| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
7. කුලසුත්‌තං
7. Kulasuttaṃ
17. ‘‘නවහි, භික්‌ඛවෙ, අඞ්‌ගෙහි සමන්‌නාගතං කුලං අනුපගන්‌ත්‌වා වා නාලං උපගන්‌තුං, උපගන්‌ත්‌වා වා නාලං නිසීදිතුං. කතමෙහි නවහි? න මනාපෙන පච්‌චුට්‌ඨෙන්‌ති, න මනාපෙන අභිවාදෙන්‌ති, න මනාපෙන ආසනං දෙන්‌ති, සන්‌තමස්‌ස පරිගුහන්‌ති, බහුකම්‌පි ථොකං දෙන්‌ති, පණීතම්‌පි ලූඛං දෙන්‌ති, අසක්‌කච්‌චං දෙන්‌ති නො සක්‌කච්‌චං, න උපනිසීදන්‌ති ධම්‌මස්‌සවනාය, භාසිතමස්‌ස න සුස්‌සූසන්‌ති. ඉමෙහි ඛො, භික්‌ඛවෙ, නවහඞ්‌ගෙහි සමන්‌නාගතං කුලං අනුපගන්‌ත්‌වා වා නාලං උපගන්‌තුං උපගන්‌ත්‌වා වා නාලං නිසීදිතුං.
17. ‘‘Navahi, bhikkhave, aṅgehi samannāgataṃ kulaṃ anupagantvā vā nālaṃ upagantuṃ, upagantvā vā nālaṃ nisīdituṃ. Katamehi navahi? Na manāpena paccuṭṭhenti, na manāpena abhivādenti, na manāpena āsanaṃ denti, santamassa pariguhanti, bahukampi thokaṃ denti, paṇītampi lūkhaṃ denti, asakkaccaṃ denti no sakkaccaṃ, na upanisīdanti dhammassavanāya, bhāsitamassa na sussūsanti. Imehi kho, bhikkhave, navahaṅgehi samannāgataṃ kulaṃ anupagantvā vā nālaṃ upagantuṃ upagantvā vā nālaṃ nisīdituṃ.
‘‘නවහි, භික්‌ඛවෙ, අඞ්‌ගෙහි සමන්‌නාගතං කුලං අනුපගන්‌ත්‌වා වා අලං උපගන්‌තුං, උපගන්‌ත්‌වා වා අලං නිසීදිතුං. කතමෙහි නවහි? මනාපෙන පච්‌චුට්‌ඨෙන්‌ති, මනාපෙන අභිවාදෙන්‌ති, මනාපෙන ආසනං දෙන්‌ති, සන්‌තමස්‌ස න පරිගුහන්‌ති, බහුකම්‌පි බහුකං දෙන්‌ති, පණීතම්‌පි පණීතං දෙන්‌ති, සක්‌කච්‌චං දෙන්‌ති නො අසක්‌කච්‌චං, උපනිසීදන්‌ති ධම්‌මස්‌සවනාය, භාසිතමස්‌ස සුස්‌සූසන්‌ති. ඉමෙහි ඛො, භික්‌ඛවෙ, නවහඞ්‌ගෙහි සමන්‌නාගතං කුලං අනුපගන්‌ත්‌වා වා අලං උපගන්‌තුං, උපගන්‌ත්‌වා වා අලං නිසීදිතු’’න්‌ති. සත්‌තමං.
‘‘Navahi, bhikkhave, aṅgehi samannāgataṃ kulaṃ anupagantvā vā alaṃ upagantuṃ, upagantvā vā alaṃ nisīdituṃ. Katamehi navahi? Manāpena paccuṭṭhenti, manāpena abhivādenti, manāpena āsanaṃ denti, santamassa na pariguhanti, bahukampi bahukaṃ denti, paṇītampi paṇītaṃ denti, sakkaccaṃ denti no asakkaccaṃ, upanisīdanti dhammassavanāya, bhāsitamassa sussūsanti. Imehi kho, bhikkhave, navahaṅgehi samannāgataṃ kulaṃ anupagantvā vā alaṃ upagantuṃ, upagantvā vā alaṃ nisīditu’’nti. Sattamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7-8. කුලසුත්‌තාදිවණ්‌ණනා • 7-8. Kulasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5-9. ගණ්‌ඩසුත්‌තාදිවණ්‌ණනා • 5-9. Gaṇḍasuttādivaṇṇanā
