| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৯. কুলসুত্তং
9. Kulasuttaṃ
১৯৯. ‘‘যং, ভিক্খৰে, সীলৰন্তো পব্বজিতা কুলং উপসঙ্কমন্তি, তত্থ মনুস্সা পঞ্চহি ঠানেহি বহুং পুঞ্ঞং পসৰন্তি। কতমেহি পঞ্চহি? যস্মিং, ভিক্খৰে, সমযে সীলৰন্তে পব্বজিতে কুলং উপসঙ্কমন্তে মনুস্সা দিস্ৰা চিত্তানি পসাদেন্তি 1, সগ্গসংৰত্তনিকং, ভিক্খৰে, তং কুলং তস্মিং সমযে পটিপদং পটিপন্নং হোতি।
199. ‘‘Yaṃ, bhikkhave, sīlavanto pabbajitā kulaṃ upasaṅkamanti, tattha manussā pañcahi ṭhānehi bahuṃ puññaṃ pasavanti. Katamehi pañcahi? Yasmiṃ, bhikkhave, samaye sīlavante pabbajite kulaṃ upasaṅkamante manussā disvā cittāni pasādenti 2, saggasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘যস্মিং, ভিক্খৰে, সমযে সীলৰন্তে পব্বজিতে কুলং উপসঙ্কমন্তে মনুস্সা পচ্চুট্ঠেন্তি অভিৰাদেন্তি আসনং দেন্তি, উচ্চাকুলীনসংৰত্তনিকং, ভিক্খৰে, তং কুলং তস্মিং সমযে পটিপদং পটিপন্নং হোতি।
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā paccuṭṭhenti abhivādenti āsanaṃ denti, uccākulīnasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘যস্মিং, ভিক্খৰে, সমযে সীলৰন্তে পব্বজিতে কুলং উপসঙ্কমন্তে মনুস্সা মচ্ছেরমলং পটিৰিনেন্তি 3, মহেসক্খসংৰত্তনিকং, ভিক্খৰে, তং কুলং তস্মিং সমযে পটিপদং পটিপন্নং হোতি।
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā maccheramalaṃ paṭivinenti 4, mahesakkhasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘যস্মিং, ভিক্খৰে, সমযে সীলৰন্তে পব্বজিতে কুলং উপসঙ্কমন্তে মনুস্সা যথাসত্তি যথাবলং সংৰিভজন্তি, মহাভোগসংৰত্তনিকং , ভিক্খৰে, তং কুলং তস্মিং সমযে পটিপদং পটিপন্নং হোতি।
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā yathāsatti yathābalaṃ saṃvibhajanti, mahābhogasaṃvattanikaṃ , bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘যস্মিং, ভিক্খৰে, সমযে সীলৰন্তে পব্বজিতে কুলং উপসঙ্কমন্তে মনুস্সা পরিপুচ্ছন্তি পরিপঞ্হন্তি ধম্মং সুণন্তি, মহাপঞ্ঞাসংৰত্তনিকং, ভিক্খৰে, তং কুলং তস্মিং সমযে পটিপদং পটিপন্নং হোতি। যং , ভিক্খৰে, সীলৰন্তো পব্বজিতা কুলং উপসঙ্কমন্তি, তত্থ মনুস্সা ইমেহি পঞ্চহি ঠানেহি বহুং পুঞ্ঞং পসৰন্তী’’তি। নৰমং।
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā paripucchanti paripañhanti dhammaṃ suṇanti, mahāpaññāsaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti. Yaṃ , bhikkhave, sīlavanto pabbajitā kulaṃ upasaṅkamanti, tattha manussā imehi pañcahi ṭhānehi bahuṃ puññaṃ pasavantī’’ti. Navamaṃ.
Footnotes:
Related texts:
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৮-৯. ৰাচাসুত্তাদিৰণ্ণনা • 8-9. Vācāsuttādivaṇṇanā
