| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৭. কুমাপুত্তসহাযত্থেরগাথাৰণ্ণনা
7. Kumāputtasahāyattheragāthāvaṇṇanā
নানাজনপদং যন্তীতি আযস্মতো কুমাপুত্তসহাযত্থেরস্স গাথা। কা উপ্পত্তি? সো কির পুরিমবুদ্ধেসু কতাধিকারো তত্থ তত্থ ৰিৰট্টূপনিস্সযং কুসলং উপচিনন্তো ইতো চতুনৰুতে কপ্পে সিদ্ধত্থস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো অরঞ্ঞং পৰিসিত্ৰা বহুং রুক্খদণ্ডং ছিন্দিত্ৰা কত্তরযট্ঠিং কত্ৰা সঙ্ঘস্স অদাসি। অঞ্ঞঞ্চ যথাৰিভৰং পুঞ্ঞং কত্ৰা দেৰেসু নিব্বত্তিত্ৰা ততো পট্ঠায সুগতীসুযেৰ পরিৰত্তেন্তো ইমস্মিং বুদ্ধুপ্পাদে ৰেল়ুকণ্টকনগরে ইদ্ধে কুলে নিব্বত্তি। সুদন্তোতিস্স নামং অহোসি। ‘‘ৰাসুলো’’তি কেচি ৰদন্তি। সো কুমাপুত্তস্স পিযসহাযো হুত্ৰা ৰিচরন্তো ‘‘কুমাপুত্তো পব্বজিতো’’তি সুত্ৰা ‘‘ন হি নূন সো ওরকো ধম্মৰিনযো, যত্থ কুমাপুত্তো পব্বজিতো’’তি তদনুবন্ধেন সযম্পি পব্বজিতুকামো হুত্ৰা সত্থু সন্তিকং উপসঙ্কমি। তস্স সত্থা ধম্মং দেসেসি। সো ভিয্যোসোমত্তায পব্বজ্জায সঞ্জাতছন্দো পব্বজিত্ৰা কুমাপুত্তেনেৰ সদ্ধিং পরিযন্তপব্বতে ভাৰনানুযুত্তো ৰিহরতি। তেন চ সমযেন সম্বহুলা ভিক্খূ নানাজনপদেসু জনপদচারিকং চরন্তাপি গচ্ছন্তাপি আগচ্ছন্তাপি তং ঠানং উপগচ্ছন্তি। তেন তত্থ কোলাহলং হোতি। তং দিস্ৰা সুদন্তত্থেরো ‘‘ইমে ভিক্খূ নিয্যানিকসাসনে পব্বজিত্ৰা জনপদৰিতক্কং অনুৰত্তেন্তা চিত্তসমাধিং ৰিরাধেন্তী’’তি সংৰেগজাতো তমেৰ সংৰেগং অত্তনো চিত্তদমনস্স অঙ্কুসং করোন্তো ‘‘নানাজনপদং যন্তী’’তি গাথং অভাসি।
Nānājanapadaṃyantīti āyasmato kumāputtasahāyattherassa gāthā. Kā uppatti? So kira purimabuddhesu katādhikāro tattha tattha vivaṭṭūpanissayaṃ kusalaṃ upacinanto ito catunavute kappe siddhatthassa bhagavato kāle kulagehe nibbattitvā viññutaṃ patto araññaṃ pavisitvā bahuṃ rukkhadaṇḍaṃ chinditvā kattarayaṭṭhiṃ katvā saṅghassa adāsi. Aññañca yathāvibhavaṃ puññaṃ katvā devesu nibbattitvā tato paṭṭhāya sugatīsuyeva parivattento imasmiṃ buddhuppāde veḷukaṇṭakanagare iddhe kule nibbatti. Sudantotissa nāmaṃ ahosi. ‘‘Vāsulo’’ti keci vadanti. So kumāputtassa piyasahāyo hutvā vicaranto ‘‘kumāputto pabbajito’’ti sutvā ‘‘na hi nūna so orako dhammavinayo, yattha kumāputto pabbajito’’ti tadanubandhena sayampi pabbajitukāmo hutvā satthu santikaṃ upasaṅkami. Tassa satthā dhammaṃ desesi. So bhiyyosomattāya pabbajjāya sañjātachando pabbajitvā kumāputteneva saddhiṃ pariyantapabbate bhāvanānuyutto viharati. Tena ca samayena sambahulā bhikkhū nānājanapadesu janapadacārikaṃ carantāpi gacchantāpi āgacchantāpi taṃ ṭhānaṃ upagacchanti. Tena tattha kolāhalaṃ hoti. Taṃ disvā sudantatthero ‘‘ime bhikkhū niyyānikasāsane pabbajitvā janapadavitakkaṃ anuvattentā cittasamādhiṃ virādhentī’’ti saṃvegajāto tameva saṃvegaṃ attano cittadamanassa aṅkusaṃ karonto ‘‘nānājanapadaṃ yantī’’ti gāthaṃ abhāsi.
৩৭. তত্থ নানাজনপদন্তি ৰিসুং ৰিসুং নানাৰিধং জনপদং, কাসিকোসলাদিঅনেকরট্ঠন্তি অত্থো। যন্তীতি গচ্ছন্তি। ৰিচরন্তাতি ‘‘অসুকো জনপদো সুভিক্খো সুলভপিণ্ডো, অসুকো খেমো অরোগো’’তিআদিৰিতক্কৰসেন জনপদচারিকং চরন্তা। অসঞ্ঞতাতি তস্সেৰ জনপদৰিতক্কস্স অপ্পহীনতায চিত্তেন অসংযতা। সমাধিঞ্চ ৰিরাধেন্তীতি সব্বস্সপি উত্তরিমনুস্সধম্মস্স মূলভূতং উপচারপ্পনাভেদং সমাধিঞ্চ নাম ৰিরাধেন্তি । চ-সদ্দো সম্ভাৰনে। দেসন্তরচরণেন ঝাযিতুং ওকাসাভাৰেন অনধিগতং সমাধিং নাধিগচ্ছন্তা, অধিগতঞ্চ ৰসীভাৰানাপাদনেন জীরন্তা ৰীরাধেন্তি নাম। কিংসু রট্ঠচরিযা করিস্সতীতি সূতি নিপাতমত্তং। ‘‘এৰংভূতানং রট্ঠচরিযা জনপদচারিকা কিং করিস্সতি, কিং নাম অত্থং সাধেস্সতি, নিরত্থকাৰা’’তি গরহন্তো ৰদতি। তস্মাতি যস্মা ঈদিসী দেসন্তরচরিযা ভিক্খুস্স ন অত্থাৰহা, অপি চ খো অনত্থাৰহা সম্পত্তীনং ৰিরাধনতো, তস্মা। ৰিনেয্য সারম্ভন্তি ৰসনপদেসে অরতিৰসেন উপ্পন্নং সারম্ভং চিত্তসংকিলেসং তদনুরূপেন পটিসঙ্খানেন ৰিনেত্ৰা ৰূপসমেত্ৰা। ঝাযেয্যাতি আরম্মণূপনিজ্ঝানেন লক্খণূপনিজ্ঝানেন চাতি দুৰিধেনপি ঝানেন ঝাযেয্য। অপুরক্খতোতি মিচ্ছাৰিতক্কেহি তণ্হাদীহি ৰা ন পুরক্খতোতি তেসং ৰসং অনুপগচ্ছন্তো কম্মট্ঠানমেৰ মনসি করেয্যাতি অত্থো। এৰং পন ৰত্ৰা থেরো তমেৰ সংৰেগং অঙ্কুসং কত্ৰা ৰিপস্সনং ৰড্ঢেত্ৰা অরহত্তং পাপুণি। তেন ৰুত্তং অপদানে (অপ॰ থের ২.৫৩.৩৬-৪১) –
37. Tattha nānājanapadanti visuṃ visuṃ nānāvidhaṃ janapadaṃ, kāsikosalādianekaraṭṭhanti attho. Yantīti gacchanti. Vicarantāti ‘‘asuko janapado subhikkho sulabhapiṇḍo, asuko khemo arogo’’tiādivitakkavasena janapadacārikaṃ carantā. Asaññatāti tasseva janapadavitakkassa appahīnatāya cittena asaṃyatā. Samādhiñca virādhentīti sabbassapi uttarimanussadhammassa mūlabhūtaṃ upacārappanābhedaṃ samādhiñca nāma virādhenti . Ca-saddo sambhāvane. Desantaracaraṇena jhāyituṃ okāsābhāvena anadhigataṃ samādhiṃ nādhigacchantā, adhigatañca vasībhāvānāpādanena jīrantā vīrādhenti nāma. Kiṃsu raṭṭhacariyā karissatīti sūti nipātamattaṃ. ‘‘Evaṃbhūtānaṃ raṭṭhacariyā janapadacārikā kiṃ karissati, kiṃ nāma atthaṃ sādhessati, niratthakāvā’’ti garahanto vadati. Tasmāti yasmā īdisī desantaracariyā bhikkhussa na atthāvahā, api ca kho anatthāvahā sampattīnaṃ virādhanato, tasmā. Vineyya sārambhanti vasanapadese arativasena uppannaṃ sārambhaṃ cittasaṃkilesaṃ tadanurūpena paṭisaṅkhānena vinetvā vūpasametvā. Jhāyeyyāti ārammaṇūpanijjhānena lakkhaṇūpanijjhānena cāti duvidhenapi jhānena jhāyeyya. Apurakkhatoti micchāvitakkehi taṇhādīhi vā na purakkhatoti tesaṃ vasaṃ anupagacchanto kammaṭṭhānameva manasi kareyyāti attho. Evaṃ pana vatvā thero tameva saṃvegaṃ aṅkusaṃ katvā vipassanaṃ vaḍḍhetvā arahattaṃ pāpuṇi. Tena vuttaṃ apadāne (apa. thera 2.53.36-41) –
‘‘কাননং ৰনমোগ্গয্হ, ৰেল়ুং ছেত্ৰানহং তদা।
‘‘Kānanaṃ vanamoggayha, veḷuṃ chetvānahaṃ tadā;
আলম্বনং করিত্ৰান, সঙ্ঘস্স অদদিং বহুং॥
Ālambanaṃ karitvāna, saṅghassa adadiṃ bahuṃ.
‘‘তেন চিত্তপ্পসাদেন, সুব্বতে অভিৰাদিয।
‘‘Tena cittappasādena, subbate abhivādiya;
আলম্বদণ্ডং দত্ৰান, পক্কামিং উত্তরামুখো॥
Ālambadaṇḍaṃ datvāna, pakkāmiṃ uttarāmukho.
‘‘চতুন্নৰুতিতো কপ্পে, যং দণ্ডমদদিং তদা।
‘‘Catunnavutito kappe, yaṃ daṇḍamadadiṃ tadā;
দুগ্গতিং নাভিজানামি, দণ্ডদানস্সিদং ফলং॥
Duggatiṃ nābhijānāmi, daṇḍadānassidaṃ phalaṃ.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
যং পনত্থং অঙ্কুসং কত্ৰা অযং থেরো অরহত্তং পত্তো, তমেৰত্থং হদযে ঠপেত্ৰা অরহত্তং পত্তোপি ‘‘নানাজনপদং যন্তি’’তি ইদমেৰ গাথং অভাসি। তস্মা তদেৰস্স অঞ্ঞাব্যাকরণং অহোসীতি।
Yaṃ panatthaṃ aṅkusaṃ katvā ayaṃ thero arahattaṃ patto, tamevatthaṃ hadaye ṭhapetvā arahattaṃ pattopi ‘‘nānājanapadaṃ yanti’’ti idameva gāthaṃ abhāsi. Tasmā tadevassa aññābyākaraṇaṃ ahosīti.
কুমাপুত্তসহাযত্থেরগাথাৰণ্ণনা নিট্ঠিতা।
Kumāputtasahāyattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৭. কুমাপুত্তসহাযকত্থেরগাথা • 7. Kumāputtasahāyakattheragāthā
