| Library / Tipiṭaka / তিপিটক • Tipiṭaka / খুদ্দকপাঠ-অট্ঠকথা • Khuddakapāṭha-aṭṭhakathā |
৪. কুমারপঞ্হৰণ্ণনা
4. Kumārapañhavaṇṇanā
অট্ঠুপ্পত্তি
Aṭṭhuppatti
ইদানি একং নাম কিন্তি এৰমাদীনং কুমারপঞ্হানং অত্থৰণ্ণনাক্কমো অনুপ্পত্তো। তেসং অট্ঠুপ্পত্তিং ইধ নিক্খেপপ্পযোজনঞ্চ ৰত্ৰা ৰণ্ণনং করিস্সাম –
Idāni ekaṃ nāma kinti evamādīnaṃ kumārapañhānaṃ atthavaṇṇanākkamo anuppatto. Tesaṃ aṭṭhuppattiṃ idha nikkhepappayojanañca vatvā vaṇṇanaṃ karissāma –
অট্ঠুপ্পত্তি তাৰ নেসং সোপাকো নাম ভগৰতো মহাসাৰকো অহোসি। তেনাযস্মতা জাতিযা সত্তৰস্সেনেৰ অঞ্ঞা আরাধিতা, তস্স ভগৰা পঞ্হব্যাকরণেন উপসম্পদং অনুঞ্ঞাতুকামো অত্তনা অধিপ্পেতত্থানং পঞ্হানং ব্যাকরণসমত্থতং পস্সন্তো ‘‘একং নাম কি’’ন্তি এৰমাদিনা পঞ্হে পুচ্ছি। সো ব্যাকাসি। তেন চ ব্যাকরণেন ভগৰতো চিত্তং আরাধেসি। সাৰ তস্সাযস্মতো উপসম্পদা অহোসি।
Aṭṭhuppatti tāva nesaṃ sopāko nāma bhagavato mahāsāvako ahosi. Tenāyasmatā jātiyā sattavasseneva aññā ārādhitā, tassa bhagavā pañhabyākaraṇena upasampadaṃ anuññātukāmo attanā adhippetatthānaṃ pañhānaṃ byākaraṇasamatthataṃ passanto ‘‘ekaṃ nāma ki’’nti evamādinā pañhe pucchi. So byākāsi. Tena ca byākaraṇena bhagavato cittaṃ ārādhesi. Sāva tassāyasmato upasampadā ahosi.
অযং তেসং অট্ঠুপ্পত্তি।
Ayaṃ tesaṃ aṭṭhuppatti.
নিক্খেপপ্পযোজনং
Nikkhepappayojanaṃ
যস্মা পন সরণগমনেহি বুদ্ধধম্মসঙ্ঘানুস্সতিৰসেন চিত্তভাৰনা, সিক্খাপদেহি সীলভাৰনা, দ্ৰত্তিংসাকারেন চ কাযভাৰনা পকাসিতা, তস্মা ইদানি নানপ্পকারতো পঞ্ঞাভাৰনামুখদস্সনত্থং ইমে পঞ্হব্যাকরণা ইধ নিক্খিত্তা। যস্মা ৰা সীলপদট্ঠানো সমাধি, সমাধিপদট্ঠানা চ পঞ্ঞা; যথাহ – ‘‘সীলে পতিট্ঠায নরো সপঞ্ঞো, চিত্তং পঞ্ঞঞ্চ ভাৰয’’ন্তি (সং॰ নি॰ ১.২৩, ১৯২), তস্মা সিক্খাপদেহি সীলং দ্ৰত্তিংসাকারেন তংগোচরং সমাধিঞ্চ দস্সেত্ৰা সমাহিতচিত্তস্স নানাধম্মপরিক্খারায পঞ্ঞায পভেদদস্সনত্থং ইধ নিক্খিত্তাতিপি ৰিঞ্ঞাতব্বা।
Yasmā pana saraṇagamanehi buddhadhammasaṅghānussativasena cittabhāvanā, sikkhāpadehi sīlabhāvanā, dvattiṃsākārena ca kāyabhāvanā pakāsitā, tasmā idāni nānappakārato paññābhāvanāmukhadassanatthaṃ ime pañhabyākaraṇā idha nikkhittā. Yasmā vā sīlapadaṭṭhāno samādhi, samādhipadaṭṭhānā ca paññā; yathāha – ‘‘sīle patiṭṭhāya naro sapañño, cittaṃ paññañca bhāvaya’’nti (saṃ. ni. 1.23, 192), tasmā sikkhāpadehi sīlaṃ dvattiṃsākārena taṃgocaraṃ samādhiñca dassetvā samāhitacittassa nānādhammaparikkhārāya paññāya pabhedadassanatthaṃ idha nikkhittātipi viññātabbā.
ইদং তেসং ইধ নিক্খেপপ্পযোজনং।
Idaṃ tesaṃ idha nikkhepappayojanaṃ.
পঞ্হৰণ্ণনা
Pañhavaṇṇanā
একং নাম কিন্তিপঞ্হৰণ্ণনা
Ekaṃ nāma kintipañhavaṇṇanā
ইদানি তেসং অত্থৰণ্ণনা হোতি – একং নাম কিন্তি ভগৰা যস্মিং একধম্মস্মিং ভিক্খু সম্মা নিব্বিন্দমানো অনুপুব্বেন দুক্খস্সন্তকরো হোতি, যস্মিং চাযমাযস্মা নিব্বিন্দমানো অনুপুব্বেন দুক্খস্সন্তমকাসি, তং ধম্মং সন্ধায পঞ্হং পুচ্ছতি। ‘‘সব্বে সত্তা আহারট্ঠিতিকা’’তি থেরো পুগ্গলাধিট্ঠানায দেসনায ৰিস্সজ্জেতি। ‘‘কতমা চ, ভিক্খৰে, সম্মাসতি? ইধ, ভিক্খৰে, ভিক্খু কাযে কাযানুপস্সী ৰিহরতী’’তি (সং॰ নি॰ ৫.৮) এৰমাদীনি চেত্থ সুত্তানি এৰং ৰিস্সজ্জনযুত্তিসম্ভৰে সাধকানি। এত্থ যেনাহারেন সব্বে সত্তা ‘‘আহারট্ঠিতিকা’’তি ৰুচ্চন্তি, সো আহারো তং ৰা নেসং আহারট্ঠিতিকত্তং ‘‘একং নাম কি’’ন্তি পুট্ঠেন থেরেন নিদ্দিট্ঠন্তি ৰেদিতব্বং। তঞ্হি ভগৰতা ইধ একন্তি অধিপ্পেতং, ন তু সাসনে লোকে ৰা অঞ্ঞং একং নাম নত্থীতি ঞাপেতুং ৰুত্তং। ৰুত্তঞ্হেতং ভগৰতা –
Idāni tesaṃ atthavaṇṇanā hoti – ekaṃ nāma kinti bhagavā yasmiṃ ekadhammasmiṃ bhikkhu sammā nibbindamāno anupubbena dukkhassantakaro hoti, yasmiṃ cāyamāyasmā nibbindamāno anupubbena dukkhassantamakāsi, taṃ dhammaṃ sandhāya pañhaṃ pucchati. ‘‘Sabbe sattā āhāraṭṭhitikā’’ti thero puggalādhiṭṭhānāya desanāya vissajjeti. ‘‘Katamā ca, bhikkhave, sammāsati? Idha, bhikkhave, bhikkhu kāye kāyānupassī viharatī’’ti (saṃ. ni. 5.8) evamādīni cettha suttāni evaṃ vissajjanayuttisambhave sādhakāni. Ettha yenāhārena sabbe sattā ‘‘āhāraṭṭhitikā’’ti vuccanti, so āhāro taṃ vā nesaṃ āhāraṭṭhitikattaṃ ‘‘ekaṃ nāma ki’’nti puṭṭhena therena niddiṭṭhanti veditabbaṃ. Tañhi bhagavatā idha ekanti adhippetaṃ, na tu sāsane loke vā aññaṃ ekaṃ nāma natthīti ñāpetuṃ vuttaṃ. Vuttañhetaṃ bhagavatā –
‘‘একধম্মে, ভিক্খৰে, ভিক্খু সম্মা নিব্বিন্দমানো সম্মা ৰিরজ্জমানো সম্মা ৰিমুচ্চমানো সম্মা পরিযন্তদস্সাৰী সম্মত্তং অভিসমেচ্চ দিট্ঠেৰ ধম্মে দুক্খস্সন্তকরো হোতি। কতমস্মিং একধম্মে? সব্বে সত্তা আহারট্ঠিতিকা। ইমস্মিং খো, ভিক্খৰে, একধম্মে ভিক্খু সম্মা নিব্বিন্দমানো…পে॰… দুক্খস্সন্তকরো হোতি। ‘একো পঞ্হো একো উদ্দেসো একং ৰেয্যাকরণ’ন্তি ইতি যং তং ৰুত্তং, ইদমেতং পটিচ্চ ৰুত্ত’’ন্তি (অ॰ নি॰ ১০.২৭)।
‘‘Ekadhamme, bhikkhave, bhikkhu sammā nibbindamāno sammā virajjamāno sammā vimuccamāno sammā pariyantadassāvī sammattaṃ abhisamecca diṭṭheva dhamme dukkhassantakaro hoti. Katamasmiṃ ekadhamme? Sabbe sattā āhāraṭṭhitikā. Imasmiṃ kho, bhikkhave, ekadhamme bhikkhu sammā nibbindamāno…pe… dukkhassantakaro hoti. ‘Eko pañho eko uddeso ekaṃ veyyākaraṇa’nti iti yaṃ taṃ vuttaṃ, idametaṃ paṭicca vutta’’nti (a. ni. 10.27).
আহারট্ঠিতিকাতি চেত্থ যথা ‘‘অত্থি, ভিক্খৰে, সুভনিমিত্তং। তত্থ অযোনিসো মনসিকারবহুলীকারো, অযমাহারো অনুপ্পন্নস্স ৰা কামচ্ছন্দস্স উপ্পাদাযা’’তি এৰমাদীসু (সং॰ নি॰ ৫.২৩২) পচ্চযো আহারোতি ৰুচ্চতি, এৰং পচ্চযং আহারসদ্দেন গহেত্ৰা পচ্চযট্ঠিতিকা ‘‘আহারট্ঠিতিকা’’তি ৰুত্তা। চত্তারো পন আহারে সন্ধায – ‘‘আহারট্ঠিতিকা’’তি ৰুচ্চমানে ‘‘অসঞ্ঞসত্তা দেৰা অহেতুকা অনাহারা অফস্সকা অৰেদনকা’’তি ৰচনতো (ৰিভ॰ ১০১৭) ‘‘সব্বে’’তি ৰচনমযুত্তং ভৰেয্য।
Āhāraṭṭhitikāti cettha yathā ‘‘atthi, bhikkhave, subhanimittaṃ. Tattha ayoniso manasikārabahulīkāro, ayamāhāro anuppannassa vā kāmacchandassa uppādāyā’’ti evamādīsu (saṃ. ni. 5.232) paccayo āhāroti vuccati, evaṃ paccayaṃ āhārasaddena gahetvā paccayaṭṭhitikā ‘‘āhāraṭṭhitikā’’ti vuttā. Cattāro pana āhāre sandhāya – ‘‘āhāraṭṭhitikā’’ti vuccamāne ‘‘asaññasattā devā ahetukā anāhārā aphassakā avedanakā’’ti vacanato (vibha. 1017) ‘‘sabbe’’ti vacanamayuttaṃ bhaveyya.
তত্থ সিযা – এৰম্পি ৰুচ্চমানে ‘‘কতমে ধম্মা সপচ্চযা? পঞ্চক্খন্ধা – রূপক্খন্ধো…পে॰… ৰিঞ্ঞাণক্খন্ধো’’তি (ধ॰ স॰ ১০৮৯) ৰচনতো খন্ধানংযেৰ পচ্চযট্ঠিতিকত্তং যুত্তং, সত্তানন্তু অযুত্তমেৰেতং ৰচনং ভৰেয্যাতি। ন খো পনেতং এৰং দট্ঠব্বং। কস্মা ? সত্তেসু খন্ধোপচারসিদ্ধিতো। সত্তেসু হি খন্ধোপচারো সিদ্ধো। কস্মা? খন্ধে উপাদায পঞ্ঞাপেতব্বতো। কথং? গেহে গামোপচারো ৰিয। সেয্যথাপি হি গেহানি উপাদায পঞ্ঞাপেতব্বত্তা গামস্স একস্মিম্পি দ্ৰীসু তীসুপি ৰা গেহেসু দড্ঢেসু ‘‘গামো দড্ঢো’’তি এৰং গেহে গামোপচারো সিদ্ধো, এৰমেৰ খন্ধেসু পচ্চযট্ঠেন আহারট্ঠিতিকেসু ‘‘সত্তা আহারট্ঠিতিকা’’তি অযং উপচারো সিদ্ধোতি ৰেদিতব্বো। পরমত্থতো চ খন্ধেসু জাযমানেসু জীযমানেসু মীযমানেসু চ ‘‘খণে খণে ত্ৰং ভিক্খু জাযসে চ জীযসে চ মীযসে চা’’তি ৰদতা ভগৰতা তেসু সত্তেসু খন্ধোপচারো সিদ্ধোতি দস্সিতো এৰাতি ৰেদিতব্বো। যতো যেন পচ্চযাখ্যেন আহারেন সব্বে সত্তা তিট্ঠন্তি, সো আহারো তং ৰা নেসং আহারট্ঠিতিকত্তং একন্তি ৰেদিতব্বং। আহারো হি আহারট্ঠিতিকত্তং ৰা অনিচ্চতাকারণতো নিব্বিদাট্ঠানং হোতি। অথ তেসু সব্বসত্তসঞ্ঞিতেসু সঙ্খারেসু অনিচ্চতাদস্সনেন নিব্বিন্দমানো অনুপুব্বেন দুক্খস্সন্তকরো হোতি, পরমত্থৰিসুদ্ধিং পাপুণাতি। যথাহ –
Tattha siyā – evampi vuccamāne ‘‘katame dhammā sapaccayā? Pañcakkhandhā – rūpakkhandho…pe… viññāṇakkhandho’’ti (dha. sa. 1089) vacanato khandhānaṃyeva paccayaṭṭhitikattaṃ yuttaṃ, sattānantu ayuttamevetaṃ vacanaṃ bhaveyyāti. Na kho panetaṃ evaṃ daṭṭhabbaṃ. Kasmā ? Sattesu khandhopacārasiddhito. Sattesu hi khandhopacāro siddho. Kasmā? Khandhe upādāya paññāpetabbato. Kathaṃ? Gehe gāmopacāro viya. Seyyathāpi hi gehāni upādāya paññāpetabbattā gāmassa ekasmimpi dvīsu tīsupi vā gehesu daḍḍhesu ‘‘gāmo daḍḍho’’ti evaṃ gehe gāmopacāro siddho, evameva khandhesu paccayaṭṭhena āhāraṭṭhitikesu ‘‘sattā āhāraṭṭhitikā’’ti ayaṃ upacāro siddhoti veditabbo. Paramatthato ca khandhesu jāyamānesu jīyamānesu mīyamānesu ca ‘‘khaṇe khaṇe tvaṃ bhikkhu jāyase ca jīyase ca mīyase cā’’ti vadatā bhagavatā tesu sattesu khandhopacāro siddhoti dassito evāti veditabbo. Yato yena paccayākhyena āhārena sabbe sattā tiṭṭhanti, so āhāro taṃ vā nesaṃ āhāraṭṭhitikattaṃ ekanti veditabbaṃ. Āhāro hi āhāraṭṭhitikattaṃ vā aniccatākāraṇato nibbidāṭṭhānaṃ hoti. Atha tesu sabbasattasaññitesu saṅkhāresu aniccatādassanena nibbindamāno anupubbena dukkhassantakaro hoti, paramatthavisuddhiṃ pāpuṇāti. Yathāha –
‘‘সব্বে সঙ্খারা অনিচ্চাতি, যদা পঞ্ঞায পস্সতি।
‘‘Sabbe saṅkhārā aniccāti, yadā paññāya passati;
অথ নিব্বিন্দতি দুক্খে, এস মগ্গো ৰিসুদ্ধিযা’’তি॥ (ধ॰ প॰ ২৭৭)।
Atha nibbindati dukkhe, esa maggo visuddhiyā’’ti. (dha. pa. 277);
এত্থ চ ‘‘একং নাম কি’’ন্তি চ ‘‘কিহা’’তি চ দুৰিধো পাঠো, তত্থ সীহল়ানং কিহাতি পাঠো। তে হি ‘‘কি’’ন্তি ৰত্তব্বে ‘‘কিহা’’তি ৰদন্তি। কেচি ভণন্তি ‘‘হ-ইতি নিপাতো, থেরিযানম্পি অযমেৰ পাঠো’’তি উভযথাপি পন একোৰ অত্থো। যথা রুচ্চতি, তথা পঠিতব্বং। যথা পন ‘‘সুখেন ফুট্ঠো অথ ৰা দুখেন (ধ॰ প॰ ৮৩), দুক্খং দোমনস্সং পটিসংৰেদেতী’’তি এৰমাদীসু কত্থচি দুখন্তি চ কত্থচি দুক্খন্তি চ ৰুচ্চতি, এৰং কত্থচি একন্তি, কত্থচি এক্কন্তি ৰুচ্চতি। ইধ পন একং নামাতি অযমেৰ পাঠো।
Ettha ca ‘‘ekaṃ nāma ki’’nti ca ‘‘kihā’’ti ca duvidho pāṭho, tattha sīhaḷānaṃ kihāti pāṭho. Te hi ‘‘ki’’nti vattabbe ‘‘kihā’’ti vadanti. Keci bhaṇanti ‘‘ha-iti nipāto, theriyānampi ayameva pāṭho’’ti ubhayathāpi pana ekova attho. Yathā ruccati, tathā paṭhitabbaṃ. Yathā pana ‘‘sukhena phuṭṭho atha vā dukhena (dha. pa. 83), dukkhaṃ domanassaṃ paṭisaṃvedetī’’ti evamādīsu katthaci dukhanti ca katthaci dukkhanti ca vuccati, evaṃ katthaci ekanti, katthaci ekkanti vuccati. Idha pana ekaṃ nāmāti ayameva pāṭho.
দ্ৰে নাম কিন্তিপঞ্হৰণ্ণনা
Dve nāma kintipañhavaṇṇanā
এৰং ইমিনা পঞ্হব্যাকরণেন আরদ্ধচিত্তো সত্থা পুরিমনযেনেৰ উত্তরিং পঞ্হং পুচ্ছতি দ্ৰে নাম কিন্তি? থেরো দ্ৰেতি পচ্চনুভাসিত্ৰা ‘‘নামঞ্চ রূপঞ্চা’’তি ধম্মাধিট্ঠানায দেসনায ৰিস্সজ্জেতি। তত্থ আরম্মণাভিমুখং নমনতো, চিত্তস্স চ নতিহেতুতো সব্বম্পি অরূপং ‘‘নাম’’ন্তি ৰুচ্চতি। ইধ পন নিব্বিদাহেতুত্তা সাসৰধম্মমেৰ অধিপ্পেতং রুপ্পনট্ঠেন চত্তারো চ মহাভূতা, সব্বঞ্চ তদুপাদায পৰত্তমানং রূপং ‘‘রূপ’’ন্তি ৰুচ্চতি, তং সব্বম্পি ইধাধিপ্পেতং। অধিপ্পাযৰসেনেৰ চেত্থ ‘‘দ্ৰে নাম নামঞ্চ রূপঞ্চা’’তি ৰুত্তং, ন অঞ্ঞেসং দ্ৰিন্নমভাৰতো। যথাহ –
Evaṃ iminā pañhabyākaraṇena āraddhacitto satthā purimanayeneva uttariṃ pañhaṃ pucchati dve nāma kinti? Thero dveti paccanubhāsitvā ‘‘nāmañca rūpañcā’’ti dhammādhiṭṭhānāya desanāya vissajjeti. Tattha ārammaṇābhimukhaṃ namanato, cittassa ca natihetuto sabbampi arūpaṃ ‘‘nāma’’nti vuccati. Idha pana nibbidāhetuttā sāsavadhammameva adhippetaṃ ruppanaṭṭhena cattāro ca mahābhūtā, sabbañca tadupādāya pavattamānaṃ rūpaṃ ‘‘rūpa’’nti vuccati, taṃ sabbampi idhādhippetaṃ. Adhippāyavaseneva cettha ‘‘dve nāma nāmañca rūpañcā’’ti vuttaṃ, na aññesaṃ dvinnamabhāvato. Yathāha –
‘‘দ্ৰীসু , ভিক্খৰে, ধম্মেসু ভিক্খু সম্মা নিব্বিন্দমানো…পে॰… দুক্খস্সন্তকরো হোতি। কতমেসু দ্ৰীসু? নামে চ রূপে চ। ইমেসু খো, ভিক্খৰে, দ্ৰীসু ধম্মেসু ভিক্খু সম্মা নিব্বিন্দমানো…পে॰… দুক্খস্সন্তকরো হোতি। ‘দ্ৰে পঞ্হা, দ্ৰে উদ্দেসা, দ্ৰে ৰেয্যাকরণানী’তি ইতি যং তং ৰুত্তং, ইদমেতং পটিচ্চ ৰুত্ত’’ন্তি (অ॰ নি॰ ১০.২৭)।
‘‘Dvīsu , bhikkhave, dhammesu bhikkhu sammā nibbindamāno…pe… dukkhassantakaro hoti. Katamesu dvīsu? Nāme ca rūpe ca. Imesu kho, bhikkhave, dvīsu dhammesu bhikkhu sammā nibbindamāno…pe… dukkhassantakaro hoti. ‘Dve pañhā, dve uddesā, dve veyyākaraṇānī’ti iti yaṃ taṃ vuttaṃ, idametaṃ paṭicca vutta’’nti (a. ni. 10.27).
এত্থ চ নামরূপমত্তদস্সনেন অত্তদিট্ঠিং পহায অনত্তানুপস্সনামুখেনেৰ নিব্বিন্দমানো অনুপুব্বেন দুক্খস্সন্তকরো হোতি, পরমত্থৰিসুদ্ধিং পাপুণাতীতি ৰেদিতব্বো। যথাহ –
Ettha ca nāmarūpamattadassanena attadiṭṭhiṃ pahāya anattānupassanāmukheneva nibbindamāno anupubbena dukkhassantakaro hoti, paramatthavisuddhiṃ pāpuṇātīti veditabbo. Yathāha –
‘‘সব্বে ধম্মা অনত্তাতি, যদা পঞ্ঞায পস্সতি।
‘‘Sabbe dhammā anattāti, yadā paññāya passati;
অথ নিব্বিন্দতি দুক্খে, এস মগ্গো ৰিসুদ্ধিযা’’তি॥ (ধ॰ প॰ ২৭৯)।
Atha nibbindati dukkhe, esa maggo visuddhiyā’’ti. (dha. pa. 279);
তীণি নাম কিন্তিপঞ্হৰণ্ণনা
Tīṇi nāma kintipañhavaṇṇanā
ইদানি ইমিনাপি পঞ্হব্যাকরণেন আরদ্ধচিত্তো সত্থা পুরিমনযেনেৰ উত্তরিং পঞ্হং পুচ্ছতি তীণি নাম কিন্তি? থেরো তীণীতি পচ্চনুভাসিত্ৰা পুন ব্যাকরিতব্বস্স অত্থস্স লিঙ্গানুরূপং সঙ্খ্যং দস্সেন্তো ‘‘তিস্সো ৰেদনা’’তি ৰিস্সজ্জেতি। অথ ৰা ‘‘যা ভগৰতা ‘তিস্সো ৰেদনা’তি ৰুত্তা, ইমাসমত্থমহং তীণীতি পচ্চেমী’’তি দস্সেন্তো আহাতি এৰম্পেত্থ অত্থো ৰেদিতব্বো। অনেকমুখা হি দেসনা পটিসম্ভিদাপভেদেন দেসনাৰিলাসপ্পত্তানং। কেচি পনাহু ‘‘তীণীতি অধিকপদমিদ’’ন্তি। পুরিমনযেনেৰ চেত্থ ‘‘তিস্সো ৰেদনা’’তি ৰুত্তং, ন অঞ্ঞেসং তিণ্ণমভাৰতো। যথাহ –
Idāni imināpi pañhabyākaraṇena āraddhacitto satthā purimanayeneva uttariṃ pañhaṃ pucchati tīṇi nāma kinti? Thero tīṇīti paccanubhāsitvā puna byākaritabbassa atthassa liṅgānurūpaṃ saṅkhyaṃ dassento ‘‘tisso vedanā’’ti vissajjeti. Atha vā ‘‘yā bhagavatā ‘tisso vedanā’ti vuttā, imāsamatthamahaṃ tīṇīti paccemī’’ti dassento āhāti evampettha attho veditabbo. Anekamukhā hi desanā paṭisambhidāpabhedena desanāvilāsappattānaṃ. Keci panāhu ‘‘tīṇīti adhikapadamida’’nti. Purimanayeneva cettha ‘‘tisso vedanā’’ti vuttaṃ, na aññesaṃ tiṇṇamabhāvato. Yathāha –
‘‘তীসু, ভিক্খৰে, ধম্মেসু ভিক্খু সম্মা নিব্বিন্দমানো…পে॰… দুক্খস্সন্তকরো হোতি। কতমেসু তীসু? তীসু ৰেদনাসু। ইমেসু খো, ভিক্খৰে, তীসু ধম্মেসু ভিক্খু সম্মা নিব্বিন্দমানো…পে॰… দুক্খস্সন্তকরো হোতি। ‘তযো পঞ্হা, তযো উদ্দেসা, তীণি ৰেয্যাকরণানী’তি ইতি যং তং ৰুত্তং , ইদমেতং পটিচ্চ ৰুত্ত’’ন্তি (অ॰ নি॰ ১০.২৭)।
‘‘Tīsu, bhikkhave, dhammesu bhikkhu sammā nibbindamāno…pe… dukkhassantakaro hoti. Katamesu tīsu? Tīsu vedanāsu. Imesu kho, bhikkhave, tīsu dhammesu bhikkhu sammā nibbindamāno…pe… dukkhassantakaro hoti. ‘Tayo pañhā, tayo uddesā, tīṇi veyyākaraṇānī’ti iti yaṃ taṃ vuttaṃ , idametaṃ paṭicca vutta’’nti (a. ni. 10.27).
এত্থ চ ‘‘যংকিঞ্চি ৰেদযিতং, সব্বং তং দুক্খস্মিন্তি ৰদামী’’তি (সং॰ নি॰ ৪.২৫৯) ৰুত্তসুত্তানুসারেন ৰা। –
Ettha ca ‘‘yaṃkiñci vedayitaṃ, sabbaṃ taṃ dukkhasminti vadāmī’’ti (saṃ. ni. 4.259) vuttasuttānusārena vā. –
‘‘যো সুখং দুক্খতো অদ্দ, দুক্খমদ্দক্খি সল্লতো।
‘‘Yo sukhaṃ dukkhato adda, dukkhamaddakkhi sallato;
অদুক্খমসুখং সন্তং, অদ্দক্খি নং অনিচ্চতো’’তি॥ (ইতিৰু॰ ৫৩) –
Adukkhamasukhaṃ santaṃ, addakkhi naṃ aniccato’’ti. (itivu. 53) –
এৰং দুক্খদুক্খতাৰিপরিণামদুক্খতাসঙ্খারদুক্খতানুসারেন ৰা তিস্সন্নং ৰেদনানং দুক্খভাৰদস্সনেন সুখসঞ্ঞং পহায দুক্খানুপস্সনামুখেন নিব্বিন্দমানো অনুপুব্বেন দুক্খস্সন্তকরো হোতি, পরমত্থৰিসুদ্ধিং পাপুণাতীতি ৰেদিতব্বো। যথাহ –
Evaṃ dukkhadukkhatāvipariṇāmadukkhatāsaṅkhāradukkhatānusārena vā tissannaṃ vedanānaṃ dukkhabhāvadassanena sukhasaññaṃ pahāya dukkhānupassanāmukhena nibbindamāno anupubbena dukkhassantakaro hoti, paramatthavisuddhiṃ pāpuṇātīti veditabbo. Yathāha –
‘‘সব্বে সঙ্খারা দুক্খাতি, যদা পঞ্ঞায পস্সতি।
‘‘Sabbe saṅkhārā dukkhāti, yadā paññāya passati;
অথ নিব্বিন্দতি দুক্খে, এস মগ্গো ৰিসুদ্ধিযা’’তি॥ (ধ॰ প॰ ২৭৮)।
Atha nibbindati dukkhe, esa maggo visuddhiyā’’ti. (dha. pa. 278);
চত্তারি নাম কিন্তিপঞ্হৰণ্ণনা
Cattāri nāma kintipañhavaṇṇanā
এৰং ইমিনাপি পঞ্হব্যাকরণেন আরদ্ধচিত্তো সত্থা পুরিমনযেনেৰ উত্তরিং পঞ্হং পুচ্ছতি চত্তারি নাম কিন্তি? তত্থ ইমস্স পঞ্হস্স ব্যাকরণপক্খে কত্থচি পুরিমনযেনেৰ চত্তারো আহারা অধিপ্পেতা। যথাহ –
Evaṃ imināpi pañhabyākaraṇena āraddhacitto satthā purimanayeneva uttariṃ pañhaṃ pucchati cattāri nāma kinti? Tattha imassa pañhassa byākaraṇapakkhe katthaci purimanayeneva cattāro āhārā adhippetā. Yathāha –
‘‘চতূসু , ভিক্খৰে, ধম্মেসু ভিক্খু সম্মা নিব্বিন্দমানো…পে॰… দুক্খস্সন্তকরো হোতি। কতমেসু চতূসু? চতূসু আহারেসু। ইমেসু খো, ভিক্খৰে, চতূসু ধম্মেসু ভিক্খু সম্মা নিব্বিন্দমানো…পে॰… দুক্খস্সন্তকরো হোতি। ‘চত্তারো পঞ্হা চত্তারো উদ্দেসা চত্তারি ৰেয্যাকরণানী’তি ইতি যং তং ৰুত্তং, ইদমেতং পটিচ্চ ৰুত্ত’’ন্তি (অ॰ নি॰ ১০.২৭)।
‘‘Catūsu , bhikkhave, dhammesu bhikkhu sammā nibbindamāno…pe… dukkhassantakaro hoti. Katamesu catūsu? Catūsu āhāresu. Imesu kho, bhikkhave, catūsu dhammesu bhikkhu sammā nibbindamāno…pe… dukkhassantakaro hoti. ‘Cattāro pañhā cattāro uddesā cattāri veyyākaraṇānī’ti iti yaṃ taṃ vuttaṃ, idametaṃ paṭicca vutta’’nti (a. ni. 10.27).
কত্থচি যেসু সুভাৰিতচিত্তো অনুপুব্বেন দুক্খস্সন্তকরো হোতি, তানি চত্তারি সতিপট্ঠানানি। যথাহ কজঙ্গলা ভিক্খুনী –
Katthaci yesu subhāvitacitto anupubbena dukkhassantakaro hoti, tāni cattāri satipaṭṭhānāni. Yathāha kajaṅgalā bhikkhunī –
‘‘চতূসু, আৰুসো, ধম্মেসু ভিক্খু সম্মা সুভাৰিতচিত্তো সম্মা পরিযন্তদস্সাৰী সম্মত্তং অভিসমেচ্চ দিট্ঠেৰ ধম্মে দুক্খস্সন্তকরো হোতি। কতমেসু চতূসু? চতূসু সতিপট্ঠানেসু। ইমেসু খো, আৰুসো, চতূসু ধম্মেসু ভিক্খু সম্মা সুভাৰিতচিত্তো…পে॰… দুক্খস্সন্তকরো হোতি। ‘চত্তারো পঞ্হা চত্তারো উদ্দেসা চত্তারি ৰেয্যাকরণানী’তি ইতি যং তং ৰুত্তং ভগৰতা, ইদমেতং পটিচ্চ ৰুত্ত’’ন্তি (অ॰ নি॰ ১০.২৮)।
‘‘Catūsu, āvuso, dhammesu bhikkhu sammā subhāvitacitto sammā pariyantadassāvī sammattaṃ abhisamecca diṭṭheva dhamme dukkhassantakaro hoti. Katamesu catūsu? Catūsu satipaṭṭhānesu. Imesu kho, āvuso, catūsu dhammesu bhikkhu sammā subhāvitacitto…pe… dukkhassantakaro hoti. ‘Cattāro pañhā cattāro uddesā cattāri veyyākaraṇānī’ti iti yaṃ taṃ vuttaṃ bhagavatā, idametaṃ paṭicca vutta’’nti (a. ni. 10.28).
ইধ পন যেসং চতুন্নং অনুবোধপ্পটিৰেধতো ভৰতণ্হাছেদো হোতি, যস্মা তানি চত্তারি অরিযসচ্চানি অধিপ্পেতানি। যস্মা ৰা ইমিনা পরিযাযেন ব্যাকতং সুব্যাকতমেৰ হোতি, তস্মা থেরো চত্তারীতি পচ্চনুভাসিত্ৰা ‘‘অরিযসচ্চানী’’তি ৰিস্সজ্জেতি। তত্থ চত্তারীতি গণনপরিচ্ছেদো। অরিযসচ্চানীতি অরিযানি সচ্চানি, অৰিতথানি অৰিসংৰাদকানীতি অত্থো। যথাহ –
Idha pana yesaṃ catunnaṃ anubodhappaṭivedhato bhavataṇhāchedo hoti, yasmā tāni cattāri ariyasaccāni adhippetāni. Yasmā vā iminā pariyāyena byākataṃ subyākatameva hoti, tasmā thero cattārīti paccanubhāsitvā ‘‘ariyasaccānī’’ti vissajjeti. Tattha cattārīti gaṇanaparicchedo. Ariyasaccānīti ariyāni saccāni, avitathāni avisaṃvādakānīti attho. Yathāha –
‘‘ইমানি খো, ভিক্খৰে, চত্তারি অরিযসচ্চানি তথানি অৰিতথানি অনঞ্ঞথানি, তস্মা অরিযসচ্চানীতি ৰুচ্চন্তী’’তি (সং॰ নি॰ ৫.১০৯৭)।
‘‘Imāni kho, bhikkhave, cattāri ariyasaccāni tathāni avitathāni anaññathāni, tasmā ariyasaccānīti vuccantī’’ti (saṃ. ni. 5.1097).
যস্মা ৰা সদেৰকেন লোকেন অরণীযতো অভিগমনীযতোতি ৰুত্তং হোতি, ৰাযমিতব্বট্ঠানসঞ্ঞিতে অযে ৰা ইরিযনতো, অনযে ৰা ন ইরিযনতো, সত্ততিংসবোধিপক্খিযঅরিযধম্মসমাযোগতো ৰা অরিযসম্মতা বুদ্ধপচ্চেকবুদ্ধবুদ্ধসাৰকা এতানি পটিৰিজ্ঝন্তি, তস্মাপি ‘‘অরিযসচ্চানী’’তি ৰুচ্চন্তি। যথাহ –
Yasmā vā sadevakena lokena araṇīyato abhigamanīyatoti vuttaṃ hoti, vāyamitabbaṭṭhānasaññite aye vā iriyanato, anaye vā na iriyanato, sattatiṃsabodhipakkhiyaariyadhammasamāyogato vā ariyasammatā buddhapaccekabuddhabuddhasāvakā etāni paṭivijjhanti, tasmāpi ‘‘ariyasaccānī’’ti vuccanti. Yathāha –
‘‘চত্তারিমানি , ভিক্খৰে, অরিযসচ্চানি…পে॰… ইমানি খো, ভিক্খৰে, চত্তারি অরিযসচ্চানি, অরিযা ইমানি পটিৰিজ্ঝন্তি, তস্মা অরিযসচ্চানীতি ৰুচ্চন্তী’’তি।
‘‘Cattārimāni , bhikkhave, ariyasaccāni…pe… imāni kho, bhikkhave, cattāri ariyasaccāni, ariyā imāni paṭivijjhanti, tasmā ariyasaccānīti vuccantī’’ti.
অপিচ অরিযস্স ভগৰতো সচ্চানীতিপি অরিযসচ্চানি। যথাহ –
Apica ariyassa bhagavato saccānītipi ariyasaccāni. Yathāha –
‘‘সদেৰকে, ভিক্খৰে…পে॰… সদেৰমনুস্সায তথাগতো অরিযো, তস্মা অরিযসচ্চানীতি ৰুচ্চন্তী’’তি (সং॰ নি॰ ৫.১০৯৮)।
‘‘Sadevake, bhikkhave…pe… sadevamanussāya tathāgato ariyo, tasmā ariyasaccānīti vuccantī’’ti (saṃ. ni. 5.1098).
অথ ৰা এতেসং অভিসম্বুদ্ধত্তা অরিযভাৰসিদ্ধিতোপি অরিযসচ্চানি। যথাহ –
Atha vā etesaṃ abhisambuddhattā ariyabhāvasiddhitopi ariyasaccāni. Yathāha –
‘‘ইমেসং খো, ভিক্খৰে, চতুন্নং অরিযসচ্চানং যথাভূতং অভিসম্বুদ্ধত্তা তথাগতো অরহং সম্মাসম্বুদ্ধোতি ৰুচ্চতী’’তি (সং॰ নি॰ ৫.১০৯৩)।
‘‘Imesaṃ kho, bhikkhave, catunnaṃ ariyasaccānaṃ yathābhūtaṃ abhisambuddhattā tathāgato arahaṃ sammāsambuddhoti vuccatī’’ti (saṃ. ni. 5.1093).
অযমেতেসং পদত্থো। এতেসং পন অরিযসচ্চানং অনুবোধপ্পটিৰেধতো ভৰতণ্হাছেদো হোতি। যথাহ –
Ayametesaṃ padattho. Etesaṃ pana ariyasaccānaṃ anubodhappaṭivedhato bhavataṇhāchedo hoti. Yathāha –
‘‘তযিদং , ভিক্খৰে, দুক্খং অরিযসচ্চং অনুবুদ্ধং পটিৰিদ্ধং…পে॰… দুক্খনিরোধগামিনিপটিপদা অরিযসচ্চং অনুবুদ্ধং পটিৰিদ্ধং, উচ্ছিন্না ভৰতণ্হা, খীণা ভৰনেত্তি, নত্থি দানি পুনব্ভৰো’’তি (সং॰ নি॰ ৫.১০৯১)।
‘‘Tayidaṃ , bhikkhave, dukkhaṃ ariyasaccaṃ anubuddhaṃ paṭividdhaṃ…pe… dukkhanirodhagāminipaṭipadā ariyasaccaṃ anubuddhaṃ paṭividdhaṃ, ucchinnā bhavataṇhā, khīṇā bhavanetti, natthi dāni punabbhavo’’ti (saṃ. ni. 5.1091).
পঞ্চ নাম কিন্তিপঞ্হৰণ্ণনা
Pañca nāma kintipañhavaṇṇanā
ইমিনাপি পঞ্হব্যাকরণেন আরদ্ধচিত্তো সত্থা পুরিমনযেনেৰ উত্তরিং পঞ্হং পুচ্ছতি পঞ্চ নাম কিন্তি? থেরো পঞ্চাতি পচ্চনুভাসিত্ৰা ‘‘উপাদানক্খন্ধা’’তি ৰিস্সজ্জেতি। তত্থ পঞ্চাতি গণনপরিচ্ছেদো। উপাদানজনিতা উপাদানজনকা ৰা খন্ধা উপাদানক্খন্ধা। যংকিঞ্চি রূপং, ৰেদনা, সঞ্ঞা, সঙ্খারা, ৰিঞ্ঞাণঞ্চ সাসৰা উপাদানিযা, এতেসমেতং অধিৰচনং। পুব্বনযেনেৰ চেত্থ ‘‘পঞ্চুপাদানক্খন্ধা’’তি ৰুত্তং, ন অঞ্ঞেসং পঞ্চন্নমভাৰতো। যথাহ –
Imināpi pañhabyākaraṇena āraddhacitto satthā purimanayeneva uttariṃ pañhaṃ pucchati pañca nāma kinti? Thero pañcāti paccanubhāsitvā ‘‘upādānakkhandhā’’ti vissajjeti. Tattha pañcāti gaṇanaparicchedo. Upādānajanitā upādānajanakā vā khandhā upādānakkhandhā. Yaṃkiñci rūpaṃ, vedanā, saññā, saṅkhārā, viññāṇañca sāsavā upādāniyā, etesametaṃ adhivacanaṃ. Pubbanayeneva cettha ‘‘pañcupādānakkhandhā’’ti vuttaṃ, na aññesaṃ pañcannamabhāvato. Yathāha –
‘‘পঞ্চসু, ভিক্খৰে, ধম্মেসু ভিক্খু সম্মা নিব্বিন্দমানো…পে॰… দুক্খস্সন্তকরো হোতি। কতমেসু পঞ্চসু? পঞ্চসু উপাদানক্খন্ধেসু। ইমেসু খো, ভিক্খৰে, পঞ্চসু ধম্মেসু ভিক্খু সম্মা নিব্বিন্দমানো…পে॰… দুক্খস্সন্তকরো হোতি। ‘পঞ্চ পঞ্হা, পঞ্চ উদ্দেসা , পঞ্চ ৰেয্যাকরণানী’তি ইতি যং তং ৰুত্তং, ইদমেতং পটিচ্চ ৰুত্ত’’ন্তি (অ॰ নি॰ ১০.২৭)।
‘‘Pañcasu, bhikkhave, dhammesu bhikkhu sammā nibbindamāno…pe… dukkhassantakaro hoti. Katamesu pañcasu? Pañcasu upādānakkhandhesu. Imesu kho, bhikkhave, pañcasu dhammesu bhikkhu sammā nibbindamāno…pe… dukkhassantakaro hoti. ‘Pañca pañhā, pañca uddesā , pañca veyyākaraṇānī’ti iti yaṃ taṃ vuttaṃ, idametaṃ paṭicca vutta’’nti (a. ni. 10.27).
এত্থ চ পঞ্চক্খন্ধে উদযব্বযৰসেন সম্মসন্তো ৰিপস্সনামতং লদ্ধা অনুপুব্বেন নিব্বানামতং সচ্ছিকরোতি। যথাহ –
Ettha ca pañcakkhandhe udayabbayavasena sammasanto vipassanāmataṃ laddhā anupubbena nibbānāmataṃ sacchikaroti. Yathāha –
‘‘যতো যতো সম্মসতি, খন্ধানং উদযব্বযং।
‘‘Yato yato sammasati, khandhānaṃ udayabbayaṃ;
লভতী পীতিপামোজ্জং, অমতং তং ৰিজানত’’ন্তি॥ (ধ॰ প॰ ৩৭৪)।
Labhatī pītipāmojjaṃ, amataṃ taṃ vijānata’’nti. (dha. pa. 374);
ছ নাম কিন্তিপঞ্হৰণ্ণনা
Cha nāma kintipañhavaṇṇanā
এৰং ইমিনাপি পঞ্হব্যাকরণেন আরদ্ধচিত্তো সত্থা পুরিমনযেনেৰ উত্তরিং পঞ্হং পুচ্ছতি ‘‘ছ নাম কি’’ন্তি? থেরো ছইতি পচ্চনুভাসিত্ৰা ‘অজ্ঝত্তিকানি আযতনানী’তি ৰিস্সজ্জেতি। তত্থ ছইতি গণনপরিচ্ছেদো, অজ্ঝত্তে নিযুত্তানি, অত্তানং ৰা অধিকত্ৰা পৰত্তানি অজ্ঝত্তিকানি। আযতনতো, আযস্স ৰা তননতো, আযতস্স ৰা সংসারদুক্খস্স নযনতো আযতনানি, চক্খুসোতঘানজিৰ্হাকাযমনানমেতং অধিৰচনং। পুব্বনযেন চেত্থ ‘‘ছ অজ্ঝত্তিকানি আযতনানী’’তি ৰুত্তং, ন অঞ্ঞেসং ছন্নমভাৰতো। যথাহ –
Evaṃ imināpi pañhabyākaraṇena āraddhacitto satthā purimanayeneva uttariṃ pañhaṃ pucchati ‘‘cha nāma ki’’nti? Thero chaiti paccanubhāsitvā ‘ajjhattikāni āyatanānī’ti vissajjeti. Tattha chaiti gaṇanaparicchedo, ajjhatte niyuttāni, attānaṃ vā adhikatvā pavattāni ajjhattikāni. Āyatanato, āyassa vā tananato, āyatassa vā saṃsāradukkhassa nayanato āyatanāni, cakkhusotaghānajivhākāyamanānametaṃ adhivacanaṃ. Pubbanayena cettha ‘‘cha ajjhattikāni āyatanānī’’ti vuttaṃ, na aññesaṃ channamabhāvato. Yathāha –
‘‘ছসু , ভিক্খৰে, ধম্মেসু ভিক্খু সম্মা নিব্বিন্দমানো…পে॰… দুক্খস্সন্তকরো হোতি। কতমেসু ছসু? ছসু অজ্ঝত্তিকেসু আযতনেসু। ইমেসু খো, ভিক্খৰে, ছসু ধম্মেসু ভিক্খু সম্মা নিব্বিন্দমানো…পে॰… দুক্খস্সন্তকরো হোতি। ‘ছ পঞ্হা ছ উদ্দেসা ছ ৰেয্যাকরণানী’তি ইতি যং তং ৰুত্তং, ইদমেতং পটিচ্চ ৰুত্ত’’ন্তি (অ॰ নি॰ ১০.২৭)।
‘‘Chasu , bhikkhave, dhammesu bhikkhu sammā nibbindamāno…pe… dukkhassantakaro hoti. Katamesu chasu? Chasu ajjhattikesu āyatanesu. Imesu kho, bhikkhave, chasu dhammesu bhikkhu sammā nibbindamāno…pe… dukkhassantakaro hoti. ‘Cha pañhā cha uddesā cha veyyākaraṇānī’ti iti yaṃ taṃ vuttaṃ, idametaṃ paṭicca vutta’’nti (a. ni. 10.27).
এত্থ চ ছ অজ্ঝত্তিকানি আযতনানি, ‘‘সুঞ্ঞো গামোতি খো, ভিক্খৰে, ছন্নেতং অজ্ঝত্তিকানং আযতনানং অধিৰচন’’ন্তি (সং॰ নি॰ ৪.২৩৮) ৰচনতো সুঞ্ঞতো পুব্বুল়কমরীচিকাদীনি ৰিয অচিরট্ঠিতিকতো তুচ্ছতো ৰঞ্চনতো চ সমনুপস্সং নিব্বিন্দমানো অনুপুব্বেন দুক্খস্সন্তং কত্ৰা মচ্চুরাজস্স অদস্সনং উপেতি। যথাহ –
Ettha ca cha ajjhattikāni āyatanāni, ‘‘suñño gāmoti kho, bhikkhave, channetaṃ ajjhattikānaṃ āyatanānaṃ adhivacana’’nti (saṃ. ni. 4.238) vacanato suññato pubbuḷakamarīcikādīni viya aciraṭṭhitikato tucchato vañcanato ca samanupassaṃ nibbindamāno anupubbena dukkhassantaṃ katvā maccurājassa adassanaṃ upeti. Yathāha –
‘‘যথা পুব্বুল়কং পস্সে, যথা পস্সে মরীচিকং।
‘‘Yathā pubbuḷakaṃ passe, yathā passe marīcikaṃ;
এৰং লোকং অৰেক্খন্তং, মচ্চুরাজা ন পস্সতী’’তি॥ (ধ॰ প॰ ১৭০)।
Evaṃ lokaṃ avekkhantaṃ, maccurājā na passatī’’ti. (dha. pa. 170);
সত্ত নাম কিন্তিপঞ্হৰণ্ণনা
Satta nāma kintipañhavaṇṇanā
ইমিনাপি পঞ্হব্যাকরণেন আরদ্ধচিত্তো সত্থা উত্তরিং পঞ্হং পুচ্ছতি সত্ত নাম কিন্তি? থেরো কিঞ্চাপি মহাপঞ্হব্যাকরণে সত্ত ৰিঞ্ঞাণট্ঠিতিযো ৰুত্তা, অপিচ খো পন যেসু ধম্মেসু সুভাৰিতচিত্তো ভিক্খু দুক্খস্সন্তকরো হোতি, তে দস্সেন্তো ‘‘সত্ত বোজ্ঝঙ্গা’’তি ৰিস্সজ্জেতি। অযম্পি চত্থো ভগৰতা অনুমতো এৰ। যথাহ –
Imināpi pañhabyākaraṇena āraddhacitto satthā uttariṃ pañhaṃ pucchati satta nāma kinti? Thero kiñcāpi mahāpañhabyākaraṇe satta viññāṇaṭṭhitiyo vuttā, apica kho pana yesu dhammesu subhāvitacitto bhikkhu dukkhassantakaro hoti, te dassento ‘‘satta bojjhaṅgā’’ti vissajjeti. Ayampi cattho bhagavatā anumato eva. Yathāha –
‘‘পণ্ডিতা গহপতযো কজঙ্গলিকা ভিক্খুনী, মহাপঞ্ঞা গহপতযো কজঙ্গলিকা ভিক্খুনী, মঞ্চেপি তুম্হে গহপতযো উপসঙ্কমিত্ৰা এতমত্থং পটিপুচ্ছেয্যাথ, অহম্পি চেতং এৰমেৰ ব্যাকরেয্যং, যথা তং কজঙ্গলিকায ভিক্খুনিযা ব্যাকত’’ন্তি (অ॰ নি॰ ১০.২৮)।
‘‘Paṇḍitā gahapatayo kajaṅgalikā bhikkhunī, mahāpaññā gahapatayo kajaṅgalikā bhikkhunī, mañcepi tumhe gahapatayo upasaṅkamitvā etamatthaṃ paṭipuccheyyātha, ahampi cetaṃ evameva byākareyyaṃ, yathā taṃ kajaṅgalikāya bhikkhuniyā byākata’’nti (a. ni. 10.28).
তায চ এৰং ব্যাকতং –
Tāya ca evaṃ byākataṃ –
‘‘সত্তসু, আৰুসো, ধম্মেসু ভিক্খু সম্মা সুভাৰিতচিত্তো…পে॰… দুক্খস্সন্তকরো হোতি। কতমেসু সত্তসু? সত্তসু বোজ্ঝঙ্গেসু। ইমেসু খো, আৰুসো, সত্তসু ধম্মেসু ভিক্খু সম্মা সুভাৰিতচিত্তো…পে॰… দুক্খস্সন্তকরো হোতি। ‘সত্ত পঞ্হা সত্ত উদ্দেসা সত্ত ৰেয্যাকরণানী’তি ইতি যং তং ৰুত্তং ভগৰতা, ইদমেতং পটিচ্চ ৰুত্ত’’ন্তি (অ॰ নি॰ ১০.২৮)।
‘‘Sattasu, āvuso, dhammesu bhikkhu sammā subhāvitacitto…pe… dukkhassantakaro hoti. Katamesu sattasu? Sattasu bojjhaṅgesu. Imesu kho, āvuso, sattasu dhammesu bhikkhu sammā subhāvitacitto…pe… dukkhassantakaro hoti. ‘Satta pañhā satta uddesā satta veyyākaraṇānī’ti iti yaṃ taṃ vuttaṃ bhagavatā, idametaṃ paṭicca vutta’’nti (a. ni. 10.28).
এৰমযমত্থো ভগৰতা অনুমতো এৰাতি ৰেদিতব্বো।
Evamayamattho bhagavatā anumato evāti veditabbo.
তত্থ সত্তাতি ঊনাধিকনিৰারণগণনপরিচ্ছেদো। বোজ্ঝঙ্গাতি সতিআদীনং ধম্মানমেতং অধিৰচনং। তত্রাযং পদত্থো – এতায লোকিযলোকুত্তরমগ্গক্খণে উপ্পজ্জমানায লীনুদ্ধচ্চপতিট্ঠানাযূহনকামসুখত্তকিলমথানুযোগউচ্ছেদসস্সতাভিনিৰেসাদি- অনেকুপদ্দৰপ্পটিপক্খভূতায সতিধম্মৰিচযৰীরিযপীতিপ্পস্সদ্ধিসমাধুপেক্খাসঙ্খাতায ধম্মসামগ্গিযা অরিযসাৰকো বুজ্ঝতীতি কত্ৰা বোধি, কিলেসসন্তাননিদ্দায উট্ঠহতি, চত্তারি ৰা অরিযসচ্চানি পটিৰিজ্ঝতি, নিব্বানমেৰ ৰা সচ্ছিকরোতীতি ৰুত্তং হোতি। যথাহ – ‘‘সত্ত বোজ্ঝঙ্গে ভাৰেত্ৰা অনুত্তরং সম্মাসম্বোধিং অভিসম্বুদ্ধো’’তি। যথাৰুত্তপ্পকারায ৰা এতায ধম্মসামগ্গিযা বুজ্ঝতীতি কত্ৰা অরিযসাৰকোপি বোধি। ইতি তস্সা ধম্মসামগ্গিসঙ্খাতায বোধিযা অঙ্গভূতত্তা বোজ্ঝঙ্গা ঝানঙ্গমগ্গঙ্গানি ৰিয, তস্স ৰা বোধীতি লদ্ধৰোহারস্স অরিযসাৰকস্স অঙ্গভূতত্তাপি বোজ্ঝঙ্গা সেনঙ্গরথঙ্গাদযো ৰিয।
Tattha sattāti ūnādhikanivāraṇagaṇanaparicchedo. Bojjhaṅgāti satiādīnaṃ dhammānametaṃ adhivacanaṃ. Tatrāyaṃ padattho – etāya lokiyalokuttaramaggakkhaṇe uppajjamānāya līnuddhaccapatiṭṭhānāyūhanakāmasukhattakilamathānuyogaucchedasassatābhinivesādi- anekupaddavappaṭipakkhabhūtāya satidhammavicayavīriyapītippassaddhisamādhupekkhāsaṅkhātāya dhammasāmaggiyā ariyasāvako bujjhatīti katvā bodhi, kilesasantānaniddāya uṭṭhahati, cattāri vā ariyasaccāni paṭivijjhati, nibbānameva vā sacchikarotīti vuttaṃ hoti. Yathāha – ‘‘satta bojjhaṅge bhāvetvā anuttaraṃ sammāsambodhiṃ abhisambuddho’’ti. Yathāvuttappakārāya vā etāya dhammasāmaggiyā bujjhatīti katvā ariyasāvakopi bodhi. Iti tassā dhammasāmaggisaṅkhātāya bodhiyā aṅgabhūtattā bojjhaṅgā jhānaṅgamaggaṅgāni viya, tassa vā bodhīti laddhavohārassa ariyasāvakassa aṅgabhūtattāpi bojjhaṅgā senaṅgarathaṅgādayo viya.
অপিচ ‘‘বোজ্ঝঙ্গাতি কেনট্ঠেন বোজ্ঝঙ্গা? বোধায সংৰত্তন্তীতি বোজ্ঝঙ্গা, বুজ্ঝন্তীতি বোজ্ঝঙ্গা, অনুবুজ্ঝন্তীতি বোজ্ঝঙ্গা, পটিবুজ্ঝন্তীতি বোজ্ঝঙ্গা, সম্বুজ্ঝন্তীতি বোজ্ঝঙ্গা’’তি (পটি॰ ম॰ ২.১৭) ইমিনাপি পটিসম্ভিদাযং ৰুত্তেন ৰিধিনা বোজ্ঝঙ্গানং বোজ্ঝঙ্গট্ঠো ৰেদিতব্বো। এৰমিমে সত্ত বোজ্ঝঙ্গে ভাৰেন্তো বহুলীকরোন্তো ন চিরস্সেৰ একন্তনিব্বিদাদিগুণপটিলাভী হোতি, তেন দিট্ঠেৰ ধম্মে দুক্খস্সন্তকরো হোতীতি ৰুচ্চতি । ৰুত্তঞ্চেতং ভগৰতা –
Apica ‘‘bojjhaṅgāti kenaṭṭhena bojjhaṅgā? Bodhāya saṃvattantīti bojjhaṅgā, bujjhantīti bojjhaṅgā, anubujjhantīti bojjhaṅgā, paṭibujjhantīti bojjhaṅgā, sambujjhantīti bojjhaṅgā’’ti (paṭi. ma. 2.17) imināpi paṭisambhidāyaṃ vuttena vidhinā bojjhaṅgānaṃ bojjhaṅgaṭṭho veditabbo. Evamime satta bojjhaṅge bhāvento bahulīkaronto na cirasseva ekantanibbidādiguṇapaṭilābhī hoti, tena diṭṭheva dhamme dukkhassantakaro hotīti vuccati . Vuttañcetaṃ bhagavatā –
‘‘সত্তিমে, ভিক্খৰে, বোজ্ঝঙ্গা ভাৰিতা বহুলীকতা একন্তনিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্তন্তী’’তি (সং॰ নি॰ ৫.২০১)।
‘‘Sattime, bhikkhave, bojjhaṅgā bhāvitā bahulīkatā ekantanibbidāya virāgāya nirodhāya upasamāya abhiññāya sambodhāya nibbānāya saṃvattantī’’ti (saṃ. ni. 5.201).
অট্ঠ নাম কিন্তিপঞ্হৰণ্ণনা
Aṭṭha nāma kintipañhavaṇṇanā
এৰং ইমিনাপি পঞ্হব্যাকরণেন আরদ্ধচিত্তো সত্থা উত্তরিং পঞ্হং পুচ্ছতি অট্ঠ নাম কিন্তি? থেরো কিঞ্চাপি মহাপঞ্হব্যাকরণে অট্ঠ লোকধম্মা ৰুত্তা, অপিচ খো পন যেসু ধম্মেসু সুভাৰিতচিত্তো ভিক্খু দুক্খস্সন্তকরো হোতি, তে দস্সেন্তো ‘‘অরিযানি অট্ঠ মগ্গঙ্গানী’’তি অৰত্ৰা যস্মা অট্ঠঙ্গৰিনিমুত্তো মগ্গো নাম নত্থি, অট্ঠঙ্গমত্তমেৰ তু মগ্গো, তস্মা তমত্থং সাধেন্তো দেসনাৰিলাসেন অরিযো অট্ঠঙ্গিকো মগ্গোতি ৰিস্সজ্জেতি। ভগৰতাপি চাযমত্থো দেসনানযো চ অনুমতো এৰ। যথাহ –
Evaṃ imināpi pañhabyākaraṇena āraddhacitto satthā uttariṃ pañhaṃ pucchati aṭṭha nāma kinti? Thero kiñcāpi mahāpañhabyākaraṇe aṭṭha lokadhammā vuttā, apica kho pana yesu dhammesu subhāvitacitto bhikkhu dukkhassantakaro hoti, te dassento ‘‘ariyāni aṭṭha maggaṅgānī’’ti avatvā yasmā aṭṭhaṅgavinimutto maggo nāma natthi, aṭṭhaṅgamattameva tu maggo, tasmā tamatthaṃ sādhento desanāvilāsena ariyo aṭṭhaṅgiko maggoti vissajjeti. Bhagavatāpi cāyamattho desanānayo ca anumato eva. Yathāha –
‘‘পণ্ডিতা গহপতযো কজঙ্গলিকা ভিক্খুনী…পে॰… অহম্পি এৰমেৰ ব্যাকরেয্যং, যথা তং কজঙ্গলিকায ভিক্খুনিযা ব্যাকত’’ন্তি (অ॰ নি॰ ১০.২৮)।
‘‘Paṇḍitā gahapatayo kajaṅgalikā bhikkhunī…pe… ahampi evameva byākareyyaṃ, yathā taṃ kajaṅgalikāya bhikkhuniyā byākata’’nti (a. ni. 10.28).
তায চ এৰং ব্যাকতং –
Tāya ca evaṃ byākataṃ –
‘‘অট্ঠসু, আৰুসো, ধম্মেসু ভিক্খু সম্মা সুভাৰিতচিত্তো…পে॰… দুক্খস্সন্তকরো হোতি। ‘অট্ঠ পঞ্হা, অট্ঠ উদ্দেসা, অট্ঠ ৰেয্যাকরণানী’তি ইতি যং তং ৰুত্তং ভগৰতা, ইদমেতং পটিচ্চ ৰুত্ত’’ন্তি (অ॰ নি॰ ১০.২৮)।
‘‘Aṭṭhasu, āvuso, dhammesu bhikkhu sammā subhāvitacitto…pe… dukkhassantakaro hoti. ‘Aṭṭha pañhā, aṭṭha uddesā, aṭṭha veyyākaraṇānī’ti iti yaṃ taṃ vuttaṃ bhagavatā, idametaṃ paṭicca vutta’’nti (a. ni. 10.28).
এৰমযং অত্থো চ দেসনানযো চ ভগৰতা অনুমতো এৰাতি ৰেদিতব্বো।
Evamayaṃ attho ca desanānayo ca bhagavatā anumato evāti veditabbo.
তত্থ অরিযোতি নিব্বানত্থিকেহি অভিগন্তব্বো, অপিচ আরকা কিলেসেহি ৰত্তনতো, অরিযভাৰকরণতো, অরিযফলপটিলাভতো চাপি অরিযোতি ৰেদিতব্বো। অট্ঠ অঙ্গানি অস্সাতি অট্ঠঙ্গিকো। স্ৰাযং চতুরঙ্গিকা ৰিয সেনা, পঞ্চঙ্গিকং ৰিয চ তূরিযং অঙ্গৰিনিব্ভোগেন অনুপলব্ভসভাৰতো অঙ্গমত্তমেৰাতি ৰেদিতব্বো। মগ্গতি ইমিনা নিব্বানং, সযং ৰা মগ্গতি, কিলেসে মারেন্তো ৰা গচ্ছতীতি মগ্গো।
Tattha ariyoti nibbānatthikehi abhigantabbo, apica ārakā kilesehi vattanato, ariyabhāvakaraṇato, ariyaphalapaṭilābhato cāpi ariyoti veditabbo. Aṭṭha aṅgāni assāti aṭṭhaṅgiko. Svāyaṃ caturaṅgikā viya senā, pañcaṅgikaṃ viya ca tūriyaṃ aṅgavinibbhogena anupalabbhasabhāvato aṅgamattamevāti veditabbo. Maggati iminā nibbānaṃ, sayaṃ vā maggati, kilese mārento vā gacchatīti maggo.
এৰমট্ঠপ্পভেদঞ্চিমং অট্ঠঙ্গিকং মগ্গং ভাৰেন্তো ভিক্খু অৰিজ্জং ভিন্দতি, ৰিজ্জং উপ্পাদেতি, নিব্বানং সচ্ছিকরোতি, তেন দিট্ঠেৰ ধম্মে দুক্খস্সন্তকরো হোতীতি ৰুচ্চতি। ৰুত্তঞ্হেতং –
Evamaṭṭhappabhedañcimaṃ aṭṭhaṅgikaṃ maggaṃ bhāvento bhikkhu avijjaṃ bhindati, vijjaṃ uppādeti, nibbānaṃ sacchikaroti, tena diṭṭheva dhamme dukkhassantakaro hotīti vuccati. Vuttañhetaṃ –
‘‘সেয্যথাপি, ভিক্খৰে, সালিসূকং ৰা যৰসূকং ৰা সম্মা পণিহিতং হত্থেন ৰা পাদেন ৰা অক্কন্তং হত্থং ৰা পাদং ৰা ভেচ্ছতি, লোহিতং ৰা উপ্পাদেস্সতীতি ঠানমেতং ৰিজ্জতি। তং কিস্স হেতু? সম্মা পণিহিতত্তা, ভিক্খৰে, সূকস্স, এৰমেৰ খো, ভিক্খৰে , সো ৰত ভিক্খু সম্মা পণিহিতায দিট্ঠিযা সম্মা পণিহিতায মগ্গভাৰনায অৰিজ্জং ভেচ্ছতি, ৰিজ্জং উপ্পাদেস্সতি, নিব্বানং সচ্ছিকরিস্সতীতি ঠানমেতং ৰিজ্জতী’’তি (অ॰ নি॰ ১.৪২)।
‘‘Seyyathāpi, bhikkhave, sālisūkaṃ vā yavasūkaṃ vā sammā paṇihitaṃ hatthena vā pādena vā akkantaṃ hatthaṃ vā pādaṃ vā bhecchati, lohitaṃ vā uppādessatīti ṭhānametaṃ vijjati. Taṃ kissa hetu? Sammā paṇihitattā, bhikkhave, sūkassa, evameva kho, bhikkhave , so vata bhikkhu sammā paṇihitāya diṭṭhiyā sammā paṇihitāya maggabhāvanāya avijjaṃ bhecchati, vijjaṃ uppādessati, nibbānaṃ sacchikarissatīti ṭhānametaṃ vijjatī’’ti (a. ni. 1.42).
নৰ নাম কিন্তিপঞ্হৰণ্ণনা
Nava nāma kintipañhavaṇṇanā
ইমিনাপি পঞ্হব্যাকরণেন আরদ্ধচিত্তো সত্থা উত্তরিং পঞ্হং পুচ্ছতি নৰ নাম কিন্তি? থেরো নৰইতি পচ্চনুভাসিত্ৰা ‘‘সত্তাৰাসা’’তি ৰিস্সজ্জেতি। তত্থ নৰাতি গণনপরিচ্ছেদো। সত্তাতি জীৰিতিন্দ্রিযপ্পটিবদ্ধে খন্ধে উপাদায পঞ্ঞত্তা পাণিনো পণ্ণত্তি ৰা। আৰাসাতি আৰসন্তি এতেসূতি আৰাসা, সত্তানং আৰাসা সত্তাৰাসা। এস দেসনামগ্গো, অত্থতো পন নৰৰিধানং সত্তানমেতং অধিৰচনং। যথাহ –
Imināpi pañhabyākaraṇena āraddhacitto satthā uttariṃ pañhaṃ pucchati nava nāma kinti? Thero navaiti paccanubhāsitvā ‘‘sattāvāsā’’ti vissajjeti. Tattha navāti gaṇanaparicchedo. Sattāti jīvitindriyappaṭibaddhe khandhe upādāya paññattā pāṇino paṇṇatti vā. Āvāsāti āvasanti etesūti āvāsā, sattānaṃ āvāsā sattāvāsā. Esa desanāmaggo, atthato pana navavidhānaṃ sattānametaṃ adhivacanaṃ. Yathāha –
‘‘সন্তাৰুসো, সত্তা নানত্তকাযা নানত্তসঞ্ঞিনো, সেয্যথাপি মনুস্সা একচ্চে চ দেৰা একচ্চে চ ৰিনিপাতিকা, অযং পঠমো সত্তাৰাসো। সন্তাৰুসো, সত্তা নানত্তকাযা একত্তসঞ্ঞিনো, সেয্যথাপি, দেৰা ব্রহ্মকাযিকা, পঠমাভিনিব্বত্তা, অযং দুতিযো সত্তাৰাসো। সন্তাৰুসো, সত্তা একত্তকাযা নানত্তসঞ্ঞিনো, সেয্যথাপি, দেৰা আভস্সরা, অযং ততিযো সত্তাৰাসো। সন্তাৰুসো, সত্তা একত্তকাযা একত্তসঞ্ঞিনো, সেয্যথাপি, দেৰা সুভকিণ্হা, অযং চতুত্থো সত্তাৰাসো। সন্তাৰুসো, সত্তা অসঞ্ঞিনো অপ্পটিসংৰেদিনো, সেয্যথাপি, দেৰা অসঞ্ঞসত্তা, অযং পঞ্চমো সত্তাৰাসো। সন্তাৰুসো, সত্তা সব্বসো রূপসঞ্ঞানং…পে॰… আকাসানঞ্চাযতনূপগা , অযং ছট্ঠো সত্তাৰাসো। সন্তাৰুসো, সত্তা…পে॰… ৰিঞ্ঞাণঞ্চাযতনূপগা, অযং সত্তমো সত্তাৰাসো। সন্তাৰুসো, সত্তা…পে॰… আকিঞ্চঞ্ঞাযতনূপগা, অযং অট্ঠমো সত্তাৰাসো। সন্তাৰুসো, সত্তা…পে॰… নেৰসঞ্ঞানাসঞ্ঞাযতনূপগা, অযং নৰমো সত্তাৰাসো’’তি (দী॰ নি॰ ৩.৩৪১)।
‘‘Santāvuso, sattā nānattakāyā nānattasaññino, seyyathāpi manussā ekacce ca devā ekacce ca vinipātikā, ayaṃ paṭhamo sattāvāso. Santāvuso, sattā nānattakāyā ekattasaññino, seyyathāpi, devā brahmakāyikā, paṭhamābhinibbattā, ayaṃ dutiyo sattāvāso. Santāvuso, sattā ekattakāyā nānattasaññino, seyyathāpi, devā ābhassarā, ayaṃ tatiyo sattāvāso. Santāvuso, sattā ekattakāyā ekattasaññino, seyyathāpi, devā subhakiṇhā, ayaṃ catuttho sattāvāso. Santāvuso, sattā asaññino appaṭisaṃvedino, seyyathāpi, devā asaññasattā, ayaṃ pañcamo sattāvāso. Santāvuso, sattā sabbaso rūpasaññānaṃ…pe… ākāsānañcāyatanūpagā , ayaṃ chaṭṭho sattāvāso. Santāvuso, sattā…pe… viññāṇañcāyatanūpagā, ayaṃ sattamo sattāvāso. Santāvuso, sattā…pe… ākiñcaññāyatanūpagā, ayaṃ aṭṭhamo sattāvāso. Santāvuso, sattā…pe… nevasaññānāsaññāyatanūpagā, ayaṃ navamo sattāvāso’’ti (dī. ni. 3.341).
পুরিমনযেনেৰ চেত্থ ‘‘নৰ সত্তাৰাসা’’তি ৰুত্তং, ন অঞ্ঞেসং নৰন্নমভাৰতো। যথাহ –
Purimanayeneva cettha ‘‘nava sattāvāsā’’ti vuttaṃ, na aññesaṃ navannamabhāvato. Yathāha –
‘‘নৰসু, ভিক্খৰে, ধম্মেসু ভিক্খু সম্মা নিব্বিন্দমানো…পে॰… দুক্খস্সন্তকরো হোতি। কতমেসু নৰসু? নৰসু সত্তাৰাসেসু। ইমেসু খো, ভিক্খৰে, নৰসু ধম্মেসু ভিক্খু সম্মা নিব্বিন্দমানো…পে॰… দুক্খস্সন্তকরো হোতি। ‘নৰ পঞ্হা , নৰ উদ্দেসা, নৰ ৰেয্যাকরণানী’তি ইতি যং তং ৰুত্তং, ইদমেতং পটিচ্চ ৰুত্ত’’ন্তি (অ॰ নি॰ ১০.২৭)।
‘‘Navasu, bhikkhave, dhammesu bhikkhu sammā nibbindamāno…pe… dukkhassantakaro hoti. Katamesu navasu? Navasu sattāvāsesu. Imesu kho, bhikkhave, navasu dhammesu bhikkhu sammā nibbindamāno…pe… dukkhassantakaro hoti. ‘Nava pañhā , nava uddesā, nava veyyākaraṇānī’ti iti yaṃ taṃ vuttaṃ, idametaṃ paṭicca vutta’’nti (a. ni. 10.27).
এত্থ চ ‘‘নৰ ধম্মা পরিঞ্ঞেয্যা। কতমে নৰ? নৰ সত্তাৰাসা’’তি (দী॰ নি॰ ৩.৩৫৯) ৰচনতো নৰসু সত্তাৰাসেসু ঞাতপরিঞ্ঞায ধুৰসুভসুখত্তভাৰদস্সনং পহায সুদ্ধসঙ্খারপুঞ্জমত্তদস্সনেন নিব্বিন্দমানো তীরণপরিঞ্ঞায অনিচ্চানুপস্সনেন ৰিরজ্জমানো দুক্খানুপস্সনেন ৰিমুচ্চমানো অনত্তানুপস্সনেন সম্মা পরিযন্তদস্সাৰী পহানপরিঞ্ঞায সম্মত্তমভিসমেচ্চ দিট্ঠেৰ ধম্মে দুক্খস্সন্তকরো হোতি। তেনেতং ৰুত্তং –
Ettha ca ‘‘nava dhammā pariññeyyā. Katame nava? Nava sattāvāsā’’ti (dī. ni. 3.359) vacanato navasu sattāvāsesu ñātapariññāya dhuvasubhasukhattabhāvadassanaṃ pahāya suddhasaṅkhārapuñjamattadassanena nibbindamāno tīraṇapariññāya aniccānupassanena virajjamāno dukkhānupassanena vimuccamāno anattānupassanena sammā pariyantadassāvī pahānapariññāya sammattamabhisamecca diṭṭheva dhamme dukkhassantakaro hoti. Tenetaṃ vuttaṃ –
‘‘নৰসু, ভিক্খৰে, ধম্মেসু ভিক্খু সম্মা নিব্বিন্দমানো…পে॰… দিট্ঠেৰ ধম্মে দুক্খস্সন্তকরো হোতি। কতমেসু নৰসু? নৰসু সত্তাৰাসেসূ’’তি (অ॰ নি॰ ১০.২৭)।
‘‘Navasu, bhikkhave, dhammesu bhikkhu sammā nibbindamāno…pe… diṭṭheva dhamme dukkhassantakaro hoti. Katamesu navasu? Navasu sattāvāsesū’’ti (a. ni. 10.27).
দস নাম কিন্তিপঞ্হৰণ্ণনা
Dasa nāma kintipañhavaṇṇanā
এৰং ইমিনাপি পঞ্হব্যাকরণেন আরদ্ধচিত্তো সত্থা উত্তরিং পঞ্হং পুচ্ছতি দস নাম কিন্তি? তত্থ কিঞ্চাপি ইমস্স পঞ্হস্স ইতো অঞ্ঞত্র ৰেয্যাকরণেসু দস অকুসলকম্মপথা ৰুত্তা। যথাহ –
Evaṃ imināpi pañhabyākaraṇena āraddhacitto satthā uttariṃ pañhaṃ pucchati dasa nāma kinti? Tattha kiñcāpi imassa pañhassa ito aññatra veyyākaraṇesu dasa akusalakammapathā vuttā. Yathāha –
‘‘দসসু, ভিক্খৰে, ধম্মেসু ভিক্খু সম্মা নিব্বিন্দমানো…পে॰… দুক্খস্সন্তকরো হোতি। কতমেসু দসসু? দসসু অকুসলকম্মপথেসু। ইমেসু খো, ভিক্খৰে, দসসু ধম্মেসু ভিক্খু সম্মা নিব্বিন্দমানো…পে॰ … দুক্খস্সন্তকরো হোতি। ‘দস পঞ্হা দস উদ্দেসা দস ৰেয্যাকরণানী’তি ইতি যং তং ৰুত্তং, ইদমেতং পটিচ্চ ৰুত্ত’’ন্তি (অ॰ নি॰ ১০.২৭)।
‘‘Dasasu, bhikkhave, dhammesu bhikkhu sammā nibbindamāno…pe… dukkhassantakaro hoti. Katamesu dasasu? Dasasu akusalakammapathesu. Imesu kho, bhikkhave, dasasu dhammesu bhikkhu sammā nibbindamāno…pe. … dukkhassantakaro hoti. ‘Dasa pañhā dasa uddesā dasa veyyākaraṇānī’ti iti yaṃ taṃ vuttaṃ, idametaṃ paṭicca vutta’’nti (a. ni. 10.27).
ইধ পন যস্মা অযমাযস্মা অত্তানং অনুপনেত্ৰা অঞ্ঞং ব্যাকাতুকামো, যস্মা ৰা ইমিনা পরিযাযেন ব্যাকতং সুব্যাকতমেৰ হোতি, তস্মা যেহি দসহি অঙ্গেহি সমন্নাগতো অরহাতি পৰুচ্চতি, তেসং অধিগমং দীপেন্তো দসহঙ্গেহি সমন্নাগতো অরহাতি পৰুচ্চতীতি পুগ্গলাধিট্ঠানায দেসনায ৰিস্সজ্জেতি। যতো এত্থ যেহি দসহি অঙ্গেহি সমন্নাগতো অরহাতি পৰুচ্চতি, তানি দসঙ্গানি ‘‘দস নাম কি’’ন্তি পুট্ঠেন থেরেন নিদ্দিট্ঠানীতি ৰেদিতব্বানি। তানি চ দস –
Idha pana yasmā ayamāyasmā attānaṃ anupanetvā aññaṃ byākātukāmo, yasmā vā iminā pariyāyena byākataṃ subyākatameva hoti, tasmā yehi dasahi aṅgehi samannāgato arahāti pavuccati, tesaṃ adhigamaṃ dīpento dasahaṅgehi samannāgato arahāti pavuccatīti puggalādhiṭṭhānāya desanāya vissajjeti. Yato ettha yehi dasahi aṅgehi samannāgato arahāti pavuccati, tāni dasaṅgāni ‘‘dasa nāma ki’’nti puṭṭhena therena niddiṭṭhānīti veditabbāni. Tāni ca dasa –
‘‘অসেখো অসেখোতি, ভন্তে, ৰুচ্চতি, কিত্তাৰতা নু খো, ভন্তে, ভিক্খু অসেখো হোতীতি? ইধ, ভিক্খৰে, ভিক্খু অসেখায সম্মাদিট্ঠিযা সমন্নাগতো হোতি, অসেখেন সম্মাসঙ্কপ্পেন সমন্নাগতো হোতি, অসেখায সম্মাৰাচায সমন্নাগতো হোতি, অসেখেন সম্মাকম্মন্তেন সমন্নাগতো হোতি, অসেখেন সম্মাআজীৰেন সমন্নাগতো হোতি, অসেখেন সম্মাৰাযামেন সমন্নাগতো হোতি, অসেখায সম্মাসতিযা সমন্নাগতো হোতি, অসেখেন সম্মাসমাধিনা সমন্নাগতো হোতি, অসেখেন সম্মাঞাণেন সমন্নাগতো হোতি, অসেখায সম্মাৰিমুত্তিযা সমন্নাগতো হোতি। এৰং খো, ভিক্খৰে, ভিক্খু অসেখো হোতী’’তি (অ॰ নি॰ ১০.১১১)। –
‘‘Asekho asekhoti, bhante, vuccati, kittāvatā nu kho, bhante, bhikkhu asekho hotīti? Idha, bhikkhave, bhikkhu asekhāya sammādiṭṭhiyā samannāgato hoti, asekhena sammāsaṅkappena samannāgato hoti, asekhāya sammāvācāya samannāgato hoti, asekhena sammākammantena samannāgato hoti, asekhena sammāājīvena samannāgato hoti, asekhena sammāvāyāmena samannāgato hoti, asekhāya sammāsatiyā samannāgato hoti, asekhena sammāsamādhinā samannāgato hoti, asekhena sammāñāṇena samannāgato hoti, asekhāya sammāvimuttiyā samannāgato hoti. Evaṃ kho, bhikkhave, bhikkhu asekho hotī’’ti (a. ni. 10.111). –
এৰমাদীসু সুত্তেসু ৰুত্তনযেনেৰ ৰেদিতব্বানীতি।
Evamādīsu suttesu vuttanayeneva veditabbānīti.
পরমত্থজোতিকায খুদ্দকপাঠ-অট্ঠকথায
Paramatthajotikāya khuddakapāṭha-aṭṭhakathāya
কুমারপঞ্হৰণ্ণনা নিট্ঠিতা।
Kumārapañhavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / খুদ্দকপাঠপাল়ি • Khuddakapāṭhapāḷi / ৪. কুমারপঞ্হা • 4. Kumārapañhā
