| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
८. कुलघरणीसुत्तवण्णना
8. Kulagharaṇīsuttavaṇṇanā
२२८. ओगाहप्पत्तोति विस्सासवसेन अनुप्पवेसं पत्तो। अञ्ञतरं कुलन्ति तस्मिं कुले जायम्पतिं सन्धाय वदति। ‘‘बहूपकारं मे एतं कुलं चिरं सप्पायाहारदानादिना; तस्मा इधाहं अग्गदक्खिणेय्यो जातो; इमेसंयेव देय्यधम्मपटिग्गण्हनेन पुञ्ञं वड्ढेस्सामी’’ति चिन्तेसि। तेनाह ‘‘अञ्ञत्थ गन्त्वा किं करिस्सामी’’तिआदि। साति देवता। उभोपेतेति तं भिक्खुञ्च घरणिञ्च सन्धाय वदति। पटिगाधप्पत्ताति पटिगाधं पत्ता अञ्ञमञ्ञस्मिं पतिट्ठितविस्सासेन।
228.Ogāhappattoti vissāsavasena anuppavesaṃ patto. Aññataraṃ kulanti tasmiṃ kule jāyampatiṃ sandhāya vadati. ‘‘Bahūpakāraṃ me etaṃ kulaṃ ciraṃ sappāyāhāradānādinā; tasmā idhāhaṃ aggadakkhiṇeyyo jāto; imesaṃyeva deyyadhammapaṭiggaṇhanena puññaṃ vaḍḍhessāmī’’ti cintesi. Tenāha ‘‘aññattha gantvā kiṃ karissāmī’’tiādi. Sāti devatā. Ubhopeteti taṃ bhikkhuñca gharaṇiñca sandhāya vadati. Paṭigādhappattāti paṭigādhaṃ pattā aññamaññasmiṃ patiṭṭhitavissāsena.
विस्समप्पत्तिवसेन सन्तिट्ठन्ति एत्थाति सण्ठानं, विस्समनट्ठानं। समागन्त्वाति सन्निपतित्वा। पटिञ्ञूदाहरणेहि मन्तयतीति मन्तनं, ञापकं कारणं। पटिलोमसद्दाति पटिलोमभावेन पतितत्ता असच्चविभावना पटिकूलसद्दा। तेन कारणेनाति तेन कारणपटिरूपकेन मिच्छावचनेन। न मङ्कुहोतब्बं अकारकभावतो। सद्देन परितस्सतीति परेहि अत्तनि पयुत्तमिच्छासद्दमत्तेन परितस्सनसीलो। वतं न सम्पज्जतीति यथासमादिन्नवतं लहुचित्तताय न पारिपूरिं गच्छति। सम्पन्नवतोति परिपुण्णसीलादिवतगुणो
Vissamappattivasena santiṭṭhanti etthāti saṇṭhānaṃ, vissamanaṭṭhānaṃ. Samāgantvāti sannipatitvā. Paṭiññūdāharaṇehi mantayatīti mantanaṃ, ñāpakaṃ kāraṇaṃ. Paṭilomasaddāti paṭilomabhāvena patitattā asaccavibhāvanā paṭikūlasaddā. Tena kāraṇenāti tena kāraṇapaṭirūpakena micchāvacanena. Na maṅkuhotabbaṃ akārakabhāvato. Saddena paritassatīti parehi attani payuttamicchāsaddamattena paritassanasīlo. Vataṃ na sampajjatīti yathāsamādinnavataṃ lahucittatāya na pāripūriṃ gacchati. Sampannavatoti paripuṇṇasīlādivataguṇo
कुलघरणीसुत्तवण्णना निट्ठिता।
Kulagharaṇīsuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ८. कुलघरणीसुत्तं • 8. Kulagharaṇīsuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ८. कुलघरणीसुत्तवण्णना • 8. Kulagharaṇīsuttavaṇṇanā
