| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. குலஸுத்தங்
3. Kulasuttaṃ
225. ஸாவத்தி²யங் விஹரதி…பே॰… ‘‘ஸெய்யதா²பி , பி⁴க்க²வே, யானி கானிசி குலானி ப³ஹுத்தி²கானி அப்பபுரிஸானி தானி ஸுப்பத⁴ங்ஸியானி ஹொந்தி சோரேஹி கும்ப⁴த்தே²னகேஹி ; ஏவமேவ கோ², பி⁴க்க²வே, யஸ்ஸ கஸ்ஸசி பி⁴க்கு²னோ மெத்தாசேதோவிமுத்தி அபா⁴விதா அப³ஹுலீகதா ஸோ ஸுப்பத⁴ங்ஸியோ ஹோதி அமனுஸ்ஸேஹி. ஸெய்யதா²பி, பி⁴க்க²வே, யானி கானிசி குலானி அப்பித்தி²கானி ப³ஹுபுரிஸானி தானி து³ப்பத⁴ங்ஸியானி ஹொந்தி சோரேஹி கும்ப⁴த்தே²னகேஹி, ஏவமேவ கோ², பி⁴க்க²வே, யஸ்ஸ கஸ்ஸசி பி⁴க்கு²னோ மெத்தாசேதோவிமுத்தி பா⁴விதா ப³ஹுலீகதா ஸோ து³ப்பத⁴ங்ஸியோ ஹோதி அமனுஸ்ஸேஹி. தஸ்மாதிஹ, பி⁴க்க²வே, ஏவங் ஸிக்கி²தப்³ப³ங் – ‘மெத்தா நோ சேதோவிமுத்தி பா⁴விதா ப⁴விஸ்ஸதி ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. ததியங்.
225. Sāvatthiyaṃ viharati…pe… ‘‘seyyathāpi , bhikkhave, yāni kānici kulāni bahutthikāni appapurisāni tāni suppadhaṃsiyāni honti corehi kumbhatthenakehi ; evameva kho, bhikkhave, yassa kassaci bhikkhuno mettācetovimutti abhāvitā abahulīkatā so suppadhaṃsiyo hoti amanussehi. Seyyathāpi, bhikkhave, yāni kānici kulāni appitthikāni bahupurisāni tāni duppadhaṃsiyāni honti corehi kumbhatthenakehi, evameva kho, bhikkhave, yassa kassaci bhikkhuno mettācetovimutti bhāvitā bahulīkatā so duppadhaṃsiyo hoti amanussehi. Tasmātiha, bhikkhave, evaṃ sikkhitabbaṃ – ‘mettā no cetovimutti bhāvitā bhavissati bahulīkatā yānīkatā vatthukatā anuṭṭhitā paricitā susamāraddhā’ti. Evañhi vo, bhikkhave, sikkhitabba’’nti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. குலஸுத்தவண்ணனா • 3. Kulasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. குலஸுத்தவண்ணனா • 3. Kulasuttavaṇṇanā
