| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๓. กุมฺมสุตฺตํ
3. Kummasuttaṃ
๑๕๙. สาวตฺถิยํ วิหรติ…เป.… ‘‘ทารุโณ , ภิกฺขเว, ลาภสกฺการสิโลโก…เป.… อธิคมายฯ ภูตปุพฺพํ, ภิกฺขเว, อญฺญตรสฺมิํ อุทกรหเท มหากุมฺมกุลํ จิรนิวาสิ อโหสิฯ อถ โข, ภิกฺขเว, อญฺญตโร กุโมฺม อญฺญตรํ กุมฺมํ เอตทโวจ – ‘มา โข ตฺวํ, ตาต กุมฺม, เอตํ ปเทสํ อคมาสี’ติฯ อคมาสิ โข, ภิกฺขเว, โส กุโมฺม ตํ ปเทสํฯ ตเมนํ ลุโทฺท ปปตาย วิชฺฌิฯ อถ โข, ภิกฺขเว, โส กุโมฺม เยน โส กุโมฺม เตนุปสงฺกมิฯ อทฺทสา โข, ภิกฺขเว, โส กุโมฺม ตํ กุมฺมํ ทูรโตว อาคจฺฉนฺตํฯ ทิสฺวาน ตํ กุมฺมํ เอตทโวจ – ‘กจฺจิ ตฺวํ, ตาต กุมฺม, น ตํ ปเทสํ อคมาสี’ติ? ‘อคมาสิํ ขฺวาหํ, ตาต กุมฺม, ตํ ปเทส’นฺติฯ ‘กจฺจิ ปนาสิ, ตาต กุมฺม, อกฺขโต อนุปหโต’ติ? ‘อกฺขโต โขมฺหิ, ตาต กุมฺม, อนุปหโต, อตฺถิ จ เม อิทํ สุตฺตกํ ปิฎฺฐิโต ปิฎฺฐิโต อนุพนฺธ’นฺติฯ ‘ตคฺฆสิ, ตาต กุมฺม, ขโต, ตคฺฆ อุปหโตฯ เอเตน หิ เต, ตาต กุมฺม, สุตฺตเกน ปิตโร จ ปิตามหา จ อนยํ อาปนฺนา พฺยสนํ อาปนฺนาฯ คจฺฉ ทานิ ตฺวํ, ตาต กุมฺม, น ทานิ ตฺวํ อมฺหาก’’’นฺติฯ
159. Sāvatthiyaṃ viharati…pe… ‘‘dāruṇo , bhikkhave, lābhasakkārasiloko…pe… adhigamāya. Bhūtapubbaṃ, bhikkhave, aññatarasmiṃ udakarahade mahākummakulaṃ ciranivāsi ahosi. Atha kho, bhikkhave, aññataro kummo aññataraṃ kummaṃ etadavoca – ‘mā kho tvaṃ, tāta kumma, etaṃ padesaṃ agamāsī’ti. Agamāsi kho, bhikkhave, so kummo taṃ padesaṃ. Tamenaṃ luddo papatāya vijjhi. Atha kho, bhikkhave, so kummo yena so kummo tenupasaṅkami. Addasā kho, bhikkhave, so kummo taṃ kummaṃ dūratova āgacchantaṃ. Disvāna taṃ kummaṃ etadavoca – ‘kacci tvaṃ, tāta kumma, na taṃ padesaṃ agamāsī’ti? ‘Agamāsiṃ khvāhaṃ, tāta kumma, taṃ padesa’nti. ‘Kacci panāsi, tāta kumma, akkhato anupahato’ti? ‘Akkhato khomhi, tāta kumma, anupahato, atthi ca me idaṃ suttakaṃ piṭṭhito piṭṭhito anubandha’nti. ‘Tagghasi, tāta kumma, khato, taggha upahato. Etena hi te, tāta kumma, suttakena pitaro ca pitāmahā ca anayaṃ āpannā byasanaṃ āpannā. Gaccha dāni tvaṃ, tāta kumma, na dāni tvaṃ amhāka’’’nti.
‘‘ลุโทฺทติ โข, ภิกฺขเว, มารเสฺสตํ ปาปิมโต อธิวจนํฯ ปปตาติ โข, ภิกฺขเว, ลาภสกฺการสิโลกเสฺสตํ อธิวจนํฯ สุตฺตกนฺติ โข, ภิกฺขเว, นนฺทิราคเสฺสตํ อธิวจนํฯ โย หิ โกจิ, ภิกฺขเว, ภิกฺขุ อุปฺปนฺนํ ลาภสกฺการสิโลกํ อสฺสาเทติ นิกาเมติ – อยํ วุจฺจติ, ภิกฺขเว, ภิกฺขุ คิโทฺธ ปปตาย 1 อนยํ อาปโนฺน พฺยสนํ อาปโนฺน ยถากามกรณีโย ปาปิมโตฯ เอวํ ทารุโณ โข, ภิกฺขเว, ลาภสกฺการสิโลโก…เป.… เอวญฺหิ โว, ภิกฺขเว, สิกฺขิตพฺพ’’นฺติฯ ตติยํฯ
‘‘Luddoti kho, bhikkhave, mārassetaṃ pāpimato adhivacanaṃ. Papatāti kho, bhikkhave, lābhasakkārasilokassetaṃ adhivacanaṃ. Suttakanti kho, bhikkhave, nandirāgassetaṃ adhivacanaṃ. Yo hi koci, bhikkhave, bhikkhu uppannaṃ lābhasakkārasilokaṃ assādeti nikāmeti – ayaṃ vuccati, bhikkhave, bhikkhu giddho papatāya 2 anayaṃ āpanno byasanaṃ āpanno yathākāmakaraṇīyo pāpimato. Evaṃ dāruṇo kho, bhikkhave, lābhasakkārasiloko…pe… evañhi vo, bhikkhave, sikkhitabba’’nti. Tatiyaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๓-๔. กุมฺมสุตฺตาทิวณฺณนา • 3-4. Kummasuttādivaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๓-๔. กุมฺมสุตฺตาทิวณฺณนา • 3-4. Kummasuttādivaṇṇanā
