| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၅. ကုလသုတ္တံ
5. Kulasuttaṃ
၂၅၈. ‘‘ယာနိ ကာနိစိ, ဘိက္ခဝေ, ကုလာနိ ဘောဂေသု မဟတ္တံ ပတ္တာနိ န စိရဋ္ဌိတိကာနိ ဘဝန္တိ, သဗ္ဗာနိ တာနိ စတူဟိ ဌာနေဟိ, ဧတေသံ ဝာ အညတရေန။ ကတမေဟိ စတူဟိ? နဋ္ဌံ န ဂဝေသန္တိ, ဇိဏ္ဏံ န ပဋိသင္ခရောန္တိ, အပရိမိတပာနဘောဇနာ ဟောန္တိ, ဒုသ္သီလံ ဣတ္ထိံ ဝာ ပုရိသံ ဝာ အာဓိပစ္စေ ဌပေန္တိ။ ယာနိ ကာနိစိ, ဘိက္ခဝေ, ကုလာနိ ဘောဂေသု မဟတ္တံ ပတ္တာနိ န စိရဋ္ဌိတိကာနိ ဘဝန္တိ, သဗ္ဗာနိ တာနိ ဣမေဟိ စတူဟိ ဌာနေဟိ , ဧတေသံ ဝာ အညတရေန။
258. ‘‘Yāni kānici, bhikkhave, kulāni bhogesu mahattaṃ pattāni na ciraṭṭhitikāni bhavanti, sabbāni tāni catūhi ṭhānehi, etesaṃ vā aññatarena. Katamehi catūhi? Naṭṭhaṃ na gavesanti, jiṇṇaṃ na paṭisaṅkharonti, aparimitapānabhojanā honti, dussīlaṃ itthiṃ vā purisaṃ vā ādhipacce ṭhapenti. Yāni kānici, bhikkhave, kulāni bhogesu mahattaṃ pattāni na ciraṭṭhitikāni bhavanti, sabbāni tāni imehi catūhi ṭhānehi , etesaṃ vā aññatarena.
‘‘ယာနိ ကာနိစိ, ဘိက္ခဝေ, ကုလာနိ ဘောဂေသု မဟတ္တံ ပတ္တာနိ စိရဋ္ဌိတိကာနိ ဘဝန္တိ, သဗ္ဗာနိ တာနိ စတူဟိ ဌာနေဟိ, ဧတေသံ ဝာ အညတရေန။ ကတမေဟိ စတူဟိ? နဋ္ဌံ ဂဝေသန္တိ, ဇိဏ္ဏံ ပဋိသင္ခရောန္တိ, ပရိမိတပာနဘောဇနာ ဟောန္တိ, သီလဝန္တံ ဣတ္ထိံ ဝာ ပုရိသံ ဝာ အာဓိပစ္စေ ဌပေန္တိ။ ယာနိ ကာနိစိ, ဘိက္ခဝေ, ကုလာနိ ဘောဂေသု မဟတ္တံ ပတ္တာနိ စိရဋ္ဌိတိကာနိ ဘဝန္တိ, သဗ္ဗာနိ တာနိ ဣမေဟိ စတူဟိ ဌာနေဟိ, ဧတေသံ ဝာ အညတရေနာ’’တိ။ ပဉ္စမံ။
‘‘Yāni kānici, bhikkhave, kulāni bhogesu mahattaṃ pattāni ciraṭṭhitikāni bhavanti, sabbāni tāni catūhi ṭhānehi, etesaṃ vā aññatarena. Katamehi catūhi? Naṭṭhaṃ gavesanti, jiṇṇaṃ paṭisaṅkharonti, parimitapānabhojanā honti, sīlavantaṃ itthiṃ vā purisaṃ vā ādhipacce ṭhapenti. Yāni kānici, bhikkhave, kulāni bhogesu mahattaṃ pattāni ciraṭṭhitikāni bhavanti, sabbāni tāni imehi catūhi ṭhānehi, etesaṃ vā aññatarenā’’ti. Pañcamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၅-၁၀. ကုလသုတ္တာဒိဝဏ္ဏနာ • 5-10. Kulasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၄-၁၀. မာလုက္ယပုတ္တသုတ္တာဒိဝဏ္ဏနာ • 4-10. Mālukyaputtasuttādivaṇṇanā
