| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৮. কুলঘরণীসুত্তৰণ্ণনা
8. Kulagharaṇīsuttavaṇṇanā
২২৮. ওগাহপ্পত্তোতি ৰিস্সাসৰসেন অনুপ্পৰেসং পত্তো। অঞ্ঞতরং কুলন্তি তস্মিং কুলে জাযম্পতিং সন্ধায ৰদতি। ‘‘বহূপকারং মে এতং কুলং চিরং সপ্পাযাহারদানাদিনা; তস্মা ইধাহং অগ্গদক্খিণেয্যো জাতো; ইমেসংযেৰ দেয্যধম্মপটিগ্গণ্হনেন পুঞ্ঞং ৰড্ঢেস্সামী’’তি চিন্তেসি। তেনাহ ‘‘অঞ্ঞত্থ গন্ত্ৰা কিং করিস্সামী’’তিআদি। সাতি দেৰতা। উভোপেতেতি তং ভিক্খুঞ্চ ঘরণিঞ্চ সন্ধায ৰদতি। পটিগাধপ্পত্তাতি পটিগাধং পত্তা অঞ্ঞমঞ্ঞস্মিং পতিট্ঠিতৰিস্সাসেন।
228.Ogāhappattoti vissāsavasena anuppavesaṃ patto. Aññataraṃ kulanti tasmiṃ kule jāyampatiṃ sandhāya vadati. ‘‘Bahūpakāraṃ me etaṃ kulaṃ ciraṃ sappāyāhāradānādinā; tasmā idhāhaṃ aggadakkhiṇeyyo jāto; imesaṃyeva deyyadhammapaṭiggaṇhanena puññaṃ vaḍḍhessāmī’’ti cintesi. Tenāha ‘‘aññattha gantvā kiṃ karissāmī’’tiādi. Sāti devatā. Ubhopeteti taṃ bhikkhuñca gharaṇiñca sandhāya vadati. Paṭigādhappattāti paṭigādhaṃ pattā aññamaññasmiṃ patiṭṭhitavissāsena.
ৰিস্সমপ্পত্তিৰসেন সন্তিট্ঠন্তি এত্থাতি সণ্ঠানং, ৰিস্সমনট্ঠানং। সমাগন্ত্ৰাতি সন্নিপতিত্ৰা। পটিঞ্ঞূদাহরণেহি মন্তযতীতি মন্তনং, ঞাপকং কারণং। পটিলোমসদ্দাতি পটিলোমভাৰেন পতিতত্তা অসচ্চৰিভাৰনা পটিকূলসদ্দা। তেন কারণেনাতি তেন কারণপটিরূপকেন মিচ্ছাৰচনেন। ন মঙ্কুহোতব্বং অকারকভাৰতো। সদ্দেন পরিতস্সতীতি পরেহি অত্তনি পযুত্তমিচ্ছাসদ্দমত্তেন পরিতস্সনসীলো। ৰতং ন সম্পজ্জতীতি যথাসমাদিন্নৰতং লহুচিত্ততায ন পারিপূরিং গচ্ছতি। সম্পন্নৰতোতি পরিপুণ্ণসীলাদিৰতগুণো
Vissamappattivasena santiṭṭhanti etthāti saṇṭhānaṃ, vissamanaṭṭhānaṃ. Samāgantvāti sannipatitvā. Paṭiññūdāharaṇehi mantayatīti mantanaṃ, ñāpakaṃ kāraṇaṃ. Paṭilomasaddāti paṭilomabhāvena patitattā asaccavibhāvanā paṭikūlasaddā. Tena kāraṇenāti tena kāraṇapaṭirūpakena micchāvacanena. Na maṅkuhotabbaṃ akārakabhāvato. Saddena paritassatīti parehi attani payuttamicchāsaddamattena paritassanasīlo. Vataṃ na sampajjatīti yathāsamādinnavataṃ lahucittatāya na pāripūriṃ gacchati. Sampannavatoti paripuṇṇasīlādivataguṇo
কুলঘরণীসুত্তৰণ্ণনা নিট্ঠিতা।
Kulagharaṇīsuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. কুলঘরণীসুত্তং • 8. Kulagharaṇīsuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. কুলঘরণীসুত্তৰণ্ণনা • 8. Kulagharaṇīsuttavaṇṇanā
