| Library / Tipiṭaka / ཏིཔིཊཀ • Tipiṭaka / ཝིམཏིཝིནོདནཱི-ཊཱིཀཱ • Vimativinodanī-ṭīkā |
༡༣. ཀུལདཱུསཀསིཀྑཱཔདཝཎྞནཱ
13. Kuladūsakasikkhāpadavaṇṇanā
༤༣༡. ཏེརསམེ ཀཱིཊཱགིརཱིཏི ཏསྶ ནིགམསྶ ནཱམཾ། ཏཉྷི སནྡྷཱཡ པརཏོ ‘‘ན ཨསྶཛིཔུནབྦསུཀེཧི བྷིཀྑཱུཧི ཀཱིཊཱགིརིསྨིཾ ཝཏྠབྦ’’ནྟི ཝུཏྟཾ, གཱམནིགམཏོ ཙ པབྦཱཛནཾ, ན ཛནཔདཏོ། ཏེན པན ཡོགཏོ ཛནཔདོཔི ‘‘ཀཱིཊཱགིརི’’ཨིཙྩེཝ སངྑྱཾ གཏོཏི ཨཱཧ ‘‘ཨེཝཾནཱམཀེ ཛནཔདེ’’ཏི།
431. Terasame kīṭāgirīti tassa nigamassa nāmaṃ. Tañhi sandhāya parato ‘‘na assajipunabbasukehi bhikkhūhi kīṭāgirismiṃ vatthabba’’nti vuttaṃ, gāmanigamato ca pabbājanaṃ, na janapadato. Tena pana yogato janapadopi ‘‘kīṭāgiri’’icceva saṅkhyaṃ gatoti āha ‘‘evaṃnāmake janapade’’ti.
ཏཏྲཱཏི སཱཝཏྠིཡཾ། དྷུརཊྛཱནེཏི ཨབྷིམུཁཊྛཱནེ, ཛེཏཝནདྭཱརསམཱིཔེཏི ཨཏྠོ། དྭཱིཧི མེགྷེཧཱིཏི ཝསྶིཀེན, ཧེམནྟིཀེན ཙཱཏི དྭཱིཧི མེགྷེཧི། གཎཱཙརིཡེཧི ཚཧི ཨདྷིཀཏཱཡ ‘‘སམདྷིཀ’’ནྟི ཝུཏྟཾ།
Tatrāti sāvatthiyaṃ. Dhuraṭṭhāneti abhimukhaṭṭhāne, jetavanadvārasamīpeti attho. Dvīhi meghehīti vassikena, hemantikena cāti dvīhi meghehi. Gaṇācariyehi chahi adhikatāya ‘‘samadhika’’nti vuttaṃ.
ཨུདཀསྶཱཏི ཨཀཔྤིཡཨུདཀསྶ ‘‘ཀཔྤིཡཨུདཀསིཉྩན’’ནྟི ཝིསུཾ ཝཀྑམཱནཏྟཱ, ཏཉྩ ‘‘ཨཱརཱམཱདིཨཏྠཱཡ རུཀྑརོཔནེ ཨཀཔྤིཡཝོཧཱརེསུཔི ཀཔྤིཡཨུདཀསིཉྩནཱདི ཝཊྚཏཱི’’ཏི ཝཀྑམཱནཏྟཱ ཨིདྷཱཔི ཝིབྷཱགཾ ཀཏྭཱ ཀཔྤིཡཨུདཀསིཉྩནཱདི ཝིསུཾ དསྶིཏཾ། ཡཐཱ ཀོཊྚནཁཎནཱདིཀཱཡིཀཀིརིཡཱཔི ཨཀཔྤིཡཝོཧཱརེ སངྒཧིཏཱ, ཨེཝཾ མཱཏིཀཱཨུཛུཀརཎཱདིཀཔྤིཡཝོཧཱརེཔཱིཏི ཨཱཧ ‘‘སུཀྑམཱཏིཀཱཡ ཨུཛུཀརཎ’’ནྟི། ཨེཏྠ པུརཱཎཔཎྞཱདིཧརཎམྤི སངྒཡ྄ཧཏི། མཧཱཔཙྩརིཡཝཱདོཝ པམཱཎཏྟཱ པཙྪཱ ཝུཏྟོ། ཨཀཔྤིཡཝོཧཱརེཔི ཨེཀཙྩཾ ཝཊྚཏཱིཏི དསྶེཏུཾ ‘‘ན ཀེཝལཉྩ སེས’’ནྟིཨཱདིམཱཧ། ཡཾཀིཉྩི མཱཏིཀནྟི སུཀྑཾ ཝཱ ཨསུཀྑཾ ཝཱ། ཏཏྠཱཏི ཨཱརཱམཱདིཨཏྠཱཡ རུཀྑརོཔནེ། ཏཐཱཏི ཀཔྤིཡཝོཧཱརཔརིཡཱཡཱདཱིཧི གནྠཱཔནཾ སནྡྷཱཡ ཝུཏྟཾ། ཨིམིནཱ ཙ ཀུལསངྒཧཏྠཱཡ གནྠཱཔནཱདིཔི ན ཝཊྚཏཱིཏི དསྶེཏི།
Udakassāti akappiyaudakassa ‘‘kappiyaudakasiñcana’’nti visuṃ vakkhamānattā, tañca ‘‘ārāmādiatthāya rukkharopane akappiyavohāresupi kappiyaudakasiñcanādi vaṭṭatī’’ti vakkhamānattā idhāpi vibhāgaṃ katvā kappiyaudakasiñcanādi visuṃ dassitaṃ. Yathā koṭṭanakhaṇanādikāyikakiriyāpi akappiyavohāre saṅgahitā, evaṃ mātikāujukaraṇādikappiyavohārepīti āha ‘‘sukkhamātikāya ujukaraṇa’’nti. Ettha purāṇapaṇṇādiharaṇampi saṅgayhati. Mahāpaccariyavādova pamāṇattā pacchā vutto. Akappiyavohārepi ekaccaṃ vaṭṭatīti dassetuṃ ‘‘na kevalañca sesa’’ntiādimāha. Yaṃkiñci mātikanti sukkhaṃ vā asukkhaṃ vā. Tatthāti ārāmādiatthāya rukkharopane. Tathāti kappiyavohārapariyāyādīhi ganthāpanaṃ sandhāya vuttaṃ. Iminā ca kulasaṅgahatthāya ganthāpanādipi na vaṭṭatīti dasseti.
ཝཏྠུཔཱུཛནཏྠཱཡ སཡཾ གནྠནཾ ཀསྨཱ ན ཝཊྚཏཱིཏི ཙོདེནྟོ ‘‘ནནུ ཙཱ’’ཏིཨཱདིམཱཧ། ཡཐཱ ཨཱརཱམཱདིཨཏྠཾ ཀཔྤིཡཔཐཝིཡཾ སཡཾ རོཔེཏུམྤི ཝཊྚཏི, ཏཐཱ ཝཏྠུཔཱུཛནཏྠཱཡ སཡཾ གནྠནམྤི ཀསྨཱ ན ཝཊྚཏཱིཏི ཙོདཀསྶ ཨདྷིཔྤཱཡོ། ཝུཏྟནྟིཨཱདི པརིཧཱརོ། ཨཐ ‘‘ན པན མཧཱཨཊྛཀཐཱཡ’’ནྟི ཀསྨཱ ཝདཏི? མཧཱཔཙྩརིཨཱདཱིསུ ཝུཏྟམྤི ཧི པམཱཎམེཝཱཏི ནཱཡཾ ཝིརོདྷོ, མཧཱཨཊྛཀཐཱཡཾ ཨཝུཏྟསྶ སཡཾ རོཔནསྶ ཏཏྠེཝ ཝུཏྟེན ཨུདཀསིཉྩནེན སཧ སཾསནྡནནཡདསྶནམུཁེན པམཱཎམེཝཱཏི པཏིཊྛཱཔེཏུཾ ཝུཏྟཏྟཱ། ‘‘མཉྙེཡྻཱསཱི’’ཏི པདཾ ‘‘ཏཾ ཀཐ’’ནྟི ཨིམིནཱ སམྦནྡྷིཏབྦཾ། ཏཏྠཱཡཾ ཨདྷིཔྤཱཡོ – ཀིཉྩཱཔི མཧཱཨཊྛཀཐཱཡཾ སཡཾ རོཔནཾ ན ཝུཏྟཾ, ཀཔྤིཡཨུདཀསྶ སཡཾ ཨཱསིཉྩནཾ ཝུཏྟམེཝ, ཏསྨཱ ཡཐཱ ཨཱརཱམཱདིཨཏྠཱཡ ཀཔྤིཡཨུདཀཾ སཡཾ སིཉྩིཏུམྤི ཝཊྚཏི, ཏཐཱ ཝཏྠུཔཱུཛནཏྠཱཡ གནྠནམྤི ཀསྨཱ ན ཝཊྚཏཱིཏི། ཏམྤི ན ཝིརུཛ྄ཛྷཏཱིཏི ཡདེཏཾ ཝཏྠུཔཱུཛནཏྠཱཡཔི གནྠནཱདིཾ པཊིཀྑིཔིཏྭཱ ཨཱརཱམཱདིཨཏྠཱཡ སཡཾ རོཔནསིཉྩནཾ ཝུཏྟཾ, ཏམྤི པཱལི༹ཡཱ སཾསནྡནཏོ པུབྦཱཔརཾ ན ཝིརུཛ྄ཛྷཏི།
Vatthupūjanatthāya sayaṃ ganthanaṃ kasmā na vaṭṭatīti codento ‘‘nanu cā’’tiādimāha. Yathā ārāmādiatthaṃ kappiyapathaviyaṃ sayaṃ ropetumpi vaṭṭati, tathā vatthupūjanatthāya sayaṃ ganthanampi kasmā na vaṭṭatīti codakassa adhippāyo. Vuttantiādi parihāro. Atha ‘‘na pana mahāaṭṭhakathāya’’nti kasmā vadati? Mahāpaccariādīsu vuttampi hi pamāṇamevāti nāyaṃ virodho, mahāaṭṭhakathāyaṃ avuttassa sayaṃ ropanassa tattheva vuttena udakasiñcanena saha saṃsandananayadassanamukhena pamāṇamevāti patiṭṭhāpetuṃ vuttattā. ‘‘Maññeyyāsī’’ti padaṃ ‘‘taṃ katha’’nti iminā sambandhitabbaṃ. Tatthāyaṃ adhippāyo – kiñcāpi mahāaṭṭhakathāyaṃ sayaṃ ropanaṃ na vuttaṃ, kappiyaudakassa sayaṃ āsiñcanaṃ vuttameva, tasmā yathā ārāmādiatthāya kappiyaudakaṃ sayaṃ siñcitumpi vaṭṭati, tathā vatthupūjanatthāya ganthanampi kasmā na vaṭṭatīti. Tampi na virujjhatīti yadetaṃ vatthupūjanatthāyapi ganthanādiṃ paṭikkhipitvā ārāmādiatthāya sayaṃ ropanasiñcanaṃ vuttaṃ, tampi pāḷiyā saṃsandanato pubbāparaṃ na virujjhati.
ཏཾ ཀཐཾ ན ཝིརུཛ྄ཛྷཏཱིཏི ཨཱཧ ‘‘ཏཏྲ ཧཱི’’ཏིཨཱདི། ཏཏྲཱཏི རོཔནསིཉྩནཝིསཡེ། པུཔྥཱདཱིཧི ཀུལསངྒཧཔྤསངྒེ ‘‘མཱལཱཝཙྪ’’ནྟི ཝིསེསིཏཏྟཱ ཀུལསངྒཧཏྠམེཝ རོཔནཾ ཨདྷིཔྤེཏནྟི ཝིཉྙཱཡཏཱིཏི ཨཱཧ ‘‘མཱལཱཝཙྪནྟི ཝདནྟོ’’ཏིཨཱདི། ཨེཏཾ ཝུཏྟནྟི ‘‘མཱལཱཝཙྪཾ རོཔེནྟིཔི རོཔཱཔེནྟིཔི, སིཉྩནྟིཔི སིཉྩཱཔེནྟིཔཱི’’ཏི ཨེཏཾ ཝུཏྟཾ། ཨཉྙཏྲ པནཱཏི ཨཱརཱམཱདིཨཏྠཱཡ མཱལཱཝཙྪཱདཱིནཾ རོཔནེ པན། པརིཡཱཡོཏི སཡཾཀརཎཀཱརཱཔནསངྑཱཏོ པརིཡཱཡོ ཝོཧཱརོ ཨཏྠཝིསེསོཏི ཨཏྠོ ཨཏྠི ཨུཔལབྦྷཏི , ཀུལསངྒཧཏྠཏྟཱབྷཱཝཱཏི ཨདྷིཔྤཱཡོ། ཨེཝམེཏྠ པརིཡཱཡསདྡསྶ ཀརཎཀཱརཱཔནཝསེན ཨཏྠེ གཡ྄ཧམཱནེ ‘‘གནྠེནྟིཔི གནྠཱཔེནྟིཔཱི’’ཏི པཱལི༹ཡཾ པཊིཀྑིཏྟགནྠནགནྠཱཔནཾ ཋཔེཏྭཱ ཡཾ པརཏོ ‘‘ཨེཝཾ ཛཱན, ཨེཝཾ ཀཏེ སོབྷེཡྻཱ’’ཏིཨཱདིཀཔྤིཡཝཙནེཧི གནྠཱཔནཾ ཝུཏྟཾ, ཏཏྠ དོསཱབྷཱཝོ སམཏྠིཏོ ཧོཏི, ‘‘གནྠེཧཱི’’ཏི ཨཱཎཏྟིཡཱ ཀཱརཱཔནསྶེཝ གནྠཱཔནནྟི ཨདྷིཔྤེཏཏྟཱ། ཏཏྠ པརིཡཱཡཾ ཨིདྷ ཙ པརིཡཱཡཱབྷཱཝཾ ཉཏྭཱཏི ཏཏྠ ‘‘མཱལཱཝཙྪཾ རོཔེནྟཱི’’ཏིཨཱདཱིསུ ‘‘མཱལཱཝཙྪ’’ནྟི ཀུལསངྒཧཏྠཏཱསཱུཙནཀསྶ ཝིསེསནསྶ སབྦྷཱཝཏོ ཀརཎཀཱརཱཔནསངྑཱཏཔརིཡཱཡསབྦྷཱཝཾ། ཨིདྷ ‘‘གནྠེནྟཱི’’ཏིཨཱདཱིསུ ཏཐཱཝིདྷཝིསེསཝཙནཱབྷཱཝཏོ ཏསྶ པརིཡཱཡསྶ ཨབྷཱཝཉྩ ཉཏྭཱ། ཏཾ སུཝུཏྟམེཝཱཏི ཝེདིཏབྦནྟི ཡོཛནཱ།
Taṃ kathaṃ na virujjhatīti āha ‘‘tatra hī’’tiādi. Tatrāti ropanasiñcanavisaye. Pupphādīhi kulasaṅgahappasaṅge ‘‘mālāvaccha’’nti visesitattā kulasaṅgahatthameva ropanaṃ adhippetanti viññāyatīti āha ‘‘mālāvacchanti vadanto’’tiādi. Etaṃ vuttanti ‘‘mālāvacchaṃ ropentipi ropāpentipi, siñcantipi siñcāpentipī’’ti etaṃ vuttaṃ. Aññatra panāti ārāmādiatthāya mālāvacchādīnaṃ ropane pana. Pariyāyoti sayaṃkaraṇakārāpanasaṅkhāto pariyāyo vohāro atthavisesoti attho atthi upalabbhati , kulasaṅgahatthattābhāvāti adhippāyo. Evamettha pariyāyasaddassa karaṇakārāpanavasena atthe gayhamāne ‘‘ganthentipi ganthāpentipī’’ti pāḷiyaṃ paṭikkhittaganthanaganthāpanaṃ ṭhapetvā yaṃ parato ‘‘evaṃ jāna, evaṃ kate sobheyyā’’tiādikappiyavacanehi ganthāpanaṃ vuttaṃ, tattha dosābhāvo samatthito hoti, ‘‘ganthehī’’ti āṇattiyā kārāpanasseva ganthāpananti adhippetattā. Tattha pariyāyaṃ idha ca pariyāyābhāvaṃ ñatvāti tattha ‘‘mālāvacchaṃ ropentī’’tiādīsu ‘‘mālāvaccha’’nti kulasaṅgahatthatāsūcanakassa visesanassa sabbhāvato karaṇakārāpanasaṅkhātapariyāyasabbhāvaṃ. Idha ‘‘ganthentī’’tiādīsu tathāvidhavisesavacanābhāvato tassa pariyāyassa abhāvañca ñatvā. Taṃ suvuttamevāti veditabbanti yojanā.
སབྦཾ ཝུཏྟནཡེནེཝ ཝེདིཏབྦནྟི ཨཊྛཀཐཱསུ ཨཱགཏནཡེནེཝ རོཔནཱདི, གནྠཱཔནཱདི ཙ སབྦཾ ཝེདིཏབྦཾ། ན ཧེཏྠ སནྡེཧོ ཀཱཏབྦོཏི ནིགམེཏི།
Sabbaṃ vuttanayeneva veditabbanti aṭṭhakathāsu āgatanayeneva ropanādi, ganthāpanādi ca sabbaṃ veditabbaṃ. Na hettha sandeho kātabboti nigameti.
ཧརཎཱདཱིསཱུཏི ཝཏྠུཔཱུཛནཏྠཱཡ ཧརཎཱདཱིསུ། ཀུལིཏྠིཨཱདཱིནཾ ཨཏྠཱཡ ཧརཎཏོཏི ཀུལིཏྠིཨཱདཱིནཾ ཧརཎསྶེཝ ཝིསེསེཏྭཱ པཊིཀྑིཏྟཏྟཱཏི ཨདྷིཔྤཱཡོ། ཏེནཱཧ ‘‘ཧརཎཱདྷིཀཱརེ ཧཱི’’ཏིཨཱདི། མཉྫརཱིཏི པུཔྥགོཙྪཾ། ཝཊཾསཀོཏི ཀཎྞསྶ ཨུཔརི པིལ༹ནྡྷནཏྠཾ ཀཏཔུཔྥཝིཀཏི , སོ ཙ ‘‘ཝཊཾསོ’’ཏི ཝུཙྩཏི། ཀཎྞིཀཱཏི བཧཱུནཾ པུཔྥཱནཾ ཝཱ མཱལཱནཾ ཝཱ ཨེཀཏོ བནྡྷིཏསྶ ནཱམཾ, ‘‘ཀཎྞཱབྷརཎ’’ནྟིཔི ཝདནྟི། ཧཱརསདིསནྟི མུཏྟཱཧཱརསདིསཾ།
Haraṇādīsūti vatthupūjanatthāya haraṇādīsu. Kulitthiādīnaṃ atthāya haraṇatoti kulitthiādīnaṃ haraṇasseva visesetvā paṭikkhittattāti adhippāyo. Tenāha ‘‘haraṇādhikāre hī’’tiādi. Mañjarīti pupphagocchaṃ. Vaṭaṃsakoti kaṇṇassa upari piḷandhanatthaṃ katapupphavikati , so ca ‘‘vaṭaṃso’’ti vuccati. Kaṇṇikāti bahūnaṃ pupphānaṃ vā mālānaṃ vā ekato bandhitassa nāmaṃ, ‘‘kaṇṇābharaṇa’’ntipi vadanti. Hārasadisanti muttāhārasadisaṃ.
ཀཔྤིཡེནཱཏི ཀཔྤིཡཨུདཀེན། ཏེསཾཡེཝ དྭིནྣནྟི ཀུལདཱུསནཔརིབྷོགཱནཾ དྭིནྣཾ། དུཀྐཊནྟི ཀུལསངྒཧཏྠཱཡ སཡཾ སིཉྩནེ, ཀཔྤིཡཝོཧཱརེན ཝཱ ཨཀཔྤིཡཝོཧཱརེན ཝཱ སིཉྩཱཔནེ ཙ དུཀྐཊཾ, པརིབྷོགཏྠཱཡ པན སཡཾ སིཉྩནེ, ཨཀཔྤིཡཝོཧཱརེན སིཉྩཱཔནེ ཙ དུཀྐཊཾ། པཡོགབཧུལཏཱཡཱཏི སཡཾ ཀརཎེ, ཀཱཡཔཡོགསྶ ཀཱརཱཔནེ ཙ ཝཙཱིཔཡོགསྶ ཙ བཧུཏྟེན།
Kappiyenāti kappiyaudakena. Tesaṃyeva dvinnanti kuladūsanaparibhogānaṃ dvinnaṃ. Dukkaṭanti kulasaṅgahatthāya sayaṃ siñcane, kappiyavohārena vā akappiyavohārena vā siñcāpane ca dukkaṭaṃ, paribhogatthāya pana sayaṃ siñcane, akappiyavohārena siñcāpane ca dukkaṭaṃ. Payogabahulatāyāti sayaṃ karaṇe, kāyapayogassa kārāpane ca vacīpayogassa ca bahuttena.
གནྠེན ནིབྦཏྟཾ དཱམཾ གནྠིམཾ། ཨེསེཝ ནཡོ སེསེསུཔི། ན ཝཊྚཏཱིཏི ཝཏྠུཔཱུཛནཏྠཱཡཔི ན ཝཊྚཏི, དུཀྐཊནྟི ཨཏྠོ། ཝཊྚཏཱིཏི ཝཏྠུཔཱུཛནཏྠཱཡ ཝཊྚཏི, ཀུལསངྒཧཏྠཱཡ པན ཀཔྤིཡཝོཧཱརེན ཀཱརཱཔེནྟསྶཱཔི དུཀྐཊམེཝ།
Ganthena nibbattaṃ dāmaṃ ganthimaṃ. Eseva nayo sesesupi. Na vaṭṭatīti vatthupūjanatthāyapi na vaṭṭati, dukkaṭanti attho. Vaṭṭatīti vatthupūjanatthāya vaṭṭati, kulasaṅgahatthāya pana kappiyavohārena kārāpentassāpi dukkaṭameva.
ནཱིཔཔུཔྥཾ ནཱམ ཀདམྦཔུཔྥཾ། པུརིམནཡེནེཝཱཏི ‘‘བྷིཀྑུསྶ ཝཱ’’ཏིཨཱདིནཱ ཝུཏྟནཡེན།
Nīpapupphaṃ nāma kadambapupphaṃ. Purimanayenevāti ‘‘bhikkhussa vā’’tiādinā vuttanayena.
ཀདལིཀྑནྡྷམྷཱིཏིཨཱདིནཱ ཝུཏྟཾ སབྦམེཝ སནྡྷཱཡ ‘‘ཏཾ ཨཏིཨོལཱ༹རིཀམེཝཱ’’ཏི ཝུཏྟཾ, སབྦཏྠ ཀརཎེ, ཨཀཔྤིཡཝཙནེན ཀཱརཱཔནེ ཙ དུཀྐཊམེཝཱཏི ཨཏྠོ། ‘‘པུཔྥཝིཛ྄ཛྷནཏྠཾ ཀཎྚཀཾ བནྡྷིཏུམྤི ན ཝཊྚཏཱི’’ཏི ཨིམསྶ ཨུཔལཀྑཎཏྟཱ པུཔྥདཱམོལམྦནཱདིཨཏྠཱཡ རཛྫུབནྡྷནཱདིཔི ན ཝཊྚཏཱིཏི ཀེཙི ཝདནྟི, ཨཉྙེ པན ‘‘པུཔྥཝིཛ྄ཛྷནཏྠཾ ཀཎྚཀནྟི ཝིསེསིཏཏྟཱ ཏདཏྠཾ ཀཎྚཀམེཝ བནྡྷིཏུཾ ན ཝཊྚཏི, ཏཉྩ ཨཊྛཀཐཱཔམཱཎེནཱ’’ཏི ཝདནྟི, ཝཱིམཾསིཏྭཱ གཧེཏབྦཾ། པུཔྥཔཊིཙྪཀཾ ནཱམ དཎྜཱདཱིཧི ཀཏཾ པུཔྥཱདྷཱནཾ, ཨེཏམྤི ནཱགདནྟཀམྤི སཚིདྡཀམེཝ གཧེཏབྦཾ། ཨསོཀཔིཎྜིཡཱཏི ཨསོཀསཱཁཱནཾ, པུཔྥཱནཾ ཝཱ སམཱུཧེ། དྷམྨརཛྫུ ནཱམ ཙེཏིཡཱདཱིནི པརིཀྑིཔིཏྭཱ ཏེསཉྩ རཛྫུཡཱ ཙ ཨནྟརཱ པུཔྥཔྤཝེསནཏྠཱཡ བནྡྷརཛྫུ། ‘‘སིཐིལཝཊྚིཏཱ ཝཱ རཛྫུཝཊྚིཨནྟརེ པུཔྥཔྤཝེསནཏྠཱཡ ཨེཝཾ བནྡྷཱ’’ཏིཔི ཝདནྟི།
Kadalikkhandhamhītiādinā vuttaṃ sabbameva sandhāya ‘‘taṃ atioḷārikamevā’’ti vuttaṃ, sabbattha karaṇe, akappiyavacanena kārāpane ca dukkaṭamevāti attho. ‘‘Pupphavijjhanatthaṃ kaṇṭakaṃ bandhitumpi na vaṭṭatī’’ti imassa upalakkhaṇattā pupphadāmolambanādiatthāya rajjubandhanādipi na vaṭṭatīti keci vadanti, aññe pana ‘‘pupphavijjhanatthaṃ kaṇṭakanti visesitattā tadatthaṃ kaṇṭakameva bandhituṃ na vaṭṭati, tañca aṭṭhakathāpamāṇenā’’ti vadanti, vīmaṃsitvā gahetabbaṃ. Pupphapaṭicchakaṃ nāma daṇḍādīhi kataṃ pupphādhānaṃ, etampi nāgadantakampi sachiddakameva gahetabbaṃ. Asokapiṇḍiyāti asokasākhānaṃ, pupphānaṃ vā samūhe. Dhammarajju nāma cetiyādīni parikkhipitvā tesañca rajjuyā ca antarā pupphappavesanatthāya bandharajju. ‘‘Sithilavaṭṭitā vā rajjuvaṭṭiantare pupphappavesanatthāya evaṃ bandhā’’tipi vadanti.
མཏྠཀདཱམནྟི དྷམྨཱསནཱདིམཏྠཀལམྦཀདཱམཾ། ཏེསཾཡེཝཱཏི ཨུཔྤལཱདཱིནཾ ཨེཝ། ཝཱཀེན ཝཱ དཎྜཀེན ཝཱཏི པུཔྥནཱལ༹ཾ ཕཱལེཏྭཱ པུཔྥེན ཨེཀཱབདྡྷཾ ཋིཏཝཱཀེན, དཎྜཀེན ཙ ཨེཀབནྡྷནེནེཝ, ཨེཏེན པུཔྥཾ བཱིཛགཱམེ སངྒཧཾ ན གཙྪཏི པཉྩསུ བཱིཛེསུ ཨཔྤཝིཊྛཏྟཱ པཎྞཾ ཝིཡ, ཏསྨཱ ཀཔྤིཡཾ ཨཀཱརཱཔེཏྭཱཔི ཀོཔནེ དོསོ ནཏྠི། ཡཉྩ ཚིནྣསྶཱཔི མཀུལ༹སྶ ཝིཀསནཾ, ཏམྤི ཨཏིཏརུཎསྶ ཨབྷཱཝཱ ཝུཌྜྷིལཀྑཎཾ ན ཧོཏི, པརིཎཏསྶ པན མཀུལ༹སྶ པཏྟཱནཾ སིནེཧེ པརིཡཱདཱནཾ གཏེ ཝིསུཾབྷཱཝོ ཨེཝ ཝིཀཱསོ, ཏེནེཝ ཚིནྣམཀུལ༹ཝིཀཱསོ ཨཙྪིནྣམཀུལ༹ཝིཀཱསཏོ པརིཧཱིནོ , མིལཱཏཡུཏྟོ ཝཱ དིསྶཏི། ཡཉྩ མིལཱཏསྶ ཨུདཀསཉྙོགེ ཨམིལཱནཏཱཔཛྫནཾ, ཏམྤི ཏམྦུལཔཎྞཱདཱིསུ སམཱནནྟི ཝུཌྜྷིལཀྑཎཾ ན ཧོཏི, པཱལི༹ཨཊྛཀཐཱདཱིསུ ཙ ན ཀཏྠཙི པུཔྥཱནཾ ཀཔྤིཡཀརཎཾ ཨཱགཏཾ, ཏསྨཱ པུཔྥཾ སབྦཐཱ ཨབཱིཛམེཝཱཏི ཝིཉྙཱཡཏི, ཝཱིམཾསིཏྭཱ གཧེཏབྦཾ། ‘‘པསིབྦཀེ ཝིཡཱ’’ཏི ཝུཏྟཏྟཱ པུཔྥཔསིབྦཀེ ཝཱ པསིབྦཀསདིསབནྡྷེ ཝཱ ཡཏྠ ཀཏྠཙི ཙཱིཝརེ ཝཱ པཀྑིཔིཏུཾ ཝཊྚཏཱིཏི སིདྡྷཾ། བནྡྷིཏུཾ ན ཝཊྚཏཱིཏི རཛྫུཨཱདཱིཧི བནྡྷནཾ སནྡྷཱཡ ཝུཏྟཾ, པུཔྥསྶེཝ པན ཨཙྪིནྣདཎྜཝཱཀེཧི བནྡྷིཏུཾ ཝཊྚཏི ཨེཝ།
Matthakadāmanti dhammāsanādimatthakalambakadāmaṃ. Tesaṃyevāti uppalādīnaṃ eva. Vākena vā daṇḍakena vāti pupphanāḷaṃ phāletvā pupphena ekābaddhaṃ ṭhitavākena, daṇḍakena ca ekabandhaneneva, etena pupphaṃ bījagāme saṅgahaṃ na gacchati pañcasu bījesu appaviṭṭhattā paṇṇaṃ viya, tasmā kappiyaṃ akārāpetvāpi kopane doso natthi. Yañca chinnassāpi makuḷassa vikasanaṃ, tampi atitaruṇassa abhāvā vuḍḍhilakkhaṇaṃ na hoti, pariṇatassa pana makuḷassa pattānaṃ sinehe pariyādānaṃ gate visuṃbhāvo eva vikāso, teneva chinnamakuḷavikāso acchinnamakuḷavikāsato parihīno , milātayutto vā dissati. Yañca milātassa udakasaññoge amilānatāpajjanaṃ, tampi tambulapaṇṇādīsu samānanti vuḍḍhilakkhaṇaṃ na hoti, pāḷiaṭṭhakathādīsu ca na katthaci pupphānaṃ kappiyakaraṇaṃ āgataṃ, tasmā pupphaṃ sabbathā abījamevāti viññāyati, vīmaṃsitvā gahetabbaṃ. ‘‘Pasibbake viyā’’ti vuttattā pupphapasibbake vā pasibbakasadisabandhe vā yattha katthaci cīvare vā pakkhipituṃ vaṭṭatīti siddhaṃ. Bandhituṃ na vaṭṭatīti rajjuādīhi bandhanaṃ sandhāya vuttaṃ, pupphasseva pana acchinnadaṇḍavākehi bandhituṃ vaṭṭati eva.
པུཔྥཔཊེ ཙ དཊྛབྦནྟི པུཔྥཔཊཾ ཀརོནྟསྶ དཱིགྷཏོ པུཔྥདཱམསྶ ཧརཎཔཙྩཱཧརཎཝསེན པཱུརཎཾ སནྡྷཱཡ ཝུཏྟཾ, ཏིརིཡཏོ ཧརཎཾ པན ཝཱཡིམཾ ནཱམ ཧོཏི, ན པཱུརིམཾ། ‘‘པུརིམཊྛཱནཾ ཨཏིཀྐཱམེཏཱི’’ཏི སཱམཉྙཏོ ཝུཏྟཏྟཱ པུརིམཾ པུཔྥཀོཊིཾ ཕུསཱཔེཏྭཱ ཝཱ ཨཕུསཱཔེཏྭཱ ཝཱ པརིཀྑིཔནཝསེན པན ཨཏིཀྐམནྟསྶ ཨཱཔཏྟིཡེཝ། བནྡྷིཏུཾ ཝཊྚཏཱིཏི པུཔྥརཧིཏཱཡ སུཏྟཝཱཀཀོཊིཡཱ བནྡྷིཏུཾ ཝཊྚཏི། ‘‘ཨེཀཝཱརཾ ཧརིཏྭཱ ཝཱ པརིཀྑིཔིཏྭཱ ཝཱ’’ཏི ཨིདཾ པུབྦེ ཝུཏྟཙེཏིཡཱདིཔརིཀྑེཔཾ, པུཔྥཔཊཀརཎཉྩ སནྡྷཱཡ ཝུཏྟཾ།
Pupphapaṭeca daṭṭhabbanti pupphapaṭaṃ karontassa dīghato pupphadāmassa haraṇapaccāharaṇavasena pūraṇaṃ sandhāya vuttaṃ, tiriyato haraṇaṃ pana vāyimaṃ nāma hoti, na pūrimaṃ. ‘‘Purimaṭṭhānaṃ atikkāmetī’’ti sāmaññato vuttattā purimaṃ pupphakoṭiṃ phusāpetvā vā aphusāpetvā vā parikkhipanavasena pana atikkamantassa āpattiyeva. Bandhituṃ vaṭṭatīti puppharahitāya suttavākakoṭiyā bandhituṃ vaṭṭati. ‘‘Ekavāraṃ haritvā vā parikkhipitvā vā’’ti idaṃ pubbe vuttacetiyādiparikkhepaṃ, pupphapaṭakaraṇañca sandhāya vuttaṃ.
པརེཧི པཱུརིཏནྟི དཱིགྷཏོ པསཱརིཏཾ། ཝཱཡིཏུནྟི ཏིརིཡཏོ ཧརིཏུཾ, ཏཾ པན ཨེཀཝཱརམྤི ན ལབྦྷཏི། པུཔྥཱནི ཋཔེནྟེནཱཏི ཨགནྠིཏཔུཔྥཱནི ཨཉྙམཉྙཾ ཕུསཱཔེཏྭཱཔི ཋཔེནྟེན། གྷཊིཀདཱམཨོལམྦཀོཏི ཧེཊྛཱབྷཱགེ གྷཊིཀཱཀཱརཡུཏྟོ, དཱརུགྷཊིཀཱཀཱརོ ཝཱ ཨོལམྦཀོ། སུཏྟམཡཾ གེཎྜུཀཾ ནཱམ། སབྦཏྠཱཏི གནྠིམཱདཱིསུ སབྦཏྠ།
Parehi pūritanti dīghato pasāritaṃ. Vāyitunti tiriyato harituṃ, taṃ pana ekavārampi na labbhati. Pupphāni ṭhapentenāti aganthitapupphāni aññamaññaṃ phusāpetvāpi ṭhapentena. Ghaṭikadāmaolambakoti heṭṭhābhāge ghaṭikākārayutto, dārughaṭikākāro vā olambako. Suttamayaṃ geṇḍukaṃ nāma. Sabbatthāti ganthimādīsu sabbattha.
རེཙཀནྟི ཨབྷིནཡཾ, ‘‘ཨེཝཾ ནཙྩཱཧཱི’’ཏི ནཊནཱཀཱརདསྶནནྟི ཨཏྠོ, ‘‘ཙཀྐཾ ཝིཡ ཨཏྟཱནཾ བྷམཱཔན’’ནྟིཔི ཀེཙི། ཨཱཀཱསེཡེཝ ཀཱིལ༹ནྟཱིཏི ‘‘ཨཡཾ སཱརཱི ཨསུཀཔདཾ མཡཱ ནཱིཏཱ’’ཏི ཨེཝཾ མུཁེནེཝ ཨུབྷོཔི ཝདནྟཱ ཀཱིལ༹ནྟི། ཛཱུཏཕལཀེཏི ཛཱུཏམཎྜལེ། པཱསཀཀཱིལཱ༹ཡཱཏི དྭིནྣཾ ཏིཝངྒུལཔྤམཱཎཱནཾ དཱརུདནྟཱདིམཡཱནཾ པཱསཀཱནཾ ཙཏཱུསུ པསྶེསུ ཨེཀཀཱདིཝསེན བིནྡཱུནི ཀཏྭཱ ཕལཀེ ཁིཔིཏྭཱ ཨུཔརིབྷཱགེ དིཊྛབིནྡཱུནཾ ཝསེན སཱརིཡོ ཨཔནེཏྭཱ ཀཱིལ༹ནཀཛཱུཏཀཱིལཱ༹ཡ།
Recakanti abhinayaṃ, ‘‘evaṃ naccāhī’’ti naṭanākāradassananti attho, ‘‘cakkaṃ viya attānaṃ bhamāpana’’ntipi keci. Ākāseyeva kīḷantīti ‘‘ayaṃ sārī asukapadaṃ mayā nītā’’ti evaṃ mukheneva ubhopi vadantā kīḷanti. Jūtaphalaketi jūtamaṇḍale. Pāsakakīḷāyāti dvinnaṃ tivaṅgulappamāṇānaṃ dārudantādimayānaṃ pāsakānaṃ catūsu passesu ekakādivasena bindūni katvā phalake khipitvā uparibhāge diṭṭhabindūnaṃ vasena sāriyo apanetvā kīḷanakajūtakīḷāya.
མཉྫཊྛི ནཱམ མཉྫཊྛརུཀྑསཱརཀསཱཝཾ། སལཱཀཧཏྠནྟི ནཱལི༹ཀེརཧཱིརཱདཱིནཾ ཀལཱཔསྶེཏཾ ནཱམཾ། པཱལི༹ཡཾ ཐརུསྨིནྟི ཁགྒེ། ཨུསྶེལེ༹ནྟཱིཏི མུཁེན ཨུསྶེལ༹ནསདྡཾ པམུཉྩནྟི, མཧནྟཾ ཨབྱཏྟསདྡཾ པཝཏྟེནྟཱིཏི ཨཏྠོ། ཨཔྥོཊེནྟཱིཏི དྭིགུཎིཏཝཱམཧཏྠེ དཀྑིཎཧཏྠེན ཏཱལེ༹ཏྭཱ སདྡཾ ཀརོནྟི། མུཁཌིཎྜིམནྟི མུཁབྷེརཱི།
Mañjaṭṭhi nāma mañjaṭṭharukkhasārakasāvaṃ. Salākahatthanti nāḷikerahīrādīnaṃ kalāpassetaṃ nāmaṃ. Pāḷiyaṃ tharusminti khagge. Usseḷentīti mukhena usseḷanasaddaṃ pamuñcanti, mahantaṃ abyattasaddaṃ pavattentīti attho. Apphoṭentīti dviguṇitavāmahatthe dakkhiṇahatthena tāḷetvā saddaṃ karonti. Mukhaḍiṇḍimanti mukhabherī.
༤༣༢. ཏེསནྟི སམཱསེ གུཎཱིབྷཱུཏཱནི པབྦཱནིཔི པརཱམསཏི། བོནྡོཏི ལོལོ, མནྡདྷཱཏུཀོཏི ཨཏྠོ། བྷཀུཊིཾ ཀཏྭཱཏི བྷམུཀབྷེདཾ ཀཏྭཱ། ནེལཱཏི ནིདྡོསཱ།
432.Tesanti samāse guṇībhūtāni pabbānipi parāmasati. Bondoti lolo, mandadhātukoti attho. Bhakuṭiṃ katvāti bhamukabhedaṃ katvā. Nelāti niddosā.
༤༣༣. པཱལི༹ཡཾ ‘‘སཱརིཔུཏྟཱ’’ཏི ཨིདཾ ཨེཀསེསནཡེན སཱརིཔུཏྟམོགྒལླཱནཱནཾ ཨུབྷིནྣཾ ཨཱལཔནཾ, ཏེནེཝ བཧུཝཙནནིདྡེསོ ཀཏོ།
433. Pāḷiyaṃ ‘‘sāriputtā’’ti idaṃ ekasesanayena sāriputtamoggallānānaṃ ubhinnaṃ ālapanaṃ, teneva bahuvacananiddeso kato.
༤༣༥. ཨཊྛཱརས ཝཏྟཱནཱིཏི ‘‘ན ཨུཔསམྤཱདེཏབྦ’’ནྟིཨཱདཱིནི ‘‘ན བྷིཀྑཱུཧི སམྤཡོཛེཏབྦ’’ནྟི པརིཡོསཱནཱནི ཀམྨཀྑནྡྷཀེ (ཙཱུལ༹ཝ॰ ༧) ཨཱགཏཱནི ཨཊྛཱརས ཝཏྟཱནི། ན པནྣལོམཱཏི ན པཏིཏམཱནལོམཱ, ཨནནུཀཱུལཝཏྟིནོཏི ཨཏྠོ།
435.Aṭṭhārasa vattānīti ‘‘na upasampādetabba’’ntiādīni ‘‘na bhikkhūhi sampayojetabba’’nti pariyosānāni kammakkhandhake (cūḷava. 7) āgatāni aṭṭhārasa vattāni. Na pannalomāti na patitamānalomā, ananukūlavattinoti attho.
༤༣༧. པརསནྟཀཾ དེཏི དུཀྐཊམེཝཱཏི ཝིསྶཱསགཱཧེན དཱནཾ སནྡྷཱཡ ཝུཏྟཾ། ཐུལླཙྩཡནྟི ཨེཏྠ བྷཎྜདེཡྻམྤི ཧོཏི ཨེཝ།
437.Parasantakaṃ deti dukkaṭamevāti vissāsagāhena dānaṃ sandhāya vuttaṃ. Thullaccayanti ettha bhaṇḍadeyyampi hoti eva.
ཏཉྩ ཁོ ཝཏྠུཔཱུཛནཏྠཱཡཱཏི མཱཏཱཔིཏཱུནམྤི པུཔྥཾ དེནྟེན ཝཏྠུཔཱུཛནཏྠཱཡེཝ དཱཏབྦནྟི དསྶེཏི། མཎྜནཏྠཱཡ པན སིཝལིངྒཱདིཔཱུཛནཏྠཱཡཱཏི ཨེཏྟཀམེཝ ཝུཏྟཏྟཱ ‘‘ཨིམཾ ཝིཀྐིཎིཏྭཱ ཛཱིཝིསྶནྟཱི’’ཏི མཱཏཱཔིཏཱུནཾ དཱཏུཾ ཝཊྚཏི, སེསཉཱཏཱིནཾ པན ཏཱཝཀཱལིཀམེཝ དཱཏུཾ ཝཊྚཏི། ཉཱཏིསཱམཎེརེཧེཝཱཏི ཏེསཾ གིཧིཀམྨཔརིམོཙནཏྠཾ ཝུཏྟཾ། ཨིཏརེཏི ཨཉྙཱཏཀཱ, ཏེཧིཔི སཱམཎེརེཧི ཨཱཙརིཡུཔཛ྄ཛྷཱཡཱནཾ ཝཏྟསཱིསེན ཧརིཏབྦཾ། ཙཱུལ༹ཀནྟི ཨུཔཌྜྷབྷཱགཏོཔི ཨུཔཌྜྷཾ།
Tañca kho vatthupūjanatthāyāti mātāpitūnampi pupphaṃ dentena vatthupūjanatthāyeva dātabbanti dasseti. Maṇḍanatthāya pana sivaliṅgādipūjanatthāyāti ettakameva vuttattā ‘‘imaṃ vikkiṇitvā jīvissantī’’ti mātāpitūnaṃ dātuṃ vaṭṭati, sesañātīnaṃ pana tāvakālikameva dātuṃ vaṭṭati. Ñātisāmaṇerehevāti tesaṃ gihikammaparimocanatthaṃ vuttaṃ. Itareti aññātakā, tehipi sāmaṇerehi ācariyupajjhāyānaṃ vattasīsena haritabbaṃ. Cūḷakanti upaḍḍhabhāgatopi upaḍḍhaṃ.
སཱམཎེརཱ…པེ॰… ཋཔེནྟཱིཏི ཨརཀྑིཏཱགོཔིཏཾ སནྡྷཱཡ ཝུཏྟཾ། ཏཏྠ ཏཏྠཱཏི མགྒེ ཝཱ ཙེཏིཡངྒཎེ ཝཱ། ‘‘སཱམཎེརེཧི དཱཔེཏུཾ ན ལབྷནྟཱི’’ཏི ཨིདཾ སཱམཎེརེཧི གིཧཱིནཾ ཀམྨཾ ཀཱརིཏཾ ཝིཡ ཧོཏཱིཏི ཝུཏྟཾ, ན པན པུཔྥདཱནཾ ཧོཏཱིཏི སཱམཎེརཱནམྤི ན ཝཊྚནཏོ། ཝུཏྟཉྩ ‘‘སཡམེཝཱ’’ཏིཨཱདི། ‘‘ཨཝིསེསེན ཝུཏྟ’’ནྟི ཨིམིནཱ སབྦེསམྤི ན ཝཊྚཏཱིཏི དསྶེཏི།
Sāmaṇerā…pe… ṭhapentīti arakkhitāgopitaṃ sandhāya vuttaṃ. Tattha tatthāti magge vā cetiyaṅgaṇe vā. ‘‘Sāmaṇerehi dāpetuṃ na labhantī’’ti idaṃ sāmaṇerehi gihīnaṃ kammaṃ kāritaṃ viya hotīti vuttaṃ, na pana pupphadānaṃ hotīti sāmaṇerānampi na vaṭṭanato. Vuttañca ‘‘sayamevā’’tiādi. ‘‘Avisesena vutta’’nti iminā sabbesampi na vaṭṭatīti dasseti.
ཁཱིཎཔརིབྦཡཱནནྟི ཨཱགནྟུཀེ སནྡྷཱཡ ཝུཏྟཾ། པརིཙྪིནྣེསུཔི རུཀྑེསུ ‘‘ཨིདྷ ཕལཱནི སུནྡརཱནཱི’’ཏིཨཱདིཾ ཝདནྟེན ཀུལསངྒཧོ ཀཏོ ནཱམ ཧོཏཱིཏི ཨཱཧ ‘‘ཨེཝཾ པན ན ཝཏྟབྦ’’ནྟི།
Khīṇaparibbayānanti āgantuke sandhāya vuttaṃ. Paricchinnesupi rukkhesu ‘‘idha phalāni sundarānī’’tiādiṃ vadantena kulasaṅgaho kato nāma hotīti āha ‘‘evaṃ pana na vattabba’’nti.
རུཀྑཙྪལླཱིཏི རུཀྑཏྟཙོ། ཨབྷཱཛནཱིཡཏྟཱ གརུབྷཎྜཾ ཝུཏྟཾ། ཝུཏྟནཡེནཱཏི པཎྞདཱནམྤི པུཔྥཕལཱདཱིསུ ཝུཏྟནཡེན ཀུལསངྒཧོ ཧོཏཱིཏི དསྶེཏི།
Rukkhacchallīti rukkhattaco. Abhājanīyattā garubhaṇḍaṃ vuttaṃ. Vuttanayenāti paṇṇadānampi pupphaphalādīsu vuttanayena kulasaṅgaho hotīti dasseti.
པུབྦེ ཝུཏྟཔྤཀཱརནྟི མམ ཝཙནེན བྷགཝཏོ པཱདེ ཝནྡཐཱཏིཨཱདིནཱ ཝུཏྟཔྤཀཱརསིཀྑཱཔདེ པཋམཾ ཝུཏྟཾ། ‘‘པཀྐམཏཱཡསྨཱ’’ཏི ཨིདཾ པབྦཱཛནཱིཡཀམྨཝསེན ཝུཏྟཾ། པུན ‘‘པཀྐམཏཱཡསྨཱ’’ཏི ཨིདམྤི པབྦཱཛནཱིཡཀམྨཀཏསྶ ཝཏྟཝསེན ཝུཏྟཾ། ཨེཏྠ ཙ ཨསྶཛིཔུནབྦསུཀེཧི ཨཱཙརིཡེསུ ཨནེཀཝིདྷེསུ ཨནཱཙཱརེསུ པཉྙཔེཏབྦཱ ཨཱཔཏྟིཡོ སིཀྑཱཔདནྟརེསུ པཉྙཏྟཱ ཨེཝཱཏི ཏཱ ཨིདྷ ཨཔཉྙཔེཏྭཱ ཀུལདཱུསཀཱནཾ པབྦཱཛནཱིཡཀམྨཝསེན ནིགྒཧཾ ཀཱཏུཾ ཏཏྠེཝ སམྨཱ ཨཝཏྟིཏྭཱ ཀཱརཀསངྒྷཾ ཚནྡགཱམིཏཱདཱིཧི པཱཔེནྟཱནཾ སམནུབྷཱསནཱཡ སངྒྷཱདིསེསཾ ཨཱརོཔིཏཉྩ ཨིདཾ སིཀྑཱཔདཾ པཉྙཏྟནྟི ཝེདིཏབྦཾ། པཋམསངྒྷབྷེདསདིསཱནེཝཱཏི ཨེཏྠ ཨངྒེསུཔི ཡཐཱ ཏཏྠ པརཀྐམནཾ, ཨེཝམིདྷ ཚནྡཱདཱིཧི པཱཔནཾ དཊྛབྦཾ། སེསཾ ཏཱདིསམེཝཱཏི།
Pubbevuttappakāranti mama vacanena bhagavato pāde vandathātiādinā vuttappakārasikkhāpade paṭhamaṃ vuttaṃ. ‘‘Pakkamatāyasmā’’ti idaṃ pabbājanīyakammavasena vuttaṃ. Puna ‘‘pakkamatāyasmā’’ti idampi pabbājanīyakammakatassa vattavasena vuttaṃ. Ettha ca assajipunabbasukehi ācariyesu anekavidhesu anācāresu paññapetabbā āpattiyo sikkhāpadantaresu paññattā evāti tā idha apaññapetvā kuladūsakānaṃ pabbājanīyakammavasena niggahaṃ kātuṃ tattheva sammā avattitvā kārakasaṅghaṃ chandagāmitādīhi pāpentānaṃ samanubhāsanāya saṅghādisesaṃ āropitañca idaṃ sikkhāpadaṃ paññattanti veditabbaṃ. Paṭhamasaṅghabhedasadisānevāti ettha aṅgesupi yathā tattha parakkamanaṃ, evamidha chandādīhi pāpanaṃ daṭṭhabbaṃ. Sesaṃ tādisamevāti.
ཀུལདཱུསཀསིཀྑཱཔདཝཎྞནཱ ནིཊྛིཏཱ།
Kuladūsakasikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༡༣. ཀུལདཱུསཀསིཀྑཱཔདཾ • 13. Kuladūsakasikkhāpadaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༡༣. ཀུལདཱུསཀསིཀྑཱཔདཝཎྞནཱ • 13. Kuladūsakasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༡༣. ཀུལདཱུསཀསིཀྑཱཔདཝཎྞནཱ • 13. Kuladūsakasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༡༣. ཀུལདཱུསཀསིཀྑཱཔདཝཎྞནཱ • 13. Kuladūsakasikkhāpadavaṇṇanā
