| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. கும்மஸுத்தங்
3. Kummasuttaṃ
159. ஸாவத்தி²யங் விஹரதி…பே॰… ‘‘தா³ருணோ , பி⁴க்க²வே, லாப⁴ஸக்காரஸிலோகோ…பே॰… அதி⁴க³மாய. பூ⁴தபுப்³ப³ங், பி⁴க்க²வே, அஞ்ஞதரஸ்மிங் உத³கரஹதே³ மஹாகும்மகுலங் சிரனிவாஸி அஹோஸி. அத² கோ², பி⁴க்க²வே, அஞ்ஞதரோ கும்மோ அஞ்ஞதரங் கும்மங் ஏதத³வோச – ‘மா கோ² த்வங், தாத கும்ம, ஏதங் பதே³ஸங் அக³மாஸீ’தி. அக³மாஸி கோ², பி⁴க்க²வே, ஸோ கும்மோ தங் பதே³ஸங். தமேனங் லுத்³தோ³ பபதாய விஜ்ஜி². அத² கோ², பி⁴க்க²வே, ஸோ கும்மோ யேன ஸோ கும்மோ தேனுபஸங்கமி. அத்³த³ஸா கோ², பி⁴க்க²வே, ஸோ கும்மோ தங் கும்மங் தூ³ரதோவ ஆக³ச்ச²ந்தங். தி³ஸ்வான தங் கும்மங் ஏதத³வோச – ‘கச்சி த்வங், தாத கும்ம, ந தங் பதே³ஸங் அக³மாஸீ’தி? ‘அக³மாஸிங் க்²வாஹங், தாத கும்ம, தங் பதே³ஸ’ந்தி. ‘கச்சி பனாஸி, தாத கும்ம, அக்க²தோ அனுபஹதோ’தி? ‘அக்க²தோ கொ²ம்ஹி, தாத கும்ம, அனுபஹதோ, அத்தி² ச மே இத³ங் ஸுத்தகங் பிட்டி²தோ பிட்டி²தோ அனுப³ந்த⁴’ந்தி. ‘தக்³க⁴ஸி, தாத கும்ம, க²தோ, தக்³க⁴ உபஹதோ. ஏதேன ஹி தே, தாத கும்ம, ஸுத்தகேன பிதரோ ச பிதாமஹா ச அனயங் ஆபன்னா ப்³யஸனங் ஆபன்னா. க³ச்ச² தா³னி த்வங், தாத கும்ம, ந தா³னி த்வங் அம்ஹாக’’’ந்தி.
159. Sāvatthiyaṃ viharati…pe… ‘‘dāruṇo , bhikkhave, lābhasakkārasiloko…pe… adhigamāya. Bhūtapubbaṃ, bhikkhave, aññatarasmiṃ udakarahade mahākummakulaṃ ciranivāsi ahosi. Atha kho, bhikkhave, aññataro kummo aññataraṃ kummaṃ etadavoca – ‘mā kho tvaṃ, tāta kumma, etaṃ padesaṃ agamāsī’ti. Agamāsi kho, bhikkhave, so kummo taṃ padesaṃ. Tamenaṃ luddo papatāya vijjhi. Atha kho, bhikkhave, so kummo yena so kummo tenupasaṅkami. Addasā kho, bhikkhave, so kummo taṃ kummaṃ dūratova āgacchantaṃ. Disvāna taṃ kummaṃ etadavoca – ‘kacci tvaṃ, tāta kumma, na taṃ padesaṃ agamāsī’ti? ‘Agamāsiṃ khvāhaṃ, tāta kumma, taṃ padesa’nti. ‘Kacci panāsi, tāta kumma, akkhato anupahato’ti? ‘Akkhato khomhi, tāta kumma, anupahato, atthi ca me idaṃ suttakaṃ piṭṭhito piṭṭhito anubandha’nti. ‘Tagghasi, tāta kumma, khato, taggha upahato. Etena hi te, tāta kumma, suttakena pitaro ca pitāmahā ca anayaṃ āpannā byasanaṃ āpannā. Gaccha dāni tvaṃ, tāta kumma, na dāni tvaṃ amhāka’’’nti.
‘‘லுத்³தோ³தி கோ², பி⁴க்க²வே, மாரஸ்ஸேதங் பாபிமதோ அதி⁴வசனங். பபதாதி கோ², பி⁴க்க²வே, லாப⁴ஸக்காரஸிலோகஸ்ஸேதங் அதி⁴வசனங். ஸுத்தகந்தி கோ², பி⁴க்க²வே, நந்தி³ராக³ஸ்ஸேதங் அதி⁴வசனங். யோ ஹி கோசி, பி⁴க்க²வே, பி⁴க்கு² உப்பன்னங் லாப⁴ஸக்காரஸிலோகங் அஸ்ஸாதே³தி நிகாமேதி – அயங் வுச்சதி, பி⁴க்க²வே, பி⁴க்கு² கி³த்³தோ⁴ பபதாய 1 அனயங் ஆபன்னோ ப்³யஸனங் ஆபன்னோ யதா²காமகரணீயோ பாபிமதோ. ஏவங் தா³ருணோ கோ², பி⁴க்க²வே, லாப⁴ஸக்காரஸிலோகோ…பே॰… ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. ததியங்.
‘‘Luddoti kho, bhikkhave, mārassetaṃ pāpimato adhivacanaṃ. Papatāti kho, bhikkhave, lābhasakkārasilokassetaṃ adhivacanaṃ. Suttakanti kho, bhikkhave, nandirāgassetaṃ adhivacanaṃ. Yo hi koci, bhikkhave, bhikkhu uppannaṃ lābhasakkārasilokaṃ assādeti nikāmeti – ayaṃ vuccati, bhikkhave, bhikkhu giddho papatāya 2 anayaṃ āpanno byasanaṃ āpanno yathākāmakaraṇīyo pāpimato. Evaṃ dāruṇo kho, bhikkhave, lābhasakkārasiloko…pe… evañhi vo, bhikkhave, sikkhitabba’’nti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3-4. கும்மஸுத்தாதி³வண்ணனா • 3-4. Kummasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3-4. கும்மஸுத்தாதி³வண்ணனா • 3-4. Kummasuttādivaṇṇanā
