| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৯. কুলত্থেরগাথাৰণ্ণনা
9. Kulattheragāthāvaṇṇanā
উদকঞ্হি নযন্তীতি আযস্মতো কুলত্থেরস্স গাথা। কা উপ্পত্তি? অযং কির থেরো পুব্বেপি ৰিৰট্টূপনিস্সযং বহুং কুসলং উপচিনিত্ৰা অধিকারসম্পন্নো ৰিপস্সিং ভগৰন্তং আকাসে গচ্ছন্তং দিস্ৰা পসন্নমানসো নাল়িকেরফলং দাতুকামো অট্ঠাসি। সত্থা তস্স চিত্তং ঞত্ৰা ওতরিত্ৰা পটিগ্গণ্হি। সো অতিৰিয পসন্নচিত্তো হুত্ৰা তেনেৰ সদ্ধাপটিলাভেন সত্থারং উপসঙ্কমিত্ৰা পব্বজ্জং যাচি, সত্থা অঞ্ঞতরং ভিক্খুং আণাপেসি – ‘‘ইমং পুরিসং পব্বাজেহী’’তি। সো পব্বজিত্ৰা লদ্ধূপসম্পদো সমণধম্মং কত্ৰা ততো চুতো ছপি বুদ্ধন্তরানি দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং ব্রাহ্মণকুলে নিব্বত্তি। কুলোতিস্স নামং অহোসি। সো ৰযপ্পত্তো সাসনে লদ্ধপ্পসাদো ভগৰতো সন্তিকে পব্বজিত্ৰা ৰিক্খেপবহুলতায ৰিসেসং নিব্বত্তেতুং নাসক্খি। অথেকদিৰসং গামং পিণ্ডায পৰিসন্তো অন্তরামগ্গে ভূমিং খণিত্ৰা উদকৰাহকং কত্ৰা ইচ্ছিতিচ্ছিতট্ঠানে উদকং নেন্তে পুরিসে দিস্ৰা তং সল্লক্খেত্ৰা গামং পৰিট্ঠো অঞ্ঞতরং উসুকারং উসুদণ্ডকং উসুযন্তে পক্খিপিত্ৰা অক্খিকোটিযা ওলোকেত্ৰা উজুং করোন্তং দিস্ৰা তম্পি সল্লক্খেত্ৰা গচ্ছন্তো পুরতো গন্ত্ৰা অরনেমিনাভিআদিকে রথচক্কাৰযৰে তচ্ছন্তে তচ্ছকে দিস্ৰা তম্পি সল্লক্খেত্ৰা ৰিহারং পৰিসিত্ৰা কতভত্তকিচ্চো পত্তচীৰরং পটিসামেত্ৰা দিৰাৰিহারে নিসিন্নো অত্তনা দিট্ঠনিমিত্তানি উপমাভাৰেন গহেত্ৰা অত্তনো চিত্তদমনে উপনেন্তো ‘‘অচেতনং উদকম্পি মনুস্সা ইচ্ছিকিচ্ছিতট্ঠানং নযন্তি তথা অচেতনং ৰঙ্কম্পি সরদণ্ডং উপাযেন নমেন্তো উজুং করোন্তি , তথা অচেতনং কট্ঠকল়িঙ্গরাদিং তচ্ছকা নেমিআদিৰসেন ৰঙ্কং উজুঞ্চ করোন্তি। অথ কস্মা অহং সকচিত্তং উজুং ন করিস্সামী’’তি চিন্তেত্ৰা ৰিপস্সনং পট্ঠপেত্ৰা ঘটেন্তো ৰাযমন্তো নচিরস্সেৰ অরহত্তং পাপুণি। তেন ৰুত্তং অপদানে (অপ॰ থের ২.৫১.৯১-৯৯) –
Udakañhi nayantīti āyasmato kulattherassa gāthā. Kā uppatti? Ayaṃ kira thero pubbepi vivaṭṭūpanissayaṃ bahuṃ kusalaṃ upacinitvā adhikārasampanno vipassiṃ bhagavantaṃ ākāse gacchantaṃ disvā pasannamānaso nāḷikeraphalaṃ dātukāmo aṭṭhāsi. Satthā tassa cittaṃ ñatvā otaritvā paṭiggaṇhi. So ativiya pasannacitto hutvā teneva saddhāpaṭilābhena satthāraṃ upasaṅkamitvā pabbajjaṃ yāci, satthā aññataraṃ bhikkhuṃ āṇāpesi – ‘‘imaṃ purisaṃ pabbājehī’’ti. So pabbajitvā laddhūpasampado samaṇadhammaṃ katvā tato cuto chapi buddhantarāni devamanussesu saṃsaranto imasmiṃ buddhuppāde sāvatthiyaṃ brāhmaṇakule nibbatti. Kulotissa nāmaṃ ahosi. So vayappatto sāsane laddhappasādo bhagavato santike pabbajitvā vikkhepabahulatāya visesaṃ nibbattetuṃ nāsakkhi. Athekadivasaṃ gāmaṃ piṇḍāya pavisanto antarāmagge bhūmiṃ khaṇitvā udakavāhakaṃ katvā icchiticchitaṭṭhāne udakaṃ nente purise disvā taṃ sallakkhetvā gāmaṃ paviṭṭho aññataraṃ usukāraṃ usudaṇḍakaṃ usuyante pakkhipitvā akkhikoṭiyā oloketvā ujuṃ karontaṃ disvā tampi sallakkhetvā gacchanto purato gantvā araneminābhiādike rathacakkāvayave tacchante tacchake disvā tampi sallakkhetvā vihāraṃ pavisitvā katabhattakicco pattacīvaraṃ paṭisāmetvā divāvihāre nisinno attanā diṭṭhanimittāni upamābhāvena gahetvā attano cittadamane upanento ‘‘acetanaṃ udakampi manussā icchikicchitaṭṭhānaṃ nayanti tathā acetanaṃ vaṅkampi saradaṇḍaṃ upāyena namento ujuṃ karonti , tathā acetanaṃ kaṭṭhakaḷiṅgarādiṃ tacchakā nemiādivasena vaṅkaṃ ujuñca karonti. Atha kasmā ahaṃ sakacittaṃ ujuṃ na karissāmī’’ti cintetvā vipassanaṃ paṭṭhapetvā ghaṭento vāyamanto nacirasseva arahattaṃ pāpuṇi. Tena vuttaṃ apadāne (apa. thera 2.51.91-99) –
‘‘নগরে বন্ধুমতিযা, আরামিকো অহং তদা।
‘‘Nagare bandhumatiyā, ārāmiko ahaṃ tadā;
অদ্দসং ৰিরজং বুদ্ধং, গচ্ছন্তং অনিলঞ্জসে॥
Addasaṃ virajaṃ buddhaṃ, gacchantaṃ anilañjase.
‘‘নাল়িকেরফলং গয্হ, বুদ্ধসেট্ঠস্সদাসহং।
‘‘Nāḷikeraphalaṃ gayha, buddhaseṭṭhassadāsahaṃ;
আকাসে ঠিতকো সন্তো, পটিগ্গণ্হি মহাযসো॥
Ākāse ṭhitako santo, paṭiggaṇhi mahāyaso.
‘‘ৰিত্তিসঞ্জননো ময্হং, দিট্ঠধম্মসুখাৰহো।
‘‘Vittisañjanano mayhaṃ, diṭṭhadhammasukhāvaho;
ফলং বুদ্ধস্স দত্ৰান, ৰিপ্পসন্নেন চেতসা॥
Phalaṃ buddhassa datvāna, vippasannena cetasā.
‘‘অধিগচ্ছিং তদা পীতিং, ৰিপুলঞ্চ সুখুত্তমং।
‘‘Adhigacchiṃ tadā pītiṃ, vipulañca sukhuttamaṃ;
উপ্পজ্জতেৰ রতনং, নিব্বত্তস্স তহিং তহিং॥
Uppajjateva ratanaṃ, nibbattassa tahiṃ tahiṃ.
‘‘একনৰুতিতো কপ্পে, যং ফলং অদদিং তদা।
‘‘Ekanavutito kappe, yaṃ phalaṃ adadiṃ tadā;
দুগ্গতিং নাভিজানামি, ফলদানস্সিদং ফলং॥
Duggatiṃ nābhijānāmi, phaladānassidaṃ phalaṃ.
‘‘দিব্বচক্খু ৰিসুদ্ধং মে, সমাধিকুসলো অহং।
‘‘Dibbacakkhu visuddhaṃ me, samādhikusalo ahaṃ;
অভিঞ্ঞাপারমিপ্পত্তো, ফলদানস্সিদং ফলং॥
Abhiññāpāramippatto, phaladānassidaṃ phalaṃ.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
এৰং যানি নিমিত্তানি অঙ্কুসে কত্ৰা ৰিপস্সনং ৰড্ঢেত্ৰা অরহত্তং পাপুণি, তেহি সদ্ধিং অত্তনো চিত্তদমনং সংসন্দিত্ৰা অঞ্ঞং ব্যাকরোন্তো ‘‘উদকঞ্হি নযন্তি নেত্তিকা’’তি গাথং অভাসি।
Evaṃ yāni nimittāni aṅkuse katvā vipassanaṃ vaḍḍhetvā arahattaṃ pāpuṇi, tehi saddhiṃ attano cittadamanaṃ saṃsanditvā aññaṃ byākaronto ‘‘udakañhi nayanti nettikā’’ti gāthaṃ abhāsi.
১৯. তত্থ উদকং হীতি হি-সদ্দো নিপাতমত্তং। নযন্তীতি পথৰিযা তং তং থলট্ঠানং খণিত্ৰা নিন্নট্ঠানং পূরেত্ৰা মাতিকং ৰা কত্ৰা রুক্খদোণিং ৰা ঠপেত্ৰা অত্তনো ইচ্ছিতিচ্ছিতট্ঠানং নেন্তি। তথা তে নেন্তীতি নেত্তিকা। তেজনন্তি কণ্ডং। ইদং ৰুত্তং হোতি – নেত্তিকা অত্তনো রুচিযা ইচ্ছিতিচ্ছিতট্ঠানং উদকং নযন্তি, উসুকারাপি তাপেত্ৰা তেজনং নমযন্তি উজুং করোন্তি। নমনৰসেন তচ্ছকা নেমিআদীনং অত্থায তচ্ছন্তা দারুং নমযন্তি অত্তনো রুচিযা উজুং ৰা ৰঙ্কং ৰা করোন্তি। এৰং এত্তকং আরম্মণং কত্ৰা সুব্বতা যথাসমাদিন্নেন সীলাদিনা সুন্দরৰতা ধীরা সোতাপত্তিমগ্গাদীনং উপ্পাদেন্তা অত্তানং দমেন্তি, অরহত্তং পন পত্তেসু একন্তদন্তা নাম হোন্তীতি।
19. Tattha udakaṃ hīti hi-saddo nipātamattaṃ. Nayantīti pathaviyā taṃ taṃ thalaṭṭhānaṃ khaṇitvā ninnaṭṭhānaṃ pūretvā mātikaṃ vā katvā rukkhadoṇiṃ vā ṭhapetvā attano icchiticchitaṭṭhānaṃ nenti. Tathā te nentīti nettikā. Tejananti kaṇḍaṃ. Idaṃ vuttaṃ hoti – nettikā attano ruciyā icchiticchitaṭṭhānaṃ udakaṃ nayanti, usukārāpi tāpetvā tejanaṃ namayanti ujuṃ karonti. Namanavasena tacchakā nemiādīnaṃ atthāya tacchantā dāruṃ namayanti attano ruciyā ujuṃ vā vaṅkaṃ vā karonti. Evaṃ ettakaṃ ārammaṇaṃ katvā subbatā yathāsamādinnena sīlādinā sundaravatā dhīrā sotāpattimaggādīnaṃ uppādentā attānaṃ damenti, arahattaṃ pana pattesu ekantadantā nāma hontīti.
কুলত্থেরগাথাৰণ্ণনা নিট্ঠিতা।
Kulattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৯. কুলত্থেরগাথা • 9. Kulattheragāthā
