| Library / Tipiṭaka / তিপিটক • Tipiṭaka / দ্ৰেমাতিকাপাল়ি • Dvemātikāpāḷi |
৮. কুমারিভূতৰগ্গো
8. Kumāribhūtavaggo
১-২-৩. পঠমকুমারিভূতাদিসিক্খাপদৰণ্ণনা
1-2-3. Paṭhamakumāribhūtādisikkhāpadavaṇṇanā
কুমারিভূতৰগ্গস্স পঠমদুতিযততিযানি তীহি গিহিগতসিক্খাপদেহি সদিসানেৰ। যা পন তা সব্বপঠমা দ্ৰে মহাসিক্খমানা, তা অতিক্কন্তৰীসতিৰস্সাতি ৰেদিতব্বা। তা হি গিহিগতা ৰা হোন্তু, অগিহিগতা ৰা, সম্মুতিকম্মাদীসু ‘‘সিক্খমানা’’ইচ্চেৰ ৰত্তব্বা, ‘‘গিহিগতা’’তি ৰা ‘‘কুমারিভূতা’’তি ৰা ন ৰত্তব্বা। গিহিগতায দসৰস্সকালে সিক্খাসম্মুতিং দত্ৰা দ্ৰাদসৰস্সকালে উপসম্পদা কাতব্বা, একাদসৰস্সকালে দত্ৰা তেরসৰস্সকালে কাতব্বা, দ্ৰাদসতেরসচুদ্দসপন্নরসসোল়সসত্তরসঅট্ঠারসৰস্সকালে সিক্খাসম্মুতিং দত্ৰা ৰীসতিৰস্সকালে উপসম্পদা কাতব্বা। অট্ঠারসৰস্সকালতো পট্ঠায চ পনাযং ‘‘গিহিগতা’’তিপি ‘‘কুমারিভূতা’’তিপি ৰত্তুং ৰট্টতি। যা পনাযং ‘‘কুমারিভূতা’’তি ৰুত্তা সামণেরী , সা ‘‘গিহিগতা’’তি ন ৰত্তব্বা, ‘‘কুমারিভূতা’’ইচ্চেৰ ৰত্তব্বা। সিক্খাসম্মুতিদানৰসেন পন সব্বাপি ‘‘সিক্খমানা’’তি ৰত্তুং ৰট্টতীতি।
Kumāribhūtavaggassa paṭhamadutiyatatiyāni tīhi gihigatasikkhāpadehi sadisāneva. Yā pana tā sabbapaṭhamā dve mahāsikkhamānā, tā atikkantavīsativassāti veditabbā. Tā hi gihigatā vā hontu, agihigatā vā, sammutikammādīsu ‘‘sikkhamānā’’icceva vattabbā, ‘‘gihigatā’’ti vā ‘‘kumāribhūtā’’ti vā na vattabbā. Gihigatāya dasavassakāle sikkhāsammutiṃ datvā dvādasavassakāle upasampadā kātabbā, ekādasavassakāle datvā terasavassakāle kātabbā, dvādasaterasacuddasapannarasasoḷasasattarasaaṭṭhārasavassakāle sikkhāsammutiṃ datvā vīsativassakāle upasampadā kātabbā. Aṭṭhārasavassakālato paṭṭhāya ca panāyaṃ ‘‘gihigatā’’tipi ‘‘kumāribhūtā’’tipi vattuṃ vaṭṭati. Yā panāyaṃ ‘‘kumāribhūtā’’ti vuttā sāmaṇerī , sā ‘‘gihigatā’’ti na vattabbā, ‘‘kumāribhūtā’’icceva vattabbā. Sikkhāsammutidānavasena pana sabbāpi ‘‘sikkhamānā’’ti vattuṃ vaṭṭatīti.
পঠমকুমারিভূতাদিসিক্খাপদৰণ্ণনা নিট্ঠিতা।
Paṭhamakumāribhūtādisikkhāpadavaṇṇanā niṭṭhitā.
৪. ঊনদ্ৰাদসৰস্সসিক্খাপদৰণ্ণনা
4. Ūnadvādasavassasikkhāpadavaṇṇanā
চতুত্থে ঊনদ্ৰাদসৰস্সাতি উপসম্পদাৰসেন অপরিপুণ্ণদ্ৰাদসৰস্সা। পাচিত্তিযন্তি উপজ্ঝাযা হুত্ৰা ৰুট্ঠাপেন্তিযা ৰুত্তনযেনেৰ দুক্কটানি অন্তরা, কম্মৰাচাপরিযোসানে পাচিত্তিযন্তি।
Catutthe ūnadvādasavassāti upasampadāvasena aparipuṇṇadvādasavassā. Pācittiyanti upajjhāyā hutvā vuṭṭhāpentiyā vuttanayeneva dukkaṭāni antarā, kammavācāpariyosāne pācittiyanti.
ঊনদ্ৰাদসৰস্সসিক্খাপদৰণ্ণনা নিট্ঠিতা।
Ūnadvādasavassasikkhāpadavaṇṇanā niṭṭhitā.
৫. পরিপুণ্ণদ্ৰাদসৰস্সসিক্খাপদৰণ্ণনা
5. Paripuṇṇadvādasavassasikkhāpadavaṇṇanā
পঞ্চমে সঙ্ঘেন অসম্মতাতি যস্সা সঙ্ঘেন পদভাজনে (পাচি॰ ১১৩২) ৰুত্তা ৰুট্ঠাপনসম্মুতি ন দিন্না। সেসং উভযত্থাপি মহাসিক্খমানাসিক্খাপদদ্ৰযসদিসমেৰাতি।
Pañcame saṅghena asammatāti yassā saṅghena padabhājane (pāci. 1132) vuttā vuṭṭhāpanasammuti na dinnā. Sesaṃ ubhayatthāpi mahāsikkhamānāsikkhāpadadvayasadisamevāti.
পরিপুণ্ণদ্ৰাদসৰস্সসিক্খাপদৰণ্ণনা নিট্ঠিতা।
Paripuṇṇadvādasavassasikkhāpadavaṇṇanā niṭṭhitā.
৬. খীযনধম্মসিক্খাপদৰণ্ণনা
6. Khīyanadhammasikkhāpadavaṇṇanā
ছট্ঠে অলং তাৰ তে অয্যে ৰুট্ঠাপিতেনাতি ৰুচ্চমানাতি ৰুট্ঠাপনসম্মুতিযা যাচিতায সঙ্ঘেন উপপরিক্খিপিত্ৰা ‘‘যস্মা বালা অব্যত্তা চ অলজ্জিনী চ হোতি, তস্মা অলং তাৰ তুয্হং উপসম্পাদিতেনা’’তি এৰং নিৰারীযমানা। পচ্ছা খীযনধম্মন্তি পচ্ছা অঞ্ঞাসং ব্যত্তানং লজ্জিনীনং ৰুট্ঠাপনসম্মুতিং দিয্যমানং দিস্ৰা ‘‘অহমেৰ নূন বালা’’তিআদীনি ভণমানা যত্থ কত্থচি খীযেয্য। পাচিত্তিযন্তি এৰং খীযনধম্মং আপজ্জন্তিযা পাচিত্তিযং।
Chaṭṭhe alaṃ tāva te ayye vuṭṭhāpitenāti vuccamānāti vuṭṭhāpanasammutiyā yācitāya saṅghena upaparikkhipitvā ‘‘yasmā bālā abyattā ca alajjinī ca hoti, tasmā alaṃ tāva tuyhaṃ upasampāditenā’’ti evaṃ nivārīyamānā. Pacchā khīyanadhammanti pacchā aññāsaṃ byattānaṃ lajjinīnaṃ vuṭṭhāpanasammutiṃ diyyamānaṃ disvā ‘‘ahameva nūna bālā’’tiādīni bhaṇamānā yattha katthaci khīyeyya. Pācittiyanti evaṃ khīyanadhammaṃ āpajjantiyā pācittiyaṃ.
সাৰত্থিযং চণ্ডকাল়িং আরব্ভ এৰং খীযনধম্মং আপজ্জনৰত্থুস্মিং পঞ্ঞত্তং, পকতিযা ছন্দাদীনং ৰসেন করোন্তীনং খীযন্তিযা, উম্মত্তিকাদীনঞ্চ অনাপত্তি। ৰুট্ঠাপনসম্মুতিযা যাচনং, উপপরিক্খিত্ৰা ন ছন্দাদিৰসেন পটিক্খিত্তায ‘‘সাধূ’’তি পটিস্সৰো, পচ্ছাখীযনন্তি ইমানেত্থ তীণি অঙ্গানি। সমুট্ঠানাদীনি অদিন্নাদানসদিসানি, ইদং পন দুক্খৰেদনন্তি।
Sāvatthiyaṃ caṇḍakāḷiṃ ārabbha evaṃ khīyanadhammaṃ āpajjanavatthusmiṃ paññattaṃ, pakatiyā chandādīnaṃ vasena karontīnaṃ khīyantiyā, ummattikādīnañca anāpatti. Vuṭṭhāpanasammutiyā yācanaṃ, upaparikkhitvā na chandādivasena paṭikkhittāya ‘‘sādhū’’ti paṭissavo, pacchākhīyananti imānettha tīṇi aṅgāni. Samuṭṭhānādīni adinnādānasadisāni, idaṃ pana dukkhavedananti.
খীযনধম্মসিক্খাপদৰণ্ণনা নিট্ঠিতা।
Khīyanadhammasikkhāpadavaṇṇanā niṭṭhitā.
৭-৮. সিক্খমাননৰুট্ঠাপনপঠমদুতিযসিক্খাপদৰণ্ণনা
7-8. Sikkhamānanavuṭṭhāpanapaṭhamadutiyasikkhāpadavaṇṇanā
সত্তমে সা পচ্ছাতি সিক্খমানায উপসম্পদায যাচিযমানায সা ভিক্খুনী এৰং ৰত্ৰা লদ্ধে চীৰরে পচ্ছা অসতি অন্তরাযে ‘‘নেৰ ৰুট্ঠাপেস্সামি , ন ৰুট্ঠাপনায উস্সুক্কং করিস্সামী’’তি ধুরং নিক্খিপেয্য, তস্সা সহ ধুরনিক্খেপেন পাচিত্তিযন্তি। অট্ঠমেপি এসেৰ নযো।
Sattame sā pacchāti sikkhamānāya upasampadāya yāciyamānāya sā bhikkhunī evaṃ vatvā laddhe cīvare pacchā asati antarāye ‘‘neva vuṭṭhāpessāmi , na vuṭṭhāpanāya ussukkaṃ karissāmī’’ti dhuraṃ nikkhipeyya, tassā saha dhuranikkhepena pācittiyanti. Aṭṭhamepi eseva nayo.
উভযম্পি সাৰত্থিযং থুল্লনন্দং আরব্ভ এতেসু ৰত্থূসু পঞ্ঞত্তং, দ্ৰীসুপি সতি অন্তরাযে, পরিযেসিত্ৰা অলভন্তিযা, গিলানায, আপদাসু, উম্মত্তিকাদীনঞ্চ অনাপত্তি। উভযত্থ ‘‘এৰাহং তং ৰুট্ঠাপেস্সামী’’তি পটিঞ্ঞা, আকঙ্খিতনিপ্ফত্তি, পচ্ছা ধুরনিক্খেপো, অনুঞ্ঞাতকারণাভাৰোতি ইমানেত্থ চত্তারি অঙ্গানি। সমুট্ঠানাদীনি সমনুভাসনসদিসানীতি।
Ubhayampi sāvatthiyaṃ thullanandaṃ ārabbha etesu vatthūsu paññattaṃ, dvīsupi sati antarāye, pariyesitvā alabhantiyā, gilānāya, āpadāsu, ummattikādīnañca anāpatti. Ubhayattha ‘‘evāhaṃ taṃ vuṭṭhāpessāmī’’ti paṭiññā, ākaṅkhitanipphatti, pacchā dhuranikkhepo, anuññātakāraṇābhāvoti imānettha cattāri aṅgāni. Samuṭṭhānādīni samanubhāsanasadisānīti.
সিক্খমাননৰুট্ঠাপনপঠমদুতিযসিক্খাপদৰণ্ণনা নিট্ঠিতা।
Sikkhamānanavuṭṭhāpanapaṭhamadutiyasikkhāpadavaṇṇanā niṭṭhitā.
৯. সোকাৰাসসিক্খাপদৰণ্ণনা
9. Sokāvāsasikkhāpadavaṇṇanā
নৰমে সোকাৰাসন্তি সঙ্কেতং কত্ৰা আগচ্ছমানা পুরিসানং অন্তোসোকং পৰেসেতীতি সোকাৰাসা, তং সোকাৰাসং। অথ ৰা ঘরং ৰিয ঘরসামিকা অযম্পি পুরিসসমাগমং অলভমানা সোকং আৰিসতি, ইতি যং আৰিসতি, স্ৰাস্সা আৰাসো হোতীতি সোকাৰাসা। তেনেৰস্স পদভাজনে (পাচি॰ ১১৬০) ‘‘সোকাৰাসা নাম পরেসং দুক্খং উপ্পাদেতি, সোকং আৰিসতী’’তি দ্ৰিধা অত্থো ৰুত্তো। পাচিত্তিযন্তি এৰরূপং ৰুট্ঠাপেন্তিযা ৰুত্তনযেনেৰ কম্মৰাচাপরিযোসানে উপজ্ঝাযায পাচিত্তিযং।
Navame sokāvāsanti saṅketaṃ katvā āgacchamānā purisānaṃ antosokaṃ pavesetīti sokāvāsā, taṃ sokāvāsaṃ. Atha vā gharaṃ viya gharasāmikā ayampi purisasamāgamaṃ alabhamānā sokaṃ āvisati, iti yaṃ āvisati, svāssā āvāso hotīti sokāvāsā. Tenevassa padabhājane (pāci. 1160) ‘‘sokāvāsā nāma paresaṃ dukkhaṃ uppādeti, sokaṃ āvisatī’’ti dvidhā attho vutto. Pācittiyanti evarūpaṃ vuṭṭhāpentiyā vuttanayeneva kammavācāpariyosāne upajjhāyāya pācittiyaṃ.
সাৰত্থিযং থুল্লনন্দং আরব্ভ এৰরূপং সিক্খমানং ৰুট্ঠাপনৰত্থুস্মিং পঞ্ঞত্তং। অজানন্তিযা , উম্মত্তিকাদীনঞ্চ অনাপত্তি। সোকাৰাসতা, জাননং, ৰুট্ঠাপনন্তি ইমানেত্থ তীণি অঙ্গানি। সমুট্ঠানাদীনি গব্ভিনিৰুট্ঠাপনসদিসানেৰাতি।
Sāvatthiyaṃ thullanandaṃ ārabbha evarūpaṃ sikkhamānaṃ vuṭṭhāpanavatthusmiṃ paññattaṃ. Ajānantiyā , ummattikādīnañca anāpatti. Sokāvāsatā, jānanaṃ, vuṭṭhāpananti imānettha tīṇi aṅgāni. Samuṭṭhānādīni gabbhinivuṭṭhāpanasadisānevāti.
সোকাৰাসসিক্খাপদৰণ্ণনা নিট্ঠিতা।
Sokāvāsasikkhāpadavaṇṇanā niṭṭhitā.
১০. অননুঞ্ঞাতসিক্খাপদৰণ্ণনা
10. Ananuññātasikkhāpadavaṇṇanā
দসমে মাতাপিতূহীতি ৰিজাতমাতরা চ জনকপিতরা চ। সামিকেনাতি যেন পরিগ্গহিতা, তেন। অননুঞ্ঞাতন্তি উপসম্পদত্থায অননুঞ্ঞাতং। দ্ৰিক্খত্তুঞ্হি ভিক্খুনীহি আপুচ্ছিতব্বং, পব্বজ্জাকালে চ উপসম্পদাকালে চ, ভিক্খূনং পন সকিং আপুচ্ছিতেপি ৰট্টতি । তস্মা যা উপসম্পদাকালে অনাপুচ্ছা উপসম্পাদেতি, তস্সা ৰুত্তনযেনেৰ পাচিত্তিযং।
Dasame mātāpitūhīti vijātamātarā ca janakapitarā ca. Sāmikenāti yena pariggahitā, tena. Ananuññātanti upasampadatthāya ananuññātaṃ. Dvikkhattuñhi bhikkhunīhi āpucchitabbaṃ, pabbajjākāle ca upasampadākāle ca, bhikkhūnaṃ pana sakiṃ āpucchitepi vaṭṭati . Tasmā yā upasampadākāle anāpucchā upasampādeti, tassā vuttanayeneva pācittiyaṃ.
সাৰত্থিযং থুল্লনন্দং আরব্ভ অননুঞ্ঞাতৰুট্ঠাপনৰত্থুস্মিং পঞ্ঞত্তং। অপলোকেত্ৰা ৰুট্ঠাপেন্তিযা, তেসং অত্থিভাৰং অজানন্তিযা, উম্মত্তিকাদীনঞ্চ অনাপত্তি। অনপলোকনং, অত্থিভাৰজাননং, ৰুট্ঠাপনন্তি ইমানেত্থ তীণি অঙ্গানি। অননুঞ্ঞাতসমুট্ঠানং, কিরিযাকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি।
Sāvatthiyaṃ thullanandaṃ ārabbha ananuññātavuṭṭhāpanavatthusmiṃ paññattaṃ. Apaloketvā vuṭṭhāpentiyā, tesaṃ atthibhāvaṃ ajānantiyā, ummattikādīnañca anāpatti. Anapalokanaṃ, atthibhāvajānanaṃ, vuṭṭhāpananti imānettha tīṇi aṅgāni. Ananuññātasamuṭṭhānaṃ, kiriyākiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
অননুঞ্ঞাতসিক্খাপদৰণ্ণনা নিট্ঠিতা।
Ananuññātasikkhāpadavaṇṇanā niṭṭhitā.
১১. পারিৰাসিকসিক্খাপদৰণ্ণনা
11. Pārivāsikasikkhāpadavaṇṇanā
একাদসমে পারিৰাসিকছন্দদানেনাতি পারিৰাসিযেন ছন্দদানেন। তত্থ চতুব্বিধং পারিৰাসিযং পরিসপারিৰাসিযং রত্তিপারিৰাসিযং ছন্দপারিৰাসিযং অজ্ঝাসযপারিৰাসিযন্তি।
Ekādasame pārivāsikachandadānenāti pārivāsiyena chandadānena. Tattha catubbidhaṃ pārivāsiyaṃ parisapārivāsiyaṃ rattipārivāsiyaṃ chandapārivāsiyaṃ ajjhāsayapārivāsiyanti.
তত্থ পরিসপারিৰাসিযং নাম ভিক্খূ কেনচিদেৰ করণীযেন সন্নিপতিতা হোন্তি, অথ মেঘো ৰা উট্ঠহতি, উস্সারণা ৰা করীযতি, মনুস্সা ৰা অজ্ঝোত্থরন্তা আগচ্ছন্তি, ভিক্খূ ‘‘অনোকাসা মযং, অঞ্ঞত্র গচ্ছামা’’তি ছন্দং অৰিস্সজ্জিত্ৰাৰ উট্ঠহন্তি, ইদং পরিসপারিৰাসিযং নাম, কিঞ্চাপি পরিসপারিৰাসিযং, ছন্দস্স পন অৰিস্সট্ঠত্তা কম্মং কাতুং ৰট্টতি।
Tattha parisapārivāsiyaṃ nāma bhikkhū kenacideva karaṇīyena sannipatitā honti, atha megho vā uṭṭhahati, ussāraṇā vā karīyati, manussā vā ajjhottharantā āgacchanti, bhikkhū ‘‘anokāsā mayaṃ, aññatra gacchāmā’’ti chandaṃ avissajjitvāva uṭṭhahanti, idaṃ parisapārivāsiyaṃ nāma, kiñcāpi parisapārivāsiyaṃ, chandassa pana avissaṭṭhattā kammaṃ kātuṃ vaṭṭati.
পুন ভিক্খূ ‘‘উপোসথাদীনি করিস্সামা’’তি রত্তিং সন্নিপতিত্ৰা ‘‘যাৰ সব্বে সন্নিপতন্তি, তাৰ ধম্মং সুণিস্সামা’’তি একং অজ্ঝেসন্তি, তস্মিং ধম্মকথং কথেন্তেযেৰ অরুণো উগ্গচ্ছতি। সচে ‘‘চাতুদ্দসিকং উপোসথং করিস্সামা’’তি নিসিন্না, ‘‘পন্নরসো’’তি কাতুং ৰট্টতি। সচে পন্নরসিকং কাতুং নিসিন্না, পাটিপদে অনুপোসথে উপোসথং কাতুং ন ৰট্টতি। অঞ্ঞং পন সঙ্ঘকিচ্চং কাতুং ৰট্টতি, ইদং রত্তিপারিৰাসিযং নাম।
Puna bhikkhū ‘‘uposathādīni karissāmā’’ti rattiṃ sannipatitvā ‘‘yāva sabbe sannipatanti, tāva dhammaṃ suṇissāmā’’ti ekaṃ ajjhesanti, tasmiṃ dhammakathaṃ kathenteyeva aruṇo uggacchati. Sace ‘‘cātuddasikaṃ uposathaṃ karissāmā’’ti nisinnā, ‘‘pannaraso’’ti kātuṃ vaṭṭati. Sace pannarasikaṃ kātuṃ nisinnā, pāṭipade anuposathe uposathaṃ kātuṃ na vaṭṭati. Aññaṃ pana saṅghakiccaṃ kātuṃ vaṭṭati, idaṃ rattipārivāsiyaṃ nāma.
পুন ভিক্খূ ‘‘কিঞ্চিদেৰ অব্ভানাদিসঙ্ঘকম্মং করিস্সামা’’তি সন্নিসিন্না হোন্তি, তত্রেকো নক্খত্তপাঠকো ভিক্খু এৰং ৰদতি ‘‘অজ্জ নক্খত্তং দারুণং, মা ইদং কম্মং করোথা’’তি। তে তস্স ৰচনেন ছন্দং ৰিস্সজ্জেত্ৰা তত্থেৰ নিসিন্না হোন্তি, অথঞ্ঞো আগন্ত্ৰা ‘‘নক্খত্তং পতিমানেন্তং, অত্থো বালং উপজ্ঝগা (জা॰ ১.১.৪৯), কিং নক্খত্তেন করোথা’’তি ৰদতি, ইদং ছন্দপারিৰাসিযঞ্চেৰ অজ্ঝাসযপারিৰাসিযঞ্চ। এতস্মিং পারিৰাসিযে পুন ছন্দপারিসুদ্ধিং অনাহরিত্ৰা কম্মং কাতুং ন ৰট্টতি, ইদং সন্ধায ৰুত্তং ‘‘পারিৰাসিকছন্দদানেনা’’তি। পাচিত্তিযন্তি এৰং ৰুট্ঠাপেন্তিযা ৰুত্তনযেনেৰ কম্মৰাচাপরিযোসানে পাচিত্তিযং।
Puna bhikkhū ‘‘kiñcideva abbhānādisaṅghakammaṃ karissāmā’’ti sannisinnā honti, tatreko nakkhattapāṭhako bhikkhu evaṃ vadati ‘‘ajja nakkhattaṃ dāruṇaṃ, mā idaṃ kammaṃ karothā’’ti. Te tassa vacanena chandaṃ vissajjetvā tattheva nisinnā honti, athañño āgantvā ‘‘nakkhattaṃ patimānentaṃ, attho bālaṃ upajjhagā (jā. 1.1.49), kiṃ nakkhattena karothā’’ti vadati, idaṃ chandapārivāsiyañceva ajjhāsayapārivāsiyañca. Etasmiṃ pārivāsiye puna chandapārisuddhiṃ anāharitvā kammaṃ kātuṃ na vaṭṭati, idaṃ sandhāya vuttaṃ ‘‘pārivāsikachandadānenā’’ti. Pācittiyanti evaṃ vuṭṭhāpentiyā vuttanayeneva kammavācāpariyosāne pācittiyaṃ.
রাজগহে থুল্লনন্দং আরব্ভ এৰং ৰুট্ঠাপনৰত্থুস্মিং পঞ্ঞত্তং। ছন্দং অৰিস্সজ্জেত্ৰাৰ অৰুট্ঠিতায পরিসায ৰুট্ঠাপেন্তিযা, উম্মত্তিকাদীনঞ্চ অনাপত্তি। পারিৰাসিকছন্দদানতা, ৰুট্ঠাপনন্তি ইমানেত্থ দ্ৰে অঙ্গানি। সমুট্ঠানাদীনি গম্ভিনিসিক্খাপদসদিসানেৰাতি।
Rājagahe thullanandaṃ ārabbha evaṃ vuṭṭhāpanavatthusmiṃ paññattaṃ. Chandaṃ avissajjetvāva avuṭṭhitāya parisāya vuṭṭhāpentiyā, ummattikādīnañca anāpatti. Pārivāsikachandadānatā, vuṭṭhāpananti imānettha dve aṅgāni. Samuṭṭhānādīni gambhinisikkhāpadasadisānevāti.
পারিৰাসিকসিক্খাপদৰণ্ণনা নিট্ঠিতা।
Pārivāsikasikkhāpadavaṇṇanā niṭṭhitā.
১২. অনুৰস্সসিক্খাপদৰণ্ণনা
12. Anuvassasikkhāpadavaṇṇanā
দ্ৰাদসমে অনুৰস্সন্তি অনুসংৰচ্ছরং। এৰং ৰুট্ঠাপেন্তিযাপি ৰুত্তনযেনেৰ পাচিত্তিযং।
Dvādasame anuvassanti anusaṃvaccharaṃ. Evaṃ vuṭṭhāpentiyāpi vuttanayeneva pācittiyaṃ.
সাৰত্থিযং সম্বহুলা ভিক্খুনিযো আরব্ভ অনুৰস্সং ৰুট্ঠাপনৰত্থুস্মিং পঞ্ঞত্তং। একন্তরিকং ৰুট্ঠাপেন্তিযা, উম্মত্তিকাদীনঞ্চ অনাপত্তি। অনুৰস্সতা, ৰুট্ঠাপনন্তি ইমানেত্থ দ্ৰে অঙ্গানি। সমুট্ঠানাদীনি একাদসমে ৰুত্তনযানেৰাতি।
Sāvatthiyaṃ sambahulā bhikkhuniyo ārabbha anuvassaṃ vuṭṭhāpanavatthusmiṃ paññattaṃ. Ekantarikaṃ vuṭṭhāpentiyā, ummattikādīnañca anāpatti. Anuvassatā, vuṭṭhāpananti imānettha dve aṅgāni. Samuṭṭhānādīni ekādasame vuttanayānevāti.
অনুৰস্সসিক্খাপদৰণ্ণনা নিট্ঠিতা।
Anuvassasikkhāpadavaṇṇanā niṭṭhitā.
১৩. একৰস্সসিক্খাপদৰণ্ণনা
13. Ekavassasikkhāpadavaṇṇanā
তেরসমে একন্তরিকং একং ৰুট্ঠাপেন্তিযা, উম্মত্তিকাদীনঞ্চ অনাপত্তি। সেসং দ্ৰাদসমেন সদিসমেৰাতি।
Terasame ekantarikaṃ ekaṃ vuṭṭhāpentiyā, ummattikādīnañca anāpatti. Sesaṃ dvādasamena sadisamevāti.
একৰস্সসিক্খাপদৰণ্ণনা নিট্ঠিতা।
Ekavassasikkhāpadavaṇṇanā niṭṭhitā.
কুমারিভূতৰগ্গো অট্ঠমো।
Kumāribhūtavaggo aṭṭhamo.
