| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
9. කුලසුත්‌තවණ්‌ණනා
9. Kulasuttavaṇṇanā
361. එවං පවත්‌තඊහිතිකාති එවං ද්‌විධා පවත්‌තඊහිතිකා. ද්‌වීහිතිකා දුක්‌කරජීවිකපයොගා. සලාකමත්‌තං වුත්‌තං එත්‌ථාති සලාකා වුත්‌තා, පුරිමපදෙ උත්‌තරපදලොපො. උභතොකොටිකන්‌ති යදි ‘‘කුලානුදයං න වණ්‌ණෙමී’’ති වදති, ‘‘භූතා නික්‌කරුණා සමණ තුම්‌හෙ’’ති වාදං ආරොපෙහි. අථ සබ්‌බදාපි ‘‘කුලානුදයං වණ්‌ණෙමී’’ති වදති. එවං සන්‌තෙ ‘‘කස්‌මා එවං දුබ්‌භික්‌ඛෙ කාලෙ මහතියා පරිසාය පරිවුතො ජනපදචාරිකං චරන්‌තා කුලූපච්‌ඡෙදාය පටිපජ්‌ජථා’’ති එවං උභතොකොටිකං වාදං ආරොපෙහීති ගාමණිං උය්‍යොජෙසි.
361.Evaṃ pavattaīhitikāti evaṃ dvidhā pavattaīhitikā. Dvīhitikā dukkarajīvikapayogā. Salākamattaṃ vuttaṃ etthāti salākā vuttā, purimapade uttarapadalopo. Ubhatokoṭikanti yadi ‘‘kulānudayaṃ na vaṇṇemī’’ti vadati, ‘‘bhūtā nikkaruṇā samaṇa tumhe’’ti vādaṃ āropehi. Atha sabbadāpi ‘‘kulānudayaṃ vaṇṇemī’’ti vadati. Evaṃ sante ‘‘kasmā evaṃ dubbhikkhe kāle mahatiyā parisāya parivuto janapadacārikaṃ carantā kulūpacchedāya paṭipajjathā’’ti evaṃ ubhatokoṭikaṃ vādaṃ āropehīti gāmaṇiṃ uyyojesi.
ද්‌වෙ අන්‌තෙති උභො කොටියො. බහි නීහරිතුන්‌ති න වණ්‌ණෙමි වණ්‌ණෙමීති ද්‌වෙ අන්‌තෙ මොචෙන්‌තො තං පුච්‌ඡිතමත්‌ථං බහි නීහරති නාම. තත්‌ථ දොසං දත්‌වා චොදෙන්‌තො තං අපුච්‌ඡං කරොන්‌තො ගිලිත්‌වා විය අන්‌තො පවෙසෙති නාම.
Dve anteti ubho koṭiyo. Bahi nīharitunti na vaṇṇemi vaṇṇemīti dve ante mocento taṃ pucchitamatthaṃ bahi nīharati nāma. Tattha dosaṃ datvā codento taṃ apucchaṃ karonto gilitvā viya anto paveseti nāma.
ඉතො සො ගාමණීතිආදි අත්‌තනො භික්‌ඛූනං අඤ්‌ඤෙසඤ්‌ච අත්‌ථකාමානං භික්‌ඛප්‌පදානෙන අනිට්‌ඨප්‌පත්‌තිඅභාවදස්‌සනත්‌ථං ආරද්‌ධං. දානෙන සම්‌භූතානීති දානමයෙන පුඤ්‌ඤකිරියවත්‌ථුනා සම්‌මදෙව භූතිං වඩ්‌ඪිං පත්‌තානි. සච්‌චෙන අරියවොහාරෙන සම්‌මදෙව භූතානි උප්‌පන්‌නානි සච්‌චසම්‌භූතානීති ආහ ‘‘සච්‌චං නාම සච්‌චවාදිතා’’ති. සෙසසීලන්‌ති අට්‌ඨවිධඅරියවොහාරතො අඤ්‌ඤසීලං. නිහිතන්‌ති තස්‌මිං කුලෙ පුබ්‌බපුරිසෙහි නිධානභාවෙන නිහිතං. දුප්‌පයුත්‌තාති කසිවාණිජ්‌ජාදිවසෙන දුට්‌ඨු පයුත්‌තා කම්‌මන්‌තා. විපජ්‌ජන්‌තීති නස්‌සන්‌ති. කුලඞ්‌ගාරොති කුලස්‌ස අඞ්‌ගාරසදිසො විනාසකපුග්‌ගලො. අනිච්‌චතාති මරණං. තස්‌මිං කුලෙ පධානපුරිසානං භොගානං වා සබ්‌බසො විනාසො. තෙනාහ ‘‘හුත්‌වා අභාවො’’තිආදි.
Ito so gāmaṇītiādi attano bhikkhūnaṃ aññesañca atthakāmānaṃ bhikkhappadānena aniṭṭhappattiabhāvadassanatthaṃ āraddhaṃ. Dānena sambhūtānīti dānamayena puññakiriyavatthunā sammadeva bhūtiṃ vaḍḍhiṃ pattāni. Saccena ariyavohārena sammadeva bhūtāni uppannāni saccasambhūtānīti āha ‘‘saccaṃ nāma saccavāditā’’ti. Sesasīlanti aṭṭhavidhaariyavohārato aññasīlaṃ. Nihitanti tasmiṃ kule pubbapurisehi nidhānabhāvena nihitaṃ. Duppayuttāti kasivāṇijjādivasena duṭṭhu payuttā kammantā. Vipajjantīti nassanti. Kulaṅgāroti kulassa aṅgārasadiso vināsakapuggalo. Aniccatāti maraṇaṃ. Tasmiṃ kule padhānapurisānaṃ bhogānaṃ vā sabbaso vināso. Tenāha ‘‘hutvā abhāvo’’tiādi.
කුලසුත්‌තවණ්‌ණනා නිට්‌ඨිතා.
Kulasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 9. කුලසුත්‌තං • 9. Kulasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. කුලසුත්‌තවණ්‌ණනා • 9. Kulasuttavaṇṇanā
