| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៥. កុលសុត្តំ
5. Kulasuttaṃ
២៥៨. ‘‘យានិ កានិចិ, ភិក្ខវេ, កុលានិ ភោគេសុ មហត្តំ បត្តានិ ន ចិរដ្ឋិតិកានិ ភវន្តិ, សព្ពានិ តានិ ចតូហិ ឋានេហិ, ឯតេសំ វា អញ្ញតរេន។ កតមេហិ ចតូហិ? នដ្ឋំ ន គវេសន្តិ, ជិណ្ណំ ន បដិសង្ខរោន្តិ, អបរិមិតបានភោជនា ហោន្តិ, ទុស្សីលំ ឥត្ថិំ វា បុរិសំ វា អាធិបច្ចេ ឋបេន្តិ។ យានិ កានិចិ, ភិក្ខវេ, កុលានិ ភោគេសុ មហត្តំ បត្តានិ ន ចិរដ្ឋិតិកានិ ភវន្តិ, សព្ពានិ តានិ ឥមេហិ ចតូហិ ឋានេហិ , ឯតេសំ វា អញ្ញតរេន។
258. ‘‘Yāni kānici, bhikkhave, kulāni bhogesu mahattaṃ pattāni na ciraṭṭhitikāni bhavanti, sabbāni tāni catūhi ṭhānehi, etesaṃ vā aññatarena. Katamehi catūhi? Naṭṭhaṃ na gavesanti, jiṇṇaṃ na paṭisaṅkharonti, aparimitapānabhojanā honti, dussīlaṃ itthiṃ vā purisaṃ vā ādhipacce ṭhapenti. Yāni kānici, bhikkhave, kulāni bhogesu mahattaṃ pattāni na ciraṭṭhitikāni bhavanti, sabbāni tāni imehi catūhi ṭhānehi , etesaṃ vā aññatarena.
‘‘យានិ កានិចិ, ភិក្ខវេ, កុលានិ ភោគេសុ មហត្តំ បត្តានិ ចិរដ្ឋិតិកានិ ភវន្តិ, សព្ពានិ តានិ ចតូហិ ឋានេហិ, ឯតេសំ វា អញ្ញតរេន។ កតមេហិ ចតូហិ? នដ្ឋំ គវេសន្តិ, ជិណ្ណំ បដិសង្ខរោន្តិ, បរិមិតបានភោជនា ហោន្តិ, សីលវន្តំ ឥត្ថិំ វា បុរិសំ វា អាធិបច្ចេ ឋបេន្តិ។ យានិ កានិចិ, ភិក្ខវេ, កុលានិ ភោគេសុ មហត្តំ បត្តានិ ចិរដ្ឋិតិកានិ ភវន្តិ, សព្ពានិ តានិ ឥមេហិ ចតូហិ ឋានេហិ, ឯតេសំ វា អញ្ញតរេនា’’តិ។ បញ្ចមំ។
‘‘Yāni kānici, bhikkhave, kulāni bhogesu mahattaṃ pattāni ciraṭṭhitikāni bhavanti, sabbāni tāni catūhi ṭhānehi, etesaṃ vā aññatarena. Katamehi catūhi? Naṭṭhaṃ gavesanti, jiṇṇaṃ paṭisaṅkharonti, parimitapānabhojanā honti, sīlavantaṃ itthiṃ vā purisaṃ vā ādhipacce ṭhapenti. Yāni kānici, bhikkhave, kulāni bhogesu mahattaṃ pattāni ciraṭṭhitikāni bhavanti, sabbāni tāni imehi catūhi ṭhānehi, etesaṃ vā aññatarenā’’ti. Pañcamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៥-១០. កុលសុត្តាទិវណ្ណនា • 5-10. Kulasuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៤-១០. មាលុក្យបុត្តសុត្តាទិវណ្ណនា • 4-10. Mālukyaputtasuttādivaṇṇanā
