| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. කුලසුත්‌තං
9. Kulasuttaṃ
199. ‘‘යං, භික්‌ඛවෙ, සීලවන්‌තො පබ්‌බජිතා කුලං උපසඞ්‌කමන්‌ති, තත්‌ථ මනුස්‌සා පඤ්‌චහි ඨානෙහි බහුං පුඤ්‌ඤං පසවන්‌ති. කතමෙහි පඤ්‌චහි? යස්‌මිං, භික්‌ඛවෙ, සමයෙ සීලවන්‌තෙ පබ්‌බජිතෙ කුලං උපසඞ්‌කමන්‌තෙ මනුස්‌සා දිස්‌වා චිත්‌තානි පසාදෙන්‌ති 1, සග්‌ගසංවත්‌තනිකං, භික්‌ඛවෙ, තං කුලං තස්‌මිං සමයෙ පටිපදං පටිපන්‌නං හොති.
199. ‘‘Yaṃ, bhikkhave, sīlavanto pabbajitā kulaṃ upasaṅkamanti, tattha manussā pañcahi ṭhānehi bahuṃ puññaṃ pasavanti. Katamehi pañcahi? Yasmiṃ, bhikkhave, samaye sīlavante pabbajite kulaṃ upasaṅkamante manussā disvā cittāni pasādenti 2, saggasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘යස්‌මිං, භික්‌ඛවෙ, සමයෙ සීලවන්‌තෙ පබ්‌බජිතෙ කුලං උපසඞ්‌කමන්‌තෙ මනුස්‌සා පච්‌චුට්‌ඨෙන්‌ති අභිවාදෙන්‌ති ආසනං දෙන්‌ති, උච්‌චාකුලීනසංවත්‌තනිකං, භික්‌ඛවෙ, තං කුලං තස්‌මිං සමයෙ පටිපදං පටිපන්‌නං හොති.
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā paccuṭṭhenti abhivādenti āsanaṃ denti, uccākulīnasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘යස්‌මිං, භික්‌ඛවෙ, සමයෙ සීලවන්‌තෙ පබ්‌බජිතෙ කුලං උපසඞ්‌කමන්‌තෙ මනුස්‌සා මච්‌ඡෙරමලං පටිවිනෙන්‌ති 3, මහෙසක්‌ඛසංවත්‌තනිකං, භික්‌ඛවෙ, තං කුලං තස්‌මිං සමයෙ පටිපදං පටිපන්‌නං හොති.
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā maccheramalaṃ paṭivinenti 4, mahesakkhasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘යස්‌මිං, භික්‌ඛවෙ, සමයෙ සීලවන්‌තෙ පබ්‌බජිතෙ කුලං උපසඞ්‌කමන්‌තෙ මනුස්‌සා යථාසත්‌ති යථාබලං සංවිභජන්‌ති, මහාභොගසංවත්‌තනිකං , භික්‌ඛවෙ, තං කුලං තස්‌මිං සමයෙ පටිපදං පටිපන්‌නං හොති.
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā yathāsatti yathābalaṃ saṃvibhajanti, mahābhogasaṃvattanikaṃ , bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘යස්‌මිං, භික්‌ඛවෙ, සමයෙ සීලවන්‌තෙ පබ්‌බජිතෙ කුලං උපසඞ්‌කමන්‌තෙ මනුස්‌සා පරිපුච්‌ඡන්‌ති පරිපඤ්‌හන්‌ති ධම්‌මං සුණන්‌ති, මහාපඤ්‌ඤාසංවත්‌තනිකං, භික්‌ඛවෙ, තං කුලං තස්‌මිං සමයෙ පටිපදං පටිපන්‌නං හොති. යං , භික්‌ඛවෙ, සීලවන්‌තො පබ්‌බජිතා කුලං උපසඞ්‌කමන්‌ති, තත්‌ථ මනුස්‌සා ඉමෙහි පඤ්‌චහි ඨානෙහි බහුං පුඤ්‌ඤං පසවන්‌තී’’ති. නවමං.
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā paripucchanti paripañhanti dhammaṃ suṇanti, mahāpaññāsaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti. Yaṃ , bhikkhave, sīlavanto pabbajitā kulaṃ upasaṅkamanti, tattha manussā imehi pañcahi ṭhānehi bahuṃ puññaṃ pasavantī’’ti. Navamaṃ.
Footnotes:
Related texts:
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 8-9. වාචාසුත්‌තාදිවණ්‌ණනා • 8-9. Vācāsuttādivaṇṇanā
