| Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya |
๙. กุลสุตฺตํ
9. Kulasuttaṃ
๑๙๙. ‘‘ยํ, ภิกฺขเว, สีลวโนฺต ปพฺพชิตา กุลํ อุปสงฺกมนฺติ, ตตฺถ มนุสฺสา ปญฺจหิ ฐาเนหิ พหุํ ปุญฺญํ ปสวนฺติฯ กตเมหิ ปญฺจหิ? ยสฺมิํ, ภิกฺขเว, สมเย สีลวเนฺต ปพฺพชิเต กุลํ อุปสงฺกมเนฺต มนุสฺสา ทิสฺวา จิตฺตานิ ปสาเทนฺติ 1, สคฺคสํวตฺตนิกํ, ภิกฺขเว, ตํ กุลํ ตสฺมิํ สมเย ปฎิปทํ ปฎิปนฺนํ โหติฯ
199. ‘‘Yaṃ, bhikkhave, sīlavanto pabbajitā kulaṃ upasaṅkamanti, tattha manussā pañcahi ṭhānehi bahuṃ puññaṃ pasavanti. Katamehi pañcahi? Yasmiṃ, bhikkhave, samaye sīlavante pabbajite kulaṃ upasaṅkamante manussā disvā cittāni pasādenti 2, saggasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘ยสฺมิํ, ภิกฺขเว, สมเย สีลวเนฺต ปพฺพชิเต กุลํ อุปสงฺกมเนฺต มนุสฺสา ปจฺจุเฎฺฐนฺติ อภิวาเทนฺติ อาสนํ เทนฺติ, อุจฺจากุลีนสํวตฺตนิกํ, ภิกฺขเว, ตํ กุลํ ตสฺมิํ สมเย ปฎิปทํ ปฎิปนฺนํ โหติฯ
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā paccuṭṭhenti abhivādenti āsanaṃ denti, uccākulīnasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘ยสฺมิํ, ภิกฺขเว, สมเย สีลวเนฺต ปพฺพชิเต กุลํ อุปสงฺกมเนฺต มนุสฺสา มเจฺฉรมลํ ปฎิวิเนนฺติ 3, มเหสกฺขสํวตฺตนิกํ, ภิกฺขเว, ตํ กุลํ ตสฺมิํ สมเย ปฎิปทํ ปฎิปนฺนํ โหติฯ
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā maccheramalaṃ paṭivinenti 4, mahesakkhasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘ยสฺมิํ, ภิกฺขเว, สมเย สีลวเนฺต ปพฺพชิเต กุลํ อุปสงฺกมเนฺต มนุสฺสา ยถาสตฺติ ยถาพลํ สํวิภชนฺติ, มหาโภคสํวตฺตนิกํ , ภิกฺขเว, ตํ กุลํ ตสฺมิํ สมเย ปฎิปทํ ปฎิปนฺนํ โหติฯ
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā yathāsatti yathābalaṃ saṃvibhajanti, mahābhogasaṃvattanikaṃ , bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘ยสฺมิํ, ภิกฺขเว, สมเย สีลวเนฺต ปพฺพชิเต กุลํ อุปสงฺกมเนฺต มนุสฺสา ปริปุจฺฉนฺติ ปริปญฺหนฺติ ธมฺมํ สุณนฺติ, มหาปญฺญาสํวตฺตนิกํ, ภิกฺขเว, ตํ กุลํ ตสฺมิํ สมเย ปฎิปทํ ปฎิปนฺนํ โหติฯ ยํ , ภิกฺขเว, สีลวโนฺต ปพฺพชิตา กุลํ อุปสงฺกมนฺติ, ตตฺถ มนุสฺสา อิเมหิ ปญฺจหิ ฐาเนหิ พหุํ ปุญฺญํ ปสวนฺตี’’ติฯ นวมํฯ
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā paripucchanti paripañhanti dhammaṃ suṇanti, mahāpaññāsaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti. Yaṃ , bhikkhave, sīlavanto pabbajitā kulaṃ upasaṅkamanti, tattha manussā imehi pañcahi ṭhānehi bahuṃ puññaṃ pasavantī’’ti. Navamaṃ.
Footnotes:
Related texts:
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๘-๙. วาจาสุตฺตาทิวณฺณนา • 8-9. Vācāsuttādivaṇṇanā
