| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៩. កុលសុត្តវណ្ណនា
9. Kulasuttavaṇṇanā
៣៦១. ឯវំ បវត្តឦហិតិកាតិ ឯវំ ទ្វិធា បវត្តឦហិតិកា។ ទ្វីហិតិកា ទុក្ករជីវិកបយោគា។ សលាកមត្តំ វុត្តំ ឯត្ថាតិ សលាកា វុត្តា, បុរិមបទេ ឧត្តរបទលោបោ។ ឧភតោកោដិកន្តិ យទិ ‘‘កុលានុទយំ ន វណ្ណេមី’’តិ វទតិ, ‘‘ភូតា និក្ករុណា សមណ តុម្ហេ’’តិ វាទំ អារោបេហិ។ អថ សព្ពទាបិ ‘‘កុលានុទយំ វណ្ណេមី’’តិ វទតិ។ ឯវំ សន្តេ ‘‘កស្មា ឯវំ ទុព្ភិក្ខេ កាលេ មហតិយា បរិសាយ បរិវុតោ ជនបទចារិកំ ចរន្តា កុលូបច្ឆេទាយ បដិបជ្ជថា’’តិ ឯវំ ឧភតោកោដិកំ វាទំ អារោបេហីតិ គាមណិំ ឧយ្យោជេសិ។
361.Evaṃ pavattaīhitikāti evaṃ dvidhā pavattaīhitikā. Dvīhitikā dukkarajīvikapayogā. Salākamattaṃ vuttaṃ etthāti salākā vuttā, purimapade uttarapadalopo. Ubhatokoṭikanti yadi ‘‘kulānudayaṃ na vaṇṇemī’’ti vadati, ‘‘bhūtā nikkaruṇā samaṇa tumhe’’ti vādaṃ āropehi. Atha sabbadāpi ‘‘kulānudayaṃ vaṇṇemī’’ti vadati. Evaṃ sante ‘‘kasmā evaṃ dubbhikkhe kāle mahatiyā parisāya parivuto janapadacārikaṃ carantā kulūpacchedāya paṭipajjathā’’ti evaṃ ubhatokoṭikaṃ vādaṃ āropehīti gāmaṇiṃ uyyojesi.
ទ្វេ អន្តេតិ ឧភោ កោដិយោ។ ពហិ នីហរិតុន្តិ ន វណ្ណេមិ វណ្ណេមីតិ ទ្វេ អន្តេ មោចេន្តោ តំ បុច្ឆិតមត្ថំ ពហិ នីហរតិ នាម។ តត្ថ ទោសំ ទត្វា ចោទេន្តោ តំ អបុច្ឆំ ករោន្តោ គិលិត្វា វិយ អន្តោ បវេសេតិ នាម។
Dve anteti ubho koṭiyo. Bahi nīharitunti na vaṇṇemi vaṇṇemīti dve ante mocento taṃ pucchitamatthaṃ bahi nīharati nāma. Tattha dosaṃ datvā codento taṃ apucchaṃ karonto gilitvā viya anto paveseti nāma.
ឥតោ សោ គាមណីតិអាទិ អត្តនោ ភិក្ខូនំ អញ្ញេសញ្ច អត្ថកាមានំ ភិក្ខប្បទានេន អនិដ្ឋប្បត្តិអភាវទស្សនត្ថំ អារទ្ធំ។ ទានេន សម្ភូតានីតិ ទានមយេន បុញ្ញកិរិយវត្ថុនា សម្មទេវ ភូតិំ វឌ្ឍិំ បត្តានិ។ សច្ចេន អរិយវោហារេន សម្មទេវ ភូតានិ ឧប្បន្នានិ សច្ចសម្ភូតានីតិ អាហ ‘‘សច្ចំ នាម សច្ចវាទិតា’’តិ។ សេសសីលន្តិ អដ្ឋវិធអរិយវោហារតោ អញ្ញសីលំ។ និហិតន្តិ តស្មិំ កុលេ បុព្ពបុរិសេហិ និធានភាវេន និហិតំ។ ទុប្បយុត្តាតិ កសិវាណិជ្ជាទិវសេន ទុដ្ឋុ បយុត្តា កម្មន្តា។ វិបជ្ជន្តីតិ នស្សន្តិ។ កុលង្គារោតិ កុលស្ស អង្គារសទិសោ វិនាសកបុគ្គលោ។ អនិច្ចតាតិ មរណំ។ តស្មិំ កុលេ បធានបុរិសានំ ភោគានំ វា សព្ពសោ វិនាសោ។ តេនាហ ‘‘ហុត្វា អភាវោ’’តិអាទិ។
Ito so gāmaṇītiādi attano bhikkhūnaṃ aññesañca atthakāmānaṃ bhikkhappadānena aniṭṭhappattiabhāvadassanatthaṃ āraddhaṃ. Dānena sambhūtānīti dānamayena puññakiriyavatthunā sammadeva bhūtiṃ vaḍḍhiṃ pattāni. Saccena ariyavohārena sammadeva bhūtāni uppannāni saccasambhūtānīti āha ‘‘saccaṃ nāma saccavāditā’’ti. Sesasīlanti aṭṭhavidhaariyavohārato aññasīlaṃ. Nihitanti tasmiṃ kule pubbapurisehi nidhānabhāvena nihitaṃ. Duppayuttāti kasivāṇijjādivasena duṭṭhu payuttā kammantā. Vipajjantīti nassanti. Kulaṅgāroti kulassa aṅgārasadiso vināsakapuggalo. Aniccatāti maraṇaṃ. Tasmiṃ kule padhānapurisānaṃ bhogānaṃ vā sabbaso vināso. Tenāha ‘‘hutvā abhāvo’’tiādi.
កុលសុត្តវណ្ណនា និដ្ឋិតា។
Kulasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៩. កុលសុត្តំ • 9. Kulasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៩. កុលសុត្តវណ្ណនា • 9. Kulasuttavaṇṇanā
