| Library / Tipiṭaka / তিপিটক • Tipiṭaka / থেরগাথাপাল়ি • Theragāthāpāḷi |
৪. কুল্লত্থেরগাথা
4. Kullattheragāthā
৩৯৩.
393.
‘‘কুল্লো সিৰথিকং গন্ত্ৰা, অদ্দস ইত্থিমুজ্ঝিতং।
‘‘Kullo sivathikaṃ gantvā, addasa itthimujjhitaṃ;
অপৰিদ্ধং সুসানস্মিং, খজ্জন্তিং কিমিহী ফুটং॥
Apaviddhaṃ susānasmiṃ, khajjantiṃ kimihī phuṭaṃ.
৩৯৪.
394.
‘‘আতুরং অসুচিং পূতিং, পস্স কুল্ল সমুস্সযং।
‘‘Āturaṃ asuciṃ pūtiṃ, passa kulla samussayaṃ;
উগ্ঘরন্তং পগ্ঘরন্তং, বালানং অভিনন্দিতং॥
Uggharantaṃ paggharantaṃ, bālānaṃ abhinanditaṃ.
৩৯৫.
395.
‘‘ধম্মাদাসং গহেত্ৰান, ঞাণদস্সনপত্তিযা।
‘‘Dhammādāsaṃ gahetvāna, ñāṇadassanapattiyā;
পচ্চৰেক্খিং ইমং কাযং, তুচ্ছং সন্তরবাহিরং॥
Paccavekkhiṃ imaṃ kāyaṃ, tucchaṃ santarabāhiraṃ.
৩৯৬.
396.
‘‘যথা ইদং তথা এতং, যথা এতং তথা ইদং।
‘‘Yathā idaṃ tathā etaṃ, yathā etaṃ tathā idaṃ;
যথা অধো তথা উদ্ধং, যথা উদ্ধং তথা অধো॥
Yathā adho tathā uddhaṃ, yathā uddhaṃ tathā adho.
৩৯৭.
397.
‘‘যথা দিৰা তথা রত্তিং, যথা রত্তিং তথা দিৰা।
‘‘Yathā divā tathā rattiṃ, yathā rattiṃ tathā divā;
যথা পুরে তথা পচ্ছা, যথা পচ্ছা তথা পুরে॥
Yathā pure tathā pacchā, yathā pacchā tathā pure.
৩৯৮.
398.
‘‘পঞ্চঙ্গিকেন তুরিযেন, ন রতী হোতি তাদিসী।
‘‘Pañcaṅgikena turiyena, na ratī hoti tādisī;
যথা একগ্গচিত্তস্স, সম্মা ধম্মং ৰিপস্সতো’’তি॥
Yathā ekaggacittassa, sammā dhammaṃ vipassato’’ti.
… কুল্লো থেরো…।
… Kullo thero….
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / থেরগাথা-অট্ঠকথা • Theragāthā-aṭṭhakathā / ৪. কুল্লত্থেরগাথাৰণ্ণনা • 4. Kullattheragāthāvaṇṇanā
