| Library / Tipiṭaka / திபிடக • Tipiṭaka / பேதவத்து²-அட்ட²கதா² • Petavatthu-aṭṭhakathā |
6. குமாரபேதவத்து²வண்ணனா
6. Kumārapetavatthuvaṇṇanā
ஸாவத்தி² நாம நக³ரந்தி இத³ங் ஸத்தா² ஜேதவனே விஹரந்தோ த்³வே பேதே ஆரப்³ப⁴ கதே²ஸி. ஸாவத்தி²யங் கிர கோஸலரஞ்ஞோ த்³வே புத்தா பாஸாதி³கா பட²மவயே டி²தா யொப்³ப³னமத³மத்தா பரதா³ரகம்மங் கத்வா காலங் கத்வா பரிகா²பிட்டே² பேதா ஹுத்வா நிப்³ப³த்திங்ஸு. தே ரத்தியங் பே⁴ரவேன ஸத்³தே³ன பரிதே³விங்ஸு. மனுஸ்ஸா தங் ஸுத்வா பீ⁴ததஸிதா ‘‘ஏவங் கதே இத³ங் அவமங்க³லங் வூபஸம்மதீ’’தி பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ மஹாதா³னங் த³த்வா தங் பவத்திங் ப⁴க³வதோ ஆரோசேஸுங். ப⁴க³வா ‘‘உபாஸகா தஸ்ஸ ஸத்³த³ஸ்ஸ ஸவனேன தும்ஹாகங் ந கோசி அந்தராயோ’’தி வத்வா தஸ்ஸ காரணங் ஆசிக்கி²த்வா தேஸங் த⁴ம்மங் தே³ஸேதுங் –
Sāvatthināma nagaranti idaṃ satthā jetavane viharanto dve pete ārabbha kathesi. Sāvatthiyaṃ kira kosalarañño dve puttā pāsādikā paṭhamavaye ṭhitā yobbanamadamattā paradārakammaṃ katvā kālaṃ katvā parikhāpiṭṭhe petā hutvā nibbattiṃsu. Te rattiyaṃ bheravena saddena parideviṃsu. Manussā taṃ sutvā bhītatasitā ‘‘evaṃ kate idaṃ avamaṅgalaṃ vūpasammatī’’ti buddhappamukhassa bhikkhusaṅghassa mahādānaṃ datvā taṃ pavattiṃ bhagavato ārocesuṃ. Bhagavā ‘‘upāsakā tassa saddassa savanena tumhākaṃ na koci antarāyo’’ti vatvā tassa kāraṇaṃ ācikkhitvā tesaṃ dhammaṃ desetuṃ –
746.
746.
‘‘ஸாவத்தி² நாம நக³ரங், ஹிமவந்தஸ்ஸ பஸ்ஸதோ;
‘‘Sāvatthi nāma nagaraṃ, himavantassa passato;
தத்த² ஆஸுங் த்³வே குமாரா, ராஜபுத்தாதி மே ஸுதங்.
Tattha āsuṃ dve kumārā, rājaputtāti me sutaṃ.
747.
747.
‘‘ஸம்மத்தா ரஜனீயேஸு, காமஸ்ஸாதா³பி⁴னந்தி³னோ;
‘‘Sammattā rajanīyesu, kāmassādābhinandino;
பச்சுப்பன்னஸுகே² கி³த்³தா⁴, ந தே பஸ்ஸிங்ஸுனாக³தங்.
Paccuppannasukhe giddhā, na te passiṃsunāgataṃ.
748.
748.
‘‘தே சுதா ச மனுஸ்ஸத்தா, பரலோகங் இதோ க³தா;
‘‘Te cutā ca manussattā, paralokaṃ ito gatā;
தேத⁴ கோ⁴ஸெந்த்யதி³ஸ்ஸந்தா, புப்³பே³ து³க்கடமத்தனோ.
Tedha ghosentyadissantā, pubbe dukkaṭamattano.
749.
749.
‘‘ப³ஹூஸு வத ஸந்தேஸு, தெ³ய்யத⁴ம்மே உபட்டி²தே;
‘‘Bahūsu vata santesu, deyyadhamme upaṭṭhite;
நாஸக்கி²ம்ஹா ச அத்தானங், பரித்தங் காதுங் ஸுகா²வஹங்.
Nāsakkhimhā ca attānaṃ, parittaṃ kātuṃ sukhāvahaṃ.
750.
750.
‘‘கிங் ததோ பாபகங் அஸ்ஸ, யங் நோ ராஜகுலா சுதா;
‘‘Kiṃ tato pāpakaṃ assa, yaṃ no rājakulā cutā;
உபபன்னா பெத்திவிஸயங், கு²ப்பிபாஸஸமப்பிதா.
Upapannā pettivisayaṃ, khuppipāsasamappitā.
751.
751.
‘‘ஸாமினோ இத⁴ ஹுத்வான, ஹொந்தி அஸாமினோ தஹிங்;
‘‘Sāmino idha hutvāna, honti asāmino tahiṃ;
ப⁴மந்தி கு²ப்பிபாஸாய, மனுஸ்ஸா உன்னதோனதா.
Bhamanti khuppipāsāya, manussā unnatonatā.
752.
752.
‘‘ஏதமாதீ³னவங் ஞத்வா, இஸ்ஸரமத³ஸம்ப⁴வங்;
‘‘Etamādīnavaṃ ñatvā, issaramadasambhavaṃ;
பஹாய இஸ்ஸரமத³ங், ப⁴வே ஸக்³க³க³தோ நரோ;
Pahāya issaramadaṃ, bhave saggagato naro;
காயஸ்ஸ பே⁴தா³ ஸப்பஞ்ஞோ, ஸக்³க³ங் ஸோ உபபஜ்ஜதீ’’தி – கா³தா² அபா⁴ஸி;
Kāyassa bhedā sappañño, saggaṃ so upapajjatī’’ti – gāthā abhāsi;
746. தத்த² இதி மே ஸுதந்தி ந கேவலங் அத்தனோ ஞாணேன தி³ட்ட²மேவ, அத² கோ² லோகே பாகடபா⁴வேன ஏவங் மயா ஸுதந்தி அத்தோ².
746. Tattha iti me sutanti na kevalaṃ attano ñāṇena diṭṭhameva, atha kho loke pākaṭabhāvena evaṃ mayā sutanti attho.
747. காமஸ்ஸாதா³பி⁴னந்தி³னோதி காமகு³ணேஸு அஸ்ஸாத³வஸேன அபி⁴னந்த³னஸீலா. பச்சுப்பன்னஸுகே² கி³த்³தா⁴தி வத்தமானஸுக²மத்தே கி³த்³தா⁴ க³தி²தா ஹுத்வா. ந தே பஸ்ஸிங்ஸுனாக³தந்தி து³ச்சரிதங் பஹாய ஸுசரிதங் சரித்வா அனாக³தங் ஆயதிங் தே³வமனுஸ்ஸேஸு லத்³த⁴ப்³ப³ங் ஸுக²ங் தே ந சிந்தேஸுங்.
747.Kāmassādābhinandinoti kāmaguṇesu assādavasena abhinandanasīlā. Paccuppannasukhe giddhāti vattamānasukhamatte giddhā gathitā hutvā. Na te passiṃsunāgatanti duccaritaṃ pahāya sucaritaṃ caritvā anāgataṃ āyatiṃ devamanussesu laddhabbaṃ sukhaṃ te na cintesuṃ.
748. தேத⁴ கோ⁴ஸெந்த்யதி³ஸ்ஸந்தாதி தே புப்³பே³ ராஜபுத்தபூ⁴தா பேதா இத⁴ ஸாவத்தி²யா ஸமீபே அதி³ஸ்ஸமானரூபா கோ⁴ஸெந்தி கந்த³ந்தி. கிங் கந்த³ந்தீதி ஆஹ ‘‘புப்³பே³ து³க்கடமத்தனோ’’தி.
748.Tedha ghosentyadissantāti te pubbe rājaputtabhūtā petā idha sāvatthiyā samīpe adissamānarūpā ghosenti kandanti. Kiṃ kandantīti āha ‘‘pubbe dukkaṭamattano’’ti.
749. இதா³னி தேஸங் கந்த³னஸ்ஸ காரணங் ஹேதுதோ ச ப²லதோ ச விப⁴ஜித்வா த³ஸ்ஸேதுங் ‘‘ப³ஹூஸு வத ஸந்தேஸூ’’திஆதி³ வுத்தங்.
749. Idāni tesaṃ kandanassa kāraṇaṃ hetuto ca phalato ca vibhajitvā dassetuṃ ‘‘bahūsu vata santesū’’tiādi vuttaṃ.
தத்த² ப³ஹூஸு வத ஸந்தேஸூதி அனேகேஸு த³க்கி²ணெய்யேஸு விஜ்ஜமானேஸு. தெ³ய்யத⁴ம்மே உபட்டி²தேதி அத்தனோ ஸந்தகே தா³தப்³ப³தெ³ய்யத⁴ம்மேபி ஸமீபே டி²தே, லப்³ப⁴மானேதி அத்தோ². பரித்தங் ஸுகா²வஹந்தி அப்பமத்தகம்பி ஆயதிங் ஸுகா²வஹங் புஞ்ஞங் கத்வா அத்தானங் ஸொத்தி²ங் நிருபத்³த³வங் காதுங் நாஸக்கி²ம்ஹா வதாதி யோஜனா.
Tattha bahūsu vata santesūti anekesu dakkhiṇeyyesu vijjamānesu. Deyyadhamme upaṭṭhiteti attano santake dātabbadeyyadhammepi samīpe ṭhite, labbhamāneti attho. Parittaṃ sukhāvahanti appamattakampi āyatiṃ sukhāvahaṃ puññaṃ katvā attānaṃ sotthiṃ nirupaddavaṃ kātuṃ nāsakkhimhā vatāti yojanā.
750. கிங் ததோ பாபகங் அஸ்ஸாதி ததோ பாபகங் லாமகங் நாம கிங் அஞ்ஞங் அஸ்ஸ ஸியா. யங் நோ ராஜகுலா சுதாதி யேன பாபகம்மேன மயங் ராஜகுலதோ சுதா இத⁴ பெத்திவிஸயங் உபபன்னா பேதேஸு நிப்³ப³த்தா கு²ப்பிபாஸஸமப்பிதா விசராமாதி அத்தோ².
750.Kiṃ tato pāpakaṃ assāti tato pāpakaṃ lāmakaṃ nāma kiṃ aññaṃ assa siyā. Yaṃ no rājakulā cutāti yena pāpakammena mayaṃ rājakulato cutā idha pettivisayaṃ upapannā petesu nibbattā khuppipāsasamappitā vicarāmāti attho.
751. ஸாமினோ இத⁴ ஹுத்வானாதி இத⁴ இமஸ்மிங் லோகே யஸ்மிங்யேவ டா²னே புப்³பே³ ஸாமினோ ஹுத்வா விசரந்தி, தஹிங் தஸ்மிங்யேவ டா²னே ஹொந்தி அஸ்ஸாமினோ. மனுஸ்ஸா உன்னதோனதாதி மனுஸ்ஸகாலே ஸாமினோ ஹுத்வா காலகதா கம்மவஸேன ஓனதா ப⁴மந்தி கு²ப்பிபாஸாய, பஸ்ஸ ஸங்ஸாரபகதிந்தி த³ஸ்ஸேதி.
751.Sāmino idha hutvānāti idha imasmiṃ loke yasmiṃyeva ṭhāne pubbe sāmino hutvā vicaranti, tahiṃ tasmiṃyeva ṭhāne honti assāmino. Manussā unnatonatāti manussakāle sāmino hutvā kālakatā kammavasena onatā bhamanti khuppipāsāya, passa saṃsārapakatinti dasseti.
752. ஏதமாதீ³னவங் ஞத்வா, இஸ்ஸரமத³ஸம்ப⁴வந்தி ஏதங் இஸ்ஸரியமத³வஸேன ஸம்பூ⁴தங் அபாயூபபத்திஸங்கா²தங் ஆதீ³னவங் தோ³ஸங் ஞத்வா பஹாய இஸ்ஸரியமத³ங் புஞ்ஞப்பஸுதோ ஹுத்வா. ப⁴வே ஸக்³க³க³தோ நரோதி ஸக்³க³ங் தே³வலோகங் க³தோயேவ ப⁴வெய்ய.
752.Etamādīnavaṃ ñatvā, issaramadasambhavanti etaṃ issariyamadavasena sambhūtaṃ apāyūpapattisaṅkhātaṃ ādīnavaṃ dosaṃ ñatvā pahāya issariyamadaṃ puññappasuto hutvā. Bhave saggagato naroti saggaṃ devalokaṃ gatoyeva bhaveyya.
இதி ஸத்தா² தேஸங் பேதானங் பவத்திங் கதெ²த்வா தேஹி மனுஸ்ஸேஹி கதங் தா³னங் தேஸங் பேதானங் உத்³தி³ஸாபெத்வா ஸம்பத்தபரிஸாய அஜ்ஜா²ஸயானுரூபங் த⁴ம்மங் தே³ஸேஸி. ஸா தே³ஸனா மஹாஜனஸ்ஸ ஸாத்தி²கா அஹோஸீதி.
Iti satthā tesaṃ petānaṃ pavattiṃ kathetvā tehi manussehi kataṃ dānaṃ tesaṃ petānaṃ uddisāpetvā sampattaparisāya ajjhāsayānurūpaṃ dhammaṃ desesi. Sā desanā mahājanassa sātthikā ahosīti.
குமாரபேதவத்து²வண்ணனா நிட்டி²தா.
Kumārapetavatthuvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / பேதவத்து²பாளி • Petavatthupāḷi / 6. குமாரபேதவத்து² • 6. Kumārapetavatthu
