| Library / Tipiṭaka / д̇ибидага • Tipiṭaka / ган̇каавид̇аран̣ий-абхинава-дийгаа • Kaṅkhāvitaraṇī-abhinava-ṭīkā |
13. гулад̣̇уусагасигкаабад̣̇аван̣н̣анаа
13. Kuladūsakasikkhāpadavaṇṇanā
наг̇арассааби г̇аамависзсад̇д̇аа ид̇ха г̇аамаг̇г̇ахан̣знзва наг̇арамби г̇ахид̇анд̇и ааха ‘‘наг̇арамби г̇аамз анд̇ог̇ад̇хамзваа’’д̇и, ваа-сад̣̇д̣̇зна ваа ануд̇д̇авигаббад̇т̇зна г̇ахан̣анд̇и звам̣ вуд̇д̇ам̣. зд̇т̇а жа абаагаарабаригкзбо саабан̣о ниг̇амо, сабаагаараабан̣ам̣ наг̇арам̣, д̇ам̣д̇ам̣вибарийд̇о г̇аамод̇и имзсам̣ д̇ин̣н̣ам̣ висзсо д̣̇адтаб̣б̣о. гулаани д̣̇уусзд̇ийд̇и кад̇д̇ияаб̣раахман̣авзссасуд̣̇д̣̇авасзна жад̇д̇аари гулаани вигаарам̣ аабаад̣̇зд̇и. д̣̇уусзнд̇о жа на асужигад̣̇д̣̇амаад̣̇ийхи д̣̇уусзд̇и, ат̇а ко ад̇д̇ано д̣̇уббадибад̇д̇ияаа д̇зсам̣ басаад̣̇ам̣ винаасзд̇и. д̇знааха ‘‘бубпад̣̇аанаад̣̇ийхий’’д̇иаад̣̇и. д̇ад̇т̇а харид̇ваа ваа хараабзд̇ваа ваа баггосид̇ваа ваа баггосаабзд̇ваа ваа саяам̣ ваа убаг̇ад̇аанам̣ (баараа. адта. 2.436-437) яасса гассажи ад̇д̇ано санд̇агасса бубпасса гуласан̇г̇ахад̇т̇ааяа д̣̇аанам̣ бубпад̣̇аанам̣, д̇ам̣ аад̣̇и язсам̣ д̇з бубпад̣̇аанаад̣̇аяо, д̇зхи бубпад̣̇аанаад̣̇ийхи. аад̣̇исад̣̇д̣̇зна (баараа. 437) палад̣̇аанажун̣н̣амад̇д̇игаад̣̇анд̇агадтавзл̣увзж̇ж̇игааж̇ан̇гхабзсанигаанам̣ г̇ахан̣ам̣. сад̣̇д̇хам̣ винаасзнд̇од̇и д̇ат̇аа агаронд̇зсу ан̃н̃зсу бзсалзсу бхигкуусу аббасаад̣̇ам̣ ад̣̇ассанам̣ г̇амзнд̇о. бубпад̣̇аанаад̣̇ийхи жа д̇зхи гад̇асан̇г̇ахзхи ан̃н̃з бзсалз д̇ат̇аа агаронд̇з д̇з мануссаа иссанд̇и на аллийяанд̇ийд̇и со д̇зсам̣ басаад̣̇ам̣ винаасзд̇и наамаад̇и д̣̇адтаб̣б̣ам̣. баабагаа самаажаараад̇и б̣уд̣̇д̇хаббадигудтад̇д̇аа лаамагаа самаажаараа . д̇з бана яасмаа гуласан̇г̇ахад̇т̇ам̣ маалааважчаробанаад̣̇аяо ид̇ха ад̇хиббзд̇аа, д̇асмаа ‘‘маалааважчаробанаад̣̇аяо’’д̇и вуд̇д̇ам̣. аараамаад̣̇ийнамад̇т̇ааяа бана габбияавохаараад̣̇ийхи робаабанаад̣̇игам̣ ваддад̇и. д̇ад̇т̇а маалааважчанд̇и д̇арун̣абубпаругкам̣. д̇арун̣агаа хи бубпаругкааби бубпаг̇ажчааби ‘‘маалааважчаа’’д̇взва вужжанд̇и, д̇асса робанам̣ маалааважчаробанам̣, д̇ам̣ аад̣̇и язсам̣ д̇з маалааважчаробанаад̣̇аяо. аад̣̇исад̣̇д̣̇зна жзд̇т̇а робаабанасин̃жанасин̃жаабанаожинанаожинаабанаг̇ант̇анаг̇ант̇аабанаанам̣ г̇ахан̣ам̣.
Nagarassāpi gāmavisesattā idha gāmaggahaṇeneva nagarampi gahitanti āha ‘‘nagarampi gāme antogadhamevā’’ti, vā-saddena vā anuttavikappatthena gahaṇanti evaṃ vuttaṃ. Ettha ca apākāraparikkhepo sāpaṇo nigamo, sapākārāpaṇaṃ nagaraṃ, taṃtaṃviparīto gāmoti imesaṃ tiṇṇaṃ viseso daṭṭhabbo. Kulāni dūsetīti khattiyabrāhmaṇavessasuddavasena cattāri kulāni vikāraṃ āpādeti. Dūsento ca na asucikaddamādīhi dūseti, atha kho attano duppaṭipattiyā tesaṃ pasādaṃ vināseti. Tenāha ‘‘pupphadānādīhī’’tiādi. Tattha haritvā vā harāpetvā vā pakkositvā vā pakkosāpetvā vā sayaṃ vā upagatānaṃ (pārā. aṭṭha. 2.436-437) yassa kassaci attano santakassa pupphassa kulasaṅgahatthāya dānaṃ pupphadānaṃ, taṃ ādi yesaṃ te pupphadānādayo, tehi pupphadānādīhi. Ādisaddena (pārā. 437) phaladānacuṇṇamattikādantakaṭṭhaveḷuvejjikājaṅghapesanikānaṃ gahaṇaṃ. Saddhaṃ vināsentoti tathā akarontesu aññesu pesalesu bhikkhūsu appasādaṃ adassanaṃ gamento. Pupphadānādīhi ca tehi katasaṅgahehi aññe pesale tathā akaronte te manussā issanti na allīyantīti so tesaṃ pasādaṃ vināseti nāmāti daṭṭhabbaṃ. Pāpakā samācārāti buddhappaṭikuṭṭhattā lāmakā samācārā . Te pana yasmā kulasaṅgahatthaṃ mālāvaccharopanādayo idha adhippetā, tasmā ‘‘mālāvaccharopanādayo’’ti vuttaṃ. Ārāmādīnamatthāya pana kappiyavohārādīhi ropāpanādikaṃ vaṭṭati. Tattha mālāvacchanti taruṇapuppharukkhaṃ. Taruṇakā hi puppharukkhāpi pupphagacchāpi ‘‘mālāvacchā’’tveva vuccanti, tassa ropanaṃ mālāvaccharopanaṃ, taṃ ādi yesaṃ te mālāvaccharopanādayo. Ādisaddena cettha ropāpanasiñcanasiñcāpanaocinanaocināpanaganthanaganthāpanānaṃ gahaṇaṃ.
маад̇игааяам̣ д̣̇иссанд̇ийд̇и яз бажжагкад̇о бассанд̇и, д̇зхи д̣̇иссанд̇и. суяяанд̇ийд̇и яз барад̇о сун̣анд̇и, д̇зхи сод̇ад̣̇ваарзна суд̇ваа убад̇хаарийяанд̇и. д̣̇удтаанийд̇и д̣̇уусид̇аани. алам̣ д̇з ид̇ха ваасзнаад̇и д̇ава ид̇ха ваасзна алам̣, маа ид̇ха д̇ава ваасо ход̇ууд̇и ад̇т̇о. вааран̣ад̇т̇о хи ид̇ха алам̣-сад̣̇д̣̇о. баб̣б̣ааж̇анийяагаммагад̇од̇и жод̣̇зд̇ваа саарзд̇ваа аабад̇д̇им̣ ааробзд̇ваа ‘‘сун̣аад̇у мз, бханд̇з, сан̇гхо, имз ассаж̇ибунаб̣б̣асугаа’’д̇иаад̣̇инаа (баараа. 434) бад̣̇абхааж̇анз вуд̇д̇ааяа н̃ад̇д̇ижад̇уд̇т̇агаммаваажааяа гад̇абаб̣б̣ааж̇анийяагаммо. яасмин̃жа вихаарз васад̇ийд̇и г̇аамад̇о б̣ахивихаарамааха. нзва д̇асмим̣ г̇аамз…бз… жарид̇ум̣ лабхад̇ийд̇и сажзби г̇аамо ваа ниг̇амо ваа д̣̇ваад̣̇асаяож̇анабарамо ход̇и, д̇ияож̇анабарамо жа вихааро ход̇и, нзва д̇асмим̣ г̇аамз ваа ниг̇амз ваа бин̣д̣ааяа жарид̇ум̣ лабхад̇и, на вихаарз васид̇ум̣. д̇асмим̣ вихаарз васанд̇зна сааманд̇аг̇аамзби бин̣д̣ааяа на жарид̇аб̣б̣ам̣, сааманд̇авихаарзби васанд̇зна д̇асмим̣ г̇аамз бин̣д̣ааяа на жарид̇аб̣б̣ам̣. сааманд̇авихаарз васанд̇зна бана сааманд̇аг̇аамз жарид̇ум̣ ваддад̇и. аабаж̇ж̇ид̇аб̣б̣аа аабад̇д̇ияод̇и гуласан̇г̇ахад̇т̇ам̣ ад̇д̇ано санд̇агад̣̇аанз д̣̇уггадам̣, иссаравад̇ааяа сан̇гхасанд̇агад̣̇аанз т̇уллажжаяам̣, басаяха д̣̇аанз баарааж̇иганд̇и имаа аабад̇д̇ияо. маад̇игааяам̣ ‘‘баггамад̇аа яасмаа’’д̇и баб̣б̣ааж̇анийяагаммагад̇асса вад̇д̇авасзна вуд̇д̇ам̣. аад̣̇имхи бана баб̣б̣ааж̇анийяагаммавасзна д̣̇адтаб̣б̣ам̣. ассаж̇ибунаб̣б̣асугзд̇и ассаж̇ин̃жзва бунаб̣б̣асуган̃жа.
Mātikāyaṃ dissantīti ye paccakkhato passanti, tehi dissanti. Suyyantīti ye parato suṇanti, tehi sotadvārena sutvā upadhārīyanti. Duṭṭhānīti dūsitāni. Alaṃ te idha vāsenāti tava idha vāsena alaṃ, mā idha tava vāso hotūti attho. Vāraṇattho hi idha alaṃ-saddo. Pabbājanīyakammakatoti codetvā sāretvā āpattiṃ āropetvā ‘‘suṇātu me, bhante, saṅgho, ime assajipunabbasukā’’tiādinā (pārā. 434) padabhājane vuttāya ñatticatutthakammavācāya katapabbājanīyakammo. Yasmiñca vihāre vasatīti gāmato bahivihāramāha. Neva tasmiṃ gāme…pe… carituṃ labhatīti sacepi gāmo vā nigamo vā dvādasayojanaparamo hoti, tiyojanaparamo ca vihāro hoti, neva tasmiṃ gāme vā nigame vā piṇḍāya carituṃ labhati, na vihāre vasituṃ. Tasmiṃ vihāre vasantena sāmantagāmepi piṇḍāya na caritabbaṃ, sāmantavihārepi vasantena tasmiṃ gāme piṇḍāya na caritabbaṃ. Sāmantavihāre vasantena pana sāmantagāme carituṃ vaṭṭati. Āpajjitabbā āpattiyoti kulasaṅgahatthaṃ attano santakadāne dukkaṭaṃ, issaravatāya saṅghasantakadāne thullaccayaṃ, pasayha dāne pārājikanti imā āpattiyo. Mātikāyaṃ ‘‘pakkamatā yasmā’’ti pabbājanīyakammakatassa vattavasena vuttaṃ. Ādimhi pana pabbājanīyakammavasena daṭṭhabbaṃ. Assajipunabbasuketi assajiñceva punabbasukañca.
гулад̣̇уусагасигкаабад̣̇аван̣н̣анаа нидтид̇аа.
Kuladūsakasikkhāpadavaṇṇanā niṭṭhitā.
