| Library / Tipiṭaka / तिपिटक • Tipiṭaka / जातकपाळि • Jātakapāḷi |
४०८. कुम्भकारजातकं (७-२-३)
408. Kumbhakārajātakaṃ (7-2-3)
९०.
90.
अम्बाहमद्दं वनमन्तरस्मिं, नीलोभासं फलितं 1 संविरूळ्हं।
Ambāhamaddaṃ vanamantarasmiṃ, nīlobhāsaṃ phalitaṃ 2 saṃvirūḷhaṃ;
तमद्दसं फलहेतु विभग्गं, तं दिस्वा भिक्खाचरियं चरामि॥
Tamaddasaṃ phalahetu vibhaggaṃ, taṃ disvā bhikkhācariyaṃ carāmi.
९१.
91.
सेलं सुमट्ठं नरवीरनिट्ठितं 3, नारी युगं धारयि अप्पसद्दं।
Selaṃ sumaṭṭhaṃ naravīraniṭṭhitaṃ 4, nārī yugaṃ dhārayi appasaddaṃ;
दुतियञ्च आगम्म अहोसि सद्दो, तं दिस्वा भिक्खाचरियं चरामि॥
Dutiyañca āgamma ahosi saddo, taṃ disvā bhikkhācariyaṃ carāmi.
९२.
92.
दिजा दिजं कुणपमाहरन्तं, एकं समानं बहुका समेच्च।
Dijā dijaṃ kuṇapamāharantaṃ, ekaṃ samānaṃ bahukā samecca;
आहारहेतू परिपातयिंसु, तं दिस्वा भिक्खाचरियं चरामि॥
Āhārahetū paripātayiṃsu, taṃ disvā bhikkhācariyaṃ carāmi.
९३.
93.
उसभाहमद्दं यूथस्स मज्झे, चलक्ककुं वण्णबलूपपन्नं।
Usabhāhamaddaṃ yūthassa majjhe, calakkakuṃ vaṇṇabalūpapannaṃ;
तमद्दसं कामहेतु वितुन्नं, तं दिस्वा भिक्खाचरियं चरामि॥
Tamaddasaṃ kāmahetu vitunnaṃ, taṃ disvā bhikkhācariyaṃ carāmi.
९४.
94.
निमिराजा विदेहानं, पञ्चालानञ्च दुम्मुखो।
Nimirājā videhānaṃ, pañcālānañca dummukho;
एते रट्ठानि हित्वान, पब्बजिंसु अकिञ्चना॥
Ete raṭṭhāni hitvāna, pabbajiṃsu akiñcanā.
९५.
95.
सब्बेपिमे देवसमा समागता, अग्गी यथा पज्जलितो तथेविमे।
Sabbepime devasamā samāgatā, aggī yathā pajjalito tathevime;
अहम्पि एको चरिस्सामि भग्गवि, हित्वान कामानि यथोधिकानि॥
Ahampi eko carissāmi bhaggavi, hitvāna kāmāni yathodhikāni.
९६.
96.
अयमेव कालो न हि अञ्ञो अत्थि, अनुसासिता मे न भवेय्य पच्छा।
Ayameva kālo na hi añño atthi, anusāsitā me na bhaveyya pacchā;
अहम्पि एका चरिस्सामि भग्गव, सकुणीव मुत्ता पुरिसस्स हत्था॥
Ahampi ekā carissāmi bhaggava, sakuṇīva muttā purisassa hatthā.
९७.
97.
आमं पक्कञ्च जानन्ति, अथो लोणं अलोणकं।
Āmaṃ pakkañca jānanti, atho loṇaṃ aloṇakaṃ;
तमहं दिस्वान पब्बजिं, चरेव त्वं चरामहन्ति॥
Tamahaṃ disvāna pabbajiṃ, careva tvaṃ carāmahanti.
कुम्भकारजातकं ततियं।
Kumbhakārajātakaṃ tatiyaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [४०८] ३. कुम्भकारजातकवण्णना • [408] 3. Kumbhakārajātakavaṇṇanā
