| Library / Tipiṭaka / ཏིཔིཊཀ • Tipiṭaka / དྭེམཱཏིཀཱཔཱལི༹ • Dvemātikāpāḷi |
༨. ཀུམཱརིབྷཱུཏཝགྒོ
8. Kumāribhūtavaggo
༡-༢-༣. པཋམཀུམཱརིབྷཱུཏཱདིསིཀྑཱཔདཝཎྞནཱ
1-2-3. Paṭhamakumāribhūtādisikkhāpadavaṇṇanā
ཀུམཱརིབྷཱུཏཝགྒསྶ པཋམདུཏིཡཏཏིཡཱནི ཏཱིཧི གིཧིགཏསིཀྑཱཔདེཧི སདིསཱནེཝ། ཡཱ པན ཏཱ སབྦཔཋམཱ དྭེ མཧཱསིཀྑམཱནཱ, ཏཱ ཨཏིཀྐནྟཝཱིསཏིཝསྶཱཏི ཝེདིཏབྦཱ། ཏཱ ཧི གིཧིགཏཱ ཝཱ ཧོནྟུ, ཨགིཧིགཏཱ ཝཱ, སམྨུཏིཀམྨཱདཱིསུ ‘‘སིཀྑམཱནཱ’’ཨིཙྩེཝ ཝཏྟབྦཱ, ‘‘གིཧིགཏཱ’’ཏི ཝཱ ‘‘ཀུམཱརིབྷཱུཏཱ’’ཏི ཝཱ ན ཝཏྟབྦཱ། གིཧིགཏཱཡ དསཝསྶཀཱལེ སིཀྑཱསམྨུཏིཾ དཏྭཱ དྭཱདསཝསྶཀཱལེ ཨུཔསམྤདཱ ཀཱཏབྦཱ, ཨེཀཱདསཝསྶཀཱལེ དཏྭཱ ཏེརསཝསྶཀཱལེ ཀཱཏབྦཱ, དྭཱདསཏེརསཙུདྡསཔནྣརསསོལ༹སསཏྟརསཨཊྛཱརསཝསྶཀཱལེ སིཀྑཱསམྨུཏིཾ དཏྭཱ ཝཱིསཏིཝསྶཀཱལེ ཨུཔསམྤདཱ ཀཱཏབྦཱ། ཨཊྛཱརསཝསྶཀཱལཏོ པཊྛཱཡ ཙ པནཱཡཾ ‘‘གིཧིགཏཱ’’ཏིཔི ‘‘ཀུམཱརིབྷཱུཏཱ’’ཏིཔི ཝཏྟུཾ ཝཊྚཏི། ཡཱ པནཱཡཾ ‘‘ཀུམཱརིབྷཱུཏཱ’’ཏི ཝུཏྟཱ སཱམཎེརཱི , སཱ ‘‘གིཧིགཏཱ’’ཏི ན ཝཏྟབྦཱ, ‘‘ཀུམཱརིབྷཱུཏཱ’’ཨིཙྩེཝ ཝཏྟབྦཱ། སིཀྑཱསམྨུཏིདཱནཝསེན པན སབྦཱཔི ‘‘སིཀྑམཱནཱ’’ཏི ཝཏྟུཾ ཝཊྚཏཱིཏི།
Kumāribhūtavaggassa paṭhamadutiyatatiyāni tīhi gihigatasikkhāpadehi sadisāneva. Yā pana tā sabbapaṭhamā dve mahāsikkhamānā, tā atikkantavīsativassāti veditabbā. Tā hi gihigatā vā hontu, agihigatā vā, sammutikammādīsu ‘‘sikkhamānā’’icceva vattabbā, ‘‘gihigatā’’ti vā ‘‘kumāribhūtā’’ti vā na vattabbā. Gihigatāya dasavassakāle sikkhāsammutiṃ datvā dvādasavassakāle upasampadā kātabbā, ekādasavassakāle datvā terasavassakāle kātabbā, dvādasaterasacuddasapannarasasoḷasasattarasaaṭṭhārasavassakāle sikkhāsammutiṃ datvā vīsativassakāle upasampadā kātabbā. Aṭṭhārasavassakālato paṭṭhāya ca panāyaṃ ‘‘gihigatā’’tipi ‘‘kumāribhūtā’’tipi vattuṃ vaṭṭati. Yā panāyaṃ ‘‘kumāribhūtā’’ti vuttā sāmaṇerī , sā ‘‘gihigatā’’ti na vattabbā, ‘‘kumāribhūtā’’icceva vattabbā. Sikkhāsammutidānavasena pana sabbāpi ‘‘sikkhamānā’’ti vattuṃ vaṭṭatīti.
པཋམཀུམཱརིབྷཱུཏཱདིསིཀྑཱཔདཝཎྞནཱ ནིཊྛིཏཱ།
Paṭhamakumāribhūtādisikkhāpadavaṇṇanā niṭṭhitā.
༤. ཨཱུནདྭཱདསཝསྶསིཀྑཱཔདཝཎྞནཱ
4. Ūnadvādasavassasikkhāpadavaṇṇanā
ཙཏུཏྠེ ཨཱུནདྭཱདསཝསྶཱཏི ཨུཔསམྤདཱཝསེན ཨཔརིཔུཎྞདྭཱདསཝསྶཱ། པཱཙིཏྟིཡནྟི ཨུཔཛ྄ཛྷཱཡཱ ཧུཏྭཱ ཝུཊྛཱཔེནྟིཡཱ ཝུཏྟནཡེནེཝ དུཀྐཊཱནི ཨནྟརཱ, ཀམྨཝཱཙཱཔརིཡོསཱནེ པཱཙིཏྟིཡནྟི།
Catutthe ūnadvādasavassāti upasampadāvasena aparipuṇṇadvādasavassā. Pācittiyanti upajjhāyā hutvā vuṭṭhāpentiyā vuttanayeneva dukkaṭāni antarā, kammavācāpariyosāne pācittiyanti.
ཨཱུནདྭཱདསཝསྶསིཀྑཱཔདཝཎྞནཱ ནིཊྛིཏཱ།
Ūnadvādasavassasikkhāpadavaṇṇanā niṭṭhitā.
༥. པརིཔུཎྞདྭཱདསཝསྶསིཀྑཱཔདཝཎྞནཱ
5. Paripuṇṇadvādasavassasikkhāpadavaṇṇanā
པཉྩམེ སངྒྷེན ཨསམྨཏཱཏི ཡསྶཱ སངྒྷེན པདབྷཱཛནེ (པཱཙི॰ ༡༡༣༢) ཝུཏྟཱ ཝུཊྛཱཔནསམྨུཏི ན དིནྣཱ། སེསཾ ཨུབྷཡཏྠཱཔི མཧཱསིཀྑམཱནཱསིཀྑཱཔདདྭཡསདིསམེཝཱཏི།
Pañcame saṅghena asammatāti yassā saṅghena padabhājane (pāci. 1132) vuttā vuṭṭhāpanasammuti na dinnā. Sesaṃ ubhayatthāpi mahāsikkhamānāsikkhāpadadvayasadisamevāti.
པརིཔུཎྞདྭཱདསཝསྶསིཀྑཱཔདཝཎྞནཱ ནིཊྛིཏཱ།
Paripuṇṇadvādasavassasikkhāpadavaṇṇanā niṭṭhitā.
༦. ཁཱིཡནདྷམྨསིཀྑཱཔདཝཎྞནཱ
6. Khīyanadhammasikkhāpadavaṇṇanā
ཚཊྛེ ཨལཾ ཏཱཝ ཏེ ཨཡྻེ ཝུཊྛཱཔིཏེནཱཏི ཝུཙྩམཱནཱཏི ཝུཊྛཱཔནསམྨུཏིཡཱ ཡཱཙིཏཱཡ སངྒྷེན ཨུཔཔརིཀྑིཔིཏྭཱ ‘‘ཡསྨཱ བཱལཱ ཨབྱཏྟཱ ཙ ཨལཛྫིནཱི ཙ ཧོཏི, ཏསྨཱ ཨལཾ ཏཱཝ ཏུཡ྄ཧཾ ཨུཔསམྤཱདིཏེནཱ’’ཏི ཨེཝཾ ནིཝཱརཱིཡམཱནཱ། པཙྪཱ ཁཱིཡནདྷམྨནྟི པཙྪཱ ཨཉྙཱསཾ བྱཏྟཱནཾ ལཛྫིནཱིནཾ ཝུཊྛཱཔནསམྨུཏིཾ དིཡྻམཱནཾ དིསྭཱ ‘‘ཨཧམེཝ ནཱུན བཱལཱ’’ཏིཨཱདཱིནི བྷཎམཱནཱ ཡཏྠ ཀཏྠཙི ཁཱིཡེཡྻ། པཱཙིཏྟིཡནྟི ཨེཝཾ ཁཱིཡནདྷམྨཾ ཨཱཔཛྫནྟིཡཱ པཱཙིཏྟིཡཾ།
Chaṭṭhe alaṃ tāva te ayye vuṭṭhāpitenāti vuccamānāti vuṭṭhāpanasammutiyā yācitāya saṅghena upaparikkhipitvā ‘‘yasmā bālā abyattā ca alajjinī ca hoti, tasmā alaṃ tāva tuyhaṃ upasampāditenā’’ti evaṃ nivārīyamānā. Pacchā khīyanadhammanti pacchā aññāsaṃ byattānaṃ lajjinīnaṃ vuṭṭhāpanasammutiṃ diyyamānaṃ disvā ‘‘ahameva nūna bālā’’tiādīni bhaṇamānā yattha katthaci khīyeyya. Pācittiyanti evaṃ khīyanadhammaṃ āpajjantiyā pācittiyaṃ.
སཱཝཏྠིཡཾ ཙཎྜཀཱལི༹ཾ ཨཱརབྦྷ ཨེཝཾ ཁཱིཡནདྷམྨཾ ཨཱཔཛྫནཝཏྠུསྨིཾ པཉྙཏྟཾ, པཀཏིཡཱ ཚནྡཱདཱིནཾ ཝསེན ཀརོནྟཱིནཾ ཁཱིཡནྟིཡཱ, ཨུམྨཏྟིཀཱདཱིནཉྩ ཨནཱཔཏྟི། ཝུཊྛཱཔནསམྨུཏིཡཱ ཡཱཙནཾ, ཨུཔཔརིཀྑིཏྭཱ ན ཚནྡཱདིཝསེན པཊིཀྑིཏྟཱཡ ‘‘སཱདྷཱུ’’ཏི པཊིསྶཝོ, པཙྪཱཁཱིཡནནྟི ཨིམཱནེཏྠ ཏཱིཎི ཨངྒཱནི། སམུཊྛཱནཱདཱིནི ཨདིནྣཱདཱནསདིསཱནི, ཨིདཾ པན དུཀྑཝེདནནྟི།
Sāvatthiyaṃ caṇḍakāḷiṃ ārabbha evaṃ khīyanadhammaṃ āpajjanavatthusmiṃ paññattaṃ, pakatiyā chandādīnaṃ vasena karontīnaṃ khīyantiyā, ummattikādīnañca anāpatti. Vuṭṭhāpanasammutiyā yācanaṃ, upaparikkhitvā na chandādivasena paṭikkhittāya ‘‘sādhū’’ti paṭissavo, pacchākhīyananti imānettha tīṇi aṅgāni. Samuṭṭhānādīni adinnādānasadisāni, idaṃ pana dukkhavedananti.
ཁཱིཡནདྷམྨསིཀྑཱཔདཝཎྞནཱ ནིཊྛིཏཱ།
Khīyanadhammasikkhāpadavaṇṇanā niṭṭhitā.
༧-༨. སིཀྑམཱནནཝུཊྛཱཔནཔཋམདུཏིཡསིཀྑཱཔདཝཎྞནཱ
7-8. Sikkhamānanavuṭṭhāpanapaṭhamadutiyasikkhāpadavaṇṇanā
སཏྟམེ སཱ པཙྪཱཏི སིཀྑམཱནཱཡ ཨུཔསམྤདཱཡ ཡཱཙིཡམཱནཱཡ སཱ བྷིཀྑུནཱི ཨེཝཾ ཝཏྭཱ ལདྡྷེ ཙཱིཝརེ པཙྪཱ ཨསཏི ཨནྟརཱཡེ ‘‘ནེཝ ཝུཊྛཱཔེསྶཱམི , ན ཝུཊྛཱཔནཱཡ ཨུསྶུཀྐཾ ཀརིསྶཱམཱི’’ཏི དྷུརཾ ནིཀྑིཔེཡྻ, ཏསྶཱ སཧ དྷུརནིཀྑེཔེན པཱཙིཏྟིཡནྟི། ཨཊྛམེཔི ཨེསེཝ ནཡོ།
Sattame sā pacchāti sikkhamānāya upasampadāya yāciyamānāya sā bhikkhunī evaṃ vatvā laddhe cīvare pacchā asati antarāye ‘‘neva vuṭṭhāpessāmi , na vuṭṭhāpanāya ussukkaṃ karissāmī’’ti dhuraṃ nikkhipeyya, tassā saha dhuranikkhepena pācittiyanti. Aṭṭhamepi eseva nayo.
ཨུབྷཡམྤི སཱཝཏྠིཡཾ ཐུལླནནྡཾ ཨཱརབྦྷ ཨེཏེསུ ཝཏྠཱུསུ པཉྙཏྟཾ, དྭཱིསུཔི སཏི ཨནྟརཱཡེ, པརིཡེསིཏྭཱ ཨལབྷནྟིཡཱ, གིལཱནཱཡ, ཨཱཔདཱསུ, ཨུམྨཏྟིཀཱདཱིནཉྩ ཨནཱཔཏྟི། ཨུབྷཡཏྠ ‘‘ཨེཝཱཧཾ ཏཾ ཝུཊྛཱཔེསྶཱམཱི’’ཏི པཊིཉྙཱ, ཨཱཀངྑིཏནིཔྥཏྟི, པཙྪཱ དྷུརནིཀྑེཔོ, ཨནུཉྙཱཏཀཱརཎཱབྷཱཝོཏི ཨིམཱནེཏྠ ཙཏྟཱརི ཨངྒཱནི། སམུཊྛཱནཱདཱིནི སམནུབྷཱསནསདིསཱནཱིཏི།
Ubhayampi sāvatthiyaṃ thullanandaṃ ārabbha etesu vatthūsu paññattaṃ, dvīsupi sati antarāye, pariyesitvā alabhantiyā, gilānāya, āpadāsu, ummattikādīnañca anāpatti. Ubhayattha ‘‘evāhaṃ taṃ vuṭṭhāpessāmī’’ti paṭiññā, ākaṅkhitanipphatti, pacchā dhuranikkhepo, anuññātakāraṇābhāvoti imānettha cattāri aṅgāni. Samuṭṭhānādīni samanubhāsanasadisānīti.
སིཀྑམཱནནཝུཊྛཱཔནཔཋམདུཏིཡསིཀྑཱཔདཝཎྞནཱ ནིཊྛིཏཱ།
Sikkhamānanavuṭṭhāpanapaṭhamadutiyasikkhāpadavaṇṇanā niṭṭhitā.
༩. སོཀཱཝཱསསིཀྑཱཔདཝཎྞནཱ
9. Sokāvāsasikkhāpadavaṇṇanā
ནཝམེ སོཀཱཝཱསནྟི སངྐེཏཾ ཀཏྭཱ ཨཱགཙྪམཱནཱ པུརིསཱནཾ ཨནྟོསོཀཾ པཝེསེཏཱིཏི སོཀཱཝཱསཱ, ཏཾ སོཀཱཝཱསཾ། ཨཐ ཝཱ གྷརཾ ཝིཡ གྷརསཱམིཀཱ ཨཡམྤི པུརིསསམཱགམཾ ཨལབྷམཱནཱ སོཀཾ ཨཱཝིསཏི, ཨིཏི ཡཾ ཨཱཝིསཏི, སྭཱསྶཱ ཨཱཝཱསོ ཧོཏཱིཏི སོཀཱཝཱསཱ། ཏེནེཝསྶ པདབྷཱཛནེ (པཱཙི॰ ༡༡༦༠) ‘‘སོཀཱཝཱསཱ ནཱམ པརེསཾ དུཀྑཾ ཨུཔྤཱདེཏི, སོཀཾ ཨཱཝིསཏཱི’’ཏི དྭིདྷཱ ཨཏྠོ ཝུཏྟོ། པཱཙིཏྟིཡནྟི ཨེཝརཱུཔཾ ཝུཊྛཱཔེནྟིཡཱ ཝུཏྟནཡེནེཝ ཀམྨཝཱཙཱཔརིཡོསཱནེ ཨུཔཛ྄ཛྷཱཡཱཡ པཱཙིཏྟིཡཾ།
Navame sokāvāsanti saṅketaṃ katvā āgacchamānā purisānaṃ antosokaṃ pavesetīti sokāvāsā, taṃ sokāvāsaṃ. Atha vā gharaṃ viya gharasāmikā ayampi purisasamāgamaṃ alabhamānā sokaṃ āvisati, iti yaṃ āvisati, svāssā āvāso hotīti sokāvāsā. Tenevassa padabhājane (pāci. 1160) ‘‘sokāvāsā nāma paresaṃ dukkhaṃ uppādeti, sokaṃ āvisatī’’ti dvidhā attho vutto. Pācittiyanti evarūpaṃ vuṭṭhāpentiyā vuttanayeneva kammavācāpariyosāne upajjhāyāya pācittiyaṃ.
སཱཝཏྠིཡཾ ཐུལླནནྡཾ ཨཱརབྦྷ ཨེཝརཱུཔཾ སིཀྑམཱནཾ ཝུཊྛཱཔནཝཏྠུསྨིཾ པཉྙཏྟཾ། ཨཛཱནནྟིཡཱ , ཨུམྨཏྟིཀཱདཱིནཉྩ ཨནཱཔཏྟི། སོཀཱཝཱསཏཱ, ཛཱནནཾ, ཝུཊྛཱཔནནྟི ཨིམཱནེཏྠ ཏཱིཎི ཨངྒཱནི། སམུཊྛཱནཱདཱིནི གབྦྷིནིཝུཊྛཱཔནསདིསཱནེཝཱཏི།
Sāvatthiyaṃ thullanandaṃ ārabbha evarūpaṃ sikkhamānaṃ vuṭṭhāpanavatthusmiṃ paññattaṃ. Ajānantiyā , ummattikādīnañca anāpatti. Sokāvāsatā, jānanaṃ, vuṭṭhāpananti imānettha tīṇi aṅgāni. Samuṭṭhānādīni gabbhinivuṭṭhāpanasadisānevāti.
སོཀཱཝཱསསིཀྑཱཔདཝཎྞནཱ ནིཊྛིཏཱ།
Sokāvāsasikkhāpadavaṇṇanā niṭṭhitā.
༡༠. ཨནནུཉྙཱཏསིཀྑཱཔདཝཎྞནཱ
10. Ananuññātasikkhāpadavaṇṇanā
དསམེ མཱཏཱཔིཏཱུཧཱིཏི ཝིཛཱཏམཱཏརཱ ཙ ཛནཀཔིཏརཱ ཙ། སཱམིཀེནཱཏི ཡེན པརིགྒཧིཏཱ, ཏེན། ཨནནུཉྙཱཏནྟི ཨུཔསམྤདཏྠཱཡ ཨནནུཉྙཱཏཾ། དྭིཀྑཏྟུཉྷི བྷིཀྑུནཱིཧི ཨཱཔུཙྪིཏབྦཾ, པབྦཛྫཱཀཱལེ ཙ ཨུཔསམྤདཱཀཱལེ ཙ, བྷིཀྑཱུནཾ པན སཀིཾ ཨཱཔུཙྪིཏེཔི ཝཊྚཏི ། ཏསྨཱ ཡཱ ཨུཔསམྤདཱཀཱལེ ཨནཱཔུཙྪཱ ཨུཔསམྤཱདེཏི, ཏསྶཱ ཝུཏྟནཡེནེཝ པཱཙིཏྟིཡཾ།
Dasame mātāpitūhīti vijātamātarā ca janakapitarā ca. Sāmikenāti yena pariggahitā, tena. Ananuññātanti upasampadatthāya ananuññātaṃ. Dvikkhattuñhi bhikkhunīhi āpucchitabbaṃ, pabbajjākāle ca upasampadākāle ca, bhikkhūnaṃ pana sakiṃ āpucchitepi vaṭṭati . Tasmā yā upasampadākāle anāpucchā upasampādeti, tassā vuttanayeneva pācittiyaṃ.
སཱཝཏྠིཡཾ ཐུལླནནྡཾ ཨཱརབྦྷ ཨནནུཉྙཱཏཝུཊྛཱཔནཝཏྠུསྨིཾ པཉྙཏྟཾ། ཨཔལོཀེཏྭཱ ཝུཊྛཱཔེནྟིཡཱ, ཏེསཾ ཨཏྠིབྷཱཝཾ ཨཛཱནནྟིཡཱ, ཨུམྨཏྟིཀཱདཱིནཉྩ ཨནཱཔཏྟི། ཨནཔལོཀནཾ, ཨཏྠིབྷཱཝཛཱནནཾ, ཝུཊྛཱཔནནྟི ཨིམཱནེཏྠ ཏཱིཎི ཨངྒཱནི། ཨནནུཉྙཱཏསམུཊྛཱནཾ, ཀིརིཡཱཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི།
Sāvatthiyaṃ thullanandaṃ ārabbha ananuññātavuṭṭhāpanavatthusmiṃ paññattaṃ. Apaloketvā vuṭṭhāpentiyā, tesaṃ atthibhāvaṃ ajānantiyā, ummattikādīnañca anāpatti. Anapalokanaṃ, atthibhāvajānanaṃ, vuṭṭhāpananti imānettha tīṇi aṅgāni. Ananuññātasamuṭṭhānaṃ, kiriyākiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ཨནནུཉྙཱཏསིཀྑཱཔདཝཎྞནཱ ནིཊྛིཏཱ།
Ananuññātasikkhāpadavaṇṇanā niṭṭhitā.
༡༡. པཱརིཝཱསིཀསིཀྑཱཔདཝཎྞནཱ
11. Pārivāsikasikkhāpadavaṇṇanā
ཨེཀཱདསམེ པཱརིཝཱསིཀཚནྡདཱནེནཱཏི པཱརིཝཱསིཡེན ཚནྡདཱནེན། ཏཏྠ ཙཏུབྦིདྷཾ པཱརིཝཱསིཡཾ པརིསཔཱརིཝཱསིཡཾ རཏྟིཔཱརིཝཱསིཡཾ ཚནྡཔཱརིཝཱསིཡཾ ཨཛ྄ཛྷཱསཡཔཱརིཝཱསིཡནྟི།
Ekādasame pārivāsikachandadānenāti pārivāsiyena chandadānena. Tattha catubbidhaṃ pārivāsiyaṃ parisapārivāsiyaṃ rattipārivāsiyaṃ chandapārivāsiyaṃ ajjhāsayapārivāsiyanti.
ཏཏྠ པརིསཔཱརིཝཱསིཡཾ ནཱམ བྷིཀྑཱུ ཀེནཙིདེཝ ཀརཎཱིཡེན སནྣིཔཏིཏཱ ཧོནྟི, ཨཐ མེགྷོ ཝཱ ཨུཊྛཧཏི, ཨུསྶཱརཎཱ ཝཱ ཀརཱིཡཏི, མནུསྶཱ ཝཱ ཨཛ྄ཛྷོཏྠརནྟཱ ཨཱགཙྪནྟི, བྷིཀྑཱུ ‘‘ཨནོཀཱསཱ མཡཾ, ཨཉྙཏྲ གཙྪཱམཱ’’ཏི ཚནྡཾ ཨཝིསྶཛྫིཏྭཱཝ ཨུཊྛཧནྟི, ཨིདཾ པརིསཔཱརིཝཱསིཡཾ ནཱམ, ཀིཉྩཱཔི པརིསཔཱརིཝཱསིཡཾ, ཚནྡསྶ པན ཨཝིསྶཊྛཏྟཱ ཀམྨཾ ཀཱཏུཾ ཝཊྚཏི།
Tattha parisapārivāsiyaṃ nāma bhikkhū kenacideva karaṇīyena sannipatitā honti, atha megho vā uṭṭhahati, ussāraṇā vā karīyati, manussā vā ajjhottharantā āgacchanti, bhikkhū ‘‘anokāsā mayaṃ, aññatra gacchāmā’’ti chandaṃ avissajjitvāva uṭṭhahanti, idaṃ parisapārivāsiyaṃ nāma, kiñcāpi parisapārivāsiyaṃ, chandassa pana avissaṭṭhattā kammaṃ kātuṃ vaṭṭati.
པུན བྷིཀྑཱུ ‘‘ཨུཔོསཐཱདཱིནི ཀརིསྶཱམཱ’’ཏི རཏྟིཾ སནྣིཔཏིཏྭཱ ‘‘ཡཱཝ སབྦེ སནྣིཔཏནྟི, ཏཱཝ དྷམྨཾ སུཎིསྶཱམཱ’’ཏི ཨེཀཾ ཨཛ྄ཛྷེསནྟི, ཏསྨིཾ དྷམྨཀཐཾ ཀཐེནྟེཡེཝ ཨརུཎོ ཨུགྒཙྪཏི། སཙེ ‘‘ཙཱཏུདྡསིཀཾ ཨུཔོསཐཾ ཀརིསྶཱམཱ’’ཏི ནིསིནྣཱ, ‘‘པནྣརསོ’’ཏི ཀཱཏུཾ ཝཊྚཏི། སཙེ པནྣརསིཀཾ ཀཱཏུཾ ནིསིནྣཱ, པཱཊིཔདེ ཨནུཔོསཐེ ཨུཔོསཐཾ ཀཱཏུཾ ན ཝཊྚཏི། ཨཉྙཾ པན སངྒྷཀིཙྩཾ ཀཱཏུཾ ཝཊྚཏི, ཨིདཾ རཏྟིཔཱརིཝཱསིཡཾ ནཱམ།
Puna bhikkhū ‘‘uposathādīni karissāmā’’ti rattiṃ sannipatitvā ‘‘yāva sabbe sannipatanti, tāva dhammaṃ suṇissāmā’’ti ekaṃ ajjhesanti, tasmiṃ dhammakathaṃ kathenteyeva aruṇo uggacchati. Sace ‘‘cātuddasikaṃ uposathaṃ karissāmā’’ti nisinnā, ‘‘pannaraso’’ti kātuṃ vaṭṭati. Sace pannarasikaṃ kātuṃ nisinnā, pāṭipade anuposathe uposathaṃ kātuṃ na vaṭṭati. Aññaṃ pana saṅghakiccaṃ kātuṃ vaṭṭati, idaṃ rattipārivāsiyaṃ nāma.
པུན བྷིཀྑཱུ ‘‘ཀིཉྩིདེཝ ཨབྦྷཱནཱདིསངྒྷཀམྨཾ ཀརིསྶཱམཱ’’ཏི སནྣིསིནྣཱ ཧོནྟི, ཏཏྲེཀོ ནཀྑཏྟཔཱཋཀོ བྷིཀྑུ ཨེཝཾ ཝདཏི ‘‘ཨཛྫ ནཀྑཏྟཾ དཱརུཎཾ, མཱ ཨིདཾ ཀམྨཾ ཀརོཐཱ’’ཏི། ཏེ ཏསྶ ཝཙནེན ཚནྡཾ ཝིསྶཛྫེཏྭཱ ཏཏྠེཝ ནིསིནྣཱ ཧོནྟི, ཨཐཉྙོ ཨཱགནྟྭཱ ‘‘ནཀྑཏྟཾ པཏིམཱནེནྟཾ, ཨཏྠོ བཱལཾ ཨུཔཛ྄ཛྷགཱ (ཛཱ॰ ༡.༡.༤༩), ཀིཾ ནཀྑཏྟེན ཀརོཐཱ’’ཏི ཝདཏི, ཨིདཾ ཚནྡཔཱརིཝཱསིཡཉྩེཝ ཨཛ྄ཛྷཱསཡཔཱརིཝཱསིཡཉྩ། ཨེཏསྨིཾ པཱརིཝཱསིཡེ པུན ཚནྡཔཱརིསུདྡྷིཾ ཨནཱཧརིཏྭཱ ཀམྨཾ ཀཱཏུཾ ན ཝཊྚཏི, ཨིདཾ སནྡྷཱཡ ཝུཏྟཾ ‘‘པཱརིཝཱསིཀཚནྡདཱནེནཱ’’ཏི། པཱཙིཏྟིཡནྟི ཨེཝཾ ཝུཊྛཱཔེནྟིཡཱ ཝུཏྟནཡེནེཝ ཀམྨཝཱཙཱཔརིཡོསཱནེ པཱཙིཏྟིཡཾ།
Puna bhikkhū ‘‘kiñcideva abbhānādisaṅghakammaṃ karissāmā’’ti sannisinnā honti, tatreko nakkhattapāṭhako bhikkhu evaṃ vadati ‘‘ajja nakkhattaṃ dāruṇaṃ, mā idaṃ kammaṃ karothā’’ti. Te tassa vacanena chandaṃ vissajjetvā tattheva nisinnā honti, athañño āgantvā ‘‘nakkhattaṃ patimānentaṃ, attho bālaṃ upajjhagā (jā. 1.1.49), kiṃ nakkhattena karothā’’ti vadati, idaṃ chandapārivāsiyañceva ajjhāsayapārivāsiyañca. Etasmiṃ pārivāsiye puna chandapārisuddhiṃ anāharitvā kammaṃ kātuṃ na vaṭṭati, idaṃ sandhāya vuttaṃ ‘‘pārivāsikachandadānenā’’ti. Pācittiyanti evaṃ vuṭṭhāpentiyā vuttanayeneva kammavācāpariyosāne pācittiyaṃ.
རཱཛགཧེ ཐུལླནནྡཾ ཨཱརབྦྷ ཨེཝཾ ཝུཊྛཱཔནཝཏྠུསྨིཾ པཉྙཏྟཾ། ཚནྡཾ ཨཝིསྶཛྫེཏྭཱཝ ཨཝུཊྛིཏཱཡ པརིསཱཡ ཝུཊྛཱཔེནྟིཡཱ, ཨུམྨཏྟིཀཱདཱིནཉྩ ཨནཱཔཏྟི། པཱརིཝཱསིཀཚནྡདཱནཏཱ, ཝུཊྛཱཔནནྟི ཨིམཱནེཏྠ དྭེ ཨངྒཱནི། སམུཊྛཱནཱདཱིནི གམྦྷིནིསིཀྑཱཔདསདིསཱནེཝཱཏི།
Rājagahe thullanandaṃ ārabbha evaṃ vuṭṭhāpanavatthusmiṃ paññattaṃ. Chandaṃ avissajjetvāva avuṭṭhitāya parisāya vuṭṭhāpentiyā, ummattikādīnañca anāpatti. Pārivāsikachandadānatā, vuṭṭhāpananti imānettha dve aṅgāni. Samuṭṭhānādīni gambhinisikkhāpadasadisānevāti.
པཱརིཝཱསིཀསིཀྑཱཔདཝཎྞནཱ ནིཊྛིཏཱ།
Pārivāsikasikkhāpadavaṇṇanā niṭṭhitā.
༡༢. ཨནུཝསྶསིཀྑཱཔདཝཎྞནཱ
12. Anuvassasikkhāpadavaṇṇanā
དྭཱདསམེ ཨནུཝསྶནྟི ཨནུསཾཝཙྪརཾ། ཨེཝཾ ཝུཊྛཱཔེནྟིཡཱཔི ཝུཏྟནཡེནེཝ པཱཙིཏྟིཡཾ།
Dvādasame anuvassanti anusaṃvaccharaṃ. Evaṃ vuṭṭhāpentiyāpi vuttanayeneva pācittiyaṃ.
སཱཝཏྠིཡཾ སམྦཧུལཱ བྷིཀྑུནིཡོ ཨཱརབྦྷ ཨནུཝསྶཾ ཝུཊྛཱཔནཝཏྠུསྨིཾ པཉྙཏྟཾ། ཨེཀནྟརིཀཾ ཝུཊྛཱཔེནྟིཡཱ, ཨུམྨཏྟིཀཱདཱིནཉྩ ཨནཱཔཏྟི། ཨནུཝསྶཏཱ, ཝུཊྛཱཔནནྟི ཨིམཱནེཏྠ དྭེ ཨངྒཱནི། སམུཊྛཱནཱདཱིནི ཨེཀཱདསམེ ཝུཏྟནཡཱནེཝཱཏི།
Sāvatthiyaṃ sambahulā bhikkhuniyo ārabbha anuvassaṃ vuṭṭhāpanavatthusmiṃ paññattaṃ. Ekantarikaṃ vuṭṭhāpentiyā, ummattikādīnañca anāpatti. Anuvassatā, vuṭṭhāpananti imānettha dve aṅgāni. Samuṭṭhānādīni ekādasame vuttanayānevāti.
ཨནུཝསྶསིཀྑཱཔདཝཎྞནཱ ནིཊྛིཏཱ།
Anuvassasikkhāpadavaṇṇanā niṭṭhitā.
༡༣. ཨེཀཝསྶསིཀྑཱཔདཝཎྞནཱ
13. Ekavassasikkhāpadavaṇṇanā
ཏེརསམེ ཨེཀནྟརིཀཾ ཨེཀཾ ཝུཊྛཱཔེནྟིཡཱ, ཨུམྨཏྟིཀཱདཱིནཉྩ ཨནཱཔཏྟི། སེསཾ དྭཱདསམེན སདིསམེཝཱཏི།
Terasame ekantarikaṃ ekaṃ vuṭṭhāpentiyā, ummattikādīnañca anāpatti. Sesaṃ dvādasamena sadisamevāti.
ཨེཀཝསྶསིཀྑཱཔདཝཎྞནཱ ནིཊྛིཏཱ།
Ekavassasikkhāpadavaṇṇanā niṭṭhitā.
ཀུམཱརིབྷཱུཏཝགྒོ ཨཊྛམོ།
Kumāribhūtavaggo aṭṭhamo.
