| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៨. កុលឃរណីសុត្តវណ្ណនា
8. Kulagharaṇīsuttavaṇṇanā
២២៨. ឱគាហប្បត្តោតិ វិស្សាសវសេន អនុប្បវេសំ បត្តោ។ អញ្ញតរំ កុលន្តិ តស្មិំ កុលេ ជាយម្បតិំ សន្ធាយ វទតិ។ ‘‘ពហូបការំ មេ ឯតំ កុលំ ចិរំ សប្បាយាហារទានាទិនា; តស្មា ឥធាហំ អគ្គទក្ខិណេយ្យោ ជាតោ; ឥមេសំយេវ ទេយ្យធម្មបដិគ្គណ្ហនេន បុញ្ញំ វឌ្ឍេស្សាមី’’តិ ចិន្តេសិ។ តេនាហ ‘‘អញ្ញត្ថ គន្ត្វា កិំ ករិស្សាមី’’តិអាទិ។ សាតិ ទេវតា។ ឧភោបេតេតិ តំ ភិក្ខុញ្ច ឃរណិញ្ច សន្ធាយ វទតិ។ បដិគាធប្បត្តាតិ បដិគាធំ បត្តា អញ្ញមញ្ញស្មិំ បតិដ្ឋិតវិស្សាសេន។
228.Ogāhappattoti vissāsavasena anuppavesaṃ patto. Aññataraṃ kulanti tasmiṃ kule jāyampatiṃ sandhāya vadati. ‘‘Bahūpakāraṃ me etaṃ kulaṃ ciraṃ sappāyāhāradānādinā; tasmā idhāhaṃ aggadakkhiṇeyyo jāto; imesaṃyeva deyyadhammapaṭiggaṇhanena puññaṃ vaḍḍhessāmī’’ti cintesi. Tenāha ‘‘aññattha gantvā kiṃ karissāmī’’tiādi. Sāti devatā. Ubhopeteti taṃ bhikkhuñca gharaṇiñca sandhāya vadati. Paṭigādhappattāti paṭigādhaṃ pattā aññamaññasmiṃ patiṭṭhitavissāsena.
វិស្សមប្បត្តិវសេន សន្តិដ្ឋន្តិ ឯត្ថាតិ សណ្ឋានំ, វិស្សមនដ្ឋានំ។ សមាគន្ត្វាតិ សន្និបតិត្វា។ បដិញ្ញូទាហរណេហិ មន្តយតីតិ មន្តនំ, ញាបកំ ការណំ។ បដិលោមសទ្ទាតិ បដិលោមភាវេន បតិតត្តា អសច្ចវិភាវនា បដិកូលសទ្ទា។ តេន ការណេនាតិ តេន ការណបដិរូបកេន មិច្ឆាវចនេន។ ន មង្កុហោតព្ពំ អការកភាវតោ។ សទ្ទេន បរិតស្សតីតិ បរេហិ អត្តនិ បយុត្តមិច្ឆាសទ្ទមត្តេន បរិតស្សនសីលោ។ វតំ ន សម្បជ្ជតីតិ យថាសមាទិន្នវតំ លហុចិត្តតាយ ន បារិបូរិំ គច្ឆតិ។ សម្បន្នវតោតិ បរិបុណ្ណសីលាទិវតគុណោ
Vissamappattivasena santiṭṭhanti etthāti saṇṭhānaṃ, vissamanaṭṭhānaṃ. Samāgantvāti sannipatitvā. Paṭiññūdāharaṇehi mantayatīti mantanaṃ, ñāpakaṃ kāraṇaṃ. Paṭilomasaddāti paṭilomabhāvena patitattā asaccavibhāvanā paṭikūlasaddā. Tena kāraṇenāti tena kāraṇapaṭirūpakena micchāvacanena. Na maṅkuhotabbaṃ akārakabhāvato. Saddena paritassatīti parehi attani payuttamicchāsaddamattena paritassanasīlo. Vataṃ na sampajjatīti yathāsamādinnavataṃ lahucittatāya na pāripūriṃ gacchati. Sampannavatoti paripuṇṇasīlādivataguṇo
កុលឃរណីសុត្តវណ្ណនា និដ្ឋិតា។
Kulagharaṇīsuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៨. កុលឃរណីសុត្តំ • 8. Kulagharaṇīsuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៨. កុលឃរណីសុត្តវណ្ណនា • 8. Kulagharaṇīsuttavaṇṇanā
