| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. কুলূপকসুত্তং
4. Kulūpakasuttaṃ
১৪৭. সাৰত্থিযং ৰিহরতি…পে॰… ‘‘তং কিং মঞ্ঞথ, ভিক্খৰে, কথংরূপো ভিক্খু অরহতি কুলূপকো হোতুং, কথংরূপো ভিক্খু ন অরহতি কুলূপকো হোতু’’ন্তি? ভগৰংমূলকা নো, ভন্তে, ধম্মা…পে॰… ভগৰা এতদৰোচ –
147. Sāvatthiyaṃ viharati…pe… ‘‘taṃ kiṃ maññatha, bhikkhave, kathaṃrūpo bhikkhu arahati kulūpako hotuṃ, kathaṃrūpo bhikkhu na arahati kulūpako hotu’’nti? Bhagavaṃmūlakā no, bhante, dhammā…pe… bhagavā etadavoca –
‘‘যো হি কোচি, ভিক্খৰে, ভিক্খু এৰংচিত্তো কুলানি উপসঙ্কমতি – ‘দেন্তুযেৰ মে, মা নাদংসু; বহুকঞ্ঞেৰ মে দেন্তু, মা থোকং; পণীতঞ্ঞেৰ মে দেন্তু, মা লূখং; সীঘঞ্ঞেৰ মে দেন্তু, মা দন্ধং; সক্কচ্চঞ্ঞেৰ মে দেন্তু, মা অসক্কচ্চ’ন্তি। তস্স চে, ভিক্খৰে, ভিক্খুনো এৰংচিত্তস্স কুলানি উপসঙ্কমতো ন দেন্তি, তেন ভিক্খু সন্দীযতি; সো ততোনিদানং দুক্খং দোমনস্সং পটিসংৰেদযতি। থোকং দেন্তি, নো বহুকং…পে॰… লূখং দেন্তি, নো পণীতং… দন্ধং দেন্তি, নো সীঘং, তেন ভিক্খু সন্দীযতি; সো ততোনিদানং দুক্খং দোমনস্সং পটিসংৰেদযতি। অসক্কচ্চং দেন্তি, নো সক্কচ্চং; তেন ভিক্খু সন্দীযতি; সো ততোনিদানং দুক্খং দোমনস্সং পটিসংৰেদযতি। এৰরূপো খো, ভিক্খৰে, ভিক্খু ন অরহতি কূলূপকো হোতুং।
‘‘Yo hi koci, bhikkhave, bhikkhu evaṃcitto kulāni upasaṅkamati – ‘dentuyeva me, mā nādaṃsu; bahukaññeva me dentu, mā thokaṃ; paṇītaññeva me dentu, mā lūkhaṃ; sīghaññeva me dentu, mā dandhaṃ; sakkaccaññeva me dentu, mā asakkacca’nti. Tassa ce, bhikkhave, bhikkhuno evaṃcittassa kulāni upasaṅkamato na denti, tena bhikkhu sandīyati; so tatonidānaṃ dukkhaṃ domanassaṃ paṭisaṃvedayati. Thokaṃ denti, no bahukaṃ…pe… lūkhaṃ denti, no paṇītaṃ… dandhaṃ denti, no sīghaṃ, tena bhikkhu sandīyati; so tatonidānaṃ dukkhaṃ domanassaṃ paṭisaṃvedayati. Asakkaccaṃ denti, no sakkaccaṃ; tena bhikkhu sandīyati; so tatonidānaṃ dukkhaṃ domanassaṃ paṭisaṃvedayati. Evarūpo kho, bhikkhave, bhikkhu na arahati kūlūpako hotuṃ.
‘‘যো চ খো, ভিক্খৰে, ভিক্খু এৰংচিত্তো কুলানি উপসঙ্কমতি – ‘তং কুতেত্থ লব্ভা পরকুলেসু – দেন্তুযেৰ মে, মা নাদংসু; বহুকঞ্ঞেৰ মে দেন্তু, মা থোকং; পণীতঞ্ঞেৰ মে দেন্তু, মা লূখং; দীঘঞ্ঞেৰ মে দেন্তু, মা দন্ধং; সক্কচ্চঞ্ঞেৰ মে দেন্তু, মা অসক্কচ্চ’ন্তি। তস্স চে, ভিক্খৰে, ভিক্খুনো এৰংচিত্তস্স কুলানি উপসঙ্কমতো ন দেন্তি; তেন ভিক্খু ন সন্দীযতি; সো ন ততোনিদানং দুক্খং দোমনস্সং পটিসংৰেদযতি। থোকং দেন্তি, নো বহুকং; তেন ভিক্খু ন সন্দীযতি; সো ন ততোনিদানং দুক্খং দোমনস্সং পটিসংৰেদযতি। লূখং দেন্তি, নো পণীতং; তেন ভিক্খু ন সন্দীযতি; সো ন ততোনিদানং দুক্খং দোমনস্সং পটিসংৰেদযতি। দন্ধং দেন্তি, নো সীঘং; তেন ভিক্খু ন সন্দীযতি; সো ন ততোনিদানং দুক্খং দোমনস্সং পটিসংৰেদযতি। অসক্কচ্চং দেন্তি, নো সক্কচ্চং; তেন ভিক্খু ন সন্দীযতি; সো ন ততোনিদানং দুক্খং দোমনস্সং পটিসংৰেদযতি। এৰরূপো খো, ভিক্খৰে, ভিক্খু অরহতি কুলূপকো হোতুং।
‘‘Yo ca kho, bhikkhave, bhikkhu evaṃcitto kulāni upasaṅkamati – ‘taṃ kutettha labbhā parakulesu – dentuyeva me, mā nādaṃsu; bahukaññeva me dentu, mā thokaṃ; paṇītaññeva me dentu, mā lūkhaṃ; dīghaññeva me dentu, mā dandhaṃ; sakkaccaññeva me dentu, mā asakkacca’nti. Tassa ce, bhikkhave, bhikkhuno evaṃcittassa kulāni upasaṅkamato na denti; tena bhikkhu na sandīyati; so na tatonidānaṃ dukkhaṃ domanassaṃ paṭisaṃvedayati. Thokaṃ denti, no bahukaṃ; tena bhikkhu na sandīyati; so na tatonidānaṃ dukkhaṃ domanassaṃ paṭisaṃvedayati. Lūkhaṃ denti, no paṇītaṃ; tena bhikkhu na sandīyati; so na tatonidānaṃ dukkhaṃ domanassaṃ paṭisaṃvedayati. Dandhaṃ denti, no sīghaṃ; tena bhikkhu na sandīyati; so na tatonidānaṃ dukkhaṃ domanassaṃ paṭisaṃvedayati. Asakkaccaṃ denti, no sakkaccaṃ; tena bhikkhu na sandīyati; so na tatonidānaṃ dukkhaṃ domanassaṃ paṭisaṃvedayati. Evarūpo kho, bhikkhave, bhikkhu arahati kulūpako hotuṃ.
‘‘কস্সপো, ভিক্খৰে, এৰংচিত্তো কুলানি উপসঙ্কমতি – ‘তং কুতেত্থ লব্ভা পরকুলেসু – দেন্তুযেৰ মে, মা নাদংসু; বহুকঞ্ঞেৰ মে দেন্তু, মা থোকং; পণীতঞ্ঞেৰ মে দেন্তু, মা লূখং; সীঘঞ্ঞেৰ মে দেন্তু, মা দন্ধং; সক্কচ্চঞ্ঞেৰ মে দেন্তু, মা অসক্কচ্চ’ন্তি। তস্স চে, ভিক্খৰে, কস্সপস্স এৰংচিত্তস্স কুলানি উপসঙ্কমতো ন দেন্তি; তেন কস্সপো ন সন্দীযতি; সো ন ততোনিদানং দুক্খং দোমনস্সং পটিসংৰেদযতি। থোকং দেন্তি, নো বহুকং; তেন কস্সপো ন সন্দীযতি; সো ন ততোনিদানং দুক্খং দোমনস্সং পটিসংৰেদযতি। লূখং দেন্তি , নো পণীতং; তেন কস্সপো ন সন্দীযতি; সো ন ততোনিদানং দুক্খং দোমনস্সং পটিসংৰেদযতি। দন্ধং দেন্তি, নো সীঘং; তেন কস্সপো ন সন্দীযতি; সো ন ততোনিদানং দুক্খং দোমনস্সং পটিসংৰেদযতি। অসক্কচ্চং দেন্তি, নো সক্কচ্চং; তেন কস্সপো ন সন্দীযতি ; সো ন ততোনিদানং দুক্খং দোমনস্সং পটিসংৰেদযতি। কস্সপেন ৰা হি ৰো, ভিক্খৰে, ওৰদিস্সামি যো ৰা পনস্স কস্সপসদিসো। ওৰদিতেহি চ পন ৰো তথত্তায পটিপজ্জিতব্ব’’ন্তি। চতুত্থং।
‘‘Kassapo, bhikkhave, evaṃcitto kulāni upasaṅkamati – ‘taṃ kutettha labbhā parakulesu – dentuyeva me, mā nādaṃsu; bahukaññeva me dentu, mā thokaṃ; paṇītaññeva me dentu, mā lūkhaṃ; sīghaññeva me dentu, mā dandhaṃ; sakkaccaññeva me dentu, mā asakkacca’nti. Tassa ce, bhikkhave, kassapassa evaṃcittassa kulāni upasaṅkamato na denti; tena kassapo na sandīyati; so na tatonidānaṃ dukkhaṃ domanassaṃ paṭisaṃvedayati. Thokaṃ denti, no bahukaṃ; tena kassapo na sandīyati; so na tatonidānaṃ dukkhaṃ domanassaṃ paṭisaṃvedayati. Lūkhaṃ denti , no paṇītaṃ; tena kassapo na sandīyati; so na tatonidānaṃ dukkhaṃ domanassaṃ paṭisaṃvedayati. Dandhaṃ denti, no sīghaṃ; tena kassapo na sandīyati; so na tatonidānaṃ dukkhaṃ domanassaṃ paṭisaṃvedayati. Asakkaccaṃ denti, no sakkaccaṃ; tena kassapo na sandīyati ; so na tatonidānaṃ dukkhaṃ domanassaṃ paṭisaṃvedayati. Kassapena vā hi vo, bhikkhave, ovadissāmi yo vā panassa kassapasadiso. Ovaditehi ca pana vo tathattāya paṭipajjitabba’’nti. Catutthaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. কুলূপকসুত্তৰণ্ণনা • 4. Kulūpakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. কুলূপকসুত্তৰণ্ণনা • 4. Kulūpakasuttavaṇṇanā
