Library / Tipiṭaka / ติปิฎก • Tipiṭaka / อปทานปาฬิ • Apadānapāḷi

    ๕. กุมารกสฺสปเตฺถรอปทานํ

    5. Kumārakassapattheraapadānaṃ

    ๑๕๐.

    150.

    ‘‘อิโต สตสหสฺสมฺหิ, กเปฺป อุปฺปชฺชิ นายโก;

    ‘‘Ito satasahassamhi, kappe uppajji nāyako;

    สพฺพโลกหิโต วีโร, ปทุมุตฺตรนามโกฯ

    Sabbalokahito vīro, padumuttaranāmako.

    ๑๕๑.

    151.

    ‘‘ตทาหํ พฺราหฺมโณ หุตฺวา, วิสฺสุโต เวทปารคู;

    ‘‘Tadāhaṃ brāhmaṇo hutvā, vissuto vedapāragū;

    ทิวาวิหารํ วิจรํ, อทฺทสํ โลกนายกํฯ

    Divāvihāraṃ vicaraṃ, addasaṃ lokanāyakaṃ.

    ๑๕๒.

    152.

    ‘‘จตุสจฺจํ ปกาเสนฺตํ, โพธยนฺตํ สเทวกํ;

    ‘‘Catusaccaṃ pakāsentaṃ, bodhayantaṃ sadevakaṃ;

    วิจิตฺตกถิกานคฺคํ, วณฺณยนฺตํ มหาชเนฯ

    Vicittakathikānaggaṃ, vaṇṇayantaṃ mahājane.

    ๑๕๓.

    153.

    ‘‘ตทา มุทิตจิโตฺตหํ, นิมเนฺตตฺวา ตถาคตํ;

    ‘‘Tadā muditacittohaṃ, nimantetvā tathāgataṃ;

    นานารเตฺตหิ วเตฺถหิ, อลงฺกริตฺวาน มณฺฑปํฯ

    Nānārattehi vatthehi, alaṅkaritvāna maṇḍapaṃ.

    ๑๕๔.

    154.

    ‘‘นานารตนปโชฺชตํ, สสงฺฆํ โภชยิํ ตหิํ;

    ‘‘Nānāratanapajjotaṃ, sasaṅghaṃ bhojayiṃ tahiṃ;

    โภชยิตฺวาน สตฺตาหํ, นานคฺครสโภชนํฯ

    Bhojayitvāna sattāhaṃ, nānaggarasabhojanaṃ.

    ๑๕๕.

    155.

    ‘‘นานาจิเตฺตหิ 1 ปุเปฺผหิ, ปูชยิตฺวา สสาวกํ 2;

    ‘‘Nānācittehi 3 pupphehi, pūjayitvā sasāvakaṃ 4;

    นิปจฺจ ปาทมูลมฺหิ, ตํ ฐานํ ปตฺถยิํ อหํฯ

    Nipacca pādamūlamhi, taṃ ṭhānaṃ patthayiṃ ahaṃ.

    ๑๕๖.

    156.

    ‘‘ตทา มุนิวโร อาห, กรุเณกรสาสโย 5;

    ‘‘Tadā munivaro āha, karuṇekarasāsayo 6;

    ‘ปสฺสเถตํ ทิชวรํ, ปทุมานนโลจนํฯ

    ‘Passathetaṃ dijavaraṃ, padumānanalocanaṃ.

    ๑๕๗.

    157.

    ‘‘‘ปีติปาโมชฺชพหุลํ, สมุคฺคตตนูรุหํ;

    ‘‘‘Pītipāmojjabahulaṃ, samuggatatanūruhaṃ;

    หาสมฺหิตวิสาลกฺขํ, มม สาสนลาลสํฯ

    Hāsamhitavisālakkhaṃ, mama sāsanalālasaṃ.

    ๑๕๘.

    158.

    ‘‘‘ปติตํ ปาทมูเล เม, เอกาวตฺถสุมานสํ 7;

    ‘‘‘Patitaṃ pādamūle me, ekāvatthasumānasaṃ 8;

    เอส ปเตฺถติ ตํ ฐานํ, วิจิตฺตกถิกตฺตนํ 9ฯ

    Esa pattheti taṃ ṭhānaṃ, vicittakathikattanaṃ 10.

    ๑๕๙.

    159.

    ‘‘‘สตสหสฺสิโต กเปฺป, โอกฺกากกุลสมฺภโว;

    ‘‘‘Satasahassito kappe, okkākakulasambhavo;

    โคตโม นาม โคเตฺตน, สตฺถา โลเก ภวิสฺสติฯ

    Gotamo nāma gottena, satthā loke bhavissati.

    ๑๖๐.

    160.

    ‘‘‘ตสฺส ธเมฺมสุ ทายาโท, โอรโส ธมฺมนิมฺมิโต;

    ‘‘‘Tassa dhammesu dāyādo, oraso dhammanimmito;

    กุมารกสฺสโป นาม, เหสฺสติ สตฺถุ สาวโกฯ

    Kumārakassapo nāma, hessati satthu sāvako.

    ๑๖๑.

    161.

    ‘‘‘วิจิตฺตปุปฺผทุสฺสานํ , รตนานญฺจ วาหสา;

    ‘‘‘Vicittapupphadussānaṃ , ratanānañca vāhasā;

    วิจิตฺตกถิกานํ โส, อคฺคตํ ปาปุณิสฺสติ’ฯ

    Vicittakathikānaṃ so, aggataṃ pāpuṇissati’.

    ๑๖๒.

    162.

    ‘‘เตน กเมฺมน สุกเตน, เจตนาปณิธีหิ จ;

    ‘‘Tena kammena sukatena, cetanāpaṇidhīhi ca;

    ชหิตฺวา มานุสํ เทหํ, ตาวติํสมคจฺฉหํฯ

    Jahitvā mānusaṃ dehaṃ, tāvatiṃsamagacchahaṃ.

    ๑๖๓.

    163.

    ‘‘ปริพฺภมํ ภวาภเว 11, รงฺคมเชฺฌ ยถา นโฎ;

    ‘‘Paribbhamaṃ bhavābhave 12, raṅgamajjhe yathā naṭo;

    สาขมิคตฺรโช หุตฺวา, มิคิยา กุจฺฉิโมกฺกมิํฯ

    Sākhamigatrajo hutvā, migiyā kucchimokkamiṃ.

    ๑๖๔.

    164.

    ‘‘ตทา มยิ กุจฺฉิคเต, วชฺฌวาโร อุปฎฺฐิโต;

    ‘‘Tadā mayi kucchigate, vajjhavāro upaṭṭhito;

    สาเขน จตฺตา เม มาตา, นิโคฺรธํ สรณํ คตาฯ

    Sākhena cattā me mātā, nigrodhaṃ saraṇaṃ gatā.

    ๑๖๕.

    165.

    ‘‘เตน สา มิคราเชน, มรณา ปริโมจิตา;

    ‘‘Tena sā migarājena, maraṇā parimocitā;

    ปริจฺจชิตฺวา สปาณํ 13, มเมวํ โอวที ตทาฯ

    Pariccajitvā sapāṇaṃ 14, mamevaṃ ovadī tadā.

    ๑๖๖.

    166.

    ‘‘‘นิโคฺรธเมว เสเวยฺย, น สาขมุปสํวเส;

    ‘‘‘Nigrodhameva seveyya, na sākhamupasaṃvase;

    นิโคฺรธสฺมิํ มตํ เสโยฺย, ยเญฺจ สาขมฺหิ ชีวิตํ’ฯ

    Nigrodhasmiṃ mataṃ seyyo, yañce sākhamhi jīvitaṃ’.

    ๑๖๗.

    167.

    ‘‘เตนานุสิฎฺฐา มิคยูถเปน, อหญฺจ มาตา จ ตเถตเร จ 15;

    ‘‘Tenānusiṭṭhā migayūthapena, ahañca mātā ca tathetare ca 16;

    อาคมฺม รมฺมํ ตุสิตาธิวาสํ, คตา ปวาสํ สฆรํ ยเถวฯ

    Āgamma rammaṃ tusitādhivāsaṃ, gatā pavāsaṃ sagharaṃ yatheva.

    ๑๖๘.

    168.

    ‘‘ปุโน กสฺสปวีรสฺส, อตฺถเมนฺตมฺหิ สาสเน;

    ‘‘Puno kassapavīrassa, atthamentamhi sāsane;

    อารุยฺห เสลสิขรํ, ยุญฺชิตฺวา ชินสาสนํฯ

    Āruyha selasikharaṃ, yuñjitvā jinasāsanaṃ.

    ๑๖๙.

    169.

    ‘‘อิทานาหํ ราชคเห, ชาโต เสฎฺฐิกุเล อหุํ;

    ‘‘Idānāhaṃ rājagahe, jāto seṭṭhikule ahuṃ;

    อาปนฺนสตฺตา เม มาตา, ปพฺพชิ อนคาริยํฯ

    Āpannasattā me mātā, pabbaji anagāriyaṃ.

    ๑๗๐.

    170.

    ‘‘สคพฺภํ ตํ วิทิตฺวาน, เทวทตฺตมุปานยุํ;

    ‘‘Sagabbhaṃ taṃ viditvāna, devadattamupānayuṃ;

    โส อโวจ ‘วินาเสถ, ปาปิกํ ภิกฺขุนิํ อิมํ’ฯ

    So avoca ‘vināsetha, pāpikaṃ bhikkhuniṃ imaṃ’.

    ๑๗๑.

    171.

    ‘‘อิทานิปิ มุนิเนฺทน, ชิเนน อนุกมฺปิตา;

    ‘‘Idānipi munindena, jinena anukampitā;

    สุขินี อชนี มยฺหํ, มาตา ภิกฺขุนุปสฺสเยฯ

    Sukhinī ajanī mayhaṃ, mātā bhikkhunupassaye.

    ๑๗๒.

    172.

    ‘‘ตํ วิทิตฺวา มหีปาโล, โกสโล มํ อโปสยิ;

    ‘‘Taṃ viditvā mahīpālo, kosalo maṃ aposayi;

    กุมารปริหาเรน, นาเมนาหญฺจ กสฺสโปฯ

    Kumāraparihārena, nāmenāhañca kassapo.

    ๑๗๓.

    173.

    ‘‘มหากสฺสปมาคมฺม, อหํ กุมารกสฺสโป;

    ‘‘Mahākassapamāgamma, ahaṃ kumārakassapo;

    วมฺมิกสทิสํ กายํ, สุตฺวา พุเทฺธน เทสิตํฯ

    Vammikasadisaṃ kāyaṃ, sutvā buddhena desitaṃ.

    ๑๗๔.

    174.

    ‘‘ตโต จิตฺตํ วิมุจฺจิ เม, อนุปาทาย สพฺพโส;

    ‘‘Tato cittaṃ vimucci me, anupādāya sabbaso;

    ปายาสิํ ทมยิตฺวาหํ, เอตทคฺคมปาปุณิํฯ

    Pāyāsiṃ damayitvāhaṃ, etadaggamapāpuṇiṃ.

    ๑๗๕.

    175.

    ‘‘กิเลสา ฌาปิตา มยฺหํ…เป.… วิหรามิ อนาสโวฯ

    ‘‘Kilesā jhāpitā mayhaṃ…pe… viharāmi anāsavo.

    ๑๗๖.

    176.

    ‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

    ‘‘Svāgataṃ vata me āsi…pe… kataṃ buddhassa sāsanaṃ.

    ๑๗๗.

    177.

    ‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ

    ‘‘Paṭisambhidā catasso…pe… kataṃ buddhassa sāsanaṃ’’.

    อิตฺถํ สุทํ อายสฺมา กุมารกสฺสโป เถโร อิมา คาถาโย

    Itthaṃ sudaṃ āyasmā kumārakassapo thero imā gāthāyo

    อภาสิตฺถาติฯ

    Abhāsitthāti.

    กุมารกสฺสปเตฺถรสฺสาปทานํ ปญฺจมํฯ

    Kumārakassapattherassāpadānaṃ pañcamaṃ.

    จตุวีสติมํ ภาณวารํฯ

    Catuvīsatimaṃ bhāṇavāraṃ.




    Next: ๖. พาหิยเตฺถรอปทานํ • 6. Bāhiyattheraapadānaṃ




    Footnotes:
    1. นานาวเณฺณหิ (สี.)
    2. มหาวีรํ (ก.)
    3. nānāvaṇṇehi (sī.)
    4. mahāvīraṃ (ka.)
    5. กรุโณ กรุณาลโย (สฺยา.)
    6. karuṇo karuṇālayo (syā.)
    7. เอกวตฺถํ สุมานสํ (สฺยา. ก.)
    8. ekavatthaṃ sumānasaṃ (syā. ka.)
    9. วิจิตฺตกถิกตฺตทํ (สี. ปี.)
    10. vicittakathikattadaṃ (sī. pī.)
    11. ภวากาเส (สี. ปี.)
    12. bhavākāse (sī. pī.)
    13. สํปาณํ (สี. ปี.)
    14. saṃpāṇaṃ (sī. pī.)
    15. จิตเร จ (สฺยา.), ตโสฺสวาเทน (ปี.), จิตเร จ ตโสฺสวาทํ (ก.)
    16. citare ca (syā.), tassovādena (pī.), citare ca tassovādaṃ (ka.)



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๕. กุมารกสฺสปเตฺถรอปทานวณฺณนา • 5. Kumārakassapattheraapadānavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact