| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
8. гулагхаран̣ийсуд̇д̇аван̣н̣анаа
8. Kulagharaṇīsuttavaṇṇanā
228. адтамз аж̇жхог̇аал̣хаббад̇д̇од̇и ог̇аахаббад̇д̇о. со гира сад̇т̇у санд̇игз гаммадтаанам̣ г̇ахзд̇ваа д̇ам̣ ванасан̣д̣ам̣ бависид̇ваа д̣̇уд̇ияад̣̇ивасз г̇аамам̣ бин̣д̣ааяа баависи баасаад̣̇игзхи абхигганд̇аад̣̇ийхи. ан̃н̃ад̇арам̣ гулам̣ д̇асса ирияаабат̇з басийд̣̇ид̇ваа бан̃жабад̇идтид̇зна ванд̣̇ид̇ваа бин̣д̣абаад̇ам̣ ад̣̇ааси. бхад̇д̇аанумод̣̇анам̣ буна суд̇ваа ад̇ирзгад̇арам̣ басийд̣̇ид̇ваа, ‘‘бханд̇з, нижжагаалам̣ ид̇хзва бхигкам̣ г̇ан̣хат̇аа’’д̇и ниманд̇зси. т̇зро ад̇хиваасзд̇ваа д̇зсам̣ аахаарам̣ барибхун̃ж̇амаано вийрияам̣ баг̇г̇аяха гхадзнд̇о арахад̇д̇ам̣ бад̇ваа жинд̇зси – ‘‘б̣ахуубагаарам̣ мз зд̇ам̣ гулам̣, ан̃н̃ад̇т̇а г̇анд̇ваа гим̣ гариссаамий’’д̇и? паласамаабад̇д̇исукам̣ анубхаванд̇о д̇ад̇т̇зва васи. аж̇жхабхаасийд̇и саа гира т̇зрасса кийн̣аасавабхаавам̣ аж̇аананд̇ий жинд̇зси – ‘‘аяам̣ т̇зро нзва ан̃н̃ам̣ г̇аамам̣ г̇ажчад̇и, на ан̃н̃ам̣ гхарам̣, на ругкамуулааасанасаалаад̣̇ийсу нисийд̣̇ад̇и, нижжагаалам̣ гхарам̣ бависид̇ваава нисийд̣̇ад̇и, убхобзд̇з ог̇аад̇хаббад̇д̇аа бадиг̇аад̇хаббад̇д̇аа, гад̣̇аажи зса имам̣ гулам̣ д̣̇уусзяяа, жод̣̇зссаами на’’нд̇и. д̇асмаа абхааси.
228. Aṭṭhame ajjhogāḷhappattoti ogāhappatto. So kira satthu santike kammaṭṭhānaṃ gahetvā taṃ vanasaṇḍaṃ pavisitvā dutiyadivase gāmaṃ piṇḍāya pāvisi pāsādikehi abhikkantādīhi. Aññataraṃ kulaṃ tassa iriyāpathe pasīditvā pañcapatiṭṭhitena vanditvā piṇḍapātaṃ adāsi. Bhattānumodanaṃ puna sutvā atirekataraṃ pasīditvā, ‘‘bhante, niccakālaṃ idheva bhikkhaṃ gaṇhathā’’ti nimantesi. Thero adhivāsetvā tesaṃ āhāraṃ paribhuñjamāno vīriyaṃ paggayha ghaṭento arahattaṃ patvā cintesi – ‘‘bahūpakāraṃ me etaṃ kulaṃ, aññattha gantvā kiṃ karissāmī’’ti? Phalasamāpattisukhaṃ anubhavanto tattheva vasi. Ajjhabhāsīti sā kira therassa khīṇāsavabhāvaṃ ajānantī cintesi – ‘‘ayaṃ thero neva aññaṃ gāmaṃ gacchati, na aññaṃ gharaṃ, na rukkhamūlaāsanasālādīsu nisīdati, niccakālaṃ gharaṃ pavisitvāva nisīdati, ubhopete ogādhappattā paṭigādhappattā, kadāci esa imaṃ kulaṃ dūseyya, codessāmi na’’nti. Tasmā abhāsi.
сан̣таанзд̇и наг̇арад̣̇ваарасса аасаннз мануссаанам̣ бхан̣д̣агам̣ од̇аарзд̇ваа виссаманадтаанз. сан̇г̇аммаад̇и самааг̇анд̇ваа. манд̇знд̇ийд̇и гат̇знд̇и. ман̃жа д̇ан̃жаад̇и ман̃жа гат̇знд̇и д̇ан̃жа гат̇знд̇и. гиманд̇аранд̇и гим̣ гааран̣ам̣? б̣ахуу хи сад̣̇д̣̇аа бажжуухаад̇и б̣ахугаа зд̇з логасмим̣ бадиломасад̣̇д̣̇аа. на д̇знаад̇и д̇зна гааран̣зна, д̇зна ваа д̇абассинаа на ман̇гу ход̇аб̣б̣ам̣. на хи д̇знаад̇и на хи д̇зна барзхи вуд̇д̇аважанзна сад̇д̇о гилиссад̇и, ад̇д̇анаа гад̇зна бана баабагаммзнзва гилиссад̇ийд̇и д̣̇ассзд̇и. ваад̇амиг̇о яат̇аад̇и яат̇аа ванз ваад̇амиг̇о ваад̇зрид̇аанам̣ бан̣н̣аад̣̇ийнам̣ сад̣̇д̣̇зна барид̇ассад̇и, звам̣ яо сад̣̇д̣̇абарид̇д̇аасий ход̇ийд̇и ад̇т̇о. наасса самбаж̇ж̇ад̇з вад̇анд̇и д̇асса лахужид̇д̇асса вад̇ам̣ на самбаж̇ж̇ад̇и. т̇зро бана кийн̣аасавад̇д̇аа самбаннавад̇од̇и взд̣̇ид̇аб̣б̣о. адтамам̣.
Saṇṭhāneti nagaradvārassa āsanne manussānaṃ bhaṇḍakaṃ otāretvā vissamanaṭṭhāne. Saṅgammāti samāgantvā. Mantentīti kathenti. Mañca tañcāti mañca kathenti tañca kathenti. Kimantaranti kiṃ kāraṇaṃ? Bahū hi saddā paccūhāti bahukā ete lokasmiṃ paṭilomasaddā. Na tenāti tena kāraṇena, tena vā tapassinā na maṅku hotabbaṃ. Na hi tenāti na hi tena parehi vuttavacanena satto kilissati, attanā katena pana pāpakammeneva kilissatīti dasseti. Vātamigo yathāti yathā vane vātamigo vāteritānaṃ paṇṇādīnaṃ saddena paritassati, evaṃ yo saddaparittāsī hotīti attho. Nāssa sampajjate vatanti tassa lahucittassa vataṃ na sampajjati. Thero pana khīṇāsavattā sampannavatoti veditabbo. Aṭṭhamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 8. гулагхаран̣ийсуд̇д̇ам̣ • 8. Kulagharaṇīsuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 8. гулагхаран̣ийсуд̇д̇аван̣н̣анаа • 8. Kulagharaṇīsuttavaṇṇanā
