| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၃-၄. ကုမ္မသုတ္တာဒိဝဏ္ဏနာ
3-4. Kummasuttādivaṇṇanā
၁၅၉-၁၆၀. တတိယေ မဟာကုမ္မကုလန္တိ မဟန္တံ အဋ္ဌိကစ္ဆပကုလံ။ အဂမာသီတိ ‘‘ဧတ္ထ အဒ္ဓာ ကိဉ္စိ ခာဒိတဗ္ဗံ အတ္ထိ, တံ မစ္ဆရာယန္တော မံ ဧသ နိဝာရေတီ’’တိ သညာယ အဂမာသိ။ ပပတာယာတိ ပပတာ ဝုစ္စတိ ဒီဃရဇ္ဇုကဗဒ္ဓော အယကန္တကောသကေ ဒဏ္ဍကံ ပဝေသေတ္ဝာ ဂဟိတော ကဏ္ဏိကသလ္လသဏ္ဌာနော, အယကဏ္ဋကော, ယသ္မိံ ဝေဂေန ပတိတ္ဝာ ကဋာဟေ လဂ္ဂမတ္တေ ဒဏ္ဍကော နိက္ခမတိ, ရဇ္ဇုကော ဧကာဗဒ္ဓော ဂစ္ဆတေဝ။ သော ကုမ္မောတိ သော ဝိဒ္ဓကုမ္မော။ ယေန သော ကုမ္မောတိ ဥဒကသဒ္ဒံ သုတ္ဝာ သာသင္ကဋ္ဌာနံ ဘဝိသ္သတီတိ နိဝတ္တိတ္ဝာ ယေန သော အတ္ထကာမော ကုမ္မော။ န ဒာနိ တ္ဝံ အမ္ဟာကန္တိ ဣဒာနိ တ္ဝံ အမိတ္တဟတ္ထံ ဂတော, န အမ္ဟာကံ သန္တကောတိ အတ္ထော။ ဧဝံ သလ္လပန္တာနံယေဝ စ နေသံ နာဝာယ ဌိတော လုဒ္ဒော ရဇ္ဇုကံ အာကဍ္ဎိတ္ဝာ ကုမ္မံ ဂဟေတ္ဝာ ယထာကာမံ အကာသိ။ သေသမေတ္ထ ဣတော အနန္တရသုတ္တေ စ ဥတ္တာနမေဝ။ တတိယစတုတ္ထာနိ။
159-160. Tatiye mahākummakulanti mahantaṃ aṭṭhikacchapakulaṃ. Agamāsīti ‘‘ettha addhā kiñci khāditabbaṃ atthi, taṃ maccharāyanto maṃ esa nivāretī’’ti saññāya agamāsi. Papatāyāti papatā vuccati dīgharajjukabaddho ayakantakosake daṇḍakaṃ pavesetvā gahito kaṇṇikasallasaṇṭhāno, ayakaṇṭako, yasmiṃ vegena patitvā kaṭāhe laggamatte daṇḍako nikkhamati, rajjuko ekābaddho gacchateva. So kummoti so viddhakummo. Yena so kummoti udakasaddaṃ sutvā sāsaṅkaṭṭhānaṃ bhavissatīti nivattitvā yena so atthakāmo kummo. Na dāni tvaṃ amhākanti idāni tvaṃ amittahatthaṃ gato, na amhākaṃ santakoti attho. Evaṃ sallapantānaṃyeva ca nesaṃ nāvāya ṭhito luddo rajjukaṃ ākaḍḍhitvā kummaṃ gahetvā yathākāmaṃ akāsi. Sesamettha ito anantarasutte ca uttānameva. Tatiyacatutthāni.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya
၃. ကုမ္မသုတ္တံ • 3. Kummasuttaṃ
၄. ဒီဃလောမိကသုတ္တံ • 4. Dīghalomikasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၃-၄. ကုမ္မသုတ္တာဒိဝဏ္ဏနာ • 3-4. Kummasuttādivaṇṇanā
