| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
38. குலதூ³ஸனநித்³தே³ஸவண்ணனா
38. Kuladūsananiddesavaṇṇanā
297. ‘‘குலானி தூ³ஸேதி புப்பே²ன வா ப²லேன வா சுண்ணேன வா மத்திகாய வா த³ந்தகட்டே²ன வா வேளுயா வா வேஜ்ஜிகாய வா ஜங்க⁴பேஸனியேன வா’’தி (பாரா॰ 437) வுத்தத்தா தானி அட்ட² வத்தூ²னி த³ஸ்ஸேதுங் ‘‘புப்ப²’’ந்திஆதி³மாஹ. இமாய மிச்சா²படிபத்தியா குலானங் அஞ்ஞேஸு ஸீலவந்தேஸு பஸாத³ங் தூ³ஸேதி வினாஸேதீதி குலதூ³ஸனங் து³க்கடங் ஆபஜ்ஜதி. தங் பன அத்தனோ ஸந்தகே ச பரஸந்தகே ச வேதி³தப்³ப³ங்.
297. ‘‘Kulāni dūseti pupphena vā phalena vā cuṇṇena vā mattikāya vā dantakaṭṭhena vā veḷuyā vā vejjikāya vā jaṅghapesaniyena vā’’ti (pārā. 437) vuttattā tāni aṭṭha vatthūni dassetuṃ ‘‘puppha’’ntiādimāha. Imāya micchāpaṭipattiyā kulānaṃ aññesu sīlavantesu pasādaṃ dūseti vināsetīti kuladūsanaṃ dukkaṭaṃ āpajjati. Taṃ pana attano santake ca parasantake ca veditabbaṃ.
298. இதா³னி இமேஸு வத்தூ²ஸு ந கேவலங் குலதூ³ஸனது³க்கடமேவ ஆபஜ்ஜதி, து²ல்லச்சயாதீ³னிபி ஆபஜ்ஜதீதி த³ஸ்ஸேதுங் ‘‘து²ல்லச்சய’’ந்திஆதி³மாஹ. ஸங்கி⁴கங் க³ருப⁴ண்ட³ங் இஸ்ஸரேன தெ³ந்தஸ்ஸ து²ல்லச்சயந்தி ஸம்ப³ந்தோ⁴. ஸேனாஸனத்தா²ய நியமிதங் பன புப்பா²தி³ க³ருப⁴ண்ட³ங் ஹோதி. ஸங்க⁴ஸ்ஸ வா அஞ்ஞஸ்ஸ வா ஸந்தகங் தெ²ய்யசித்தேன தெ³ந்தஸ்ஸ து³க்கடாதீ³னி ஹொந்தீதி பாட²ஸேஸோ, தஸ்ஸ ப⁴ண்ட³ஸ்ஸ அக்³க⁴வஸேன து³க்கடது²ல்லச்சயபாராஜிகானி ஹொந்தீதி அத்தோ².
298. Idāni imesu vatthūsu na kevalaṃ kuladūsanadukkaṭameva āpajjati, thullaccayādīnipi āpajjatīti dassetuṃ ‘‘thullaccaya’’ntiādimāha. Saṅghikaṃ garubhaṇḍaṃ issarena dentassa thullaccayanti sambandho. Senāsanatthāya niyamitaṃ pana pupphādi garubhaṇḍaṃ hoti. Saṅghassa vā aññassa vā santakaṃ theyyacittena dentassa dukkaṭādīni hontīti pāṭhaseso, tassa bhaṇḍassa agghavasena dukkaṭathullaccayapārājikāni hontīti attho.
299-300. ஸப்³ப³தா²தி (பாரா॰ அட்ட²॰ 2.431) கப்பியவோஹாரஅகப்பியவோஹாரபரியாயஓபா⁴ஸனிமித்தகம்மாதீ³ஹி ந வட்டதீதி அத்தோ². வதிஆதீ³னி கத்வா ஜக்³கி³துஞ்ச. அத்தனோ பரிபோ⁴க³த்த²ந்தி ப²லபரிபோ⁴க³த்த²ங். ரோபனாதீ³னீதி ரோபாபனாதீ³னி. ஆதி³-ஸத்³தே³ன ஸிஞ்சாபனஓசினாபனாதீ³னி க³ஹிதானி. குத்³தா³லக²ணித்திவாஸிப²ரஸுஉத³கபா⁴ஜனாதீ³னி ஆஹரித்வா ஸமீபே ட²பனவஸேன நிமித்ததோ ச குத்³தா³லக²ணித்தாதீ³னி ச மாலாவச்சே² ச க³ஹெத்வா டி²தே ‘‘ஸாமணேராத³யோ தி³ஸ்வா ‘தே²ரோ காராபேதுகாமோ’தி ஆக³ந்த்வா கரொந்தீ’’தி ஸஞ்ஞாய ஓபா⁴ஸதோ ச ‘‘இமங் ருக்க²ங் ஜான, இமங் ஆவாடங் ஜானா’’திஆதி³கப்பியவோஹாரதோ ச ‘‘பண்டி³தேன மாலாவச்சா²த³யோ ரோபாபேதப்³பா³, ந சிரஸ்ஸேவ உபகாராய ஸங்வத்தந்தீ’’திஆதி³பரியாயதோ ச ரோபனாதீ³னி லப்³ப⁴ரேதி ஸம்ப³ந்தோ⁴.
299-300.Sabbathāti (pārā. aṭṭha. 2.431) kappiyavohāraakappiyavohārapariyāyaobhāsanimittakammādīhi na vaṭṭatīti attho. Vatiādīni katvā jaggituñca. Attano paribhogatthanti phalaparibhogatthaṃ. Ropanādīnīti ropāpanādīni. Ādi-saddena siñcāpanaocināpanādīni gahitāni. Kuddālakhaṇittivāsipharasuudakabhājanādīni āharitvā samīpe ṭhapanavasena nimittato ca kuddālakhaṇittādīni ca mālāvacche ca gahetvā ṭhite ‘‘sāmaṇerādayo disvā ‘thero kārāpetukāmo’ti āgantvā karontī’’ti saññāya obhāsato ca ‘‘imaṃ rukkhaṃ jāna, imaṃ āvāṭaṃ jānā’’tiādikappiyavohārato ca ‘‘paṇḍitena mālāvacchādayo ropāpetabbā, na cirasseva upakārāya saṃvattantī’’tiādipariyāyato ca ropanādīni labbhareti sambandho.
301-2. இதா³னி அட்ட²ஸு வத்தூ²ஸு அவஸேஸானி த்³வே வத்தூ²னி த³ஸ்ஸேதுங் ‘‘வுத்தாவ வேஜ்ஜிகா ஜங்க⁴பேஸனே’’தி வுத்தங். தத்த² வேஜ்ஜிகா புப்³பே³ வுத்தாவ, இதா³னி ஜங்க⁴பேஸனாதி³வினிச்ச²யங் வக்கா²மீதி அத்தோ². பிதரோதி (பாரா॰ அட்ட²॰ 2.436-437) மாதாபிதரோ. ப⁴ண்டு³ந்தி பப்³ப³ஜ்ஜாபெக்க²ங். பி⁴க்கு²ஸ்ஸ ஸகங் வெய்யாவச்சகரஞ்சாதி ஏதே ட²பெத்வா கஸிவாணிஜ்ஜாதி³கி³ஹிகம்மேஸு தூ³தஸாஸனங் ஹரணே து³க்கடந்தி அத்தோ². பட²மங் ஸாஸனங் அக்³க³ஹெத்வா புன தங் தி³ஸ்வா வா தஸ்ஸ ஸந்திகங் க³ந்த்வா வா வத³தோபி து³க்கடமேவாதி அத்தோ². ஸாஸனங் அக்³க³ஹெத்வா ஆக³தானங் பன ‘‘ப⁴ந்தே, தஸ்மிங் கா³மே இத்த²ன்னாமஸ்ஸ கா பவத்தீ’’தி புச்சி²யமானே கதே²துங் வட்டதி. புச்சி²தபஞ்ஹே தோ³ஸோ நத்தி².
301-2. Idāni aṭṭhasu vatthūsu avasesāni dve vatthūni dassetuṃ ‘‘vuttāva vejjikā jaṅghapesane’’ti vuttaṃ. Tattha vejjikā pubbe vuttāva, idāni jaṅghapesanādivinicchayaṃ vakkhāmīti attho. Pitaroti (pārā. aṭṭha. 2.436-437) mātāpitaro. Bhaṇḍunti pabbajjāpekkhaṃ. Bhikkhussa sakaṃ veyyāvaccakarañcāti ete ṭhapetvā kasivāṇijjādigihikammesu dūtasāsanaṃ haraṇe dukkaṭanti attho. Paṭhamaṃ sāsanaṃ aggahetvā puna taṃ disvā vā tassa santikaṃ gantvā vā vadatopi dukkaṭamevāti attho. Sāsanaṃ aggahetvā āgatānaṃ pana ‘‘bhante, tasmiṃ gāme itthannāmassa kā pavattī’’ti pucchiyamāne kathetuṃ vaṭṭati. Pucchitapañhe doso natthi.
303. ஏவங் குலதூ³ஸனேன உப்பன்னபச்சயா. ‘‘பஞ்சன்னம்பீ’’தி வுத்தத்தா அனுபஸம்பன்னேன கதம்பி ஏதி³ஸங் ந வட்டதி ஏவ மிச்சா²ஜீவத்தா. ஆதுமாவத்து² (மஹாவ॰ 303) செத்த² நித³ஸ்ஸனங். கிங் வியாதி சே, தங் த³ஸ்ஸேதுங் ‘‘அபூ⁴தாரோசனாரூப-ஸப்³யோஹாருக்³க³ஹாதி³ஸா’’தி வுத்தங். தத்த² உக்³க³ஹாதி³ஸாதி ஏதேஹி உப்பன்னபச்சயஸதி³ஸாதி அத்தோ².
303.Evaṃ kuladūsanena uppannapaccayā. ‘‘Pañcannampī’’ti vuttattā anupasampannena katampi edisaṃ na vaṭṭati eva micchājīvattā. Ātumāvatthu (mahāva. 303) cettha nidassanaṃ. Kiṃ viyāti ce, taṃ dassetuṃ ‘‘abhūtārocanārūpa-sabyohāruggahādisā’’ti vuttaṃ. Tattha uggahādisāti etehi uppannapaccayasadisāti attho.
304. இதா³னி புப்பா²தீ³னி கேஸங் தா³துங் வட்டந்தி, கேஸங் தா³துங் ந வட்டந்தீதி தங் த³ஸ்ஸேதுங் ‘‘ஹராபெத்வா’’திஆதி³மாஹ. பிதூனங் (பாரா॰ அட்ட²॰ 2.436-437) தா³துங் லப்³ப⁴தீதி ஸம்ப³ந்தோ⁴. ஸேஸஞாதீனங் பத்தானங் ஏவ. லிங்க³ந்தி ஸிவலிங்க³ங்.
304. Idāni pupphādīni kesaṃ dātuṃ vaṭṭanti, kesaṃ dātuṃ na vaṭṭantīti taṃ dassetuṃ ‘‘harāpetvā’’tiādimāha. Pitūnaṃ (pārā. aṭṭha. 2.436-437) dātuṃ labbhatīti sambandho. Sesañātīnaṃ pattānaṃ eva. Liṅganti sivaliṅgaṃ.
305. ததா² ப²லந்தி ப²லம்பி மாதாபிதூனங் ஹரித்வாபி ஹராபெத்வாபி தா³துங் லப்³ப⁴தீதி அத்தோ². ந கேவலங் மாதாபிதூனங்யேவ, அஞ்ஞேஸம்பி தா³துங் லப்³ப⁴தீதி த³ஸ்ஸேதுங் ‘‘கி³லானான’’ந்திஆதி³மாஹ. ஸபரஸந்தகந்தி எத்த² பரோதி அத்தனோ விஸ்ஸாஸஞ்ஞாதகோ ஏவ அதி⁴ப்பேதோ.
305.Tathāphalanti phalampi mātāpitūnaṃ haritvāpi harāpetvāpi dātuṃ labbhatīti attho. Na kevalaṃ mātāpitūnaṃyeva, aññesampi dātuṃ labbhatīti dassetuṃ ‘‘gilānāna’’ntiādimāha. Saparasantakanti ettha paroti attano vissāsaññātako eva adhippeto.
306. பா⁴ஜெந்தேதி ஸங்க⁴ஸ்ஸ ப²லபுப்ப²ம்ஹி பா⁴ஜியமானே ஸம்மதேன தெ³ய்யந்தி ஸம்ப³ந்தோ⁴. இதரேன அஸம்மதேன அபலோகெத்வா தா³தப்³ப³ந்தி அத்தோ².
306.Bhājenteti saṅghassa phalapupphamhi bhājiyamāne sammatena deyyanti sambandho. Itarena asammatena apaloketvā dātabbanti attho.
307. பரிச்சி²ஜ்ஜாதி ஆக³தானங் தா³தப்³ப³ந்தி ப²லவஸேன வா ருக்க²வஸேன வா பரிச்சி²ந்தி³த்வாதி அத்தோ². இதரஸ்ஸாதி இஸ்ஸராதி³கஸ்ஸ. கதிகங் வத்வாதி ‘‘இமஸ்மிங் ருக்கே² எத்தகானி ப²லானி லப்³ப⁴ந்தீ’’தி ஏவங் வத்வா.
307.Paricchijjāti āgatānaṃ dātabbanti phalavasena vā rukkhavasena vā paricchinditvāti attho. Itarassāti issarādikassa. Katikaṃ vatvāti ‘‘imasmiṃ rukkhe ettakāni phalāni labbhantī’’ti evaṃ vatvā.
308. ஸேஸேதி மத்திகாத³ந்தகட்ட²வேளும்ஹி (பாரா॰ அட்ட²॰ 2.436-437). யதா²வுத்தனயோ ஏவாதி எத்த² அத்தனோ ச பரஸ்ஸ ச ஸந்தகங் குலஸங்க³ஹத்தா²ய த³த³தோ து³க்கடந்திஆதி³னா ஹெட்டா² வுத்தனயேனேவ வினிச்ச²யோ வேதி³தப்³போ³தி அத்தோ². பண்ணம்பீதி கிஞ்சாபி பாளியங் பண்ணதா³னங் ந வுத்தங், ததா²பி குலதூ³ஸனே பவேஸயேதி அத்தோ². குலதூ³ஸனவினிச்ச²யோ.
308.Seseti mattikādantakaṭṭhaveḷumhi (pārā. aṭṭha. 2.436-437). Yathāvuttanayo evāti ettha attano ca parassa ca santakaṃ kulasaṅgahatthāya dadato dukkaṭantiādinā heṭṭhā vuttanayeneva vinicchayo veditabboti attho. Paṇṇampīti kiñcāpi pāḷiyaṃ paṇṇadānaṃ na vuttaṃ, tathāpi kuladūsane pavesayeti attho. Kuladūsanavinicchayo.
குலதூ³ஸனநித்³தே³ஸவண்ணனா நிட்டி²தா.
Kuladūsananiddesavaṇṇanā niṭṭhitā.
