| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
8. කුලඝරණීසුත්‌තවණ්‌ණනා
8. Kulagharaṇīsuttavaṇṇanā
228. ඔගාහප්‌පත්‌තොති විස්‌සාසවසෙන අනුප්‌පවෙසං පත්‌තො. අඤ්‌ඤතරං කුලන්‌ති තස්‌මිං කුලෙ ජායම්‌පතිං සන්‌ධාය වදති. ‘‘බහූපකාරං මෙ එතං කුලං චිරං සප්‌පායාහාරදානාදිනා; තස්‌මා ඉධාහං අග්‌ගදක්‌ඛිණෙය්‍යො ජාතො; ඉමෙසංයෙව දෙය්‍යධම්‌මපටිග්‌ගණ්‌හනෙන පුඤ්‌ඤං වඩ්‌ඪෙස්‌සාමී’’ති චින්‌තෙසි. තෙනාහ ‘‘අඤ්‌ඤත්‌ථ ගන්‌ත්‌වා කිං කරිස්‌සාමී’’තිආදි. සාති දෙවතා. උභොපෙතෙති තං භික්‌ඛුඤ්‌ච ඝරණිඤ්‌ච සන්‌ධාය වදති. පටිගාධප්‌පත්‌තාති පටිගාධං පත්‌තා අඤ්‌ඤමඤ්‌ඤස්‌මිං පතිට්‌ඨිතවිස්‌සාසෙන.
228.Ogāhappattoti vissāsavasena anuppavesaṃ patto. Aññataraṃ kulanti tasmiṃ kule jāyampatiṃ sandhāya vadati. ‘‘Bahūpakāraṃ me etaṃ kulaṃ ciraṃ sappāyāhāradānādinā; tasmā idhāhaṃ aggadakkhiṇeyyo jāto; imesaṃyeva deyyadhammapaṭiggaṇhanena puññaṃ vaḍḍhessāmī’’ti cintesi. Tenāha ‘‘aññattha gantvā kiṃ karissāmī’’tiādi. Sāti devatā. Ubhopeteti taṃ bhikkhuñca gharaṇiñca sandhāya vadati. Paṭigādhappattāti paṭigādhaṃ pattā aññamaññasmiṃ patiṭṭhitavissāsena.
විස්‌සමප්‌පත්‌තිවසෙන සන්‌තිට්‌ඨන්‌ති එත්‌ථාති සණ්‌ඨානං, විස්‌සමනට්‌ඨානං. සමාගන්‌ත්‌වාති සන්‌නිපතිත්‌වා. පටිඤ්‌ඤූදාහරණෙහි මන්‌තයතීති මන්‌තනං, ඤාපකං කාරණං. පටිලොමසද්‌දාති පටිලොමභාවෙන පතිතත්‌තා අසච්‌චවිභාවනා පටිකූලසද්‌දා. තෙන කාරණෙනාති තෙන කාරණපටිරූපකෙන මිච්‌ඡාවචනෙන. න මඞ්‌කුහොතබ්‌බං අකාරකභාවතො. සද්‌දෙන පරිතස්‌සතීති පරෙහි අත්‌තනි පයුත්‌තමිච්‌ඡාසද්‌දමත්‌තෙන පරිතස්‌සනසීලො. වතං න සම්‌පජ්‌ජතීති යථාසමාදින්‌නවතං ලහුචිත්‌තතාය න පාරිපූරිං ගච්‌ඡති. සම්‌පන්‌නවතොති පරිපුණ්‌ණසීලාදිවතගුණො
Vissamappattivasena santiṭṭhanti etthāti saṇṭhānaṃ, vissamanaṭṭhānaṃ. Samāgantvāti sannipatitvā. Paṭiññūdāharaṇehi mantayatīti mantanaṃ, ñāpakaṃ kāraṇaṃ. Paṭilomasaddāti paṭilomabhāvena patitattā asaccavibhāvanā paṭikūlasaddā. Tena kāraṇenāti tena kāraṇapaṭirūpakena micchāvacanena. Na maṅkuhotabbaṃ akārakabhāvato. Saddena paritassatīti parehi attani payuttamicchāsaddamattena paritassanasīlo. Vataṃ na sampajjatīti yathāsamādinnavataṃ lahucittatāya na pāripūriṃ gacchati. Sampannavatoti paripuṇṇasīlādivataguṇo
කුලඝරණීසුත්‌තවණ්‌ණනා නිට්‌ඨිතා.
Kulagharaṇīsuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 8. කුලඝරණීසුත්‌තං • 8. Kulagharaṇīsuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8. කුලඝරණීසුත්‌තවණ්‌ණනා • 8. Kulagharaṇīsuttavaṇṇanā
