| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
6. கும்மங்க³பஞ்ஹோ
6. Kummaṅgapañho
6. ‘‘ப⁴ந்தே நாக³ஸேன, ‘கும்மஸ்ஸ பஞ்ச அங்கா³னி க³ஹேதப்³பா³னீ’தி யங் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, கும்மோ உத³கசரோ உத³கேயேவ வாஸங் கப்பேதி, ஏவமேவ கோ², மஹாராஜ, யோகி³னா யோகா³வசரேன ஸப்³ப³பாணபூ⁴தபுக்³க³லானங் ஹிதானுகம்பினா மெத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ஸப்³பா³வந்தங் லோகங் ப²ரித்வா விஹரிதப்³ப³ங். இத³ங், மஹாராஜ, கும்மஸ்ஸ பட²மங் அங்க³ங் க³ஹேதப்³ப³ங்.
6. ‘‘Bhante nāgasena, ‘kummassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, kummo udakacaro udakeyeva vāsaṃ kappeti, evameva kho, mahārāja, yoginā yogāvacarena sabbapāṇabhūtapuggalānaṃ hitānukampinā mettāsahagatena cetasā vipulena mahaggatena appamāṇena averena abyāpajjena sabbāvantaṃ lokaṃ pharitvā viharitabbaṃ. Idaṃ, mahārāja, kummassa paṭhamaṃ aṅgaṃ gahetabbaṃ.
‘‘புன சபரங், மஹாராஜ, கும்மோ உத³கே உப்பிலவந்தோ ஸீஸங் உக்கி²பித்வா யதி³ கோசி பஸ்ஸதி, தத்தே²வ நிமுஜ்ஜதி கா³ள்ஹமோகா³ஹதி ‘மா மங் தே புன பஸ்ஸெய்யு’ந்தி, ஏவமேவ கோ², மஹாராஜ, யோகி³னா யோகா³வசரேன கிலேஸேஸு ஓபதந்தேஸு ஆரம்மணஸரே நிமுஜ்ஜிதப்³ப³ங் கா³ள்ஹமோகா³ஹிதப்³ப³ங் ‘மா மங் கிலேஸா புன பஸ்ஸெய்யு’ந்தி. இத³ங், மஹாராஜ, கும்மஸ்ஸ து³தியங் அங்க³ங் க³ஹேதப்³ப³ங்.
‘‘Puna caparaṃ, mahārāja, kummo udake uppilavanto sīsaṃ ukkhipitvā yadi koci passati, tattheva nimujjati gāḷhamogāhati ‘mā maṃ te puna passeyyu’nti, evameva kho, mahārāja, yoginā yogāvacarena kilesesu opatantesu ārammaṇasare nimujjitabbaṃ gāḷhamogāhitabbaṃ ‘mā maṃ kilesā puna passeyyu’nti. Idaṃ, mahārāja, kummassa dutiyaṃ aṅgaṃ gahetabbaṃ.
‘‘புன சபரங் , மஹாராஜ, கும்மோ உத³கதோ நிக்க²மித்வா காயங் ஓதாபேதி, ஏவமேவ கோ², மஹாராஜ, யோகி³னா யோகா³வசரேன நிஸஜ்ஜட்டா²னஸயனசங்கமதோ மானஸங் நீஹரித்வா ஸம்மப்பதா⁴னே மானஸங் ஓதாபேதப்³ப³ங். இத³ங், மஹாராஜ, கும்மஸ்ஸ ததியங் அங்க³ங் க³ஹேதப்³ப³ங்.
‘‘Puna caparaṃ , mahārāja, kummo udakato nikkhamitvā kāyaṃ otāpeti, evameva kho, mahārāja, yoginā yogāvacarena nisajjaṭṭhānasayanacaṅkamato mānasaṃ nīharitvā sammappadhāne mānasaṃ otāpetabbaṃ. Idaṃ, mahārāja, kummassa tatiyaṃ aṅgaṃ gahetabbaṃ.
‘‘புன சபரங், மஹாராஜ, கும்மோ பத²விங் க²ணித்வா விவித்தே வாஸங் கப்பேதி, ஏவமேவ கோ², மஹாராஜ, யோகி³னா யோகா³வசரேன லாப⁴ஸக்காரஸிலோகங் பஜஹித்வா ஸுஞ்ஞங் விவித்தங் கானநங் வனபத்த²ங் பப்³ப³தங் கந்த³ரங் கி³ரிகு³ஹங் அப்பஸத்³த³ங் அப்பனிக்³கோ⁴ஸங் பவிவித்தமோகா³ஹித்வா விவித்தே யேவ வாஸங் உபக³ந்தப்³ப³ங். இத³ங், மஹாராஜ, கும்மஸ்ஸ சதுத்த²ங் அங்க³ங் க³ஹேதப்³ப³ங். பா⁴ஸிதம்பேதங், மஹாராஜ, தே²ரேன உபஸேனேன வங்க³ந்தபுத்தேன –
‘‘Puna caparaṃ, mahārāja, kummo pathaviṃ khaṇitvā vivitte vāsaṃ kappeti, evameva kho, mahārāja, yoginā yogāvacarena lābhasakkārasilokaṃ pajahitvā suññaṃ vivittaṃ kānanaṃ vanapatthaṃ pabbataṃ kandaraṃ giriguhaṃ appasaddaṃ appanigghosaṃ pavivittamogāhitvā vivitte yeva vāsaṃ upagantabbaṃ. Idaṃ, mahārāja, kummassa catutthaṃ aṅgaṃ gahetabbaṃ. Bhāsitampetaṃ, mahārāja, therena upasenena vaṅgantaputtena –
‘‘‘விவித்தங் அப்பனிக்³கோ⁴ஸங், வாளமிக³னிஸேவிதங்;
‘‘‘Vivittaṃ appanigghosaṃ, vāḷamiganisevitaṃ;
ஸேவே ஸேனாஸனங் பி⁴க்கு², படிஸல்லானகாரணா’தி.
Seve senāsanaṃ bhikkhu, paṭisallānakāraṇā’ti.
‘‘புன சபரங், மஹாராஜ, கும்மோ சாரிகங் சரமானோ யதி³ கஞ்சி பஸ்ஸதி வா, ஸத்³த³ங் ஸுணாதி வா, ஸொண்டி³பஞ்சமானி அங்கா³னி ஸகே கபாலே நித³ஹித்வா அப்பொஸ்ஸுக்கோ துண்ஹீபூ⁴தோ திட்ட²தி காயமனுரக்க²ந்தோ, ஏவமேவ கோ², மஹாராஜ, யோகி³னா யோகா³வசரேன ஸப்³ப³த்த² ரூபஸத்³த³க³ந்த⁴ரஸபொ²ட்ட²ப்³ப³த⁴ம்மேஸு ஆபதந்தேஸு ச²ஸு த்³வாரேஸு ஸங்வரகவாடங் அனுக்³கா⁴டெத்வா மானஸங் ஸமோத³ஹித்வா ஸங்வரங் கத்வா ஸதேன ஸம்பஜானேன விஹாதப்³ப³ங் ஸமணத⁴ம்மங் அனுரக்க²மானேன. இத³ங், மஹாராஜ, கும்மஸ்ஸ பஞ்சமங் அங்க³ங் க³ஹேதப்³ப³ங். பா⁴ஸிதம்பேதங், மஹாராஜ, ப⁴க³வதா தே³வாதிதே³வேன ஸங்யுத்தனிகாயவரே கும்மூபமஸுத்தந்தே –
‘‘Puna caparaṃ, mahārāja, kummo cārikaṃ caramāno yadi kañci passati vā, saddaṃ suṇāti vā, soṇḍipañcamāni aṅgāni sake kapāle nidahitvā appossukko tuṇhībhūto tiṭṭhati kāyamanurakkhanto, evameva kho, mahārāja, yoginā yogāvacarena sabbattha rūpasaddagandharasaphoṭṭhabbadhammesu āpatantesu chasu dvāresu saṃvarakavāṭaṃ anugghāṭetvā mānasaṃ samodahitvā saṃvaraṃ katvā satena sampajānena vihātabbaṃ samaṇadhammaṃ anurakkhamānena. Idaṃ, mahārāja, kummassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare kummūpamasuttante –
‘‘‘கும்மோவ அங்கா³னி ஸகே கபாலே, ஸமோத³ஹங் பி⁴க்கு² மனோவிதக்கே;
‘‘‘Kummova aṅgāni sake kapāle, samodahaṃ bhikkhu manovitakke;
அனிஸ்ஸிதோ அஞ்ஞமஹேட²யானோ, பரினிப்³பு³தோனூபவதெ³ய்ய கஞ்சீ’’’தி.
Anissito aññamaheṭhayāno, parinibbutonūpavadeyya kañcī’’’ti.
கும்மங்க³பஞ்ஹோ ச²ட்டோ².
Kummaṅgapañho chaṭṭho.
