| Library / Tipiṭaka / д̇ибидага • Tipiṭaka / винаяасан̇г̇аха-адтагат̇аа • Vinayasaṅgaha-aṭṭhakathā |
5. гуласан̇г̇ахавинижчаяагат̇аа
5. Kulasaṅgahavinicchayakathā
27. гуласан̇г̇аход̇и бубпапалаад̣̇ийхи гулаанам̣ сан̇г̇ахо гуласан̇г̇ахо. д̇ад̇рааяам̣ винижчаяо (баараа. адта. 2.431) – гуласан̇г̇ахад̇т̇ааяа маалааважчаад̣̇ийни робзд̇ум̣ ваа робаабзд̇ум̣ ваа син̃жид̇ум̣ ваа син̃жаабзд̇ум̣ ваа бубпаани ожинид̇ум̣ ваа ожинаабзд̇ум̣ ваа г̇ант̇ид̇ум̣ ваа г̇ант̇аабзд̇ум̣ ваа на ваддад̇и. д̇ад̇т̇а агаббияавохааро габбияавохааро барияааяо обхаасо нимид̇д̇агамманд̇и имаани бан̃жа ж̇аанид̇аб̣б̣аани.
27.Kulasaṅgahoti pupphaphalādīhi kulānaṃ saṅgaho kulasaṅgaho. Tatrāyaṃ vinicchayo (pārā. aṭṭha. 2.431) – kulasaṅgahatthāya mālāvacchādīni ropetuṃ vā ropāpetuṃ vā siñcituṃ vā siñcāpetuṃ vā pupphāni ocinituṃ vā ocināpetuṃ vā ganthituṃ vā ganthāpetuṃ vā na vaṭṭati. Tattha akappiyavohāro kappiyavohāro pariyāyo obhāso nimittakammanti imāni pañca jānitabbāni.
28. д̇ад̇т̇а агаббияавохааро наама аллахарид̇аанам̣ годданам̣ годдаабанам̣, ааваадасса кан̣анам̣ кан̣аабанам̣, маалааважчасса робанам̣ робаабанам̣, аал̣ияаа б̣анд̇ханам̣ б̣анд̇хаабанам̣, уд̣̇агасса сзжанам̣ сзжаабанам̣, маад̇игааяа саммукагаран̣ам̣, габбияауд̣̇агасин̃жанам̣, хад̇т̇абаад̣̇амукад̇ховананахаанод̣̇агасин̃жанам̣. габбияавохааро наама ‘‘имам̣ ругкам̣ ж̇аана, имам̣ ааваадам̣ ж̇аана, имам̣ маалааважчам̣ ж̇аана, зд̇т̇а уд̣̇агам̣ ж̇аанаа’’д̇иаад̣̇иважанам̣ сугкамаад̇игааяа уж̇угаран̣ан̃жа. барияааяо наама ‘‘бан̣д̣ид̇зна маалааважчаад̣̇аяо робаабзд̇аб̣б̣аа, нажирассзва убагаарааяа сам̣вад̇д̇анд̇ий’’д̇иаад̣̇иважанам̣. обхаасо наама гуд̣̇аалакан̣ид̇д̇аад̣̇ийни жа маалааважчз жа г̇ахзд̇ваа таанам̣. звам̣ тид̇ан̃хи сааман̣зраад̣̇аяо д̣̇исваа ‘‘т̇зро гаараабзд̇угаамо’’д̇и г̇анд̇ваа гаронд̇и. нимид̇д̇агаммам̣ наама гуд̣̇аалакан̣ид̇д̇иваасипарасууд̣̇агабхааж̇анаани аахарид̇ваа самийбз табанам̣.
28. Tattha akappiyavohāro nāma allaharitānaṃ koṭṭanaṃ koṭṭāpanaṃ, āvāṭassa khaṇanaṃ khaṇāpanaṃ, mālāvacchassa ropanaṃ ropāpanaṃ, āḷiyā bandhanaṃ bandhāpanaṃ, udakassa secanaṃ secāpanaṃ, mātikāya sammukhakaraṇaṃ, kappiyaudakasiñcanaṃ, hatthapādamukhadhovananahānodakasiñcanaṃ. Kappiyavohāro nāma ‘‘imaṃ rukkhaṃ jāna, imaṃ āvāṭaṃ jāna, imaṃ mālāvacchaṃ jāna, ettha udakaṃ jānā’’tiādivacanaṃ sukkhamātikāya ujukaraṇañca. Pariyāyo nāma ‘‘paṇḍitena mālāvacchādayo ropāpetabbā, nacirasseva upakārāya saṃvattantī’’tiādivacanaṃ. Obhāso nāma kudālakhaṇittādīni ca mālāvacche ca gahetvā ṭhānaṃ. Evaṃ ṭhitañhi sāmaṇerādayo disvā ‘‘thero kārāpetukāmo’’ti gantvā karonti. Nimittakammaṃ nāma kudālakhaṇittivāsipharasuudakabhājanāni āharitvā samīpe ṭhapanaṃ.
29. имаани бан̃жаби гуласан̇г̇ахад̇т̇ааяа робанаробаабанаад̣̇ийсу на вадданд̇и. палабарибхог̇ад̇т̇ааяа габбияаагаббияавохаарад̣̇ваяамзва на ваддад̇и, ид̇арад̇д̇аяам̣ ваддад̇и. махаабажжарияам̣ бана ‘‘габбияавохаароби ваддад̇и, яан̃жа ад̇д̇ано барибхог̇ад̇т̇ааяа ваддад̇и, д̇ам̣ ан̃н̃абуг̇г̇аласса ваа сан̇гхасса ваа жзд̇ияасса ваа ад̇т̇ааяаби ваддад̇ий’’д̇и вуд̇д̇ам̣. аараамад̇т̇ааяа бана ванад̇т̇ааяа чааяад̇т̇ааяа жа агаббияавохаарамад̇д̇амзва на ваддад̇и, сзсам̣ ваддад̇и. на гзвалан̃жа сзсам̣, яам̣ гин̃жи маад̇игамби уж̇ум̣ гаад̇ум̣ габбияауд̣̇агам̣ син̃жид̇ум̣ нахаанагодтагам̣ гад̇ваа нахааяид̇ум̣ хад̇т̇абаад̣̇амукад̇хованауд̣̇агаани жа д̇ад̇т̇а чад̣д̣зд̇умби ваддад̇и. махаабажжарияам̣ бана гурунд̣̇ияан̃жа ‘‘габбияабат̇авияам̣ саяам̣ робзд̇умби ваддад̇ий’’д̇и вуд̇д̇ам̣. аараамаад̣̇иад̇т̇ааяа бана робид̇асса ваа робаабид̇асса ваа палам̣ барибхун̃ж̇ид̇умби ваддад̇и.
29. Imāni pañcapi kulasaṅgahatthāya ropanaropāpanādīsu na vaṭṭanti. Phalaparibhogatthāya kappiyākappiyavohāradvayameva na vaṭṭati, itarattayaṃ vaṭṭati. Mahāpaccariyaṃ pana ‘‘kappiyavohāropi vaṭṭati, yañca attano paribhogatthāya vaṭṭati, taṃ aññapuggalassa vā saṅghassa vā cetiyassa vā atthāyapi vaṭṭatī’’ti vuttaṃ. Ārāmatthāya pana vanatthāya chāyatthāya ca akappiyavohāramattameva na vaṭṭati, sesaṃ vaṭṭati. Na kevalañca sesaṃ, yaṃ kiñci mātikampi ujuṃ kātuṃ kappiyaudakaṃ siñcituṃ nahānakoṭṭhakaṃ katvā nahāyituṃ hatthapādamukhadhovanaudakāni ca tattha chaḍḍetumpi vaṭṭati. Mahāpaccariyaṃ pana kurundiyañca ‘‘kappiyapathaviyaṃ sayaṃ ropetumpi vaṭṭatī’’ti vuttaṃ. Ārāmādiatthāya pana ropitassa vā ropāpitassa vā phalaṃ paribhuñjitumpi vaṭṭati.
30. аяам̣ бана аад̣̇ид̇о бадтааяа вид̇т̇аарзна аабад̇д̇ивинижчаяо – гулад̣̇уусанад̇т̇ааяа агаббияабат̇авияам̣ маалааважчам̣ робзнд̇асса баажид̇д̇ияан̃жзва д̣̇уггадан̃жа, д̇ат̇аа агаббияавохаарзна робаабзнд̇асса. габбияабат̇авияам̣ робанзби робаабанзби д̣̇уггадамзва. убхаяад̇рааби сагим̣ аан̣ад̇д̇ияаа б̣ахуунамби робанз згамзва сабаажид̇д̇ияад̣̇уггадам̣ ваа суд̣̇д̇хад̣̇уггадам̣ ваа ход̇и. барибхог̇ад̇т̇ааяа габбияабхуумияам̣ ваа агаббияабхуумияам̣ ваа габбияавохаарзна робаабанз анаабад̇д̇и. аараамаад̣̇иад̇т̇ааяаби агаббияабат̇авияам̣ робзнд̇асса ваа агаббияаважанзна робаабзнд̇асса ваа баажид̇д̇ияам̣. аяам̣ бана наяо махааадтагат̇ааяам̣ на судту вибхад̇д̇о, махаабажжарияам̣ бана вибхад̇д̇од̇и.
30. Ayaṃ pana ādito paṭṭhāya vitthārena āpattivinicchayo – kuladūsanatthāya akappiyapathaviyaṃ mālāvacchaṃ ropentassa pācittiyañceva dukkaṭañca, tathā akappiyavohārena ropāpentassa. Kappiyapathaviyaṃ ropanepi ropāpanepi dukkaṭameva. Ubhayatrāpi sakiṃ āṇattiyā bahūnampi ropane ekameva sapācittiyadukkaṭaṃ vā suddhadukkaṭaṃ vā hoti. Paribhogatthāya kappiyabhūmiyaṃ vā akappiyabhūmiyaṃ vā kappiyavohārena ropāpane anāpatti. Ārāmādiatthāyapi akappiyapathaviyaṃ ropentassa vā akappiyavacanena ropāpentassa vā pācittiyaṃ. Ayaṃ pana nayo mahāaṭṭhakathāyaṃ na suṭṭhu vibhatto, mahāpaccariyaṃ pana vibhattoti.
син̃жанасин̃жаабанз бана агаббияауд̣̇агзна саб̣б̣ад̇т̇а баажид̇д̇ияам̣, гулад̣̇уусанабарибхог̇ад̇т̇ааяа д̣̇уггадамби. габбиязна д̇зсам̣язва д̣̇виннам̣ ад̇т̇ааяа д̣̇уггадам̣, барибхог̇ад̇т̇ааяа жзд̇т̇а габбияавохаарзна син̃жаабанз анаабад̇д̇и. аабад̇д̇идтаанз бана д̇хаарааважчзд̣̇авасзна баяог̇аб̣ахулад̇ааяа жа аабад̇д̇иб̣ахулад̇аа взд̣̇ид̇аб̣б̣аа.
Siñcanasiñcāpane pana akappiyaudakena sabbattha pācittiyaṃ, kuladūsanaparibhogatthāya dukkaṭampi. Kappiyena tesaṃyeva dvinnaṃ atthāya dukkaṭaṃ, paribhogatthāya cettha kappiyavohārena siñcāpane anāpatti. Āpattiṭṭhāne pana dhārāvacchedavasena payogabahulatāya ca āpattibahulatā veditabbā.
гуласан̇г̇ахад̇т̇ааяа ожинанз бубпаг̇ан̣анааяа д̣̇уггадабаажид̇д̇ияаани, ан̃н̃ад̇т̇а баажид̇д̇ияаанзва. б̣ахууни бана бубпаани згабаяог̇зна ожинанд̇о баяог̇авасзна гаарзд̇аб̣б̣о. ожинаабанз гулад̣̇уусанад̇т̇ааяа сагим̣ аан̣ад̇д̇о б̣ахумби ожинаад̇и, згамзва сабаажид̇д̇ияад̣̇уггадам̣, ан̃н̃ад̇ра баажид̇д̇ияамзва.
Kulasaṅgahatthāya ocinane pupphagaṇanāya dukkaṭapācittiyāni, aññattha pācittiyāneva. Bahūni pana pupphāni ekapayogena ocinanto payogavasena kāretabbo. Ocināpane kuladūsanatthāya sakiṃ āṇatto bahumpi ocināti, ekameva sapācittiyadukkaṭaṃ, aññatra pācittiyameva.
31. г̇ант̇анаг̇ант̇аабанзсу бана саб̣б̣ааби ча бубпавигад̇ияо взд̣̇ид̇аб̣б̣аа – г̇ант̇имам̣ г̇обпимам̣ взд̇химам̣ взтимам̣ бууримам̣ вааяиманд̇и. д̇ад̇т̇а г̇ант̇имам̣ наама сад̣̇ан̣д̣агзсу ваа уббалабад̣̇умаад̣̇ийсу ан̃н̃зсу ваа д̣̇ийгхаван̣дзсу бубпзсу д̣̇адтаб̣б̣ам̣. д̣̇ан̣д̣агзна ваа д̣̇ан̣д̣агам̣, ван̣дзна ваа ван̣дам̣ г̇ант̇зд̇ваа гад̇амзва хи г̇ант̇имам̣. д̇ам̣ бхигкусса ваа бхигкунияаа ваа гаад̇умби агаббияаважанзна гаараабзд̇умби на ваддад̇и, ‘‘звам̣ ж̇аана, звам̣ гад̇з собхзяяа, яат̇аа зд̇аани бубпаани на вигирияанд̇и, д̇ат̇аа гарохий’’д̇иаад̣̇инаа бана габбияаважанзна гаараабзд̇ум̣ ваддад̇и.
31. Ganthanaganthāpanesu pana sabbāpi cha pupphavikatiyo veditabbā – ganthimaṃ gopphimaṃ vedhimaṃ veṭhimaṃ pūrimaṃ vāyimanti. Tattha ganthimaṃ nāma sadaṇḍakesu vā uppalapadumādīsu aññesu vā dīghavaṇṭesu pupphesu daṭṭhabbaṃ. Daṇḍakena vā daṇḍakaṃ, vaṇṭena vā vaṇṭaṃ ganthetvā katameva hi ganthimaṃ. Taṃ bhikkhussa vā bhikkhuniyā vā kātumpi akappiyavacanena kārāpetumpi na vaṭṭati, ‘‘evaṃ jāna, evaṃ kate sobheyya, yathā etāni pupphāni na vikiriyanti, tathā karohī’’tiādinā pana kappiyavacanena kārāpetuṃ vaṭṭati.
г̇обпимам̣ наама суд̇д̇зна ваа ваагаад̣̇ийхи ваа вассигабубпаад̣̇ийнам̣ згад̇ован̣дигаубхад̇ован̣дигамаалаавасзна г̇обпанам̣, ваагам̣ ваа раж̇ж̇ум̣ ваа д̣̇иг̇ун̣ам̣ гад̇ваа д̇ад̇т̇а аван̣дагаани нийбабубпаад̣̇ийни бавзсзд̇ваа бадибаадияаа б̣анд̇ханд̇и, зд̇амби г̇обпимамзва. саб̣б̣ам̣ буриманаязнзва на ваддад̇и.
Gopphimaṃ nāma suttena vā vākādīhi vā vassikapupphādīnaṃ ekatovaṇṭikaubhatovaṇṭikamālāvasena gopphanaṃ, vākaṃ vā rajjuṃ vā diguṇaṃ katvā tattha avaṇṭakāni nīpapupphādīni pavesetvā paṭipāṭiyā bandhanti, etampi gopphimameva. Sabbaṃ purimanayeneva na vaṭṭati.
взд̇химам̣ наама саван̣дагаани вассигабубпаад̣̇ийни ван̣дз, аван̣дагаани вагулабубпаад̣̇ийни ад̇д̇ано чид̣̇д̣̇зсу суужид̇аалахийраад̣̇ийхи винивиж̇жхид̇ваа аавунанд̇и, зд̇ам̣ взд̇химам̣ наама. д̇ам̣ буриманаязнзва на ваддад̇и. гзжи бана гад̣̇алигканд̇хамхи ган̣дагз ваа д̇аалахийраад̣̇ийни ваа бавзсзд̇ваа д̇ад̇т̇а бубпаани винивиж̇жхид̇ваа табзнд̇и, гзжи ган̣дагасаакаасу, гзжи бубпачад̇д̇абубпагуудааг̇аарагаран̣ад̇т̇ам̣ чад̇д̇з жа бхид̇д̇ияан̃жа бавзсзд̇ваа табид̇аган̣дагзсу, гзжи д̇хаммаасанавид̇аанз б̣ад̣̇д̇хаган̣дагзсу, гзжи ган̣игаарабубпаад̣̇ийни салаагаахи виж̇жханд̇и, чад̇д̇аад̇хичад̇д̇ам̣ вияа гаронд̇и, д̇ам̣ ад̇иол̣ааригамзва. бубпавиж̇жханад̇т̇ам̣ бана д̇хаммаасанавид̇аанз ган̣дагамби б̣анд̇хид̇ум̣ ган̣дагаад̣̇ийхи ваа згабубпамби виж̇жхид̇ум̣ бубпзязва ваа бубпам̣ бавзсзд̇ум̣ на ваддад̇и. ж̇аалавид̇аанавзд̣̇иганааг̇ад̣̇анд̇агабубпабадижчагад̇аалабан̣н̣аг̇ул̣агаад̣̇ийнам̣ бана чид̣̇д̣̇зсу асогабин̣д̣ияаа ваа анд̇арзсу бубпаани бавзсзд̇ум̣ на д̣̇осо. на хзд̇ам̣ взд̇химам̣ ход̇и. д̇хаммараж̇ж̇уяамби зсзва наяо.
Vedhimaṃ nāma savaṇṭakāni vassikapupphādīni vaṇṭe, avaṇṭakāni vakulapupphādīni attano chiddesu sūcitālahīrādīhi vinivijjhitvā āvunanti, etaṃ vedhimaṃ nāma. Taṃ purimanayeneva na vaṭṭati. Keci pana kadalikkhandhamhi kaṇṭake vā tālahīrādīni vā pavesetvā tattha pupphāni vinivijjhitvā ṭhapenti, keci kaṇṭakasākhāsu, keci pupphachattapupphakūṭāgārakaraṇatthaṃ chatte ca bhittiyañca pavesetvā ṭhapitakaṇṭakesu, keci dhammāsanavitāne baddhakaṇṭakesu, keci kaṇikārapupphādīni salākāhi vijjhanti, chattādhichattaṃ viya karonti, taṃ atioḷārikameva. Pupphavijjhanatthaṃ pana dhammāsanavitāne kaṇṭakampi bandhituṃ kaṇṭakādīhi vā ekapupphampi vijjhituṃ puppheyeva vā pupphaṃ pavesetuṃ na vaṭṭati. Jālavitānavedikanāgadantakapupphapaṭicchakatālapaṇṇaguḷakādīnaṃ pana chiddesu asokapiṇḍiyā vā antaresu pupphāni pavesetuṃ na doso. Na hetaṃ vedhimaṃ hoti. Dhammarajjuyampi eseva nayo.
взтимам̣ наама бубпад̣̇аамабубпахад̇т̇агзсу д̣̇адтаб̣б̣ам̣. гзжи хи мад̇т̇агад̣̇аамам̣ гаронд̇аа хздтаа гхадагаагаарам̣ д̣̇ассзд̇ум̣ бубпзхи взтзнд̇и, гзжи адта адта ваа д̣̇аса д̣̇аса ваа уббалабубпаад̣̇ийни суд̇д̇зна ваа ваагзна ваа д̣̇ан̣д̣агзсу б̣анд̇хид̇ваа уббалахад̇т̇агз ваа бад̣̇умахад̇т̇агз ваа гаронд̇и, д̇ам̣ саб̣б̣ам̣ буриманаязнзва на ваддад̇и. сааман̣зрзхи уббаадзд̇ваа т̇алз табид̇ауббалаад̣̇ийни гаасаавзна бхан̣д̣игамби б̣анд̇хид̇ум̣ на ваддад̇и. д̇зсам̣язва бана ваагзна ваа д̣̇ан̣д̣агзна ваа б̣анд̇хид̇ум̣ ам̣сабхан̣д̣игам̣ ваа гаад̇ум̣ ваддад̇и. ам̣сабхан̣д̣игам̣ наама канд̇хз табид̇агаасаавасса убхо анд̇з аахарид̇ваа бхан̣д̣игам̣ гад̇ваа д̇асмим̣ басиб̣б̣агз вияа бубпаани багкибанд̇и, аяам̣ вужжад̇и ам̣сабхан̣д̣игаа, зд̇ам̣ гаад̇ум̣ ваддад̇и. д̣̇ан̣д̣агзхи бад̣̇уминибан̣н̣ам̣ виж̇жхид̇ваа уббалаад̣̇ийни бан̣н̣зна взтзд̇ваа г̇ан̣ханд̇и, д̇ад̇рааби бубпаанам̣ убари бад̣̇уминибан̣н̣амзва б̣анд̇хид̇ум̣ ваддад̇и, хздтаа д̣̇ан̣д̣агам̣ бана б̣анд̇хид̇ум̣ на ваддад̇и.
Veṭhimaṃ nāma pupphadāmapupphahatthakesu daṭṭhabbaṃ. Keci hi matthakadāmaṃ karontā heṭṭhā ghaṭakākāraṃ dassetuṃ pupphehi veṭhenti, keci aṭṭha aṭṭha vā dasa dasa vā uppalapupphādīni suttena vā vākena vā daṇḍakesu bandhitvā uppalahatthake vā padumahatthake vā karonti, taṃ sabbaṃ purimanayeneva na vaṭṭati. Sāmaṇerehi uppāṭetvā thale ṭhapitauppalādīni kāsāvena bhaṇḍikampi bandhituṃ na vaṭṭati. Tesaṃyeva pana vākena vā daṇḍakena vā bandhituṃ aṃsabhaṇḍikaṃ vā kātuṃ vaṭṭati. Aṃsabhaṇḍikaṃ nāma khandhe ṭhapitakāsāvassa ubho ante āharitvā bhaṇḍikaṃ katvā tasmiṃ pasibbake viya pupphāni pakkhipanti, ayaṃ vuccati aṃsabhaṇḍikā, etaṃ kātuṃ vaṭṭati. Daṇḍakehi paduminipaṇṇaṃ vijjhitvā uppalādīni paṇṇena veṭhetvā gaṇhanti, tatrāpi pupphānaṃ upari paduminipaṇṇameva bandhituṃ vaṭṭati, heṭṭhā daṇḍakaṃ pana bandhituṃ na vaṭṭati.
бууримам̣ наама маалааг̇ун̣з жа бубпабадз жа д̣̇адтаб̣б̣ам̣. яо хи маалааг̇ун̣зна жзд̇ияам̣ ваа б̣од̇хим̣ ваа взд̣̇игам̣ ваа баригкибанд̇о буна аанзд̇ваа буримадтаанам̣ ад̇иггаамзд̇и, зд̇д̇аавад̇аа бууримам̣ наама ход̇и, го бана ваад̣̇о анзгагкад̇д̇ум̣ баригкибанд̇асса. нааг̇ад̣̇анд̇аганд̇арзхи бавзсзд̇ваа харанд̇о оламб̣агам̣ гад̇ваа буна нааг̇ад̣̇анд̇агам̣ баригкибад̇и, зд̇амби бууримам̣ наама. нааг̇ад̣̇анд̇агз бана бубпавалаяам̣ бавзсзд̇ум̣ ваддад̇и. маалааг̇ун̣зхи бубпабадам̣ гаронд̇и, д̇ад̇рааби згамзва маалааг̇ун̣ам̣ харид̇ум̣ ваддад̇и. буна бажжаахарад̇о бууримамзва ход̇и. д̇ам̣ саб̣б̣ам̣ буриманаязнзва на ваддад̇и. маалааг̇ун̣зхи бана б̣ахуухиби гад̇ам̣ бубпад̣̇аамам̣ лабхид̇ваа аасанамад̇т̇агаад̣̇ийсу б̣анд̇хид̇ум̣ ваддад̇и. ад̇ид̣̇ийгхам̣ бана маалааг̇ун̣ам̣ згаваарам̣ харид̇ваа баригкибид̇ваа буна ид̇арасса бхигкуно д̣̇аад̇ум̣ ваддад̇и, д̇знаби д̇ат̇зва гаад̇ум̣ ваддад̇и.
Pūrimaṃ nāma mālāguṇe ca pupphapaṭe ca daṭṭhabbaṃ. Yo hi mālāguṇena cetiyaṃ vā bodhiṃ vā vedikaṃ vā parikkhipanto puna ānetvā purimaṭṭhānaṃ atikkāmeti, ettāvatā pūrimaṃ nāma hoti, ko pana vādo anekakkhattuṃ parikkhipantassa. Nāgadantakantarehi pavesetvā haranto olambakaṃ katvā puna nāgadantakaṃ parikkhipati, etampi pūrimaṃ nāma. Nāgadantake pana pupphavalayaṃ pavesetuṃ vaṭṭati. Mālāguṇehi pupphapaṭaṃ karonti, tatrāpi ekameva mālāguṇaṃ harituṃ vaṭṭati. Puna paccāharato pūrimameva hoti. Taṃ sabbaṃ purimanayeneva na vaṭṭati. Mālāguṇehi pana bahūhipi kataṃ pupphadāmaṃ labhitvā āsanamatthakādīsu bandhituṃ vaṭṭati. Atidīghaṃ pana mālāguṇaṃ ekavāraṃ haritvā parikkhipitvā puna itarassa bhikkhuno dātuṃ vaṭṭati, tenapi tatheva kātuṃ vaṭṭati.
вааяимам̣ наама бубпаж̇аалабубпабадабубпаруубзсу д̣̇адтаб̣б̣ам̣. жзд̇ияз бубпаж̇аалам̣ гаронд̇асса згамзгамхи ж̇аалачид̣̇д̣̇агз д̣̇уггадам̣. бхид̇д̇ичад̇д̇аб̣од̇хид̇т̇амбхаад̣̇ийсуби зсзва наяо. бубпабадам̣ бана барзхи буурид̇амби вааяид̇ум̣ на лаб̣бхад̇и. г̇обпимабубпзхзва хад̇т̇иассаад̣̇ируубагаани гаронд̇и, д̇ааниби вааяимадтаанз д̇идтанд̇и. буриманаязнзва саб̣б̣ам̣ на ваддад̇и. ан̃н̃зхи гад̇абарижчзд̣̇з бана бубпаани табзнд̇зна хад̇т̇иассаад̣̇ируубагамби гаад̇ум̣ ваддад̇и. махаабажжарияам̣ бана гал̣амб̣агзна ад̣дхажанд̣̇агзна жа сад̣̇д̇хим̣ адта бубпавигад̇ияо вуд̇д̇аа.
Vāyimaṃ nāma pupphajālapupphapaṭapuppharūpesu daṭṭhabbaṃ. Cetiye pupphajālaṃ karontassa ekamekamhi jālachiddake dukkaṭaṃ. Bhittichattabodhitthambhādīsupi eseva nayo. Pupphapaṭaṃ pana parehi pūritampi vāyituṃ na labbhati. Gopphimapuppheheva hatthiassādirūpakāni karonti, tānipi vāyimaṭṭhāne tiṭṭhanti. Purimanayeneva sabbaṃ na vaṭṭati. Aññehi kataparicchede pana pupphāni ṭhapentena hatthiassādirūpakampi kātuṃ vaṭṭati. Mahāpaccariyaṃ pana kaḷambakena aḍḍhacandakena ca saddhiṃ aṭṭha pupphavikatiyo vuttā.
32. д̇ад̇т̇а гал̣амб̣агод̇и ад̣дхажанд̣̇аганд̇арз гхадигад̣̇аамаоламб̣аго вуд̇д̇о. ад̣дхажанд̣̇агод̇и ад̣дхажанд̣̇аагаарзна маалааг̇ун̣абаригкзбо. д̇ад̣̇убхаяамби бууримзязва бавидтам̣. гурунд̣̇ияам̣ бана ‘‘д̣̇вз д̇аяо маалааг̇ун̣з згад̇о гад̇ваа бубпад̣̇аамагаран̣амби вааяимам̣язваа’’д̇и вуд̇д̇ам̣. д̇амби ид̇ха бууримадтаанзязва бавидтам̣. на гзвалан̃жа бубпад̣̇аамамзва, бидтамаяад̣̇аамамби г̇зн̣д̣угабубпад̣̇аамамби гурунд̣̇ияам̣ вуд̇д̇ам̣. карабад̇д̇ад̣̇аамамби сигкаабад̣̇асса саад̇хааран̣ад̇д̇аа бхигкуунамби бхигкунийнамби нзва гаад̇ум̣, на гаараабзд̇ум̣ ваддад̇и, бууж̇аанимид̇д̇ам̣ бана габбияаважанам̣ саб̣б̣ад̇т̇а вад̇д̇ум̣ ваддад̇и. барияааяаобхаасанимид̇д̇агаммаани вадданд̇иязва.
32. Tattha kaḷambakoti aḍḍhacandakantare ghaṭikadāmaolambako vutto. Aḍḍhacandakoti aḍḍhacandākārena mālāguṇaparikkhepo. Tadubhayampi pūrimeyeva paviṭṭhaṃ. Kurundiyaṃ pana ‘‘dve tayo mālāguṇe ekato katvā pupphadāmakaraṇampi vāyimaṃyevā’’ti vuttaṃ. Tampi idha pūrimaṭṭhāneyeva paviṭṭhaṃ. Na kevalañca pupphadāmameva, piṭṭhamayadāmampi geṇḍukapupphadāmampi kurundiyaṃ vuttaṃ. Kharapattadāmampi sikkhāpadassa sādhāraṇattā bhikkhūnampi bhikkhunīnampi neva kātuṃ, na kārāpetuṃ vaṭṭati, pūjānimittaṃ pana kappiyavacanaṃ sabbattha vattuṃ vaṭṭati. Pariyāyaobhāsanimittakammāni vaṭṭantiyeva.
яо харид̇ваа ваа хараабзд̇ваа ваа баггосид̇ваа ваа баггосаабзд̇ваа ваа саяам̣ ваа убаг̇ад̇аанам̣ яам̣ гин̃жи ад̇д̇ано санд̇агам̣ бубпам̣ гуласан̇г̇ахад̇т̇ааяа д̣̇зд̇и, д̇асса д̣̇уггадам̣, барасанд̇агам̣ д̣̇зд̇и, д̣̇уггадамзва. т̇зяяажид̇д̇зна д̣̇зд̇и, бхан̣д̣аг̇гхзна гаарзд̇аб̣б̣о. зса наяо сан̇гхигзби. аяам̣ бана висзсо – сзнаасанад̇т̇ааяа нияамид̇ам̣ иссаравад̇ааяа д̣̇ад̣̇ад̇о т̇уллажжаяанд̇и.
Yo haritvā vā harāpetvā vā pakkositvā vā pakkosāpetvā vā sayaṃ vā upagatānaṃ yaṃ kiñci attano santakaṃ pupphaṃ kulasaṅgahatthāya deti, tassa dukkaṭaṃ, parasantakaṃ deti, dukkaṭameva. Theyyacittena deti, bhaṇḍagghena kāretabbo. Esa nayo saṅghikepi. Ayaṃ pana viseso – senāsanatthāya niyamitaṃ issaravatāya dadato thullaccayanti.
33. бубпам̣ наама гасса д̣̇аад̇ум̣ ваддад̇и, гасса на ваддад̇ийд̇и? маад̇аабид̇уунам̣ д̇аава харид̇вааби хараабзд̇вааби баггосид̇вааби баггосаабзд̇вааби д̣̇аад̇ум̣ ваддад̇и , сзсан̃аад̇агаанам̣ баггосаабзд̇ваава. д̇ан̃жа ко вад̇т̇убууж̇анад̇т̇ааяа, ман̣д̣анад̇т̇ааяа бана сивалин̇г̇аад̣̇ибууж̇анад̇т̇ааяа ваа гассажиби д̣̇аад̇ум̣ на ваддад̇и. маад̇аабид̇уунан̃жа хараабзнд̇зна н̃аад̇исааман̣зрзхзва хараабзд̇аб̣б̣ам̣. ид̇арз бана яад̣̇и саяамзва ижчанд̇и, ваддад̇и. саммад̇зна бубпабхааж̇агзна бубпабхааж̇анагаалз самбад̇д̇аанам̣ сааман̣зраанам̣ убад̣дхабхааг̇ам̣ д̣̇аад̇ум̣ ваддад̇и. гурунд̣̇ияам̣ бана ‘‘самбад̇д̇аг̇ихийнам̣ убад̣дхабхааг̇ам̣’’, махаабажжарияам̣ ‘‘жуул̣агам̣ д̣̇аад̇ум̣ ваддад̇ий’’д̇и вуд̇д̇ам̣. асаммад̇зна абалогзд̇ваа д̣̇аад̇аб̣б̣ам̣. аажарияубаж̇жхааязсу саг̇аараваа сааман̣зраа б̣ахууни бубпаани аахарид̇ваа раасим̣ гад̇ваа табзнд̇и, т̇зраа баад̇ова самбад̇д̇аанам̣ сад̣̇д̇хивихааригаад̣̇ийнам̣ убаасагаад̣̇ийнам̣ ваа ‘‘д̇вам̣ ид̣̇ам̣ г̇ан̣ха, д̇вам̣ ид̣̇ам̣ г̇ан̣хаа’’д̇и д̣̇знд̇и, бубпад̣̇аанам̣ наама на ход̇и. ‘‘жзд̇ияам̣ бууж̇зссаамаа’’д̇и г̇ахзд̇ваа г̇ажчанд̇ааби бууж̇ам̣ гаронд̇ааби д̇ад̇т̇а д̇ад̇т̇а самбад̇д̇аанам̣ жзд̇ияабууж̇анад̇т̇ааяа д̣̇знд̇и, зд̇амби бубпад̣̇аанам̣ наама на ход̇и. убаасагз аггабубпаад̣̇ийхи бууж̇знд̇з д̣̇исваа ‘‘вихаарз ган̣игаарабубпаад̣̇ийни ад̇т̇и, убаасагаа д̇аани г̇ахзд̇ваа бууж̇зт̇аа’’д̇и вад̇д̇умби ваддад̇и. бхигкуу бубпабууж̇ам̣ гад̇ваа д̣̇иваад̇арам̣ г̇аамам̣ бавидтз ‘‘гим̣, бханд̇з, ад̇ид̣̇иваа бавидтад̇т̇аа’’д̇и бужчанд̇и, ‘‘вихаарз бубпаани б̣ахууни, бууж̇ам̣ агаримхаа’’д̇и вад̣̇анд̇и. мануссаа ‘‘б̣ахууни гира вихаарз бубпааний’’д̇и бунад̣̇ивасз бахууд̇ам̣ каад̣̇анийяам̣ бхож̇анийяам̣ г̇ахзд̇ваа вихаарам̣ г̇анд̇ваа бубпабууж̇ан̃жа гаронд̇и д̣̇аанан̃жа д̣̇знд̇и, ваддад̇и.
33. Pupphaṃ nāma kassa dātuṃ vaṭṭati, kassa na vaṭṭatīti? Mātāpitūnaṃ tāva haritvāpi harāpetvāpi pakkositvāpi pakkosāpetvāpi dātuṃ vaṭṭati , sesañātakānaṃ pakkosāpetvāva. Tañca kho vatthupūjanatthāya, maṇḍanatthāya pana sivaliṅgādipūjanatthāya vā kassacipi dātuṃ na vaṭṭati. Mātāpitūnañca harāpentena ñātisāmaṇereheva harāpetabbaṃ. Itare pana yadi sayameva icchanti, vaṭṭati. Sammatena pupphabhājakena pupphabhājanakāle sampattānaṃ sāmaṇerānaṃ upaḍḍhabhāgaṃ dātuṃ vaṭṭati. Kurundiyaṃ pana ‘‘sampattagihīnaṃ upaḍḍhabhāgaṃ’’, mahāpaccariyaṃ ‘‘cūḷakaṃ dātuṃ vaṭṭatī’’ti vuttaṃ. Asammatena apaloketvā dātabbaṃ. Ācariyupajjhāyesu sagāravā sāmaṇerā bahūni pupphāni āharitvā rāsiṃ katvā ṭhapenti, therā pātova sampattānaṃ saddhivihārikādīnaṃ upāsakādīnaṃ vā ‘‘tvaṃ idaṃ gaṇha, tvaṃ idaṃ gaṇhā’’ti denti, pupphadānaṃ nāma na hoti. ‘‘Cetiyaṃ pūjessāmā’’ti gahetvā gacchantāpi pūjaṃ karontāpi tattha tattha sampattānaṃ cetiyapūjanatthāya denti, etampi pupphadānaṃ nāma na hoti. Upāsake akkapupphādīhi pūjente disvā ‘‘vihāre kaṇikārapupphādīni atthi, upāsakā tāni gahetvā pūjethā’’ti vattumpi vaṭṭati. Bhikkhū pupphapūjaṃ katvā divātaraṃ gāmaṃ paviṭṭhe ‘‘kiṃ, bhante, atidivā paviṭṭhatthā’’ti pucchanti, ‘‘vihāre pupphāni bahūni, pūjaṃ akarimhā’’ti vadanti. Manussā ‘‘bahūni kira vihāre pupphānī’’ti punadivase pahūtaṃ khādanīyaṃ bhojanīyaṃ gahetvā vihāraṃ gantvā pupphapūjañca karonti dānañca denti, vaṭṭati.
34. мануссаа ‘‘маяам̣, бханд̇з, асугад̣̇ивасам̣ наама бууж̇зссаамаа’’д̇и бубпаваарам̣ яаажид̇ваа анун̃н̃аад̇ад̣̇ивасз ааг̇ажчанд̇и, сааман̣зрзхи жа баг̇зва бубпаани ожинид̇ваа табид̇аани хонд̇и, д̇з ругкзсу бубпаани абассанд̇аа ‘‘гухим̣, бханд̇з, бубпааний’’д̇и вад̣̇анд̇и, сааман̣зрзхи ожинид̇ваа табид̇аани, д̇умхз бана бууж̇зд̇ваа г̇ажчат̇а, сан̇гхо ан̃н̃ам̣ д̣̇ивасам̣ бууж̇зссад̇ийд̇и. д̇з бууж̇зд̇ваа д̣̇аанам̣ д̣̇ад̇ваа г̇ажчанд̇и, ваддад̇и. махаабажжарияам̣ бана гурунд̣̇ияан̃жа ‘‘т̇зраа сааман̣зрзхи д̣̇аабзд̇ум̣ на лабханд̇и, сажз саяамзва д̇аани бубпаани д̇зсам̣ д̣̇знд̇и, ваддад̇и. т̇зрзхи бана ‘сааман̣зрзхи ожинид̇ваа табид̇ааний’д̇и зд̇д̇агамзва вад̇д̇аб̣б̣а’’нд̇и вуд̇д̇ам̣. сажз бана бубпаваарам̣ яаажид̇ваа аножид̇зсу бубпзсу яааг̇убхад̇д̇аад̣̇ийни аад̣̇ааяа ааг̇анд̇ваа сааман̣зрз ‘‘ожинид̇ваа д̣̇зт̇аа’’д̇и вад̣̇анд̇и, н̃аабхисааман̣зраанам̣язва ожинид̇ваа д̣̇аад̇ум̣ ваддад̇и. ан̃н̃аад̇агз угкибид̇ваа ругкасаакааяа табзнд̇и, на орохид̇ваа балааяид̇аб̣б̣ам̣, ожинид̇ваа д̣̇аад̇ум̣ ваддад̇и . сажз бана гожи д̇хаммагат̇иго ‘‘б̣ахууни убаасагаа вихаарз бубпаани, яааг̇убхад̇д̇аад̣̇ийни аад̣̇ааяа г̇анд̇ваа бубпабууж̇ам̣ гарот̇аа’’д̇и вад̣̇ад̇и, д̇ассзва на габбад̇ийд̇и махаабажжарияан̃жа гурунд̣̇ияан̃жа вуд̇д̇ам̣. махааадтагат̇ааяам̣ бана ‘‘зд̇ам̣ агаббияам̣ на ваддад̇ий’’д̇и ависзсзна вуд̇д̇ам̣.
34. Manussā ‘‘mayaṃ, bhante, asukadivasaṃ nāma pūjessāmā’’ti pupphavāraṃ yācitvā anuññātadivase āgacchanti, sāmaṇerehi ca pageva pupphāni ocinitvā ṭhapitāni honti, te rukkhesu pupphāni apassantā ‘‘kuhiṃ, bhante, pupphānī’’ti vadanti, sāmaṇerehi ocinitvā ṭhapitāni, tumhe pana pūjetvā gacchatha, saṅgho aññaṃ divasaṃ pūjessatīti. Te pūjetvā dānaṃ datvā gacchanti, vaṭṭati. Mahāpaccariyaṃ pana kurundiyañca ‘‘therā sāmaṇerehi dāpetuṃ na labhanti, sace sayameva tāni pupphāni tesaṃ denti, vaṭṭati. Therehi pana ‘sāmaṇerehi ocinitvā ṭhapitānī’ti ettakameva vattabba’’nti vuttaṃ. Sace pana pupphavāraṃ yācitvā anocitesu pupphesu yāgubhattādīni ādāya āgantvā sāmaṇere ‘‘ocinitvā dethā’’ti vadanti, ñābhisāmaṇerānaṃyeva ocinitvā dātuṃ vaṭṭati. Aññātake ukkhipitvā rukkhasākhāya ṭhapenti, na orohitvā palāyitabbaṃ, ocinitvā dātuṃ vaṭṭati . Sace pana koci dhammakathiko ‘‘bahūni upāsakā vihāre pupphāni, yāgubhattādīni ādāya gantvā pupphapūjaṃ karothā’’ti vadati, tasseva na kappatīti mahāpaccariyañca kurundiyañca vuttaṃ. Mahāaṭṭhakathāyaṃ pana ‘‘etaṃ akappiyaṃ na vaṭṭatī’’ti avisesena vuttaṃ.
35. паламби ад̇д̇ано санд̇агам̣ вуд̇д̇анаязнзва маад̇аабид̇уунан̃жа сзсан̃аад̇ийнан̃жа д̣̇аад̇ум̣ ваддад̇и. гуласан̇г̇ахад̇т̇ааяа бана д̣̇знд̇асса вуд̇д̇анаязнзва ад̇д̇ано санд̇агз барасанд̇агз сан̇гхигз сзнаасанад̇т̇ааяа нияамид̇з жа д̣̇уггадаад̣̇ийни взд̣̇ид̇аб̣б̣аани. ад̇д̇ано санд̇агам̣язва г̇илаанамануссаанам̣ ваа самбад̇д̇аиссараанам̣ ваа кийн̣абариб̣б̣аяаанам̣ ваа д̣̇аад̇ум̣ ваддад̇и, палад̣̇аанам̣ на ход̇и. палабхааж̇агзнаби саммад̇зна сан̇гхасса палабхааж̇анагаалз самбад̇д̇амануссаанам̣ убад̣дхабхааг̇ам̣ д̣̇аад̇ум̣ ваддад̇и, асаммад̇зна абалогзд̇ваа д̣̇аад̇аб̣б̣ам̣. сан̇гхаараамзби палабарижчзд̣̇зна ваа ругкабарижчзд̣̇зна ваа гад̇игаа гаад̇аб̣б̣аа ‘‘д̇ад̇о г̇илаанамануссаанам̣ ваа ан̃н̃зсам̣ ваа палам̣ яаажанд̇аанам̣ яат̇аабарижчзд̣̇зна жад̇д̇аари бан̃жа палаани д̣̇аад̇аб̣б̣аани, ругкаа ваа д̣̇ассзд̇аб̣б̣аа ‘ид̇о г̇ахзд̇ум̣ лаб̣бхад̇ий’’’д̇и. ‘‘ид̇ха палаани сунд̣̇араани, ид̇о г̇ан̣хат̇аа’’д̇и звам̣ бана на вад̇д̇аб̣б̣ам̣. ад̇д̇ано санд̇агам̣ сирийсажун̣н̣ам̣ ваа ан̃н̃ам̣ ваа яам̣ гин̃жи гасаавам̣ гуласан̇г̇ахад̇т̇ааяа д̣̇зд̇и, д̣̇уггадам̣. барасанд̇агаад̣̇ийсуби вуд̇д̇анаязнзва винижчаяо взд̣̇ид̇аб̣б̣о. аяам̣ бана висзсо – сан̇гхасса рагкид̇аг̇обид̇ааби ругкачалли г̇арубхан̣д̣амзваад̇и. мад̇д̇игад̣̇анд̇агадтавзл̣убан̣н̣зсуби г̇арубхан̣д̣уубаг̇ам̣ н̃ад̇ваа жун̣н̣з вуд̇д̇анаязнзва винижчаяо взд̣̇ид̇аб̣б̣о.
35. Phalampi attano santakaṃ vuttanayeneva mātāpitūnañca sesañātīnañca dātuṃ vaṭṭati. Kulasaṅgahatthāya pana dentassa vuttanayeneva attano santake parasantake saṅghike senāsanatthāya niyamite ca dukkaṭādīni veditabbāni. Attano santakaṃyeva gilānamanussānaṃ vā sampattaissarānaṃ vā khīṇaparibbayānaṃ vā dātuṃ vaṭṭati, phaladānaṃ na hoti. Phalabhājakenapi sammatena saṅghassa phalabhājanakāle sampattamanussānaṃ upaḍḍhabhāgaṃ dātuṃ vaṭṭati, asammatena apaloketvā dātabbaṃ. Saṅghārāmepi phalaparicchedena vā rukkhaparicchedena vā katikā kātabbā ‘‘tato gilānamanussānaṃ vā aññesaṃ vā phalaṃ yācantānaṃ yathāparicchedena cattāri pañca phalāni dātabbāni, rukkhā vā dassetabbā ‘ito gahetuṃ labbhatī’’’ti. ‘‘Idha phalāni sundarāni, ito gaṇhathā’’ti evaṃ pana na vattabbaṃ. Attano santakaṃ sirīsacuṇṇaṃ vā aññaṃ vā yaṃ kiñci kasāvaṃ kulasaṅgahatthāya deti, dukkaṭaṃ. Parasantakādīsupi vuttanayeneva vinicchayo veditabbo. Ayaṃ pana viseso – saṅghassa rakkhitagopitāpi rukkhachalli garubhaṇḍamevāti. Mattikadantakaṭṭhaveḷupaṇṇesupi garubhaṇḍūpagaṃ ñatvā cuṇṇe vuttanayeneva vinicchayo veditabbo.
36. ж̇ан̇гхабзсанияанд̇и г̇ихийнам̣ д̣̇ууд̇зяяам̣ саасанахаран̣агаммам̣ вужжад̇и, д̇ам̣ на гаад̇аб̣б̣ам̣. г̇ихийнан̃хи саасанам̣ г̇ахзд̇ваа г̇ажчанд̇асса бад̣̇з бад̣̇з д̣̇уггадам̣. д̇ам̣ гаммам̣ ниссааяа лад̣̇д̇хабхож̇анам̣ бхун̃ж̇анд̇ассаби аж̇жхохаарз аж̇жхохаарз д̣̇уггадам̣. батамам̣ саасанам̣ аг̇г̇ахзд̇вааби бажчаа ‘‘аяам̣ д̣̇аани со г̇аамо, ханд̣̇а нам̣ саасанам̣ аарожзмий’’д̇и маг̇г̇аа оггаманд̇ассаби бад̣̇з бад̣̇з д̣̇уггадам̣. саасанам̣ аарожзд̇ваа лад̣̇д̇хабхож̇анам̣ бхун̃ж̇ад̇о буриманаязнзва д̣̇уггадам̣. саасанам̣ аг̇г̇ахзд̇ваа ааг̇ад̇зна бана ‘‘бханд̇з, д̇асмим̣ г̇аамз ид̇т̇аннаамасса гаа бавад̇д̇ий’’д̇и бужчияамаанзна гат̇зд̇ум̣ ваддад̇и, бужчид̇абан̃хз д̣̇осо над̇т̇и. бан̃жаннам̣ бана сахад̇хаммигаанам̣ маад̇аабид̇уунам̣ бан̣д̣убалаасасса ад̇д̇ано взяяааважжагарасса саасанам̣ харид̇ум̣ ваддад̇и, г̇ихийнан̃жа габбияасаасанам̣, д̇асмаа ‘‘мама важанзна бхаг̇авад̇о баад̣̇з ванд̣̇ат̇аа’’д̇и ваа ‘‘жзд̇ияам̣ бадимам̣ б̣од̇хим̣ сан̇гхад̇т̇зрам̣ ванд̣̇ат̇аа’’д̇и ваа ‘‘жзд̇ияз г̇анд̇хабууж̇ам̣ гарот̇аа’’д̇и ваа ‘‘бубпабууж̇ам̣ гарот̇аа’’д̇и ваа ‘‘бхигкуу саннибаад̇зт̇а, д̣̇аанам̣ д̣̇ассаама, д̇хаммам̣ д̣̇зсаабаяиссаамаа’’д̇и ваа ийд̣̇исзсу саасанзсу гуггужжам̣ на гаад̇аб̣б̣ам̣. габбияасаасанаани хи зд̇аани, на г̇ихийнам̣ г̇ихигаммабадисам̣яуд̇д̇аанийд̇и. имзхи бана адтахи гулад̣̇уусагагаммзхи уббаннабажжаяаа бан̃жаннамби сахад̇хаммигаанам̣ на габбанд̇и. абхууд̇аарожанаруубияасам̣вохаарзхи уббаннабажжаяасад̣̇исаава хонд̇и.
36.Jaṅghapesaniyanti gihīnaṃ dūteyyaṃ sāsanaharaṇakammaṃ vuccati, taṃ na kātabbaṃ. Gihīnañhi sāsanaṃ gahetvā gacchantassa pade pade dukkaṭaṃ. Taṃ kammaṃ nissāya laddhabhojanaṃ bhuñjantassapi ajjhohāre ajjhohāre dukkaṭaṃ. Paṭhamaṃ sāsanaṃ aggahetvāpi pacchā ‘‘ayaṃ dāni so gāmo, handa naṃ sāsanaṃ ārocemī’’ti maggā okkamantassapi pade pade dukkaṭaṃ. Sāsanaṃ ārocetvā laddhabhojanaṃ bhuñjato purimanayeneva dukkaṭaṃ. Sāsanaṃ aggahetvā āgatena pana ‘‘bhante, tasmiṃ gāme itthannāmassa kā pavattī’’ti pucchiyamānena kathetuṃ vaṭṭati, pucchitapañhe doso natthi. Pañcannaṃ pana sahadhammikānaṃ mātāpitūnaṃ paṇḍupalāsassa attano veyyāvaccakarassa sāsanaṃ harituṃ vaṭṭati, gihīnañca kappiyasāsanaṃ, tasmā ‘‘mama vacanena bhagavato pāde vandathā’’ti vā ‘‘cetiyaṃ paṭimaṃ bodhiṃ saṅghattheraṃ vandathā’’ti vā ‘‘cetiye gandhapūjaṃ karothā’’ti vā ‘‘pupphapūjaṃ karothā’’ti vā ‘‘bhikkhū sannipātetha, dānaṃ dassāma, dhammaṃ desāpayissāmā’’ti vā īdisesu sāsanesu kukkuccaṃ na kātabbaṃ. Kappiyasāsanāni hi etāni, na gihīnaṃ gihikammapaṭisaṃyuttānīti. Imehi pana aṭṭhahi kuladūsakakammehi uppannapaccayā pañcannampi sahadhammikānaṃ na kappanti. Abhūtārocanarūpiyasaṃvohārehi uppannapaccayasadisāva honti.
баб̣б̣ааж̇анийяагаммагад̇о бана яасмим̣ г̇аамз ваа ниг̇амз ваа гулад̣̇уусагагаммам̣ гад̇ам̣, яасмин̃жа вихаарз васад̇и, нзва д̇асмим̣ г̇аамз ваа ниг̇амз ваа жарид̇ум̣ лабхад̇и, на вихаарз васид̇ум̣. бадиббассад̣̇д̇хагаммзнаби жа д̇зна язсу гулзсу буб̣б̣з гулад̣̇уусагагаммам̣ гад̇ам̣, д̇ад̇о уббаннабажжаяаа на г̇ахзд̇аб̣б̣аа, аасавагкаяабад̇д̇знаби на г̇ахзд̇аб̣б̣аа, агаббияаава хонд̇и. ‘‘гасмаа на г̇ан̣хат̇аа’’д̇и бужчид̇зна ‘‘буб̣б̣з звам̣ гад̇ад̇д̇аа’’д̇и вуд̇д̇з сажз вад̣̇анд̇и ‘‘на маяам̣ д̇зна гааран̣зна д̣̇зма, ид̣̇аани сийлаванд̇ад̇ааяа д̣̇змаа’’д̇и, г̇ахзд̇аб̣б̣аа. багад̇ияаа д̣̇аанадтаанзязва гулад̣̇уусагагаммам̣ гад̇ам̣ ход̇и, д̇ад̇о багад̇ид̣̇аанамзва г̇ахзд̇ум̣ ваддад̇и. яам̣ вад̣дхзд̇ваа д̣̇знд̇и, д̇ам̣ на ваддад̇и. яасмаа жа бужчид̇абан̃хз д̣̇осо над̇т̇и, д̇асмаа ан̃н̃амби бхигкум̣ буб̣б̣ан̣хз ваа сааяанхз ваа анд̇арагхарам̣ бавидтам̣ гожи бужчзяяа ‘‘гасмаа, бханд̇з, жарат̇аа’’д̇и. язнад̇т̇зна жарад̇и, д̇ам̣ аажигкид̇ваа ‘‘лад̣̇д̇хам̣ на лад̣̇д̇ха’’нд̇и вуд̇д̇з сажз на лад̣̇д̇хам̣, ‘‘на лад̣̇д̇ха’’нд̇и вад̇ваа яам̣ со д̣̇зд̇и, д̇ам̣ г̇ахзд̇ум̣ ваддад̇и.
Pabbājanīyakammakato pana yasmiṃ gāme vā nigame vā kuladūsakakammaṃ kataṃ, yasmiñca vihāre vasati, neva tasmiṃ gāme vā nigame vā carituṃ labhati, na vihāre vasituṃ. Paṭippassaddhakammenapi ca tena yesu kulesu pubbe kuladūsakakammaṃ kataṃ, tato uppannapaccayā na gahetabbā, āsavakkhayapattenapi na gahetabbā, akappiyāva honti. ‘‘Kasmā na gaṇhathā’’ti pucchitena ‘‘pubbe evaṃ katattā’’ti vutte sace vadanti ‘‘na mayaṃ tena kāraṇena dema, idāni sīlavantatāya demā’’ti, gahetabbā. Pakatiyā dānaṭṭhāneyeva kuladūsakakammaṃ kataṃ hoti, tato pakatidānameva gahetuṃ vaṭṭati. Yaṃ vaḍḍhetvā denti, taṃ na vaṭṭati. Yasmā ca pucchitapañhe doso natthi, tasmā aññampi bhikkhuṃ pubbaṇhe vā sāyanhe vā antaragharaṃ paviṭṭhaṃ koci puccheyya ‘‘kasmā, bhante, carathā’’ti. Yenatthena carati, taṃ ācikkhitvā ‘‘laddhaṃ na laddha’’nti vutte sace na laddhaṃ, ‘‘na laddha’’nti vatvā yaṃ so deti, taṃ gahetuṃ vaṭṭati.
37. ‘‘на жа, бхигкавз, бан̣ид̇хааяа аран̃н̃з вад̇т̇аб̣б̣ам̣, яо васзяяа, аабад̇д̇и д̣̇уггадасса. на жа, бхигкавз, бан̣ид̇хааяа бин̣д̣ааяа жарид̇аб̣б̣ам̣…бз… на жа, бхигкавз, бан̣ид̇хааяа жан̇гамид̇аб̣б̣ам̣…бз… на жа, бхигкавз, бан̣ид̇хааяа таад̇аб̣б̣ам̣…бз… на жа, бхигкавз, бан̣ид̇хааяа нисийд̣̇ид̇аб̣б̣ам̣…бз… на жа, бхигкавз, бан̣ид̇хааяа сзяяаа габбзд̇аб̣б̣аа, яо габбзяяа, аабад̇д̇и д̣̇уггадассаа’’д̇и (баараа. 223 аад̣̇аяо) вуд̇д̇ад̇д̇аа ‘‘звам̣ (баараа. адта. 2.223) аран̃н̃з васанд̇ам̣ мам̣ ж̇ано арахад̇д̇з ваа сзгкабхуумияам̣ ваа самбхаавзссад̇и, д̇ад̇о логасса саггад̇о бхависсаами г̇аругад̇о маанид̇о бууж̇ид̇о’’д̇и звам̣ бад̇т̇анам̣ гад̇ваа аран̃н̃з на васид̇аб̣б̣ам̣. звам̣ бан̣ид̇хааяа ‘‘аран̃н̃з васиссаамий’’д̇и г̇ажчанд̇асса бад̣̇аваарз бад̣̇аваарз д̣̇уггадам̣, д̇ат̇аа аран̃н̃з гудигаран̣ажан̇гамананисийд̣̇ананиваасанабаарубанаад̣̇ийсу саб̣б̣агижжзсу баяог̇з баяог̇з д̣̇уггадам̣, д̇асмаа звам̣ аран̃н̃з на васид̇аб̣б̣ам̣. звам̣ васанд̇о хи самбхааванам̣ лабхад̇у ваа маа ваа, д̣̇уггадам̣ аабаж̇ж̇ад̇и. яо бана самаад̣̇иннад̇худ̇ан̇г̇о ‘‘д̇худ̇ан̇г̇ам̣ рагкиссаамий’’д̇и ваа ‘‘г̇ааманд̇з мз васад̇о жид̇д̇ам̣ вигкибад̇и, аран̃н̃ам̣ саббааяа’’нд̇и жинд̇зд̇ваа ваа ‘‘ад̣̇д̇хаа аран̃н̃з д̇ин̣н̣ам̣ вивзгаанам̣ ан̃н̃ад̇арам̣ баабун̣иссаамий’’д̇и ваа ‘‘аран̃н̃ам̣ бависид̇ваа арахад̇д̇ам̣ абаабун̣ид̇ваа на нигкамиссаамий’’д̇и ваа ‘‘аран̃н̃аваасо наама бхаг̇авад̇аа басад̇т̇о, маяи жа аран̃н̃з васанд̇з б̣ахуу саб̣рахмажаарий г̇ааманд̇ам̣ хид̇ваа ааран̃н̃агаа бхависсанд̇ий’’д̇и ваа звам̣ анаваж̇ж̇аваасам̣ васид̇угаамо ход̇и, д̇знзва васид̇аб̣б̣ам̣. бин̣д̣ааяа жаранд̇ассаби ‘‘абхигганд̇аад̣̇ийни сан̣табзд̇ваа бин̣д̣ааяа жариссаамий’’д̇и ниваасанабаарубанагижжад̇о бабхуд̇и яаава бхож̇анабарияосаанам̣, д̇аава баяог̇з баяог̇з д̣̇уггадам̣, самбхааванам̣ лабхад̇у ваа маа ваа, д̣̇уггадамзва. канд̇хагавад̇д̇асзкияавад̇д̇абарибууран̣ад̇т̇ам̣ бана саб̣рахмажаарийнам̣ д̣̇идтаануг̇ад̇иаабаж̇ж̇анад̇т̇ам̣ ваа баасаад̣̇игзхи абхиггамабадиггамаад̣̇ийхи бин̣д̣ааяа бависанд̇о анубаваж̇ж̇о вин̃н̃уунам̣. жан̇гаманаад̣̇ийсуби зсзва наяо.
37. ‘‘Na ca, bhikkhave, paṇidhāya araññe vatthabbaṃ, yo vaseyya, āpatti dukkaṭassa. Na ca, bhikkhave, paṇidhāya piṇḍāya caritabbaṃ…pe… na ca, bhikkhave, paṇidhāya caṅkamitabbaṃ…pe… na ca, bhikkhave, paṇidhāya ṭhātabbaṃ…pe… na ca, bhikkhave, paṇidhāya nisīditabbaṃ…pe… na ca, bhikkhave, paṇidhāya seyyā kappetabbā, yo kappeyya, āpatti dukkaṭassā’’ti (pārā. 223 ādayo) vuttattā ‘‘evaṃ (pārā. aṭṭha. 2.223) araññe vasantaṃ maṃ jano arahatte vā sekkhabhūmiyaṃ vā sambhāvessati, tato lokassa sakkato bhavissāmi garukato mānito pūjito’’ti evaṃ patthanaṃ katvā araññe na vasitabbaṃ. Evaṃ paṇidhāya ‘‘araññe vasissāmī’’ti gacchantassa padavāre padavāre dukkaṭaṃ, tathā araññe kuṭikaraṇacaṅkamananisīdananivāsanapārupanādīsu sabbakiccesu payoge payoge dukkaṭaṃ, tasmā evaṃ araññe na vasitabbaṃ. Evaṃ vasanto hi sambhāvanaṃ labhatu vā mā vā, dukkaṭaṃ āpajjati. Yo pana samādinnadhutaṅgo ‘‘dhutaṅgaṃ rakkhissāmī’’ti vā ‘‘gāmante me vasato cittaṃ vikkhipati, araññaṃ sappāya’’nti cintetvā vā ‘‘addhā araññe tiṇṇaṃ vivekānaṃ aññataraṃ pāpuṇissāmī’’ti vā ‘‘araññaṃ pavisitvā arahattaṃ apāpuṇitvā na nikkhamissāmī’’ti vā ‘‘araññavāso nāma bhagavatā pasattho, mayi ca araññe vasante bahū sabrahmacārī gāmantaṃ hitvā āraññakā bhavissantī’’ti vā evaṃ anavajjavāsaṃ vasitukāmo hoti, teneva vasitabbaṃ. Piṇḍāya carantassapi ‘‘abhikkantādīni saṇṭhapetvā piṇḍāya carissāmī’’ti nivāsanapārupanakiccato pabhuti yāva bhojanapariyosānaṃ, tāva payoge payoge dukkaṭaṃ, sambhāvanaṃ labhatu vā mā vā, dukkaṭameva. Khandhakavattasekhiyavattaparipūraṇatthaṃ pana sabrahmacārīnaṃ diṭṭhānugatiāpajjanatthaṃ vā pāsādikehi abhikkamapaṭikkamādīhi piṇḍāya pavisanto anupavajjo viññūnaṃ. Caṅkamanādīsupi eseva nayo.
ид̇и баал̣имуд̇д̇агавинаяавинижчаяасан̇г̇ахз
Iti pāḷimuttakavinayavinicchayasaṅgahe
гуласан̇г̇ахавинижчаяагат̇аа самад̇д̇аа.
Kulasaṅgahavinicchayakathā samattā.
