| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. කුලසුත්‌තං
3. Kulasuttaṃ
13. ‘‘සත්‌තහි , භික්‌ඛවෙ, අඞ්‌ගෙහි සමන්‌නාගතං කුලං අනුපගන්‌ත්‌වා වා නාලං උපගන්‌තුං, උපගන්‌ත්‌වා වා නාලං උපනිසීදිතුං. කතමෙහි සත්‌තහි? න මනාපෙන පච්‌චුට්‌ඨෙන්‌ති, න මනාපෙන අභිවාදෙන්‌ති, න මනාපෙන ආසනං දෙන්‌ති, සන්‌තමස්‌ස පරිගුහන්‌ති, බහුකම්‌පි ථොකං දෙන්‌ති, පණීතම්‌පි ලූඛං දෙන්‌ති, අසක්‌කච්‌චං දෙන්‌ති නො සක්‌කච්‌චං. ඉමෙහි ඛො, භික්‌ඛවෙ, සත්‌තහි අඞ්‌ගෙහි සමන්‌නාගතං කුලං අනුපගන්‌ත්‌වා වා නාලං උපගන්‌තුං, උපගන්‌ත්‌වා වා නාලං උපනිසීදිතුං.
13. ‘‘Sattahi , bhikkhave, aṅgehi samannāgataṃ kulaṃ anupagantvā vā nālaṃ upagantuṃ, upagantvā vā nālaṃ upanisīdituṃ. Katamehi sattahi? Na manāpena paccuṭṭhenti, na manāpena abhivādenti, na manāpena āsanaṃ denti, santamassa pariguhanti, bahukampi thokaṃ denti, paṇītampi lūkhaṃ denti, asakkaccaṃ denti no sakkaccaṃ. Imehi kho, bhikkhave, sattahi aṅgehi samannāgataṃ kulaṃ anupagantvā vā nālaṃ upagantuṃ, upagantvā vā nālaṃ upanisīdituṃ.
‘‘සත්‌තහි, භික්‌ඛවෙ, අඞ්‌ගෙහි සමන්‌නාගතං කුලං අනුපගන්‌ත්‌වා වා අලං උපගන්‌තුං, උපගන්‌ත්‌වා වා අලං උපනිසීදිතුං. කතමෙහි සත්‌තහි? මනාපෙන පච්‌චුට්‌ඨෙන්‌ති, මනාපෙන අභිවාදෙන්‌ති, මනාපෙන ආසනං දෙන්‌ති, සන්‌තමස්‌ස න පරිගුහන්‌ති, බහුකම්‌පි බහුකං දෙන්‌ති, පණීතම්‌පි පණීතං දෙන්‌ති, සක්‌කච්‌චං දෙන්‌ති නො අසක්‌කච්‌චං. ඉමෙහි ඛො, භික්‌ඛවෙ, සත්‌තහි අඞ්‌ගෙහි සමන්‌නාගතං කුලං අනුපගන්‌ත්‌වා වා අලං උපගන්‌තුං, උපගන්‌ත්‌වා වා අලං උපනිසීදිතු’’න්‌ති. තතියං.
‘‘Sattahi, bhikkhave, aṅgehi samannāgataṃ kulaṃ anupagantvā vā alaṃ upagantuṃ, upagantvā vā alaṃ upanisīdituṃ. Katamehi sattahi? Manāpena paccuṭṭhenti, manāpena abhivādenti, manāpena āsanaṃ denti, santamassa na pariguhanti, bahukampi bahukaṃ denti, paṇītampi paṇītaṃ denti, sakkaccaṃ denti no asakkaccaṃ. Imehi kho, bhikkhave, sattahi aṅgehi samannāgataṃ kulaṃ anupagantvā vā alaṃ upagantuṃ, upagantvā vā alaṃ upanisīditu’’nti. Tatiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 3. කුලසුත්‌තවණ්‌ණනා • 3. Kulasuttavaṇṇanā
