Library / Tipiṭaka / д̇ибидага • Tipiṭaka / куд̣̇д̣̇агабаата-адтагат̇аа • Khuddakapāṭha-aṭṭhakathā

    4. гумаарабан̃хаван̣н̣анаа

    4. Kumārapañhavaṇṇanā

    адтуббад̇д̇и

    Aṭṭhuppatti

    ид̣̇аани згам̣ наама гинд̇и звамаад̣̇ийнам̣ гумаарабан̃хаанам̣ ад̇т̇аван̣н̣анааггамо ануббад̇д̇о. д̇зсам̣ адтуббад̇д̇им̣ ид̇ха нигкзбаббаяож̇анан̃жа вад̇ваа ван̣н̣анам̣ гариссаама –

    Idāni ekaṃ nāma kinti evamādīnaṃ kumārapañhānaṃ atthavaṇṇanākkamo anuppatto. Tesaṃ aṭṭhuppattiṃ idha nikkhepappayojanañca vatvā vaṇṇanaṃ karissāma –

    адтуббад̇д̇и д̇аава нзсам̣ собааго наама бхаг̇авад̇о махаасааваго ахоси. д̇знааяасмад̇аа ж̇аад̇ияаа сад̇д̇авассзнзва ан̃н̃аа аараад̇хид̇аа, д̇асса бхаг̇аваа бан̃хаб̣яаагаран̣зна убасамбад̣̇ам̣ анун̃н̃аад̇угаамо ад̇д̇анаа ад̇хиббзд̇ад̇т̇аанам̣ бан̃хаанам̣ б̣яаагаран̣асамад̇т̇ад̇ам̣ бассанд̇о ‘‘згам̣ наама ги’’нд̇и звамаад̣̇инаа бан̃хз бужчи. со б̣яаагааси. д̇зна жа б̣яаагаран̣зна бхаг̇авад̇о жид̇д̇ам̣ аараад̇хзси. саава д̇ассааяасмад̇о убасамбад̣̇аа ахоси.

    Aṭṭhuppatti tāva nesaṃ sopāko nāma bhagavato mahāsāvako ahosi. Tenāyasmatā jātiyā sattavasseneva aññā ārādhitā, tassa bhagavā pañhabyākaraṇena upasampadaṃ anuññātukāmo attanā adhippetatthānaṃ pañhānaṃ byākaraṇasamatthataṃ passanto ‘‘ekaṃ nāma ki’’nti evamādinā pañhe pucchi. So byākāsi. Tena ca byākaraṇena bhagavato cittaṃ ārādhesi. Sāva tassāyasmato upasampadā ahosi.

    аяам̣ д̇зсам̣ адтуббад̇д̇и.

    Ayaṃ tesaṃ aṭṭhuppatti.

    нигкзбаббаяож̇анам̣

    Nikkhepappayojanaṃ

    яасмаа бана саран̣аг̇аманзхи б̣уд̣̇д̇хад̇хаммасан̇гхаануссад̇ивасзна жид̇д̇абхааванаа, сигкаабад̣̇зхи сийлабхааванаа, д̣̇вад̇д̇им̣саагаарзна жа гааяабхааванаа багаасид̇аа, д̇асмаа ид̣̇аани наанаббагаарад̇о бан̃н̃аабхааванаамукад̣̇ассанад̇т̇ам̣ имз бан̃хаб̣яаагаран̣аа ид̇ха нигкид̇д̇аа. яасмаа ваа сийлабад̣̇адтаано самаад̇хи, самаад̇хибад̣̇адтаанаа жа бан̃н̃аа; яат̇ааха – ‘‘сийлз бад̇идтааяа наро сабан̃н̃о, жид̇д̇ам̣ бан̃н̃ан̃жа бхааваяа’’нд̇и (сам̣. ни. 1.23, 192), д̇асмаа сигкаабад̣̇зхи сийлам̣ д̣̇вад̇д̇им̣саагаарзна д̇ам̣г̇ожарам̣ самаад̇хин̃жа д̣̇ассзд̇ваа самаахид̇ажид̇д̇асса наанаад̇хаммабаригкаарааяа бан̃н̃ааяа бабхзд̣̇ад̣̇ассанад̇т̇ам̣ ид̇ха нигкид̇д̇аад̇иби вин̃н̃аад̇аб̣б̣аа.

    Yasmā pana saraṇagamanehi buddhadhammasaṅghānussativasena cittabhāvanā, sikkhāpadehi sīlabhāvanā, dvattiṃsākārena ca kāyabhāvanā pakāsitā, tasmā idāni nānappakārato paññābhāvanāmukhadassanatthaṃ ime pañhabyākaraṇā idha nikkhittā. Yasmā vā sīlapadaṭṭhāno samādhi, samādhipadaṭṭhānā ca paññā; yathāha – ‘‘sīle patiṭṭhāya naro sapañño, cittaṃ paññañca bhāvaya’’nti (saṃ. ni. 1.23, 192), tasmā sikkhāpadehi sīlaṃ dvattiṃsākārena taṃgocaraṃ samādhiñca dassetvā samāhitacittassa nānādhammaparikkhārāya paññāya pabhedadassanatthaṃ idha nikkhittātipi viññātabbā.

    ид̣̇ам̣ д̇зсам̣ ид̇ха нигкзбаббаяож̇анам̣.

    Idaṃ tesaṃ idha nikkhepappayojanaṃ.

    бан̃хаван̣н̣анаа

    Pañhavaṇṇanā

    згам̣ наама гинд̇ибан̃хаван̣н̣анаа

    Ekaṃ nāma kintipañhavaṇṇanā

    ид̣̇аани д̇зсам̣ ад̇т̇аван̣н̣анаа ход̇и – згам̣ наама гинд̇и бхаг̇аваа яасмим̣ згад̇хаммасмим̣ бхигку саммаа ниб̣б̣инд̣̇амаано анубуб̣б̣зна д̣̇угкассанд̇агаро ход̇и, яасмим̣ жааяамааяасмаа ниб̣б̣инд̣̇амаано анубуб̣б̣зна д̣̇угкассанд̇амагааси, д̇ам̣ д̇хаммам̣ санд̇хааяа бан̃хам̣ бужчад̇и. ‘‘саб̣б̣з сад̇д̇аа аахаарадтид̇игаа’’д̇и т̇зро буг̇г̇алаад̇хидтаанааяа д̣̇зсанааяа виссаж̇ж̇зд̇и. ‘‘гад̇амаа жа, бхигкавз, саммаасад̇и? ид̇ха, бхигкавз, бхигку гааяз гааяаанубассий вихарад̇ий’’д̇и (сам̣. ни. 5.8) звамаад̣̇ийни жзд̇т̇а суд̇д̇аани звам̣ виссаж̇ж̇анаяуд̇д̇исамбхавз саад̇хагаани. зд̇т̇а язнаахаарзна саб̣б̣з сад̇д̇аа ‘‘аахаарадтид̇игаа’’д̇и вужжанд̇и, со аахааро д̇ам̣ ваа нзсам̣ аахаарадтид̇игад̇д̇ам̣ ‘‘згам̣ наама ги’’нд̇и будтзна т̇зрзна нид̣̇д̣̇идтанд̇и взд̣̇ид̇аб̣б̣ам̣. д̇ан̃хи бхаг̇авад̇аа ид̇ха зганд̇и ад̇хиббзд̇ам̣, на д̇у саасанз логз ваа ан̃н̃ам̣ згам̣ наама над̇т̇ийд̇и н̃аабзд̇ум̣ вуд̇д̇ам̣. вуд̇д̇ан̃хзд̇ам̣ бхаг̇авад̇аа –

    Idāni tesaṃ atthavaṇṇanā hoti – ekaṃ nāma kinti bhagavā yasmiṃ ekadhammasmiṃ bhikkhu sammā nibbindamāno anupubbena dukkhassantakaro hoti, yasmiṃ cāyamāyasmā nibbindamāno anupubbena dukkhassantamakāsi, taṃ dhammaṃ sandhāya pañhaṃ pucchati. ‘‘Sabbe sattā āhāraṭṭhitikā’’ti thero puggalādhiṭṭhānāya desanāya vissajjeti. ‘‘Katamā ca, bhikkhave, sammāsati? Idha, bhikkhave, bhikkhu kāye kāyānupassī viharatī’’ti (saṃ. ni. 5.8) evamādīni cettha suttāni evaṃ vissajjanayuttisambhave sādhakāni. Ettha yenāhārena sabbe sattā ‘‘āhāraṭṭhitikā’’ti vuccanti, so āhāro taṃ vā nesaṃ āhāraṭṭhitikattaṃ ‘‘ekaṃ nāma ki’’nti puṭṭhena therena niddiṭṭhanti veditabbaṃ. Tañhi bhagavatā idha ekanti adhippetaṃ, na tu sāsane loke vā aññaṃ ekaṃ nāma natthīti ñāpetuṃ vuttaṃ. Vuttañhetaṃ bhagavatā –

    ‘‘згад̇хаммз, бхигкавз, бхигку саммаа ниб̣б̣инд̣̇амаано саммаа вираж̇ж̇амаано саммаа вимужжамаано саммаа барияанд̇ад̣̇ассаавий саммад̇д̇ам̣ абхисамзжжа д̣̇идтзва д̇хаммз д̣̇угкассанд̇агаро ход̇и. гад̇амасмим̣ згад̇хаммз? саб̣б̣з сад̇д̇аа аахаарадтид̇игаа. имасмим̣ ко, бхигкавз, згад̇хаммз бхигку саммаа ниб̣б̣инд̣̇амаано…бз… д̣̇угкассанд̇агаро ход̇и. ‘зго бан̃хо зго уд̣̇д̣̇зсо згам̣ взяяаагаран̣а’нд̇и ид̇и яам̣ д̇ам̣ вуд̇д̇ам̣, ид̣̇амзд̇ам̣ бадижжа вуд̇д̇а’’нд̇и (а. ни. 10.27).

    ‘‘Ekadhamme, bhikkhave, bhikkhu sammā nibbindamāno sammā virajjamāno sammā vimuccamāno sammā pariyantadassāvī sammattaṃ abhisamecca diṭṭheva dhamme dukkhassantakaro hoti. Katamasmiṃ ekadhamme? Sabbe sattā āhāraṭṭhitikā. Imasmiṃ kho, bhikkhave, ekadhamme bhikkhu sammā nibbindamāno…pe… dukkhassantakaro hoti. ‘Eko pañho eko uddeso ekaṃ veyyākaraṇa’nti iti yaṃ taṃ vuttaṃ, idametaṃ paṭicca vutta’’nti (a. ni. 10.27).

    аахаарадтид̇игаад̇и жзд̇т̇а яат̇аа ‘‘ад̇т̇и, бхигкавз, субханимид̇д̇ам̣. д̇ад̇т̇а аяонисо манасигаараб̣ахулийгааро, аяамаахааро ануббаннасса ваа гаамажчанд̣̇асса уббаад̣̇ааяаа’’д̇и звамаад̣̇ийсу (сам̣. ни. 5.232) бажжаяо аахаарод̇и вужжад̇и, звам̣ бажжаяам̣ аахаарасад̣̇д̣̇зна г̇ахзд̇ваа бажжаяадтид̇игаа ‘‘аахаарадтид̇игаа’’д̇и вуд̇д̇аа. жад̇д̇ааро бана аахаарз санд̇хааяа – ‘‘аахаарадтид̇игаа’’д̇и вужжамаанз ‘‘асан̃н̃асад̇д̇аа д̣̇зваа ахзд̇угаа анаахаараа апассагаа авзд̣̇анагаа’’д̇и важанад̇о (вибха. 1017) ‘‘саб̣б̣з’’д̇и важанамаяуд̇д̇ам̣ бхавзяяа.

    Āhāraṭṭhitikāti cettha yathā ‘‘atthi, bhikkhave, subhanimittaṃ. Tattha ayoniso manasikārabahulīkāro, ayamāhāro anuppannassa vā kāmacchandassa uppādāyā’’ti evamādīsu (saṃ. ni. 5.232) paccayo āhāroti vuccati, evaṃ paccayaṃ āhārasaddena gahetvā paccayaṭṭhitikā ‘‘āhāraṭṭhitikā’’ti vuttā. Cattāro pana āhāre sandhāya – ‘‘āhāraṭṭhitikā’’ti vuccamāne ‘‘asaññasattā devā ahetukā anāhārā aphassakā avedanakā’’ti vacanato (vibha. 1017) ‘‘sabbe’’ti vacanamayuttaṃ bhaveyya.

    д̇ад̇т̇а сияаа – звамби вужжамаанз ‘‘гад̇амз д̇хаммаа сабажжаяаа? бан̃жагканд̇хаа – руубагканд̇хо…бз… вин̃н̃аан̣агканд̇хо’’д̇и (д̇ха. са. 1089) важанад̇о канд̇хаанам̣язва бажжаяадтид̇игад̇д̇ам̣ яуд̇д̇ам̣, сад̇д̇аананд̇у аяуд̇д̇амзвзд̇ам̣ важанам̣ бхавзяяаад̇и. на ко банзд̇ам̣ звам̣ д̣̇адтаб̣б̣ам̣. гасмаа ? сад̇д̇зсу канд̇хобажаарасид̣̇д̇хид̇о. сад̇д̇зсу хи канд̇хобажааро сид̣̇д̇хо. гасмаа? канд̇хз убаад̣̇ааяа бан̃н̃аабзд̇аб̣б̣ад̇о. гат̇ам̣? г̇зхз г̇аамобажааро вияа. сзяяат̇ааби хи г̇зхаани убаад̣̇ааяа бан̃н̃аабзд̇аб̣б̣ад̇д̇аа г̇аамасса згасмимби д̣̇вийсу д̇ийсуби ваа г̇зхзсу д̣̇ад̣дхзсу ‘‘г̇аамо д̣̇ад̣дхо’’д̇и звам̣ г̇зхз г̇аамобажааро сид̣̇д̇хо, звамзва канд̇хзсу бажжаяадтзна аахаарадтид̇игзсу ‘‘сад̇д̇аа аахаарадтид̇игаа’’д̇и аяам̣ убажааро сид̣̇д̇ход̇и взд̣̇ид̇аб̣б̣о. барамад̇т̇ад̇о жа канд̇хзсу ж̇ааяамаанзсу ж̇ийяамаанзсу мийяамаанзсу жа ‘‘кан̣з кан̣з д̇вам̣ бхигку ж̇ааяасз жа ж̇ийяасз жа мийяасз жаа’’д̇и вад̣̇ад̇аа бхаг̇авад̇аа д̇зсу сад̇д̇зсу канд̇хобажааро сид̣̇д̇ход̇и д̣̇ассид̇о зваад̇и взд̣̇ид̇аб̣б̣о. яад̇о язна бажжаяаакязна аахаарзна саб̣б̣з сад̇д̇аа д̇идтанд̇и, со аахааро д̇ам̣ ваа нзсам̣ аахаарадтид̇игад̇д̇ам̣ зганд̇и взд̣̇ид̇аб̣б̣ам̣. аахааро хи аахаарадтид̇игад̇д̇ам̣ ваа анижжад̇аагааран̣ад̇о ниб̣б̣ид̣̇аадтаанам̣ ход̇и. ат̇а д̇зсу саб̣б̣асад̇д̇асан̃н̃ид̇зсу сан̇каарзсу анижжад̇аад̣̇ассанзна ниб̣б̣инд̣̇амаано анубуб̣б̣зна д̣̇угкассанд̇агаро ход̇и, барамад̇т̇ависуд̣̇д̇хим̣ баабун̣аад̇и. яат̇ааха –

    Tattha siyā – evampi vuccamāne ‘‘katame dhammā sapaccayā? Pañcakkhandhā – rūpakkhandho…pe… viññāṇakkhandho’’ti (dha. sa. 1089) vacanato khandhānaṃyeva paccayaṭṭhitikattaṃ yuttaṃ, sattānantu ayuttamevetaṃ vacanaṃ bhaveyyāti. Na kho panetaṃ evaṃ daṭṭhabbaṃ. Kasmā ? Sattesu khandhopacārasiddhito. Sattesu hi khandhopacāro siddho. Kasmā? Khandhe upādāya paññāpetabbato. Kathaṃ? Gehe gāmopacāro viya. Seyyathāpi hi gehāni upādāya paññāpetabbattā gāmassa ekasmimpi dvīsu tīsupi vā gehesu daḍḍhesu ‘‘gāmo daḍḍho’’ti evaṃ gehe gāmopacāro siddho, evameva khandhesu paccayaṭṭhena āhāraṭṭhitikesu ‘‘sattā āhāraṭṭhitikā’’ti ayaṃ upacāro siddhoti veditabbo. Paramatthato ca khandhesu jāyamānesu jīyamānesu mīyamānesu ca ‘‘khaṇe khaṇe tvaṃ bhikkhu jāyase ca jīyase ca mīyase cā’’ti vadatā bhagavatā tesu sattesu khandhopacāro siddhoti dassito evāti veditabbo. Yato yena paccayākhyena āhārena sabbe sattā tiṭṭhanti, so āhāro taṃ vā nesaṃ āhāraṭṭhitikattaṃ ekanti veditabbaṃ. Āhāro hi āhāraṭṭhitikattaṃ vā aniccatākāraṇato nibbidāṭṭhānaṃ hoti. Atha tesu sabbasattasaññitesu saṅkhāresu aniccatādassanena nibbindamāno anupubbena dukkhassantakaro hoti, paramatthavisuddhiṃ pāpuṇāti. Yathāha –

    ‘‘саб̣б̣з сан̇каараа анижжаад̇и, яад̣̇аа бан̃н̃ааяа бассад̇и;

    ‘‘Sabbe saṅkhārā aniccāti, yadā paññāya passati;

    ат̇а ниб̣б̣инд̣̇ад̇и д̣̇угкз, зса маг̇г̇о висуд̣̇д̇хияаа’’д̇и. (д̇ха. ба. 277);

    Atha nibbindati dukkhe, esa maggo visuddhiyā’’ti. (dha. pa. 277);

    зд̇т̇а жа ‘‘згам̣ наама ги’’нд̇и жа ‘‘гихаа’’д̇и жа д̣̇увид̇хо баато, д̇ад̇т̇а сийхал̣аанам̣ гихаад̇и баато. д̇з хи ‘‘ги’’нд̇и вад̇д̇аб̣б̣з ‘‘гихаа’’д̇и вад̣̇анд̇и. гзжи бхан̣анд̇и ‘‘ха-ид̇и нибаад̇о, т̇зрияаанамби аяамзва баато’’д̇и убхаяат̇ааби бана згова ад̇т̇о. яат̇аа ружжад̇и, д̇ат̇аа батид̇аб̣б̣ам̣. яат̇аа бана ‘‘сукзна пудто ат̇а ваа д̣̇укзна (д̇ха. ба. 83), д̣̇угкам̣ д̣̇оманассам̣ бадисам̣взд̣̇зд̇ий’’д̇и звамаад̣̇ийсу гад̇т̇ажи д̣̇уканд̇и жа гад̇т̇ажи д̣̇угканд̇и жа вужжад̇и, звам̣ гад̇т̇ажи зганд̇и, гад̇т̇ажи згганд̇и вужжад̇и. ид̇ха бана згам̣ наамаад̇и аяамзва баато.

    Ettha ca ‘‘ekaṃ nāma ki’’nti ca ‘‘kihā’’ti ca duvidho pāṭho, tattha sīhaḷānaṃ kihāti pāṭho. Te hi ‘‘ki’’nti vattabbe ‘‘kihā’’ti vadanti. Keci bhaṇanti ‘‘ha-iti nipāto, theriyānampi ayameva pāṭho’’ti ubhayathāpi pana ekova attho. Yathā ruccati, tathā paṭhitabbaṃ. Yathā pana ‘‘sukhena phuṭṭho atha vā dukhena (dha. pa. 83), dukkhaṃ domanassaṃ paṭisaṃvedetī’’ti evamādīsu katthaci dukhanti ca katthaci dukkhanti ca vuccati, evaṃ katthaci ekanti, katthaci ekkanti vuccati. Idha pana ekaṃ nāmāti ayameva pāṭho.

    д̣̇вз наама гинд̇ибан̃хаван̣н̣анаа

    Dve nāma kintipañhavaṇṇanā

    звам̣ иминаа бан̃хаб̣яаагаран̣зна аарад̣̇д̇хажид̇д̇о сад̇т̇аа буриманаязнзва уд̇д̇арим̣ бан̃хам̣ бужчад̇и д̣̇вз наама гинд̇и? т̇зро д̣̇взд̇и бажжанубхаасид̇ваа ‘‘нааман̃жа руубан̃жаа’’д̇и д̇хаммаад̇хидтаанааяа д̣̇зсанааяа виссаж̇ж̇зд̇и. д̇ад̇т̇а аарамман̣аабхимукам̣ наманад̇о, жид̇д̇асса жа над̇ихзд̇уд̇о саб̣б̣амби аруубам̣ ‘‘наама’’нд̇и вужжад̇и. ид̇ха бана ниб̣б̣ид̣̇аахзд̇уд̇д̇аа саасавад̇хаммамзва ад̇хиббзд̇ам̣ руббанадтзна жад̇д̇ааро жа махаабхууд̇аа, саб̣б̣ан̃жа д̇ад̣̇убаад̣̇ааяа бавад̇д̇амаанам̣ руубам̣ ‘‘рууба’’нд̇и вужжад̇и, д̇ам̣ саб̣б̣амби ид̇хаад̇хиббзд̇ам̣. ад̇хиббааяавасзнзва жзд̇т̇а ‘‘д̣̇вз наама нааман̃жа руубан̃жаа’’д̇и вуд̇д̇ам̣, на ан̃н̃зсам̣ д̣̇виннамабхаавад̇о. яат̇ааха –

    Evaṃ iminā pañhabyākaraṇena āraddhacitto satthā purimanayeneva uttariṃ pañhaṃ pucchati dve nāma kinti? Thero dveti paccanubhāsitvā ‘‘nāmañca rūpañcā’’ti dhammādhiṭṭhānāya desanāya vissajjeti. Tattha ārammaṇābhimukhaṃ namanato, cittassa ca natihetuto sabbampi arūpaṃ ‘‘nāma’’nti vuccati. Idha pana nibbidāhetuttā sāsavadhammameva adhippetaṃ ruppanaṭṭhena cattāro ca mahābhūtā, sabbañca tadupādāya pavattamānaṃ rūpaṃ ‘‘rūpa’’nti vuccati, taṃ sabbampi idhādhippetaṃ. Adhippāyavaseneva cettha ‘‘dve nāma nāmañca rūpañcā’’ti vuttaṃ, na aññesaṃ dvinnamabhāvato. Yathāha –

    ‘‘д̣̇вийсу , бхигкавз, д̇хаммзсу бхигку саммаа ниб̣б̣инд̣̇амаано…бз… д̣̇угкассанд̇агаро ход̇и. гад̇амзсу д̣̇вийсу? наамз жа руубз жа. имзсу ко, бхигкавз, д̣̇вийсу д̇хаммзсу бхигку саммаа ниб̣б̣инд̣̇амаано…бз… д̣̇угкассанд̇агаро ход̇и. ‘д̣̇вз бан̃хаа, д̣̇вз уд̣̇д̣̇зсаа, д̣̇вз взяяаагаран̣ааний’д̇и ид̇и яам̣ д̇ам̣ вуд̇д̇ам̣, ид̣̇амзд̇ам̣ бадижжа вуд̇д̇а’’нд̇и (а. ни. 10.27).

    ‘‘Dvīsu , bhikkhave, dhammesu bhikkhu sammā nibbindamāno…pe… dukkhassantakaro hoti. Katamesu dvīsu? Nāme ca rūpe ca. Imesu kho, bhikkhave, dvīsu dhammesu bhikkhu sammā nibbindamāno…pe… dukkhassantakaro hoti. ‘Dve pañhā, dve uddesā, dve veyyākaraṇānī’ti iti yaṃ taṃ vuttaṃ, idametaṃ paṭicca vutta’’nti (a. ni. 10.27).

    зд̇т̇а жа наамаруубамад̇д̇ад̣̇ассанзна ад̇д̇ад̣̇идтим̣ бахааяа анад̇д̇аанубассанаамукзнзва ниб̣б̣инд̣̇амаано анубуб̣б̣зна д̣̇угкассанд̇агаро ход̇и, барамад̇т̇ависуд̣̇д̇хим̣ баабун̣аад̇ийд̇и взд̣̇ид̇аб̣б̣о. яат̇ааха –

    Ettha ca nāmarūpamattadassanena attadiṭṭhiṃ pahāya anattānupassanāmukheneva nibbindamāno anupubbena dukkhassantakaro hoti, paramatthavisuddhiṃ pāpuṇātīti veditabbo. Yathāha –

    ‘‘саб̣б̣з д̇хаммаа анад̇д̇аад̇и, яад̣̇аа бан̃н̃ааяа бассад̇и;

    ‘‘Sabbe dhammā anattāti, yadā paññāya passati;

    ат̇а ниб̣б̣инд̣̇ад̇и д̣̇угкз, зса маг̇г̇о висуд̣̇д̇хияаа’’д̇и. (д̇ха. ба. 279);

    Atha nibbindati dukkhe, esa maggo visuddhiyā’’ti. (dha. pa. 279);

    д̇ийн̣и наама гинд̇ибан̃хаван̣н̣анаа

    Tīṇi nāma kintipañhavaṇṇanā

    ид̣̇аани иминааби бан̃хаб̣яаагаран̣зна аарад̣̇д̇хажид̇д̇о сад̇т̇аа буриманаязнзва уд̇д̇арим̣ бан̃хам̣ бужчад̇и д̇ийн̣и наама гинд̇и? т̇зро д̇ийн̣ийд̇и бажжанубхаасид̇ваа буна б̣яаагарид̇аб̣б̣асса ад̇т̇асса лин̇г̇аануруубам̣ сан̇кяам̣ д̣̇ассзнд̇о ‘‘д̇иссо взд̣̇анаа’’д̇и виссаж̇ж̇зд̇и. ат̇а ваа ‘‘яаа бхаг̇авад̇аа ‘д̇иссо взд̣̇анаа’д̇и вуд̇д̇аа, имаасамад̇т̇амахам̣ д̇ийн̣ийд̇и бажжзмий’’д̇и д̣̇ассзнд̇о аахаад̇и звамбзд̇т̇а ад̇т̇о взд̣̇ид̇аб̣б̣о. анзгамукаа хи д̣̇зсанаа бадисамбхид̣̇аабабхзд̣̇зна д̣̇зсанаавилаасаббад̇д̇аанам̣. гзжи банааху ‘‘д̇ийн̣ийд̇и ад̇хигабад̣̇амид̣̇а’’нд̇и. буриманаязнзва жзд̇т̇а ‘‘д̇иссо взд̣̇анаа’’д̇и вуд̇д̇ам̣, на ан̃н̃зсам̣ д̇ин̣н̣амабхаавад̇о. яат̇ааха –

    Idāni imināpi pañhabyākaraṇena āraddhacitto satthā purimanayeneva uttariṃ pañhaṃ pucchati tīṇi nāma kinti? Thero tīṇīti paccanubhāsitvā puna byākaritabbassa atthassa liṅgānurūpaṃ saṅkhyaṃ dassento ‘‘tisso vedanā’’ti vissajjeti. Atha vā ‘‘yā bhagavatā ‘tisso vedanā’ti vuttā, imāsamatthamahaṃ tīṇīti paccemī’’ti dassento āhāti evampettha attho veditabbo. Anekamukhā hi desanā paṭisambhidāpabhedena desanāvilāsappattānaṃ. Keci panāhu ‘‘tīṇīti adhikapadamida’’nti. Purimanayeneva cettha ‘‘tisso vedanā’’ti vuttaṃ, na aññesaṃ tiṇṇamabhāvato. Yathāha –

    ‘‘д̇ийсу, бхигкавз, д̇хаммзсу бхигку саммаа ниб̣б̣инд̣̇амаано…бз… д̣̇угкассанд̇агаро ход̇и. гад̇амзсу д̇ийсу? д̇ийсу взд̣̇анаасу. имзсу ко, бхигкавз, д̇ийсу д̇хаммзсу бхигку саммаа ниб̣б̣инд̣̇амаано…бз… д̣̇угкассанд̇агаро ход̇и. ‘д̇аяо бан̃хаа, д̇аяо уд̣̇д̣̇зсаа, д̇ийн̣и взяяаагаран̣ааний’д̇и ид̇и яам̣ д̇ам̣ вуд̇д̇ам̣ , ид̣̇амзд̇ам̣ бадижжа вуд̇д̇а’’нд̇и (а. ни. 10.27).

    ‘‘Tīsu, bhikkhave, dhammesu bhikkhu sammā nibbindamāno…pe… dukkhassantakaro hoti. Katamesu tīsu? Tīsu vedanāsu. Imesu kho, bhikkhave, tīsu dhammesu bhikkhu sammā nibbindamāno…pe… dukkhassantakaro hoti. ‘Tayo pañhā, tayo uddesā, tīṇi veyyākaraṇānī’ti iti yaṃ taṃ vuttaṃ , idametaṃ paṭicca vutta’’nti (a. ni. 10.27).

    зд̇т̇а жа ‘‘яам̣гин̃жи взд̣̇аяид̇ам̣, саб̣б̣ам̣ д̇ам̣ д̣̇угкасминд̇и вад̣̇аамий’’д̇и (сам̣. ни. 4.259) вуд̇д̇асуд̇д̇аанусаарзна ваа. –

    Ettha ca ‘‘yaṃkiñci vedayitaṃ, sabbaṃ taṃ dukkhasminti vadāmī’’ti (saṃ. ni. 4.259) vuttasuttānusārena vā. –

    ‘‘яо сукам̣ д̣̇угкад̇о ад̣̇д̣̇а, д̣̇угкамад̣̇д̣̇агки саллад̇о;

    ‘‘Yo sukhaṃ dukkhato adda, dukkhamaddakkhi sallato;

    ад̣̇угкамасукам̣ санд̇ам̣, ад̣̇д̣̇агки нам̣ анижжад̇о’’д̇и. (ид̇иву. 53) –

    Adukkhamasukhaṃ santaṃ, addakkhi naṃ aniccato’’ti. (itivu. 53) –

    звам̣ д̣̇угкад̣̇угкад̇аавибарин̣аамад̣̇угкад̇аасан̇каарад̣̇угкад̇аанусаарзна ваа д̇иссаннам̣ взд̣̇анаанам̣ д̣̇угкабхаавад̣̇ассанзна сукасан̃н̃ам̣ бахааяа д̣̇угкаанубассанаамукзна ниб̣б̣инд̣̇амаано анубуб̣б̣зна д̣̇угкассанд̇агаро ход̇и, барамад̇т̇ависуд̣̇д̇хим̣ баабун̣аад̇ийд̇и взд̣̇ид̇аб̣б̣о. яат̇ааха –

    Evaṃ dukkhadukkhatāvipariṇāmadukkhatāsaṅkhāradukkhatānusārena vā tissannaṃ vedanānaṃ dukkhabhāvadassanena sukhasaññaṃ pahāya dukkhānupassanāmukhena nibbindamāno anupubbena dukkhassantakaro hoti, paramatthavisuddhiṃ pāpuṇātīti veditabbo. Yathāha –

    ‘‘саб̣б̣з сан̇каараа д̣̇угкаад̇и, яад̣̇аа бан̃н̃ааяа бассад̇и;

    ‘‘Sabbe saṅkhārā dukkhāti, yadā paññāya passati;

    ат̇а ниб̣б̣инд̣̇ад̇и д̣̇угкз, зса маг̇г̇о висуд̣̇д̇хияаа’’д̇и. (д̇ха. ба. 278);

    Atha nibbindati dukkhe, esa maggo visuddhiyā’’ti. (dha. pa. 278);

    жад̇д̇аари наама гинд̇ибан̃хаван̣н̣анаа

    Cattāri nāma kintipañhavaṇṇanā

    звам̣ иминааби бан̃хаб̣яаагаран̣зна аарад̣̇д̇хажид̇д̇о сад̇т̇аа буриманаязнзва уд̇д̇арим̣ бан̃хам̣ бужчад̇и жад̇д̇аари наама гинд̇и? д̇ад̇т̇а имасса бан̃хасса б̣яаагаран̣абагкз гад̇т̇ажи буриманаязнзва жад̇д̇ааро аахаараа ад̇хиббзд̇аа. яат̇ааха –

    Evaṃ imināpi pañhabyākaraṇena āraddhacitto satthā purimanayeneva uttariṃ pañhaṃ pucchati cattāri nāma kinti? Tattha imassa pañhassa byākaraṇapakkhe katthaci purimanayeneva cattāro āhārā adhippetā. Yathāha –

    ‘‘жад̇уусу , бхигкавз, д̇хаммзсу бхигку саммаа ниб̣б̣инд̣̇амаано…бз… д̣̇угкассанд̇агаро ход̇и. гад̇амзсу жад̇уусу? жад̇уусу аахаарзсу. имзсу ко, бхигкавз, жад̇уусу д̇хаммзсу бхигку саммаа ниб̣б̣инд̣̇амаано…бз… д̣̇угкассанд̇агаро ход̇и. ‘жад̇д̇ааро бан̃хаа жад̇д̇ааро уд̣̇д̣̇зсаа жад̇д̇аари взяяаагаран̣ааний’д̇и ид̇и яам̣ д̇ам̣ вуд̇д̇ам̣, ид̣̇амзд̇ам̣ бадижжа вуд̇д̇а’’нд̇и (а. ни. 10.27).

    ‘‘Catūsu , bhikkhave, dhammesu bhikkhu sammā nibbindamāno…pe… dukkhassantakaro hoti. Katamesu catūsu? Catūsu āhāresu. Imesu kho, bhikkhave, catūsu dhammesu bhikkhu sammā nibbindamāno…pe… dukkhassantakaro hoti. ‘Cattāro pañhā cattāro uddesā cattāri veyyākaraṇānī’ti iti yaṃ taṃ vuttaṃ, idametaṃ paṭicca vutta’’nti (a. ni. 10.27).

    гад̇т̇ажи язсу субхаавид̇ажид̇д̇о анубуб̣б̣зна д̣̇угкассанд̇агаро ход̇и, д̇аани жад̇д̇аари сад̇ибадтаанаани. яат̇ааха гаж̇ан̇г̇алаа бхигкуний –

    Katthaci yesu subhāvitacitto anupubbena dukkhassantakaro hoti, tāni cattāri satipaṭṭhānāni. Yathāha kajaṅgalā bhikkhunī –

    ‘‘жад̇уусу, аавусо, д̇хаммзсу бхигку саммаа субхаавид̇ажид̇д̇о саммаа барияанд̇ад̣̇ассаавий саммад̇д̇ам̣ абхисамзжжа д̣̇идтзва д̇хаммз д̣̇угкассанд̇агаро ход̇и. гад̇амзсу жад̇уусу? жад̇уусу сад̇ибадтаанзсу. имзсу ко, аавусо, жад̇уусу д̇хаммзсу бхигку саммаа субхаавид̇ажид̇д̇о…бз… д̣̇угкассанд̇агаро ход̇и. ‘жад̇д̇ааро бан̃хаа жад̇д̇ааро уд̣̇д̣̇зсаа жад̇д̇аари взяяаагаран̣ааний’д̇и ид̇и яам̣ д̇ам̣ вуд̇д̇ам̣ бхаг̇авад̇аа, ид̣̇амзд̇ам̣ бадижжа вуд̇д̇а’’нд̇и (а. ни. 10.28).

    ‘‘Catūsu, āvuso, dhammesu bhikkhu sammā subhāvitacitto sammā pariyantadassāvī sammattaṃ abhisamecca diṭṭheva dhamme dukkhassantakaro hoti. Katamesu catūsu? Catūsu satipaṭṭhānesu. Imesu kho, āvuso, catūsu dhammesu bhikkhu sammā subhāvitacitto…pe… dukkhassantakaro hoti. ‘Cattāro pañhā cattāro uddesā cattāri veyyākaraṇānī’ti iti yaṃ taṃ vuttaṃ bhagavatā, idametaṃ paṭicca vutta’’nti (a. ni. 10.28).

    ид̇ха бана язсам̣ жад̇уннам̣ ануб̣од̇хаббадивзд̇хад̇о бхавад̇ан̣хаачзд̣̇о ход̇и, яасмаа д̇аани жад̇д̇аари арияасажжаани ад̇хиббзд̇аани. яасмаа ваа иминаа барияааязна б̣яаагад̇ам̣ суб̣яаагад̇амзва ход̇и, д̇асмаа т̇зро жад̇д̇аарийд̇и бажжанубхаасид̇ваа ‘‘арияасажжааний’’д̇и виссаж̇ж̇зд̇и. д̇ад̇т̇а жад̇д̇аарийд̇и г̇ан̣анабарижчзд̣̇о. арияасажжаанийд̇и арияаани сажжаани, авид̇ат̇аани ависам̣ваад̣̇агаанийд̇и ад̇т̇о. яат̇ааха –

    Idha pana yesaṃ catunnaṃ anubodhappaṭivedhato bhavataṇhāchedo hoti, yasmā tāni cattāri ariyasaccāni adhippetāni. Yasmā vā iminā pariyāyena byākataṃ subyākatameva hoti, tasmā thero cattārīti paccanubhāsitvā ‘‘ariyasaccānī’’ti vissajjeti. Tattha cattārīti gaṇanaparicchedo. Ariyasaccānīti ariyāni saccāni, avitathāni avisaṃvādakānīti attho. Yathāha –

    ‘‘имаани ко, бхигкавз, жад̇д̇аари арияасажжаани д̇ат̇аани авид̇ат̇аани анан̃н̃ат̇аани, д̇асмаа арияасажжаанийд̇и вужжанд̇ий’’д̇и (сам̣. ни. 5.1097).

    ‘‘Imāni kho, bhikkhave, cattāri ariyasaccāni tathāni avitathāni anaññathāni, tasmā ariyasaccānīti vuccantī’’ti (saṃ. ni. 5.1097).

    яасмаа ваа сад̣̇звагзна логзна аран̣ийяад̇о абхиг̇аманийяад̇од̇и вуд̇д̇ам̣ ход̇и, вааяамид̇аб̣б̣адтаанасан̃н̃ид̇з аяз ваа ирияанад̇о, анаяз ваа на ирияанад̇о, сад̇д̇ад̇им̣саб̣од̇хибагкияаарияад̇хаммасамааяог̇ад̇о ваа арияасаммад̇аа б̣уд̣̇д̇хабажжзгаб̣уд̣̇д̇хаб̣уд̣̇д̇хасаавагаа зд̇аани бадивиж̇жханд̇и, д̇асмааби ‘‘арияасажжааний’’д̇и вужжанд̇и. яат̇ааха –

    Yasmā vā sadevakena lokena araṇīyato abhigamanīyatoti vuttaṃ hoti, vāyamitabbaṭṭhānasaññite aye vā iriyanato, anaye vā na iriyanato, sattatiṃsabodhipakkhiyaariyadhammasamāyogato vā ariyasammatā buddhapaccekabuddhabuddhasāvakā etāni paṭivijjhanti, tasmāpi ‘‘ariyasaccānī’’ti vuccanti. Yathāha –

    ‘‘жад̇д̇ааримаани , бхигкавз, арияасажжаани…бз… имаани ко, бхигкавз, жад̇д̇аари арияасажжаани, арияаа имаани бадивиж̇жханд̇и, д̇асмаа арияасажжаанийд̇и вужжанд̇ий’’д̇и.

    ‘‘Cattārimāni , bhikkhave, ariyasaccāni…pe… imāni kho, bhikkhave, cattāri ariyasaccāni, ariyā imāni paṭivijjhanti, tasmā ariyasaccānīti vuccantī’’ti.

    абижа арияасса бхаг̇авад̇о сажжаанийд̇иби арияасажжаани. яат̇ааха –

    Apica ariyassa bhagavato saccānītipi ariyasaccāni. Yathāha –

    ‘‘сад̣̇звагз, бхигкавз…бз… сад̣̇звамануссааяа д̇ат̇ааг̇ад̇о арияо, д̇асмаа арияасажжаанийд̇и вужжанд̇ий’’д̇и (сам̣. ни. 5.1098).

    ‘‘Sadevake, bhikkhave…pe… sadevamanussāya tathāgato ariyo, tasmā ariyasaccānīti vuccantī’’ti (saṃ. ni. 5.1098).

    ат̇а ваа зд̇зсам̣ абхисамб̣уд̣̇д̇хад̇д̇аа арияабхаавасид̣̇д̇хид̇оби арияасажжаани. яат̇ааха –

    Atha vā etesaṃ abhisambuddhattā ariyabhāvasiddhitopi ariyasaccāni. Yathāha –

    ‘‘имзсам̣ ко, бхигкавз, жад̇уннам̣ арияасажжаанам̣ яат̇аабхууд̇ам̣ абхисамб̣уд̣̇д̇хад̇д̇аа д̇ат̇ааг̇ад̇о арахам̣ саммаасамб̣уд̣̇д̇ход̇и вужжад̇ий’’д̇и (сам̣. ни. 5.1093).

    ‘‘Imesaṃ kho, bhikkhave, catunnaṃ ariyasaccānaṃ yathābhūtaṃ abhisambuddhattā tathāgato arahaṃ sammāsambuddhoti vuccatī’’ti (saṃ. ni. 5.1093).

    аяамзд̇зсам̣ бад̣̇ад̇т̇о. зд̇зсам̣ бана арияасажжаанам̣ ануб̣од̇хаббадивзд̇хад̇о бхавад̇ан̣хаачзд̣̇о ход̇и. яат̇ааха –

    Ayametesaṃ padattho. Etesaṃ pana ariyasaccānaṃ anubodhappaṭivedhato bhavataṇhāchedo hoti. Yathāha –

    ‘‘д̇аяид̣̇ам̣ , бхигкавз, д̣̇угкам̣ арияасажжам̣ ануб̣уд̣̇д̇хам̣ бадивид̣̇д̇хам̣…бз… д̣̇угканирод̇хаг̇ааминибадибад̣̇аа арияасажжам̣ ануб̣уд̣̇д̇хам̣ бадивид̣̇д̇хам̣, ужчиннаа бхавад̇ан̣хаа, кийн̣аа бхаванзд̇д̇и, над̇т̇и д̣̇аани бунаб̣бхаво’’д̇и (сам̣. ни. 5.1091).

    ‘‘Tayidaṃ , bhikkhave, dukkhaṃ ariyasaccaṃ anubuddhaṃ paṭividdhaṃ…pe… dukkhanirodhagāminipaṭipadā ariyasaccaṃ anubuddhaṃ paṭividdhaṃ, ucchinnā bhavataṇhā, khīṇā bhavanetti, natthi dāni punabbhavo’’ti (saṃ. ni. 5.1091).

    бан̃жа наама гинд̇ибан̃хаван̣н̣анаа

    Pañca nāma kintipañhavaṇṇanā

    иминааби бан̃хаб̣яаагаран̣зна аарад̣̇д̇хажид̇д̇о сад̇т̇аа буриманаязнзва уд̇д̇арим̣ бан̃хам̣ бужчад̇и бан̃жа наама гинд̇и? т̇зро бан̃жаад̇и бажжанубхаасид̇ваа ‘‘убаад̣̇аанагканд̇хаа’’д̇и виссаж̇ж̇зд̇и. д̇ад̇т̇а бан̃жаад̇и г̇ан̣анабарижчзд̣̇о. убаад̣̇аанаж̇анид̇аа убаад̣̇аанаж̇анагаа ваа канд̇хаа убаад̣̇аанагканд̇хаа. яам̣гин̃жи руубам̣, взд̣̇анаа, сан̃н̃аа, сан̇каараа, вин̃н̃аан̣ан̃жа саасаваа убаад̣̇аанияаа, зд̇зсамзд̇ам̣ ад̇хиважанам̣. буб̣б̣анаязнзва жзд̇т̇а ‘‘бан̃жубаад̣̇аанагканд̇хаа’’д̇и вуд̇д̇ам̣, на ан̃н̃зсам̣ бан̃жаннамабхаавад̇о. яат̇ааха –

    Imināpi pañhabyākaraṇena āraddhacitto satthā purimanayeneva uttariṃ pañhaṃ pucchati pañca nāma kinti? Thero pañcāti paccanubhāsitvā ‘‘upādānakkhandhā’’ti vissajjeti. Tattha pañcāti gaṇanaparicchedo. Upādānajanitā upādānajanakā vā khandhā upādānakkhandhā. Yaṃkiñci rūpaṃ, vedanā, saññā, saṅkhārā, viññāṇañca sāsavā upādāniyā, etesametaṃ adhivacanaṃ. Pubbanayeneva cettha ‘‘pañcupādānakkhandhā’’ti vuttaṃ, na aññesaṃ pañcannamabhāvato. Yathāha –

    ‘‘бан̃жасу, бхигкавз, д̇хаммзсу бхигку саммаа ниб̣б̣инд̣̇амаано…бз… д̣̇угкассанд̇агаро ход̇и. гад̇амзсу бан̃жасу? бан̃жасу убаад̣̇аанагканд̇хзсу. имзсу ко, бхигкавз, бан̃жасу д̇хаммзсу бхигку саммаа ниб̣б̣инд̣̇амаано…бз… д̣̇угкассанд̇агаро ход̇и. ‘бан̃жа бан̃хаа, бан̃жа уд̣̇д̣̇зсаа , бан̃жа взяяаагаран̣ааний’д̇и ид̇и яам̣ д̇ам̣ вуд̇д̇ам̣, ид̣̇амзд̇ам̣ бадижжа вуд̇д̇а’’нд̇и (а. ни. 10.27).

    ‘‘Pañcasu, bhikkhave, dhammesu bhikkhu sammā nibbindamāno…pe… dukkhassantakaro hoti. Katamesu pañcasu? Pañcasu upādānakkhandhesu. Imesu kho, bhikkhave, pañcasu dhammesu bhikkhu sammā nibbindamāno…pe… dukkhassantakaro hoti. ‘Pañca pañhā, pañca uddesā , pañca veyyākaraṇānī’ti iti yaṃ taṃ vuttaṃ, idametaṃ paṭicca vutta’’nti (a. ni. 10.27).

    зд̇т̇а жа бан̃жагканд̇хз уд̣̇аяаб̣б̣аяавасзна саммасанд̇о вибассанаамад̇ам̣ лад̣̇д̇хаа анубуб̣б̣зна ниб̣б̣аанаамад̇ам̣ сажчигарод̇и. яат̇ааха –

    Ettha ca pañcakkhandhe udayabbayavasena sammasanto vipassanāmataṃ laddhā anupubbena nibbānāmataṃ sacchikaroti. Yathāha –

    ‘‘яад̇о яад̇о саммасад̇и, канд̇хаанам̣ уд̣̇аяаб̣б̣аяам̣;

    ‘‘Yato yato sammasati, khandhānaṃ udayabbayaṃ;

    лабхад̇ий бийд̇ибаамож̇ж̇ам̣, амад̇ам̣ д̇ам̣ виж̇аанад̇а’’нд̇и. (д̇ха. ба. 374);

    Labhatī pītipāmojjaṃ, amataṃ taṃ vijānata’’nti. (dha. pa. 374);

    ча наама гинд̇ибан̃хаван̣н̣анаа

    Cha nāma kintipañhavaṇṇanā

    звам̣ иминааби бан̃хаб̣яаагаран̣зна аарад̣̇д̇хажид̇д̇о сад̇т̇аа буриманаязнзва уд̇д̇арим̣ бан̃хам̣ бужчад̇и ‘‘ча наама ги’’нд̇и? т̇зро чаид̇и бажжанубхаасид̇ваа ‘аж̇жхад̇д̇игаани ааяад̇анааний’д̇и виссаж̇ж̇зд̇и. д̇ад̇т̇а чаид̇и г̇ан̣анабарижчзд̣̇о, аж̇жхад̇д̇з нияуд̇д̇аани, ад̇д̇аанам̣ ваа ад̇хигад̇ваа бавад̇д̇аани аж̇жхад̇д̇игаани. ааяад̇анад̇о, ааяасса ваа д̇ананад̇о, ааяад̇асса ваа сам̣саарад̣̇угкасса наяанад̇о ааяад̇анаани, жагкусод̇агхаанаж̇ивхаагааяаманаанамзд̇ам̣ ад̇хиважанам̣. буб̣б̣анаязна жзд̇т̇а ‘‘ча аж̇жхад̇д̇игаани ааяад̇анааний’’д̇и вуд̇д̇ам̣, на ан̃н̃зсам̣ чаннамабхаавад̇о. яат̇ааха –

    Evaṃ imināpi pañhabyākaraṇena āraddhacitto satthā purimanayeneva uttariṃ pañhaṃ pucchati ‘‘cha nāma ki’’nti? Thero chaiti paccanubhāsitvā ‘ajjhattikāni āyatanānī’ti vissajjeti. Tattha chaiti gaṇanaparicchedo, ajjhatte niyuttāni, attānaṃ vā adhikatvā pavattāni ajjhattikāni. Āyatanato, āyassa vā tananato, āyatassa vā saṃsāradukkhassa nayanato āyatanāni, cakkhusotaghānajivhākāyamanānametaṃ adhivacanaṃ. Pubbanayena cettha ‘‘cha ajjhattikāni āyatanānī’’ti vuttaṃ, na aññesaṃ channamabhāvato. Yathāha –

    ‘‘часу , бхигкавз, д̇хаммзсу бхигку саммаа ниб̣б̣инд̣̇амаано…бз… д̣̇угкассанд̇агаро ход̇и. гад̇амзсу часу? часу аж̇жхад̇д̇игзсу ааяад̇анзсу. имзсу ко, бхигкавз, часу д̇хаммзсу бхигку саммаа ниб̣б̣инд̣̇амаано…бз… д̣̇угкассанд̇агаро ход̇и. ‘ча бан̃хаа ча уд̣̇д̣̇зсаа ча взяяаагаран̣ааний’д̇и ид̇и яам̣ д̇ам̣ вуд̇д̇ам̣, ид̣̇амзд̇ам̣ бадижжа вуд̇д̇а’’нд̇и (а. ни. 10.27).

    ‘‘Chasu , bhikkhave, dhammesu bhikkhu sammā nibbindamāno…pe… dukkhassantakaro hoti. Katamesu chasu? Chasu ajjhattikesu āyatanesu. Imesu kho, bhikkhave, chasu dhammesu bhikkhu sammā nibbindamāno…pe… dukkhassantakaro hoti. ‘Cha pañhā cha uddesā cha veyyākaraṇānī’ti iti yaṃ taṃ vuttaṃ, idametaṃ paṭicca vutta’’nti (a. ni. 10.27).

    зд̇т̇а жа ча аж̇жхад̇д̇игаани ааяад̇анаани, ‘‘сун̃н̃о г̇аамод̇и ко, бхигкавз, чаннзд̇ам̣ аж̇жхад̇д̇игаанам̣ ааяад̇анаанам̣ ад̇хиважана’’нд̇и (сам̣. ни. 4.238) важанад̇о сун̃н̃ад̇о буб̣б̣ул̣агамарийжигаад̣̇ийни вияа ажирадтид̇игад̇о д̇ужчад̇о ван̃жанад̇о жа саманубассам̣ ниб̣б̣инд̣̇амаано анубуб̣б̣зна д̣̇угкассанд̇ам̣ гад̇ваа мажжурааж̇асса ад̣̇ассанам̣ убзд̇и. яат̇ааха –

    Ettha ca cha ajjhattikāni āyatanāni, ‘‘suñño gāmoti kho, bhikkhave, channetaṃ ajjhattikānaṃ āyatanānaṃ adhivacana’’nti (saṃ. ni. 4.238) vacanato suññato pubbuḷakamarīcikādīni viya aciraṭṭhitikato tucchato vañcanato ca samanupassaṃ nibbindamāno anupubbena dukkhassantaṃ katvā maccurājassa adassanaṃ upeti. Yathāha –

    ‘‘яат̇аа буб̣б̣ул̣агам̣ бассз, яат̇аа бассз марийжигам̣;

    ‘‘Yathā pubbuḷakaṃ passe, yathā passe marīcikaṃ;

    звам̣ логам̣ авзгканд̇ам̣, мажжурааж̇аа на бассад̇ий’’д̇и. (д̇ха. ба. 170);

    Evaṃ lokaṃ avekkhantaṃ, maccurājā na passatī’’ti. (dha. pa. 170);

    сад̇д̇а наама гинд̇ибан̃хаван̣н̣анаа

    Satta nāma kintipañhavaṇṇanā

    иминааби бан̃хаб̣яаагаран̣зна аарад̣̇д̇хажид̇д̇о сад̇т̇аа уд̇д̇арим̣ бан̃хам̣ бужчад̇и сад̇д̇а наама гинд̇и? т̇зро гин̃жааби махаабан̃хаб̣яаагаран̣з сад̇д̇а вин̃н̃аан̣адтид̇ияо вуд̇д̇аа, абижа ко бана язсу д̇хаммзсу субхаавид̇ажид̇д̇о бхигку д̣̇угкассанд̇агаро ход̇и, д̇з д̣̇ассзнд̇о ‘‘сад̇д̇а б̣ож̇жхан̇г̇аа’’д̇и виссаж̇ж̇зд̇и. аяамби жад̇т̇о бхаг̇авад̇аа анумад̇о зва. яат̇ааха –

    Imināpi pañhabyākaraṇena āraddhacitto satthā uttariṃ pañhaṃ pucchati satta nāma kinti? Thero kiñcāpi mahāpañhabyākaraṇe satta viññāṇaṭṭhitiyo vuttā, apica kho pana yesu dhammesu subhāvitacitto bhikkhu dukkhassantakaro hoti, te dassento ‘‘satta bojjhaṅgā’’ti vissajjeti. Ayampi cattho bhagavatā anumato eva. Yathāha –

    ‘‘бан̣д̣ид̇аа г̇ахабад̇аяо гаж̇ан̇г̇алигаа бхигкуний, махаабан̃н̃аа г̇ахабад̇аяо гаж̇ан̇г̇алигаа бхигкуний, ман̃жзби д̇умхз г̇ахабад̇аяо убасан̇гамид̇ваа зд̇амад̇т̇ам̣ бадибужчзяяаат̇а, ахамби жзд̇ам̣ звамзва б̣яаагарзяяам̣, яат̇аа д̇ам̣ гаж̇ан̇г̇алигааяа бхигкунияаа б̣яаагад̇а’’нд̇и (а. ни. 10.28).

    ‘‘Paṇḍitā gahapatayo kajaṅgalikā bhikkhunī, mahāpaññā gahapatayo kajaṅgalikā bhikkhunī, mañcepi tumhe gahapatayo upasaṅkamitvā etamatthaṃ paṭipuccheyyātha, ahampi cetaṃ evameva byākareyyaṃ, yathā taṃ kajaṅgalikāya bhikkhuniyā byākata’’nti (a. ni. 10.28).

    д̇ааяа жа звам̣ б̣яаагад̇ам̣ –

    Tāya ca evaṃ byākataṃ –

    ‘‘сад̇д̇асу, аавусо, д̇хаммзсу бхигку саммаа субхаавид̇ажид̇д̇о…бз… д̣̇угкассанд̇агаро ход̇и. гад̇амзсу сад̇д̇асу? сад̇д̇асу б̣ож̇жхан̇г̇зсу. имзсу ко, аавусо, сад̇д̇асу д̇хаммзсу бхигку саммаа субхаавид̇ажид̇д̇о…бз… д̣̇угкассанд̇агаро ход̇и. ‘сад̇д̇а бан̃хаа сад̇д̇а уд̣̇д̣̇зсаа сад̇д̇а взяяаагаран̣ааний’д̇и ид̇и яам̣ д̇ам̣ вуд̇д̇ам̣ бхаг̇авад̇аа, ид̣̇амзд̇ам̣ бадижжа вуд̇д̇а’’нд̇и (а. ни. 10.28).

    ‘‘Sattasu, āvuso, dhammesu bhikkhu sammā subhāvitacitto…pe… dukkhassantakaro hoti. Katamesu sattasu? Sattasu bojjhaṅgesu. Imesu kho, āvuso, sattasu dhammesu bhikkhu sammā subhāvitacitto…pe… dukkhassantakaro hoti. ‘Satta pañhā satta uddesā satta veyyākaraṇānī’ti iti yaṃ taṃ vuttaṃ bhagavatā, idametaṃ paṭicca vutta’’nti (a. ni. 10.28).

    звамаяамад̇т̇о бхаг̇авад̇аа анумад̇о зваад̇и взд̣̇ид̇аб̣б̣о.

    Evamayamattho bhagavatā anumato evāti veditabbo.

    д̇ад̇т̇а сад̇д̇аад̇и уунаад̇хиганивааран̣аг̇ан̣анабарижчзд̣̇о. б̣ож̇жхан̇г̇аад̇и сад̇иаад̣̇ийнам̣ д̇хаммаанамзд̇ам̣ ад̇хиважанам̣. д̇ад̇рааяам̣ бад̣̇ад̇т̇о – зд̇ааяа логияалогуд̇д̇арамаг̇г̇агкан̣з уббаж̇ж̇амаанааяа лийнуд̣̇д̇хажжабад̇идтаанааяууханагаамасукад̇д̇агиламат̇аануяог̇аужчзд̣̇асассад̇аабхинивзсаад̣̇и- анзгубад̣̇д̣̇аваббадибагкабхууд̇ааяа сад̇ид̇хаммавижаяавийрияабийд̇иббассад̣̇д̇хисамаад̇хубзгкаасан̇каад̇ааяа д̇хаммасаамаг̇г̇ияаа арияасааваго б̣уж̇жхад̇ийд̇и гад̇ваа б̣од̇хи, гилзсасанд̇аананид̣̇д̣̇ааяа удтахад̇и, жад̇д̇аари ваа арияасажжаани бадивиж̇жхад̇и, ниб̣б̣аанамзва ваа сажчигарод̇ийд̇и вуд̇д̇ам̣ ход̇и. яат̇ааха – ‘‘сад̇д̇а б̣ож̇жхан̇г̇з бхаавзд̇ваа ануд̇д̇арам̣ саммаасамб̣од̇хим̣ абхисамб̣уд̣̇д̇хо’’д̇и. яат̇аавуд̇д̇аббагаарааяа ваа зд̇ааяа д̇хаммасаамаг̇г̇ияаа б̣уж̇жхад̇ийд̇и гад̇ваа арияасаавагоби б̣од̇хи. ид̇и д̇ассаа д̇хаммасаамаг̇г̇исан̇каад̇ааяа б̣од̇хияаа ан̇г̇абхууд̇ад̇д̇аа б̣ож̇жхан̇г̇аа жхаанан̇г̇амаг̇г̇ан̇г̇аани вияа, д̇асса ваа б̣од̇хийд̇и лад̣̇д̇хавохаарасса арияасаавагасса ан̇г̇абхууд̇ад̇д̇ааби б̣ож̇жхан̇г̇аа сзнан̇г̇арат̇ан̇г̇аад̣̇аяо вияа.

    Tattha sattāti ūnādhikanivāraṇagaṇanaparicchedo. Bojjhaṅgāti satiādīnaṃ dhammānametaṃ adhivacanaṃ. Tatrāyaṃ padattho – etāya lokiyalokuttaramaggakkhaṇe uppajjamānāya līnuddhaccapatiṭṭhānāyūhanakāmasukhattakilamathānuyogaucchedasassatābhinivesādi- anekupaddavappaṭipakkhabhūtāya satidhammavicayavīriyapītippassaddhisamādhupekkhāsaṅkhātāya dhammasāmaggiyā ariyasāvako bujjhatīti katvā bodhi, kilesasantānaniddāya uṭṭhahati, cattāri vā ariyasaccāni paṭivijjhati, nibbānameva vā sacchikarotīti vuttaṃ hoti. Yathāha – ‘‘satta bojjhaṅge bhāvetvā anuttaraṃ sammāsambodhiṃ abhisambuddho’’ti. Yathāvuttappakārāya vā etāya dhammasāmaggiyā bujjhatīti katvā ariyasāvakopi bodhi. Iti tassā dhammasāmaggisaṅkhātāya bodhiyā aṅgabhūtattā bojjhaṅgā jhānaṅgamaggaṅgāni viya, tassa vā bodhīti laddhavohārassa ariyasāvakassa aṅgabhūtattāpi bojjhaṅgā senaṅgarathaṅgādayo viya.

    абижа ‘‘б̣ож̇жхан̇г̇аад̇и гзнадтзна б̣ож̇жхан̇г̇аа? б̣од̇хааяа сам̣вад̇д̇анд̇ийд̇и б̣ож̇жхан̇г̇аа, б̣уж̇жханд̇ийд̇и б̣ож̇жхан̇г̇аа, ануб̣уж̇жханд̇ийд̇и б̣ож̇жхан̇г̇аа, бадиб̣уж̇жханд̇ийд̇и б̣ож̇жхан̇г̇аа, самб̣уж̇жханд̇ийд̇и б̣ож̇жхан̇г̇аа’’д̇и (бади. ма. 2.17) иминааби бадисамбхид̣̇ааяам̣ вуд̇д̇зна вид̇хинаа б̣ож̇жхан̇г̇аанам̣ б̣ож̇жхан̇г̇адто взд̣̇ид̇аб̣б̣о. звамимз сад̇д̇а б̣ож̇жхан̇г̇з бхаавзнд̇о б̣ахулийгаронд̇о на жирассзва зганд̇аниб̣б̣ид̣̇аад̣̇иг̇ун̣абадилаабхий ход̇и, д̇зна д̣̇идтзва д̇хаммз д̣̇угкассанд̇агаро ход̇ийд̇и вужжад̇и . вуд̇д̇ан̃жзд̇ам̣ бхаг̇авад̇аа –

    Apica ‘‘bojjhaṅgāti kenaṭṭhena bojjhaṅgā? Bodhāya saṃvattantīti bojjhaṅgā, bujjhantīti bojjhaṅgā, anubujjhantīti bojjhaṅgā, paṭibujjhantīti bojjhaṅgā, sambujjhantīti bojjhaṅgā’’ti (paṭi. ma. 2.17) imināpi paṭisambhidāyaṃ vuttena vidhinā bojjhaṅgānaṃ bojjhaṅgaṭṭho veditabbo. Evamime satta bojjhaṅge bhāvento bahulīkaronto na cirasseva ekantanibbidādiguṇapaṭilābhī hoti, tena diṭṭheva dhamme dukkhassantakaro hotīti vuccati . Vuttañcetaṃ bhagavatā –

    ‘‘сад̇д̇имз, бхигкавз, б̣ож̇жхан̇г̇аа бхаавид̇аа б̣ахулийгад̇аа зганд̇аниб̣б̣ид̣̇ааяа вирааг̇ааяа нирод̇хааяа убасамааяа абхин̃н̃ааяа самб̣од̇хааяа ниб̣б̣аанааяа сам̣вад̇д̇анд̇ий’’д̇и (сам̣. ни. 5.201).

    ‘‘Sattime, bhikkhave, bojjhaṅgā bhāvitā bahulīkatā ekantanibbidāya virāgāya nirodhāya upasamāya abhiññāya sambodhāya nibbānāya saṃvattantī’’ti (saṃ. ni. 5.201).

    адта наама гинд̇ибан̃хаван̣н̣анаа

    Aṭṭha nāma kintipañhavaṇṇanā

    звам̣ иминааби бан̃хаб̣яаагаран̣зна аарад̣̇д̇хажид̇д̇о сад̇т̇аа уд̇д̇арим̣ бан̃хам̣ бужчад̇и адта наама гинд̇и? т̇зро гин̃жааби махаабан̃хаб̣яаагаран̣з адта логад̇хаммаа вуд̇д̇аа, абижа ко бана язсу д̇хаммзсу субхаавид̇ажид̇д̇о бхигку д̣̇угкассанд̇агаро ход̇и, д̇з д̣̇ассзнд̇о ‘‘арияаани адта маг̇г̇ан̇г̇ааний’’д̇и авад̇ваа яасмаа адтан̇г̇авинимуд̇д̇о маг̇г̇о наама над̇т̇и, адтан̇г̇амад̇д̇амзва д̇у маг̇г̇о, д̇асмаа д̇амад̇т̇ам̣ саад̇хзнд̇о д̣̇зсанаавилаасзна арияо адтан̇г̇иго маг̇г̇од̇и виссаж̇ж̇зд̇и. бхаг̇авад̇ааби жааяамад̇т̇о д̣̇зсанаанаяо жа анумад̇о зва. яат̇ааха –

    Evaṃ imināpi pañhabyākaraṇena āraddhacitto satthā uttariṃ pañhaṃ pucchati aṭṭha nāma kinti? Thero kiñcāpi mahāpañhabyākaraṇe aṭṭha lokadhammā vuttā, apica kho pana yesu dhammesu subhāvitacitto bhikkhu dukkhassantakaro hoti, te dassento ‘‘ariyāni aṭṭha maggaṅgānī’’ti avatvā yasmā aṭṭhaṅgavinimutto maggo nāma natthi, aṭṭhaṅgamattameva tu maggo, tasmā tamatthaṃ sādhento desanāvilāsena ariyo aṭṭhaṅgiko maggoti vissajjeti. Bhagavatāpi cāyamattho desanānayo ca anumato eva. Yathāha –

    ‘‘бан̣д̣ид̇аа г̇ахабад̇аяо гаж̇ан̇г̇алигаа бхигкуний…бз… ахамби звамзва б̣яаагарзяяам̣, яат̇аа д̇ам̣ гаж̇ан̇г̇алигааяа бхигкунияаа б̣яаагад̇а’’нд̇и (а. ни. 10.28).

    ‘‘Paṇḍitā gahapatayo kajaṅgalikā bhikkhunī…pe… ahampi evameva byākareyyaṃ, yathā taṃ kajaṅgalikāya bhikkhuniyā byākata’’nti (a. ni. 10.28).

    д̇ааяа жа звам̣ б̣яаагад̇ам̣ –

    Tāya ca evaṃ byākataṃ –

    ‘‘адтасу, аавусо, д̇хаммзсу бхигку саммаа субхаавид̇ажид̇д̇о…бз… д̣̇угкассанд̇агаро ход̇и. ‘адта бан̃хаа, адта уд̣̇д̣̇зсаа, адта взяяаагаран̣ааний’д̇и ид̇и яам̣ д̇ам̣ вуд̇д̇ам̣ бхаг̇авад̇аа, ид̣̇амзд̇ам̣ бадижжа вуд̇д̇а’’нд̇и (а. ни. 10.28).

    ‘‘Aṭṭhasu, āvuso, dhammesu bhikkhu sammā subhāvitacitto…pe… dukkhassantakaro hoti. ‘Aṭṭha pañhā, aṭṭha uddesā, aṭṭha veyyākaraṇānī’ti iti yaṃ taṃ vuttaṃ bhagavatā, idametaṃ paṭicca vutta’’nti (a. ni. 10.28).

    звамаяам̣ ад̇т̇о жа д̣̇зсанаанаяо жа бхаг̇авад̇аа анумад̇о зваад̇и взд̣̇ид̇аб̣б̣о.

    Evamayaṃ attho ca desanānayo ca bhagavatā anumato evāti veditabbo.

    д̇ад̇т̇а арияод̇и ниб̣б̣аанад̇т̇игзхи абхиг̇анд̇аб̣б̣о, абижа аарагаа гилзсзхи вад̇д̇анад̇о, арияабхаавагаран̣ад̇о, арияапалабадилаабхад̇о жааби арияод̇и взд̣̇ид̇аб̣б̣о. адта ан̇г̇аани ассаад̇и адтан̇г̇иго. свааяам̣ жад̇уран̇г̇игаа вияа сзнаа, бан̃жан̇г̇игам̣ вияа жа д̇уурияам̣ ан̇г̇авиниб̣бхог̇зна анубалаб̣бхасабхаавад̇о ан̇г̇амад̇д̇амзваад̇и взд̣̇ид̇аб̣б̣о. маг̇г̇ад̇и иминаа ниб̣б̣аанам̣, саяам̣ ваа маг̇г̇ад̇и, гилзсз маарзнд̇о ваа г̇ажчад̇ийд̇и маг̇г̇о.

    Tattha ariyoti nibbānatthikehi abhigantabbo, apica ārakā kilesehi vattanato, ariyabhāvakaraṇato, ariyaphalapaṭilābhato cāpi ariyoti veditabbo. Aṭṭha aṅgāni assāti aṭṭhaṅgiko. Svāyaṃ caturaṅgikā viya senā, pañcaṅgikaṃ viya ca tūriyaṃ aṅgavinibbhogena anupalabbhasabhāvato aṅgamattamevāti veditabbo. Maggati iminā nibbānaṃ, sayaṃ vā maggati, kilese mārento vā gacchatīti maggo.

    звамадтаббабхзд̣̇ан̃жимам̣ адтан̇г̇игам̣ маг̇г̇ам̣ бхаавзнд̇о бхигку авиж̇ж̇ам̣ бхинд̣̇ад̇и, виж̇ж̇ам̣ уббаад̣̇зд̇и, ниб̣б̣аанам̣ сажчигарод̇и, д̇зна д̣̇идтзва д̇хаммз д̣̇угкассанд̇агаро ход̇ийд̇и вужжад̇и. вуд̇д̇ан̃хзд̇ам̣ –

    Evamaṭṭhappabhedañcimaṃ aṭṭhaṅgikaṃ maggaṃ bhāvento bhikkhu avijjaṃ bhindati, vijjaṃ uppādeti, nibbānaṃ sacchikaroti, tena diṭṭheva dhamme dukkhassantakaro hotīti vuccati. Vuttañhetaṃ –

    ‘‘сзяяат̇ааби, бхигкавз, саалисуугам̣ ваа яавасуугам̣ ваа саммаа бан̣ихид̇ам̣ хад̇т̇зна ваа баад̣̇зна ваа агганд̇ам̣ хад̇т̇ам̣ ваа баад̣̇ам̣ ваа бхзжчад̇и, лохид̇ам̣ ваа уббаад̣̇зссад̇ийд̇и таанамзд̇ам̣ виж̇ж̇ад̇и. д̇ам̣ гисса хзд̇у? саммаа бан̣ихид̇ад̇д̇аа, бхигкавз, суугасса, звамзва ко, бхигкавз , со вад̇а бхигку саммаа бан̣ихид̇ааяа д̣̇идтияаа саммаа бан̣ихид̇ааяа маг̇г̇абхааванааяа авиж̇ж̇ам̣ бхзжчад̇и, виж̇ж̇ам̣ уббаад̣̇зссад̇и, ниб̣б̣аанам̣ сажчигариссад̇ийд̇и таанамзд̇ам̣ виж̇ж̇ад̇ий’’д̇и (а. ни. 1.42).

    ‘‘Seyyathāpi, bhikkhave, sālisūkaṃ vā yavasūkaṃ vā sammā paṇihitaṃ hatthena vā pādena vā akkantaṃ hatthaṃ vā pādaṃ vā bhecchati, lohitaṃ vā uppādessatīti ṭhānametaṃ vijjati. Taṃ kissa hetu? Sammā paṇihitattā, bhikkhave, sūkassa, evameva kho, bhikkhave , so vata bhikkhu sammā paṇihitāya diṭṭhiyā sammā paṇihitāya maggabhāvanāya avijjaṃ bhecchati, vijjaṃ uppādessati, nibbānaṃ sacchikarissatīti ṭhānametaṃ vijjatī’’ti (a. ni. 1.42).

    нава наама гинд̇ибан̃хаван̣н̣анаа

    Nava nāma kintipañhavaṇṇanā

    иминааби бан̃хаб̣яаагаран̣зна аарад̣̇д̇хажид̇д̇о сад̇т̇аа уд̇д̇арим̣ бан̃хам̣ бужчад̇и нава наама гинд̇и? т̇зро наваид̇и бажжанубхаасид̇ваа ‘‘сад̇д̇ааваасаа’’д̇и виссаж̇ж̇зд̇и. д̇ад̇т̇а наваад̇и г̇ан̣анабарижчзд̣̇о. сад̇д̇аад̇и ж̇ийвид̇инд̣̇рияаббадиб̣ад̣̇д̇хз канд̇хз убаад̣̇ааяа бан̃н̃ад̇д̇аа баан̣ино бан̣н̣ад̇д̇и ваа. ааваасаад̇и аавасанд̇и зд̇зсууд̇и ааваасаа, сад̇д̇аанам̣ ааваасаа сад̇д̇ааваасаа. зса д̣̇зсанаамаг̇г̇о, ад̇т̇ад̇о бана нававид̇хаанам̣ сад̇д̇аанамзд̇ам̣ ад̇хиважанам̣. яат̇ааха –

    Imināpi pañhabyākaraṇena āraddhacitto satthā uttariṃ pañhaṃ pucchati nava nāma kinti? Thero navaiti paccanubhāsitvā ‘‘sattāvāsā’’ti vissajjeti. Tattha navāti gaṇanaparicchedo. Sattāti jīvitindriyappaṭibaddhe khandhe upādāya paññattā pāṇino paṇṇatti vā. Āvāsāti āvasanti etesūti āvāsā, sattānaṃ āvāsā sattāvāsā. Esa desanāmaggo, atthato pana navavidhānaṃ sattānametaṃ adhivacanaṃ. Yathāha –

    ‘‘санд̇аавусо, сад̇д̇аа наанад̇д̇агааяаа наанад̇д̇асан̃н̃ино, сзяяат̇ааби мануссаа згажжз жа д̣̇зваа згажжз жа винибаад̇игаа, аяам̣ батамо сад̇д̇ааваасо. санд̇аавусо, сад̇д̇аа наанад̇д̇агааяаа згад̇д̇асан̃н̃ино, сзяяат̇ааби, д̣̇зваа б̣рахмагааяигаа, батамаабхиниб̣б̣ад̇д̇аа, аяам̣ д̣̇уд̇ияо сад̇д̇ааваасо. санд̇аавусо, сад̇д̇аа згад̇д̇агааяаа наанад̇д̇асан̃н̃ино, сзяяат̇ааби, д̣̇зваа аабхассараа, аяам̣ д̇ад̇ияо сад̇д̇ааваасо. санд̇аавусо, сад̇д̇аа згад̇д̇агааяаа згад̇д̇асан̃н̃ино, сзяяат̇ааби, д̣̇зваа субхагин̣хаа, аяам̣ жад̇уд̇т̇о сад̇д̇ааваасо. санд̇аавусо, сад̇д̇аа асан̃н̃ино аббадисам̣взд̣̇ино, сзяяат̇ааби, д̣̇зваа асан̃н̃асад̇д̇аа, аяам̣ бан̃жамо сад̇д̇ааваасо. санд̇аавусо, сад̇д̇аа саб̣б̣асо руубасан̃н̃аанам̣…бз… аагаасаанан̃жааяад̇ануубаг̇аа , аяам̣ чадто сад̇д̇ааваасо. санд̇аавусо, сад̇д̇аа…бз… вин̃н̃аан̣ан̃жааяад̇ануубаг̇аа, аяам̣ сад̇д̇амо сад̇д̇ааваасо. санд̇аавусо, сад̇д̇аа…бз… аагин̃жан̃н̃ааяад̇ануубаг̇аа, аяам̣ адтамо сад̇д̇ааваасо. санд̇аавусо, сад̇д̇аа…бз… нзвасан̃н̃аанаасан̃н̃ааяад̇ануубаг̇аа, аяам̣ навамо сад̇д̇ааваасо’’д̇и (д̣̇ий. ни. 3.341).

    ‘‘Santāvuso, sattā nānattakāyā nānattasaññino, seyyathāpi manussā ekacce ca devā ekacce ca vinipātikā, ayaṃ paṭhamo sattāvāso. Santāvuso, sattā nānattakāyā ekattasaññino, seyyathāpi, devā brahmakāyikā, paṭhamābhinibbattā, ayaṃ dutiyo sattāvāso. Santāvuso, sattā ekattakāyā nānattasaññino, seyyathāpi, devā ābhassarā, ayaṃ tatiyo sattāvāso. Santāvuso, sattā ekattakāyā ekattasaññino, seyyathāpi, devā subhakiṇhā, ayaṃ catuttho sattāvāso. Santāvuso, sattā asaññino appaṭisaṃvedino, seyyathāpi, devā asaññasattā, ayaṃ pañcamo sattāvāso. Santāvuso, sattā sabbaso rūpasaññānaṃ…pe… ākāsānañcāyatanūpagā , ayaṃ chaṭṭho sattāvāso. Santāvuso, sattā…pe… viññāṇañcāyatanūpagā, ayaṃ sattamo sattāvāso. Santāvuso, sattā…pe… ākiñcaññāyatanūpagā, ayaṃ aṭṭhamo sattāvāso. Santāvuso, sattā…pe… nevasaññānāsaññāyatanūpagā, ayaṃ navamo sattāvāso’’ti (dī. ni. 3.341).

    буриманаязнзва жзд̇т̇а ‘‘нава сад̇д̇ааваасаа’’д̇и вуд̇д̇ам̣, на ан̃н̃зсам̣ наваннамабхаавад̇о. яат̇ааха –

    Purimanayeneva cettha ‘‘nava sattāvāsā’’ti vuttaṃ, na aññesaṃ navannamabhāvato. Yathāha –

    ‘‘навасу, бхигкавз, д̇хаммзсу бхигку саммаа ниб̣б̣инд̣̇амаано…бз… д̣̇угкассанд̇агаро ход̇и. гад̇амзсу навасу? навасу сад̇д̇ааваасзсу. имзсу ко, бхигкавз, навасу д̇хаммзсу бхигку саммаа ниб̣б̣инд̣̇амаано…бз… д̣̇угкассанд̇агаро ход̇и. ‘нава бан̃хаа , нава уд̣̇д̣̇зсаа, нава взяяаагаран̣ааний’д̇и ид̇и яам̣ д̇ам̣ вуд̇д̇ам̣, ид̣̇амзд̇ам̣ бадижжа вуд̇д̇а’’нд̇и (а. ни. 10.27).

    ‘‘Navasu, bhikkhave, dhammesu bhikkhu sammā nibbindamāno…pe… dukkhassantakaro hoti. Katamesu navasu? Navasu sattāvāsesu. Imesu kho, bhikkhave, navasu dhammesu bhikkhu sammā nibbindamāno…pe… dukkhassantakaro hoti. ‘Nava pañhā , nava uddesā, nava veyyākaraṇānī’ti iti yaṃ taṃ vuttaṃ, idametaṃ paṭicca vutta’’nti (a. ni. 10.27).

    зд̇т̇а жа ‘‘нава д̇хаммаа барин̃н̃зяяаа. гад̇амз нава? нава сад̇д̇ааваасаа’’д̇и (д̣̇ий. ни. 3.359) важанад̇о навасу сад̇д̇ааваасзсу н̃аад̇абарин̃н̃ааяа д̇хувасубхасукад̇д̇абхаавад̣̇ассанам̣ бахааяа суд̣̇д̇хасан̇каарабун̃ж̇амад̇д̇ад̣̇ассанзна ниб̣б̣инд̣̇амаано д̇ийран̣абарин̃н̃ааяа анижжаанубассанзна вираж̇ж̇амаано д̣̇угкаанубассанзна вимужжамаано анад̇д̇аанубассанзна саммаа барияанд̇ад̣̇ассаавий бахаанабарин̃н̃ааяа саммад̇д̇амабхисамзжжа д̣̇идтзва д̇хаммз д̣̇угкассанд̇агаро ход̇и. д̇знзд̇ам̣ вуд̇д̇ам̣ –

    Ettha ca ‘‘nava dhammā pariññeyyā. Katame nava? Nava sattāvāsā’’ti (dī. ni. 3.359) vacanato navasu sattāvāsesu ñātapariññāya dhuvasubhasukhattabhāvadassanaṃ pahāya suddhasaṅkhārapuñjamattadassanena nibbindamāno tīraṇapariññāya aniccānupassanena virajjamāno dukkhānupassanena vimuccamāno anattānupassanena sammā pariyantadassāvī pahānapariññāya sammattamabhisamecca diṭṭheva dhamme dukkhassantakaro hoti. Tenetaṃ vuttaṃ –

    ‘‘навасу, бхигкавз, д̇хаммзсу бхигку саммаа ниб̣б̣инд̣̇амаано…бз… д̣̇идтзва д̇хаммз д̣̇угкассанд̇агаро ход̇и. гад̇амзсу навасу? навасу сад̇д̇ааваасзсуу’’д̇и (а. ни. 10.27).

    ‘‘Navasu, bhikkhave, dhammesu bhikkhu sammā nibbindamāno…pe… diṭṭheva dhamme dukkhassantakaro hoti. Katamesu navasu? Navasu sattāvāsesū’’ti (a. ni. 10.27).

    д̣̇аса наама гинд̇ибан̃хаван̣н̣анаа

    Dasa nāma kintipañhavaṇṇanā

    звам̣ иминааби бан̃хаб̣яаагаран̣зна аарад̣̇д̇хажид̇д̇о сад̇т̇аа уд̇д̇арим̣ бан̃хам̣ бужчад̇и д̣̇аса наама гинд̇и? д̇ад̇т̇а гин̃жааби имасса бан̃хасса ид̇о ан̃н̃ад̇ра взяяаагаран̣зсу д̣̇аса агусалагаммабат̇аа вуд̇д̇аа. яат̇ааха –

    Evaṃ imināpi pañhabyākaraṇena āraddhacitto satthā uttariṃ pañhaṃ pucchati dasa nāma kinti? Tattha kiñcāpi imassa pañhassa ito aññatra veyyākaraṇesu dasa akusalakammapathā vuttā. Yathāha –

    ‘‘д̣̇асасу, бхигкавз, д̇хаммзсу бхигку саммаа ниб̣б̣инд̣̇амаано…бз… д̣̇угкассанд̇агаро ход̇и. гад̇амзсу д̣̇асасу? д̣̇асасу агусалагаммабат̇зсу. имзсу ко, бхигкавз, д̣̇асасу д̇хаммзсу бхигку саммаа ниб̣б̣инд̣̇амаано…бз. … д̣̇угкассанд̇агаро ход̇и. ‘д̣̇аса бан̃хаа д̣̇аса уд̣̇д̣̇зсаа д̣̇аса взяяаагаран̣ааний’д̇и ид̇и яам̣ д̇ам̣ вуд̇д̇ам̣, ид̣̇амзд̇ам̣ бадижжа вуд̇д̇а’’нд̇и (а. ни. 10.27).

    ‘‘Dasasu, bhikkhave, dhammesu bhikkhu sammā nibbindamāno…pe… dukkhassantakaro hoti. Katamesu dasasu? Dasasu akusalakammapathesu. Imesu kho, bhikkhave, dasasu dhammesu bhikkhu sammā nibbindamāno…pe. … dukkhassantakaro hoti. ‘Dasa pañhā dasa uddesā dasa veyyākaraṇānī’ti iti yaṃ taṃ vuttaṃ, idametaṃ paṭicca vutta’’nti (a. ni. 10.27).

    ид̇ха бана яасмаа аяамааяасмаа ад̇д̇аанам̣ анубанзд̇ваа ан̃н̃ам̣ б̣яаагаад̇угаамо, яасмаа ваа иминаа барияааязна б̣яаагад̇ам̣ суб̣яаагад̇амзва ход̇и, д̇асмаа язхи д̣̇асахи ан̇г̇зхи саманнааг̇ад̇о арахаад̇и бавужжад̇и, д̇зсам̣ ад̇хиг̇амам̣ д̣̇ийбзнд̇о д̣̇асахан̇г̇зхи саманнааг̇ад̇о арахаад̇и бавужжад̇ийд̇и буг̇г̇алаад̇хидтаанааяа д̣̇зсанааяа виссаж̇ж̇зд̇и. яад̇о зд̇т̇а язхи д̣̇асахи ан̇г̇зхи саманнааг̇ад̇о арахаад̇и бавужжад̇и, д̇аани д̣̇асан̇г̇аани ‘‘д̣̇аса наама ги’’нд̇и будтзна т̇зрзна нид̣̇д̣̇идтаанийд̇и взд̣̇ид̇аб̣б̣аани. д̇аани жа д̣̇аса –

    Idha pana yasmā ayamāyasmā attānaṃ anupanetvā aññaṃ byākātukāmo, yasmā vā iminā pariyāyena byākataṃ subyākatameva hoti, tasmā yehi dasahi aṅgehi samannāgato arahāti pavuccati, tesaṃ adhigamaṃ dīpento dasahaṅgehi samannāgato arahāti pavuccatīti puggalādhiṭṭhānāya desanāya vissajjeti. Yato ettha yehi dasahi aṅgehi samannāgato arahāti pavuccati, tāni dasaṅgāni ‘‘dasa nāma ki’’nti puṭṭhena therena niddiṭṭhānīti veditabbāni. Tāni ca dasa –

    ‘‘асзко асзкод̇и, бханд̇з, вужжад̇и, гид̇д̇аавад̇аа ну ко, бханд̇з, бхигку асзко ход̇ийд̇и? ид̇ха, бхигкавз, бхигку асзкааяа саммаад̣̇идтияаа саманнааг̇ад̇о ход̇и, асзкзна саммаасан̇габбзна саманнааг̇ад̇о ход̇и, асзкааяа саммааваажааяа саманнааг̇ад̇о ход̇и, асзкзна саммаагамманд̇зна саманнааг̇ад̇о ход̇и, асзкзна саммааааж̇ийвзна саманнааг̇ад̇о ход̇и, асзкзна саммаавааяаамзна саманнааг̇ад̇о ход̇и, асзкааяа саммаасад̇ияаа саманнааг̇ад̇о ход̇и, асзкзна саммаасамаад̇хинаа саманнааг̇ад̇о ход̇и, асзкзна саммаан̃аан̣зна саманнааг̇ад̇о ход̇и, асзкааяа саммаавимуд̇д̇ияаа саманнааг̇ад̇о ход̇и. звам̣ ко, бхигкавз, бхигку асзко ход̇ий’’д̇и (а. ни. 10.111). –

    ‘‘Asekho asekhoti, bhante, vuccati, kittāvatā nu kho, bhante, bhikkhu asekho hotīti? Idha, bhikkhave, bhikkhu asekhāya sammādiṭṭhiyā samannāgato hoti, asekhena sammāsaṅkappena samannāgato hoti, asekhāya sammāvācāya samannāgato hoti, asekhena sammākammantena samannāgato hoti, asekhena sammāājīvena samannāgato hoti, asekhena sammāvāyāmena samannāgato hoti, asekhāya sammāsatiyā samannāgato hoti, asekhena sammāsamādhinā samannāgato hoti, asekhena sammāñāṇena samannāgato hoti, asekhāya sammāvimuttiyā samannāgato hoti. Evaṃ kho, bhikkhave, bhikkhu asekho hotī’’ti (a. ni. 10.111). –

    звамаад̣̇ийсу суд̇д̇зсу вуд̇д̇анаязнзва взд̣̇ид̇аб̣б̣аанийд̇и.

    Evamādīsu suttesu vuttanayeneva veditabbānīti.

    барамад̇т̇аж̇од̇игааяа куд̣̇д̣̇агабаата-адтагат̇ааяа

    Paramatthajotikāya khuddakapāṭha-aṭṭhakathāya

    гумаарабан̃хаван̣н̣анаа нидтид̇аа.

    Kumārapañhavaṇṇanā niṭṭhitā.




    Next: 5. ман̇г̇аласуд̇д̇аван̣н̣анаа • 5. Maṅgalasuttavaṇṇanā




    Related texts:



    д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / куд̣̇д̣̇агабаатабаал̣и • Khuddakapāṭhapāḷi / 4. гумаарабан̃хаа • 4. Kumārapañhā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact