকতায ‘‘সমধিক’’ন্তি ৰুত্তং।
Tatrāti sāvatthiyaṃ. Dhuraṭṭhāneti abhimukhaṭṭhāne, jetavanadvārasamīpeti attho. Dvīhi meghehīti vassikena, hemantikena cāti dvīhi meghehi. Gaṇācariyehi chahi adhikatāya ‘‘samadhika’’nti vuttaṃ.
উদকস্সাতি অকপ্পিযউদকস্স ‘‘কপ্পিযউদকসিঞ্চন’’ন্তি ৰিসুং ৰক্খমানত্তা, তঞ্চ ‘‘আরামাদিঅত্থায রুক্খরোপনে অকপ্পিযৰোহারেসুপি কপ্পিযউদকসিঞ্চনাদি ৰট্টতী’’তি ৰক্খমানত্তা ইধাপি ৰিভাগং কত্ৰা কপ্পিযউদকসিঞ্চনাদি ৰিসুং দস্সিতং। যথা কোট্টনখণনাদিকাযিককিরিযাপি অকপ্পিযৰোহারে সঙ্গহিতা, এৰং মাতিকাউজুকরণাদিকপ্পিযৰোহারেপীতি আহ ‘‘সুক্খমাতিকায উজুকরণ’’ন্তি। এত্থ পুরাণপণ্ণাদিহরণম্পি সঙ্গয্হতি। মহাপচ্চরিযৰাদোৰ পমাণত্তা পচ্ছা ৰুত্তো। অকপ্পিযৰোহারেপি একচ্চং ৰট্টতীতি দস্সেতুং ‘‘ন কেৰলঞ্চ সেস’’ন্তিআদিমাহ। যংকিঞ্চি মাতিকন্তি সুক্খং ৰা অসুক্খং ৰা। তত্থাতি আরামাদিঅত্থায রুক্খরোপনে। তথাতি কপ্পিযৰোহারপরিযাযাদীহি গন্থাপনং সন্ধায ৰুত্তং। ইমিনা চ কুলসঙ্গহত্থায গন্থাপনাদিপি ন ৰট্টতীতি দস্সেতি।
Udakassāti akappiyaudakassa ‘‘kappiyaudakasiñcana’’nti visuṃ vakkhamānattā, tañca ‘‘ārāmādiatthāya rukkharopane akappiyavohāresupi kappiyaudakasiñcanādi vaṭṭatī’’ti vakkhamānattā idhāpi vibhāgaṃ katvā kappiyaudakasiñcanādi visuṃ dassitaṃ. Yathā koṭṭanakhaṇanādikāyikakiriyāpi akappiyavohāre saṅgahitā, evaṃ mātikāujukaraṇādikappiyavohārepīti āha ‘‘sukkhamātikāya ujukaraṇa’’nti. Ettha purāṇapaṇṇādiharaṇampi saṅgayhati. Mahāpaccariyavādova pamāṇattā pacchā vutto. Akappiyavohārepi ekaccaṃ vaṭṭatīti dassetuṃ ‘‘na kevalañca sesa’’ntiādimāha. Yaṃkiñci mātikanti sukkhaṃ vā asukkhaṃ vā. Tatthāti ārāmādiatthāya rukkharopane. Tathāti kappiyavohārapariyāyādīhi ganthāpanaṃ sandhāya vuttaṃ. Iminā ca kulasaṅgahatthāya ganthāpanādipi na vaṭṭatīti dasseti.
ৰত্থুপূজনত্থায সযং গন্থনং কস্মা ন ৰট্টতীতি চোদেন্তো ‘‘ননু চা’’তিআদিমাহ। যথা আরামাদিঅত্থং কপ্পিযপথৰিযং সযং রোপেতুম্পি ৰট্টতি, তথা ৰত্থুপূজনত্থায সযং গন্থনম্পি কস্মা ন ৰট্টতীতি চোদকস্স অধিপ্পাযো। ৰুত্তন্তিআদি পরিহারো। অথ ‘‘ন পন মহাঅট্ঠকথায’’ন্তি কস্মা ৰদতি? মহাপচ্চরিআদীসু ৰুত্তম্পি হি পমাণমেৰাতি নাযং ৰিরোধো, মহাঅট্ঠকথাযং অৰুত্তস্স সযং রোপনস্স তত্থেৰ ৰুত্তেন উদকসিঞ্চনেন সহ সংসন্দননযদস্সনমুখেন পমাণমেৰাতি পতিট্ঠাপেতুং ৰুত্তত্তা। ‘‘মঞ্ঞেয্যাসী’’তি পদং ‘‘তং কথ’’ন্তি ইমিনা সম্বন্ধিতব্বং। তত্থাযং অধিপ্পাযো – কিঞ্চাপি মহাঅট্ঠকথাযং সযং রোপনং ন ৰুত্তং, কপ্পিযউদকস্স সযং আসিঞ্চনং ৰুত্তমেৰ, তস্মা যথা আরামাদিঅত্থায কপ্পিযউদকং সযং সিঞ্চিতুম্পি ৰট্টতি, তথা ৰত্থুপূজনত্থায গন্থনম্পি কস্মা ন ৰট্টতীতি। তম্পি ন ৰিরুজ্ঝতীতি যদেতং ৰত্থুপূজনত্থাযপি গন্থনাদিং পটিক্খিপিত্ৰা আরামাদিঅত্থায সযং রোপনসিঞ্চনং ৰুত্তং, তম্পি পাল়িযা সংসন্দনতো পুব্বাপরং ন ৰিরুজ্ঝতি।
Vatthupūjanatthāya sayaṃ ganthanaṃ kasmā na vaṭṭatīti codento ‘‘nanu cā’’tiādimāha. Yathā ārāmādiatthaṃ kappiyapathaviyaṃ sayaṃ ropetumpi vaṭṭati, tathā vatthupūjanatthāya sayaṃ ganthanampi kasmā na vaṭṭatīti codakassa adhippāyo. Vuttantiādi parihāro. Atha ‘‘na pana mahāaṭṭhakathāya’’nti kasmā vadati? Mahāpaccariādīsu vuttampi hi pamāṇamevāti nāyaṃ virodho, mahāaṭṭhakathāyaṃ avuttassa sayaṃ ropanassa tattheva vuttena udakasiñcanena saha saṃsandananayadassanamukhena pamāṇamevāti patiṭṭhāpetuṃ vuttattā. ‘‘Maññeyyāsī’’ti padaṃ ‘‘taṃ katha’’nti iminā sambandhitabbaṃ. Tatthāyaṃ adhippāyo – kiñcāpi mahāaṭṭhakathāyaṃ sayaṃ ropanaṃ na vuttaṃ, kappiyaudakassa sayaṃ āsiñcanaṃ vuttameva, tasmā yathā ārāmādiatthāya kappiyaudakaṃ sayaṃ siñcitumpi vaṭṭati, tathā vatthupūjanatthāya ganthanampi kasmā na vaṭṭatīti. Tampi na virujjhatīti yadetaṃ vatthupūjanatthāyapi ganthanādiṃ paṭikkhipitvā ārāmādiatthāya sayaṃ ropanasiñcanaṃ vuttaṃ, tampi pāḷiyā saṃsandanato pubbāparaṃ na virujjhati.
তং কথং ন ৰিরুজ্ঝতীতি আহ ‘‘তত্র হী’’তিআদি। তত্রাতি রোপনসিঞ্চনৰিসযে। পুপ্ফাদীহি কুলসঙ্গহপ্পসঙ্গে ‘‘মালাৰচ্ছ’’ন্তি ৰিসেসিতত্তা কুলসঙ্গহত্থমেৰ রোপনং অধিপ্পেতন্তি ৰিঞ্ঞাযতীতি আহ ‘‘মালাৰচ্ছন্তি ৰদন্তো’’তিআদি। এতং ৰুত্তন্তি ‘‘মালাৰচ্ছং রোপেন্তিপি রোপাপেন্তিপি, সিঞ্চন্তিপি সিঞ্চাপেন্তিপী’’তি এতং ৰুত্তং। অঞ্ঞত্র পনাতি আরামাদিঅত্থায মালাৰচ্ছাদীনং রোপনে পন। পরিযাযোতি সযংকরণকারাপনসঙ্খাতো পরিযাযো ৰোহারো অত্থৰিসেসোতি অত্থো অত্থি উপলব্ভতি , কুলসঙ্গহত্থত্তাভাৰাতি অধিপ্পাযো। এৰমেত্থ পরিযাযসদ্দস্স করণকারাপনৰসেন অত্থে গয্হমানে ‘‘গন্থেন্তিপি গন্থাপেন্তিপী’’তি পাল়িযং পটিক্খিত্তগন্থনগন্থাপনং ঠপেত্ৰা যং পরতো ‘‘এৰং জান, এৰং কতে সোভেয্যা’’তিআদিকপ্পিযৰচনেহি গন্থাপনং ৰুত্তং, তত্থ দোসাভাৰো সমত্থিতো হোতি, ‘‘গন্থেহী’’তি আণত্তিযা কারাপনস্সেৰ গন্থাপনন্তি অধিপ্পেতত্তা। তত্থ পরিযাযং ইধ চ পরিযাযাভাৰং ঞত্ৰাতি তত্থ ‘‘মালাৰচ্ছং রোপেন্তী’’তিআদীসু ‘‘মালাৰচ্ছ’’ন্তি কুলসঙ্গহত্থতাসূচনকস্স ৰিসেসনস্স সব্ভাৰতো করণকারাপনসঙ্খাতপরিযাযসব্ভাৰং। ইধ ‘‘গন্থেন্তী’’তিআদীসু তথাৰিধৰিসেসৰচনাভাৰতো তস্স পরিযাযস্স অভাৰঞ্চ ঞত্ৰা। তং সুৰুত্তমেৰাতি ৰেদিতব্বন্তি যোজনা।
Taṃ kathaṃ na virujjhatīti āha ‘‘tatra hī’’tiādi. Tatrāti ropanasiñcanavisaye. Pupphādīhi kulasaṅgahappasaṅge ‘‘mālāvaccha’’nti visesitattā kulasaṅgahatthameva ropanaṃ adhippetanti viññāyatīti āha ‘‘mālāvacchanti vadanto’’tiādi. Etaṃ vuttanti ‘‘mālāvacchaṃ ropentipi ropāpentipi, siñcantipi siñcāpentipī’’ti etaṃ vuttaṃ. Aññatra panāti ārāmādiatthāya mālāvacchādīnaṃ ropane pana. Pariyāyoti sayaṃkaraṇakārāpanasaṅkhāto pariyāyo vohāro atthavisesoti attho atthi upalabbhati , kulasaṅgahatthattābhāvāti adhippāyo. Evamettha pariyāyasaddassa karaṇakārāpanavasena atthe gayhamāne ‘‘ganthentipi ganthāpentipī’’ti pāḷiyaṃ paṭikkhittaganthanaganthāpanaṃ ṭhapetvā yaṃ parato ‘‘evaṃ jāna, evaṃ kate sobheyyā’’tiādikappiyavacanehi ganthāpanaṃ vuttaṃ, tattha dosābhāvo samatthito hoti, ‘‘ganthehī’’ti āṇattiyā kārāpanasseva ganthāpananti adhippetattā. Tattha pariyāyaṃ idha ca pariyāyābhāvaṃ ñatvāti tattha ‘‘mālāvacchaṃ ropentī’’tiādīsu ‘‘mālāvaccha’’nti kulasaṅgahatthatāsūcanakassa visesanassa sabbhāvato karaṇakārāpanasaṅkhātapariyāyasabbhāvaṃ. Idha ‘‘ganthentī’’tiādīsu tathāvidhavisesavacanābhāvato tassa pariyāyassa abhāvañca ñatvā. Taṃ suvuttamevāti veditabbanti yojanā.
সব্বং ৰুত্তনযেনেৰ ৰেদিতব্বন্তি অট্ঠকথাসু আগতনযেনেৰ রোপনাদি, গন্থাপনাদি চ সব্বং ৰেদিতব্বং। ন হেত্থ সন্দেহো কাতব্বোতি নিগমেতি।
Sabbaṃ vuttanayeneva veditabbanti aṭṭhakathāsu āgatanayeneva ropanādi, ganthāpanādi ca sabbaṃ veditabbaṃ. Na hettha sandeho kātabboti nigameti.
হরণাদীসূতি ৰত্থুপূজনত্থায হরণাদীসু। কুলিত্থিআদীনং অত্থায হরণতোতি কুলিত্থিআদীনং হরণস্সেৰ ৰিসেসেত্ৰা পটিক্খিত্তত্তাতি অধিপ্পাযো। তেনাহ ‘‘হরণাধিকারে হী’’তিআদি। মঞ্জরীতি পুপ্ফগোচ্ছং। ৰটংসকোতি কণ্ণস্স উপরি পিল়ন্ধনত্থং কতপুপ্ফৰিকতি , সো চ ‘‘ৰটংসো’’তি ৰুচ্চতি। কণ্ণিকাতি বহূনং পুপ্ফানং ৰা মালানং ৰা একতো বন্ধিতস্স নামং, ‘‘কণ্ণাভরণ’’ন্তিপি ৰদন্তি। হারসদিসন্তি মুত্তাহারসদিসং।
Haraṇādīsūti vatthupūjanatthāya haraṇādīsu. Kulitthiādīnaṃ atthāya haraṇatoti kulitthiādīnaṃ haraṇasseva visesetvā paṭikkhittattāti adhippāyo. Tenāha ‘‘haraṇādhikāre hī’’tiādi. Mañjarīti pupphagocchaṃ. Vaṭaṃsakoti kaṇṇassa upari piḷandhanatthaṃ katapupphavikati , so ca ‘‘vaṭaṃso’’ti vuccati. Kaṇṇikāti bahūnaṃ pupphānaṃ vā mālānaṃ vā ekato bandhitassa nāmaṃ, ‘‘kaṇṇābharaṇa’’ntipi vadanti. Hārasadisanti muttāhārasadisaṃ.
কপ্পিযেনাতি কপ্পিযউদকেন। তেসংযেৰ দ্ৰিন্নন্তি কুলদূসনপরিভোগানং দ্ৰিন্নং। দুক্কটন্তি কুলসঙ্গহত্থায সযং সিঞ্চনে, কপ্পিযৰোহারেন ৰা অকপ্পিযৰোহারেন ৰা সিঞ্চাপনে চ দুক্কটং, পরিভোগত্থায পন সযং সিঞ্চনে, অকপ্পিযৰোহারেন সিঞ্চাপনে চ দুক্কটং। পযোগবহুলতাযাতি সযং করণে, কাযপযোগস্স কারাপনে চ ৰচীপযোগস্স চ বহুত্তেন।
Kappiyenāti kappiyaudakena. Tesaṃyeva dvinnanti kuladūsanaparibhogānaṃ dvinnaṃ. Dukkaṭanti kulasaṅgahatthāya sayaṃ siñcane, kappiyavohārena vā akappiyavohārena vā siñcāpane ca dukkaṭaṃ, paribhogatthāya pana sayaṃ siñcane, akappiyavohārena siñcāpane ca dukkaṭaṃ. Payogabahulatāyāti sayaṃ karaṇe, kāyapayogassa kārāpane ca vacīpayogassa ca bahuttena.
গন্থেন নিব্বত্তং দামং গন্থিমং। এসেৰ নযো সেসেসুপি। ন ৰট্টতীতি ৰত্থুপূজনত্থাযপি ন ৰট্টতি, দুক্কটন্তি অত্থো। ৰট্টতীতি ৰত্থুপূজনত্থায ৰট্টতি, কুলসঙ্গহত্থায পন কপ্পিযৰোহারেন কারাপেন্তস্সাপি দুক্কটমেৰ।
Ganthena nibbattaṃ dāmaṃ ganthimaṃ. Eseva nayo sesesupi. Na vaṭṭatīti vatthupūjanatthāyapi na vaṭṭati, dukkaṭanti attho. Vaṭṭatīti vatthupūjanatthāya vaṭṭati, kulasaṅgahatthāya pana kappiyavohārena kārāpentassāpi dukkaṭameva.
নীপপুপ্ফং নাম কদম্বপুপ্ফং। পুরিমনযেনেৰাতি ‘‘ভিক্খুস্স ৰা’’তিআদিনা ৰুত্তনযেন।
Nīpapupphaṃ nāma kadambapupphaṃ. Purimanayenevāti ‘‘bhikkhussa vā’’tiādinā vuttanayena.
কদলিক্খন্ধম্হীতিআদিনা ৰুত্তং সব্বমেৰ সন্ধায ‘‘তং অতিওল়ারিকমেৰা’’তি ৰুত্তং, সব্বত্থ করণে, অকপ্পিযৰচনেন কারাপনে চ দুক্কটমেৰাতি অত্থো। ‘‘পুপ্ফৰিজ্ঝনত্থং কণ্টকং বন্ধিতুম্পি ন ৰট্টতী’’তি ইমস্স উপলক্খণত্তা পুপ্ফদামোলম্বনাদিঅত্থায রজ্জুবন্ধনাদিপি ন ৰট্টতীতি কেচি ৰদন্তি, অঞ্ঞে পন ‘‘পুপ্ফৰিজ্ঝনত্থং কণ্টকন্তি ৰিসেসিতত্তা তদত্থং কণ্টকমেৰ বন্ধিতুং ন ৰট্টতি, তঞ্চ অট্ঠকথাপমাণেনা’’তি ৰদন্তি, ৰীমংসিত্ৰা গহেতব্বং। পুপ্ফপটিচ্ছকং নাম দণ্ডাদীহি কতং পুপ্ফাধানং, এতম্পি নাগদন্তকম্পি সছিদ্দকমেৰ গহেতব্বং। অসোকপিণ্ডিযাতি অসোকসাখানং, পুপ্ফানং ৰা সমূহে। ধম্মরজ্জু নাম চেতিযাদীনি পরিক্খিপিত্ৰা তেসঞ্চ রজ্জুযা চ অন্তরা পুপ্ফপ্পৰেসনত্থায বন্ধরজ্জু। ‘‘সিথিলৰট্টিতা ৰা রজ্জুৰট্টিঅন্তরে পুপ্ফপ্পৰেসনত্থায এৰং বন্ধা’’তিপি ৰদন্তি।
Kadalikkhandhamhītiādinā vuttaṃ sabbameva sandhāya ‘‘taṃ atioḷārikamevā’’ti vuttaṃ, sabbattha karaṇe, akappiyavacanena kārāpane ca dukkaṭamevāti attho. ‘‘Pupphavijjhanatthaṃ kaṇṭakaṃ bandhitumpi na vaṭṭatī’’ti imassa upalakkhaṇattā pupphadāmolambanādiatthāya rajjubandhanādipi na vaṭṭatīti keci vadanti, aññe pana ‘‘pupphavijjhanatthaṃ kaṇṭakanti visesitattā tadatthaṃ kaṇṭakameva bandhituṃ na vaṭṭati, tañca aṭṭhakathāpamāṇenā’’ti vadanti, vīmaṃsitvā gahetabbaṃ. Pupphapaṭicchakaṃ nāma daṇḍādīhi kataṃ pupphādhānaṃ, etampi nāgadantakampi sachiddakameva gahetabbaṃ. Asokapiṇḍiyāti asokasākhānaṃ, pupphānaṃ vā samūhe. Dhammarajju nāma cetiyādīni parikkhipitvā tesañca rajjuyā ca antarā pupphappavesanatthāya bandharajju. ‘‘Sithilavaṭṭitā vā rajjuvaṭṭiantare pupphappavesanatthāya evaṃ bandhā’’tipi vadanti.
মত্থকদামন্তি ধম্মাসনাদিমত্থকলম্বকদামং। তেসংযেৰাতি উপ্পলাদীনং এৰ। ৰাকেন ৰা দণ্ডকেন ৰাতি পুপ্ফনাল়ং ফালেত্ৰা পুপ্ফেন একাবদ্ধং ঠিতৰাকেন, দণ্ডকেন চ একবন্ধনেনেৰ, এতেন পুপ্ফং বীজগামে সঙ্গহং ন গচ্ছতি পঞ্চসু বীজেসু অপ্পৰিট্ঠত্তা পণ্ণং ৰিয, তস্মা কপ্পিযং অকারাপেত্ৰাপি কোপনে দোসো নত্থি। যঞ্চ ছিন্নস্সাপি মকুল়স্স ৰিকসনং, তম্পি অতিতরুণস্স অভাৰা ৰুড্ঢিলক্খণং ন হোতি, পরিণতস্স পন মকুল়স্স পত্তানং সিনেহে পরিযাদানং গতে ৰিসুংভাৰো এৰ ৰিকাসো, তেনেৰ ছিন্নমকুল়ৰিকাসো অচ্ছিন্নমকুল়ৰিকাসতো পরিহীনো , মিলাতযুত্তো ৰা দিস্সতি। যঞ্চ মিলাতস্স উদকসঞ্ঞোগে অমিলানতাপজ্জনং, তম্পি তম্বুলপণ্ণাদীসু সমানন্তি ৰুড্ঢিলক্খণং ন হোতি, পাল়িঅট্ঠকথাদীসু চ ন কত্থচি পুপ্ফানং কপ্পিযকরণং আগতং, তস্মা পুপ্ফং সব্বথা অবীজমেৰাতি ৰিঞ্ঞাযতি, ৰীমংসিত্ৰা গহেতব্বং। ‘‘পসিব্বকে ৰিযা’’তি ৰুত্তত্তা পুপ্ফপসিব্বকে ৰা পসিব্বকসদিসবন্ধে ৰা যত্থ কত্থচি চীৰরে ৰা পক্খিপিতুং ৰট্টতীতি সিদ্ধং। বন্ধিতুং ন ৰট্টতীতি রজ্জুআদীহি বন্ধনং সন্ধায ৰুত্তং, পুপ্ফস্সেৰ পন অচ্ছিন্নদণ্ডৰাকেহি বন্ধিতুং ৰট্টতি এৰ।
Matthakadāmanti dhammāsanādimatthakalambakadāmaṃ. Tesaṃyevāti uppalādīnaṃ eva. Vākena vā daṇḍakena vāti pupphanāḷaṃ phāletvā pupphena ekābaddhaṃ ṭhitavākena, daṇḍakena ca ekabandhaneneva, etena pupphaṃ bījagāme saṅgahaṃ na gacchati pañcasu bījesu appaviṭṭhattā paṇṇaṃ viya, tasmā kappiyaṃ akārāpetvāpi kopane doso natthi. Yañca chinnassāpi makuḷassa vikasanaṃ, tampi atitaruṇassa abhāvā vuḍḍhilakkhaṇaṃ na hoti, pariṇatassa pana makuḷassa pattānaṃ sinehe pariyādānaṃ gate visuṃbhāvo eva vikāso, teneva chinnamakuḷavikāso acchinnamakuḷavikāsato parihīno , milātayutto vā dissati. Yañca milātassa udakasaññoge amilānatāpajjanaṃ, tampi tambulapaṇṇādīsu samānanti vuḍḍhilakkhaṇaṃ na hoti, pāḷiaṭṭhakathādīsu ca na katthaci pupphānaṃ kappiyakaraṇaṃ āgataṃ, tasmā pupphaṃ sabbathā abījamevāti viññāyati, vīmaṃsitvā gahetabbaṃ. ‘‘Pasibbake viyā’’ti vuttattā pupphapasibbake vā pasibbakasadisabandhe vā yattha katthaci cīvare vā pakkhipituṃ vaṭṭatīti siddhaṃ. Bandhituṃ na vaṭṭatīti rajjuādīhi bandhanaṃ sandhāya vuttaṃ, pupphasseva pana acchinnadaṇḍavākehi bandhituṃ vaṭṭati eva.
পুপ্ফপটে চ দট্ঠব্বন্তি পুপ্ফপটং করোন্তস্স দীঘতো পুপ্ফদামস্স হরণপচ্চাহরণৰসেন পূরণং সন্ধায ৰুত্তং, তিরিযতো হরণং পন ৰাযিমং নাম হোতি, ন পূরিমং। ‘‘পুরিমট্ঠানং অতিক্কামেতী’’তি সামঞ্ঞতো ৰুত্তত্তা পুরিমং পুপ্ফকোটিং ফুসাপেত্ৰা ৰা অফুসাপেত্ৰা ৰা পরিক্খিপনৰসেন পন অতিক্কমন্তস্স আপত্তিযেৰ। বন্ধিতুং ৰট্টতীতি পুপ্ফরহিতায সুত্তৰাককোটিযা বন্ধিতুং ৰট্টতি। ‘‘একৰারং হরিত্ৰা ৰা পরিক্খিপিত্ৰা ৰা’’তি ইদং পুব্বে ৰুত্তচেতিযাদিপরিক্খেপং, পুপ্ফপটকরণঞ্চ সন্ধায ৰুত্তং।
Pupphapaṭeca daṭṭhabbanti pupphapaṭaṃ karontassa dīghato pupphadāmassa haraṇapaccāharaṇavasena pūraṇaṃ sandhāya vuttaṃ, tiriyato haraṇaṃ pana vāyimaṃ nāma hoti, na pūrimaṃ. ‘‘Purimaṭṭhānaṃ atikkāmetī’’ti sāmaññato vuttattā purimaṃ pupphakoṭiṃ phusāpetvā vā aphusāpetvā vā parikkhipanavasena pana atikkamantassa āpattiyeva. Bandhituṃ vaṭṭatīti puppharahitāya suttavākakoṭiyā bandhituṃ vaṭṭati. ‘‘Ekavāraṃ haritvā vā parikkhipitvā vā’’ti idaṃ pubbe vuttacetiyādiparikkhepaṃ, pupphapaṭakaraṇañca sandhāya vuttaṃ.
পরেহি পূরিতন্তি দীঘতো পসারিতং। ৰাযিতুন্তি তিরিযতো হরিতুং, তং পন একৰারম্পি ন লব্ভতি। পুপ্ফানি ঠপেন্তেনাতি অগন্থিতপুপ্ফানি অঞ্ঞমঞ্ঞং ফুসাপেত্ৰাপি ঠপেন্তেন। ঘটিকদামওলম্বকোতি হেট্ঠাভাগে ঘটিকাকারযুত্তো, দারুঘটিকাকারো ৰা ওলম্বকো। সুত্তমযং গেণ্ডুকং নাম। সব্বত্থাতি গন্থিমাদীসু সব্বত্থ।
Parehi pūritanti dīghato pasāritaṃ. Vāyitunti tiriyato harituṃ, taṃ pana ekavārampi na labbhati. Pupphāni ṭhapentenāti aganthitapupphāni aññamaññaṃ phusāpetvāpi ṭhapentena. Ghaṭikadāmaolambakoti heṭṭhābhāge ghaṭikākārayutto, dārughaṭikākāro vā olambako. Suttamayaṃ geṇḍukaṃ nāma. Sabbatthāti ganthimādīsu sabbattha.
রেচকন্তি অভিনযং, ‘‘এৰং নচ্চাহী’’তি নটনাকারদস্সনন্তি অত্থো, ‘‘চক্কং ৰিয অত্তানং ভমাপন’’ন্তিপি কেচি। আকাসেযেৰ কীল়ন্তীতি ‘‘অযং সারী অসুকপদং মযা নীতা’’তি এৰং মুখেনেৰ উভোপি ৰদন্তা কীল়ন্তি। জূতফলকেতি জূতমণ্ডলে। পাসককীল়াযাতি দ্ৰিন্নং তিৰঙ্গুলপ্পমাণানং দারুদন্তাদিমযানং পাসকানং চতূসু পস্সেসু এককাদিৰসেন বিন্দূনি কত্ৰা ফলকে খিপিত্ৰা উপরিভাগে দিট্ঠবিন্দূনং ৰসেন সারিযো অপনেত্ৰা কীল়নকজূতকীল়ায।
Recakanti abhinayaṃ, ‘‘evaṃ naccāhī’’ti naṭanākāradassananti attho, ‘‘cakkaṃ viya attānaṃ bhamāpana’’ntipi keci. Ākāseyeva kīḷantīti ‘‘ayaṃ sārī asukapadaṃ mayā nītā’’ti evaṃ mukheneva ubhopi vadantā kīḷanti. Jūtaphalaketi jūtamaṇḍale. Pāsakakīḷāyāti dvinnaṃ tivaṅgulappamāṇānaṃ dārudantādimayānaṃ pāsakānaṃ catūsu passesu ekakādivasena bindūni katvā phalake khipitvā uparibhāge diṭṭhabindūnaṃ vasena sāriyo apanetvā kīḷanakajūtakīḷāya.
মঞ্জট্ঠি নাম মঞ্জট্ঠরুক্খসারকসাৰং। সলাকহত্থন্তি নাল়িকেরহীরাদীনং কলাপস্সেতং নামং। পাল়িযং থরুস্মিন্তি খগ্গে। উস্সেল়েন্তীতি মুখেন উস্সেল়নসদ্দং পমুঞ্চন্তি, মহন্তং অব্যত্তসদ্দং পৰত্তেন্তীতি অত্থো। অপ্ফোটেন্তীতি দ্ৰিগুণিতৰামহত্থে দক্খিণহত্থেন তাল়েত্ৰা সদ্দং করোন্তি। মুখডিণ্ডিমন্তি মুখভেরী।
Mañjaṭṭhi nāma mañjaṭṭharukkhasārakasāvaṃ. Salākahatthanti nāḷikerahīrādīnaṃ kalāpassetaṃ nāmaṃ. Pāḷiyaṃ tharusminti khagge. Usseḷentīti mukhena usseḷanasaddaṃ pamuñcanti, mahantaṃ abyattasaddaṃ pavattentīti attho. Apphoṭentīti dviguṇitavāmahatthe dakkhiṇahatthena tāḷetvā saddaṃ karonti. Mukhaḍiṇḍimanti mukhabherī.
৪৩২. তেসন্তি সমাসে গুণীভূতানি পব্বানিপি পরামসতি। বোন্দোতি লোলো, মন্দধাতুকোতি অত্থো। ভকুটিং কত্ৰাতি ভমুকভেদং কত্ৰা। নেলাতি নিদ্দোসা।
432.Tesanti samāse guṇībhūtāni pabbānipi parāmasati. Bondoti lolo, mandadhātukoti attho. Bhakuṭiṃ katvāti bhamukabhedaṃ katvā. Nelāti niddosā.
৪৩৩. পাল়িযং ‘‘সারিপুত্তা’’তি ইদং একসেসনযেন সারিপুত্তমোগ্গল্লানানং উভিন্নং আলপনং, তেনেৰ বহুৰচননিদ্দেসো কতো।
433. Pāḷiyaṃ ‘‘sāriputtā’’ti idaṃ ekasesanayena sāriputtamoggallānānaṃ ubhinnaṃ ālapanaṃ, teneva bahuvacananiddeso kato.
৪৩৫. অট্ঠারস ৰত্তানীতি ‘‘ন উপসম্পাদেতব্ব’’ন্তিআদীনি ‘‘ন ভিক্খূহি সম্পযোজেতব্ব’’ন্তি পরিযোসানানি কম্মক্খন্ধকে (চূল়ৰ॰ ৭) আগতানি অট্ঠারস ৰত্তানি। ন পন্নলোমাতি ন পতিতমানলোমা, অননুকূলৰত্তিনোতি অত্থো।
435.Aṭṭhārasa vattānīti ‘‘na upasampādetabba’’ntiādīni ‘‘na bhikkhūhi sampayojetabba’’nti pariyosānāni kammakkhandhake (cūḷava. 7) āgatāni aṭṭhārasa vattāni. Na pannalomāti na patitamānalomā, ananukūlavattinoti attho.
৪৩৭. পরসন্তকং দেতি দুক্কটমেৰাতি ৰিস্সাসগাহেন দানং সন্ধায ৰুত্তং। থুল্লচ্চযন্তি এত্থ ভণ্ডদেয্যম্পি হোতি এৰ।
437.Parasantakaṃ deti dukkaṭamevāti vissāsagāhena dānaṃ sandhāya vuttaṃ. Thullaccayanti ettha bhaṇḍadeyyampi hoti eva.
তঞ্চ খো ৰত্থুপূজনত্থাযাতি মাতাপিতূনম্পি পুপ্ফং দেন্তেন ৰত্থুপূজনত্থাযেৰ দাতব্বন্তি দস্সেতি। মণ্ডনত্থায পন সিৰলিঙ্গাদিপূজনত্থাযাতি এত্তকমেৰ ৰুত্তত্তা ‘‘ইমং ৰিক্কিণিত্ৰা জীৰিস্সন্তী’’তি মাতাপিতূনং দাতুং ৰট্টতি, সেসঞাতীনং পন তাৰকালিকমেৰ দাতুং ৰট্টতি। ঞাতিসামণেরেহেৰাতি তেসং গিহিকম্মপরিমোচনত্থং ৰুত্তং। ইতরেতি অঞ্ঞাতকা, তেহিপি সামণেরেহি আচরিযুপজ্ঝাযানং ৰত্তসীসেন হরিতব্বং। চূল়কন্তি উপড্ঢভাগতোপি উপড্ঢং।
Tañca kho vatthupūjanatthāyāti mātāpitūnampi pupphaṃ dentena vatthupūjanatthāyeva dātabbanti dasseti. Maṇḍanatthāya pana sivaliṅgādipūjanatthāyāti ettakameva vuttattā ‘‘imaṃ vikkiṇitvā jīvissantī’’ti mātāpitūnaṃ dātuṃ vaṭṭati, sesañātīnaṃ pana tāvakālikameva dātuṃ vaṭṭati. Ñātisāmaṇerehevāti tesaṃ gihikammaparimocanatthaṃ vuttaṃ. Itareti aññātakā, tehipi sāmaṇerehi ācariyupajjhāyānaṃ vattasīsena haritabbaṃ. Cūḷakanti upaḍḍhabhāgatopi upaḍḍhaṃ.
সামণেরা…পে॰… ঠপেন্তীতি অরক্খিতাগোপিতং সন্ধায ৰুত্তং। তত্থ তত্থাতি মগ্গে ৰা চেতিযঙ্গণে ৰা। ‘‘সামণেরেহি দাপেতুং ন লভন্তী’’তি ইদং সামণেরেহি গিহীনং কম্মং কারিতং ৰিয হোতীতি ৰুত্তং, ন পন পুপ্ফদানং হোতীতি সামণেরানম্পি ন ৰট্টনতো। ৰুত্তঞ্চ ‘‘সযমেৰা’’তিআদি। ‘‘অৰিসেসেন ৰুত্ত’’ন্তি ইমিনা সব্বেসম্পি ন ৰট্টতীতি দস্সেতি।
Sāmaṇerā…pe… ṭhapentīti arakkhitāgopitaṃ sandhāya vuttaṃ. Tattha tatthāti magge vā cetiyaṅgaṇe vā. ‘‘Sāmaṇerehi dāpetuṃ na labhantī’’ti idaṃ sāmaṇerehi gihīnaṃ kammaṃ kāritaṃ viya hotīti vuttaṃ, na pana pupphadānaṃ hotīti sāmaṇerānampi na vaṭṭanato. Vuttañca ‘‘sayamevā’’tiādi. ‘‘Avisesena vutta’’nti iminā sabbesampi na vaṭṭatīti dasseti.
খীণপরিব্বযানন্তি আগন্তুকে সন্ধায ৰুত্তং। পরিচ্ছিন্নেসুপি রুক্খেসু ‘‘ইধ ফলানি সুন্দরানী’’তিআদিং ৰদন্তেন কুলসঙ্গহো কতো নাম হোতীতি আহ ‘‘এৰং পন ন ৰত্তব্ব’’ন্তি।
Khīṇaparibbayānanti āgantuke sandhāya vuttaṃ. Paricchinnesupi rukkhesu ‘‘idha phalāni sundarānī’’tiādiṃ vadantena kulasaṅgaho kato nāma hotīti āha ‘‘evaṃ pana na vattabba’’nti.
রুক্খচ্ছল্লীতি রুক্খত্তচো। অভাজনীযত্তা গরুভণ্ডং ৰুত্তং। ৰুত্তনযেনাতি পণ্ণদানম্পি পুপ্ফফলাদীসু ৰুত্তনযেন কুলসঙ্গহো হোতীতি দস্সেতি।
Rukkhacchallīti rukkhattaco. Abhājanīyattā garubhaṇḍaṃ vuttaṃ. Vuttanayenāti paṇṇadānampi pupphaphalādīsu vuttanayena kulasaṅgaho hotīti dasseti.
পুব্বে ৰুত্তপ্পকারন্তি মম ৰচনেন ভগৰতো পাদে ৰন্দথাতিআদিনা ৰুত্তপ্পকারসিক্খাপদে পঠমং ৰুত্তং। ‘‘পক্কমতাযস্মা’’তি ইদং পব্বাজনীযকম্মৰসেন ৰুত্তং। পুন ‘‘পক্কমতাযস্মা’’তি ইদম্পি পব্বাজনীযকম্মকতস্স ৰত্তৰসেন ৰুত্তং। এত্থ চ অস্সজিপুনব্বসুকেহি আচরিযেসু অনেকৰিধেসু অনাচারেসু পঞ্ঞপেতব্বা আপত্তিযো সিক্খাপদন্তরেসু পঞ্ঞত্তা এৰাতি তা ইধ অপঞ্ঞপেত্ৰা কুলদূসকানং পব্বাজনীযকম্মৰসেন নিগ্গহং কাতুং তত্থেৰ সম্মা অৰত্তিত্ৰা কারকসঙ্ঘং ছন্দগামিতাদীহি পাপেন্তানং সমনুভাসনায সঙ্ঘাদিসেসং আরোপিতঞ্চ ইদং সিক্খাপদং পঞ্ঞত্তন্তি ৰেদিতব্বং। পঠমসঙ্ঘভেদসদিসানেৰাতি এত্থ অঙ্গেসুপি যথা তত্থ পরক্কমনং, এৰমিধ ছন্দাদীহি পাপনং দট্ঠব্বং। সেসং তাদিসমেৰাতি।
Pubbevuttappakāranti mama vacanena bhagavato pāde vandathātiādinā vuttappakārasikkhāpade paṭhamaṃ vuttaṃ. ‘‘Pakkamatāyasmā’’ti idaṃ pabbājanīyakammavasena vuttaṃ. Puna ‘‘pakkamatāyasmā’’ti idampi pabbājanīyakammakatassa vattavasena vuttaṃ. Ettha ca assajipunabbasukehi ācariyesu anekavidhesu anācāresu paññapetabbā āpattiyo sikkhāpadantaresu paññattā evāti tā idha apaññapetvā kuladūsakānaṃ pabbājanīyakammavasena niggahaṃ kātuṃ tattheva sammā avattitvā kārakasaṅghaṃ chandagāmitādīhi pāpentānaṃ samanubhāsanāya saṅghādisesaṃ āropitañca idaṃ sikkhāpadaṃ paññattanti veditabbaṃ. Paṭhamasaṅghabhedasadisānevāti ettha aṅgesupi yathā tattha parakkamanaṃ, evamidha chandādīhi pāpanaṃ daṭṭhabbaṃ. Sesaṃ tādisamevāti.
কুলদূসকসিক্খাপদৰণ্ণনা নিট্ঠিতা।
Kuladūsakasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১৩. কুলদূসকসিক্খাপদং • 13. Kuladūsakasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১৩. কুলদূসকসিক্খাপদৰণ্ণনা • 13. Kuladūsakasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১৩. কুলদূসকসিক্খাপদৰণ্ণনা • 13. Kuladūsakasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১৩. কুলদূসকসিক্খাপদৰণ্ণনা • 13. Kuladūsakasikkhāpadavaṇṇanā
