| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
8. කුමාරීභූතවග්‌ගො
8. Kumārībhūtavaggo
225. ඌනවීසතිවස්‌සං කුමාරිභූතං වුට්‌ඨාපෙන්‌තියා පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? සම්‌බහුලා භික්‌ඛුනියො ආරබ්‌භ . කිස්‌මිං වත්‌ථුස්‌මින්‌ති? සම්‌බහුලා භික්‌ඛුනියො ඌනවීසතිවස්‌සං කුමාරිභූතං වුට්‌ඨාපෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං තීහි සමුට්‌ඨානෙහි සමුට්‌ඨාති…පෙ.….
225. Ūnavīsativassaṃ kumāribhūtaṃ vuṭṭhāpentiyā pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahulā bhikkhuniyo ārabbha . Kismiṃ vatthusminti? Sambahulā bhikkhuniyo ūnavīsativassaṃ kumāribhūtaṃ vuṭṭhāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
පරිපුණ්‌ණවීසතිවස්‌සං කුමාරිභූතං ද්‌වෙ වස්‌සානි ඡසු ධම්‌මෙසු අසික්‌ඛිතසික්‌ඛං වුට්‌ඨාපෙන්‌තියා පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? සම්‌බහුලා භික්‌ඛුනියො ආරබ්‌භ. කිස්‌මිං වත්‌ථුස්‌මින්‌ති? සම්‌බහුලා භික්‌ඛුනියො පරිපුණ්‌ණවීසතිවස්‌සං කුමාරිභූතං ද්‌වෙ වස්‌සානි ඡසු ධම්‌මෙසු අසික්‌ඛිතසික්‌ඛං වුට්‌ඨාපෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං තීහි සමුට්‌ඨානෙහි සමුට්‌ඨාති…පෙ.….
Paripuṇṇavīsativassaṃ kumāribhūtaṃ dve vassāni chasu dhammesu asikkhitasikkhaṃ vuṭṭhāpentiyā pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahulā bhikkhuniyo ārabbha. Kismiṃ vatthusminti? Sambahulā bhikkhuniyo paripuṇṇavīsativassaṃ kumāribhūtaṃ dve vassāni chasu dhammesu asikkhitasikkhaṃ vuṭṭhāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
පරිපුණ්‌ණවීසතිවස්‌සං කුමාරිභූතං ද්‌වෙ වස්‌සානි ඡසු ධම්‌මෙසු සික්‌ඛිතසික්‌ඛං සඞ්‌ඝෙන අසම්‌මතං වුට්‌ඨාපෙන්‌තියා පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? සම්‌බහුලා භික්‌ඛුනියො ආරබ්‌භ. කිස්‌මිං වත්‌ථුස්‌මින්‌ති? සම්‌බහුලා භික්‌ඛුනියො පරිපුණ්‌ණවීසතිවස්‌සං කුමාරිභූතං ද්‌වෙ වස්‌සානි ඡසු ධම්‌මෙසු සික්‌ඛිතසික්‌ඛං සඞ්‌ඝෙන අසම්‌මතං වුට්‌ඨාපෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං තීහි සමුට්‌ඨානෙහි සමුට්‌ඨාති…පෙ.….
Paripuṇṇavīsativassaṃ kumāribhūtaṃ dve vassāni chasu dhammesu sikkhitasikkhaṃ saṅghena asammataṃ vuṭṭhāpentiyā pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahulā bhikkhuniyo ārabbha. Kismiṃ vatthusminti? Sambahulā bhikkhuniyo paripuṇṇavīsativassaṃ kumāribhūtaṃ dve vassāni chasu dhammesu sikkhitasikkhaṃ saṅghena asammataṃ vuṭṭhāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
ඌනද්‌වාදසවස්‌සාය වුට්‌ඨාපෙන්‌තියා පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? සම්‌බහුලා භික්‌ඛුනියො ආරබ්‌භ. කිස්‌මිං වත්‌ථුස්‌මින්‌ති? සම්‌බහුලා භික්‌ඛුනියො ඌනද්‌වාදසවස්‌සා වුට්‌ඨාපෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං තීහි සමුට්‌ඨානෙහි සමුට්‌ඨාති…පෙ.….
Ūnadvādasavassāya vuṭṭhāpentiyā pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahulā bhikkhuniyo ārabbha. Kismiṃ vatthusminti? Sambahulā bhikkhuniyo ūnadvādasavassā vuṭṭhāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
පරිපුණ්‌ණද්‌වාදසවස්‌සාය සඞ්‌ඝෙන අසම්‌මතාය වුට්‌ඨාපෙන්‌තියා පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? සම්‌බහුලා භික්‌ඛුනියො ආරබ්‌භ. කිස්‌මිං වත්‌ථුස්‌මින්‌ති? සම්‌බහුලා භික්‌ඛුනියො පරිපුණ්‌ණද්‌වාදසවස්‌සා සඞ්‌ඝෙන අසම්‌මතා වුට්‌ඨාපෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං තීහි සමුට්‌ඨානෙහි සමුට්‌ඨාති – දුතියපාරාජිකෙ…පෙ.….
Paripuṇṇadvādasavassāya saṅghena asammatāya vuṭṭhāpentiyā pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahulā bhikkhuniyo ārabbha. Kismiṃ vatthusminti? Sambahulā bhikkhuniyo paripuṇṇadvādasavassā saṅghena asammatā vuṭṭhāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti – dutiyapārājike…pe….
‘‘අලං තාව තෙ, අය්‍යෙ, වුට්‌ඨාපිතෙනා’’ති වුච්‌චමානාය ‘‘සාධූ’’ති පටිස්‌සුණිත්‌වා පච්‌ඡා ඛීයනධම්‌මං ආපජ්‌ජන්‌තියා පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? චණ්‌ඩකාළිං භික්‌ඛුනිං ආරබ්‌භ. කිස්‌මිං වත්‌ථුස්‌මින්‌ති? චණ්‌ඩකාළී භික්‌ඛුනී ‘‘අලං තාව තෙ, අය්‍යෙ, වුට්‌ඨාපිතෙනා’’ති වුච්‌චමානා ‘‘සාධූ’’ති පටිස්‌සුණිත්‌වා පච්‌ඡා ඛීයනධම්‌මං ආපජ්‌ජි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං තීහි සමුට්‌ඨානෙහි සමුට්‌ඨාති…පෙ.….
‘‘Alaṃ tāva te, ayye, vuṭṭhāpitenā’’ti vuccamānāya ‘‘sādhū’’ti paṭissuṇitvā pacchā khīyanadhammaṃ āpajjantiyā pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Caṇḍakāḷiṃ bhikkhuniṃ ārabbha. Kismiṃ vatthusminti? Caṇḍakāḷī bhikkhunī ‘‘alaṃ tāva te, ayye, vuṭṭhāpitenā’’ti vuccamānā ‘‘sādhū’’ti paṭissuṇitvā pacchā khīyanadhammaṃ āpajji, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
සික්‌ඛමානං – ‘‘සචෙ මෙ ත්‌වං, අය්‍යෙ, චීවරං දස්‌සසි, එවාහං තං වුට්‌ඨාපෙස්‌සාමී’’ති වත්‌වා නෙව වුට්‌ඨාපෙන්‌තියා න වුට්‌ඨාපනාය උස්‌සුක්‌කං කරොන්‌තියා පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ථුල්‌ලනන්‌දං භික්‌ඛුනිං ආරබ්‌භ. කිස්‌මිං වත්‌ථුස්‌මින්‌ති? ථුල්‌ලනන්‌දා භික්‌ඛුනී සික්‌ඛමානං – ‘‘සචෙ මෙ ත්‌වං, අය්‍යෙ, චීවරං දස්‌සසි, එවාහං තං වුට්‌ඨාපෙස්‌සාමී’’ති වත්‌වා නෙව වුට්‌ඨාපෙසි න වුට්‌ඨාපනාය උස්‌සුක්‌කං අකාසි , තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං එකෙන සමුට්‌ඨානෙන සමුට්‌ඨාති – ධුරනික්‌ඛෙපෙ…පෙ.….
Sikkhamānaṃ – ‘‘sace me tvaṃ, ayye, cīvaraṃ dassasi, evāhaṃ taṃ vuṭṭhāpessāmī’’ti vatvā neva vuṭṭhāpentiyā na vuṭṭhāpanāya ussukkaṃ karontiyā pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Thullanandaṃ bhikkhuniṃ ārabbha. Kismiṃ vatthusminti? Thullanandā bhikkhunī sikkhamānaṃ – ‘‘sace me tvaṃ, ayye, cīvaraṃ dassasi, evāhaṃ taṃ vuṭṭhāpessāmī’’ti vatvā neva vuṭṭhāpesi na vuṭṭhāpanāya ussukkaṃ akāsi , tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – dhuranikkhepe…pe….
සික්‌ඛමානං – ‘‘සචෙ මං ත්‌වං, අය්‍යෙ, ද්‌වෙ වස්‌සානි අනුබන්‌ධිස්‌සසි, එවාහං තං වුට්‌ඨාපෙස්‌සාමී’’ති වත්‌වා නෙව වුට්‌ඨාපෙන්‌තියා න වුට්‌ඨාපනාය උස්‌සුක්‌කං කරොන්‌තියා පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ථුල්‌ලනන්‌දං භික්‌ඛුනිං ආරබ්‌භ. කිස්‌මිං වත්‌ථුස්‌මින්‌ති? ථුල්‌ලනන්‌දා භික්‌ඛුනී සික්‌ඛමානං – ‘‘සචෙ මං ත්‌වං, අය්‍යෙ, ද්‌වෙ වස්‌සානි අනුබන්‌ධිස්‌සසි, එවාහං තං වුට්‌ඨාපෙස්‌සාමී’’ති වත්‌වා නෙව වුට්‌ඨාපෙසි න වුට්‌ඨාපනාය උස්‌සුක්‌කං අකාසි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං එකෙන සමුට්‌ඨානෙන සමුට්‌ඨාති – ධුරනික්‌ඛෙපෙ…පෙ.….
Sikkhamānaṃ – ‘‘sace maṃ tvaṃ, ayye, dve vassāni anubandhissasi, evāhaṃ taṃ vuṭṭhāpessāmī’’ti vatvā neva vuṭṭhāpentiyā na vuṭṭhāpanāya ussukkaṃ karontiyā pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Thullanandaṃ bhikkhuniṃ ārabbha. Kismiṃ vatthusminti? Thullanandā bhikkhunī sikkhamānaṃ – ‘‘sace maṃ tvaṃ, ayye, dve vassāni anubandhissasi, evāhaṃ taṃ vuṭṭhāpessāmī’’ti vatvā neva vuṭṭhāpesi na vuṭṭhāpanāya ussukkaṃ akāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – dhuranikkhepe…pe….
පුරිසසංසට්‌ඨං කුමාරකසංසට්‌ඨං චණ්‌ඩිං සොකාවාසං සික්‌ඛමානං වුට්‌ඨාපෙන්‌තියා පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ථුල්‌ලනන්‌දං භික්‌ඛුනිං ආරබ්‌භ. කිස්‌මිං වත්‌ථුස්‌මින්‌ති? ථුල්‌ලනන්‌දා භික්‌ඛුනී පුරිසසංසට්‌ඨං කුමාරකසංසට්‌ඨං චණ්‌ඩිං සොකාවාසං සික්‌ඛමානං වුට්‌ඨාපෙසි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං තීහි සමුට්‌ඨානෙහි සමුට්‌ඨාති…පෙ.….
Purisasaṃsaṭṭhaṃ kumārakasaṃsaṭṭhaṃ caṇḍiṃ sokāvāsaṃ sikkhamānaṃ vuṭṭhāpentiyā pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Thullanandaṃ bhikkhuniṃ ārabbha. Kismiṃ vatthusminti? Thullanandā bhikkhunī purisasaṃsaṭṭhaṃ kumārakasaṃsaṭṭhaṃ caṇḍiṃ sokāvāsaṃ sikkhamānaṃ vuṭṭhāpesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
මාතාපිතූහි වා සාමිකෙන වා අනනුඤ්‌ඤාතං සික්‌ඛමානං වුට්‌ඨාපෙන්‌තියා පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ථුල්‌ලනන්‌දං භික්‌ඛුනිං ආරබ්‌භ. කිස්‌මිං වත්‌ථුස්‌මින්‌ති? ථුල්‌ලනන්‌දා භික්‌ඛුනී මාතාපිතූහිපි සාමිකෙනාපි අනනුඤ්‌ඤාතං සික්‌ඛමානං වුට්‌ඨාපෙසි , තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං චතූහි සමුට්‌ඨානෙහි සමුට්‌ඨාති – සියා වාචතො සමුට්‌ඨාති, න කායතො න චිත්‌තතො; සියා කායතො ච වාචතො ච සමුට්‌ඨාති, න චිත්‌තතො; සියා වාචතො ච චිත්‌තතො ච සමුට්‌ඨාති, න කායතො; සියා කායතො ච වාචතො ච චිත්‌තතො ච සමුට්‌ඨාති…පෙ.….
Mātāpitūhi vā sāmikena vā ananuññātaṃ sikkhamānaṃ vuṭṭhāpentiyā pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Thullanandaṃ bhikkhuniṃ ārabbha. Kismiṃ vatthusminti? Thullanandā bhikkhunī mātāpitūhipi sāmikenāpi ananuññātaṃ sikkhamānaṃ vuṭṭhāpesi , tasmiṃ vatthusmiṃ. Ekā paññatti. Channaṃ āpattisamuṭṭhānānaṃ catūhi samuṭṭhānehi samuṭṭhāti – siyā vācato samuṭṭhāti, na kāyato na cittato; siyā kāyato ca vācato ca samuṭṭhāti, na cittato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
පාරිවාසිකඡන්‌දදානෙන සික්‌ඛමානං වුට්‌ඨාපෙන්‌තියා පාචිත්‌තියං කත්‌ථ පඤ්‌ඤත්‌තන්‌ති? රාජගහෙ පඤ්‌ඤත්‌තං. කං ආරබ්‌භාති? ථුල්‌ලනන්‌දං භික්‌ඛුනිං ආරබ්‌භ. කිස්‌මිං වත්‌ථුස්‌මින්‌ති? ථුල්‌ලනන්‌දා භික්‌ඛුනී පාරිවාසිකඡන්‌දදානෙන සික්‌ඛමානං වුට්‌ඨාපෙසි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං තීහි සමුට්‌ඨානෙහි සමුට්‌ඨාති…පෙ.….
Pārivāsikachandadānena sikkhamānaṃ vuṭṭhāpentiyā pācittiyaṃ kattha paññattanti? Rājagahe paññattaṃ. Kaṃ ārabbhāti? Thullanandaṃ bhikkhuniṃ ārabbha. Kismiṃ vatthusminti? Thullanandā bhikkhunī pārivāsikachandadānena sikkhamānaṃ vuṭṭhāpesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
අනුවස්‌සං වුට්‌ඨාපෙන්‌තියා පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? සම්‌බහුලා භික්‌ඛුනියො ආරබ්‌භ. කිස්‌මිං වත්‌ථුස්‌මින්‌ති? සම්‌බහුලා භික්‌ඛුනියො අනුවස්‌සං වුට්‌ඨාපෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං තීහි සමුට්‌ඨානෙහි සමුට්‌ඨාති…පෙ.….
Anuvassaṃ vuṭṭhāpentiyā pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahulā bhikkhuniyo ārabbha. Kismiṃ vatthusminti? Sambahulā bhikkhuniyo anuvassaṃ vuṭṭhāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
එකං වස්‌සං ද්‌වෙ වුට්‌ඨාපෙන්‌තියා පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? සම්‌බහුලා භික්‌ඛුනියො ආරබ්‌භ. කිස්‌මිං වත්‌ථුස්‌මින්‌ති? සම්‌බහුලා භික්‌ඛුනියො එකං වස්‌සං ද්‌වෙ වුට්‌ඨාපෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං තීහි සමුට්‌ඨානෙහි සමුට්‌ඨාති…පෙ.….
Ekaṃ vassaṃ dve vuṭṭhāpentiyā pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahulā bhikkhuniyo ārabbha. Kismiṃ vatthusminti? Sambahulā bhikkhuniyo ekaṃ vassaṃ dve vuṭṭhāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
කුමාරීභූතවග්‌ගො අට්‌ඨමො.
Kumārībhūtavaggo aṭṭhamo.
