| Library / Tipiṭaka / д̇ибидага • Tipiṭaka / бзд̇авад̇т̇у-адтагат̇аа • Petavatthu-aṭṭhakathā |
5. гумаарабзд̇авад̇т̇уван̣н̣анаа
5. Kumārapetavatthuvaṇṇanā
ажчзраруубам̣ суг̇ад̇асса н̃аан̣анд̇и ид̣̇ам̣ гумаарабзд̇авад̇т̇у. д̇асса гаа уббад̇д̇и? саавад̇т̇ияам̣ гира б̣ахуу убаасагаа д̇хаммаг̇ан̣аа худ̇ваа наг̇арз маханд̇ам̣ ман̣д̣абам̣ гаарзд̇ваа д̇ам̣ наанааван̣н̣зхи вад̇т̇зхи алан̇гарид̇ваа гаалассзва сад̇т̇аарам̣ бхигкусан̇гхан̃жа ниманд̇зд̇ваа махаарахаварабажжад̇т̇аран̣ад̇т̇ад̇зсу аасанзсу б̣уд̣̇д̇хаббамукам̣ бхигкусан̇гхам̣ нисийд̣̇аабзд̇ваа г̇анд̇хабубпаад̣̇ийхи бууж̇зд̇ваа махаад̣̇аанам̣ бавад̇д̇знд̇и. д̇ам̣ д̣̇исваа ан̃н̃ад̇аро мажчзрамалабарияудтид̇ажид̇д̇о бурисо д̇ам̣ саггаарам̣ асахамаано звамааха – ‘‘варамзд̇ам̣ саб̣б̣ам̣ сан̇гаарагуудз чад̣д̣ид̇ам̣, на д̇взва имзсам̣ мун̣д̣агаанам̣ д̣̇инна’’нд̇и. д̇ам̣ суд̇ваа убаасагаа сам̣виг̇г̇амаанасаа ‘‘бхаарияам̣ вад̇а иминаа бурисзна баабам̣ басуд̇ам̣, язна звам̣ б̣уд̣̇д̇хаббамукз бхигкусан̇гхз абарад̣̇д̇ха’’нд̇и д̇амад̇т̇ам̣ д̇асса маад̇уяаа аарожзд̇ваа ‘‘г̇ажча, д̇вам̣ сасаавагасан̇гхам̣ бхаг̇аванд̇ам̣ камаабзхий’’д̇и аахам̣су. саа ‘‘саад̇хуу’’д̇и бадиссун̣ид̇ваа буд̇д̇ам̣ санд̇аж̇ж̇знд̇ий сан̃н̃аабзд̇ваа бхаг̇аванд̇ам̣ бхигкусан̇гхан̃жа убасан̇гамид̇ваа буд̇д̇зна гад̇аажжаяам̣ д̣̇зсзнд̇ий камаабзд̇ваа бхаг̇авад̇о бхигкусан̇гхасса жа сад̇д̇аахам̣ яааг̇уд̣̇аанзна бууж̇ам̣ агааси. д̇ассаа буд̇д̇о нажирассзва гаалам̣ гад̇ваа гилидтагаммуубаж̇ийвинияаа г̇ан̣игааяа гужчияам̣ ниб̣б̣ад̇д̇и. саа жа нам̣ ж̇аад̇амад̇д̇ам̣язва ‘‘д̣̇аараго’’д̇и н̃ад̇ваа сусаанз чад̣д̣аабзси. со д̇ад̇т̇а ад̇д̇ано бун̃н̃аб̣алзнзва г̇ахид̇аарагко гзнажи анубад̣̇д̣̇уд̇о маад̇у-ан̇гз вияа сукам̣ суби. д̣̇звад̇аа д̇асса аарагкам̣ г̇ан̣хим̣сууд̇и жа вад̣̇анд̇и.
Accherarūpaṃ sugatassa ñāṇanti idaṃ kumārapetavatthu. Tassa kā uppatti? Sāvatthiyaṃ kira bahū upāsakā dhammagaṇā hutvā nagare mahantaṃ maṇḍapaṃ kāretvā taṃ nānāvaṇṇehi vatthehi alaṅkaritvā kālasseva satthāraṃ bhikkhusaṅghañca nimantetvā mahārahavarapaccattharaṇatthatesu āsanesu buddhappamukhaṃ bhikkhusaṅghaṃ nisīdāpetvā gandhapupphādīhi pūjetvā mahādānaṃ pavattenti. Taṃ disvā aññataro maccheramalapariyuṭṭhitacitto puriso taṃ sakkāraṃ asahamāno evamāha – ‘‘varametaṃ sabbaṃ saṅkārakūṭe chaḍḍitaṃ, na tveva imesaṃ muṇḍakānaṃ dinna’’nti. Taṃ sutvā upāsakā saṃviggamānasā ‘‘bhāriyaṃ vata iminā purisena pāpaṃ pasutaṃ, yena evaṃ buddhappamukhe bhikkhusaṅghe aparaddha’’nti tamatthaṃ tassa mātuyā ārocetvā ‘‘gaccha, tvaṃ sasāvakasaṅghaṃ bhagavantaṃ khamāpehī’’ti āhaṃsu. Sā ‘‘sādhū’’ti paṭissuṇitvā puttaṃ santajjentī saññāpetvā bhagavantaṃ bhikkhusaṅghañca upasaṅkamitvā puttena kataaccayaṃ desentī khamāpetvā bhagavato bhikkhusaṅghassa ca sattāhaṃ yāgudānena pūjaṃ akāsi. Tassā putto nacirasseva kālaṃ katvā kiliṭṭhakammūpajīviniyā gaṇikāya kucchiyaṃ nibbatti. Sā ca naṃ jātamattaṃyeva ‘‘dārako’’ti ñatvā susāne chaḍḍāpesi. So tattha attano puññabaleneva gahitārakkho kenaci anupadduto mātu-aṅke viya sukhaṃ supi. Devatā tassa ārakkhaṃ gaṇhiṃsūti ca vadanti.
ат̇а бхаг̇аваа бажжуусасамаяз махаагарун̣аасамаабад̇д̇ид̇о вудтааяа б̣уд̣̇д̇хажагкунаа логам̣ вологзнд̇о д̇ам̣ д̣̇аарагам̣ сиват̇игааяа чад̣д̣ид̇ам̣ д̣̇исваа суурияуг̇г̇аманавзлааяа сиват̇игам̣ аг̇амааси. ‘‘сад̇т̇аа ид̇хааг̇ад̇о, гааран̣знзд̇т̇а бхавид̇аб̣б̣а’’нд̇и махааж̇ано саннибад̇и. бхаг̇аваа саннибад̇ид̇абарисааяа ‘‘нааяам̣ д̣̇аараго он̃н̃аад̇аб̣б̣о, яад̣̇иби ид̣̇аани сусаанз чад̣д̣ид̇о анаат̇о тид̇о, ааяад̇им̣ бана д̣̇идтзва д̇хаммз абхисамбарааяан̃жа ул̣аарасамбад̇д̇им̣ бадилабхиссад̇ий’’д̇и вад̇ваа д̇зхи мануссзхи ‘‘гим̣ ну ко, бханд̇з, иминаа буримаж̇аад̇ияам̣ гад̇ам̣ гамма’’нд̇и будто –
Atha bhagavā paccūsasamaye mahākaruṇāsamāpattito vuṭṭhāya buddhacakkhunā lokaṃ volokento taṃ dārakaṃ sivathikāya chaḍḍitaṃ disvā sūriyuggamanavelāya sivathikaṃ agamāsi. ‘‘Satthā idhāgato, kāraṇenettha bhavitabba’’nti mahājano sannipati. Bhagavā sannipatitaparisāya ‘‘nāyaṃ dārako oññātabbo, yadipi idāni susāne chaḍḍito anātho ṭhito, āyatiṃ pana diṭṭheva dhamme abhisamparāyañca uḷārasampattiṃ paṭilabhissatī’’ti vatvā tehi manussehi ‘‘kiṃ nu kho, bhante, iminā purimajātiyaṃ kataṃ kamma’’nti puṭṭho –
‘‘б̣уд̣̇д̇хабамукасса бхигкусан̇гхасса, бууж̇ам̣ агааси ж̇анад̇аа ул̣аарам̣;
‘‘Buddhapamukhassa bhikkhusaṅghassa, pūjaṃ akāsi janatā uḷāraṃ;
д̇ад̇расса жид̇д̇ассаху ан̃н̃ат̇ад̇д̇ам̣, ваажам̣ абхааси парусам̣ асаб̣бха’’нд̇и. –
Tatrassa cittassahu aññathattaṃ, vācaṃ abhāsi pharusaṃ asabbha’’nti. –
аад̣̇инаа наязна д̣̇аарагзна гад̇агаммам̣ ааяад̇им̣ бад̇д̇аб̣б̣ам̣ самбад̇д̇ин̃жа багаасзд̇ваа саннибад̇ид̇ааяа барисааяа аж̇жхаасаяаануруубам̣ д̇хаммам̣ гат̇зд̇ваа убари саамуггам̣сигам̣ д̇хаммад̣̇зсанам̣ агааси. сажжабарияосаанз жад̇ураасийд̇ияаа баан̣асахассаанам̣ д̇хаммаабхисамаяо ахоси, д̇ан̃жа д̣̇аарагам̣ асийд̇игодивибхаво зго гудумб̣иго бхаг̇авад̇о саммукаава ‘‘маяхам̣ буд̇д̇о’’д̇и аг̇г̇ахзси. бхаг̇аваа ‘‘зд̇д̇агзна аяам̣ д̣̇аараго рагкид̇о, махааж̇анасса жа ануг̇г̇ахо гад̇о’’д̇и вихаарам̣ аг̇амааси.
Ādinā nayena dārakena katakammaṃ āyatiṃ pattabbaṃ sampattiñca pakāsetvā sannipatitāya parisāya ajjhāsayānurūpaṃ dhammaṃ kathetvā upari sāmukkaṃsikaṃ dhammadesanaṃ akāsi. Saccapariyosāne caturāsītiyā pāṇasahassānaṃ dhammābhisamayo ahosi, tañca dārakaṃ asītikoṭivibhavo eko kuṭumbiko bhagavato sammukhāva ‘‘mayhaṃ putto’’ti aggahesi. Bhagavā ‘‘ettakena ayaṃ dārako rakkhito, mahājanassa ca anuggaho kato’’ti vihāraṃ agamāsi.
со абарзна самаязна д̇асмим̣ гудумб̣игз гаалагад̇з д̇зна нияяаад̣̇ид̇ам̣ д̇ханам̣ бадибаж̇ж̇ид̇ваа гудумб̣ам̣ сан̣табзнд̇о д̇асмим̣ наг̇арзязва махаавибхаво г̇ахабад̇и худ̇ваа д̣̇аанаад̣̇инирад̇о ахоси. ат̇згад̣̇ивасам̣ бхигкуу д̇хаммасабхааяам̣ гат̇ам̣ самудтаабзсум̣ – ‘‘ахо нууна сад̇т̇аа сад̇д̇зсу анугамбаго, соби наама д̣̇аараго д̇ад̣̇аа анаат̇о тид̇о зд̇арахи махад̇им̣ самбад̇д̇им̣ бажжанубхавад̇и, ул̣аараани жа бун̃н̃аани гарод̇ий’’д̇и. д̇ам̣ суд̇ваа сад̇т̇аа ‘‘на, бхигкавз, д̇асса зд̇д̇агаава самбад̇д̇и, ат̇а ко ааяубарияосаанз д̇аавад̇им̣сабхаванз саггасса д̣̇зваран̃н̃о буд̇д̇о худ̇ваа ниб̣б̣ад̇д̇иссад̇и, махад̇им̣ д̣̇иб̣б̣асамбад̇д̇ин̃жа бадилабхиссад̇ий’’д̇и б̣яаагааси. д̇ам̣ суд̇ваа бхигкуу жа махааж̇ано жа ‘‘ид̣̇ам̣ гира гааран̣ам̣ д̣̇исваа д̣̇ийгхад̣̇ассий бхаг̇аваа ж̇аад̇амад̇д̇ассзвасса аамагасусаанз чад̣д̣ид̇асса д̇ад̇т̇а г̇анд̇ваа сан̇г̇ахам̣ агаасий’’д̇и сад̇т̇у н̃аан̣ависзсам̣ т̇омзд̇ваа д̇асмим̣ ад̇д̇абхаавз д̇асса бавад̇д̇им̣ гат̇зсум̣. д̇амад̇т̇ам̣ д̣̇ийбзнд̇аа сан̇г̇ийд̇игаараа –
So aparena samayena tasmiṃ kuṭumbike kālakate tena niyyāditaṃ dhanaṃ paṭipajjitvā kuṭumbaṃ saṇṭhapento tasmiṃ nagareyeva mahāvibhavo gahapati hutvā dānādinirato ahosi. Athekadivasaṃ bhikkhū dhammasabhāyaṃ kathaṃ samuṭṭhāpesuṃ – ‘‘aho nūna satthā sattesu anukampako, sopi nāma dārako tadā anātho ṭhito etarahi mahatiṃ sampattiṃ paccanubhavati, uḷārāni ca puññāni karotī’’ti. Taṃ sutvā satthā ‘‘na, bhikkhave, tassa ettakāva sampatti, atha kho āyupariyosāne tāvatiṃsabhavane sakkassa devarañño putto hutvā nibbattissati, mahatiṃ dibbasampattiñca paṭilabhissatī’’ti byākāsi. Taṃ sutvā bhikkhū ca mahājano ca ‘‘idaṃ kira kāraṇaṃ disvā dīghadassī bhagavā jātamattassevassa āmakasusāne chaḍḍitassa tattha gantvā saṅgahaṃ akāsī’’ti satthu ñāṇavisesaṃ thometvā tasmiṃ attabhāve tassa pavattiṃ kathesuṃ. Tamatthaṃ dīpentā saṅgītikārā –
453.
453.
‘‘ажчзраруубам̣ суг̇ад̇асса н̃аан̣ам̣, сад̇т̇аа яат̇аа буг̇г̇алам̣ б̣яаагааси;
‘‘Accherarūpaṃ sugatassa ñāṇaṃ, satthā yathā puggalaṃ byākāsi;
уссаннабун̃н̃ааби бхаванд̇и хзгз, барид̇д̇абун̃н̃ааби бхаванд̇и хзгз.
Ussannapuññāpi bhavanti heke, parittapuññāpi bhavanti heke.
454.
454.
‘‘аяам̣ гумааро сийват̇игааяа чад̣д̣ид̇о, ан̇г̇удтаснзхзна яаабзд̇и рад̇д̇им̣;
‘‘Ayaṃ kumāro sīvathikāya chaḍḍito, aṅguṭṭhasnehena yāpeti rattiṃ;
на яагкабхууд̇аа на сарийсабаа ваа, вихзтаязяяум̣ гад̇абун̃н̃ам̣ гумаарам̣.
Na yakkhabhūtā na sarīsapā vā, viheṭhayeyyuṃ katapuññaṃ kumāraṃ.
455.
455.
‘‘сунакаабимасса балихим̣су баад̣̇з, д̇хан̇гаа син̇г̇аалаа баривад̇д̇аяанд̇и;
‘‘Sunakhāpimassa palihiṃsu pāde, dhaṅkā siṅgālā parivattayanti;
г̇аб̣бхаасаяам̣ багкиг̇ан̣аа харанд̇и, гаагаа бана агкималам̣ харанд̇и.
Gabbhāsayaṃ pakkhigaṇā haranti, kākā pana akkhimalaṃ haranti.
456.
456.
‘‘наяимасса рагкам̣ вид̣̇ахим̣су гзжи, на осад̇хам̣ саасабад̇хуубанам̣ ваа;
‘‘Nayimassa rakkhaṃ vidahiṃsu keci, na osadhaṃ sāsapadhūpanaṃ vā;
нагкад̇д̇аяог̇амби на аг̇г̇ахзсум̣, на саб̣б̣ад̇хан̃н̃ааниби аагирим̣су.
Nakkhattayogampi na aggahesuṃ, na sabbadhaññānipi ākiriṃsu.
457.
457.
‘‘зд̇аад̣̇исам̣ уд̇д̇амагижчабад̇д̇ам̣, рад̇д̇аабхад̇ам̣ сийват̇игааяа чад̣д̣ид̇ам̣;
‘‘Etādisaṃ uttamakicchapattaṃ, rattābhataṃ sīvathikāya chaḍḍitaṃ;
нонийд̇абин̣д̣ам̣ва бавзд̇хамаанам̣, сасам̣саяам̣ ж̇ийвид̇асаавасзсам̣.
Nonītapiṇḍaṃva pavedhamānaṃ, sasaṃsayaṃ jīvitasāvasesaṃ.
458.
458.
‘‘д̇амад̣̇д̣̇асаа д̣̇звамануссабууж̇ид̇о, д̣̇исваа жа д̇ам̣ б̣яаагари бхуурибан̃н̃о;
‘‘Tamaddasā devamanussapūjito, disvā ca taṃ byākari bhūripañño;
‘аяам̣ гумааро наг̇арассимасса, аг̇г̇агулиго бхависсад̇и бхог̇ад̇о жа’.
‘Ayaṃ kumāro nagarassimassa, aggakuliko bhavissati bhogato ca’.
459.
459.
‘‘гисса вад̇ам̣ гим̣ бана б̣рахмажарияам̣, гисса сужин̣н̣асса аяам̣ вибааго;
‘‘Kissa vataṃ kiṃ pana brahmacariyaṃ, kissa suciṇṇassa ayaṃ vipāko;
зд̇аад̣̇исам̣ б̣яасанам̣ баабун̣ид̇ваа, д̇ам̣ д̇аад̣̇исам̣ бажжанубхоссад̇ид̣̇д̇хи’’нд̇и. –
Etādisaṃ byasanaṃ pāpuṇitvā, taṃ tādisaṃ paccanubhossatiddhi’’nti. –
ча г̇аат̇аа авожум̣.
Cha gāthā avocuṃ.
453. д̇ад̇т̇а ажчзраруубанд̇и ажчарияасабхаавам̣. суг̇ад̇асса н̃аан̣анд̇и ан̃н̃зхи асаад̇хааран̣ам̣ саммаасамб̣уд̣̇д̇хасса н̃аан̣ам̣, аасаяаанусаяан̃аан̣аад̣̇исаб̣б̣ан̃н̃уд̇ан̃н̃аан̣амзва санд̇хааяа вуд̇д̇ам̣. д̇аяид̣̇ам̣ ан̃н̃зсам̣ ависаяабхууд̇ам̣ гат̇ам̣ н̃аан̣анд̇и ааха ‘‘сад̇т̇аа яат̇аа буг̇г̇алам̣ б̣яаагаасий’’д̇и. д̇зна сад̇т̇у д̣̇зсанааяа зва н̃аан̣асса ажчарияабхааво вин̃н̃ааяад̇ийд̇и д̣̇ассзд̇и.
453. Tattha accherarūpanti acchariyasabhāvaṃ. Sugatassa ñāṇanti aññehi asādhāraṇaṃ sammāsambuddhassa ñāṇaṃ, āsayānusayañāṇādisabbaññutaññāṇameva sandhāya vuttaṃ. Tayidaṃ aññesaṃ avisayabhūtaṃ kathaṃ ñāṇanti āha ‘‘satthā yathā puggalaṃ byākāsī’’ti. Tena satthu desanāya eva ñāṇassa acchariyabhāvo viññāyatīti dasseti.
ид̣̇аани б̣яаагаран̣ам̣ д̣̇ассзнд̇о ‘‘уссаннабун̃н̃ааби бхаванд̇и хзгз, барид̇д̇абун̃н̃ааби бхаванд̇и хзгз’’д̇и ааха. д̇ассад̇т̇о – уссаннагусалад̇хаммааби ид̇хзгажжз буг̇г̇алаа лад̣̇д̇хабажжаяасса абун̃н̃асса васзна ж̇аад̇иаад̣̇инаа нихийнаа бхаванд̇и, барид̇д̇абун̃н̃ааби аббад̇арабун̃н̃ад̇хаммааби згз сад̇д̇аа кзд̇д̇асамбад̇д̇иаад̣̇инаа д̇асса бун̃н̃асса махааж̇уд̇игад̇ааяа ул̣аараа бхаванд̇ийд̇и.
Idāni byākaraṇaṃ dassento ‘‘ussannapuññāpi bhavanti heke, parittapuññāpi bhavanti heke’’ti āha. Tassattho – ussannakusaladhammāpi idhekacce puggalā laddhapaccayassa apuññassa vasena jātiādinā nihīnā bhavanti, parittapuññāpi appatarapuññadhammāpi eke sattā khettasampattiādinā tassa puññassa mahājutikatāya uḷārā bhavantīti.
454. сийват̇игааяаад̇и сусаанз. ан̇г̇удтаснзхзнаад̇и ан̇г̇удтад̇о бавад̇д̇аснзхзна, д̣̇звад̇ааяа ан̇г̇удтад̇о баг̇гхарид̇акийрзнаад̇и ад̇т̇о. на яагкабхууд̇аа на сарийсабаа ваад̇и бисаажабхууд̇аа ваа яагкабхууд̇аа ваа сарийсабаа ваа яз гзжи саранд̇аа г̇ажчанд̇аа ваа на вихзтаязяяум̣ на б̣аад̇хзяяум̣.
454.Sīvathikāyāti susāne. Aṅguṭṭhasnehenāti aṅguṭṭhato pavattasnehena, devatāya aṅguṭṭhato paggharitakhīrenāti attho. Na yakkhabhūtā na sarīsapā vāti pisācabhūtā vā yakkhabhūtā vā sarīsapā vā ye keci sarantā gacchantā vā na viheṭhayeyyuṃ na bādheyyuṃ.
455. балихим̣су баад̣̇зд̇и ад̇д̇ано ж̇ивхааяа баад̣̇з лихисум̣. д̇хан̇гаад̇и гаагаа. баривад̇д̇аяанд̇ийд̇и ‘‘маа нам̣ гумаарам̣ гзжи вихзтзяяу’’нд̇и рагканд̇аа нирог̇абхааваж̇аананад̇т̇ам̣ абараабарам̣ баривад̇д̇анд̇и. г̇аб̣бхаасаяанд̇и г̇аб̣бхамалам̣. багкиг̇ан̣аад̇и г̇иж̇жхагулалаад̣̇аяо сагун̣аг̇ан̣аа. харанд̇ийд̇и абанзнд̇и. агкималанд̇и агкиг̇уут̇ам̣.
455.Palihiṃsu pādeti attano jivhāya pāde lihisuṃ. Dhaṅkāti kākā. Parivattayantīti ‘‘mā naṃ kumāraṃ keci viheṭheyyu’’nti rakkhantā nirogabhāvajānanatthaṃ aparāparaṃ parivattanti. Gabbhāsayanti gabbhamalaṃ. Pakkhigaṇāti gijjhakulalādayo sakuṇagaṇā. Harantīti apanenti. Akkhimalanti akkhigūthaṃ.
456. гзжийд̇и гзжи мануссаа, амануссаа бана рагкам̣ сам̣вид̣̇ахим̣су. осад̇ханд̇и д̇ад̣̇аа ааяад̇ин̃жа аарог̇яаавахам̣ аг̇ад̣̇ам̣. саасабад̇хуубанам̣ ваад̇и яам̣ ж̇аад̇асса д̣̇аарагасса рагкан̣ад̇т̇ам̣ саасабзна д̇хуубанам̣ гаронд̇и, д̇амби д̇асса гаронд̇аа наахзсунд̇и д̣̇ийбзнд̇и. нагкад̇д̇аяог̇амби на аг̇г̇ахзсунд̇и нагкад̇д̇аяуд̇д̇амби на г̇ан̣хим̣су. ‘‘асугамхи нагкад̇д̇з д̇ит̇имхи мухуд̇д̇з аяам̣ ж̇аад̇о’’д̇и звам̣ ж̇аад̇агаммамбисса на гзжи агам̣сууд̇и ад̇т̇о. на саб̣б̣ад̇хан̃н̃ааниби аагирим̣сууд̇и ман̇г̇алам̣ гаронд̇аа аг̇ад̣̇авасзна яам̣ саасабад̇зламиссид̇ам̣ саалиаад̣̇ид̇хан̃н̃ам̣ аагиранд̇и, д̇амбисса наагам̣сууд̇и ад̇т̇о.
456.Kecīti keci manussā, amanussā pana rakkhaṃ saṃvidahiṃsu. Osadhanti tadā āyatiñca ārogyāvahaṃ agadaṃ. Sāsapadhūpanaṃ vāti yaṃ jātassa dārakassa rakkhaṇatthaṃ sāsapena dhūpanaṃ karonti, tampi tassa karontā nāhesunti dīpenti. Nakkhattayogampi na aggahesunti nakkhattayuttampi na gaṇhiṃsu. ‘‘Asukamhi nakkhatte tithimhi muhutte ayaṃ jāto’’ti evaṃ jātakammampissa na keci akaṃsūti attho. Na sabbadhaññānipi ākiriṃsūti maṅgalaṃ karontā agadavasena yaṃ sāsapatelamissitaṃ sāliādidhaññaṃ ākiranti, tampissa nākaṃsūti attho.
457. зд̇аад̣̇исанд̇и зваруубам̣ . уд̇д̇амагижчабад̇д̇анд̇и барамагижчам̣ аабаннам̣ ад̇ивияа д̣̇угкаббад̇д̇ам̣. рад̇д̇аабхад̇анд̇и рад̇д̇ияам̣ аабхад̇ам̣. нонийд̇абин̣д̣ам̣ вияаад̇и наванийд̇абин̣д̣асад̣̇исам̣, мам̣сабзсимад̇д̇ад̇аа звам̣ вуд̇д̇ам̣. бавзд̇хамаананд̇и д̣̇уб̣б̣алабхаавзна багамбамаанам̣. сасам̣саяанд̇и ‘‘ж̇ийвад̇и ну ко на ну ко ж̇ийвад̇ий’’д̇и сам̣саяид̇ад̇ааяа сам̣саяаванд̇ам̣. ж̇ийвид̇асаавасзсанд̇и ж̇ийвид̇адтид̇ияаа хзд̇убхууд̇аанам̣ саад̇ханаанам̣ абхаавзна гзвалам̣ ж̇ийвид̇амад̇д̇аавасзсагам̣.
457.Etādisanti evarūpaṃ . Uttamakicchapattanti paramakicchaṃ āpannaṃ ativiya dukkhappattaṃ. Rattābhatanti rattiyaṃ ābhataṃ. Nonītapiṇḍaṃ viyāti navanītapiṇḍasadisaṃ, maṃsapesimattatā evaṃ vuttaṃ. Pavedhamānanti dubbalabhāvena pakampamānaṃ. Sasaṃsayanti ‘‘jīvati nu kho na nu kho jīvatī’’ti saṃsayitatāya saṃsayavantaṃ. Jīvitasāvasesanti jīvitaṭṭhitiyā hetubhūtānaṃ sādhanānaṃ abhāvena kevalaṃ jīvitamattāvasesakaṃ.
458. аг̇г̇агулиго бхависсад̇и бхог̇ад̇о жаад̇и бхог̇анимид̇д̇ам̣ бхог̇асса васзна аг̇г̇агулиго сздтагулиго бхависсад̇ийд̇и ад̇т̇о.
458.Aggakuliko bhavissati bhogato cāti bhoganimittaṃ bhogassa vasena aggakuliko seṭṭhakuliko bhavissatīti attho.
459. ‘‘гисса вад̇а’’нд̇и аяам̣ г̇аат̇аа сад̇т̇у санд̇игз тид̇зхи убаасагзхи д̇зна гад̇агаммасса бужчаавасзна вуд̇д̇аа. саа жа ко сиват̇игааяа саннибад̇ид̇зхийд̇и взд̣̇ид̇аб̣б̣аа. д̇ад̇т̇а гиссаад̇и гим̣ асса. вад̇анд̇и вад̇асамаад̣̇аанам̣. буна гиссаад̇и гийд̣̇исасса сужин̣н̣асса вад̇асса б̣рахмажарияасса жаад̇и вибхад̇д̇им̣ вибарин̣аамзд̇ваа яож̇анаа. зд̇аад̣̇исанд̇и г̇ан̣игааяа гужчияаа ниб̣б̣ад̇д̇анам̣, сусаанз чад̣д̣ананд̇и зваруубам̣. б̣яасананд̇и анад̇т̇ам̣. д̇аад̣̇исанд̇и д̇ат̇ааруубам̣, ‘‘ан̇г̇удтаснзхзна яаабзд̇и рад̇д̇и’’нд̇иаад̣̇инаа, ‘‘аяам̣ гумааро наг̇арассимасса аг̇г̇агулиго бхависсад̇ий’’д̇иаад̣̇инаа жа вуд̇д̇аббагааранд̇и ад̇т̇о. ид̣̇д̇хинд̇и д̣̇звид̣̇д̇хим̣, д̣̇иб̣б̣асамбад̇д̇инд̇и вуд̇д̇ам̣ ход̇и.
459. ‘‘Kissa vata’’nti ayaṃ gāthā satthu santike ṭhitehi upāsakehi tena katakammassa pucchāvasena vuttā. Sā ca kho sivathikāya sannipatitehīti veditabbā. Tattha kissāti kiṃ assa. Vatanti vatasamādānaṃ. Puna kissāti kīdisassa suciṇṇassa vatassa brahmacariyassa cāti vibhattiṃ vipariṇāmetvā yojanā. Etādisanti gaṇikāya kucchiyā nibbattanaṃ, susāne chaḍḍananti evarūpaṃ. Byasananti anatthaṃ. Tādisanti tathārūpaṃ, ‘‘aṅguṭṭhasnehena yāpeti ratti’’ntiādinā, ‘‘ayaṃ kumāro nagarassimassa aggakuliko bhavissatī’’tiādinā ca vuttappakāranti attho. Iddhinti deviddhiṃ, dibbasampattinti vuttaṃ hoti.
ид̣̇аани д̇зхи убаасагзхи будто бхаг̇аваа яат̇аа д̇ад̣̇аа б̣яаагааси, д̇ам̣ д̣̇ассзнд̇аа сан̇г̇ийд̇игаараа –
Idāni tehi upāsakehi puṭṭho bhagavā yathā tadā byākāsi, taṃ dassentā saṅgītikārā –
460.
460.
‘‘б̣уд̣̇д̇хабамукасса бхигкусан̇гхасса, бууж̇ам̣ агааси ж̇анад̇аа ул̣аарам̣;
‘‘Buddhapamukhassa bhikkhusaṅghassa, pūjaṃ akāsi janatā uḷāraṃ;
д̇ад̇расса жид̇д̇ассаху ан̃н̃ат̇ад̇д̇ам̣, ваажам̣ абхааси парусам̣ асаб̣бхам̣.
Tatrassa cittassahu aññathattaṃ, vācaṃ abhāsi pharusaṃ asabbhaṃ.
461.
461.
‘‘со д̇ам̣ вид̇аггам̣ бавинод̣̇аяид̇ваа, бийд̇им̣ басаад̣̇ам̣ бадилад̣̇д̇хаа бажчаа;
‘‘So taṃ vitakkaṃ pavinodayitvā, pītiṃ pasādaṃ paṭiladdhā pacchā;
д̇ат̇ааг̇ад̇ам̣ ж̇зд̇аванз васанд̇ам̣, яааг̇уяаа убадтааси сад̇д̇арад̇д̇ам̣.
Tathāgataṃ jetavane vasantaṃ, yāguyā upaṭṭhāsi sattarattaṃ.
462.
462.
‘‘д̇асса вад̇ам̣ д̇ам̣ бана б̣рахмажарияам̣, д̇асса сужин̣н̣асса аяам̣ вибааго;
‘‘Tassa vataṃ taṃ pana brahmacariyaṃ, tassa suciṇṇassa ayaṃ vipāko;
зд̇аад̣̇исам̣ б̣яасанам̣ баабун̣ид̇ваа, д̇ам̣ д̇аад̣̇исам̣ бажжанубхоссад̇ид̣̇д̇хим̣.
Etādisaṃ byasanaṃ pāpuṇitvā, taṃ tādisaṃ paccanubhossatiddhiṃ.
463.
463.
‘‘тад̇ваана со вассасад̇ам̣ ид̇хзва, саб̣б̣зхи гаамзхи саман̇г̇ибхууд̇о;
‘‘Ṭhatvāna so vassasataṃ idheva, sabbehi kāmehi samaṅgibhūto;
гааяасса бхзд̣̇аа абхисамбарааяам̣, сахаб̣яад̇ам̣ г̇ажчад̇и ваасавассаа’’д̇и. –
Kāyassa bhedā abhisamparāyaṃ, sahabyataṃ gacchati vāsavassā’’ti. –
жад̇ассо г̇аат̇аа авожум̣.
Catasso gāthā avocuṃ.
460. д̇ад̇т̇а ж̇анад̇аад̇и ж̇анасамуухо, убаасагаг̇ан̣од̇и ад̇хиббааяо. д̇ад̇раад̇и д̇ассам̣ бууж̇ааяам̣. ассаад̇и д̇асса д̣̇аарагасса. жид̇д̇ассаху ан̃н̃ат̇ад̇д̇анд̇и буримабхавасмим̣ жид̇д̇асса ан̃н̃ат̇аабхааво анаад̣̇аро аг̇аараво абажжаяо ахоси. асаб̣бханд̇и саад̇хусабхааяа саавзд̇ум̣ аяуд̇д̇ам̣ парусам̣ ваажам̣ абхааси.
460. Tattha janatāti janasamūho, upāsakagaṇoti adhippāyo. Tatrāti tassaṃ pūjāyaṃ. Assāti tassa dārakassa. Cittassahu aññathattanti purimabhavasmiṃ cittassa aññathābhāvo anādaro agāravo apaccayo ahosi. Asabbhanti sādhusabhāya sāvetuṃ ayuttaṃ pharusaṃ vācaṃ abhāsi.
461. сод̇и со аяам̣. д̇ам̣ вид̇агганд̇и д̇ам̣ баабагам̣ вид̇аггам̣. бавинод̣̇аяид̇ваад̇и маад̇араа гад̇ааяа сан̃н̃ад̇д̇ияаа вуубасамзд̇ваа. бийд̇им̣ басаад̣̇ам̣ бадилад̣̇д̇хаад̇и бийд̇им̣ басаад̣̇ан̃жа бадилабхид̇ваа уббаад̣̇зд̇ваа. яааг̇уяаа убадтаасийд̇и яааг̇уд̣̇аанзна убадтахи. сад̇д̇арад̇д̇анд̇и сад̇д̇ад̣̇ивасам̣.
461.Soti so ayaṃ. Taṃ vitakkanti taṃ pāpakaṃ vitakkaṃ. Pavinodayitvāti mātarā katāya saññattiyā vūpasametvā. Pītiṃ pasādaṃ paṭiladdhāti pītiṃ pasādañca paṭilabhitvā uppādetvā. Yāguyā upaṭṭhāsīti yāgudānena upaṭṭhahi. Sattarattanti sattadivasaṃ.
462. д̇асса вад̇ам̣ д̇ам̣ бана б̣рахмажарияанд̇и д̇ам̣ маяаа хздтаа вуд̇д̇аббагаарам̣ ад̇д̇ано жид̇д̇асса басаад̣̇анам̣ д̣̇аанан̃жа имасса буг̇г̇аласса вад̇ам̣ д̇ам̣ б̣рахмажарияан̃жа, ан̃н̃ам̣ гин̃жи над̇т̇ийд̇и ад̇т̇о.
462.Tassavataṃ taṃ pana brahmacariyanti taṃ mayā heṭṭhā vuttappakāraṃ attano cittassa pasādanaṃ dānañca imassa puggalassa vataṃ taṃ brahmacariyañca, aññaṃ kiñci natthīti attho.
463. тад̇ваанаад̇и яаава ааяубарияосаанаа ид̇хзва мануссалогз тад̇ваа. абхисамбарааяанд̇и бунаб̣бхавз. сахаб̣яад̇ам̣ г̇ажчад̇и ваасавассаад̇и саггасса д̣̇зваанаминд̣̇асса буд̇д̇абхаавзна сахабхаавам̣ г̇амиссад̇и. анааг̇ад̇ад̇т̇з хи ид̣̇ам̣ бажжуббаннагаалаважанам̣. сзсам̣ саб̣б̣ад̇т̇а уд̇д̇аанамзваад̇и.
463.Ṭhatvānāti yāva āyupariyosānā idheva manussaloke ṭhatvā. Abhisamparāyanti punabbhave. Sahabyataṃ gacchati vāsavassāti sakkassa devānamindassa puttabhāvena sahabhāvaṃ gamissati. Anāgatatthe hi idaṃ paccuppannakālavacanaṃ. Sesaṃ sabbattha uttānamevāti.
гумаарабзд̇авад̇т̇уван̣н̣анаа нидтид̇аа.
Kumārapetavatthuvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бзд̇авад̇т̇убаал̣и • Petavatthupāḷi / 5. гумаарабзд̇авад̇т̇у • 5. Kumārapetavatthu
